الأربعاء، 18 فبراير 2009

انت فين يا زينة


انت فين يا زينة

بلغونى ان فية اجتماع لمجلس الادارة والمديرين الاكبار لمناقشة المبيعات وخطة العمل لسنة 2009 وحيحضرة رئيس مجلس الادارة بنفسة ..قولت مابدهاش بقى .. لازم الواحد يكون على سنجة عشرة ..حاكم الايام علمتنى ان المظهر اهم من المخبر .. واللى بتقولة حتى لو كان ريان يافجل ..حيلاقى صدى ويتسمع لو كنت لابس كويس ..لكن لوكنت عادى محدش حيديك ودنة حتى لو كنت بتتكلم فى الفيمتو ثانية..القصد ..استلفت من مراتى ربنا يخليهالى .. ماهى دايما تسلفنى وتفك زنقتى …اينعم بتقعد تعايرنى بعدها بس مش مهم … ماهى فلوسى برضة …يعنى هية بتشتغل ماهى قاعدة فى البيت!! نزلت اشتريت بدلة كحلى فخمة..وقميص لبنى .. وكرافتة محترمة هاند ميد ماركة فان هوزن تمنها لوحدة 100جنية… ولمعت الجزمة اصل الفلوس ماكفتش اشترى جزمة .. وحضرت اللبس و كويت القميص وعلقتة على الشماعة ..وخدت دش سخن وغسلت شعرى بالهيد اند شولدر وحلقت دقنى ..ودخلت انام بدرى علشان ابقى فايق فى الاجتماع واسيب علامة يمكن يزودوا المرتب علشان اسد ديونى لمراتى …المنبة ضرب قمت جرى صليت الصبح والسنة وقولت الاذكار ..ولبست .. وانا نازل على السلم دعيت رب اشرح لى صدرى ويسر لى امرى واحلل عقدة من لسانى ..حاكم مراتى دايما توصينى بالدعوة دى ..على فكرة عمرها ماخيبت ..نزلت السلم واحدة واحدة ..واخد بالى من نفسى قوى لاحسن البدلة تتكرمش ولا تتعفر بتراب السلم اللى بادفع فى تسييقة كل شهر عشرين جنية وعمرى ماشوفتة متسييق ….اتاكدت ان مفاتيح العربية والموبايل والرخص فى جيبى وتوكلت على الله …وانا نازل فى اخر السلم سمعت اتنين بيتكلموا وواحدمنهم بيكح كحة جامدة قوى… كحة من بتاعة البلغم دى ..شكلة بيشرب علبتين سجاير فى اليوم ….ويادوب انالسة طالع من باب العمارة والاقى الراحل اللى بيكح دة بيلف راسة ناحيتى وبكل عزمة وراح تافف البلغم اللى فى صدرة كلة …راح البلغم مغرق الكرافتة الهند ميد الفان هاوزن ام 100جنية اللى قعدت اربط فيها ربع ساعة …انا اتسمرت فى مكانى والراجل هوة كمان اتسمر ومافيش على لسانة الا ..لامؤخذة ياباشا ..لا مؤخذ ياباشا ..معرفش الهدوء اللى نزل علية دة جة منين ..فتحت باب العربيةواخدت المناديل وقعدت امسح الكرافنة … والراجل واقف ورايا وشغال ..لامؤخذة ياباشا ..لا مؤخذة ياباشا ..ركبت العربية ورحت الاجتماع …الكرافتة بعد مانشفت جيرت وبدل ماهى فان هوزن بقت عبدة النقاش هوزن …جة الدور علية علشان اتكلم قمت وشرحت خطتى للسنة الجاية …وكان اول طلب طلبتة أن احنا نعمل مناديل ورق هدية للعملاء نكتب عليها اسم منتجاتنا وياريت ماتكونش مناديل ورق عادية …ياريت تكون مناديل مبللة …اهى تنفع وقت التفة ..قصدى وقت الزنقة

الجمعة، 13 فبراير 2009

السيط ولا الغنى

السيط ولا الغنى

طلعت فى دماغى فكرة انى اعمل مشروع صغير جنب الشغل اهو يدخل قرشين يساعدوا فى العيشة ..حاكم شغلانة الدعاية دى ريش على مافيش .. القصد ... بعد تفكير قررت افتح محل ورقيات شغلانة سهلة والبضاعة ملهاش تاريخ صلاحية ومابتبظش وبعيد عن تفتيش مصلحة التموين وللى مايعرفش يعنى اية ورقيات ... اقولة دى حاجات للستات

الويز..سيندريلا .. بامبرز .. وممكن جنبها شوية كريمات على شامبوهات ...وكدة يعنى ..عملت اللى يرضى ربنا والمجتمع والناس ومحمد شومان ورحت مصلحة الضرايب علشان اطلع بطاقة ضريبية ...ماهى العملية دلوقت بقى فيها سجن ...المهم قدمت الورق للموظفة اللى هناك فقالت لى ورقك كدة كامل بس لازم تروح للست الوكيلة وبعدين تعدى على الست مديرة الكمبيوتر وفى الاخر تختم الورق من الست الريسة ...خدت الورق ورحت للست الوكيلة صبحت عليها ردت الصباح وقالت لى دقيقة واحدة ورجعالك ... وفتحت درج المكتب ...على فكرة اول مرة اشوف درج مكتب ست تكات ...القصد طلعت من الدرج اكرة .. بضم الالف وفتح الكاف ... اكرة باب ... ايوة والله ..اكرة باب.. ومشيت..وشوية ورجعت ..مضت لى على الورق وقالت لى روح بقى للست مديرة الكمبيوتر.. ... وانا داخل اودة الكمبيوتر لقيت واحدة ست خارجة وفى ايديها نفس الاكرة اللى كانت مع الست الوكيلة ... سألت الستات اللى قاعدين فى الاودة فين الست المديرة ..قالولى ماهى اللى لسة طالعة قدامك دى ..قولت طيب ووقفت استناها لما ترجع ..المهم الست المديرة رجعت ومضت لى على الورق وقالت لى روح بقى للست الريسة تختم لك الورق ..رحت للست الريسة ولسة بديها الورق جات ست شيك قوى.. الغريبة انها مش محجبة.. شعر وبرفنات وكعب عالى .. دماغ كدة يامعلم .. عرفت بعدين انها مش موظفة ...كانت سيدة اعمال بتخلص ورقها ...القصد لقيت الست دى بتدى الريسة نفس الاكرة ...الريسة سابتنى وخرجت ..وقفت وانا دماغى بتلف هوة فية اية بالظبط ؟ ..اية حكاية الاكرة دى ... ولية الستات بس اللى معاهم الاكرة دى؟ ...كان سؤال ساذج قوى ...ماهى المصلحة كلها ستات ..انا ماقابلتش راجل من ساعة ما جيت....الله ؟!... ماهى شركتنا برضة كلها ستات ...التلفزيون كلة ستات ..دا حتى الرجالةاللى بيقدموا فى الدشعلى دريم- يبدون-عاملين فيها ستات ..المنظمات لحقوق الستات .... حتى الوحدة الصحية لرعاية الامومة يعنى برضة ستات ...حتى اشرف عبد الباقى عامل راجل على ست ستات ...امال اية حكاية المجتمع الذكورى اللى فلقينا بيها دى ..فقت على صوت الست الريسة وهية بتقولى كدة خلاص بس ماتنساش تقدم الاقرار الضريبى قبل شهر تلاتة ..خدت الورق ونزلت على السلم ...شفت حاجة غريبة قوى ... طابور طويل تحت فى بير السلم ..والاغرب ان الطابور دة كلة رجالة !!!! بس كان شكلهم غريب قوى اللى موطى واللى ماسك جنبة واللى بيخبط الارض برجلية ..تحس كدة انهم تعبانين.. سألت اخرواحد فى الطابور ..هوة فية اية ؟ الطابور دا لية؟ رد وقالى ماهى الناس دى عايزة تخش الحمام فواقفين طابور ...سألتة لية هوة مافيش حمام فى المصلحة؟ قالى فية طبعا وحمام سيراميك الجوهرة من بتاع احمد عز كمان!! ....بس اللى ماتعرفوش ان الستات اللى فوق قافلينة وواخدين الاكرة ... الاكرة ..الاكرة ...ايوة... ايوة ... اة اخيرة عرفت الاكرة دى بتاعة اية....

قولت يانهار اسود حتى الحمام ...وبعدين انا زعلان لية اما انا عبيط بشكل ماهو مشروعى هوة كمان للستات

دا باين المجتمع الذكورى دة اسم بس .. السيط ولا الغنى يعنى لكن الحقيقة المرة اللى محدش عايز يعترف بيها

ان المجتمع دة اطاهر من زمااااااااااااااااااااااااااااااااااااااان

عادى

عادى

مراتى كانت سهرانة طول الليل بتعمل كيكة على فكرة جبت اللبن باربعة جنية ونص ....عادى ماكل حاجة بتغلى.. المهم مراتى قررت انها ماتقومش الصبح تحضر لى الفطار.. معذورة ...ماهى سهرانة طول الليل وانا كمان باقوم بدرى.. لقيتها سيبالى ورقة كاتبة فيها..ماتكلش كتير من الكيكة البنات بيحبوها ومتنساش القسط بتاع مصاريف المدرسة 4000 جنية هة ..ياولاد البوبى دا انا من ساعت مادخلت المدرسة لغاية مابقيت دكتور ماصرفتش الاربعتلاف دول ..عادى ركبت عربيتى قصدى عربية الشركة .. فجأة لقيت اتنين ناطين على العربية وهاتك يا مسح.. دفعت ..عادى

وصلت الشركة لقيت السكرتيرة بتدينى 62 طلب وظيفة وقالت عايزين واحد يشتغل مندوب اعمل الانترفيوهات دى واختار لنا واحد ...

مسكت السيفيهات وقولت فى نفسى يعنى لو كل واحد من دول خد ربع ساعة يبقى انا عايزخمستاشر ساعة ونص ربنا يقدرنا ..عادى..دخلت مكتبى ولعت النور والتكييف وقلعت الجاكت اصل اليوم دة كان حر قوى مع اننا فى الشتا ..طلبت من الفراش مج نسكافية الفراش قالى مافيش لبن .. قولت طاب ماتروح تشترى.. قال لى ياباشا الادارة قررت تقلل المصاريف انت ما تعرفش ان فية ازمة مالية عالمية ولا اية؟ قولت لة يعنى شوية اللبن دول هما اللى حيرجعوا المليارات اللى ضاعت..القصد هاتها بلاك اهو نصحصح .. قعدت ارتب فى الورق اللى قدامى لقيت السكرتيرة داخلة علية مزعورة ..يادكتور يادكتور افتح الشباكواقفل النور والتكييف .. احنا بنقلل فى المصاريف انت ماتعرفش ان فية ازمة مالية عالمية ولا اية؟وخرجت ... قولت فى نفسى عادى..الفراش دخل وجاب لى النسكافية فى كباية القهوة .. كنت حاقولة هوا انا مش قولت لك مج ... بس افتكرت ان فية ازمة مالية عالمية فسكت....

رنيت الجرس للسكرتيرة علشان تدخل لى اول واحد ...لقيتها بتفتح الباب وبتقولى ياريت بلاش الجرس .. قولتلها لية فى اية... قالت لى بيسحب كهربا ... قولتلها ايوة ايوة علشان الازمة .. ابتسمت لى وياريتها ماابتسمت ..قفلت الباب ومشيت ..

دخل اول واحد سلم عليا وقعد على الكرسى وحط رجل على رجل وفرد ضهرة ...قولت عادى أكيد زمايلة قالولوة اهم حاجة فى الاتنرفيو هية الثقة بالنفس ...عادى

سألتة : احكى لى عن نفسك

رد بزهق: يعني عايزنى اقول اية؟

رديت : انت مين .. شهاداتك اية..اشتغلت فين قبل كدة ... كدة يعنى

رد بزهق اكبر: طاب ماناكاتب الكلام دة كلة فى السى فى ... حنعيدة تانى

قولت :يعنى عايز اسمعك

رد بقرف وقالى ماشى وبدأيحكى حاجات غريبة .. سرحت وقعدت ابص علية ياة هية الازمة العالمية عملت فى الناس كدة.....

البدلة قصيرة والقميص مرفى والكرافتة غريبة لونها بيج لكن الربطة بنى لا دى مش بنى دى وساخة بصيت على الجزمة قصدى اللى كانت جزمة فى يوم من الايام ... وفجاة لقيتة بيسألنى ... عايز تسأل عن حاجة تانى...؟

انتبهت وقولت هة.. . اة... تفتكر حتاخد كام لو اشتغلت معانا؟

رد عليا بسرعة وحزم كأنة متوقع السؤال : انا مااقبلش اقل من 2000 جنية غير المصاريف... والعربية طبعا تمليك....

سرحت تانى .. طاب دا انا بعد عشرين سنة شغل مرتبى الفين جنية والعربية بتاعة الشركة ... الله دا المفروض الزيادة السنوية تكون نزلت ... طلعت من المكتب بسرعة وسألت السكرتيرة هية الزيادة السنادى كام ... بصت لى وعنيها بتقول انتوا مابتشبعوش...

وقالت خمسين جنية ورجعت تبص فى الملفات اللى قدامها ... قولت لها عادى ما فية ازمة مالية عالمية .... بصت لى وابتسمت وياريتها ما ابتسمت ..دخلت المكتب وقولت للولد طيب حنبقى نتصل بيك......

ابتسم وقال لى: أيوة أيوة... مانا فاهم يابية دى عاشر شركة اقدم فيها وبرضة قالولى حنتصل بيك ..بلد وسايط سلامو عليكو وهبد الباب ومشى....عادى... كنت حاغلط واضرب الجرس بس الحمد لله ربنا ستر طلعت علشان اندة اللى علية الدور ....

السكرتيرة قالت لى على فكرة يا دكتور .... ال ( التارجت) زاد 40% ... قولت لها عادى

بجد بجد ... اللى بيحصل دة عادى.... عادى.... يعنى ولا بالأجنحة

الأحد، 8 فبراير 2009

حنعيش يعنى حنعيش

بالذوق بالعافية حنعيش بفلوس من غير فلوس حنعيش حتى وسط الغباء حنعيش