الجمعة، 25 مارس 2011

الاجازة لسة مفتوحة



الاجازة لسة مفتوحة

انا جيت مش علشان اقطع الاجازة ولا حاجة ... كل الحكاية انى جيت علشان اخد حاجة نسيتها وماشى على طول ... ومدام انا كدة كدة جيت حأسأل سؤال ونفسى حد يجاوبنى علية ويريحنى .... حاكم انا اليومين دول مش مظبوط وشاكك فى الدكتور اللى عمل لى العملية انه يكون عملها لى فى مخى مش فى رجلى زى ما كنت متفق معاه .... ودة اللى اثر على قدراتى العقلية فى الفهم والادراك ....

السؤال فى الفيلم الهندى اللى حصل من كام يوم ... فيلم الصباع البمبى ...المشهور باسم الاستفتاء على التعديلات الدستورية ...واللى قلب كيان البلد اكتر ماهو مقلوب .

الجيش قال لنا لو قولتوا نعم ... حنعمل اعلان دستورى تمشى عليه البلد فى الفترة الانتقالية الجاية .... ولو قولتوا لأ.... يبقى حنعمل اعلان دستورى تمشى علية البلد الفترة الانتقالية الجاية ...

السؤال بقى .... كان لازمته اية الاستفتاء اذا كان كدة كدة فية اعلان دستورى حنمشى عليه الفترة الانتقاليه الجاية؟؟؟؟؟؟؟؟؟؟؟؟

لو حد عندة اجابة يقولى والنبى ... او يخلى الجيش يبعتهالى مسج ,,, اصلى بصراحة وحشتنى مسجاته ...

شوفتوا اديكوا كنتوا حتنسونى فردة الجزمة التانية اللى كنت جاى اخدها ... ماهو انا اليومين دول بالبس فردة واحدة بس !!!!!!!!!!!!!!!



الثلاثاء، 15 مارس 2011

اجازة مفتوحة

اجازة مفتوحة

مولد وصاحبة غايب ... محدش يعرف ويحس بمعنى الجملة دى الا اللى حضر مولد قبل كدة واشترى حب العزيز وشاف بريللو وهوه بيلف بالموتوسيكل على الحيطة ... ولان مش كتير شاف المولد ... لان دلوقت بقى اسمة دريم بارك ... واحساس الملاهى لايمكن يكون زى احساس مولد السيدة غنيمة ...زى ما احساس الايس كريم عمرة مايبقى زى احساس الدندرمة اللى عليها الدبان من عربية الجلاطة اللى فى سوق الجمعة ... عموما اللى عايز يحس احساس المولد يبص على المحروسة اليومين دول .... حاجة كدة ماتتوصفش ... حاجه كدة فله ... قشطة ... هبل فى الجبل ... عباطة فى البطاطا ... خيبة بالويبة ... تعالى معايا نطوف ونشوف ... ائتلاف شباب الثورة ... مجلس امناء الثورة ... ائتلاف مصر ... عمرو خالد فى القناة الاولى بيرمى البزور ... وفى القناة التانية بيعمل حزب ... وعلى الفضائية بيترشح رئيس ....البرادعى قرر انه يتنازل عن الدكتوراة ويقدم السى فى لمخدماتى الحى علشان عايز يشتغل خدام لشعب مصر .... وعمرو موسى اللى فهمته منه لغاية دلوقت انه عايز يترشح بس لغاية دلوقت مش عارف عايز يترشح رئيس جمهورية ولا رئيس دوله .... حيبان .... كله حيبان ... اه جمال حشمت بتاع الاخوان عامل حديث فى صوت الامه بيقول فيه انه مش حيسيب حقة وحيلاحق مصطفى الفقى فى المحاكم علشان زور انتخابات 2005 ... دا غير انه بيطالب الفقى انه يطلع يعتزر للشعب المصرى عن اشتراكه فى الانتخابات ....اوعوا تفتحوا البورصة ... لا... لازم تفتحوا البورصة ... عشرين اعتصام تحت شباك مجلس الوزراء و بينادوا بالوقوف جنب عصام شرف ....كنيسه بتنهد ... مكان بيتعبد فيه ربنا بيتهد ... ونطلع بيافطة بتقول مسيحى ومسلم ايد واحدة .... نعمل اعتصام عند ماسبيرو اسبوع ونوتر الدنيا ... وبعدين ننضف مكانا واحنا ماشيين ونرفع يافطة لا للفتنة الطائفية ...قاعدين نتكلم على ثروة الرئيس وهوه فى شرم ولا فى تبوك ... وجيمى سايب دقنة وسوزان عندها اسهال وفريدة مخاصمة بابى ... وقبل الاستفتاء بتلت ايام افتكرنا ان فية تعديلات دستورية لازم نتناقش فيها ... وبعدين ادونا فرصة ننظم نفسنا ... يعنى تلت اربع خمس سنين كدهوه عقبال مانظبط ... ليبرالى ...قومى ...ناصرى ... اشتراكى ... اخوانى ...سلفى ... جهادى ... وسطى ... وطنى ... مسيحى ... حقوقى ... عبود راجع من على الحدود بعد ماقتل انور ... راجع فرحان مبسوط مش متدايق انه قتل ... ايه فيه حاجة ... حد ليه شوق فى حاجة ... اه ...احنا الجهاد وراجعين ...حد نفسة فى حاجة ....

وعلشان كلها بقت هردبيس ...على رأى جدى الله يرحمه ... ولانه مافيش فايدة من الحوارات والكلام .... قررت ان اقوم باجازة مفتوحة ... لان شايف ان حكاية المدونة دى مبقلهاش لازمة ... لانها بقت زى القربة المقطوعة ... مابينوبنيش منها غير النفخ ... وانا اتنفخت بما فية الكفاية ... خصوصا ان مبقاش فاضل بعد العبط اللى احنا فية غير ان ايبك يقتل اقطاى ... وشجر الدر تقتل ايبك ... وام على تقتل شجر الدر ... وقطز يقتل على ... وبيبرس يقتل قطز ... قلاوون يقتل بيبرس....و........وفى الاخر الشعب حيقتل نفسة علشان يرتاح من الكلام.

يالا باى ائتلاف ... شاو عمرو موسى ... شالوم برادعى .. جزاكم الله خيرا يا اخوان ... سعيدة يامسيحيين ... اللى اللقاء فى الجنة ياعبود ... عليه العوض يامصر

السبت، 12 مارس 2011

يا لوك لوك.... يا حجارة

يا لوك لوك.... يا حجارة

الشاب واقف على ناصية الشارع يعاكس البنت الحلوه ام جينز ... ويلف ويدور علشان يكلمها ... هوه صح ... طاقة جنسية ونفسية ... واثبات الذات وحب الاخر لينا زى الاكل والشرب ماحدش يقدر يستحمل قلته كتير .... بعد خمس سنين الشاب اتجوز ... ونزل يقعد على القهوة يحاول يرجع جزء من الحرية المسلوبة ... وهوه قاعد شاف على اول الشارع شاب بيعاكس البنت الحلوة ام بنطلون جينز ... لبس طاقية المدير الفنى وقعد يدى تعليمات الواد مش سامعها من اصله... يابنى مش كدة .. قرب الاول ... ياه دا انت غبى قوى .... هوه صح ... ماهو التدريب لما البنى ادم مايعرفش يلعب حاجة مهمة ولا نموت يعنى ؟....بعد خمس سنين ... بنت صاحبنا حلوه كدة عقبال ماتشوفوا عيالكوا عندها عشر سنين ... جابت له كوباية الشاى وهوه واقف فى البلكونة ...بيبص على الواد اللى واقف على اول الشارع بيعاكس البنت الحلوه ام جينز ... اتنرفز ودخل وهوه بيقول قلة ادب ومسخرة ... ومن نرفزته ماخدتش باله من ابتسامة الرثاء اللى كانت على وش بنته.... مشيها رثاء ....هوه صح ماهو بقى عنده بنت بدأت تكبر .... وهوه بدأ يخاف عليها ...... بعد خمس سنين وهوه رايح يصلى العشا .....شاف الواد واقف تحت الشجرة مع البنت الحلوه ام جينز وهاتك ياتسبيل ولمس ايدين ... طبعا بص لهم بصة بايخة وقاومهم بقلبه ... خصوصا لما سمع الواد بيقول للبنت ... جدو دة ماله بيبص لنا كدة ليه؟ ... هوه صح ... ما الايام قربت تخلص وعايزين نقابل ربنا بحاجة تشفع لنا ولو حتى نهى عن المنكر بالقلب .

السؤال هنا .... اى مرحله كان صاحبنا فيها صح ؟ ... عموما السؤال مش صح .... لان كل مرحله كان صاحبنا صح ... السؤال الاصح ...

انهى مرحله كان اصح ؟ ... ولما تتلخبط كدة وتبوظ منك العملية وماتعرفش راسك من رجليك .... يبقى لازم لك مرجعية تحكم وتقول مين الصح .... والمرجعية ممكن تكون دينية او قومية او ليبراليه او اشتراكية او مهلبية ... طاب مين فيهم الصح .... كلهم صح ... قول مين الاصح ... طبعا الدينية ... طاب انهى مذهب اصح ... السنى ولا الشيعى ... السنى طبعا ... طاب انهى امام اصح .. الشافعى ولا ابو حنيفة ولا مالك ولا ابن حنبل .. ولا انا فيه عقل .... بص... الاصح اللى فية ديموقراطية اكتر ...وحرية اطول ... يعنى افهم من كدة انك حتوافق على التعديلات الدستورية ... لا طبعا لان مافيش دستور اصلا واحنا فى شرعية ثورية .. احنا اللى عملنا الثورة ... وكلامنا لازم يتسمع ... احنا الصح ... طاب ما احنا برضة الصح ... يبقى نتحاور علشان نشوف مين فينا الاصح ....

عندنا هيه دى الحضارة ... يالوك لوك يا حجارة .....جاتنا القرف كلنا

الأربعاء، 9 مارس 2011

عمو ... والنبى يا عمو...

عمو ... والنبى يا عمو...

عموالجيش ...... والنبى ياعموا الجيش ... علشان خاطرى ... وحياة الشهدا اللى ماتوا فى التحرير .... والنبى ..... انا نفسى ..... لا مش مصاصة والله .... انا نفسى بس... انك تعلن الاحكام العرفية .....والنبى ياعمو ... والنبى .... والنبى..... مش علشانى والله ... دا علشان تيتا .... اصل عمامى ولاد الكلب ما صدقوا انها تتعب شوية وعايزين يموتوها .... اه ...عايزين يورثوها ... اه ... مهما ماشيين بمبدأ اقتل القتيل وامشى فى جنازته ....
الله يخرب بيتكوا كلكوا ياجهله ياولاد العبيطة الله يهدكوا كلكوا من حسنى لجمال لامن الدوله لسلفى لاخوان لنسيج لااتلاف لبرادعى للقناة الاولى للاسوانى لكل عبيط جعجاع فرحان بصوته للكل كليله..... الله يخرب بيتكوا حتخرب علينا كلنا

الأحد، 6 مارس 2011

بص لى يا خويا ....طيب..... بص لى ياحبيبى


ايها الاسوأ يانى ... انت مابتبصش ليه فى عين الراجل وانت بتكلمه ... علميا لها سبب من اتنين ... يا ما انت هايبة لضألتك ودى حقيقة ... يا اما انت بتكدب ... ودى برضة حقيقة ... فى اقتراح تالت ....هوه مش علمى بس يمشى ... وهوه ان الحرف التالت من اسم العيلة ... نون مش الف

الخميس، 3 مارس 2011

ارشح الفريق احمد شفيق رئيسا لجمهورية مصر العربية

ارشح الفريق احمد شفيق رئيسا لجمهورية مصر العربية

ارجوك يا سيادة الفريق ... اترشح رئيس لجمهورية مصر العربية علشان تحمينا من الغوغاء وانصاف العقلاء وادباء فرش الملاية... ولو حكمت حانزل على نقاله علشان انتخبك ...

المهنة : ثورجى

المهنة : ثورجى

اللى شاف حلقة امبارح من برنامج مصر بالبلدى .... واتفرج عليها بدون احكام مسبقة وبدون مايكون مع فريق ضد فريق ... والفريق هنا معناها مجموعة من البشر وليس معناها رتبة عسكرية ... لان اللى بيقول فريق او شفيق او اى حاجة اخرها ايق يبقى على طول من الثورة المضادة ..والخونه ومن اللى بيبيعوا دم الشهداء .

عموما انا كنت عايز اكتب انطباعاتى عن الحلقة من وجهة نظر محايدة على قدر الامكان ... الضيوف كانوا عمرو الحمزاوى ... واحمد كمال ابو المجد ... ونجيب سويرس ... وعلاء الاسوانى وحمدى قنديل ...وطبعا احمد شفيق ...ربنا يسامحنى بقى .. قولت اسمه ... طبعا مع حفظ الالقاب للجميع ... لان الواحد زى مالابد من انه يكون ديموقراطى لازمن انه يكون فى نفس ذات نفس الوقت مافيش تعارض انه يحترم اللى قدامه ...حتى لو اختلف معاه فى الفكر او التوجه او لبس الحظاظات ... القصد ... معلش يا دكتور حمزاوى ... برضه فرق العلام والثقافه ... مابيخليش اللى زيى يفهم انت بتقول ايه .. وانا من ناحيتى حأحاول اقرأ واذاكر علشان افهم حضرتك بتقول ايه بالظبط .. معلش يعنى اصل انا من افرازات مجانية التعليم ... بس والله انا مدخل بناتى مدارس خاصة ومشترك لهم فى الباص ...

الدكتور احمد كمال ابو المجد ... مثل اعلى يحتذى به فى العلم والعقل والتفكير للى عايز يفهم ويتعلم ومايدمرش كل تاريخة لمجرد انه بيطلع فى التليفزيون وبقى ليه شعبية ... ماهو بقى زمن السييطة والحنجورى .... ياخسارة يامصر عقمت خلاص ...

الاستاذ نجيب سويرس ... نموذج... مثل حى لرجل الاعمال الذكى المثقف الوطنى الواعى صاحب الرؤية ... ربنا يكتر من امثالك ويخفى المخفيين وامثالهم .

الاستاذ حمدى قنديل .. صحفى مخضرم حتى النخاع ... يعرف جيدا ان من مواصفات الصحفى الناجح هو الحصول على خبر او سبق صحفى ...

الروائى العالمى علاء الاسوانى ... معلش يا جماعة سامحونى على جهلى بموضوع العالمية دة ... لانى ماقراتش للاستاذ علاء حاجة قبل كدة ... واكيد انى مش حقرأ له حاجة بعد كدة ..... وان كان على الفيلم بتاع عمارة يعقوبيان ... فحتفرج علية علشان الاستاذ وحيد حامد بس مش علشان حد تانى ...دا مش علشان انا مختلف مع الاسوانى باشا ولا حاجة لاسمح الله ... لكن علشان هوه وصل لى الفكر بتاعة فى الحلقة ... ووفر علية الوقت اللى كنت حاضيعة فى القراية ليه ... وصلى ان الامثال لشعبية رغم بساطة مفرادتها الا ان فيها حكم عالية جدا ... زى ان الغجرية ست جيرنها ... زى انصح الجاهل يعييك ... زى اشوفك تعجبنى اسمعك استعجب ... وصل لى كمان ان لما يكون مثقفين البلد بهذا الاتجاه الذهنى وهذة الطريقة فى التفكير والحوار ... يبقى عليه العوض ومنه اعوض ... والله يرحمك يانجيب محفوظ انت واحسان عبد القدوس ويوسف ادريس ...وصلنى ان استمر فى مقوله : ياعينى عليكى يابلد كل رموزك فقاقيع ...

الفريق الدكتور احمد شفيق ... معلش يا باشا امسحها فيه .. ماهو اللى مايعرفش يقول عدس ... وشهادة لله وللوطن : فى المدة اللى اشتغلتهاماشوفتش غير اتنين مديرين ... سعادتك واحد رؤساء مجلس ادارة احدى الشركات المالتى ناشيونال اللى اتشرف انى اشتغلت تحت ادارته فيها ...

والله والله .. اصعب حاجة فى الدنيا انك تلاقى مدير بس سهل جدا جدا انك تلاقى حنجورى

عنوان البوست مستوحى من قول رجل الاعمال نجيب سويرس : الثورة علشان نغير مش علشان ناخدها مهنه .

الأربعاء، 2 مارس 2011

لعله خير




من الاخر هوه دة اللى حصل لى يوم الخميس اللى فات