الثلاثاء، 25 يناير 2011

هيه العركة مع مين بالظبط ؟

هيه العركة مع مين بالظبط ؟

اليومين دول فيه حاجات غريبة بتحصل فى مصر ...او مش غريبة لان ده العادى من اهل ايجيبت ... مابيصدقوا يشوفوا حد عمل حاجة الا وجرى يعملوا زيه ... لغاية مابقت البلد كلها محلات موبيلات وسنترالات ومحلات بيتزا وكشرى .... وحكومة ظل وحكومة موازية ... وجمعيات حقوق الانسان بقت اكتر من الجمعيات الاستهلاكية بتاعة السبعينات ...دا غير الحركات الشعبية وحركات انتفاضية وحركات تحريرية ... وحركات مع وحركات ضد وحركات بتلزق بوسترات .... ومصر كبيرة عليك ومصر عزيزة عليك ومصر بتبوس ايديك ...وثورة غضب وانتماءات حزبية وانتماءات مهلبية ...وعصيان مدنى وخيبة ميرى ....وبرادعى وقبله عمرو موسى وبعدة سيد كفته ....والخلاصة محدش عارف هية العركة مع مين بالظبط ... ولامين واقف جنب مين ... ولا مين بيساند مين ... ولامين عايز ايه ولامين رايح فين ... ولامين معاه الحق ... ولاايه هوه الحق من اصله ... ولا هوه كلام صح ولا هوه كلام بنكررة زى البغبغنات ونحلف بايمانات المسلمين ان معانا مستندات ... ولا الحكومة عامله عبيطة ولا الشعب هوه اللى عبيط ولا احنا مش لاقين حاجة نعملها ولا احنا خلاص كلنا عجبتنا لعبة الزعامة ... ولا احنا عايزين نعيش على مزاجنا ونعمل اللى احنا عايزينه ونأنتخ والحكومة هية اللى تصرف علينا زى ما احنا قاعدين بنشارك ابونا وامنا العواجيز فى معاشهم ... ونستكبر ننزل نشتغل ب400جنية علشان الحد الادنى للاجور 1200 ...ولا مصر مستهدفة بجد ولا كلام علشان قانون الطوارئ يفضل سارى ... ولا قانون الطوارئ مدايقك فى ايه ... ولا اسرائيل وجيش الاسلام ابن القاعدة الصغير ولا حزب الله ولا ايران ... ولا غباء مسؤلين ... ولا الغبا اللى عشش فى عقول اهل ايجيبت ... ولانفسنا فى جنازة علشان نشبع فيها لطم ...ولا متاجرة بالغلابة اللى مايعرفوش عنوان جمعية حقوق الانسان فين من اصله ... ولاخيبة وقله عقل واحساس مميت بالدونية بيطلع على شكل زعامة منشودة ... والحل؟

الحل مش فى جمعية ولاحركة ولاوقفة ولا قاعدة احتجاجية ولا فيس بوك ولاتويتر ولا حتى مدونه بنطلغ فيها غلنا ... الحل ان احنا نبطل نسخن بعض ونسخن نفسنا ... الحل ان احنا نساعد بعض ونقف جنب بعض ... الحل ان احنا نرضى برزقنا ونسعى علشان نزودة مش نبص فى ايد غيرنا ونغل ونحسد ... الحل ان احنا نبطل نعمل اوصيا على بعض ...ونقبل بعض ونقبل نفسنا ... الحل ان احنا نخف من تطلعاتنا وفشخرتنا وتنطيتنا والعروسة الامورة اللى فرحانه بشبابها وجايبة مفرش السرير السورى بالفين جنية تجهز جنبها عروسة شبابها بيروح علشان الجوازة واقفة على كيسين مخدة وكليمه ... الحل ان احنا نرحم بعض ونقضى حوائج بعض ... الحل انا احنا نعيش عيشتنا وناكل اكلنا ونشرب شربنا ونتكلم لغوتنا ...ونفتخر .... الحل ان احنا نجرى ونكافح ونتعب ونشقى ونرجع البيت ناخد ولادنا فى حضننا ونعلمهم ونقلهم حبوا مصر حبوا بلدكم ومتسماعوش كلام الناس الشررين اللى عايزين يخربوها ...

الحل ان احنا نتقى ربنا ... كلنا نتقى ربنا ... من كبيرنا لصغيرنا نتقى ربنا ... ... يابويا ....تعبت

السبت، 22 يناير 2011

ماتيجى نصفى النفوس

ماتيجى نصفى النفوس

كلام واتكلمنا .... فى الجرايد وكتبنا ....على التليفزيون وطلعنا .... قدام مجلس الشعب واعتصمنا ... فى نفسنا وولعنا ....مافاضيلش حاجة نعملها ... غيران احنا نقلكوا لجل حبيبكوا النبى يامسئولين يا كبار ...راعونا شوية ... احنا مش طالبين كتير ... ولا احنا عندنا رفاهية تونس وثورتها ولا حتى عايزينها ... احنا كل اللى عايزينة ... لقمة نضيفة ... ان شالله مش نضيفة قوى ... وشوية ميه نضيفة تروينا... نص نص موافقين ... واودتين وصاله تتاوينا... وعلبه دوا سعرها حنين تشفينا ...ويعنى ولو ممكن وظيفة من سؤال اللئيم تنجينا... ومش مهم التعليم احنا حنبقى نذاكر للعيال ... يا مسئولين يا كبار وعزة جلال الله احنا ماكان قصدنا ندايقكوا يعنى وكده ابدا والله ... دا احنا عارفين ان حنا يعنى دمنا تقيل حبتين .. وهوانا وكدة مش جاى على هواكم ... ومنخبيش عليكوا ...احنا يعنى كنا بنحاول نهاجر ونسيب البلد بس يعنى العملية مش سهله وكدهوه... كنا عيزين يعنى نسيبكوا تتستمتعوا بالبلد وبنيلها وجوها وبحرها وشرمها من غير يعنى مدايقة وكدهوه بس والله ما احنا عارفين ...

لجل حبيبكوا النبى يا مسئولين ياكبار ... نفسنا تقروا معانا الفاتحة ونصفى النفوس ...ولو انتوا يعنى فى نفسكوا حاجة مننا وكدهوه ...المسامح كريم .. وانتوا الكبار برضك ... واحنا برضك بنعترف ان احنا غلطنا فيكوا كتير ... واحنا اسفين ... وياسيادنا عدننا اخواتكوا الصغيرين ... عيال وغلطت ... ونوعدكوا وعد شرف ... ان عيشتونا كويس ... انشالله مش كويس قوى ....نص نص ماشى ... نعمة وفضل ...ساعتها وما عليكوا علينا يمين... حندعيلكوا فى كل صلى ان ربنا يسهل لكوا تحويلاتكوا ويكترلكوا رزقكوا ... وفيللاكوا.. وبيسيناتكوا...ويديكوا الصحة والقوة ومايحوجكوا ابدا للفياجرا.. قادر يا كريم ... عموما هية الدعوة الاخيرة دى ملهاش لازمة قوى ... لاننا متأكدين وحسين قوى انكم ماشاء الله مش محتاجنها خالص ... دا احنا تمنين مليون يعنى ... ماشاء الله الله اكبر والله ماهو حسد ولاغيرة ... والنبى فكروا كدة واقروا معانا الفاتحة ... ومتنعوش هم ... احنا حنكتبهالكوا على ورقة كده وتقروها على طول ... علشان يعنى ماتضطروش تتعبوا نفسكوا وتحفظوها وكدهوه .

الجمعة، 21 يناير 2011

بدون اكسسوار... افضل

بدون اكسسوار... افضل

اتروشن ... هبل ... هلس ... هلفط ... عرض ... كشكش... اشرب ... حشش ... اتدروش ... قصر ... طول ... انكش .. الوى ... اعوج ..وطى ... بوس .. زمبك ... اشتم ... زور ... بور ... ازهق ... احرق .. قلد.

اقلعى .. اتدلعى ... لعلعى ... اشفطى ... فتحى ... انفخى .. قشرى ... اخلعى ... افقعى ... بعبعى ... قلدى .

بس على فكره .. طالت ولا قصرت حتدفع وتدفعى .... تمن الخيبة والعمر اللى راح اونطة فى احلام اليقظة وشحاتة نظرات الاعجاب من الناس ... وفى الاخر حتقعد وتقعدى ...تنصح وتنصحى ... تصرخ وتصرخى ... ومحدش حيسمع ... وحيجى اللى بعدكوا ... يتروشن .. يهلفط ...يهبل .. يهلس ...يعرض .. يكشكش .. يزهق .. يحرق .. يقلد .... وتقلع .. تتدلع ..تلعلع.. تشفط .. تقشر .. تفشر ... وتقلد. ... وبرضة طالت ولا قصرت .. حيدفع وتدفع ... تمن الخيبة والعمر اللى راح اونطة فى احلام اليقظة وشحاتة نظرات الاعجاب من الناس ...وحيقعد وتقعد وينصح وتنصح ... ويصرخ وتصرخ .. وبرضة محدش حيسمع الا من رحم ربى ويتعلم ... يتعلم انه يعيش نفسه مايعيش حد تانى ... يكبر فى عين نفسه قبل مايكبر فى عين حد تانى ... يحترم نفسه...قبل مايدور على حد يحترمه ... من الاخر يتعلم يبقى بنى ادم ...ماهو كل بنى ادم فينا فيه حاجة مش موجودة فى حد تانى عايش معانا على الارض... ربنا بقى... سبحانه .... بيميز عبيدة علشان يبقى لكل واحد دور فى عمار الارض ... دور على نفسك يا جميل ... دورى على نفسك يا قمر ... خليك انت ... خليكى انت ... ماتخليكوش حد تانى ... علموا نفسكوا ... طوروا نفسكوا ... كبروا نفسكوا ... وسيبكم بقى من حكاية التقليد والاكسسوار اليامه اللى بتداروا وراهم خيبيتكوا ...علشان الناس اللى شغلاكوا وعاملين حسابهم وبتشحتوا منهم نظرات الاعجاب اللى ماحدش شايفها غيركوا ...الناس دول هما اللى بيضحكوا عليكوا ... عارفين ليه ؟ ... علشان الناس دى مش عبيطة .. دول بيفهموا ويعرفوا ويصنفوا ويقدروا ... الناس دول عارفين ان كل ما الاكسسوار بيزيد ... يبقى صاحبة عبيط ... وطبعا ماحدش حيسمع ... عارفين ليه ؟ ... علشان احنا بنستسهل نخدع نفسنا ونضحك عليها ... أو علشان نفسنا هيه اللى بتخدعنا وتضحك علينا ... او علشان احنا مع بعضينا ولو اول مره لوحدينا بين فرحة قلبنا وعنينا ... غلس انا مش كدة ؟

الأربعاء، 19 يناير 2011

مجموعة ولع فى نفسك

مجموعة ولع فى نفسك

تتشرف شركة مصر هيه امى للخدمات والتكنولوجيا ... ان تقدم عرضها المميز لسنة 2011

يوجد لدينا جميع انواع البنزين ال 80 و 90 و 92 و 95 وكذلك السولار والجاز العادى والجاز الوسخ والسبرتو الاحمر من اكبر شركات البترول العالمية...كما يسعدنا ان نقدم تشكيله رائعة من الكبريت الباكستانى ... مع مفاجأة الموسم ... الولاعة الصينى ام روحين وكشاف ... علشان لو عين ماولعتش التانية تشتغل على طول ... اما الكشاف فينفع لو عايز تولع فى نفسك فى الضلمة ... ونتشرف بافتتاح ركن الاطفاء بعد التجديدات ونقدم جميع مواد الاطفاء القديمة والحديثة ... ابتداء من البطاطين وحتى الرغاوى فى علب سهلة لفتح ... كما تعلن الشركة انها على استعداد تام للتصوير السينمائى والفيديو والعرض على اليوتيوب والفيس بوك وتويتر ... ومن احدث خدمات الشركة ... داتا بيز على سى دى فيها جميع تليفونات المراسلين الاجانب والمصريين وبرامج التوك شو لزوم التسييح ... والمفاجأة الكبيرة ... عند شراءك مجموعة ولع فى نفسك تاخد فتوى هدية :

فى حاله وفاتك متأثرا بالحروق ...............نضمن لك ان تكون شهيدا .............

خد قرارك وسيب الباقى علينا

مع تحيات شركة مصر هية امى ...

العنوان : شارع خيبة الامل راكبه جمل ... من ميدان غطينى وصوتى

ت : 0900

توجد امكانية الدفع بالفيزا

الثلاثاء، 18 يناير 2011

انا مبسوط كدة ... انا مرتاح كدة

انا مبسوط كدة ... انا مرتاح كدة

افرض مثلا مثلا انك صحيت من النوم فى يوم من الايام ... لقيت فيه رئيس جديد للبلد ... ومجلس شعب من غير سرور وكله معارضة ... ووزارة فوق مستوى الشبهات ومافيهاش ولا وزير فنان ... والديموقراطية للركب ... وحرية التعبير بالهبل ... وحقوق الانسان بالعبيط ... والظباط والعساكر فى قسم الشرطة بيحموا المتهمين ... والانبوبة ببلاش ... والشقة مكتوب عليها ايجار دايم .. والاتوبيسات مش لاقيه اللى يركبها .... والعيش ابيض زى الفل وبيوصل لك لباب البيت ...والجامعات المصرية مستوليه على المراكز الاولى فى العالم ...والمستشفى معزوقة ملايكة رحمة ... ومن كتر فرص الشغل محتار تختار ايه وتسيب ايه ... والبنات متحجبة ... والولاد مابيتحرشوش ... والناس بتصلى ... وعلى كل قمة شارع كنيسة .... طاب لو ده حصل فعلا ... النجم بتاع التوك شو..حيجيب حاجة يسخنك بيها منين علشان يلم اعلاناته ... وصحفى المعارضة حيلاقى فين حد يشتمة علشان يطلعلك غلك ويزود توزيعة ...وصحفى القومية حيجيب منين حد ينافقة علشان يقدر يعيش ويتنفس ... وموظف الحى حيلاقى فين حد يدى له رشوة ... والخريج حيلاقى حجه فين يقعد بيها على القهوه ويأنتخ ...ومخرج العشوائيات حيلاقى فين سيناريو يرصد بيه الواقع ويقول انا بارصد الواقع الاليم ومش قضيتى انى الاقى حلول ... والداعية الاسلامى حيطلع يقول ايه مادام الناس كلها محترمة وبتصلى ... والاخوه المسيحين حيطالبوا بايه ماكل شارع فيه كنيسة ... واصحاب المدونات ... واهل الفيس بوك ...ومدرب البرايفت فى النادى .. والمغنى العبقرى ... ومنادى العربيات والبرادعى ... حد ينسى البرادعى ياجدعان ... ... كل دول وغيرهم وغيرهم ...حيعملوا ايه ... حيشتغلوا على مين .... وحيهبشوا فى مين ومن مين ...

ممكن فيه حد تطلع فى دماغة يولع فى نفسه قدام مجلس الشعب او الشورى او الامه ...واحتمال انه يكون عايز شهرة ... اوفلوس لما يلف على الفضائيات بعد مايطلع من المستشفى ... او مختل عقليا .. اومريض نفسيا .... او ..او ... او ... بس الاكيد .. الاكيد انه مش عايز حال البلد ينصلح ... ... لأن الحقيقة الحقيقة ...احنا مبسوطين كدة ... مرتاحين كدة ... لانها لو انصلحت ... ناس كتير حتخسر وظايفها ام الوفات ... او ملايين ... او حتخسر الشهرة والاضواء ... كله خايف على السبوبة ... اذا كانت مادية او نفسية ... علشان كدة محدش حيثور ... ويثور ليه ؟ ... ماهى ماشيه زى الفل والحمد لله ... وسيبك من حكاية الشكوى دى ... دى الشكوى رقوة يا جدعان ... وسلم لى على الغلبان .