الجمعة، 24 مايو، 2013

اهتز عرش ملك الكيف 2

اهتز عرش ملك الكيف 2


قبل ما نتكلم عن تجار المخدرات الجدد وانواع المخدرات الجديدة اللى بتكسب قوى ومابتدخلش السجن .... لازم نتكلم الاول عن زبون المخدرات ... واللى اسمه فى عالم الماركتنج : كاستمر .. وبعد ما الدنيا اتطورت وظهر وباء ال   ام بى ايه ... بقى بيسموه الكوليج .... القصد.
السؤال: ليه فين ناس بيتشرب مخدرات وناس لأ ؟
كتر فلوس مثلا ؟ .... ابدا ... فيه ناس بتقطع من قوتها وتشغل حريمها خدامات فى البيوت علشان تجيب تمن حتة الحشيش او سيجارتين البانجو .
علام وثقافة وكدهوة ؟... ابدا ...فيه دكتور جامعة بيشرب حشيش ... وزبال طالع من سته ابتدائى مابيشربش "مع احترامى الكامل للزبال اللى بيشيل زبالتنا ".
السن مثلا ؟ ... برضة ابدا ...فيه عواجيز رجليهم والقبر بتشرب المخدرات ... وشباب زى الورد فى عز تهورة وثورته مابيشربش .
الجنس ...؟ ...مافيش فايدة ... قصدى النوع مش السيكو سيكو .... برضة لا؟ فيه ستات بتكتم وتطلع من مناخيرها ورجالة بشنبات "ايام ماكان الشنب رمز الرجوله ... قديم انا معلش .." مابيحطوش السيجارة فى بقهم .
امال ايه ياعم الحاج ؟
من وجهة نظرى ان كلمة السر هيه..... الكرامة وتقدير الذات .
فيه كرامة وتقدير ذات ... مافيش مخدرات .... مافيش كرامة وتقدير ذات ... فيه مخدرات .... ببساطة كدة .
لان البنى ادم اللى عنده كرامة .....  وعزة نفس ......ومقدر نفسه ..... ومعترف بقيمتها .... وحاسس انه موجود ...وليه كيان .... وفيه معنى لوجوده .... وليه لازمة فى الدنيا .......عمره ماحيشرب مخدرات ... لكن لو مافيش شوية الحاجات اللى فاتت دى وكمان مافيش فرق بينة وبين الكائنات الاوليه وحيدة الخليه اللى بتتغذى بالضغط الاسموزى وتتكاثر ذاتيا ....يبقى ماقدامهوش غير ادينى الحقنة بسرعة ارجوك محتاجة الجرعة .... المسكن ... المهدىء ... المخدر... للصراع المزمن داخل النفس .
ياسيدى البيه ... اللى كتير مننا مايعرفهوش ان الانسان يقدر يعيش بلقيمات يقمن صلبة ... وبق ميه يبل ريقة ... ونومة تحت شجرة وايديه مخدته ...بس مايقدرش يعيش من غير مايحس بكرامته وتقديره لنفسه واعترافه بوجودة ... بالمناسبة .. مافيش فرق بين كبير وصغير ... متعلم وجاهل ... غنى وفقير ..مصرى و اخوانى ...كله واحد ... كله بنى ادم ... كله انسان .
وان حصل وبيحصل وحايحصل والانسان يعيش بدون ما يحس بكرامته وتقديره لنفسه واعترافه بوجودة.... فى الحالة دى يدخل البنى ادم بقدم ثابته الى طريق الموت حيا .... مرارة ..... عمليات دفاعية ... حرب على النفس .. اكتئاب ....  تبلد ..... واشارات المرور بقى على طول طريق الموت حيا... هيه المخدرات باشكالها القديمة والمستحدثة .... نوع من انواع العلاج ... بس علاج وهمى من بتاع قنوات الاخوه اللى بدقن ... علاج بياخدة العيان ويمشى عليه بانتظام ... وساعات كتير يزود الجرعة ... بس العيان مابيخفش ... ولا بيموت ... بس بيرتاح ... او بيتخيل انه بيرتاح.... راحة كده وكده ... زى ماكل حاجة حوالينا كده وكده ...

ونكمل المرة الجاية ياناس ياعسل.... مساااااء الخييييير . 

الأحد، 12 مايو، 2013

اهتز عرش ملك الكيف 1


اهتز عرش ملك الكيف 1

الحشيش هوه ملك الكيف... ماعرفش ليه سموه كده ؟ ...
عمرى ماجربت ملك الكيف .. برضه ماعرفش ليه ؟ ... يمكن ادب ... يمكن دين ... عقل ... خوف ... مش مهم ... المهم النى مجربتوش ...  مع انى حضرت قعدات كتير فيها ناس بتشد وتلعلع .... بينى وبينكوا اليومين دول بأقاوم بشراسة احساس انى عايز اشرب حشيش ياسعاد ؟؟ وبرضة ما اعرفش الاحساس ده جالى منين ؟ ... يمكن علشان ده الوقت المناسب لشرب الحشيش ؟... ماهولو ماشربناش حشيش فى اليومين السود دول ... حنشربه امتى ؟ ... لما الاخوان يرجعوا السجون  مثلا ؟؟!! .... القصد.
تاجر المخدرات عموما ....حشيش بودرة .. بانجو.. ترامادول .. تاجر ذو حيثية فى المجتمع ... فلوس وعزوه وسلطه ... وسطوه وصبيان وسلاح ... حاجة كده اشى خيال ياناس ... لكن رغم كل الهيلمان ده .... بيصعب عليه  .... عايش ياعينى فى قلق ورعب وخوف ... مش عرف يلاقيها منين ولا منين ... حرس الحدود وشرطة المسطحات من ناحية ... ومباحث مكافحة المخدرات وخيانة الصبيان وكيد النسوان من الناحية التانية ... ومتنساش ندالة التجار مع بعضيها ... دا طبعا غير نظرة المجتمع .. وان كان نظرة المجتمع دى حلها بسيط ... كل الحكاية .. عجلين يندبحوا اول كل شهر للغلابة ... والدبح يكون قدام الجامع اللى بناه الحاج بعد مارجع من عند النبى وعمل فيه مستوصف ودار تحفيظ قران ... عادى ...الناس دايما بتسامح الغنى وتنسى له اى حاجة وحشة وتغنى له وتدعيله ... حتى لو كان تاجر مخدرات .... برضه مادخلناش فى الموضوع ...
صلى على النبى ...لأن تاجر المخدرات مكون رئيسى فى اى مجتمع استبدادى ظالم مش عارف يعلم ولا يشغل شبابه وبالتالى مش عارف يجوزهم ... ولا قادر يوفر حد الكفاف للغالبية العظمى منه .... يبقى تاجر المخدرات لازم يطور نفسه علشان يكبر ويكبر تجارته ... فوجب عليه ان يواكب العصر والعولمه وثورة المعلومات والانتر نت ... ولان المخدرات مش حشيش وبودرة وبانجوبس ولان فيه انواع جديدة بقالها سوق ومريدين وزباين ... فبدأ التطوير ....مخدرات جديدة ... مميزاتها فاقت التصورات .... مافيهاش حرمانيه ولا يعاقب عليها القانون .. وتجارها  قيمة كده وسيما ونجوم مجتمع ... مش كده وبس ... دول كمان بقوا مثل يحتذى به ... حلوة يحتذى دى ... بتفكرنى بالشعر العباسى اللى كنا بناخده فى ثانوى ...
نكمل المرة الجاية علشان ماتزهقوش منى ..... يالا باى   

الخميس، 9 مايو، 2013

مشاهد من مصر7 حمو الاوفيس بوى


مشاهد من مصر7

حمو الاوفيس بوى

حمو عنده 29 سنه ... معاه دبلوم صنايع قسم خراطة ... حمو ساكن فى كمبوند ابو خروف ... مداخل مجارى ... حمامات مشتركة ... سقف بلاستيك ... بلطجية للحراسة ... حمو اشتغل كل الشغلانات اللى ممكن تخطر على بالك ...انتهى بيه المطاف فى شركة مقاولات ... اوفيس بوى ... او بالبلدى فراش ... بالحقيقى بقى مرمطون ...  روح ياحمو هات عيش .. حاضر ... تعالى ياحمو اعملى قهوه ... حاضر ... روح ياحموا صلح لى الجزمة الايطالى ... حاضر .... تعالى ياحمو امسح المية اللى وقعت على المكتب  حاضر ... حاضر .. حاضر ...
انت اتأخرت ليه مواعيد الشركة 8 بالدقيقة ... معلش ... انت غيبت فى الحمام ليه ... معلش ... انت مش سامع الجرس يابنى ادم ... معلش ... انت لسه حتاكل ... معلش ...وبعدين حد ياكل طعمية فى الحر ده ... معلش ... كلمنى من بعيد ريحتك وحشه ... معلش ... طول النهار يا حاضر يا معلش .... كلمتين وبس .
مرتب حمو 400 جنية شامل  بدل الاهانه والذل وكسرة النفس .... حمو بيدفع 5 جنية فى اليوم مواصلات رايح وزيهم جاى ....
البهوات اللى فى الشركة كل واحد فيهم عنده عربية ... البهوات اللى فى الشركة بيدوا حمو مفاتيح العربية علشان يغسلهالهم ... عموا كان فرحان ... سبوبة تجيب المواصلات ويطلع بال400 جنيه خالص مخلص ... حمو كل امله انه يطلع بال400 جنيه خالص مخلص .
فى يوم اسود غطيس ... صاحب الشركة الغنى المحترم  شاف حمو وهوه بيغسل عربية واحد من البهوات ...صاحب الشركة الغنى المحترم قرر يخصم يومين لحمو .... عنده وجهة نظر ... بيقول الوقت اللى بيضيعه حمو فى غسيل العربيات ده وقت الشركة ... من حق الشركة ... من فلوس الشركة ...
ولغاية هذة اللحظة محدش عارف حمو بيعمل ايه بال100 جنية ... ماهو بيصرف 300 مواصلات ..
 ولغاية هذة اللحظة محدش عارف لغاية امتى حمو حيقدر يقاوم ومايتحولش لبلطجى .
ولغاية هذه اللحظة محدش عارف حمو عايش ازاى ... او بمعنى اصح ... عايش ليه ؟


الثلاثاء، 7 مايو، 2013

مشاهد من مصر6 أم سحر أو سينا (المشهد الخامس )


مشاهد من مصر6
أم سحر أو سينا
 (المشهد الخامس )

وصل البيه الدكتور وأم سحر البلد ... أم سحر فتحت باب العربية ورمت نفسها على الارض وتاخد من التراب وتحط على دماغها ... يالهوى .. ياخرابى ... يارب ... احنا غلابة يارب ... احنا تحتك يارب .
على باب بيت الميت ... واحد بدقن مصمم ان هوه اللى يغسل الميت ... وواحد تانى من غير دقن بيشده من ايده ويقوله : والنعمة الشريفة ماحيحصل ... ليه هوه انت من بقية اهله .... والمصحف مانت داخل علية.
ابو دقن : انا اللى حأغسل يعنى انا اللى حأغسل... علشان الغسل يبقى شرعى .
ابو من غير دقن : هوه انتوا عايزين تكوشوا على كل حاجة حتى غسل الميتيين ... ياعالم ارحمونا بقى .
البية الدكتور دخل لقى ابو محمد نايم على ضهرة ومغطيين وشه بالملاية ...وقاعدين حواليه يصوتوا وينوحوا ... البيه رفع الملايه .... فتح عين ابو محمد وبص فى الننى ... نفسى اعرف هما الدكاترة بيعرفوا ايه لما بيبصوا فى الننى .. ولا لما يقولوا للعيان قول اه... عالم بتشتغلنا والنعمة . القصد ..
اول ما البيه بص فى الننى بتاع ابو محمد صرخ وقال : اى حمار فيكوا يروح الاجزخانه ويجيب جلده جلكوز وجهاز محلول .... بسرعة ياولاد الكلب .
ابو محمد مطلعش ميت ولا حاجة ... ابو محمد خد حقنه الانسولين... ومافطرش ... قال نشرب المعسل الاول ...ابو محمد دخل فى غيبوبة سكر .
مش دى المشكله .. المشكله ان مافيش حمار من اللى بينوحوا ويتعاركوا جنبه فكر يجيب دكتور يشوفه ...
المشكلة الاكبران البلد دى فى القرن 21 مافيهاش وحدة صحية ...والصيدليه الوحيدة اللى فى البلد فيها بت دبلوم صنايع قسم زخرفة .... بس بت ... الصيدلية بتجيب فى اليوم الف جنيه ... حلوه بقى والشباب طالع داخل بيجيب جيل ... وكيس الريحة ابو نص جنيه.
ابو محمد فتح عنييه ... ابو دقن مسك فى ايد ابو من غير دقن ومشوا ... الصويت وقف ... الناس اختفت ... البيه الدكتور خد عربيته ورجع عيادته ..
ولغاية هذه اللحظة محدش عارف أم سحر كانت زعلانه قوى كده ليه على ابو محمد رغم انه مالوش اى لازمة فى حياتها  غير انه بيشرب معسل ؟
ولغاية هذه اللحظة  محدش عارف سبب العلاقة الطرديه بين الرجوله والمعسل ؟.
الاهم بقى انه لغايه هذه اللحظة... واللحظة الجاية والسنه الجاية والقرن الجاى ... محدش عارف الفرق بين حياة أم سحر وغيبوبة ابو محمد ؟.
الحاجة الوحيده اللى عرفتها وكانت محيرانى قوى ... وهيه ليه بينادوا على ام سحر ويقولولها يا أم سحر مع ان ابنها الكبير اسمه محمد ؟ ... لانها ببساطة ... ولدت سحر فى السوق ... ومن يوميها وهما بينادوها أم سحر  ... على فكرة ... رجعت يوميها مجبورة ... رزق سحر بقى .


الاثنين، 6 مايو، 2013

مشاهد من مصر5 أم سحر أو سينا (المشهد الرابع )


مشاهد من مصر5
أم سحر أو سينا
 (المشهد الرابع )

بدأت علاقة انسانية اجتماعية اقتصاديه نفسية قوية جدا بين الست هانم وأم سحر ... مش بقولوكوا الست هانم هيه أم سحر وأم سحر هيه الست هانم ... القصد ... زيارة ام سحر الاسبوعية للست هانم ... زيارة خير ... اشى قميص لمحمد ... اشى بيجاما لسعيد ... ومرة حله ... اى نعم ايديها مكسورة ... بس تيفال ... بطانية ... جاكت فرو للبت ... الزغلول بقى ... قميص نوم شفتشى بمبه حلاوه بالروب بس ام سحر قالت تشيله لبت من البنات ... فالمتعة والانوثة والاحساس بالادمية كلمات ليست لها وجود فى قاموس أم سحر .... تسمع عنها من بعيد بس عمرها ماجربت ... وتجرب ليه ؟ ... هيه عارفة وظيفتها كويس ... وماتقلقش على ابو محمد ...المهم عنده الطفح والمعسل ... الحاجات دى بالنسبه له مش اكتر من فك زنقة ..... او بالفلاحى فك حصر ..... وساعة الزنقة مابيفرقش كتيرالديورافيت عن ورا الشجرة.
فى يوم دخلت الست هانم علشان تحط البيض البلدى واللبن الجاموسى والزبدة الفلاحى فى التلاجة .... وفجأة سمعت صوات ام سحر: ... يالهوى ... يالهوى ... يامرارى ... انكسرت ياناس ... ماليش غيرك يارب ...
الست هانم طلعت جرى من المطبخ : جرى ايه ... فيه ايه يا أم سحر ؟!
أم سحر : مات ... مات ياست هانم مات ... سندى مات ... ضلى  مات .
الست هانم : هوه مين اللى مات ياوليه .
ام سحر : ابو محمد ياختى ... ابو محمد مات ... يارب ... يارب ... ملناش غيرك يارب ... احنا بتوعك يارب ... والختمة الشريفه سايباه زى الفل .
الجيران اتلمت على صوات ام سحر ... الست هانم اتصلت بالبيه الدكتور جوزها علشان يلحقها ... البيه الدكتور جوزها زعق لها فى التليفون وقالها : انا مالى يموت ولا يولع انا فاضى للكلام ده ... الست هانم قعدت تتحايل عليه علشان ينقذها من الموقف الغريب اللى هيه فيه ... الناس واقفة قدام باب البرج ابو مداخل رخام وسكيوريتى بيقولوا : الست هانم بتعذب الخدامة ...
وصل البيه الدكتور .... خد أم سحر فى عربيته وطلع على بلد أم سحر ... فى العربية  أم سحر فضحته فضيحة المتطاهر ...صوات وصريخ ويالهوى والحقونى ياناس...... الناس طول مالعربية ماشيه بينهم  بيقولوا الراجل خاطف الوليه ... بيقولوا بس ...
 واحد فيهم قال: الله يخرب بيتك يامرسى ماعدتش فيه أمن فى البلد  . قام واحد تانى رد عليه : ومرسى حيعملكوا ايه ؟ ... دا كله من الفساد اللى من ايام المخلوع ...واحد تالت بقى قعد يصور ام سحر وهيه بتعيط فى العربيه ... قالك يمكن نبيع الفيديوا ل سى بى سى ولا الجزيرة مباشر واخد قرشين ... ماتولع المخطوفه.

الى اللقاء فى المشهد الخامس 

السبت، 4 مايو، 2013

مشاهد من مصر4 أم سحر أو سينا (المشهد الثالث )


مشاهد من مصر4
أم سحر أو سينا
 (المشهد الثالث )

أم سحر تعبت من مشوار السوق اللى كل يوم بتعمله من  28 سنه كان لازم تروح السوق بأى شكل ... صحتها كويسة .. عيانه ... دراعها مكسور ... حبلى  ...بس لازم تروح السوق ... امال مين حيصرف على البيت ويجيب المعسل لابو محمد ... 
وفى يوم وهيه رايحة السوق  لا بيها ولا عليها ... وقفت جنبها عربية الست هانم .... ست هانم زى اى ست هانم فى مصر  ... زى ما أم سحر زى أى أم سحر فى مصر ...... على فكرة الست هانم وأم سحر ...الاتنين..... مقهورين  بيشقوا بيتمرمطوا بيتبهدلوا .... والاسم نسوان ... كل الحكاية ان الواحده فيهم لما بتلاقى فرصة تعيش فيها .... ولو بالكدب .... دور الست هانم بتبقى ست هانم على طول  مابتضيعش الفرصة .... لانها عارفة ومتأكدة انها حتفوق من الحلم على الحقيقة ... حقيقة انها ام سحر مش الست هانم   ... (عرضتها انا شويه ... معلش )
 القصد ... الست هانم نادت على ام سحر : انت ... ايوه انت ... تعالى ... انت معاكى رقاق وعيش من المكبب البنى ده ؟....
 ام سحر من اللى شافته فى دنيتها من اول ابوها واخواتها ...لعم زيادة ... لدكتور الوحده لابو محمد ...لحماتها ...داغير اخت جوزها اللى ماجبناش سيرتها لان اللى كانت بتعمله عايز دفاتر..... لغاية منصور العبيط اللى بياخد منها ارضية على قعدتها فى السوق  ... كل اللى شافته ام سحر فى دنيتها خلاها تحس كده ان الست هانم دى لقطة .... سبوبة وربنا حدفها فى سكتها ..... كلمة من الست هانم لكلمة من ام سحر ... ام سحر ركبت العربية وراحت البيت عند الست هانم ....
طول ما ام سحر قاعده فى العربية وهيه بتحلم ... اخد منها قميص من بتوع البيه بتاعها للواد محمد ... ياسلام لوطرحة للبت عبير تروح بيها المدرسة ... اكيد حتدينى حته بغاشة ولا حتتين بقلاوة للبت سحر مأنا بنشوف الناس اللى زى دى يتعمل اللى اسمه ايه ده عيد الميلاد كل يوم والتانى .

الى اللقاء فى المشهد الرابع  

الخميس، 2 مايو، 2013

مشاهد من مصر3 أم سحر أو سينا (المشهد الثانى )


مشاهد من مصر3
أم سحر أو سينا
 (المشهد الثانى )

أبو ام سحر واخواتها الرجالة اتفقوا على شبكة 200 جرام دهب للبت ... بكده ضربوا عصفورين بحجر .... الاولانى ... خلصوا من البت وهمها قبل ماتكبر وتجيبلهم العار ... التانى ... جابو لاختهم الدهب اللى يشرفهم قدام الناس ويأمن للبت مستقبلها ... عداهم العيب وأزح ... بعد ماخلصوا الاتفاق مع ابو محمد ولعوا الجوزة وقاعدوا يشربوا المعسل وعلى وش امهم نشوة انتصار زايف ... ماتتلخبطش... ابو محمد يبقى جوز ام سحر .... ما انا قولت لك انى مش عارف بينادوها ام سحر ليه ؟ رغم ان ابنها الكبير اسمه محمد .
ليله الدخله ... ام سحر ماكانتش فاهمة ايه اللى بيحصل ... كل اللى حواليها بيضحكوا ويزرغتوا ويضربوا نار ... لكن هيه كانت زعلانه ... ان ان امها خدت منها العروسة اللى خالتها عملتهاله لما كانت بتنجد ...
بعد ما اتقفل عليها الباب هيه وابو محمد ... فردت وشها وقلعت هدوما ومددت على السرير ... امها قالت لها كدة ... وهيه نفذت كل اللى قالت لها عليه امها ... وسابته بعمل اللى هوه عايزة ومافتحتش بقها ...ماهى ام ام سحرقالت لها كمان سيبيه يعمل اللى هوه عايزة وماتفتحيش بقك ... ام سحر نفذت واتألمت وقامت بوجعها تعمل لابو محمد الشاى وترص له  كرسى المعسل...(يلعن ابوك مجتمع ).
فى الصبحية .. بعد ما اثبت ابو محمد رجولته ... طلع نشر القماشه من غير مايغسلها ... علشان بقع الشرف ماتروحش وتثبت للكل ان ابو محمد راجل وان ام سحر اللى عندها 12 سنه شرعا و 18 سنه قانونا شريفه ..... اول حاجة عملها ابو محمد بعد مانشر صك الشرف انه قلع ام سحر الدهب .... كل الدهب ... ال200 جرام ونزل الصاغة باعه ورجع على السوق واشترى بقرة ولده بعجلها ...وبدات ايام الشقى لام سحر ... تترب تحت البهايم ... تحلب ... تعمل الزبده والجبنه والقشطة ... تلم بيض الفراخ وتخبز العيش البتاو وتلم كل ده وتشيله على راسها والساعة 6 الصبح تكون فى السوق .... تقعد فى نغرة الشمس وميه المطر لغاية ماتجبر ... تلم حاجتها وتشترى المعسل والفحم لابو محمد وترجع جرى علشان تغديه ...

الى اللقاء فى المشهد الثالث  

الأربعاء، 1 مايو، 2013

مشاهد من مصر2 أم سحر أو سينا (الجزء الاول)


مشاهد من مصر2

أم سحر أو سينا
 (المشهد الاول)

ماعرفش بينادوها أم سحر ليه ؟ ... رغم ان عندها محمد وسعيد وعبير غير سحر الصغيرة ..
أم سحر عندها 40 سنه ... هيه بتقول كده ... بتقول انا مولوده ليله رجوع عمى توفيق من حرب اكتوبر ... علشان كده سمونى سينا  ....
محمد ابنها الكبير عنده 27 سنه ... ما اصل الحكاية بدأت من 28 سنه .... صلى على النبى ... فى صباح يوم اغتيال الطفوله.... العيد الشهرى للقرية ....وصل عم زياده حلاق الصحة ... والدور كان على سينا ...
 دخلت سينا ... وافترى عم زيادة ... جار وحف ومعطاش لنفسه فرصة يراجع حديث النبى ويخف بس ومايحفش ....القصد ...مشهد غريب مالوش تفسير غير ان العالم دى هبله ...  سينا بتصرخ ... العيال اللى واقفه على باب الاودة ماسكين فى  بعض بيعيطوا وهما بيتفرجوا على  سينا ... ما الدور جاى عليهم ... عم زياده بيمسح الدم من على الموس بخرقة .. وبيلم العده وبيحلم بالخمسة جنيه وكباية الشاى ... ام سينا بتزرغت ... ابو سينا قاعد على باب البيت بيشرب معسل ورافع شنبه وعلى وش امه ابتسامه فخر ... اخواتها الرجاله بقى ...ولا بلاش....  القصد ..
بعد شهرين رجع عم زيادة ... بس المرة دى علشان ياخد جوزين حمام وبرام رز وفطيرتين مشلتتين ... لا مش ليه خالص .... دا الشىء لزوم الشىء ... بعد ساعة ... رجع عم زيادة ومعاه شهادة تسنين لسينا بان عندها 18 سنه مختومة بختم النسر  .... بعد ساعتين ....... سمعوا خبر دكتور الوحده قال ايه ... نقلوه مصر علشان يعملوله غسيل معدة ... اللخبطة والطفاسة والمال الحرم بيعمل تلبك معوى ..... القصد .
ابو سينا واخواتها قاعدين مع العريس اللى جاى لسينا ... بيشربوا الشاى والمعسل وبيتكلموا فى مصير البت ... ام سينا واقفة تتصنت من على الباب ... سينا بقى كانت قاعدة هيه وصحابها وبيعملوا  اطباق وحلل ومعالق  من الطين .

الى اللقاء فى المشهد التانى