الثلاثاء، 20 ديسمبر 2011

نشرتها فى يونيو ... واعيد نشرها فى يوليو ... ودى المرة التالته

ائتلاف شباب الثورة ....... نصيحة اخلع بذكاء


ائتلاف شباب الثورة يقاطع المؤتمر الذى دعا الية المجلس العسكرى مبررا المقاطعة بأن الدعوة للحوار جاءت متعجله ولاتلبى جوهر الرغبة فى الحوار ( حلوه متعجلة دى ... والاحلى جوهر الرغبة فى الحوار ).

من كام يوم ائتلاف شباب الثورة ينسحب من جلسات مؤتمر الحوار بتاع عبد العزيز حجازى .

من كام يوم كدة ... الاخوان المسلمين خلعوا من الائتلاف .

من كام يوم كدة جمعة الغضب 2.... مليونية ... مليارية ياسيدى ....... بس بدون تأييد شعبى مش عايز تصدق انت حر .

بقليل من التفكير المنهجى وربط المتغيرات المستقلة بالمتغيرات التابعة .... تعرف التطور الطبيعى للحاجة الساقعة حيبقى ايه .

أحنا عجزنا ... وهرمنا ... وخرفنا ... ومبقاش لينا اى تلاتين لازمة فى الدنيا ... والائتلاف هوه اللى عارف كل حاجة وفاهم كل حاجة واحسن من ابويا كمان ... بس خدها منى وارميها البحر ... اعملها بجميله واخلع ... ايوه اخلع ... واعتزل العمل السياسى ... وخليها تبان قال يعنى ان كان هدفك تمشى مبارك وتمنع التوريث وتأسس للديموقراطية ... وأهو حصل ....لان اللى بيتعمل اليومين دول بياخد من رصيدك عند الناس ... وقناة التحرير و25 يناير وريم ماجد مش حيقدروا يدافعوا عنك كتير ... ماهو برضه عض قلبى ولا تعض رغيفى ... واحبك اه ...اكتر من اعلاناتى لا ... اخلع بذكاء ماتخيبش خيبة مبارك اللى لو كان خلع فى الوقت الصح ... كان زمانه بطل وبيتشال على الاعناق ...

اه ولو ليك شوق تكمل ... حقك ... بس والنبى كمل شرعى بقى ... وسيبك من شغل الهتيقة وكدابين الزفة ده ... خلى بالك ... ستى اللى كنت مابسمعش كلامها برضة ... علشان كنت شايفها عجوزة بتخرف .. وانا ابو الشباب اللى فاهم كل حاجة ... كانت تقوللى لما كنت اتعبها واناهدها : سيب حبيبك على هواه لغاية ديله مايجى على قفاة ... عموما انا ماكنتش فاهم هية بتقول ايه ... لغاية ديلى ماجه على قفايا ... ساعتها فهمت ..... وفى الاخر انت حر ... مش انت اللى علمتنى معنى الحرية ؟!!

الاثنين، 12 ديسمبر 2011

مافاضلش الا الايه

مافاضلش الا الايه

الاسبوع اللى فات كان موسم 27 رجب ... كل سنه وانتوا طيبين ...انا ما اعرفش عادة المواسم دى جابوها منين . بس قريت مرة انها عادة شيعيه من ايام الفاطميين لماكانوا بيحكموا مصر ... ايوة ماهوالفاطميين حكموا مصر 200 سنه ... وبعدين اشمعنى هما يعنى ماطوب الارض حكم مصر ... القصد ... وانا نازل الصبح لقيت ورقة ملزوقة على باب الشقة مكتوب فيها ... هات دكر بط علشان الموسم بكره .... بس ...من غير كل سنه وانت طيب... ولاصباح الخير .... مش مهم ... وانا راجع من الشغل عديت على الفرارجى اللى قالى : خلاص ياباشا الدكورة خلصت ... انت اتأخرت ... ولأنى عارف انه لو مكلناش بط فى الموسم حيبقى اعوذ بالله ارتكبنا نوع من انواع الشرك الاصغر ॥دا غير ان حتحصل مشكله كبيرة انا مش قدها ... ميلت على الفرارجى وقولت له باستعطاف : ماينفعش اروح من غير دكر بط ... الفرارجى بص لى بشماته وقالى : مش قولت لك يا باشا الدكورة خلصت !!!!... طبعا انا مش محتاج اوضح ان الفرارجى كان قصدة على دكورة البط !!؟؟هيه اللى خلصت ... قولت له طاب ظبطنى وانا حأظبطك ... قالى : مانت ياباشا ناسينى من زمان !!!... قولت له ظبطنى وشوف .... قالى : عقبال ماتشرب فنجان القهوة حيكون الدكر جاهز ... بس .... ايه ؟ ... قولت له : ايه ... قالى : الإيه ولا ايه؟ ... قولت له :آآآآآه ... وفتحت الشنطه وعطيت له علبتين من الإيه ...اللى لونهم ازرق ..... بص للعلبتين كدة وقالى : دول يكفوا اسبوعين بس ؟ وبقيت الشهر ياباشا....؟؟؟؟... بصيت له باستغراب ... قالى وهوه بيفرد صدره... صحه ياباشا ... نوديها فين ؟!؟!... عطيته علبتين كمان وقعدت اشرب القهوة واتفرج علية ... مسك الدكر ...لوى رقبته ... دبحه... رماه فى حلة الميه المغلية ... كل ده فى ثوانى من غير رحمه ولا شفقه ... افتكرت لما كنت امسك دكر البط لأبويا علشان يدبحه ... كان بيفرهدنا ... وحتى بعد مايندبح كان يقوم ويقعد ويفرفر ... بس ابويا كان بيسيبه .... كان يقولى حرام دى حلاوة روح سيبه لغاية مايموت ... قعدت اقارن بين زمان ودلوقتى ... هوه ليه دلوقتى لا بقى فيه رحمه من اللى بيدبح ولا مقاومه من اللى بيندبح .... اه ..... ولابقى فيه عقل يفك الارتباط الشرطى بين الموسم ودكر البط والشرك الاصغر ...الواضح ان كل اللى فاضل ... الإيه ... وكمان الكداب يقول: اوديكى فين ياصحه

ملحوظة :

كان ائمة الشيعة فى خطبه الجمعه ايام حكم الفاطميين لمصر ... يشتمون سيدنا عمر بن الخطاب على المنابر بطريقة مميزة ... هذة الطريقة هى التى استخدمتها النساء فى المناطق الشعبية فى الخناقات والتى كانت تبدأ ب يا احمد و تنتهى بكلمة ياعووووووووووومر .... دلاله على اقصى انواع الردح ...

الأربعاء، 30 نوفمبر 2011

عم ياقوت جاب من الآخر

عم ياقوت جاب من الآخر


افتكرت ان كان عندى حتة قماشه محترمه ....قولت هوه انا ليه مبفصلهاش ..قمت قلبت عليها البيت ...انى الاقيها ...ابدا ...وفى يوم وانا قاعد جه فى بالى انها تكون فى الشنطة اللى تحت السرير ....نزلت تحت السرير وشديت الشنطة وفتحتها ...ولقيت القماشه ...لقيتها ملفوفه فى حتة حرير ....ومحطوطه فى كيس مرسوم عليه الاهرامات من ناحيه والكعبه من الناحيه التانيه ...فرحت قوى ...وخدت القماشة وطلعت جرى على عم ياقوت الخياط ...قولت له : ياعم ياقوت انا فى عرضك ...كل يوم بيبقى عندى حفله ...كل الناس اللى فيها محترمين ...او بيبانوا انهم محترمين ...كلهم بيبقوا على سنجة عشرة ...لابسين بدل اخر شياكه واخر موديل ...وانا فى وسطهم ببقى عرة ...والنبى ياشيخ تاخد القماشه دى وتفصل لى منها بدله شيك ...نفسى مرة احضر الحفله دى وانا بنى ادم ...والله ياعم ياقوت انا كويس ...وعندى حاجات كتيره حلوه ...ويمكن كمان اكون احسن من كل الى فى الحفله بس ماحدش بيعبرنى ولابيبصلى.....ودايما بيعاملونى على انى جاى اشحت منهم ...وساعات كتير بيعاملونى على انى بهيم ....بياكل ويشرب وينطح وبس ....مع انى ياعم ياقوت غير كدة خالص ....بس ماحدش مقدرنى ...عم ياقوت بص لى بنظرة عطف ومسك القماشه وفردها على البنك ...وقعد يقلب فيها يمين وشمال وفوق وتحت ...ويحطها قدام اللمبه ...كل دة وعلى وشه تعبيرات غريبه مرة اعجاب ومرة حسرة ومرة قرف ومرة استغراب ...وفجأه قالى : شوف يابنى لو انت كنت جبت القماشه دى من خمسين سنه ....كنت عملت لك بدله كل اللى حواليك يحسدوك عليها ...بس ياخسارة ...انت اتأخرت قوى ...القماشه شاطت ونكتت والعته هرتها...مش حينفع يابنى ....عوضك على الله ...رديت عليه باستعطاف ...والنبى ياعم ياقوت شوف لى حل الله يخليك ...عم ياقوت قالى : يابنى انا مش عايز اغشك ...القماشه دى ماتنفعش ولا حتى يتعمل منها لباس ...قولت له بيأس: طاب والحل ياعم ياقوت ...قالى: الحل انك تغزل لك حته قماشه جديدة ...على نضافه...هيه اه حتاخد وقت كتير بس هوه ده الحل الوحيد ...خليك فى الجديد ...دا طبعا لو ربنا قدرك وعرفت تعمل منه حاجه ...وسابنى وقعد يولع فى السبرتايه علشان يعمل فنجان قهوة محوجه بالحبهان والمستكه .... وانا ماشى سمعته بيقول لنفسه : ربنا مابيظلمش حد..... البنى ادم هوه اللى بيظلم نفسه.!

السبت، 26 نوفمبر 2011

الحياة بدون فياجرا.... ممكنه !!

الحياة بدون فياجرا.... ممكنه !!

خد قرفة بالجنزبيل وحليهم بمعلقة عسل نحل قطفة اولى .... معلش ولا يهمك ... طاب جرب غذاء ملكات نحل على مسحوق جنسنج وخد معلقة... معلش عادى ...... اطحن شوية خلنجان على لبان دكر وسفهم على الريق ...... معلش بتحصل ... ابشرلك بلحتين جوزة الطيب وشويه حبة البركة على ورقة لحمة ضانى ... معلش ساعات بتعاند كدة ... اديها طبق سى فود مع جمبريتين جامبوا ... كدة مقدمناش غير الفياجرا ... طاب السياجرا ... نخليها نياجرا ... الهندى ... التركى ... الالمانى ... الامريكانى بتاع فايزر ... طاب الميت مللى ... طاب المتين مللى ... طاب المضروب ... التقليد ... بس لقيتها يامعلم ...عليك وعلى شداد الحيل ... ايوه اسمه كدة ... شداد الحيل .. دا كوكتيل صينى عجب ... طاب انا اعمل لاهلك ايه دلوقت ؟!! .... عيش بركة واسكت بقى... اعمل انك زهدت ... محدش حياخد باله ...

على فكره دى شكوة ناس كتير ... وشباب ... يعنى خمسة وتلاتين اربعين سنة ....يعنى الدنيا لسه قدامهم ...طبعا حتقولوا اسرائيل بترش حاجات فى الهوا ... وحتقولوا المبيدات المسرطنة والرى بمية المجارى ... وكتمة النفس والارهاب ولزقة الوزير الفنان على الكرسى .. والانتخابات المتزورة ... هما السبب ... بس ماهية الحاجات دى طول عمرها موجودة ...طول عمرنا بنرش مبيدات وبنروى من المصرف ...وطول عمر الانتخابات بتتزور ... والوسيله الوحيدة لتداول السلطة هيه القضاء والقدر ... طول عمرنا بنعدى على العطار ناخد القرطاس ليله الجمعة ... بس كان مين اللى بيعدى على العطار؟ ... الراجل العجوز ابو ستين سبعين سنة ابوعين زايغة واللى متجوز بت فى سن عياله ... طاب ايه السبب يا حكيم عصرك واوانك ؟ ..

استر يارب فى اللى جاى .... السبب يا جماعة حرب كسر النفس وكسر المناخير اللى شناها ( اى تديرها ... وليس شناها بتاعة دور البرد ) الستات على الغلابة الرجالة انتقاما وتنفيسا عن قهر السنين ...وغيرة العمر من ولاد الكلب اللى بيعملوا اللى فى نفسهم واحنا قاعدين محبوسين فى البيت .. ماتخرجيش ماتضحكيش ماتناقشيش واعملى لاخوكى الشاى واكوي له القميص ....الحرب دى بتبدى بعد الجواز باسبوعين على اكثر تقدير ... ويشتد رحاها ويزداد وطيسها يوما بعد يوم ... قبل الجواز ينزل للزبون طقم حنية ,,,على طقم مشاعر جياشة... على طقم رقة وانوثة ... وعليهم طقم سمعان كلام وامرك واللى تشوفة وكلمتك على رقبتى واللى تحبة اموت فيه وانت اللى كنت باتمناه...وبعد الاسبوعين نبدأ باسم الله ...ماهو مش معقول كدة ... سايب القميص على كرسى السفرة ... لوحد طب فجأة يقول علينا ايه ؟ ... ايه مش تغسل مكنة الحلاقة بعد ماتحلق ...

والنبى دى طماطم تنجاب ... شكلك بتاخد اللى الراجل بيديهولك ...

الواحدة ماتعتمدش عليك فى حاجة ابدا ... عمرك مانصفتنى ...

ماشى ماشى اتغدى عند امك وسيبنا قاعدين جعانين ...

واخد بالك من نفسك ومتشيك كدة ليه ... شاكلك شايف لك شوفة ... هه ... اللى خدته القرعة تاخدة ام الشعور ...

بقولك ايه... انا طلعان عينى طول النهار ... مسح وكنس وغسيل وطبيخ ...انا مش فاضية لدلعك دة ... انا عايزة انام ... بكرة ... بكرة ...

اصل الدنيا حر والعرق بيزهقنى ... اصل الدنيا سقعة والانبوبة فاضية ...

الا عملت حسابك فى قسط المدارس بتاع العيال ...

الصبح ماتنساش تاخد الزباله فى ايدك ... الزبال بقاله يومين مجاش ...

يووووه ماقولنا الدنيا سقعة ... خلينا فى المهم ... تتغدى ايه بكرة ... ماتقوليش اى حاجة ...انا عازمة ماما واختى على الغدا يوم الخميس .... موسم كل سنة وانت طيب ...تصبح على خير ....

الفطار عندك على السفرة ... انا داخله انام ... ماتنساش تقفل الباب كويس ...

اهلا ... ماجبتش الفاكهة زى ما قولت لك ... بقالنا اسبوع ريقنا ناشف ... اقلع الجزمة برة انا لسة منضفة ... ارحموا بقى انت وعيالك ... تتغدى ولا حتصلى الاول ...

اه العيال عايزين يروحوا النادى ... يفكوا شوية من جو المزاكرة ... العيال جم من النادى هلكانين وناموا ... عايز حاجة ؟ ... ماشى بس على طول ...

خصيمكوا النبى ...السيدة فى ضهركوا ... ممكن بعد اللى بيشوفة الغلبان دة يقدر يمارس حياته الطبيعية عادى كدة ... بصراحة عنده حق ان ولا وصفة تنفع معاه ...

على رأى المثل : فيه ناس ... زى القنفد ... لاتنحضن ولا تنباس .

ايتها الزوجات انهوا هذه الحرب فالانسان يعيش مرة واحدة ... ايتها الزوجات ارحموا من فى الارض يرحمكم من فى السماء ... يا اخونا دا دى الحاجة والحيدة اللى فاضله للغلبان يلاقى فيها نفسة بعد الذل اللى بيشوفة طول النهار ... مايبقاش انتوا والحكومة علية ....

13 يناير 2011

الثلاثاء، 22 نوفمبر 2011

حلم رزل قوى

حلم رزل قوى
(اهوه بيتحقق اهوه )
من ارزل انواع الاحلام .. انك تكون نايم وبتحلم انك نايم وبتحلم .... فلما تصحى من الحلم التانى .. وتقول اللهم اجعله خير ... تكتشف انك لسه بتحلم ... وان كل اللى حصل انك قومت بس من الحلم اللى فى الحلم .... وده اللى حصل ... حلمت انى فتحت الفيس بوك الصبح على صفحة المجلس العسكرى ... لقيت الرساله رقم 35 مكتوب فيها : وعلشان احنا الجيش والشعب ايد واحده ...قبضنا على حسنى مبارك وعياله ومراته ونسايبه وصحابة اللى كانوا بيقعدوا معاه على القهوه والشله اللى كانت بتساعده فى نهب مصر ... قصدى حكم مصر ... مش بس كدة ... دا احنا قبضنا على كل من عدى تحت بلكونة القصر الجمهورى فى التلاتين سنه اللى فاتوا ...وحكمنا عليهم بالسجن مدى الحياة ... ومصادرة كل اموالهم وممتلكاتهم ... كدهوه من غير محكمه ولا قفص ولا قاضى ولانيابة ولاغيرة .... واستكفينا بالمحكمة اللى اتعملت فى ميدان التحرير .... وبكدة يبقى اثبتنا للشعب ان احنا وهوه ايد وحدة ... خلاص كدة ولا فيه حاجة تانى .... والله ولى التوفيق ..... مافيش ربع ساعة وميدان التحرير اتملى على اخرة ... مليونية الانتصار ... وهاتك يازغاريد ورقص ومصر هيه امى ويا حبيبتى يامصر ... داغير لم الزباله وكنس الميدان .... باليل عرس وطنى فى الفضائيات ... ومصر الرائدة .... مصر العظيمة... مصر اللى خلت الدول كلها مزبهله ازبهلال اخر حاجتين .... ويا فرحة ماتمت .... تانى يوم الصبح .... الدعوه الى مليونية الحساب .... الفلوس اللى رجعت دى مش لوكانت فى البنك كانت جابت فوايد ... الشعب يريد استرداد الفوايد .... الاخوان المسلمين قالوا لا ... دى ارباح مش فوايد ... الفوايد حرام ... السفليين قالوا : لافوايد ولا اربح دا ربا ... احنا عايزينها غرامة .... الليبراليرون : لا ....فوايد ايه وارباح ايه ... الفلوس دى لو كانت اشتغلت فى البورصة كانت جابت اكتر من ارباح البنك ... الاخوان والسلفيين مابيحبوش مصر وعايزين يتنازلوا عن حقها .... الاشتراكيين ماسكتوش ... مصر يعنى البوليتاريا ... يعنى العمال الغلابة ... الفلوس دى لازم تتوزع عليهم ... بعد مليونية الحساب ماخلصت ... بدأت مليونية الاستنطاع .... يعنى ايه سجن مدى الحياة ... يعنى يقعدوا فى السجن واكلين شاربين نايمين على حساب الشعب ... يعنى يسرقونا وهما فى الحكم ... ويستنطعوا علينا وهما فى السجن ....الشعب يريد تمن الاستنطاع ... وبعد مليونية الاستنطاع بدأت مليونية الاستهبال ووراها مليونية الاستعباط ..... وصحيت من الحلم لقيت نفسى فى ميدان التحرير ... ملقتش لا دبابات ولا مدرعات ولا عساكر بس لقيت مليونيه المصالحة ... الشعب يريد رجوع الجيش ...فتحت النت على صفحة الجيش ملقتهاش ... عارفين الجيش راح فين .... اعتصم فى الصحراءالغربية ... وقعد يهتف الجيش يريد اللجوء السياسى لليبيا ... ماهو لو الحكاية عباطة فى عباطة نروح بقى للقذافى .... عباطه على ابوها .... رجعت التحرير لقيت الشعب كله فى الميدان ولقيت بقية مصر كلها متأجرة مؤقت ... اهو قرش جاى يصرف على الشعب ..... ماهى مصاريف المليونيات غالية .

صحيت من النوم على سؤال بيرن فى دماغى ... هوه احنا حنشتغل امتى ...؟ ولا احنا بقينا شعب ولاموخذة .....ومن غير ماتفهمونى صح .... لوك لوك ....لوك لوك وفعل مافيش.
السبت, أبريل 09, ..... ..2011

الاثنين، 14 نوفمبر 2011

مجربة

مجربة

الاحاسيس والانفعالات هية اللى بتميز الانسان عن الحيوان ... والاحاسيس والانفعالات دى كلها فجائية ... يعنى مثلا... احساس الفرح بيجى فجأة ... احساس الخوف بيجى فجأة ... احساس العطش فجأة .. احساس الجوع فجأة ... احساس السيكو سيكو برضة بيجى فجأة ...

كل الاحاسيس فجأة .... ماعدا احساس الملل ... هوه الاحساس الوحيد الى بيجى وحده وحده ... حته حته .. سنه سنه " بكسر السين او فتحها زى ماتحب تقرأها ... براحتك يعنى " ... لان احساس الملل يتسرب ونتشر ويتغلغل بهدوء وتؤدة " حلوة تؤدة دى " .... فى نفس البنى ادم وبعد شوية يتحول البنى ادم الى كائن هلامى لا هوه بنى ادم بيتفاعل ويشارك البيئة اللى حوالية ... ولا هوه حيوان واضح الاحتياجات والغرائز ... الغريبة بقى ان ماحدش عارف سبب احساس الملل ده ايه ... ياترى هوه تعود على الاحاسيس ... ومع تكرارها بتفقد زهوتها ومعناها.... ممكن ... يعنى مثلا احساس الحب لما بيتكرر مابيبقاش زى اول مرة ... احساس الفرح هوه كمان لما بيتكرر مابيبقاش زى اول مرة ...فى كل مرة يقل عن اللى قابليها ... ولا السبب السن والخبرة والمرمطة فى الدنيا اللى بتخلى البنى ادم عارف ومتوقع ومستنتج ومتأكد من اللى حيحصل ... فمبيقاش فيه فرحة الاكتشاف والتعرف والمفاجأة ... اه على فكرة الملل مش اكتئاب ولو انه يعتبر الخطوة الاولى فى طريق الاكتئاب ... هنا بقى السؤال ... ياترى ده التطور الطبيعى للحاجة الساقعة .. وان الملل لازم يصيبنا يعنى لازم يصيبنا ... ولافيه حل للموضوع ده ؟ ... عموما انا عندى حل ... هوه اجتهاد شخصى ... بس جايز ينفع ... هوه مش حل ... هوه تلت حلول .. مابتخليش الملل يتسرب الى نفوسنا ... لكن احنا مابنعملهوش نتيجة الانانية .. او النسيان.. او اللامبالاه .. او الكسل ... او الغباء ... او اشياء اخرى ...

نمرة واحد ... علاقتنا بربنا ...اللى كل مازادت كل ما الملل قل ...

نمرة اتنين ... مساعدة الاخرين ... يعنى كل ماتساعد حد ولا تقف جنب حد ولا تعمل حاجة لحد من غير مقابل ... او تتصل بحد من غير ما تقوله فى اخر المكامله : على فكرة انا كنت عايز منك ... كل ما احساس الملل مايقل ...

نمرة تلاته ... العلم ... لانك كل ماتعرف تعرف انك ماكنتش تعرف ... بير يامعلم مالوش أرار يخليك على طول فى حاله نشوة وسعادة ...

على فكرة الوصفات دى مجربة ... بس كلمه فى سرك ... ساعات كتير مابعملهاش .... ما نا مصرى وابويا مصرى ... عادى يعنى ... واخيرا ... حنعيش يعنى حنعيش ... بالذوق بالعافية حنعيش ... حتى وسط الغباء حنعيش .

الجمعة، 11 نوفمبر 2011

رساله الى من يقلقة الامر

رساله الى من يقلقة الامر


اللى ماعندوتش ثقة فى نفسه ولا فى دينه ولا فى حضارتة وتاريخة ... اى حاجة ممكن تزغلله ... واى كلام مزوق يلخبطة ... ويعمل زى فريد الاطرش ... كلمة تجيبة وكلمة تودية ... يعنى باللغة العربية امعة ... وبالبلدى ملطشة ... يعنى بالمفتشر .. اى شيطان من شياطين الانس او الجن ... يزغزغة ويلعب بية وبدماغة وبافكارة زى ماهوه عايز ...ويسمعة كلام ملعلط من نوعية ... علمانية .. ومدنية ... ومواطنة ... وحرية ... ومن كتر الزن على الودان يسحرة ... فيصدق المصطلحات دى ... ومش بس يصدقها .. دا كمان يقتنع بيها ... وياريتها تيجى على قد كدة ... دا يدافع عنها ويحارب علشانها ... مصطلحات مطاطة من اللى تجيبك على حجر عمو... من اللى بتجرجر على سكة اللى يروح مايرجعش ... من اللى بتخليك تغرز وانت مش حاسس ... لعبة قديمة ساذجة ماتخيلش الا على السذج واللى نفسهم يبانوا متعلمين .... عندك مدنية ... تمشى معاك لغاية ماتوديك ان كله قانونى ... والقانون يحكم الجميع ..والمحامى يكتب ورقة لاتنين عايزين يتجوزوا ... المهم تكون مختومة من المحكمة ... مش مهم بقى شاهد ولا مهر ولا اشهار ... مش مهم ملة العريس ايه ولامله الامورة ايه .... مدنية بقى ... وعنك كمان علمانية .... تجرجرك لغاية ماتوحلك فى ان الدين شعائر جوه الجامع والكنيسة ... لكن برة ماليش فية ... البت تاخد زى الولد ايه حكاية للذكر مثل حظ الانثيين دى ... ايه الكلام القديم دة! ......الحرية بقى ... معاك من حرية الرأى اللى هية حق شرعى ... لغاية ماتوصلك لحقك انك تمشى بلبوص فى الشارع ... حريييييية ....المواطنة بقى ياباشا ... الزغلول الكبير ... ياخدك لغاية مايوديك للعو ...يعنى البهائى والملحد والشاذ والسحاقية ليهم حقوق زى جنابك بالظبط ... حقهم يعملوا مظاهرات يطالبوا بحقوقهم ... مواطن ولا مش مواطن ؟ اعترض بقى ... وفجأة تلاقى ميشو الخو.....اجة ... حقة انه يبقى رئيس الجمهورية ...بعد ماكنا مستحملينة فى الوزارة بس ...

شوف ياعم الحاج انت وهوه ... تلبسلى حظاظة ... ترسم لى شنب ونضارة على التيشرت ... براحتك ... تقولى ان اللى بتقوله صح ومفروض وده اللى حيخلى مصر تبقى ام الدنيا ...ونطلعوا الدنيا بت حلال وشرعية ... فده على نفسك يا معلم ... ماتفرضوش علينا عايز تبرطع ..انت حر ...عايز تعيش فى ماخور برضة انت حر بس بعيد عننا وحياة ابوك ... لان اللى ماتعرفوش علشان الغرب كل دماغك ... ان احنا مصريين مسلمين ... واخواتنا مصريين مسيحيين ... يعنى عندنا دين ورب بنعبدة ... ورسل مؤمنين برسالاتهم ومبادئهم واخلاقهم ...ولو عايز تتحاور وتناقش وتهلفط ... ماشى حنستحملك ... بس الكلام دة على طريقة تطبيق القيم والاخلاق والمبادئ والمفاهيم اللى ربنا قال عليها ... اه ... ووالنبى بلاش تجيب لنا تيك اوى من برة وتقولنا دة علشان مصلحتكوا ... مصلحتنا عارفها ربنا اللى خلقنا ورسلنا اللى بيهدونا لطريق الخير والرشاد ...وارحمنا بقى لانك مش حتكسب ... كان غيرك اشطر ... لان ببساطة ربنا حينصر دينه ... ربنا حينصر دينه ...غصب عن عين الجن الازرق ...

اه نسيت اقولك حاجة مهمه ... احنا مش سلفيين ولا اخوان ... علشان ماتخدكش الجلالة ... بس اللى ماتعرفهوش يا قمر ... انت واللى بيتشدد لك ... ان احنا ممكن نكون مختلفين معاهم فى الاسلوب ...لكن ساعة الجد حنبقى سلفيين اكتر من السلفيين ... واخوان اكتر من الاخوان ... ماهو مش حنقابل ربنا ونقف قدامة عنينا فى الارض ونقوله سامحنا يارب ما نصرناش دينك فى الارض.... مش حيحصل هه فاهم ولا نقول كمان ...فخدوها بقى من قصيرها وحلو عن سمانا بتيشيرتاتكوا وحظاظتكوا .

امضاء مصريين لسه مانزلوش التحرير

نشرت فى 13 يونيو 2011