الاثنين، 31 ديسمبر 2012

كل سنة وانتو طيبين

                        كل سنة وانتو طيبين 
.... اينعم 2013 ...... وبدأه يوم تلات....... والاخوان فى الحكم ....والعياط ريس... والعريان بيكافح علشان يرجع اليهود لمصر ... وبيخوفونا بالشاطر  ....وبديع جاب للبيطريين الشتيمة ....والدولا بسته جنية وربع... ومخزون السكر يكفى اسبوعين ...  بس التفاؤل حلو برضة ... وديننا الحنيف نهانا عن التشاؤم .... وحنعيش يعنى حنعيش بفلوس من غير حنعيش ... حتى وسط الاخوان حنعيش ..... بجد بقى ... كل سنه وانتوا طيبين وسنه سعيدة علينا كلنا ما عدا اللى مش بيحبنا ... اه نسيت : كل سنه والاخوه المسيحيين بخير وسعادة واللى مش عاجبه يشرب من البحر ... وسمعنى احلا سلام : بلادى بلادى لكى حبى وفؤادى ............... وربنا ياخد الاخوان

الأربعاء، 19 ديسمبر 2012


راسبوتين السلفى
بما اننا فى زمن الطبيخ ... قررت ادخل مجال الطبخ والمطبخ ... واقدم لكوا طريقة عمل اكله مميزة وجديدة .. او بمعنى اصح قديمة جديدة ... حأقلكوا المقادير وطريقة العمل وازاى بناكلها بالهنا والشفا ...
 ....نبدأ
النهاردة حقدم ليكوا وصفة راسبوتين بالسلفنيون ... راسبوتين دى اكله عالمية ... اصلها روسى ... والعرب عندهم اكله شبهها اسمها مسيلمة الكذاب ... وفى امريكا اسمها جيم جونز ... وفى كل حتة فى العالم حتلاقى الاكله دى وطبعا حتلاقى اللى بياكلها ..وشهرة الاكله مش جاية من المقادير ... خالص ... شهرة الاكله  دى جاية من اللى بياكلوها ... هما اللى بيدوها الطعم والريحة والنكهه..
المقادير :
1 واحد طويل وعريض ... او عريض بس ... حاجة كدة تخض وتملى العين ... وممكن يكون قصير ورفيع بس النوع دة مش كتير .
2 دقن اى كان طولها وكل ماطولت كان احسن .. وياسلام لو فيها كام شعرة بيضا .
3 عين كحيله ذات نظرة ثاقبة وقدرة عالية على التبريق .
4 اعراض خفيفة من جنون العظمة (بارانويا )
5 غموض فى التحركات والظهور والادعاء بالوجود الدائم فى الخلوه .
البهارات :
ودى من اساسيات الطبخة
1 عند الظهور تضاف اضاءة من نوع خاص حسب الطلعة ... يعنى اضاءة فلورسنتيه لأضفاء نكهة الملائكية ... او اضاءة حمراء لأضافة نكهة الشياطين .
2حكايات مرسلة عن معجزات راسبوين على حل المشاكل وشفاء الابرص والاكمة .
3 عدد من الاعوان من عينة الزبون بتاع احنا بنحبك ياجاسر ( فى فيلم على سبايسى ) يهللوا ويكبروا كل ماراسبوتين يكح
الاكيلة :
ودى من اهم متطلبات اكلة راسبوتين بالشمبنيون ( قصدى بالسلفنيون )
المواصفات :
1 حاصلون على قدر يسير من التعليم او لا تعليم من اصله .
2 الاعتقاد الكامل فى القدرات الخاصة والسحر والعفاريت والاعمال .
3 يعانون من القهر والذل والعيشة البائسة .
4 الكبت الجنسى وعدم القدرة او الامل فى الزواج .
5 الفشل الاجتماعى والمادى والثقافى والسياسى .
6 سهولة الاستهواء وسرعة الانقياد والايمان الكامل بالمخلص ومبعوث العناية الالهيه .
7 اليأس من الدنيا واللجوء الى احلام اليقظة .
الطريقة : لخبط المقادير على البهارات بأى طريقة تعجبك ... حيطلعلك احلى راسبوتين .. او مسيلمة الكذاب .. او جيم جونز ...كله نفس الطعم ونفس النكهة ... واخيرا ... خلى الاكيلة يزلطوا.. ويلهطوا .. ويلهلطوا .... وبعدين على مهلهم كدة ... يعيطوا ويصوطوا .. وتربت تربت تو .... او تربت تربت تى ....ياأمة ضحكت من جهلها الامم.

الاثنين، 17 ديسمبر 2012

نشرتها ابريل اللى فات وحدش عايز يسمع


البارانويا  :
  حالة نفسيّة مرضيّة يملك المصاب بها جهازاً عقائدياً معقّداً وتفصيلياً يتمركز حول أوهام لا أرضيّة واقعية لها.هذه الأوهام تقنعه بأنه مضّطهد من قبل الآخرين وبأنّ السبب الرئيسي لإضطهاده من قبلهم هو كونه شخص عظيم ومهمّ للغاية!الجهاز العقائدي المفعم بالأوهام الذي يبتلي به المصاب بالبارانويا يتشكّل ويتطور ببطء شديد وعلى مرّ زمن طويل. ويصبح مع الأيام منظّماً للغاية إلى درجة يبدو معها منطقيا ومقنعاوالخطورة التي ينطوي عليها هذا الإضطراب النفسي تكمن في أن المصاب به يبدو طبيعيّا أثناء الحديث وفي تصرفاته وسلوكه إلى درجة لاتثير لدى اللآخرين إيّة رغبة لمواجهة المريض وإحالته إلى الجهات المعنيّة بعلاجه.تتشكّل لدى المريض قناعة مطلقة بأنّه عظيم وبأنّ الآخرين يسعون لإيذائه والحطّ من عظمته. ويدافع عن قناعته هذه حتى عندما تواجهه بكلّ البراهين التي تثبت عدم صحّة تلك القناعة.عدم الثقة بالآخرين يدفع المريض لتركيز كلّ حواسه على تصرفات الناس من حوله وتفسير كل حركة لهم بطريقة تخدم قناعاته. يبني من الحبة الصغيرة جبلا كبيرا كأن يدّعي عندما يرى شخصا يلوح يده عن بعد بأنّ هذا الشخص يشير اليه ويتكلم للآخرين عنه، وقد يذهب أبعد من ذلك فيدّعي أنه يخطط لقتله.هذه الأوهام التي يعيشها المصاب بالبارانويا تجعل منه شخصا شكّاكا عنيدا غاضبا عدوانيّا وناقما على الآخرين.
ياترى ده مين ده ؟؟؟؟؟؟؟؟؟

الجمعة، 14 ديسمبر 2012

حفضل اقول ومش حأزهق


انهم يحنثون بالوعود

انهم كاذبون .... انهم خائنون ... وفى خصامهم فاجرون ... انهم

 بالعهود يحنثون .... وللغايه يهرولون .... وبالوسيله يبررون 

....وباعتقالاتهم يتاجرون ... انهم وراء الدين يتسترون .....من

 الدول العربية يمولون ....وعلى السلطة يركبون ... وللزيت

 والمكرونة يبيعون ... وللانبوبه يوصلون ... وللشعب هم

 خادعون .... انهم ليسوا اخوان ..

والله اعلم بكونهم مسلمون ..

الأحد، 9 ديسمبر 2012

قضى الامر الذى فيه تستفيان

قضى الامر الذى فيه تستفيان 

انشاء الله لو ربنا ماكتبش علينا ان احنا نموت بعض قبل يوم السبت الجاى .... ارجوا من اللوزعى اللى مانزلش انتخابات الرئاسة علشان يروح العين السخنة ويبلبط...... ارجوا من الجهبذ اللى قعد فى البيت وقاطع الانتخابات ....ارجوا من الجهنمى اللى كتب على ورقة الانتخاب حمدين صباحى وبوظ صوته ..... ارجوا من الفخم اللى عصر على نفسه لمونه ....ان ينزل الاستفتاء على دستور تهانى ...ويقول اللى يملية عليه ضميرة ... فرصة عمركوا تصلحوا غلطة عمركوا ....



الجمعة، 30 نوفمبر 2012

خلص الكلام




دا انا ياجماعة بعد ماسمعت حوار دواهى الغازية 

الأربعاء، 28 نوفمبر 2012

عبوك



صباح اليوم الاول فى قصر رئاسى

نهار داخلى :
بانوراما لحجرة نوم الرئيس ...
 يرقد الرئيس على سريرة فى وضع الجنين .... تحاول الحاجه ايقاظة بهدوء ...
ام محمد : حاج ... ياحاج ... اصحى ياحاج ... الساعة بقت حداشر ... قائد الحرس بقاله ساعة بيخبط علينا .
يستيقظ ابو محمد مفزوعا : جاى جاى .... بس والنبى بلاش ضرب على القفا .
ام محمد : استر يارب ... مالك ياحاج ... وضرب ايه اللى على القفا ؟!
ابو محمد : حضرى الشنطة بسرعة ياحاجة ... وماتنسيش الفوطة زى المرة اللى فاتت ... دا انا قعدت سنه انشف وشى فى ديل الجلابية .
ام محمد : لا اله الا الله ... انت بتحلم ولا ايه ياحاج ... شنطة ايه وفوطة ايه وديل جلابية ايه .
ابو محمد مستنكرا : مش بتقولى ظابط امن الدوله بيخبط .
ام محمد ضاحكة : الله يحظك يا حاج ... الله لا يرجعها ايام ... انا بقولك قائد الحرس الجمهورى بيخبط ... انت نسيت انك الريس ولا ايه .
يعتدل ابو محمد ويبصق عن شماله قائلا : اعوذ بالله من الشيطان الرجيم ... بينى وبينك ياحاجة ... مش عارف اخد عليها ولا اصدقها ... كوابيس فى النوم من ناحية امن الدوله ... وكوابيس فى الصحيان من المعلم والممتاز ... يالله اهو كله علشان مصر .
ام محمد : قوم بس يا حاج وصلى على النبى ... تبات نار تصبح رماد ... ومحدش عارف الخير فين ... بس انا عايزاك المرة دى تتناصح بقى وتلم الشعب حواليك ... اه ... يعنى كل يوم الصبح كدة تطلع عليهم فى التليفزيون ... وتصبح عليهم ... محافظة محافظة ومركز مركز ولو عرفت تجيب من الرقم القومى اساميهم وتصبح عليهم واحد واحد يبقى خير وبركة.. اه والنبى ياحاج اوعى وانت بتصبح على المحافظات تنسى البحيرة المره دى ... حاكم زعلانين منك قوى انك نسيتهم فى الخطاب اللى قولته بعد النتيجة... بيقولوا ماكنش العشم ينسانا بعد ما وقفنا معاه .
ابو محمد : ايه .. هما حيزاولونى من اولها ... ولا علشان عطونى صوتهم يعنى ... لااااااا ... انا الرئيس ... ولو مش عارفين اعرفهم ... ايوه ... انا الرئيس .
يرن جرس التليفون الخصوصى .. ترفع ام محمد السماعة وتقول ... اهلا اهلا ... صباح الخير ياسيدنا المعلم .
يقع ابو محمد من على السرير ... ويجرى زاحفا ويأخذ التليفون من الحاجة .
ابو محمد بصوت مرتعش : السلام عليكم ورحمة الله وبركاته يا مولانا المعلم ..ابدا والله يامولانا المعلم دا انا صاحى من بدرى ....عفوك يا مولانا ... والله ماحتتكرر تانى يا مولانا .. حاضر يامولانا ... من النهاردة ... البلان حتبقى عندك شهرى واسبوعى .... حاضر يامولانا  ويومى ... حاضر يامولانا ... لا طبعا فاهم ... كل اللى حيقول عليه الممتاز  ... كله يامولانا ... والله العظيم كله يامولانا ... اتفضل يامولانا ... اتفضل يامولانا .
بعد ان يغلق ابو محمد التليفون ينظر الى الحاجه بعتاب قائلا : كده ياحاجة ... كدة قاعدة تتسايرى معايا وضيعتى الوقت ... انا نازل على المكتب ... المعلم حيكلمنى على تليفون المكتب بعد عشر دقايق .
ام محمد وهى تجرى وراءة : استنى ياحاج ... استنى بس .. حتنزل المكتب بالجلابية  ياراجل ؟! وكمان حافى ...... الهى يخرب بيت الرياسة اللى حتضيع منى الراجل .... بس معلش اهو كله علشان مصر .
ملحوظة : يارب يخلف ظنى .... علشان مصر ....!!!!!!!!!!!
نص الخطاب الاول لرئيس
ايها الاخوان والاخوات :
اعاهد الله العلى العظيم على التمسك بالبرنامج والجهاد فى سبيل تحقيقة والقيام بشرائطة .. والثقة التامة فى القيادات الحديثة ... والسمع والطاعة لمطالب الاخوان والاخوات فى المنشط والمكره... واقسم بالله العظيم على ذلك وابايع عليه والله على ما اقول وكيل .
                          ( الهتيفة : الله اكبر ولله الحمد )
ايها الاخوان والاخوات :
 اننا نرسى دولة القانون ... لذلك سوف احلف اليمين امام الدستورية العليا ... ولاننى ثائر منكم سوف انزل الميدان لاطالب مع اخوانى بالغاء المكمل ... احنا فى ثورة والثورة مكمله .
                          ( الهتيفة : الله اكبر ولله الحمد )
ايها الاخوان والاخوات :
اننى رئيس لكل الشعب ... لكل الشعب... ولذلك سوف استقيل من رئاسة حزب الذل والندامة  ... ولكنى كمواطن له الحق فى ان ينتمى الى حزب ... فاننى لن استقيل من حزب الذل والندامة  .
                          ( الهتيفة : الله اكبر ولله الحمد )

ايها الاخوان والاخوات :
اننى اتعهد بالحفاظ على كافة المعاهدات التى وقعت عليها الجمهورية ... وخاصة معسكر ديفيد .... كما اتعهد بمراجعة بنود معاهدة ديفيد.. كما اتعهد باعادة العلاقات مع تيران لاحداث توازن استراتيجى فى المنطقة  الله يلعن ابوهم اللى بيشتموا الصحابه . .
                          ( الهتيفة : الله اكبر ولله الحمد )
ايهاالاخوات :
انا عايز كل واحده فيكوا تطمن خالص ... كل واحدة تلبس اللى هيه عيزاه ... براحتها خالص .. تلبس بنى ... تلبس كحلى .. ازرق .. اسود ... براحتك خالص ... علشان بيقولوا ان الرئيس  حيحجب الستات ... الرئيس مابيحجبش الستات ... عمر الرئيس ماقال ان الستات تتحجب ... دا ربنا اللى بيقول ومدام ربنا اللى بيقول يبقى لازم ننفذ كلام ربنا .
                          ( الهتيفة : الله اكبر ولله الحمد )
ايها الاخوان والاخوات :
اننا دولة مدنية دينية .... جمهورية ملكية...سنية شيعية ... واقتصادها رأسمالى اشتراكى ... ومرجعيها الازهر والمقطم ... ان حرية الرأى والتعبير والابداع مكفولة للجميع بمجرد استلام التصريح ... انى معكم وعليكم ... انى بكم وبدونكم ... اننى الرئيس لا كذب ... انى الرئيس .. انى الرئيس ... انى الشاطر ... انى بلوة سودا ....انى الرئيس يالا خافوا منى ... انى بلوه سودا .. انى الشاطر
والسلاموا عيكم ورحمة الله وبركاته .
                          ( الهتيفة : الله اكبر ولله الحمد )

الاثنين، 26 نوفمبر 2012

باصرخ من سنه ومحدش عايز يسمع 3


جمال مبارك رئيسا لمصر
صيغ المبالغة فى اللغة العربية تستخدم لتكثير وتعظيم 

الصفات ....وتأتى صيغ المبالغة على خمس اوزان ..

 فعال .. مفعال .. فعول ... فعيل ... فعل(بفتح الفاء وكسر 

العين ).. ومثال لذلك صفة الكذب فيقال فى المبالغة .. 

كذاب .. مكذاب ... كذوب ...كذيب ... كذب (بفتح الكاف 

وكسر الذال) ... وهناك صيغ مبالغة مشهورة ومتداولة 

واخرى غير متداولة لصعوبتها فى النطق والتعامل فى 

الكلام ...مثلما فى صفة الخوف فنقول خواف على وزن 

فعال ولانقول مخواف او خووف او خويف او خوف (بفتح 

الخاء وكسر الواو )....اما الصفة التى كتب من اجلها هذا 

البوست فهى صفة البكاء او باللغة الدارجة العياط ... 

فنقول على كثير البكاء والتباكى عيوطة وهى فى الاصل 

عيوط  على وزن فعول ..ولكن اضيفت لها الهاء لزيادة 

السخرية من هذا العيوط فنحن كما تعلمون مجتمع 

ذكورى وان كان ذكوريتة لاتختلف كثيرا عن سنبل فى 

المسلسل التركى حريم السلطان ...ففى المجتمع الذكورى

 نجد ان هاء اوتاء التأنيث سبه واهانه فى واقع الامر ... 

عموما استخدام صيغة المبالغة عيوطة لا يمنع من صحة 

الصيغ الاخرى ... مثل معياط ... عييط ... عيووط .. 

عيط... والمهم عياط على وزن فعال .... وكما ذكرت 

فالعياط هوالشخص كثير العياط والبكاء والتباكى والندب 

...فكل ماتكلمة ... يعيط على الذل والهوان وكسرة النفس 

والمرمطة ايام النظام السابق ...فمثلا عندما تسأله سؤال 

مباشر :مثل ما اسمك ؟ فان يرد قائلا : مش عايزين 

نرجع لمصر القديمة وايام الزل والهوان والقهر والفساد 

... انا اسمى العياط ... ولو سألته : اتغديت ايه النهاردة 

.؟ يرد عليك ويقول : مش عايزين نرجع لمصر القديمة 

وايام الزل والهوان والقهر والفساد... اتغديت محشى 

اسلامى ( والمحشى الاسلامى هو محشى بدون خلطة ... 

لان الخلطة من الاختلاط والاختلاط حرام ...لانه لايجوز 

ان يكون الواد بقدونس قاعد مع البت كسبرة فى صوبع 

واحد ... وماتقوليش ماهو بينهم الرز ... اصل الرز من 

(ش....ط) النظام القديم على رأى العيوطة الصغير مع 

منى الشاذلى ( رد فعل منى الشاذلى عجبنى قوى )... 

ولو سألته انت متجوز ؟ يرد عليك: مش عايزين نرجع 

لمصر القديمة وايام الزل والهوان والقهر والفساد ايوة 

متجوز .. هذه هى الاسئلة .. وتلك هى الاجابات ... وذلك 

هو العياط ..البكاء ..المتباكى... الكهين 

الكائد..المتمسكن..المراوغ  .

نرجع بقى للعنوان ... مش احمد شفيق بقى .... دا لو 

جمال محمد حسنى السيد مبارك بكل مساوئه وموبقاته 

وخطاياه وسفالته ووضاعته ووساخته ورخامته ورزالته 


والاهم غبائه اترشح قدام الكائن العيوطة ... سوف 

انتخبه بكل ضمير مستريح وبكل راحة بل ساذهب لانام 

مطمئنا على بناتى ومستقبلهم ...سأنتخب جمال محمد 

حسنى االسيد مبارك .. لانه صادق ... وسخ وبيقول انا 

وسخ ... واضح ... سافل وبيقول انا سافل ...  حأنتخب 

جمال لانى مابحبش العيوطة.... مابحبش

 الملاوع...مابحبش الابتسامة الصفرة... مابحبش 

الرجوله غير الكامله ... طاب سنبل عنده عذره .... امر 

سلطانى بقى تعمل ايه ؟.

ملحوظة للى عايز يفهم وعنده بقايا كرامة وفتات عزة 

نفس ونخوه... ومستوعب ان ربنا كرمه :

يقول الشهيد (والله اعلم )حسن البنا فى حديثه المقدس :

ان عضو الجماعة بين يدى المرشد كالميت بين يدى

 مغسله ... يقلبه كيف يشاء ... وان خطأ المرشد اصوب 

من صحيح عضو الجماعة .

انا عن نفسى الوحيد اللى يقلبنى بين يديه هوه الله 

سبحانه وتعالى ولله المثل الاعلى .

انا عن نفسى حقى ان اقول رائى واغلط براحتى .. واعمل 

اللى شايفة صح وحدودى هيه حدود ربنا

انا عن نفسى مرشدى هوه سيدنا النبى محمد رسول الله

 صلى الله عليه وسلم  ومحدش غيره مرشدى

انا عن نفسى مابابوسش  غير ايد ورجل  ابويا وامى.

انا عن نفسى طول ماربنا عاطينى العمر ... عايش ... 

حى ... وانا اللى باحمى نفسى لان امى بطلت تحمينى من 

اربعين سنه بعد ماعلمتنى ازاى اتليف.

آه ياشعب .... آه يانخبة .... آه ياولاد التاجرة

السبت، 24 نوفمبر 2012

بأصرخ من سنه ومحدش عايز يسمع 2


انهم يحنثون بالوعود

انهم كاذبون .... انهم خائنون ... وفى خصامهم فاجرون ... انهم

 بالعهود يحنثون .... وللغايه يهرولون .... وبالوسيله يبررون 

....وباعتقالاتهم يتاجرون .. انهم وراء الدين يتسترون .....من

 الدول العربية يمولون ....وعلى السلطة يركبون ... وللزيت

 والمكرونة يبيعون ... وللانبوبه يوصلون ... وللشعب هم

 خادعون .... انهم ليسوا اخوان ..
 
والله اعلم بكونهم مسلمون ..

الجمعة، 23 نوفمبر 2012

انا بصرخ من سنه ومحدش عايز يسمع



الجزمة هيه الحل

عندنا بيت فى الفلاحين ... مش عارف احنا بنيناه ليه من اصله ... يمكن علشان الحلم العبيط بتاع الارض والطين والجذور ... يمكن علشان الخوف من الزفة بتاعة شوفوا طوله وعرضة يا ولاد ... عواد باع ارضة ياولاد .... يمكن علشان بنيناة بالطوب الاحمر فى الوقت اللى كان كل البيوت بالطوب النى ... يعنى شوية عواجان على زهو على تفاخر ... المهم انه اتبنى وخلاص ... البيت ده مابنرحهوش غير مرة او مرتين فى السنه علشان ناخد ايجار الارض اللى برضة ما اعرفش احنا اشتريناها ليه ؟ مع ان ولا واحد فينا يقدر يفرق بين البرسيم والملوخية .... القصد ... تعبنا من الفيران اللى بتقرقض البيبان والعفش ... مش نافع معاها لا سم ولا مصيدة ولا لزق ... فقررت انى ادرس سلوك الفيران واتعامل معاهم من وجهة نظر نفسية ... بحكم التوجهات والدراسات ... لقيت ان الفيران طول عمرها فى الجحور ... مخنوقة محبوسة مذلولة ..ولما بتطلع على وش الارض ... الف من يمسك لها الشبشب والجزمة والعصايه ... دا غير الحقيقة العلمية اللى بتقول ان سنان الفيران اللى قدام بتطول مع الوقت فلازم يقرقضوا حاجة علشان لو طولت زيادة عن اللزوم ماتعرفش تاكل ... فقولت انا اتصالح مع الفيران ... احط لهم الاكل واجيب لهم خشبة يقرقضوا فيها ... ويانحله لاتقرصينى ولا عايز عسل منك ..ونفذت الكلام ... وشوية ولقيت الاكل اتاكل ... والخشبة اتقرقضت ... وبرضة قرقضوا البيبان والعفش ... وياريت على قد كدة ... دول جابوا القرايب والصحاب واتلموا حوالين البيت وعملوا مظاهرات ...واحتلوا الميدان... وان كان عاجبك يا اهبل يابتاع علم النفس ... ولانى صاحب قرارى ... ولانى بدافع عن بيتى وارضى وبيبانى وعفشى .... اعلنت الحرب من جديد ... عصيان وشباشب ومصيدة ولزق واحدث جهاز بيعلونوا عنه فى التليفزيون بيشتغل بالموجات الصوتية .... بصراحة تعبت علشان اتخلص منهم ...... بس اتعلمت ... اتعلمت ان الفار اللى عايش طول عمرة فى الجحر ماينفعش معاه تعديل سلوك وشوية الفرم بتاع فرويد وسكنر وبافلوف والعالم دى  .... صدقونى اتعلمت ان الجزمة هية الحل مع الفئران المقرقضون.

الأربعاء، 21 نوفمبر 2012

محدش عايز يصدقنى ليه ؟( انا كدة حعييط)


جاهل بدرجة دكتوراة

الجاهل مش هوه اللى مابيعرفش يقرأ ويكتب ..الجاهل هوه اللى بيبقى عنده مشكله فى ادراك اللى حواليه ... والجهل الاكبر ...لما يدرك اللى حوالية بالعكس .... فتلاقية بيغلط فى تصرفاتة وقراراته ... والغلط يجيب غلط ... لغاية مايودى نفسه هوه ومريدية ومعارضية بالقلب  فى ستين داهية ...
ومع الاسف ومع الالم ...جهال العصر جهال بدرجة دكتوراه من نورث كارولينا ... ونورث كارولينا حته فى امريكا فيها جامعة ... اللى معاة 30 الف دولار جايبهم من الحاج او من الجماعة يقدر ياخد بيهم دكتوراه ويرجع للمحروسة علشان تلقفة الفضائيات وتستثمر فيه .... تسلكنه ( من السليكون ) وتشفطة وتنفخه وتقشرة وتصنع منه نجم نخبوى .... وتعلى عليه الاسبوت وتنور النور وتلغوش وتشوشر وهما حلقتين يا معلم ويبقى فى نظر الناس والمصيبه الاكبر فى نظر نفسه ... قائد التنوير والتقدم ومحارب الفساد المغوار  وسبارتكوس العصر الحديث... رغم انه كان بيحصحص من امن الدولة ايام الكحرته ... وكله من اجل زينة الحياه الدنيا وحب النفس وطز فيكى يامصر وطزين فيك يا شعب .
ولان اكثر الناس لا يعلمون فالطبيعى انهم لا يعقلون ايه اللى بيحصل حواليهم وليهم .... فالعقول الكسلانه التعبانة المرضانه اللى مابتفكرش ولا تعقلش بتحب دايما الصور الملونه الملعلة الجاهزة ... ومش بس بتحبها ..لا ... دى بتسجدلها وتقدسها وتضحى بروحها وماتصدقش ابدا ان فيه واحد معاه دكتوراة ممكن يكون جاهل او ضال اوعندة مشكله نفسيه تؤرقة ومبتنيمهوش الليل .... ولما تقوله كده يبص لك من فوق لتحت بقرف ويقولك وهوه بيرجع عليك : دا معاه دكتوراة من امريكااااااااااا.
دا على اساس ان امريكا بيوحى لها .... لكن حتستنى ايه من جاهل يقود جهال ...غير ان الاعلانات تزيد ... عليه العوض ومنه العوض . 

الاثنين، 19 نوفمبر 2012

يا شعب قفا


يا شعب قفا

شعب صدق انه ثائر ... شعب صدق انه اخر حاجة ... بيقدر يعمل كل حاجة ... بيفهم فى كل حاجة ....شعب صدق انه بهر العالم  (هوه بهرة بس بغباءة )..... شعب صدق ان عندة حضارة ونخبة ومثقفين ....
 والحقيقة ...... انه شعب قفا ... حقيقة مرة ...بس هيه دى الحقيقة ...الحقيقة انه شعب قفا علشان اللى كان بيخسرة كان اقل كتير من اللى بيخسرة دلوقت (فكرة المكسب غير واردة من اصله مع هذا الشعب القفا)...
الحقيقة انه شعب قفا ... شتم اللى مفروض يشيله على راسة .... وشال على راسه اللى مفروض يضربة بالجزم ....
 الحقيقة انه شعب قفا ...نزل اتوضى بالحبر الفسفورى وصور ايدة بالموبايل ورفع الصورة على الفيس وهوه مش عارف هوه قال ايوة ليه ؟ولا لأ ليه ؟ (انا كنت القفا الكبير علشان قولت نعم ... بس والله مش علشان ادخل الجنه ... لكن بسذاجتى الفطرية...  علشان نلم بقى ونعمل علشان مصلحة مصر ... عبيط عارف مش محتاج حد يقولها ... خلاص غلطان وبأصلح غلطتى ... مالوش لازمة الشتيمة  بقى ) ....
الحقيقة انه بقى شعب من المكتئبين الزهقانين القرفانين يقودهم مهووس ميكروفونات ....وعليه عفريت اسمه خطبه
 الحقيقة انه بقى شعب قفا .... لا عارف يرجع زى زمان ... ولاعارف يعيش النهاردة.... ولاشايف لبكرة ملامح ...
 وبدال مالشعب ينتقم من اللى كان السبب .... اتنفض وسن سنانه وطلع ضوافرة.... ونفخ صدرة ..... على ميييين ؟ ........... على نفسه  طبعا .
عمرك شوفت شعب قفا زى كدة ؟
واخيرا سمعنى احلى سلام : سينا ضاعت منا تانى ومصر اليوم فى عيد .

دايما بانسى كده... معلش حكم السن بقى ... نسيت اقول للى كانوا السبب : يلعن ابوكوا

نسيت واحدة



اديلة فرصة

اديله فرصة لما يموت اطفالنا ويبعت رئيس الوزرا يبوس اطفال غزة

·       اديله فرصة لما الطائرالدكر تبيض .
·       اديله فرصة يخلص صلاة.
·       اديله فرصة لما يخلص خطبة فى جوامع مصر .
·       اديله فرصة يغرق البلد فى الديون .
·       اديله فرصة لما يفرض ضرايب على دفن الميتين .
·       اديله فرصة لما سينا تروح مننا .
·       اديله فرصة لما يفتتح مصنع الحديد والصلب وجامع عمرو بن العاص .
·       اديله فرصة لما يسجل مكالمات الشعب ويشوف مين نجس بيحب فى التليفون .
·       اديله فرصة يطهرك يا شعب يانجس ويفتح لك حسابات .
·       اديله فرصة ينيمك من المغرب علشان تقوم فايق للشغل ... ولما تسأل فين الشغل يقولك طاب هوه انت نمت الاول .
·       اديله فرصة لما يلغى الشرطة .
·       اديله فرصة لما يسرح الجيش.
·       اديله فرصة لما يهد ابو الهول والهرم ويبنى مكانهم قاعة محاضرات .
·       اديله فرصة يسوق البلد دا سواق عارف ربنا وبيصلى الفجر ... احنا اللى ولاد كلب انجاس قاعدين له على الفتيس .
·       اديله فرصة ياشعب زباله وشوفلك حته تانية عيش فيها عشرين تلاتين سنه على ماينضف زبالتك ويلم وساختك وبعدين يبقى يبعت لك تيجى او مايبعتلكش  .... المهم انك تديله فرصة .



الأربعاء، 14 نوفمبر 2012

ميرو الحساس


ميرو الحساس

حساس الجيل ... سينسور اوف جينيراشن .... ميرو الحساس .....
فى فيلم الموسم
  بيخونى بيخونى ياطنط لارى......
تدور احداث الفيلم عن اكتشاف ميرو..... حساس الجيل.... خيانة ريزو ...
بعد ما دفى ميرو المرتبة علشان لما ريزو يجيى ياخد الدفا كله ...بعدماحط لريزو الدباديب على المخدة .....ورسم قلب بالورد على السرير .. بعد مارش البرفان السينيه ماركة رجعت تانى لينا ....وبعد ماحضر الشورت الاحمر ابو سوستة من ورا ...... دخل ريزو على ميرو وفى ايده عزة  ... وفى لحظة صادمة .... اكتشف ميرو ان ريزو بيخونه مع عزة  ... اللى مزعل ميرو قوى... مش ان ريزو بيخونه مع عزة ... ولا ان ريزو  حياخد الدفا كله لوحده ... ولا ان ريزو رمى الجوابات والدباديب بتاعة ميرو من الشباك ...لا خالص ... اللى مزعل ميرو و قاهره ياضنايا ان ريزو مارضاش يرجعله الشورت الاحمر ابو سوسته من ورا ... بصراحة ميرو عنده حق حيروح المقطم ازاى دلوقت  .... ولا يهمك ياميروا بعد بكرة الجمعة ... اشتمه فى الخطبه واوعى تتقهر وتشيل فى نفسك... دوحه عايزاك ياميرو.... دوحة ماتقدرش تستغنى عنك .
................................ يلعن ابوكوا .................................

الاثنين، 12 نوفمبر 2012

اديلة فرصة


اديلة فرصة

·       اديله فرصة لما الطائرالدكر تبيض .
·       اديله فرصة يخلص صلاة.
·       اديله فرصة لما يخلص خطبة فى جوامع مصر .
·       اديله فرصة يغرق البلد فى الديون .
·       اديله فرصة لما يفرض ضرايب على دفن الميتين .
·       اديله فرصة لما سينا تروح مننا .
·       اديله فرصة لما يفتتح مصنع الحديد والصلب وجامع عمرو بن العاص .
·       اديله فرصة لما يسجل مكالمات الشعب ويشوف مين نجس بيحب فى التليفون .
·       اديله فرصة يطهرك يا شعب يانجس ويفتح لك حسابات .
·       اديله فرصة ينيمك من المغرب علشان تقوم فايق للشغل ... ولما تسأل فين الشغل يقولك طاب هوه انت نمت الاول .
·       اديله فرصة لما يلغى الشرطة .
·       اديله فرصة لما يسرح الجيش.
·       اديله فرصة لما يهد ابو الهول والهرم ويبنى مكانهم قاعة محاضرات .
·       اديله فرصة يسوق البلد دا سواق عارف ربنا وبيصلى الفجر ... احنا اللى ولاد كلب انجاس قاعدين له على الفتيس .
·       اديله فرصة ياشعب زباله وشوفلك حته تانية عيش فيها عشرين تلاتين سنه على ماينضف زبالتك ويلم وساختك وبعدين يبقى يبعت لك تيجى او مايبعتلكش  .... المهم انك تديله فرصة .