الخميس، 9 مايو، 2013

مشاهد من مصر7 حمو الاوفيس بوى


مشاهد من مصر7

حمو الاوفيس بوى

حمو عنده 29 سنه ... معاه دبلوم صنايع قسم خراطة ... حمو ساكن فى كمبوند ابو خروف ... مداخل مجارى ... حمامات مشتركة ... سقف بلاستيك ... بلطجية للحراسة ... حمو اشتغل كل الشغلانات اللى ممكن تخطر على بالك ...انتهى بيه المطاف فى شركة مقاولات ... اوفيس بوى ... او بالبلدى فراش ... بالحقيقى بقى مرمطون ...  روح ياحمو هات عيش .. حاضر ... تعالى ياحمو اعملى قهوه ... حاضر ... روح ياحموا صلح لى الجزمة الايطالى ... حاضر .... تعالى ياحمو امسح المية اللى وقعت على المكتب  حاضر ... حاضر .. حاضر ...
انت اتأخرت ليه مواعيد الشركة 8 بالدقيقة ... معلش ... انت غيبت فى الحمام ليه ... معلش ... انت مش سامع الجرس يابنى ادم ... معلش ... انت لسه حتاكل ... معلش ...وبعدين حد ياكل طعمية فى الحر ده ... معلش ... كلمنى من بعيد ريحتك وحشه ... معلش ... طول النهار يا حاضر يا معلش .... كلمتين وبس .
مرتب حمو 400 جنية شامل  بدل الاهانه والذل وكسرة النفس .... حمو بيدفع 5 جنية فى اليوم مواصلات رايح وزيهم جاى ....
البهوات اللى فى الشركة كل واحد فيهم عنده عربية ... البهوات اللى فى الشركة بيدوا حمو مفاتيح العربية علشان يغسلهالهم ... عموا كان فرحان ... سبوبة تجيب المواصلات ويطلع بال400 جنيه خالص مخلص ... حمو كل امله انه يطلع بال400 جنيه خالص مخلص .
فى يوم اسود غطيس ... صاحب الشركة الغنى المحترم  شاف حمو وهوه بيغسل عربية واحد من البهوات ...صاحب الشركة الغنى المحترم قرر يخصم يومين لحمو .... عنده وجهة نظر ... بيقول الوقت اللى بيضيعه حمو فى غسيل العربيات ده وقت الشركة ... من حق الشركة ... من فلوس الشركة ...
ولغاية هذة اللحظة محدش عارف حمو بيعمل ايه بال100 جنية ... ماهو بيصرف 300 مواصلات ..
 ولغاية هذة اللحظة محدش عارف لغاية امتى حمو حيقدر يقاوم ومايتحولش لبلطجى .
ولغاية هذه اللحظة محدش عارف حمو عايش ازاى ... او بمعنى اصح ... عايش ليه ؟


هناك تعليق واحد:

  1. ثقافة الهزيمة .. البحث عن الشمس‏

    شركة سيارات صينية
    Geely
    و نظرا لفشلها فى أنتاج سيارة على مستوى عالى من الجودة تستطيع بها المنافسة فى الأسواق العالمية ، أشترت فى عام 2010 شركة فولفو السويدية لصناعة السيارات لتنقذها من الأفلاس ، وقاموا بنقل تكنولوجيا متقدمة إلى الصين. و يبلغ مرتب العامل بشركة السيارات الصينية 400 إيرو شهريا ، بينما فى السويد يتقاضى العامل 8 أضعاف هذا المرتب ، و تقوم الشركة الصينية الأن ببناء 3 مصانع لتصنيع سيارة فولفو فى الصين. و هذا مثال جيد لما ينبغى أن تفعله مصر لنقل التكنولوجيا المتقدمة سيما أن أجور العمالة منخفضة فى مصر ، و يمكن أن نعمل هذا مع شركات عالمية ألمانية لصناعة مستلزمات الطاقة الشمسية.

    و للأسف أغلب بلاد العرب تغوص بالنفايات و القمامة ، بينما منذ أكثر من 50 عاما فى الخارج أوروبا و أمريكا يتم أعادة تدوير النفايات والذى لا يصلح يتم حرقه فى مصانع خاصة لأنتاج الطاقة ، و يعتمد عليها فى أنتاج جزء ليس هين من أحتياجات الطاقة. ليس لدينا هذه المصانع و هى رخيصة و لا حتى أحد يتكلم أو يكتب عن هذا الموضوع . هل نحتاج إلى 50 عام أخرى حتى تصل و تطبق هذه الفكرة فى مصر و البلاد العربية؟!!!

    باقى المقال بالرابط التالى

    www.ouregypt.us

    ردحذف