السبت، 26 فبراير، 2011

بصراحة كدة انا مش متفائل

بصراحة كدة انا مش متفائل

ممكن اكون قديم ... قديم قديم يعنى ... وجايز اكون شريك مخالف وخلاص .... وممكن اكون شايف ان اللى جاى مش بتاع جيلى ...فبعافر علشان افضل موجود ... وجايز اكون ساذج واذناب الحزب الوطنى بتلتف حواليه وانا مش دارى ....وممكن اكون خايف على مصر ... وممكن برضة ماتكونش مصر فارقة معايا ... وكل خوفى على بناتى فى ظل التطور الطبيعى للجان الشعبية بسيوفها وخناجرها بتوع قريش ... ممكن اكون كدة علشان فرق السن والكبر عبر ... زى ما انتوا عارفين ... وممكن اكون هادى علشان ماليش اطماع ... او حيادى علشان النظام السابق ما اذنيش فى حاجة ... يعنى مانضربتش فى قسم ولا حد قالى كلمه بايخة ... حتى المرور لما كان بيسحب رخصتى ... حق الله باكون غلطان فعلا ... ماحصلش مرة ان امن الدوله عين عليه مدير غبى لانى اصلا ربنا شفانى من الحكومة من بدرى ... وكان كل صراعى مع النظام السابق انى عايز المرتب يكفينى لغاية اخر الشهر ... وجايز ويمكن ويمكن وجايز ...وبما اننا بعد الثورة بقينا كلنا فاهمين كل حاجة ومكشوف عننا الحجاب وبنعرف النوايا وبنطلع على الغيب ... مين فيكوا يقدر يقول لى انا مين فى دول ؟ .... انا اقولكوا بطريقة الهندسة بتاعة اعدادى : بما ان انا نفسى مش عارف انا مين بالظبط ... اذن ولا واحد فيكوا حيعرف انا مين ... ومدام انا مش عارف وانتو مش عارفين ... يبقى اللى بيحصل حوالينا دة طبيعى جدا جدا جدا ....طبيعى انك ياتجيبلى تكنوقراطة يابلاش ياوله ... روح رجع البطاطا يابلاش يا وله ... طبيعى ان 83 مليون مصرى فجأه وبقدرة قادر تحولوا الى خيراء استراتيجيون ...وفقهاء دستوريون ...ومنظرون ... وقضاة ... وجلادون ... طبيعى ان حب مصر فى اننا ندهن الرصيف ونشيل الزباله علشان ندى فرصة للزبالين يعتصموا براحتهم قدام الحى .... طبيعى ان يكون فيه ناس شايفة ان التورته لسه فيها حاجة تتاكل وان استقالات الصحف القومية بالعبيط وان فاتك الميرى اتمرغ فى ترابه ياحمار .... طبيعى ان كله عايز يطلع على المنصة ... واللى مايطلعش يا يعيط يا يتقمص ... واالى يطلع يبقى خد لقب الخومينى ويافرحة امه بيه ... ياعينى عليكى يا بلد كل رموزك فقاقيع .... طبيعى ان الجيش يبقى نصة فى الشارع علشان ينظم المرور ... ونصه التانى على الحدود مع مجنون ليبيا ....... طبيعى ان افرازات عائله حرب بتحاسب جنرالات الجيش المصرى ... ماهى شرعية ثورية بقى .... طبيعى ان اسرائيل ماحدش يسمع لها حس ...وطبيعى ان السفينة الحربية بتاعة ايران تروح تزور ميناء اللاذقية ... صله رحم ... اعترض بقى .... طبيعى ان احنا نخسر كل يوم ملايين وان اتكلمت ... يقولو لك ماتجيب الفلوس اللى برة الاول ... طاب يا اخونا مانجيب الفلوس اللى برة وكمان اللى جوة ولا هوه خراب والسلام ... طبيعى ان ولا وزير حيجى حيعجب ... طبيعى ان احمد شفيق لازم يرحل علشان هوه من نظام حسنى ... ولما تتكلم يقولك اه شفيق وزير طيران شاطر بس ماينفعش رئيس وزارة ... طاب ما انت اللى بتقول اهه انه كان وزير شاطر فى زمن النظام اللى مش شاطر ... ولا هية لازم تتجاب على الارض علشان نرتاح .... طبيعى انك ترفض اللجنه الدستورية علشان طارق البشرى فيه مسحة دينية ... ماهو الدين بقى سبه اليومين دول .... والنغمه بقت الشعب يريد دوله مدنية ....بلاها علمانية علشان الكلمة دى بتدايق ناس كتير خليها مدنية ... طبيعى ان مفهوم الديموقراطية بقى ان لسعادتك مطلق الحرية انك توافق على رائى وبس .... لكن لو ماوفقتش ... تبقى بتبيع دم الشهيد ... ومن اذناب الحزب الوطنى ... خاين للثورة ... وتتحط فى القائمة السوداء ... ومتاسفين على موقفك ... ومكناش فاكرين انك عميل .... ويخسارة اتخدعنا فيك.

احسن حاجة انك تثور على الظلم والفساد وقله الادب والمسخرة ... بس بصراحة انا خايف لايكون كل اللى اتعمل دة والدم اللى اندفع دة يكون كله علشان اكله كباب وكفتة وبدال ماكنا بنعزف نهاوند وسيكا للى فات ... حنعزف بوب للى جاى .... بصراحة كدة انا مش متفائل ...

الاثنين، 21 فبراير، 2011

الادراك

( 1)الادراك

مافيش بنى ادم فى الدنيا زى التانى ....حكمة ربنا...اللى مش عارفين نستوعبها ...لكن لو استوعبنا الحكمه دى وفهمناها واقتنعنا بيها ... مش حتلاقى حد بيتعارك مع حد ... ولا حد بيشتم حد ...ولا حتلاقى زوجة بتنكد على جوزها ... ولا جوز بيطلع عين جوزته ...ساعتها لا حنصنف بعض ولا حنخون بعض ....طبعا انا بتكلم هنا عن الناس الاسوياء اللى مش متعمدين الظلم والفساد وركوب الامواج وتغيير الايدولوجيات عن عمد ... ولا باتكلم عن اللى ليهم اجندات خاصة ... بغض النظر عن كلمة اجندات اللى بقت سيئة السمعة .

الدنيا حوالينا من سما لارض لجبال لقمر ...موجودة وكلنا شايفينها .... بس كل واحد مدرك الحاجات دى غير التانى خالص ... كل واحد مستقبل الحاجات دى بطريقة مختلفه ... نمسك القمر مثلا .... القمر عبارة عن قرص دائرى معلق فى السماء يبعث ضوءا فضى ويظهر فى الليل بعد غروب الشمس... هذه هى حقيقة القمر المجردة .... ولكن ... واحد عايش قصة حب لاول مره ... حيشوف ان القمر فيه ملامح من حبيبته ...وبيبعت شعاع يدى جو من الرومانسية على شاعرية زمن ضاع فيه الحب وبقى تيك اواى ... ربنا يسهل والثورة تقدر ترجعه .... واحد سلفى مابيشوفش فى القمر غير انه وسيله نعرف بيها اول الشهر الهجرى علشان الصيام والحج والعيد ....واحد فى كلية العلوم كل امله انه يشتغل فى ناسا... يشوف القمر انه براكين وحفر وجزء ضلمه ساقع تلج عايز يعرف فيه ايه .....وواحد اهبل شايف ان القمر اهم من الشمس علشان بيطلع باليل ينور الدنيا لكن الشمس ملهاش لازمة علشان بتطلع بالنهار والدنيا منورة .... وواحدة عايشة فى زمن المخلل تطلع فوق السطح تخبط بغطيان الحلل علشان تطفش العفاريت اللى خانقة القمر ومخليه وشه مزرود يا حبة عين امه ....وغيرة وغيرها ... كل واحد بيشوف بطريقته ويدرك الامور بمعرفته .....

الادراك بقى باللغة العربية الفصحى يعنى : عملية استقبال المثيرات الخارجية وتفسيرها بواسطة الفرد تمهيدا لترجمتها الى سلوك .

اهى هية سلللللللللللللووووووووووك دى .... الراجل اتصرف او عمل سلوك معين نتيجة لادراكة للشىء بطريقة معينه ... الدنيا ماتهدتش يعنى ....

طاب هوه فيه حاجات بتأثر فى الادراك دة ؟ طبعا .. اهم حاجة المعرفة ... يعنى لما تعرف ان القمر بيعكس نور الشمس ... مش حتقول ان القمر احسن من الشمس ...الحاجة التانية اللى بتأثر على الادراك... البيئة المحيطة بيك ... يعنى الواحد لو عايش فى بيئة شرقيه حيد رك ان اخته قاعدة مع زميلها بطريقة غير اللى حيدركها عم الامريكانى ... وبالتالى السلوك بتاع كل واحد حيبقى غير التانى ....دا كمان تلاقى الاختلاف بين الاخوات فى العيلة الواحدة ...تلاقيهم مختلفين فى ادراكاتهم ووجهات نظرهم ... زى ظابط الامن المركزى اللى جه مع منى الشاذلى وبيحكى عن اخوه اللى كان فى المظاهرات ....تاثير الوظيفة او المهنه ... وبرضة الاحتياجات اللى بيشعر بيها البنى ادم ونفسه يحققها بتاثر هية كمان على الادراك ... الحلاق مثلا نفسه يجز شعر الزبون علشان يقبض .. فاول حاجة يشوفها ويدركها فى الراجل اللى داخله ...راس الزبون وشعرة ...

من مواصفات الادراك ان البنى ادم مننا وبدون مايشعر بيلم الحاجات اللى زى بعض مع بعض ... يعنى لو شاف شاب روش من ابو بوكسر ...ويشوف منه تصرفات مش مظبوطة ... يقوم يعمم ويقولك ... كل الشباب هايف وتافه ... رغم ان فيه شباب زى الورد عملوا ثورة ماكانتش على البال ولا الخاطر ...

من مواصفات الادراك كمان ان الانسان بيدرك بطريقة اختيارية ... يعنى بالبلدى بمزاجة يعنى مابيدركش او يتجاهل بعض الاشياء مع انها بتكون واضحة زى الشمس ... يا اما لانها مش مهمه بالنسبه له ... يا اما علشان هوه مش عايز يشوفها اصلا ... زى الرئيس السابق كدة ماكنش عايز يدرك ان الشعب مش عايزة ...

هنا بقى يجيى السؤال المهم ...هوه ممكن الادراك يتغير .... طبعا ممكن وممكن جدا كمان .... بس لو استبعدنا ركبان الدماغ ...والخوف من انه يتقال ان احنا غيرنا كلامنا .... والكبر والعنجهيه ...وشوية الكلام الفاضى اللى لا بيودى ولا بيجيب ده .... ولان الادراك بيجى عن طريق المعلومات ...فاذا غيرت المعلومات حيتغير الادراك ... وكمان لو بصيت للامور بنظرة عامة مش نظرة خاصة..يعنى ماخليتش احتياجاتى ورغباتى الخاصة تتحكم فيه .... بالتالى ادراكى حيبقى اوقع وشمل ...مثال من الحياة ... فيه ناس ادركت ان الرئيس السابق راجل وطنى وصاحب الضربة الجوية وليه انجازات ماحدش يقدر ينكرها ..فدافعت عنه باستماته ... لكن لما وصلت لها معلومات انه كان عارف اللى بيحصل من فساد...وان ملف التوريث بمباركتة...اتحول الادراك من حسنى مبارك البطل الى حسنى مبارك الديكتاتور الفاسد .

الى اللقاء فى الحلقة القادمة

الخميس، 17 فبراير، 2011

مينى فراعين يظهرون على المشهد



مينى فراعين يظهرون على المشهد

فجائية الثورة وسرعة نتائجها وتتابع تغيراتها ... عملت نوع من اللخبطة لمفاهيم وموروثات وافكار وادراكات راسخه فى عقولنا بقالها سبعين تمانين سنة ... قلبت ردود الافعال واساليب التفكير رأسا على عقب ... خلت كل واحد فينا متوتر مش عارف ينام ولا يقعد ولا يقف ولايشتغل .... خلت كل واحد فينا مش قادر يفكر ولا يحلل ولايوصل لنتائج .... خلت كل واحد فينا قاعد ليل نهار يعيد حسباتة مع نفسه قبل مايعيد حسباته مع الواقع اللى اتغير .... ويسأل ... ياترى اللى كنا بنعمله قبل الثورة ده صح ولا غلط ؟.... احنا كنا جبنا ولا اللى قدامنا اقنعونا بكدة .... ؟ احنا كنا فاهمين بس مش قادرين نعمل حاجة ولا ماكناش فاهمين من اصله ؟ ....احنا حابين الثورة علشان حسنى وجمال وعز مشيوا ولا حابينها علشان خلاص حنفوق ونكبر ونعلى ونبقى بنى ادمين يعملوا حضارة بجد ...مش يشغلوا حضارة مشحوتة من برة ....ياترى احنا لازم نتغير فى عشرين يوم زى الثورة ما اتعملت فى عشرين يوم ولا المسأله عايزة وقت ؟ ... عموما انا شايف ان فيه ناس كتيرة قوى محتاجين وقت علشان تلم شتاتها وتعرف هيه رايحه على فين... محتاجين وقت علشان يوصل لهم ان فيه ثورة حصلت وان الدنيا بتتغير وبسرعة .... القصد ... اللى قدر يتغير بسرعة واللى لسه عايز وقت علشان يتغير ...واللى مش عايز يتغير من اصله ... كل دول محتاجين حاجة واحدة بس ... محاجين مازورة موحدة ... مازورة كلنا نقيس بيها ... مش كل واحد معاه مازوتة زى زمان ... مازورة واحدة نقيس بيها احنا عايزين ايه ... عايزين مصر بجد ولا عايزين نرجع زى الاول ..شطارة وفهلوة ومحسوبية ... عايزين نبنى مصر بجد ولا عايزين نبنى على الارض الزراعية اللى بتوكلنا .... عايزين نغير افكار واشخاص عقيمة ولا عايزين شماعات جديدة تقدر تستحمل الخيبة والعجز والكسل وقلة الحيلة ... عايزين نفهم ان كل يوم يعدى من غير شغل حيضيع مستقبلنا ومستقبل عيالنا ولا عايزين نهبهب وخلاص ... عايزين نفكر ازى نكبر ولا عايزين نهلفط وخلاص...عايزين ناخد حقنا ولاعايزين ندبح ونسلخ ونشمت ونعلق على باب زويله....

فى النهاية لم ولا ولن نتفق على اشخاص .... عادى جدا هيه جديدة علينا بس عادى جدا ... ولكن يجب ولا بد وحتما ولزمن ومن كل بد ....ان احنا نتفق على مصر .... علشان لو مصر ضاعت ... احنا حنضيع معاها ..... تانى وعاشر ومليون ومن قبل الثورة باقول وحفضل بعد الثورة حاقول : ايها الاعلاميون .... ايها الصحافيون ...ايها السينيمائيون ... ارحمونا بقى لجل خاطر النبى ...خلى دوركوا اللى جاى تثقيف الشعب وتعليمه وتصحيح ادراكاته ومفاهيمة ... ماتخليش دوركوا انكوا تجيبوا سبق صحفى او اعلامى وتعرفوا هوه الرئيس السابق دخل الحمام النهاردة ولا كان عنده امساك ...ماتخليش دوركوا انكوا تصفوا حسابتكوا مع اللى فات ... مش دوركوا انكوا تطلعوا تعيطوا على الشاشة وتقولوا احنا كنا مقهورين ومحبوسين ... ماحنا كمان كان طالع عين ابونا ...والاهم... والاهم جدا ...بلاش تطلعوا فراعين جداد ... حتى لو كانوا الشباب اللى عملوا الثورة .... كفاية بقى تعبنا .

فكر تكسب :

انا معايا الف ومتين جنية ... الحد الادنى للاجور ... وقدامى اربع ارغفة ...بيبقى الرغيف بكام ؟ ... يبقى الرغيف بتلتميت جنية .... برافوا ..... طيب لو انا باخد ربعميت جنية... وقدامى اربعين رغيف ... يبقى الرغيف بكام ؟ ... يبقى الرغيف بعشرة جنية ... برافووووو

سؤال المسابقة بقى : ايهما اوقع واعقل واصلح ... ازود الفلوس ولا ازود الانتاج ؟؟!...

اعمل مظاهرات ولا ارمى بذرة واقف على مكنة الطحين ؟

فى الكويت الراجل بيقبض ميت دينار بيكفوه وبيزيدوا ... وفى موزمبيق المواطن بيقبض ميت الف زرزور ...ومابيكفيهوش



الثلاثاء، 8 فبراير، 2011

وحشتينى يا مصر ... وحشتينى ياشيخة

وحشتينى يا مصر ... وحشتينى ياشيخة

يوم الجمعة اللى قبل جمعة الغضب دافعت و باستماتة على ان هذا الشعب لا ولن يثور ..... وخلال الاسبوعين الماضيين ....تارجحت كثيرا مابين مؤيد ومعارض .... وماخبيش عليكوا وصلت انى مش عارف اخد موقف ... ياترى انا مع دول ولا مع دول ... ولكن بعد ان سقطت ورقة التوت عن الجميع ....استطيع ان اقول رأيى الان : ان رجالا مثل وائل غنيم ....انحنى لهم واباركهم واشكرهم لانهم ضمنوا لبناتى مستقبلا كريما .... انحنى لكل من مات شهيدا فى سبيل الحرية التى يأسنا ان تولد يوما .... لكن الشاب الامور اللى طلع مع خيرى رمضان فأنى ثابت عند رائى .... عيب يابنى كدة .... اما بالنسبة اللرئيس حسنى مبارك فانا مع خروجة مكرما فى جو من الشرعية ... ليس حبا او كرها ... ولكن لان الشرعية هى التى لابد وان تحكمنا لو اردنا ان نعيش عهدا جديدا .... ولانه لا يجب ان نضحى باحسن مافى خلقنا وهو حفظ الجميل لرجل قدم الكثير لمصر ... قد اخطأ ... ولكن لابد للانتقام من حدود ....

كلنا فضفضنا وشتمنا وسبينا وطلعنا غلنا وانفجرنا وعبرنا وايدنا و وخونا .... وبعدين ... حنفضل كدة كتير ولا ايه ؟ ... لندع السياسيون يعملون ... ولندع المعتصمون واقفون يضمنون لنا نجاح الثورة... يضمنون ان التغيير سوف يحدث ....ونبدأ فى رسم خريطة المستقبل الذى دفع ثمنه رجال كل ذنبهم انهم طالبوا بالحرية ..... نعم رجال ...مش شباب طاهر برىء نقى زى مابيقولو ا اللى مش شايفين فى مصر غير انها تورته بالكريز ...كل واحد عايز يلهط منها حته ... الهى الكريزة تقف فى زوركوا يابعدا ....

لا اخفيكم انى احسست انى كهل عجوز وانا اقف اشاهد مايجرى ... احسست انه ليس لى مكان فى هذا الزمن القادم .... فكرت فى ان اتنحى جانبا لافسح المجال لرجال مصر الشرفاء لان القادم هو زمنهم وليس زمنى ...وقبل ما بناتى تقف فى الصاله ويقولوا لى اتنحى ... او يقولوا لى نريد... اسقاط ...اسلام .... وما خبيش عليكوا ... انا حاسس ان امهم اليومين دول بتحاول تخترقهم علشان تنفذ اجندتها الخاصة ... ماهى الاسبوع اللى فات جابت لهم كنتاكى .....( كنتاكى ياولاد الكلب ... بيضحوا بدمهم علشان كنتاكى ؟؟؟!!!! ...)... لكنى قررت ان اشارك ... حتى تنتهى مدتى فى الحياة ... فهى بلدى... مصر الحبيبه الغالية .. قد لا استطيع ان اقف فى التحرير ... قدلا استطيع ان اتظاهر فى الشوارع او اقف مع اللجان الشعبية .... ولكنى استطيع ان اشارك بمدونتى فى صنع هذا المستقبل عن طريق ما اتقنة واحبة الا وهو التنمية البشرية ... ان مصر فى هذا الوقت لا ينقصها سوى التنمية البشرية ... تنمية الانسان وفكرة وعقله .... ان مصر الان بحاجة الى عقول وقدرات ... ان مصر تستطيع فى خلال خمس سنوات ان تصبح احسن بلد فى العالم .... والله العظيم خمس سنين بس

وابتدا من البوست القادم ... سابدأ فى الحديث عن فن الاتصال والادارة واساليب التفكير والقيادة والتسويق ..والبرمجة اللغوية العصبية ... وكل مايساعد فى تقديم نموذج لانسان متحضر قوى فكريا وعقليا ..... ساقدم كل ما اعرفة لكى يا مصر

وتحيا مصر حرة مستقله ... تحيا مصر فوق الجميع .... تحيا مصر ام الدنيا اللى علمتها يعنى اية حضارة ... ولسه بتعلمها ... وحتفضل تعلمها

ويحيا رجال مصر .... وبناتها اللى بميت راجل ...اللى عملوا لنا اللى ماكناش متخيلين انه يحصل . والف رحمه ونور على شهداءنا ...

اه نسيت .... روّح يا بردعى لاحسن الحاجة قلقانة عليك .... رأيى وانا حر فيه ... هية ديموقراطية ولا مش ديموقراطية ؟!!!!

السبت، 5 فبراير، 2011

صحيح اللى يمشى ورا العيال

صحيح اللى يمشى ورا العيال

والله لو كل الشباب اللى عملوا مظاهرة 25 يناير ... زى المواطن اللى طلع مع خيرى رمضان هوه واخوه المواطن المحامى فى برنامج مصر النهاردة ....يبقى كل سنة وانتى طيبة يامصر .... عواجيزك منافقين يا على الموجة راكبين .... وشبابك لا فاهمين ولا حافظين ولاحتى متربيين .... يبقى يلعن ابو الفيس بوك على البلوج على الكمبيوتر على التكنولوجيا اللى تخلى شبابنا كدة.

ايها الجيش تدخل ... ارجوك ايها الجيش تدخل لتوقف هذة المهزله ... مهزلة الاحزاب ... مهزله قبيلة الحزب الوطنى ... مهزلة الاعلام ... مهزلة الاخوان ... مهزلة البرادعى ...ارجوك حافظ على اللى باقى من مصر ... مصر اللى ماعدتش فيها لا عقل ولا اخلاق .

كلمة حاموت واقولها: ايها الشباب الطاهر البرىء النقى ... ايها الشباب الثورى الجميل الفظيع ......ايها الشباب اللى بينفخوا فيك بقالهم اسبوع ...

انت صدقت نفسك يالا منك له ولا ايه .