الخميس، 29 أبريل، 2010

هـلـفـطه

هـلـفـطه

من مأثورات البرادعى (سعد زغلول سابقا): أنّ الحق فوقَ الحكومة، وأنّ الأمة فوق الحكومة، وأنّ النظام الحاكم يحكم نيابة عن الشعب ....... لولولولولولولى ...زرغتى ياللى مانتيش غرمانه ...وطبلى ياهبله ... وسقفى يامايله ...وخلى الاحلام والامانى تاكل دماغك ...مانتى بقالك سبع تلاف سنه بتتمنى يجيلك الزعيم المخلص ... اللى حينطأك على وش الدنيا ....ومجاش ومش حيجى ...وغلاوتك عندى ماهو جاى ...علشان حدوتة الزعيم دى فى خيالك المريض ياهبله ...ماعادتش موجودة فى الحقيقه।

الصراع بعد ما كان بين الناس والحكومه ....اتحول وبقى صراع بين الناس والناس ....وبعدين اتحول تانى ...وبقى بين الناس ونفسها ...افتكرت المثل اللى بيقول ماقدرش على الحمار قدرعلى البردعه ....طبعا انت فهمت ان الحمار هوه الحكومه .... والبردعه هيه احنا ...الشعب يعنى ... انا برضه كنت فاكر كدة بس بعد مابصيت كويس ...لقيت ان البردعه هيه الحكومه ...واحنا ...الشعب يعنى.... هوه الحمار.

من يوم ماوعيت على الدنيا ...ومصر كلها بتحكى فى المحكى ...وبتقول فى المتقال ...وترغى فى المرغى ...مشكله الاميه وبوظان التعليم ....مشكله الاسكان وتنظيم النسل ...الدنيا زحمه ... اللحمه ولعت ....السكر غلى ...وانا احلى بايه ...امريكا مضطهدانا ...العرب حسدينا ....اسرائيل عملالنا عمل على شنب قرموط عايم فى خليج العقبه ... ايران مشبشبالنا ...... لكن احنا ................................... ززززززززززززززى الفل .

ربنا لما بيغضب على ناس بيرزقهم الجدل ...مش مصدق ..بص على الفضائيات ...والجرايد المستقله ....وليه تبعد ؟!!!! بص علينا واحنا قاعدين مع بعض .

ياللا باى... بينا موبيلات ......

الاثنين، 26 أبريل، 2010

وبسهم مصرى مسموم

وبسهم مصرى مسموم

مشكلتى ان بحب السيما ...بس السيما اللى بجد ...بس الموضوع دة بقى بيحرق دمى اليومين دول ...يادوب لسه طالع من فترة النقاهه ...كانت فى البيت مش فى شرم ... مش حسد والله المرض مافيهوش حسد ... وبعدين برغم كل حاجه انا بحبه وشايف ان احنا حنلوص من بعدة ...القصد يادوب لسه طالع من فترة النقاهه بعد اللى حصل لى لما شفت فيلم كابتن بومه اللى احداثه بتدور فى رمضان ...واشوف فيلم الوان السما السبعه ....فيلم بيحكى حكايه مومس وزانى ....وبرضه الاحداث فى رمضان ...انا مش عارف ليه رمضان ...ماالسنه فيها احداشر شهر تانيين ...اشمعنى رمضان ياولاد الكلب ...قبل ماتزعلوا من الشتيمه شوفوا معايا لقطه من الفيلم ....

المومس راكبه عربيه من ام فلوس كتير بعد ما نزلت من شقتها الفخمه... يعنى شوفتوا يابنات..... الدعارة بتكسب ازاى !!....وهيه سايقه جالها تليفون من واحد ...بيقولها انا لسه واصل من لندن ...ايه ...تجيلى ولا اجيلك ...تقوم المومس تقوله ايه : عندى مشاوير مش حينفع دلوقت ...خلينا بعد الفطار ... طاب افهم ...المشاوير اللى منعاها ...ولا هيه فاهمه ان الزنا بيفطر ...فنخليها بعد الفطار احسن .... حكمتك يارب ....

المشهد التانى : عم الزانى طالع بعد ماصلى العيد ...وهوه بيلبس الجزمه...يجيله تليفون من ستنا المومس ...تقوله انا عايزه افطر معاك كحك بسكر ....يقوم يروح معاها عند مامتها ياكل الكحك .... والسكر كان بعد مشهدين تلاته

انا مش معترض ان الافلام تناقش قضايا المومسات والزوانى ...ماهم فئه من المجتمع ...وموجودة فى اى مجتمع ...حتى مجتمع النبى كان فيه اللى بيزنى ...بس اللى مش قادر ابلعه ...ليه رمضان ...وليه الجامع ...وليه الخلفيه دايما جامع قلعة صلاح الدين..... عارفين ليه ....علشان المعلومه توصل للجميع ...كله يفهم كله يستوعب .....احنا مش بنعترض على الدين ياجماعه ...بس الدين مكانه الجامع ...الجامع وبس ...مش اكتر من كدة ....صلى وصوم واعبد ربنا زى ما انت عايز ...بس دا مايمنعش انك تزنى ...وتشرب خمرة ...ولو عايز لواط وسحاق ...عادى ...حريه شخصيه ...حقوق الحيوان ...

ماهو لو الكلام دة بيقوله الامريكان والاوربيين ...ماشى الحال عادى ...حياتهم وافكارهم وهما أحرار فيها ...يعملوا اللى هما عايزينه ...انشاله يناموا مع كلاب السكك ... لكن لما يكون اللى بيروج للنجاسه دى مصريين ...مسلمين ...الممثلين والمؤلفين والمخرجين والمنتجين ...مصريين ومسلمين .... يبقى فيه حاجة من اتنين .... يا اما الناس دى مش عارفه انها بتقتل البلد اللى نصها جاهل والنص التانى أمى ...وعايزة حد يفهمها ان مش كل حاجه تتقلد وان مش دة الابداع ....يا اما الناس دى متعمدة انها تقتل المجتمع والاسلام بسهم مسموم ....

يارب ...ياقوى ...يامنتقم ...ياجبار ...أرنا فيهم عجائب قدرتك

السبت، 24 أبريل، 2010

بأحلف بسماها وبتربها ...........لأخربها

بأحلف بسماها وبتربها ...........لأخربها

الدايرة اللى انا عايش فيها بياخدو منها اتنين لمجلس الشعب ...واحد فئات وواحد ياعمال يافلاحين...دا على اساس ان دلوقت فيه عمال لابسه العفريته الزرقا وماسكه فى ايديها مفتاح الانابيب وبتبنى مصر ....ولا اصلا بقى فيه فلاحين بتصحى الفجر تسرح الغيط علشان تزرع الدهب الابيض طويل التيله ... وللى مايعرفش احسن وقت بيبنى عليه الفلاحين بيوتهم على الارض الزراعيه ...هوه موسم الانتخابات ... حاكم الحكومه بيجيلها رمد حبيبى فى موسم الانتخابات مابتشوفش كويس المبانى وهيه طالعه على وش الارض الزراعيه ...مش ده اللى عايز اتكلم فيه ....اللى عايز اتكلم فيه ان الزفه بدأت بدرى ... عديت اليفط..... لقيتهم اتنين وستين واحد وواحده مرشحين نفسهم .... ايوه مالستات بقى لهم مقعد دلوقت شوفتوا احنا بنتطور ازاى.... طبعا كلهم مترشحين من اجلنا ...كلهم منا وبنا ... كلهم عايزين يغيروا ....كلهم بيحبوا مصر ....كلهم حيخدمونا ويبوسوا ايدينا ... ويعدوا علينا كل يوم باليل يشوفونا عايزين اى حاجه ولا لأ ...وقبل ما ننام يطرقعولنا صوابعنا ....

لو شوفتوا اسماء واشكال وتاريخ المرشحين ...تعرفوا ان الموضوع مافيهوش مصر خالص ...ولا تغيير ولا من اجلنا ولا صوابع ولا بدنجان...الموضوع ليه بعد تالت ورابع وخامس ....ياعالم ياهوه ...ياعالم حرام عليكوا الضرب فى الميت حرام ...مصر ماتت وعفنت والدود كلها خلاص ....مش هاين عليكوا تسيبوا لنا شوية العضم .... ولا لازم تطحنوه هوه كمان ....

نصيحه لوجه الله :

.... ظبطوا.... وسستموا ...وارشوا ...واعملو اللى فى نفسكوا فيه ....واخربوها على الاخر .... بس اعرفوا يوم ما البلد دى حتخرب ......حتخرب عليكوا قبلنا..... الهى يخرب بيوتكوا

الخميس، 22 أبريل، 2010

محدش يشتغلنى ....انا بأشتغل نفسى

محدش يشتغلنى ....انا بأشتغل نفسى

السح الدح امبو...ادى الواد لابوه ...ياعينى الواد بيعيط ....الواد عطشان اسقوه ...شيلو الواد من الارض ...الواد محسود ارقوه ....اغنية من التراث المصرى القديم ....لمؤلف كان سابق عصره ...كان شايف اللى بيحصل من بدرى قوى ...فعلا الواد مالوش حيله فى نفسه ...مش عارف هوه عايز ايه ...رامى نفسه على الارض وبيعيط ...وسايب للى حواليه القرار ...اللى يقول دا عايز ابوه ...واللى يقول دا محسود ارقوه ...واللى يقول داعطشان اسقوه ...واللى يقول قوم يامصرى ...طالب بالتغيير ...تغيير الدستور او تغيير البامبرز مش مهم المهم قوم اعمل مظاهرة ...اشتم وصرخ واتعارك مع الشرطه ...وماتخافش انا وراك ...حاطلع فى الفضائيات واكتب فى الجرايد ...وحآخد خمستلاف جنيه فى الحلقه ...والفين جنيه فى المقاله ...مانت عارف الناس اد ايه تعبانه فى مصر ...دى قطع غيار المرسيدس بقت نار ...ومصاريف الكمبوند جهنم الحمرا ...يقوم الواد المصرى يطلع المظاهرة ...وهوه مش فاهم ليه ولا لحساب مين ...وعم المسخناتى سبوبته ماشيه ..من بره بقى من جوه ...المهم سبوبة الفلوس ماشيه ...دا طبعا غير السبوبه النفساويه ....سيط وشهرة وصور فى الجرايد ...عيشه يا معلم ....واللى يغيط ان الواد المصريه هوه اللى بيدفع تمن كل ده.

وشويه ويجى فى وسط المظاهرة واحد تانى ...يقول يامصرى ياعبيط انت مش فاهم حاجه..... انت مش عارف مصلحتك.... اتلم وخليك فى حالك أحسن لك ...علشان لو ماتلمتش حأضرب امك بالرصاص المطاطى ...يااسرائيلى يابن الكلب ... حتبوظ لنا السبوبه الله يخرب بيتك ...لسه ماكملناش المليار.... ياأهبل ... محدش عارف بكره فيه ايه ....وبعدين انت عايز ايه !! ...ما انا فكرت لك وبفكرلك وحفكر لك ازاى اطلعك فوق خط الفقر وانت نايم فى بيتكوا وقاعد على القهوة حاطط رجل على رجل وقدامك المارلبورو الحمرا ....عايز ايه تانى ...سيبنى ماتعطلنيش يا بنى ادم واصبر شويه ...

وياعينى الواد المصرى الغلبان لا فاهم حاجة.... ولادارى بحاجه ...ولاعارف لا مين معاه ...ولامين عليه ...مفروم ياولداه بين اشباه المثقفين اللى بيتاجرو بأى حاجه وعلى حساب كل حاجه ...وبين اشباه السياسيين اللى بيلمو كل حاجه واى حاجه.

وياعينى ليه ؟!!!... دا الواد المصرى يستاهل اللى بيجرى له ...مادام راضى انه يعيش عاله فى اكله وشربه وتفكيره ....يستاهل اللى بيحصل له ماهو مش عايز يبقى راجل بجد ...مش راجل بالبانجو والفياجرا ... يامصرى فوق واتشطر على بتاع الموبيل اللى بيقلبك ...وبتاع الماركتينج اللى بيشقلبك ...وبتاع الفيديو كليب اللى بيجيب لك الاحتقان ويبهدلك ...ولما تتشطركدة و تغير نفسك .... ابقى اطلب التغيير ... جاتك الهم جاهل مافيكش غير لسان.

أنا طبعا باتكلم على المصرى اللى فى اولى تانى ...لكن المصرى اللى فى اولى اول ...اللى هوه انا واللى معايا ...طبعا زى الفل ...فاهمين كل حاجه وعارفين كل حاجه ... عليه العوض ومنه العوض.

كلمة حق :

كلنا مسؤلين ....كلنا مسؤلين ....كلنا مسؤلين على الخراب اللى احنا فيه

مش بس كفايه والحزب ... كلنا فسدة.

الأحد، 18 أبريل، 2010

من فات قديمه تاه



من فات قديمه تاه

عارفين احنا توهنا ليه....علشان انبهرنا بما يقدمه الغرب ...ونسينا ان كل اللى بيطنطوا علينا بيه دة بتاعنا ....والله بتاعنا ....وعلى رأى الاسكندرانيه ... كلامك ده كله بتاعى وكاتبه على دراعى ....وكل الابحاث والمؤتمرات والندوات والكتب فى علم النفس والتنميه البشريه ...لخصها جد من جدودنا اللى ماعرفوش يخلفوا ...اسمه حسن البصرى ...قايل الكلام اللى بيقولوه اصحاب الحظارة دلوقت...من ألف سنه ...ماغلطش فى الكتابه ظ مش ض...اقرأوا وقولوا رايكم :

فكن ايها العاقل مقبلا على شأنك ....راضيا عن زمانك (السعادة)...سلما لأهل دهرك ...جاريا على عادة عصرك (ايجابى)...منقادا لمن قدمه الناس عليك (ديموقراطيه)...حانيا على من قدمك الناس عليه (ادارة) ...ولاتباينهم بالعزله فيمقتوك...ولاتجاهرهم بالمخالفه لهم فيمقتوك (فن التواصل )...فانه لا راحه لمعادى ولا عيش لممقوت .

واجعل نصح نفسك غنيمة عقلك.. ولاتداهنها باخفاء عيبك ... فتنفع عدوك وتضر نفسك ....لانه من اصلح نفسه ..ارغم انف اعاديه .(تنميه بشريه)

فهذب ايها الانسان نفسك بافتكار عيوبك وانفعها كنفعك لعدوك فان من لم يكن له من نفسه واعظ ...لم تنفعه المواعظ .واعلم ان من اعمل جده بلغ امانيه

اعاننا الله واياكم على القول بالعمل وعلى النصح بالقبول ..وحسبنا الله وكفا

من كتاب ادب الدنيا والدين للحسن البصرى ..الكتاب منزلاه مكتبه الاسرة باربعه جنيه ونصف ...يعنى بتمن كانزايه واتنين مولتوا....وماسيج ...

صدقه جاريه : اى كلمه فى الكتاب صعبه ومش عارفين تفهموا معناها ...انا على استعداد كامل للترجمه والشرح وتوصيل الطلبات للمنازل ...ومن غير اى بقشيش

الأربعاء، 14 أبريل، 2010

احنا اسفين ياصلاح

احنا أسفين يا صلاح

عناوين الاخبار النهاردة مش مريحانى :

مصر تستعيد أصبع اخناتون من سويسرا بعد اكثر من قرن.(ليه دلوقت)

مجلس الوزراء يوافق على تعديل قانون التوقيت الصيفى.(ليه عايزينها ضلمه)

الرئيس مبارك يرأس اجتماعا وزاريا بشرم الشيخ غدا.( ليه مستعجل )

يارب اكون فاهم غلط . وعموما انا مش من مؤيدى البرادعى ....هه....تانى ... انا مش من مؤيدى البرادعى..... ومن قبل الصوبع مايرجع

الثلاثاء، 13 أبريل، 2010

عم ياقوت جاب من الاخر

عم ياقوت جاب من الآخر


افتكرت ان كان عندى حتة قماشه محترمه ....قولت هوه انا ليه مبفصلهاش ..قمت قلبت عليها البيت ...انى الاقيها ...ابدا ...وفى يوم وانا قاعد جه فى بالى انها تكون فى الشنطة اللى تحت السرير ....نزلت تحت السرير وشديت الشنطة وفتحتها ...ولقيت القماشه ...لقيتها ملفوفه فى حتة حرير ....ومحطوطه فى كيس مرسوم عليه الاهرامات من ناحيه والكعبه من الناحيه التانيه ...فرحت قوى ...وخدت القماشة وطلعت جرى على عم ياقوت الخياط ...قولت له : ياعم ياقوت انا فى عرضك ...كل يوم بيبقى عندى حفله ...كل الناس اللى فيها محترمين ...او بيبانوا انهم محترمين ...كلهم بيبقوا على سنجة عشرة ...لابسين بدل اخر شياكه واخر موديل ...وانا فى وسطهم ببقى عرة ...والنبى ياشيخ تاخد القماشه دى وتفصل لى منها بدله شيك ...نفسى مرة احضر الحفله دى وانا بنى ادم ...والله ياعم ياقوت انا كويس ...وعندى حاجات كتيره حلوه ...ويمكن كمان اكون احسن من كل الى فى الحفله بس ماحدش بيعبرنى ولابيبصلى.....ودايما بيعاملونى على انى جاى اشحت منهم ...وساعات كتير بيعاملونى على انى بهيم ....بياكل ويشرب وينطح وبس ....مع انى ياعم ياقوت غير كدة خالص ....بس ماحدش مقدرنى ...عم ياقوت بص لى بنظرة عطف ومسك القماشه وفردها على البنك ...وقعد يقلب فيها يمين وشمال وفوق وتحت ...ويحطها قدام اللمبه ...كل دة وعلى وشه تعبيرات غريبه مرة اعجاب ومرة حسرة ومرة قرف ومرة استغراب ...وفجأه قالى : شوف يابنى لو انت كنت جبت القماشه دى من خمسين سنه ....كنت عملت لك بدله كل اللى حواليك يحسدوك عليها ...بس ياخسارة ...انت اتأخرت قوى ...القماشه شاطت ونكتت والعته هرتها...مش حينفع يابنى ....عوضك على الله ...رديت عليه باستعطاف ...والنبى ياعم ياقوت شوف لى حل الله يخليك ...عم ياقوت قالى : يابنى انا مش عايز اغشك ...القماشه دى ماتنفعش ولا حتى يتعمل منها لباس ...قولت له بيأس: طاب والحل ياعم ياقوت ...قالى: الحل انك تغزل لك حته قماشه جديدة ...على نضافه...هيه اه حتاخد وقت كتير بس هوه ده الحل الوحيد ...خليك فى الجديد ...دا طبعا لو ربنا قدرك وعرفت تعمل منه حاجه ...وسابنى وقعد يولع فى السبرتايه علشان يعمل فنجان قهوة محوجه بالحبهان والمستكه .... وانا ماشى سمعته بيقول لنفسه : ربنا مابيظلمش حد..... البنى ادم هوه اللى بيظلم نفسه.!

الاثنين، 12 أبريل، 2010

الطيب والشرس

الطيب والشرس

قوم ايه ... من سنه كده كنت قاعد فى النادى مع مجموعة من المؤهلات العليا ....يعنىدكاترة وصيادله ومهندسين ....مجموعه من الصفوه اللى بيقوم عليهم وعلى فكرهم وعلمهم اى مجتمع محترم ...قوم ايه ...انفتحت سيرة الدكتور يسرى الجمل وزير التعليم فى مصر .....قوم الراجل ما كنش عاجبهم قالو دا طيب ...وطيب فى زمن الماركتينج بقت شتيمه ...معناها انه لا بيهش ولابينش ...والناس بتستعبطه ... قوم ايه قالوا انه ماينفعش فى الوزارة اللى عفنت ...ولا بقى فيها لا تربيه ولا تعليم ....القصد قعدوا يشتموا فى الوزير والحكومه اللى خلت العيال مايعرفوش عن التعليم غير مدرسة المشاغبين ...والدروس الخصوصيه اللى بياخدوا فلوسها من اهاليهم ويجيبوا بيها سجاير وبانجو ...ودباديب فى الفلانتين ....قوم ايه سابو العيال واتدوروا على المدرسين اللى مابيرحوش المدرسه الا علشان يقبضوا الكادر وليل نهار قاعدين فى مراكز الدروس الخصوصيه يلموا فلوس ...قوم ايه جابوا سيرة المناهج وصعوبتها وانها مابتطلعش غير حفيظه ...دا طبعا على اساس انهم بيعرفوا عياله بياخدوا ايه ....ماطولش عليكوا اتفقوا على انهم عايزين وزير شرس يلم العالم دى ويرجع للتعليم هيبته اللى راحت ....ويضرب بايد من حديد .... الدكتور يسرى الجمل خد قعدته ...ساب الوزارة ....وروح على فيلته فى الكمبوند ....وجه الدكتور احمد ذكى بدر ...الراجل بصراحه شرس ...من اول يوم ...نزل بنفسه يلف على المدارس ...يرفد وينقل ويحول للتحقيق ...ويدور بابره على حد يدى له مكافأة ..... قوم الاسبوع اللى فات قعدت مع نفس الشله من المؤهلات العليا المثقفين ...ماذادش عليهم حاجه غير ان كل واحد فيهم بقى معاه بدل الموبيل اتنين ...قوم ايه بدأ الكلام على احمد ذكى بدر ....بقى دة اسلوب وزير تعليم ...ايه مافيش رحمه ...نازل رفد ونقل وتحقيق ...مش حرام ده ...مش المدرسين اللى اتنقلوا دول عندهم بيوت وعيال ...وازاى يرفد التلامذه ..هوه جاى يعلم ولا جاى يطلع جيل من ولاد الشوارع ...دا كدة حيبوظ التعليم ...دا على اساس ان التعليم فله ....هوه فاكر نفسه مين ... ولا علشان ما ابوه كان وزير الداخليه ....لا احنا فى زمن الديموقراطيه ...ارفع راسك يا اخى فقد ولى زمن الاستعباد ....
طبعا انا كنت قاعد اسمع الكلام اللى بيتقال وانا فاتح بقى ومدلدل لسانى زى الاهبل .
هوه ليه احنا مش عاجبنا حاجه ...ليه كل ما وزارة تيجى وقبل حتى ماتقعد على الكرسى نبدأ فى الهجوم عليها.... لما حكومه نظيف جات قالوا يانهار اسود حكومه رجال اعمال يعنى حيسرقونا ...فين ايام وزارة اساتذة الجامعه المحترمين ...وايام حكومه اساتذة الجامعة ..قالوا هما يعرفوا حاجه دى ناس طول النهار بين الكتب والمراجع والابحاث ...فين ايام وزارة ظباط الجيش ...وايام وزارة ظباط الجيش ...ياعم دول ظباط جيش يعنى مايفهموش غير فى الدبابات والمدافع ....
طاب ظباط الجيش ماينفعوش ...واساتذة الجامعه مالهومش فيه ...ورجال الاعمال اتجوزوا السلطه مسيار ودخلوا عليها فى عز النهار ...والوزير الطيب وحش والشرس وحش والقبيح وحش ...وحسنى مبارك وحش وجمال وحش والبرادعى لو جه ويارب ما يجى وحش ...امال ياعالم يا هوه.. مين الحلو ...ونلاقيه فين ...وان لقيناه حيرضى يجى ؟!! والختمه الشريفه ما حيرضى يجى ...حيقولنا انتوا عالم عبيطه ..عالم عشوائيه من زمن خالد يوسف ...مابيعجبكوش العجب ولا الصيام فى رجب ...عايزين تكيه تقعدوا تكلوا وتلغوا وتناموا على حساب اى حد ...من الاخر اكل ومرعه وقله صنعه ...جاتكم الهم عايزين جنازة وتشبعوا فيها لطم ...ويارتكم حتشبعوا

وجهة نظر :
عندما اجد رجلا يحمل بين طياته دهاء انور السادات ...واصرار رجب طيب اوردغان ...والمصحف لانزل انتخبه علشان يحكم مصر ...مش تقولى حمدين وايمن والبرادعى وعباس العفش ....

الجمعة، 9 أبريل، 2010

فى حب مصر

فى حب مصر

تعلن قناة...كله ماشى الفضائية عن قرب بدايه برنامجها الجديد ...فى حب مصر

وتطلب على وجه السرعة ....اعلامى ...لتقديم البرنامج.

المواصفات المطلوبة :

1- أى مؤهل ينفع ....بكالوريوس ...ليسانس ...دبلوم ...ونقبل الاعدادية

2- يستطيع ان يلوى زراع الحق ليظهر الباطل

3- يملك موهبة المتاجرة بالآم الناس وأحزانهم

4- ان يكون مبدأه فى الحياه اللى تغلب به العب به

5- ان يكون من لابسى بوكسر الشفايف ...ومطلقى اللحيه ومقصرى البنطلون

6- أن يملك المقدرة على السب واللعن وتسخين البشر

7- ان يكون من مريدى البرادعى والاخوان المسلمين

8- ان يكون من انصار الحزب الوطنى وحركة كفايه

9- ان يكون من مؤيدى عمرو خالد وخالد يوسف

10- من الآخر عايزين واحد زباله يقدر يدمر لنا المجتمع

المميزات :

1- مرتب مغرى جدا وبالدولار وخالص الضرايب

2- شقة تمليك جنب الاستوديو فى مدينة الافساد الاعلامى

3- عموله مجزيه على كل موضوع سافل أو ضيف شاذ يستضيفه

4- تأمين صحى من اللى على نفقة الدوله

5- سيارة فخمه موديل السنه دى وتمليك كمان

6- نسبه فى ارباح المسجات والرنات والمسابقات.

سؤال عبيط ....فيه فى الدنيا ...بلد ناسها بيحبوها كدة ؟!!! فعلا كم فيكى يا مصر من مضحكات ولكنه ضحك كالبكاء.

حد يقولى ... حد ينصحنى ...اعمل ايه ...بابا نام وانا عايز ادخل الحمام ....... ارجّع

الخميس، 8 أبريل، 2010

شويه كدة مع نفسى

شويه كدة مع نفسى

بصوا كان فيه دعوة للاضراب على الفساد عملتها السنه اللى فاتت ... وبكرر الدعوة تانى ...انا مقتنع بالفكرة ...وفيه ناس مش قليلين هما كمان مقتنعين ... فياريت اللى مقتنع ولسه عنده نفس ياريت يكمل المسيره السنه دى ...اما بالنسبه ليه ...فالواضح انى بمر بحاله من الياس والاحباط بل والاكتئاب الحاد الذى لا ينفع معه سوى رحمة ربنا ..وبصراحه كدة ماعنديش اى امل فى ان اى حاجة تتغير او تتصلح اوتتعدل ....... انا عارف.... شويه كدة وحارجع اعافر تانى ... ماهو اللى فيه داء مابيبطلهوش .... بس شويه كده مع نفسى.

على فكرة فيه دعاء اتعلمته حلو قوى.. ادعوه ربنا حيكرمكوا

ربى دبر لى امرى فاننى لا احسن تدبيرة

الخميس، 1 أبريل، 2010

ماتريكس3



ماتريكس 3

فيه حاجه غريبه اتكررت اكتر من خمس مرات الاسبوع ده قدامى .....الواضح كده انها بداية ظاهرة ...او الله اعلم انها ظاهره موجودة بس انا اللى لسه شايفها ...شباب حلو كدة تالته اعدادى ....اولى ثانوى ...فصلوا ... عملوا حياه موازيه للى احنا عايشينها ...حياه افتراضيه ....فصلوا بين نفسهم وجسدهم ......الجسد مبقاش اكتر من توك توك يتنقلوا بيه من مكان لمكان ....لكن العقل والتفكير والعيشة بقت فى مكان تانى خالص ...الواد لما بيتكلم عن الفلوس يقولك مسابقات فى النت ...لعبة الحياه ....فوركس .. دى وسيله عمل الثروة...لما قلبه الاخضر حب ...حب واحده ماشفهاش ....ماسمعش صوتها .... بيحبها بالكتابه ...بيكلمها بالكتابه ...بيخاصمها ويصالحها بالكتابه ....ولما ماسورة هرموناته تضرب ....يفتح نيو ويندو ..ولا نيو تاب ....وهاتك ياهلاوس ...ويااوهام ...وتطلع كالعادة القدرات السريه ....ولما يحب يلعب رياضه ...بيشغل فيفا 2010 وينزل الملعب ويلعب ويضيع اجوان ويجيب اجوان ...ويرمى نفسه على ارض الاودة ويسجد وينطق الماوس .... وبعد مايحقق انتصاراته ويحس انه بطل ...يقرر انه يبص على احوال البلد اللى مش عجباه ....ويشارك فى حركات التحرير اللى على الفيس بوك ...ويسمى نفسه سعد باشا زغلول ... ولما يحب يقرب من ربنا ...يحط خلفية توكلت على الله ...ويغير رنات الموبيل كلها ويخليها ادعيه ...

الواد عنده خمستاشر سنه ....وعنده تيبس فى مفاصل الركبه ...وغضروف بين الفقره التانيه والتالته...وعين -3 وعين -3.5 ....كل ده مقدور عليه .....اللى تاعبه بجد ....البواسير ....وكل امانيه انه يجيب لاب توب ....علشان يعيش حياته وهوه ممد على السرير ....ويترحم من وجع البواسير ....

الغريبه ان الواد مابيرحش المدرسه ....ومابيفتحش كتاب ...والاغرب انه بينجح .....وابو ه واخد له شقه بالقسط علشان لما يتخرج من الطب يعملها عيادة ....ماتشتغربوش ...حيتخرج ...ويفتح عيادة ...ويبقى استشارى ...والدخول له حيبقى بالحجز ...دا طبعا فى عالمه الافتراضى ....او فى عالمنا ...ماهو مافيش حاجه غريبه على مصرنا ....دى ام الدنيا ...

اموت واعرف اسم الندل ..........ابو الدنيا دى .

تصدقوا .....انا مابقيتش خايف على القدس ......انا كل خوفى دلوقت بقى على الكعبه