الثلاثاء، 25 سبتمبر 2012

حمامة الحاج مانجة +( وربنا انا سابق عصرى كاتبها قبل ماتحصل)


حمامة الحاج مانجة

الحاج منجة جه من البلد وخد شقة فى التجمع الخامس بعد ما ربنا كرمه واتنطأ وبقى له شان وشنشان ... بدأ يمارس حياتة الجديدة .. بس انتوا عارفين الطبع غلاب ... واللى فيه داء مايبطلوش ....
الحاج منجة بعت البلد وجاب قفصين طيور فراخ على بط على حمام ... وخد بلكونة المطبخ  وعملها عشش للطيور ... وبدأ مشروع تربية الطيور ... اهو منها مايحسش بالغربة فى البتاع اللى اسمه كمبوند ... وفى نفس الوقت يمارس حاجة  هوه بيعرف يعملها .
الحاج منجة كان عاطى لكل نوع طيور اسم ... يعنى لما نفسه تهفه على ديك رومى يقول للحاجة ام محمد : ادبحيلنا طائر البهجة ... ولو عندة عزومة وعايز يدبح بطة ووزة والباقى لابو العلا ... يقول للحاجة : ادبحيلنا طائر الوحدة وطائر النجدة ... اما بقى لما يرسم لليله جمعة طحن ويتعشى حمام  ... يقول للحاجة : ادبحى جوزين من طائر ال.......  ايوه بالظبط ابو جناحين وريش ده... طول عمرى باقول ذكاء القارىء لا حدود له .
القصد الوز والبط والرومى والحمام بيعملوا دوشة دا غير الريحه ... قوم الجيران اللى فى الكمبوند اشتكت من الريحة والدوشة ,,,, الحاج منجه وعدهم انه حيركب شفاط علشان يمنع الريحة ويبطن الحيطة علشان الصوت وفوق دة ودة حيدى لكل واحد طائر هدية ... الجيران صدقت ومشت ... ماهو الزفر برضة له نكهته ... وفيلم الكنتاكى والعيشة الملزقة دى صعب برضة ....
الحاج منجة كعادته من ايام الشقى مالوش عهد ولا كلمة ... يعنى لا بطن الحيطه ولا ركب شفاط ولا عطى حد من الجيران طائر من اللى قال علية .
انتوا عارفين بقى احنا فى توابع ثورة والناس ماعدش عندها خلق ... قوم الناس اتلمت تحت التراس بتاع الحاج منجة وهتفت ...الجيران تريد الطائر ... الجيران تريد الطائر.
 الحاج منجة نفذ نصيحة الحاج مرشدى عمدة البلد ومعبرش الجيران .... الجيران زادت والهتاف صوته بقى عالى ...
البواب طلع للحاج منجة وقاله ياحاج اديهم الطائر اللى وعدتهم بيه ... انت ماتعرفش العالم دى ... دى عالم يبان عليها طيبه ... بس الحقيقة دى عالم صيع .
الحاج منجة قاله : يابنى الطيور اللى عندى يادوب تكفينى انا والجماعة ... بقى احنا نتعب ونشقى ونتذل وهما يجوا ياخدوا على الجاهز ...
 البواب قاله  :طاب انا عندىفكرة يا حاج ... اطلع وريهم اى طائر وقولهم انه قاعد على البيض واول مايفقس حأديكوا ...
خرج الحاج منجة على الجيران بانفعال .... وقف فى التراس ....وقال :  هوه ده الطائراللى عندى ........... وطلع لهم الحمامة .....
بهدوء غريب ................ الجيران مشيت

الأحد، 23 سبتمبر 2012

سبوبة صاحية 3 ( الانطلاق )


سبوبة صاحية ( الانطلاق )


احنا وقفنا لغاية ما انت طالع من المسجد ...هنا بقى حتلاقى واحد قرب منك بخطوات مترددة وقالك كنت عايز اسألك سؤال يا مولانا .... حط ايدك على كتفه وابتسم ابتسامه هاديه وقوله اتفضل يا اخى .... واسمعة باهتمام ... بعد مايخلص قوله : الموضوع كدة عايز قاعدة ...خدة من ايده واقعد معاه على جنب ... الناس اللى واقفة حتتشجع وتيجى تقعد ويعملوا حلقة علم ... ابدأ يامعلم فى الفتوى ... بس خلي دمك خفيف .. شيخ روش يعنى ... وانت وشطارتك بقى يامعلم ... الوى دراع الكلام وادخل على الموضوع الجدلى اللى محضرة ... وانطلق يامعلم .
كرر العمليه دى لمدة اسبوع كامل ... يوم عن يوم حتلاقى الحلقة بتزيد حواليك وحيبقى لك مريدين يامعلم ...بعد الاسبوع ... اختفى لمدة 3 ايام من الجامع وبعدين ارجع تانى ... طبعا حيستقبلوك استقبال الفاتحين ... ويسألوك كنت فين يامولانا .... قولهم انك كنت فى التجمع الخامس او 6 اكتوبر او الساحل الشمالى لو كنت فى الصيف ... واحكى لهم انك بتدى محاضرات وندوات هناك .. وتتأسف لهم علشان اتأخرت عليهم .... حيطلع لك واحد فلوطة ويقولك : احنا اولى بيك يامولانا ... حدد لنا يومين .. ترشدنا وتعلمنا دينا وتنور بصيرتنا ... اوعى توافق على طول ... اتمنع ..لان الطلب عليك كتير ... ولما يتحايلوا عليك ... وافق ... بس على يوم واحد بس .... واشتغل يا حبيبى اشتغل ...
اه نسيت ... لو كلكعت معاك ومحدش قالك عايزينك يومين ... (وده اللى حيحصل علشان نيتك الزباله ) ... ماتقلقش ....حقولك تعمل ايه علشان اكون خلصت ذمتى من الشيطان : كرر اللى عملته ... بس لما ترجع تكون محضر اتنين حلوين كدة يسيطوك ويتحايلوا عليك قدام الناس .
اخيرا .. دعبث لك على اى حد فى مدينة الانتاج الاعلامى ... ظبطه ونصص معاه ... علشان يظبطك فى كام برنامج .... وانت شطارتك بقى ...
ماتخافش متترددش ... الطريقة دى متجربة واتهرست فى تلاتين سنه مليون مرة ونجحت بنسبة 99%.
امانه عليك ماتنسى اخوك اللى دلك على السبوبه ... يعنى  ساعة حلوه ... لاب توب ... موبيل جلاكسى تاب ... اهو انت وذوقك بقى .
        مع تحيات حنعيش يعنى حنعيش ....
                 سبوبتك عندنا


الخميس، 20 سبتمبر 2012

سبوبه صاحيه (البدايه)


سبوبه صاحيه (البدايه)

البس الجلابية البيضا وحط الطرحة على دماغك وامسك السبحة ... اه ماتنساش تدهن علامة الصلا بنقطة زيت تموين ... روح الجامع قبل الصلاه بربع ساعة ... وخد بالك من مشيتك ... لازم تكون بهدوء وتكون باصص فى الارض ... اول ماتدخل الجامع روح على الصف الاولانى ... بس مش فى الحته بتاعة الامام ... خد جنب شوية ... صلى ركعتين تحية المسجد وطول حبتين ... بعد ماتخلص امسك المصحف واقرا ... بعد الاذان ... قوم صلى السنه واقعد سبح وسيب الباقى على الناس  ... بعد الاقامة حتلاقى واحد جه وقالك اتفضل علشان تؤمنا يامولانا ... اوعى توافق على طول ... اتمنع لغاية مايجى واحد تانى يحاول يقنعك ... ساعتها بس اطلع وام الصلا... خلى بالك ... ماتطولش وفى نفس الوقت ماتصليش بانا اعطيناك الكوثر ... بعد ماتخلص اتعدل واقعد باصص للمصلين بس عينك ماتجيش فى عنيهم .... بص فى الارض وتمتم باللى يفتح عليك بيه ربنا  ... حيجوا واحد واحد يسلموا عليك ويقولوا لك حرما يا مولانا ... بعدها قوم وصلى السنه ... هنا بقى طول على قد ماتقدر .... ماتخافش فيه اتنين تلاته على الاقل حيستنوك لما تخلص علشان يستفتوك فى امور دنياهم .
والى اللقاء فى الحلقة القادمة .


الاثنين، 17 سبتمبر 2012

سبوبة صاحية ( التحضير )


سبوبة صاحية
( التحضير )

اول خطوة :
اشترى كوز درة مشوى ... سمى وانحته بالهنا والشفا ... ماترميش الكلحه ... سيبها تنشف فى الشمس يومين وفى نص قورتك قريب من منبت الشعر وحك بالكلحة سيرن داير لغاية ماتلتهب وتعرق دم ... اجرش لمونة وحك الالتهاب ... حتتلسوع يامعلم .. نار... نار الله الموقدة .. معلش استحمل ... اكل العيش مر .... كرر العمليه دى يوميا لمد سبع ايام ... بعد الاسبوع اقف قدام المرايا .... وحتشوف علامة صلاة جامدة اخر حاجتين يا بوب.
تانى خطوة :
اشترى جلابية بيضا... وطرحة بيضا ...  بس يكونوا من الابيض الشاهق وجيبلك سبحة طويلة ...  متر ونص على الاقل  ...
تالت خطوة :
اختار موضوع جدلى ... الحجاب ... الختان ... جواز البنات بعد مايتعملهم العقيقة   .. الاغانى ... الفن ... وشوية سياسة على الماشى ... احمد شفيق حرامى .. البرادعى بتاع عيال ... وانت وخيالك بقى .
رابع خطوة :
لم الايات والاحاديث اللى بتتكلم عن الموضوع الجدلى اللى انت اختارتة ..... واختار كام افيه من اللى بيعجبوا الناس ..... على كام شتيمة واحفظهم صم ..... هه صم يامعلم .
خامس خطوه والاهم والاخيرة :
طول دقنك على قد ماتقدر ... وخفف شنبك على قد ماتقدر ... وياسلام بقى لو تضرب شوية شعر من الدقن بمية اكسجين ... علشان الدقن تبقى شوية اسود وشوية ابيض .

والى اللقاء فى الحلقة القادمة مع بداية السبوبة .



السبت، 15 سبتمبر 2012

بعد مشاهدة لقاء د محمود حسين على قناة صدى البلد (تالت)



الجزمة هيه الحل

عندنا بيت فى الفلاحين ... مش عارف احنا بنيناه ليه من اصله ... يمكن علشان الحلم العبيط بتاع الارض والطين والجذور ... يمكن علشان الخوف من الزفة بتاعة شوفوا طوله وعرضة يا ولاد ... عواد باع ارضة ياولاد .... يمكن علشان بنيناة بالطوب الاحمر فى الوقت اللى كان كل البيوت بالطوب النى ... يعنى شوية عواجان على زهو على تفاخر ... المهم انه اتبنى وخلاص ... البيت ده مابنرحهوش غير مرة او مرتين فى السنه علشان ناخد ايجار الارض اللى برضة ما اعرفش احنا اشتريناها ليه ؟ مع ان ولا واحد فينا يقدر يفرق بين البرسيم والملوخية .... القصد ... تعبنا من الفيران اللى بتقرقض البيبان والعفش ... مش نافع معاها لا سم ولا مصيدة ولا لزق ... فقررت انى ادرس سلوك الفيران واتعامل معاهم من وجهة نظر نفسية ... بحكم التوجهات والدراسات ... لقيت ان الفيران طول عمرها فى الجحور ... مخنوقة محبوسة مذلولة ..ولما بتطلع على وش الارض ... الف من يمسك لها الشبشب والجزمة والعصايه ... دا غير الحقيقة العلمية اللى بتقول ان سنان الفيران اللى قدام بتطول مع الوقت فلازم يقرقضوا حاجة علشان لو طولت زيادة عن اللزوم ماتعرفش تاكل ... فقولت انا اتصالح مع الفيران ... احط لهم الاكل واجيب لهم خشبة يقرقضوا فيها ... ويانحله لاتقرصينى ولا عايز عسل منك ..ونفذت الكلام ... وشوية ولقيت الاكل اتاكل ... والخشبة اتقرقضت ... وبرضة قرقضوا البيبان والعفش ... وياريت على قد كدة ... دول جابوا القرايب والصحاب واتلموا حوالين البيت وعملوا مظاهرات ...واحتلوا الميدان... وان كان عاجبك يا اهبل يابتاع علم النفس ... ولانى صاحب قرارى ... ولانى بدافع عن بيتى وارضى وبيبانى وعفشى .... اعلنت الحرب من جديد ... عصيان وشباشب ومصيدة ولزق واحدث جهاز بيعلونوا عنه فى التليفزيون بيشتغل بالموجات الصوتية .... بصراحة تعبت علشان اتخلص منهم ...... بس اتعلمت ... اتعلمت ان الفار اللى عايش طول عمرة فى الجحر ماينفعش معاه تعديل سلوك وشوية الفرم بتاع فرويد وسكنر وبافلوف والعالم دى  .... صدقونى اتعلمت ان الجزمة هية الحل مع الفئران المقرقضون.

الأربعاء، 12 سبتمبر 2012

اتنيلت ونشرتها فى اكتوبر 2010


الطماطم بين النظرية والتطبيق
من يوم ما وعيت على الدنيا ... يعنى من اربعين سنه كدة ... وانا اعرف ان الاسم الحركى للطماطم هوه المجنونه ... اه عرفت بعد كده ان اسمها قوطة وبندورة وحاجات تانيه ... بس الاسم الكودى هوه المجنونه .... ولما سألت عرفت ان اسم المجنونه دة علشان يوم يبقى سعرها فى السما ويوم يبقى الاتنين كيلو ببلاش ونص ... طاب وده معناه ايه يعنى ... اقولكوا : ده معناه ايه ..
ثانيا : ان اللى حصل للطماطم اليومين اللى فاتوا دول مش حاجة جديدة ... ماهى الطماطم حالها كده من اربعين سنه ... يعنى المفروض ان احنا نكون اتعودنا على كدة ...ومانتفاجأش
اولا : لو الطماطم بتزيد فى سعرها شهرين فى السنه ... حاجة تقرف ... طاب ماهى بترخص عشر شهور فى السنه ... حاجة كويسة ... يبقى ليه بقى الازمة النفسية وحاله الاكتئاب اللى صابت الشعب الحبيب من زيادة سعر الطماطم
ثالثا : ماتيجى نتحمل نصيبنا من المسئوليه ... ازاى ... احكيلكوا الحكاية اللى خلتنى اكتب البوست ده ...وانتوا حتعرفوا
قوم ايه مراتى من اسبوعين كدة طلبت منى اشترى كيلو طماطم وشوية خضار ... وبعد مرور الاسبوعين وبعد ثورة الطماطم اللى على النت والمدونات ومن ضمنهم انا ...دا طبعا غير التوك شو والمصرى اليوم .. والدستور الالكترونى ... اكتشفت ان احنا كل يوم تقريبا بناكل طبيخ بدمعة ... قوم سألت : هوه يامراتى العزيزة كيلوا الطماطم اللى جبته من اسبوعين فيه بركه قوى كدة لدرجة ان احنا بقالنا اسبوعين بنطبخ منه ....ضحكت وقالت ربنا يبارك ..بس لا طبعا .... قولت : امال ايه الحكاية ... دى الناس بره بتاكل ملوخيه بقى لها شهر ...علشان مشكله الطماطم ... قالت : مشكلتهم .. يحلوها بمعرفتهم ... انا طبعا فاهم مراتى وعارف انها لما ببتكلم بالاسلوب دة يبقى هيه عامله حاجة محدش عاملها ... قولت: فهمنى يا عبقرى ..قالت : فاكر لما سألت اخوك على الميعاد اللى بتبقى فيه عروة الطماطم غاليه ...(اخويا دة مهندس زراعى ) قولت : ايوه .... قالت : انا بقى قبل ميعاد العروه دى ... الطماطم بتبقى رخيصة ... اقوم اشترى كميه واعصرها واغليها واحطها فى علبه كبيرة واحطها فى التلاجة ... تيجى العروه ...تغلى الطماطم ...تولع الطماطم .. تنقص الطماطم فى السوق.... ماليش فيه .... قولت : يابنت الايه ... يعنى احنا عندنا طماطم دلوقت ... قالت ايوة تكفينا اسبوعين كمان ... دا غير ان فاضل اربع طماطمات من اللى انت جايبهم سيباهم للسلطه .......ايه رأيكم ؟ّّّ!!!
رابعا : مش حل مراتى احسن من اننا ندفن نفسنا فى المشكله ..ونسخن بعض ... وننفعل ... ومانصدق نلاقى جنازة ونشبع فيها لطم .. ونحمل رئيس الجمهموريه مسؤلية اختفاء الطماطم ... اقول لكوا اخر نكته تحزن اكتر ماتضحك ... واحد من عباقرة الافرازات المصرية ...قال ياجماعة ابراهيم عيسى اترفد مش علشان الضرايب ولا علشان مقالة البرادعى زى مانتوا عارفين ... دا اترفد لان مباحث امن الدوله عرفت انه بيكتب مقال عن الطماطم بيهاجم فيها حسنى مبارك ...وبيقول فيه ان الرئيس فى اى دوله محترمه لو الطماطم غلت عندة يقدم استقالته على طول
خامسا : اقول لكوا حاجه .....وانا عارف انها مش حتعجبكوا .... ساعات كتير بيصعب عليه حسنى مبارك قوى ........ قوى والله 

الخميس، 6 سبتمبر 2012

جاتك نيلة انت وطائر النهضة


جاتك نيلة انت وطائر النهضة

مهندس امريكى كان بيشتغل فى احدى دول الخليج ... مع العشرة والايام حب انه يدخل فى الاسلام .... راح لشيخ ... وسأله : انا عندى 60 سنة ممكن ادخل فى الاسلام ؟ ... رد عليه الشيخ قائلا : لأ طبعا ... خلاص الفرصة راحت . .. اصاب الامريكى الحزن ورجع من حيث أتى .... بعد عدة شهور جلس يتحدث مع احد الشيوخ وذكر له كيف انه كان يتمنى ان يدخل الاسلام ولكن كما قال الشيخ الفلانى الفرصة راحت .... استعجب الشيخ وقال : هل مازلت تريد ان تدخل فى الاسلام ... رد الامريكى فرحا : نعم وبكل تأكيد .... فقال له الشيخ : ماعليك الا ان تقول لا اله الا الله محمد رسول الله .... فنطق الرجل بالشهادة ودخل الاسلام .
ذهب الشيخ الى هذا الفلانى ليعرف لماذا فعل ذلك مع الامريكى ... فقال له الفلانى بحسد وغل  : طبعا مايدخلش الاسلام ... بقى يقعد ستين سنه يتمتع بالخمرة والنساء ... وبعد كدة عايز يدخل الجنة معانا ...لا طبعا .
هناك مصيبتان عظيمتان ....
 الاولى : ان الفلانى يرى ان الخمر والنساء متعة وكان يتمنى ان يشرب الخمر ويأتى النساء ... انه يحسد الامريكى على معصية يرتكبها  .
الثانيه : انه تأله على الله وقرر انه داخل الجنه وانه يقرر من يدخل معه .
حكى هذه القصه الحبيب على الجفرى احد الدعاه الى الله والاسلام بالحكمة والموعظة الحسنة ... احد الدعاة القلائل الذين لا يسبون ولا يقذفون ولا يشتمون امثال شيوخ التكوين العكسى اللى ملو البلد (التكوين العكسى احد العمليات النفسية الدفاعية يفرد لها البوست القادم ).
ليست هذه المقدمة دفاعا عن فن الهام شاهين وخالد يوسف واحبوش .. ولكنه دفاعا عن الاسلام اللى بيتشوه ويساء اليه  على ايد الجهله من اشكال هذا البدر .
ياجاهل يا ابن الجاهل.... لومنعت فن الهام شاهين وخالد يوسف ورينى حتقدر تمنع مواقع الجنس على النت ولا الافلام والصور اللى على الفلاشات والهاردات والسى ديهات ازاى .
ياجاهل يابن الجاهل.. لو عايز مجتمع نضيف وطاهر ونقى .. حل مشكلة الشباب العاطل اللى قاعد نهارة وليله على القهوة من غير شغلة ولا مشغلة .
ياجاهل يابن الجاهل ...ورينى حتوفر ازاى شقة اودتين وصاله للشباب علشان يتلم ويتجوز .
ياجاهل يابن الجاهل ...بطل تنادى انت وامثالك بختان البنات ... علشان الشباب والبنات يستمتعوا بما احل الله .
ياجاهل يابن الجاهل ... نور عقول الشباب بالعلم والحضارة والفكر والرياضة علشان مايستسلموش لغرايزهم.
ياجاهل يابن الجاهل ... مش مشكلتنا انك طلوقة مش بنى ادم ... مش مشكلتنا انك مش عارف تبوس ولا تحضن .
ياجاهل يابن الجاهل ... الفلوس اللى بتاخدها من الفضائيات اللى بتجيبك تسخن القاعدة فلوس ان ماكانتش حرام تبقى مشبوهة .
يا جاهل يابن الجاهل شوف اسيادك من شيوخ الاسلام ... كانوا بيعملوا ايه واتعلم منهم ... دا لو انت بتفهم من اصله .
ياجاهل يابن الجاهل ... جاتك نيله فيك انت و طائر النهضة فى يوم واحد .


الأربعاء، 5 سبتمبر 2012

الجزمة هيه الحل


الجزمة هيه الحل

عندنا بيت فى الفلاحين ... مش عارف احنا بنيناه ليه من اصله ... يمكن علشان الحلم العبيط بتاع الارض والطين والجذور ... يمكن علشان الخوف من الزفة بتاعة شوفوا طوله وعرضة يا ولاد ... عواد باع ارضة ياولاد .... يمكن علشان بنيناة بالطوب الاحمر فى الوقت اللى كان كل البيوت بالطوب النى ... يعنى شوية عواجان على زهو على تفاخر ... المهم انه اتبنى وخلاص ... البيت ده مابنرحهوش غير مرة او مرتين فى السنه علشان ناخد ايجار الارض اللى برضة ما اعرفش احنا اشتريناها ليه ؟ مع ان ولا واحد فينا يقدر يفرق بين البرسيم والملوخية .... القصد ... تعبنا من الفيران اللى بتقرقض البيبان والعفش ... مش نافع معاها لا سم ولا مصيدة ولا لزق ... فقررت انى ادرس سلوك الفيران واتعامل معاهم من وجهة نظر نفسية ... بحكم التوجهات والدراسات ... لقيت ان الفيران طول عمرها فى الجحور ... مخنوقة محبوسة مذلولة ..ولما بتطلع على وش الارض ... الف من يمسك لها الشبشب والجزمة والعصايه ... دا غير الحقيقة العلمية اللى بتقول ان سنان الفيران اللى قدام بتطول مع الوقت فلازم يقرقضوا حاجة علشان لو طولت زيادة عن اللزوم ماتعرفش تاكل ... فقولت انا اتصالح مع الفيران ... احط لهم الاكل واجيب لهم خشبة يقرقضوا فيها ... ويانحله لاتقرصينى ولا عايز عسل منك ..ونفذت الكلام ... وشوية ولقيت الاكل اتاكل ... والخشبة اتقرقضت ... وبرضة قرقضوا البيبان والعفش ... وياريت على قد كدة ... دول جابوا القرايب والصحاب واتلموا حوالين البيت وعملوا مظاهرات ...واحتلوا الميدان... وان كان عاجبك يا اهبل يابتاع علم النفس ... ولانى صاحب قرارى ... ولانى بدافع عن بيتى وارضى وبيبانى وعفشى .... اعلنت الحرب من جديد ... عصيان وشباشب ومصيدة ولزق واحدث جهاز بيعلونوا عنه فى التليفزيون بيشتغل بالموجات الصوتية .... بصراحة تعبت علشان اتخلص منهم ...... بس اتعلمت ... اتعلمت ان الفار اللى عايش طول عمرة فى الجحر ماينفعش معاه تعديل سلوك وشوية الفرم بتاع فرويد وسكنر وبافلوف والعالم دى  .... صدقونى اتعلمت ان الجزمة هية الحل مع الفئران المقرقضون.

الاثنين، 3 سبتمبر 2012

مزاد الدين


مزاد الدين

دينكوا و دين ابوكوا و دين امكوا و دين اسلافكوا .... نزلتوة المزاد... و الا اونا...  الادوى ... الاترى  نشترى الدنيا بالدين نشتريها فمن يبيع ... نشترى الكراسى بالدين نشتريها فمن يبيع ...كدب وخداع وسفاله ..... لوع نسوان وكيد حريم ...ردح شراديح وكهن عاهرات .... بتبيعوا ايه بإيه جاتكوا القرف .
مش دى امريكا الشيطان الاعظم ... مش دى امريكا اللى مش عايزين معونتها ... مش دى امريكا اللى المخلوع كان بيسجد لها ... مش ده الشيخ الشهيد ابن لادن ...مش دى امريكا الوسخة اللى عطت لعيالكوا واخواتكوا وامهاتكو الجنسية .... بتبيعوا ايه  بإيه جاتكوا القرف .
قال والشعب الطيب عايز ينضرب على قفاه زى (حامد ) للمرة المليون وينتخب ابو الافتاح ومصدق بكل هطاله العركة الوهمية بينه وبين الاصدقاء المتأسلمون ....قال ويقولك شفيق ده فلول ... يانهار اسود على العقول المغسولة يابشر .
افخر اننى فلول ... وافخر اننى اكره الاصدقاء المتأسلمون واخواتهم فى الرضاعة ...افخر بأننى سوف ارشح الفريق شفيق ....وكفاية بقى عباطة وهباله ومتاجرة بالدين والشعب الغلبان ... كفاية بقى فيلم الثورة الاهبل اللى مصدقينه ده.
يا اخوانه ... يا خلق هو ... ياعالم ... يابشر ... يابنى ادمين ... فوقوا بقى يوم ماحتخرب مش حتخرب على اللى معاهم جنسية امريكية وخليجية وايرانية والمانية ... حتخرب بس..... على اللى معاه الجنسية المصرية ...
يحيا المجلس العسكرى.... يحيا المشير وعنان ... يحيا الفريق شفيق ... والموت للخونه وتجار الدين.