الاثنين، 12 أبريل، 2010

الطيب والشرس

الطيب والشرس

قوم ايه ... من سنه كده كنت قاعد فى النادى مع مجموعة من المؤهلات العليا ....يعنىدكاترة وصيادله ومهندسين ....مجموعه من الصفوه اللى بيقوم عليهم وعلى فكرهم وعلمهم اى مجتمع محترم ...قوم ايه ...انفتحت سيرة الدكتور يسرى الجمل وزير التعليم فى مصر .....قوم الراجل ما كنش عاجبهم قالو دا طيب ...وطيب فى زمن الماركتينج بقت شتيمه ...معناها انه لا بيهش ولابينش ...والناس بتستعبطه ... قوم ايه قالوا انه ماينفعش فى الوزارة اللى عفنت ...ولا بقى فيها لا تربيه ولا تعليم ....القصد قعدوا يشتموا فى الوزير والحكومه اللى خلت العيال مايعرفوش عن التعليم غير مدرسة المشاغبين ...والدروس الخصوصيه اللى بياخدوا فلوسها من اهاليهم ويجيبوا بيها سجاير وبانجو ...ودباديب فى الفلانتين ....قوم ايه سابو العيال واتدوروا على المدرسين اللى مابيرحوش المدرسه الا علشان يقبضوا الكادر وليل نهار قاعدين فى مراكز الدروس الخصوصيه يلموا فلوس ...قوم ايه جابوا سيرة المناهج وصعوبتها وانها مابتطلعش غير حفيظه ...دا طبعا على اساس انهم بيعرفوا عياله بياخدوا ايه ....ماطولش عليكوا اتفقوا على انهم عايزين وزير شرس يلم العالم دى ويرجع للتعليم هيبته اللى راحت ....ويضرب بايد من حديد .... الدكتور يسرى الجمل خد قعدته ...ساب الوزارة ....وروح على فيلته فى الكمبوند ....وجه الدكتور احمد ذكى بدر ...الراجل بصراحه شرس ...من اول يوم ...نزل بنفسه يلف على المدارس ...يرفد وينقل ويحول للتحقيق ...ويدور بابره على حد يدى له مكافأة ..... قوم الاسبوع اللى فات قعدت مع نفس الشله من المؤهلات العليا المثقفين ...ماذادش عليهم حاجه غير ان كل واحد فيهم بقى معاه بدل الموبيل اتنين ...قوم ايه بدأ الكلام على احمد ذكى بدر ....بقى دة اسلوب وزير تعليم ...ايه مافيش رحمه ...نازل رفد ونقل وتحقيق ...مش حرام ده ...مش المدرسين اللى اتنقلوا دول عندهم بيوت وعيال ...وازاى يرفد التلامذه ..هوه جاى يعلم ولا جاى يطلع جيل من ولاد الشوارع ...دا كدة حيبوظ التعليم ...دا على اساس ان التعليم فله ....هوه فاكر نفسه مين ... ولا علشان ما ابوه كان وزير الداخليه ....لا احنا فى زمن الديموقراطيه ...ارفع راسك يا اخى فقد ولى زمن الاستعباد ....
طبعا انا كنت قاعد اسمع الكلام اللى بيتقال وانا فاتح بقى ومدلدل لسانى زى الاهبل .
هوه ليه احنا مش عاجبنا حاجه ...ليه كل ما وزارة تيجى وقبل حتى ماتقعد على الكرسى نبدأ فى الهجوم عليها.... لما حكومه نظيف جات قالوا يانهار اسود حكومه رجال اعمال يعنى حيسرقونا ...فين ايام وزارة اساتذة الجامعه المحترمين ...وايام حكومه اساتذة الجامعة ..قالوا هما يعرفوا حاجه دى ناس طول النهار بين الكتب والمراجع والابحاث ...فين ايام وزارة ظباط الجيش ...وايام وزارة ظباط الجيش ...ياعم دول ظباط جيش يعنى مايفهموش غير فى الدبابات والمدافع ....
طاب ظباط الجيش ماينفعوش ...واساتذة الجامعه مالهومش فيه ...ورجال الاعمال اتجوزوا السلطه مسيار ودخلوا عليها فى عز النهار ...والوزير الطيب وحش والشرس وحش والقبيح وحش ...وحسنى مبارك وحش وجمال وحش والبرادعى لو جه ويارب ما يجى وحش ...امال ياعالم يا هوه.. مين الحلو ...ونلاقيه فين ...وان لقيناه حيرضى يجى ؟!! والختمه الشريفه ما حيرضى يجى ...حيقولنا انتوا عالم عبيطه ..عالم عشوائيه من زمن خالد يوسف ...مابيعجبكوش العجب ولا الصيام فى رجب ...عايزين تكيه تقعدوا تكلوا وتلغوا وتناموا على حساب اى حد ...من الاخر اكل ومرعه وقله صنعه ...جاتكم الهم عايزين جنازة وتشبعوا فيها لطم ...ويارتكم حتشبعوا

وجهة نظر :
عندما اجد رجلا يحمل بين طياته دهاء انور السادات ...واصرار رجب طيب اوردغان ...والمصحف لانزل انتخبه علشان يحكم مصر ...مش تقولى حمدين وايمن والبرادعى وعباس العفش ....

هناك 3 تعليقات:

  1. انها حكاية حمار جحا تتكرر دوما وأبدا ونكتشف دائما انه يستحيل ارضاء الناس جميعا استحالة وجود العنقاء والغول والخل الوفي
    عن الطيبة والشراسة المشكلة هي عندما يكون الاختيار او المفاضلة بين طرفي نقيض والبون بينهما شاسع فلا الطيبة الكثيرة مقبولة ولا الشراسة الشديدة مقبولة كلاهما مفسدة المزج بينهما وسياسة شعرة معاوية هي المطلوبة والناجحة
    دمت بكل ود

    ردحذف
  2. الحلو مين ؟؟ انا طبعا دي عايزه كلام

    طب بالامانه يا دوك لو انا رشحت نفسي هاتنتخبنى
    ههههههههههههههههه

    طب ايه رايك انا مستعده انتخب عباس العفش
    اه يعنى هانبقى اعفش من كده ايه فى عهده


    بص يا دوك المشكله ان الناس اساسا مش بيحاولوا يفكروا

    يعنى شلة المثقفين حضرتك انا برضه باقعد معاهم بس ايه كبار عنك شويه يا فندم رهط طويل عريض يعنى

    تقعد بقى تسمع
    تلاقي الى عنده افكار اشتراكيه ميه ميه ما زال بيحكم بيها والى اخوان والى ميكيافيلى كده يعنى
    اوقات كتيره اقعد ادور ادور ادور هما جايبين الكلام ده منين

    الاقيهم للاسف بينقلوا ما يصل اليهم عبر الدستور والاسبوع والبتنجان المنتشر
    والى اصلا انا مقتنعه تماما ان الى ماسكين الجرايد دي ادوات ليس الا
    احد ابطال العرض المسرحي المشين
    وان ما كانوش فهما برضه فى ركاب اكل العيش مر
    او تقدر تمشيها اكل الجاتو برضه

    طب حد بقى يحلل
    يتكلم
    يفكر
    يقووووووول رايه هو مش راي زحلوق الى فى جرنال مش عارف ايه
    مافيش

    وزير التعليم الى فات مش مشكله الى فات مات

    ووزير التعليم الحالي
    لما سمعت الى عمله وشوفت الفيديو
    قلت الواد متربي على الغالي وابن ابوه ويعز البروباجندا واحتمال يكون طامع للعالي ( اها ما خد بالك العجل دلوقتي قرب يقع والسكاكين هاتكتر)

    وبعدين لما سمعت الحديث بتاعه
    قلت الاخ ده يا جماعه افلح ان صدق
    ولكن ان انننننننن صدق

    وبعدين هما مسكوه التعليم وعملوله الاعلام الازم الى يقول هو ده الى هايربيكم يا كلاب

    وبعدين لما كشر عن انيابه قالوله ايييييييييه لا ا رجع

    ايه الدوشه دي

    اعلام يقولك انك حقاني وجد وشديد وهاتظبط ام الدنيا انت هاتستهبل امال احنا نعمل ايه

    وايه ده كمان اعتصامات ده انت عايز تولعها بقى

    قشطه لحد كده اركن بقى جمب اخوات بلاش دوشه


    واحنا ما علينا الا نطبل فى كل زفه شويه

    عموما انا مستعده انتخب اي حد يغير الدستور بحيث ان كل ست سنين يبقى من حقي اقول رايي فى الراجل الى بيحكمنى

    اي حد فى الدنيا هايعمل كده انا هانتخبه

    عشان كل ست سنين هاينفع اغير رايي مش كل خمسين سنه

    تحياتي يا دوك

    ردحذف
  3. ندى الياسمين
    حمدالله على السلامه ...ونصيحه دى اخر مرة توضبى الشقه ...انا عارف اكيد شوفتى الذل ...بس معلش ماهى لما بتخلص وتشفيها التعي بيروح ...مبروك ياباشا

    ردحذف