الأحد، 29 مارس 2009

ولاعة جماجم

ولاعة جماجم

بنطلونة الجينز اجرب ...ونسل... واترفى ...وضاق واتعملة سمكة .... والقميص ماكنش حظة احسن كتير ...نسل من الياقة ....واجرب من الاكتاف ....والجزمة اشتكت خياطة ومسامير وكولّة ...بس الحق دايما متلمعة .... بس اثار الزمن ماحدش يقدر يداويها .. لا بوتكس ...ولا حتى سيليكون ...وتلاقية ماسك فى ايدة علبتين مارلبورو احمر ...طاب لية علبتين ...ماكفاية علبة ....لا هما علبتين ...وطبعا مبيقولش ان الكل علبة من دول فيهم خمس سجاير مارلبورو والباقى كليوبترا لايت ...علشان فلتر اللايت شبة فلتر المارلبورو ...فمحدش ياخد بالة.... ولما يعزم يعزم بالمارلبورو ولما يشرب يشرب الكليوبترا ....ومعاة ولاعة.. ثرى دى ...عبارة عن جمجمة كبيرة ولازق فيها جماجم صغيرة ...وماسك مادلية هيكل عظمى ....ويا رعبك يا معلم ...والنضارة الريبان اللى جايبها من سان ستيفانوا مول ....وطبعا مقالش ان باقى عليها قسطين ....ماكلة بيعدى والتلت سنين عدوا هوا ... ويالهوى على الموبيل ...موضوع لوحدة ... احدث انواع الموبايلات وبالبلوتوث كمان ....اشتراة لما كان فى جنينة مول.... وطبعا مقالش انة استعمال وانة مغيرلة الوش ....وانة قسط على تلت سنين ...رخامة على صاحب فاترينة موبيلات استعمال ...ماهو ابن خالتة ... وياما امة ساعدت خالتة ايام الضنا ....ايام ماكنوش لاقيين ياكلوا ... فاية يعنى لما ياخد الموبيل تقسيط على تلت اربع ولاحتى خمس سنين ...ولما يقعد لازم يحط رجل على رجل ....ويرجع ضهرة لورا ...ويمسك السيجارة بطراطيف صوابعة ....ويقفل عينة نص قفلة....ويديك احساس فظيع بالقرف من كل اللى حوالية ...دايما صوتة عالى ....ودايما يحلف ...ودايما ماحدش بيكدبة ... حكى عن الاسبوع اللى قضاة فى بورتو مارينا .....والمتعة اللى اتمتعها ...واد اية كان نفسة يكمل ...بس ملقاش شغل ...قصدى رجع علشان البيزينس بتاعة ....الغريب انة عمرة ما قال اية البيزينس بتاعة ...والاغرب ان عمر ماحد سألة عن البيزينس بتاعة ....وياسلام لما يحكيلك انة مايحبش يسافر القاهرة الا فى الديزل ...وطبعا درجة اولى ...و طبعا... طبعا مايقولش انة بيستخبى من الكمسرى فى الحمام .....ويحكى عن اكلة السمك والجمبرى والسبيط والكابوريا ..والقعدة الحلوة اللى على البحر ...وطبعا مايقولش ...انها كانت سمكة مشوية ورغفين على الشط .... ومن غير ماقولك طبعا عمرة مادفع حسابة على القهوة ....ومن حوالى شهرين قال انة مسافر شارم علشان عندة بيزينس ....وطبعا ماقالش ان البيزينس دة هوة تظبيط الستات العواجيز.... ومن يومها ماحدش شاف وشة ....اللى بيقول سافر مع واحدة عجوزة لبولندا ....واللى بيقول انة ضحك على عجوزة روسية وخد فلوسها ...واللى بيقول ان جالة الايدز ....بس انا متاكد انة حيرجع ...ويقعد ويحط رجل على رجل ...ويفرد ضهرة ورا ...ويولع السيجارة الكليوبترا الايت بالولاعة الجماجم ....ويقفل عينة نص قفلة ويديك احساس انة قرفان من كل اللى حوالية....ويحكى ويحكى ....وهوة مصدق ...واللى حوالية برضة مصدقيين ..........وحكمتك يارب

الخميس، 26 مارس 2009

يا انا يا انتى يا حكومة

يا انا يا انتى يا حكومة

انا اكتر واحد فى الدنيا ممكن تلاقية يتعامل مع دوواوين الحكومة ... مش حبا فيها لا سمح الله ...لكن غصب عنى والله ...فى الضرايب تلاقينى ...فى التامينات تلاقينى .. فى السجل التجارى ...فى الغرفة التجارية ..فى الشهر العقارى ...فى مكتب العمل ....حظى كدة ...اعمل اية ...كل ماروح اخلص ورقة ماتخدش خمس دقايق ....اقعد فيها يومين تلاتة ....هات وصل نور..... هات وصل كهربا. ........هات شهادة من اتنين موظفين لايقل مرتبهم عن اربعين جنية .....طاب هوة فية حد مرتبة اقل من اربعين جنية دلوقت .....حتى لو فية ....هوة مش بنى ادم ...والحكومة مأمناة على شغلها ...طاب لو مش مأمناة.... شغلتة لية ؟...واية الفرق بين الموظف اللى مرتبة اربعين جنية واللى مرتبة اقل من اربعين جنية؟!! ... دا غير هات شهادة الميلاد.... الاصل طبعا ...وشهادة الثانويةالعامة ...طاب يا جماعة ماهى شهادة البكالوريوس اهية ..هوة ممكن اخد شهادة البكالوريوس من غير ماخد الثانوية العامة؟!!! .....طلبات ماتنتهيش ...طاب ليه ..على راى بنتى لما تحصل لها حاجة ما تعجبهاش ....والاغرب والاعجب انك لما تروح تسأل عن ملفك ...يقولك بكل بساطة ..ضاع !!! ...فخدتها حكمة من موظف قديم...صارت بيبى وبينة صداقة من كتر ما رحت لة ...قالى اوعى يابنى تاّمن للحكومة ... وفى يوم نطت فى دماغى فكرة جهنمية ...اعذب بيها الموظفين زى ما بيعذبونى ....نزلت اشتريت شنطى جلد بايد ,,, وكتبت عليها يا انا يا انتى يا حكومة ...شوف بقى حطيت فيها اية ...شهادة الميلاد.. وشهادة الجيش.. وشهادة البكالوريوس... وشهادة الاعدادية ...وشهادة الابتدائية

ورحت حصانة ناصر ..الحضانة اللى كنت فيها زمان ... وجبت منها شهادة مختومة تثبت انى كنت فيها سنة تسعة وستين .... وانى كنت حسن ا لسير والسلوك ...وطبعا حطيت البطاقة ...وجواز السفر ..وشهادات ميلاد بناتى ..وعقد جوازى ...وورقه مختومة من اتنين شهود ان الشاهد الاولانى على جوازى مات ...بس همه كانوا حاضرين ...وفيش وتشبية لمن يهمة الامر ..وكارنية النادى ...وشهادة مختومة انى من ابوين وجدين مصريين ....وقولت اعمل الدى ان اية بالمرة ...مالحكومة بقت تكنولوجية ...وشهادة اخلاء الطرف من الجيش ...ووصل النظافة اللى بناخدة من مجلس المدينة ... وشهادة من دكتور انى على قيد الحياة ...وانى خالى من الامراض المعدية ...بس اللى معرفتش اجيبها .. شهادة انى خالى من الامراض العصبية والنفسية ...محدش رضى يديهالى لما عرفوا حكاية الشنطة دى ...القصد ...ومن يومها الشنطة مابتفارقنيش ....بس تروح فين يا صعلوك بين الملوك ....رحت ديوان من الدوواوين اخلص ورقة ...وقفت قدام الموظف وكلى ثقة فى نفسى ...مافيش ورقة يطلبها اللا واقولة اهية ... كان جويا احساس شرير بالشماتة..... ماانا مش منولة غرضة ....عذبتة ...كنت فرحان فية قوى ...طبعا الراجل كان تعبان ...قالى بغيظ ...ماشاء الله ماشاء الله ...كل ورقك جاهز ... بس لو تعرف تجيب ورقة فاضية ...اكتب لك فيها الطلب يبقى كتر خيرك ...وبكل شماتة....فتحت الشنطة وطلعت له ورقة فلوسكاب ابيض ...اتغاظ اكتر وقالى ...لأ ...اناعايز مسطر ...قولت له ولا يهمك ورحت مطلع له ورق مسطر ...قالى طاب انت نسيت الدمغة طلعت له الدمغة ..قالى عايز طابع شرطة ...قولت له اتفضل ...الراجل كان حيعيط.... مش مرتاح يا ناس .. مش واخد على كدة .... قالى طاب ماشى ماشى ..احنا كدة خلصنا .... بس لازم تروح تدفع فى الخزنة .... قولت قوى هات الوصل ....قالى بشماتة ... الساعة اتناشر وخمسة ....والخزنة بتقفل الساعة اتناشر ...تعالى بكرة ... وابتسم حتة دين ابتسامة ...وقام وهوة بينادى هات لى كوباية شاى يا منعم ...

الا لية والنبى الخزنة بتقفل الساعة اتناشر مع ان باقية الديوان بيقفل الساعة اتنين .....اللى يعرف يقول لى.... والنبى والنبى

الثلاثاء، 24 مارس 2009

نفسى ابقى كومودينو

نفسى ابقى كومودينو

كان صابح اجازة ....اجازة طابا .... عقبال اجازة اسكندرية ...واجازة طنطا ...واجازة ميت مرحوم ...قررنا انا وصحابى ...انا احنا نسهر مع بعضنا على القهوة...كنا اربع شباب زى الورد ...جة الجرسون يشوفنا نشرب اية ....قولنا فى نفس واحد .... ينسون وخلى السكر برة....كان اصغر واحد فينا حيقفل الاربعين بكرة ...يابختة ....الناس كلها واخدة اجازة فى عيد ميلادة ....قعدنانفتكر فى ذكريات زمان ...وايام الجامعة ..والبنات اللى حبناهم ....وكان نفسنا نتجوزهم .... وطبعا ماحدش فينا اتجوز اللى كان عايزها .... هوّة احنا كنا لاقيين تذكرة الاتوبيس!!!! .... (لما بنشوف البنات اللى كنا عايزيين نتجوزهم دلوقت ...بنحمد ربنا ان احنا كنا مفلسين) .... واحنا بنضحك ونهزر ...كان واحد فينا قاعد سرحان ...لا بيتكلم ولا بيضحك معانا ولا بيشاركنا الذكريات .... سألناة اية يا عم ... روق كدة ...دى الليلة عيد ....مالك كدة شايل طاجن ستك .... رد بنرفزة انا متغاظ...منكاد....مفروس سألتة من اية ؟ ...رد رد غريب قوى قال مفروس من الكومودينو...وطبعا انت عارف لو واحد فى الشلة وقع ممكن يحصل لة اية...... وهاتك يا تريقة ...لية هوة خد ترقيتك ؟!!... امال الدولاب عامل معاك اية؟!! ..كومودينو ياراجل يامطبق!!!....وهوة برضة مابيردش وسرحان ...قولت فى نفسى لأ... الواد شكلة فى ازمة ..زعقت لصحابى وقلت لهم بس يا واد انت وهوة ...مالك يابنى شكلك زهقان بجد ....ومصـدّق حد يسألة وانفجر ...اية ... هوة فية اية...حرام ...العمر اتسرق ...ماعدش فاضل اد اللى راح... كلها خمس ست سنين وابقى عجوز ما اسواش....عامل زى التور فى الساقية من يوم ما اتخرجت ...باجرى علشان الاقى شغل ...واجرى علشان احوش .. واجرى علشان اتجوز .. واجرى علشان اصرف على البيت والعيال ومدارسهم ولبسهم وجهازهم ومستقبلهم ..انا بقى فين ..مين حاسس بية ..كلة عارف عايز منى اية ..ومحدش سأل انا عايز اية ...رديت علية طاب يابنى ماحنا كلنا على كدة ...دى سنة الحياة ... صرخ وقال : لأ ربنا مايرضاش بكدة ..العمر بيجرى والواحد ماشفش يوم حلو ... كله شقى ... وهم .... محدش بيسأل فيّة ..دا انا ماحصلتش الكومودينو ...دى مراتى مهتمة بالكومودينو اكتر منى ...مسح وتنضيف وجلانس ومفرش جديد ... باتعامل زى دكر النحل ..لأ لأ لازم اتجوز تانى ... حقى ولا مش حقى ...حقى شرعا وقانونا ...ايوة حاتجوز واحدة صغيرة وحلوة تاخد بالها منى ...وتدلعنى ... ومش حاجيب كومودينو فى العفش ...عايز احس انى بنى ادم مش مكنة فلوس ....والعيال كدة كدة حايكبروا ...وحيبقى لهم حياتهم ... ومش حيفكروا يرفعوا سماعة التليفون يسألوا علية ...الحق نفسى انا بقى ...قولت لة : طاب واية ضمنك ان اللى حتتجوزها دى ماتطلعش زى مراتك ؟! ...قالى لأ لأياحبيبى مانا حنقى بقى ... حنقى واحدة صغيرةوحلوة وروشة ... قولت لة مسالتش نفسك هية الصغير الحلوة دى حتاخدك على اية ...اينعم النيو لوك بقى سهل ...حتصبغ شعرك ..وتركب الكوبرى ...وشوية فى الجيم والكرش ينزل ...لكن النفس يا جميل حتعمل فية اية ....البت الصغيرة اللى بتقول عليها دى ....عايزة تعيش ..عايزة تتفسح وتخرج وتشوف الدنيا ...عايزة تتنطط وتسهر ....شبابها قدامها لكن انت شبابك ورا ضهرك ...حتى لوعملت كدة ...مش حتقدر تواصل ...حتتكسف من نفسك ....حتى لو ماتكسفتش ...حتتعب ...حتزهق ...وحتضطر علشان ترضيها ...تعوضها بالهدايا والدهب والفلوس اللى بتشتكى انك بتدفعها لمراتك وعيالك ...وشوية ..وحتطلب حقها فى انها تكون ام ...وخلف يامعلم بقى وربى من جديد ...ومغص وبامبرز وسهر ودكتور ..وعياط ومدارس .....حتركب الساقية من جديد ... بس خلى بالك المرة دى التور عجـّز مش حيقدر يلف ....مش حيقدر يكمل .... رد عليّة بيأس: لأ انا لسة فى عزى ....قولت لة فوق بقى لاعز ولا وز ...فوق وافتكر كويس ...لا انت عشت ...وروقت ..وعاكست وحبيت ...وخطبت ورقصت...عشت حياتك ..بس تلاقيك كل الحكاية قعدت كتير اليومين اللى فاتوا قدام الدش ...وركزت شوية مع نانسى وهيفا وروبى وطوبى ....حنيت للشقاوة ياعفريت ...قولت فى نفسك بسرعة كدة الحق لى كمان حتة ....لا ياحبيبى انت خدت منابك خلاص ...فوق يااهبل ...سيب العيال بكرة عند ستهم ...وخد مراتك واعزمها على فسحة حلوة واتعشوا برة وادخلوا سينما ....حتلاقى الدنيا بقت حلوة .. وحتنسى حكاية التور والساقية وحتحب الكومودينو...اللى شايل بلاويك....سرح شوية كدة وقالى ...لا ياعم مايهونش علية العيال ...انا حاخدهم معايا ...ماينفعش اسيبهم واتفسح انا !!!!!

الأحد، 22 مارس 2009

توضيح لابد منه

توضيح لابد منه

اكتر من عشرين تليفون.... واكتر من رد على البوست بتاع الدى ان اية .... بيسألنى عن الحوض المرصود ...هوة بصراحة....مافيش غير الاخت صبرنى يارب اللى قربت شوية..... هوة فعلا مكان فى القاهرة بس مش حاجة اتسرقت ورجعت..... دا كان من اشهر الاماكن اللى كان بيمارس فيها البغاء تحت سمع وبصر وحراسة الحكومة... وبالقانون .....دا طبعا قبل قانون الغاء البغاء اللى كان سنة1949 ....واللى المخرجة العبقرية اللى بتدغدغ... وتونــِّس... مشاعر الناس بافلامها العبقرية ....نفسها ان الايام دى ترجع وكلة يكون بالقانون ....زى ماقالت على القناة الفضائية...... وحسبى الله ونعم الوكيل ......وشكرا الى كل من قرأ البوست..... ولا اخفيكم سرا اننى كنت قد قررت ان يكون اخر بوست ..... لانى حسيت ان مافيش فايدة من الكلام والكتابة ....بس كان تعليق فى التليفون ..هوة اللى خلانى ارجع فى قرارى .....قالى اوعى تسلم لو نجحت انك تغير واحد من السبعين مليون يبقى انت نجحت.....ثم ياخى كمل اهى حتة تبقى فضفضة وماتموتش من الكبت.... وشكرا جزيلا لكل من قرأ البوست مرة تانية..... وربنا يخليكوا لية ....بالمناسبة فية مصطلح دايما بتقولة البنات والستات لما يشوفوا بنت او ست واخدة بالها من نفسها حبيتين .... بيقولوا الست دى عايقة او البت دى عايقة ....خلوا بالكوا كلمة عايقة دى كانت زمان قبل سنة 1949 بتتقال على القوادة اللى بتشغل البنات اللى عندها فى الدعارة ...ومن اشهرهم ... بهية الزايطة عيشة النجس....فاطمة طرطور... بنبة العربجية....سيدة جرح.... ونفيسة الكبابجية

وتكملة للمعلومة مدام الموضوع انفتح ...كانت البنت اللى بتشتغل بقى ... يقولوا عليها ... مقطورة ..وكان فى حكمدارية البوليس اللى هوة قسم الشرطة دلوقتى فية دفاتر لتسجيل البغايا الاسم والعنوان.... والمكان اللى كانوا بيتجمعوا فية كان اسمة ...كرخانة ... وكان لكل واحدة من اللى بيشتغلوا كارت متابعة تروح تكشف فى مستشفى الجلدية كل اسبوعين....ويتكتب نتيجة الكشف فى الكارت ... ايوة كل واحدة معاها كارت فية اسمها وعنوانها وتاريخ الكشف الطبى .... وملاحظات تانية ... مثل...غيرت الرخصة من245 الى378.....المذكورة صارت مقطورة طرف العايقة عيشة النجس ....المذكورة تابت وسلمت الرخصة للقسم بتاريخ كذا ..... وكتير من النوع دة ... ومن اشهر اماكن بيوت الدعارة فى الوقت دة ...وش البركة ..باب الشعرية.....بولاق ...كلوت بك ....وطبعا اللى فتح السيرة ..... الحوض المرصود

الثلاثاء، 17 مارس 2009

أوعى الدى ان اية

أوعى الدى ان اية

هوا احنا لية ماعندناش زىّ وطنى ... علشان ببساطة احنا خلطبيطة ....سلطة .... كنافة.... كل واحد فينا فى وطن غير التانى.... يحلفولك انك فرعونى ...واجدادك هما اللى بنو الاهرمات....ويأكدولك انك عربى ...كريم العنصرين.... ويقسموا لك انك اسلامى ومن ضهر عمرو بن العاص ...ويرجعوا يشرحولك انك قبطى....وسيدنا عيسى عّدى على سينا ....ويفهموك ازاى العرق التركى مادد فى نص البلد....

بدليل طابوزادة والارناؤطى...ويبينوا لك ازاى المماليك اثروا علينا ...داغير الهكسوس ....والرومان .... والكنعانيين والاسكندر الاكبر..... والفرنجة ...والانجليز ... وبونابرت .. .. وكليبر.... وسليمان الحلبى يانهار اسود ومنيل ...حتى اللى خدلنا بتارنا سورى....

الحمد للة انا متأكد ان مافيش فى دمنا .....دم هندى ....والله اعلم لغاية دلوقتى يعنى .....ويرجع السؤال احنا ملناش زى وطنى لية .... سؤال طبعا عبيط مش لما نعرف احنا مين الاول نبقى نتفق على حاجة تسترنا.... القصد ....طلع علينا حبة مثقفين وهاتك يارغى فى الموضوع دة ....واتوصلوا لحل يرضى جميع الاطراف ....مازعلوش حد .... وبدون مايشعروا ....قالو الحقيقة ....حقيقتنا ....قالوا ان مصر زى المعدة ....ايوة معدة.....لمت كل الحضارات اللى عدّت عليها ....وهضمتها ايوة ياسيدى اتهضمت الحضارات ...وانت عارف طبعا ....زى ماخدت فى العلوم فى سنة رابعة ...ما هى النتيجة النهائية للهضم.....ايوة ياسيدى احنا كدة بالظبط.....اخراج كرية الشكل والرائحة...لزج الملمس...كئيب اللون ...خرج للدنيا علشان يخرب اكتر مايعمر....يشتم اكتر مايشكر....يموت فى اللطم ...يشتكى ليل ونهار ...حتى لوكانت مستورة ....ماهو الشكوى رقوة... رقوة من العين ..والجن والعمل السفلى ..دايما عندة شماعة جاهزة...اسمها الحكومة ... ماهى حكومة بت كلب ...مابتشغلناش ...وان شغلتنا بنزوّغ ...ونشتكى ان المرتبات قليلة ..والعيشة مش مكفية ...وكارت الموبيل مابيكفيش تلت ايام... وتقسيط الكمبيوتر كاسر وسطنا بس لازم .... امال الفيديو كليب مش لازم ننزلة على الكمبيوتر امال نشوف نانسى وهايفة ازاى ....والنت ....ونعمل شات والبت تعمل واد والواد يعمل بت وهاتك يارغى للفجر ...ونتخمد للعصر ونرجع ننزل نتفسح ...والبنات لابسة بدى وجينز محزق .... بس اوعى تفتح بقك ...الطرحة تمام ولا لأ....والكل ماسك فى ايدة الكانز والايد التانية ازازة المية المعدنية ...مية معدنية فى بلد النيل؟!!! ....وكافيية... وشوبنج... وموول... وسنتر... ولمبى ... ورمضان مبروك ابو العلمين حمودة.....والأب بكل بجاحة يطلع فى الدش ...ويقول فين حق بتى..... واوعى الدى ان اية لا يعضك...بمزاجى اه ...لكن تتحرش .... شوف حاعمل فيك اية ....والنبى لاخليكوا كلكوا تتنادو باسامى امكوا ... .. عرفتوا لية بقى مصر ام الدنيا .....علشان خلفت من كل الدنيا..... وعمرها مادورت.... ولا حتدور على الدى ان اية..........وكفايا بقى علشان ... تعبت.... وزهقت... ومليت ...وطهقت ....... وسلم لى على الحوض المرصود

الاثنين، 16 مارس 2009

من شقـّــــاط للقـّــــاط


من شقـّــــاط للقـّــــاط

قام الواد العصر .... ماهو ماعندوش شغل ... ويشتغل لية .. مابابا عندة قهوة والفلوس كتير .... وقبل حتى مايغسل وشة .. كلم البت وقعد يحب فيها ...والبت معاة الله ينور ...ماهو لو متجوزش.. يبقى اتفسحنا ..ودخلنا السيما .. وكلنا كنتاكى ... اهى فكة بدل الهم والحبسة اللى الواحدة فيها .. قفلت الموبيل وقالت لامها .. انا نازلة ازور واحدة صحبتى ... وعلشان ماما مكبرة ..خلـّصت زمتها من ربنا وقالت لها بس ماتتأخريش ... وانتى جاية عدّى على خالتك وهاتى حلة الكسكسى علشان الموسم بعد بكرة ...وقفت امها فى المطبخ دماغها تودى وتجيب ...الراجل جاى له حوافز الف جنية ...قالت فى نفسها افلسة قبل ما يتسرمح بيهم ...ماهو قصقصى طيرك قبل ما يلوف على غيرك...طلبتة على الموبيل وقالتلة ماتنساش تعمل حسابك احنا عايزين كسوة الصيف ... ردعليها الراجل وقالها ماكنتى تستنى لما ارجع لزمتها اية مكالمة الموبيل دى ..قفل السكة وحلف مايقولها على قرش داخلة بعد كدة ....دخل الراجل على مديرة يشتكى لة الهم والمرض وطلب منه خط سير ....يروح التأمين... واهو يزوغ بقيت اليوم ...وافق المدير ماهو موش عايز وجع دماغ ومناهدة ...ماهو مدير اّة بس بنى اّدم برضة..... وراة مسئوليات ومطالب والعيشة مش مكفـّية..... رفع السماعة وكلم حماتة ...ظبطها بكلمتين ...وقالها احنا مستنيينك النهارة ...انتى وحشتينا والولاد نفسهم يشوفوكى ...حماتة كلمت حماة وقالت له هات معاك زيارة لبتـّك علشان انا حازورها النهاردة ...ومش معقول ادخل عليها بإيدى فاضية ....جوزها يقول علينا اية ...ولا عايزة ينكد على البت ....قفل حماه الموبيل وقعد يسب ويلعن ..هو انا ناقص مصاريف ياولاد الكلب ....واتنرفز على الموظفين الغلابة وخصم لكل واح يوم ....خد العربية وراح يصلحها عند الميكانيكى ....والشغلانة اللى ماتساويش عشرين جنية خد فيها الميكانيكى تلتميت جنية ....وايه يعنى ماهو صاحب شركة اد الدنيا هوة عايز يركب عربيات ببلاش ....ثم انا عايز اكمل تمن الموبيل ...وراح اشترى ال إن 95 .. بزيادة تلتميت جنية عن تمنه ...ماهو بتاع الموبيلات اقنعة ان معاة ضمان دولى ...يعنى لو سافر اى حتة برة يقدر يصلحة ببلاش ....مع ان صاحبنا ابعد حتة سافرها كانت دمياط علشان يجيب عفشة ....القصد بتاع الموبيل روح اتغدى ودخل ينام .... مراتة دخلت وراة قلـّبت جيوبة ولهفت 100جنية .... ماهو الواحدة مننا لازم تأمن نفسها ...حاكم الرجالة غدارين...وشوية رن جرس الباب ....ودخلت ام نجاة الدلالة وباعت لها حتتين قماش على انة حرير هندى معتبر مع انة مكتوب علية

MADE IN CHINA

وهوة اصلا مايساويش تلاتة جنية ...خدت ام نجاة الفلوس وحطت خمسين جنية فى الشنطة والخمسين التانية حطتها فى أأمن خزنة فى العالم ....كان ابو نجاة مستنيها على باب العمارة ...وقالها فين فلوسك ياولية ... فتحت الشنطة وعطت لة الخمسين جنية وقالت لة وحياتك عندى دول اللى كسبتهم النهاردة ... قالها اوعى ياولية تكونى مدكنة حاجة كدة ولا كدة ... خبطت على صدرها وقالت له اخص عليك يابو نجاة هو انا عمرى عملتها ... خد ابو نجاة الفلوس وراح على القهوة يلعب قمار على المشاريب ...ولأنة حمار خسر طبعا ... وحاسب الواد فتلة على المشاريب .... الواد فتلة القهوجى غالطة فى عشرين جنية حطهم فى جيبة .....واّّخر النهار حاسب المعلم اللى خصم منة عشرة جنية ...ليه مش مهم اهى غلاسة ....ماهوبيغالط الزباين ويحط فى جيبة ابن الحرمية.....خد المعلم الإيراد وروح يتعشى مع العيال .... الواد قالة يابا عايز ميت جنية علشان اجيب كرت شحن علشان فية كام اعلان وظايف ...وعايز اكلمهم علشان ربنا يكرم واشتغل واشرفك .... المعلم عطالة الميت جنية ودعا له ربنا يكرمة ....جرى الولد على الموبيل يكلم البنت ويعزمها على فسحة وسينما واكلة كنتاكى ......

الجمعة، 13 مارس 2009

فــتــَّحى الدواليب يا بت

فــتــَّحى الدواليب يا بت

من زمان مارحتش لخالتى باريس ...ايوة باريس ...دى الصغيرة خالتى الكبيرة هية اللى فرنسا

.. قولت ياواد روح اتطمن عليها ... ماتخليش الدنيا تاخدك وتنسى اهلك ..خصوصا انى عرفت ان بنتها نجلاء جالها عريس وحتتجوز قريب ..البت يا اخى كبرت وبيجيلها عرسان .. المهم رحت لها ..كانت فرحانة بيَة قوى ... خدتنى بالحضن وقعدت تحكيلى على العريس .... قالت لى ... عندة شقة .. وشغال مع ابوة فى التجارة ..وطيب .. من بخت البت نجلاء ..اصلها غلبانة وبت حلال .. مش زى البنات بتوع اليومين دول ..معلش يابنى البيت مكركب .. قولت لها ولا يهمك ياخالتى هو انا غريب ... بس اية الكراتين دى كلها ...ردت.. اصلى قولت اطلع شوار البت واشوف اية اللى ناقصها.... قولتلها ياخالتى لايمكن يكون فى حاجة ناقصة قولى اية اللى زايد .... ضحكت وقالت ..انتو كدة يارجالة ..ايش فهمكوا انتو فى شغل الستات ... اسكت دا والنبى ناقصنا حاجات كتير تصدق... بنعد الفوط لقيناهم ستين بس يعنى لسة عايزين خمستاشر فوطة.. اية يا خالتى حتدخلى البت بخمسة وسبعين فوطة ...هوة العريس ماكنش بيستحمى فى بيتهم ولا اية؟!! ردت خالتى بزهول ...انت عايز تفضحنا ولا اية ..هوة كدة العروسة لازم تخش ب75 فوطة... واتفرج معايا يامعلم ..24طقم سرير.. 4بطاطين بوشين الوزن قايم 6كيلو....بطانيتين النمر.... طقم حلل تيفال ..طقم حلل الومنيوم ... طقم حلل صاج... طبعا غير الفردانى .... طقم صينى يابانى اصلى لزوم النيش .... طقم صينى صينى لزوم الاستعمال .... طقم اركوبال لزوم الفرن ... دا غير الفنجيل والكُبيات ...... اللى زهقت من عدهم لما وصلت لل43 ... وشنطة معالق وسكاكين بمية الدهب ...وشنطة تانية بس من غير مية الدهب .... ومفرشين سرير هندى .. وكاسات تركى... والبراد ماليزى ... والسكاكين مغربى ... دا غير 12طقم خروج صيفى ... و12طقم خروج شتوى ...

دا غير توكيل جويا اللى فى الدرج التحتانى واللى طبعا ماخلونيش اشوفة .... وسبع كراتين صابون كامى ....وسبع كراتين صابون لوكس .... اكيد العريس ماكنش بيستحمى فى بيتهم...

و6 برسيل اوتوماتيك تسعة كيلو .... لييييييية هوة فية ايييية ...داجهار مدرسة الثانوية بنات ....حرام عليكى يا خالتى ... ردت وقالت ... انت عايز تضحك الناس علينا!! ...ولا تشمت العدويين فينا!! ... لما يجوا كدة فى الصباحية ويفـــتــّحوا الدواليب.... يقولوا علينا اية؟!...اسكت هو احنا جبنا زى اللى بيجيبو .. العين بصيرة والايد قصيرة...ينهار اسود ...امال لوكانت طويلة كان حصل اية ...ماناعارف ظروفها.. ...الراجل موظف وبيشتغل بعد الضهر ... امال جابت الحجات دى كلها منين ... اتلائمت وسألتها ... اكيد الحاجات دى كلفتك الشىء الفلانى؟!!..... قالت لى بكل رضا .. اهو ربك بيدبرها..... ماهو رزق البنات واسع.... اهى جمعية من هنا على جمعية من هنا ... على شوية حاجات بالتقسيط ....والراجل برضة ماسبنيش .. عمل استبدال معاش.....وربنا يقدرنا ونسدد القرض بتاع بنك ناصر .... مش بقولك يابنى رزق البنات واسع ... سرحت مع نفسى رزق اية بس ...دا انتى مديونة لشوشتك ياولية... فوقت على صوتها وهيه بتقولى ... ماهو لازم اشرف البت قدام اهل جوزها .. وقدام كل اللى حيجى فى الصباحية ويفــتـّح فى الدواليب ...سرحت تانى ...هية ايه حكاية يفــتـّح فى الدواليب دى .. هية الدواليب دى مش حاجة خاصة برضة والا انا متهيألى ...ينهار اسود ... يكونوش فى صبحيتى فتحوا دواليبى انا كمان .... مش هم الدولاب اللى فيه البدل .. مش مشكلة ..المشكلة لو كانوا فتحوا .... مش مهم مش مهم ..انا شغلى كله جيل ... ماركة يعنى ... ماكنش فية حاجة بفتة خالص ...باركت لخالتى ونزلت .. وطول السكة وانا سرحان فى سؤال نفسى حد يجاوبنى علية .... ياترى لو منعنا الناس من انها تـفــتـــّح الدواليب فى الصباحية اية اللى ممكن يحصل ؟؟؟



الخميس، 12 مارس 2009

نجاشى و أورجانزا

نجاشى و أورجانزا

جرس التليفون رن الساعة 3 الفجر نط مهند من على السرير... يارب استر ...دا مين اللى بيطلب فى الوقت دة...ربنا يستر ...رفع السماعة لقى صوت امة الحاجة أورجانزا بتصرخ وتعيط...

أورجانزا : الحقنى يابنى..... الحقنى يا ياضنايا

مهند بخضة : خير يامه ابويا جرى له حاجة.... ؟

أورجانزا : هودة بيجراله حاجة ...اهو زى الجن قدامى

مهند : طاب خير يامه ...والنبى قولى انا مش عارف امسك اعصابى

أورجانزا وصوتها كل دموع : انت لازم تطلقنى من ابوك....و دلوقت حالا

اول حاجة عملها مهند انه خبط راسة فى التربيزة اللى عليها التليفون وقال لها:

ماشى يامة .... بس المأذون زمانة نايم دلوقتى ....ممكن نخليها الصبح ... اول مايصحى حاجيبة واجيلك

أورجانزا :لأ لو مجيتش دلوقت يبقى قلبى وربى غضبان عليك ليوم الدين

مهند :طاب يامه ماهى مش مستاهله مأذون ...ابويا يقولك انتى طالق وخلصنا ... وابقى اجيب المأذون الصبح

أورجانزا :اة وعايزنى ابات معاة فى الشقة وانا مش على زمتة ...عايزنى اقعد معاة فى الحرام

مهند باستعطاف : ماهو يامه لما يطلقك حتبقى لسة فى العدة ..يعنى لسة فى الحلال برضة

أورجانزا : ايوة ..ماهو يقدر يردنى لوعاز ....لأ... حتيجى ولا لأ

مهند باستعطاف : يامه والنبى ... الساعة تلاتة ..والجو برد ..والدنيا بتشتى

أورجانزا بتهديد : خلاص متجيش ..ماتجيش لأمك اللى شالتك فى بطنها ...ورضعتك من صدرها...روح قلبى وربى .......

وقبل ما تكمل الدعوة مهند قالها خلاص يا مه انا جاى وقفل السماعة ودخل يلبس هدومه

مرات مهند قالتله اية بتلبس ورايح فين؟ !

مهند : ابدا .. حشوف مأذون علشان امى عايزة تتطلق دلوقت

ردت مراتةوقالت طيب... ماتنساش تقفل الباب وراك بالمفتاح ..وشدت الغطا وادتة ضهرها ونامت

لبس مهند ... ونزل ويادوب وصل لباب الشارع .... والدنيا سيول يامعلم ...رجع جرى ياخد الشمسية

...ونزل ...قال فى نفسه ياساتر الشارع مافيهوش بنى ادم .. وهما خطوتين .... وطلع لة كلب بلدى معتبر ...بلدى بلدى يعنى العفانة... والجوع..قعد يقول استر يارب ... وسمع كل الايات اللى حافظها... لغاية ما الكلب عدا من جنبة.... ولسة ما كملش كلمة الحمد لله ...الا والكلب يتضير لة ......ومطاردة يامعلم ولا مطاردة السيما.... الكلب يهوهو...والسما بتبرق .. والشتا سيول ...والشمسية بتطير... وقع مهند على الارض والكلب حصلة ... وربنا كريم .. كان مهند لابس الكلسون ..وبنطلون البيجاما تحت البنطلون

...فالعضة ما وصلتش للاخر الحمد للة.... ايوة يادوب قطعت البنطلون من ورا .... القصد مهند بقى مية ... والشمسية طارت و ماعرفش يجيبها ....ووصل مهند بالسلامة ...ابوة فتح لة الباب ....ودخل مهند

مهند : ايه يابا فية ايه زعلتها لية؟

نجاشى : برضة ... برضة انا اللى زعلتها... حسبى الله ونعم الوكيل ... ما انت طول عمرك ابن امك مهند : معلش يابا ..الستات عايزة المسايسة ..

نجاشى : واحنا يعنى ا للى بهايم.... معندناش دم...... مابنحسش ولا اية؟!

مهند قالة طاب اهدى يابا ... وتعالى احكى لى اية اللحصل ...بس والنبى شوف لى فوطة انشف بيها المية اللى علية دى

ولسة بينشف بالفوطة وسمع امه بتصرخ من جوة

أورجانز : اتودودوا ... اتودودوا كمان ... بدال ماتخش جرى على امك تشو ف اللى بيحصل لها...

امك اللى ربتك ..وكبرتك ... وعملتك راجل ...ومراتك الدايخة جات خادتك على الجاهز

مهند : ياما مالك ومال مراتى دلوقت ؟!

أورجانزا : ايوة دافع عنها دافع ..مانا خلاص مبقاليش لازمة .. انا اللى رضعت ..وشخخت ..وغيرت ماهو ايوة.. . ربى ياخايبة للغايبة

مهند : سيبك يامه من مراتى دلوقت وقولى لى اية اللى حصل

أورجانزا : اللىحصل؟ مانت ماتعرفش اللى حصل ..ماهو حتعرف منين ... هو انت حد بيشوفك

مهند : يامةهوة مش انا كنت عندكوا امبارح العصر

أورجانز : ماعرفش بقى اهو خلصنى من الراجل دة وخلاص ...دا كان يوم اسود يوم ماتجوزتة

مهند : يامة اليوم الاسود دة كان من خمسين سنة ...!! لزمتة اية بس ..انتو مالكوش الا بعض

أورجانزا : ايوة ...ايوة يا اخويا بدليل انة قاعد يشكر فى امينة رزق... ويقول شايفة وقفت جنب جوزها ازاى لغاية ما كبرتة ...ولاعيالها طالعين كلهم فى مراكز مهمة....ليه انشاء الله ... هوة انا كنت قصرت فى اية.... دانا شايلة همه وهم اهلة من يوم ماتجوزته ... دا داخل علية ماحلتهوش غير مرتبة

مهند : امينة رزق مين يامة؟!!

نجاشى وهوة حاطط وشة فى الارض : الممثلة يابنى... محنا كنا بنتفرج على فيلم قديم عمك محروس عطاهولى على سى دى وقالى اسهر سهرة تفكرك بايام زمان

مهند : اه ... بس يامة امينة رزق دى ماتت من زمان

أورجانزا : وانا مالى ماتت ولا عيشة .... انا فى نكران الجميل الل قدامك دة

مهند : خلاص يامة ابويا غلطان ومايستاهلكيش ...خليكى انتى العاقلة

نجاشى : لية هو نا اتجننت ولا اية دو ولية بتخرف ...زعلانة من ممثلة ماتت فى فيلم ابيض واسود

مهند : يابه يابه الله يسترك وحياة حبيبك النبى...... ماهو مالكش حق برضة ...امى يامه تعبت معانا...

ولازم نقدرها ونديها حقها

أورجانزا : ابدا... الطلاق يعنى الطلاق

مهند : ماشى بس خلى بالك يامة لوطلقك مالكيش حق فى الشقة ...انتى مش حاضنة ....

أورجانزا بتردد : ولايهمنى

مهند : ماشى مش مشكلة .... دى نور لما اقولها ان ماما حتيجى تقعد معانا حتفرح قوى

أورجانزا نور مين دى اللى اقعد معاها ... وبعدين البنطلون بتاعك مقطع كدة لية ... روح يانجاشى شوف لة بنطلون فى الدولاب ..... وابعدوا عنى بقى رفعتولى الضغط ...عايزة انام ... يللا برة..

جاتك نيلة انت وابوك

مهند خد ابوة وخرج وهوة بيقولها داحنا من غيرك مانسويش يامة ..... لبس مهند بنطلون بدل اللى اتقطع ...ودخل ابوة ينام .. طبعا فى الاوضة التانية...

كانت الساعة سابعة لما وصل مهند البيت ...قابل عيالة على السلم رايحين المدرسة.... طلبو منهم المصروف ...عطاهم ..نور فتحت لة الباب ..وقالت له خش انت نام وانا حكلم الشغل اخد لك اجازة النهاردة .... الله اية البنطلون اللى انت لابسة دة ....قالها ابدا ماتقلقيش الدنيا كانت ضلمة محدش شاف حاجة ...اصل لما......الكل........وراح فى سابع نومة

الأربعاء، 11 مارس 2009

عبقرية المصريين

عبقرية المصريين

انا سكن فى وسط البلد ..ورايا المحكمة ..والشهر العقارى ..وجنبى رئاسة الحى ..والعمارات اللى فى الشارع معظمها دكاترة ومعامل ومراكز اشعة ومحاميين ومحاسبين ...يعنى خلية نحل ... دا طبيعى فى وسط البلد .. والطبيعى برضة انك ماتلقيش ركنة لعربيتك بسهولة ...ماهى البلد بقت جراج كبير وسنترال اكبر ...كلة راكن العربية وكلة بيتكلم فى الموبيل .. القصد طبعا الناس طول النهار تتخانق على الركنة ... فقرروا انهم يركنوا صف تانى علشان يحلو المشكلة ... الشارع بقى صف على اليمين وصفين على الشمال ... وظهرت مشكلة اكبر ..الحتة اللى سيبينها فى النص يادوب تعدى عربية ..طاب العربية اللى جاية فى المقابل تعمل اية ... وبدات تانى وصلات الردح والشتيمة ... وذكر جميع انواع الحيوانات .. ويلعن ويلعن واب وام واخ واخت كلة دة طبيعى ماحنا شعب مابنشوفش غير نفسنا والناس اللى قدمنا دول هوا مش موجودين ...وببص على الحى ... الاقية حاطط عمدان قدامة علشان محدش يركن ... ورئس الحى باشا لما يجى يلاقى ركنة قدام الباب بالظبط ...لية يارب مخلقتنيش رئس حى ...القصد ... الغريب فى الموضوع ان على اخر الشارع تلاقى لجنة مرور مقيمة واقفة 24ساعة.... سيادتة معالى جناب الظابط واقف وهاتك يالم فى رخص اللى حزام ...واللى موبيل واللى بيدخن ..واللى غلاسة وخلاص ....غلاسة على الراكب وغلاسة على خلق الله ماهولما اوقف عربيةعلشان اشوف رخصها يبقى حوقف الطريق كلة والعربيات تزيد ... والكلاكسات تعلى ..والناس تولع فى نفسها ..وتلعن اليوم اللى فكرت تجيب فية عربية ....والله انا مش ضد ان اللى مش مركب الحزام ..وبيتكلم فى الموبايل يتعاقب .. بس السؤال هوالاصل فى عسكرى المرور تسييل حركة المرور ولا لم الرخص ..؟! برضة ماجيناش للمهم ..الناس لما بتركن صف تانى ..اللى راكن صف اول مابيعرفش يطلع بعربيتة الا لما الصف التانى يطلع الاول ... يعنى انت لو ملتزم وراكن صف اول ...وخلصت شغلك وعايز تطلع بعربيتك ماتقدرش الا لما الباشا ابن الباشايطلع الاول .. واستنى بقى يامعلم ساعة ساعتين وانشالله ماروحت ولا رحت شغلك ...وطبعا مش مضطر احكىلك عن وصلات الردح اللى بتتطور الى فيدو كليب... مش بس صوت .. وفى يوم قمت بدرى قولت اشوف الشارع وهوة رايق ...نفسى ياناس .. مستكترين الحلم كمان ...وكان اكبر كابوس شفتة فى حياتى .... لقيت الشارع كلة راكن صف تانى ..... اصبر بس ... الشارع راكن صف تانى ومافيش صف اولانى ... ايوة والله العظيم...ماهو لمابيركنوا صف اولانى مابيعرفوش يطلعوا ...فركنوا صف تانى... والله العظيم... الشارع كلة راكن صف تانى ومافيش صف اولانى وشوية ورئيس الحى جة ...شالوا العمدان ... الراجل ركن وطلع مكتبة علشان يباشر مهام وظيفتة ...ويخدم البلد ويساعد الناس ....وحنعيش يعنى حنعيش وسط الغلا وسط الغبا برضة حنعيش

الأحد، 8 مارس 2009

لباس بفتة


لباس بفتة

وانا بتفرج على التليفزيون وقعت على برنامج بيناقش قضايا الشباب ومشاكلهم ... وهاتك يانقاش قصدى ياجدال اللى يقولك الدش واللى يقولك المدرسة واللى يقولك التعليم واللى يقولك نانسى عجرم ...المهم الموضوع سايح ومحدش عارف هوة الموضوع اللى بيتكلموا فية كان اية بالضبط ..قولت ياواد بلا.. وجع دماغ ورحت قافل التليفزيون .. ورحت أعمل فنجان قهوة .. يخفف شوية من الصداع اللى جانى من البرنامج .... يادوب خلصت فنجان القهوة ولقيت جرس الباب بيضرب ..كان واحد صاحبى... داخل علية زهقان وبينفخ ..قولت له مالك يابنى .. قالى بقولك اية انا قرفان وزهقان ومش عايز اتكلم فى مواضيع انا جاى افك معاك شوية.. وابعد عن البيت والقرف والواد ابن الكلب ابنى الكبير ....الواد ابن الكلب دة واد زى الفل فى اولى حقوق ...حافظ نص القران ملتزم فى دراستة ... ورياضى كمان بيلعب رأس حربة .. واد زى العسل لو كمل حيبقى ابو تريكة ..فسألتة باستغراب ابنك الكبير؟! دا واد كويس ؟... كويس اية دا ابن كلب..دا مطلع عينى.... دا انا مش مخلية عايز حاجة... كل اللى عايزة بأديهوله ..وبادية كورسات بالشئ الفلانى ...ورغم كدة بقالة فترة لا بيذاكر وبيعاند معايا ويرد الكلمة بالكلمة ...أكنى واحد صاحبة مش ابوة اللى مخلفة وبيصرف علية ..سألتة واية علاقتة بأمة قالى كانت كويسة قوى .. كان بيقعد معاها ويحكى لها كل حاجة بتحصل لة... ويحكى لها كمان اسرارة ...قولت :جميل.... قالى: لأمش جميل فجأة مبقاش يتكلم معاها وبرضة بدأ يعاندها وبطل يحكيلها دا بقى يبجح فيها كمان ... مش بقولك ..ابن كلب عايز يطلع من تحت ايدى ...بس دا بعدة ابن الكلب دة ....قولت براحة يا عم الحاج شوية .. انت من الصبح ابن الكلب.... ابن الكلب ... خلاص عرفنا انك كلب ... هية امة كانت بتحكيلك كل اللى بيحكيهولها ... قالى : ايوة طبعا مش ابنى ولازم اعرف عنة الصغيرة قبل الكبيرة قولت: وفى يوم نرفزك ودايقك رحت قايلة انت بتعمل كذا وكذا .....وحكيت لة كل اللى امة كانت بتحكيهولك عنة ... ايوة علشان يعرف انى عارف عنة كل حاجة ...ومايصعش عليا ابن الكلب دة ... فيها اية دى .. رديت علية وانا متغاظ وعايز اقوم الطشة بالقلم : لافيها ياعم الكلب .. الواد فقد ثقتة فى امه حس ان كل اسرارة بقت مكشوفة ومعروفة لكل الناس ..لية بس كدة ... قالى هوة اية اللى لية ..داواد ابن كلب .. لازم يعرف انى ابوة .. وانة ملكى وبتاعى ...قولت لة حيلك ....حيلك.... انت فاكرة قميص ولا بنطلون ؟!... دا بنى ادم له مشاعر واحاسيس له كرامه ..قولت اساله عن اخبارة فى الكورة ...قالى ماهى دى كمان بطلها .. اتفضل ياسيدى اللى بتدافع عنة من الصبح ...قال اية مش رايح النادى الا ببوكسر .... قال اية بتاع كدة ملون بيتلبس بدل اللباس البفتة بتاعنا .. لية هوة بت .. والله مانا جايبهولة ... قولت :يعنى انت ملبسة لباس بفتة زى حالاتك ..قالى ايوة طبعا ... والمفروض ان الواد يروح النادى ويغير قدام صحابة.... ويلبس الشورت واللباس يدلدل منة وهوة بيلعب .. وزمايلة يتريقوا علية ... مش كدة..ياراجل حرام عليك الواد زى الفل انت اللى وحش .. انت اللى عايز تفهم انت اللى عايز بوكسر مش هوة....ارحم ابنك وارحمنى ..على رأى اللمبى يابنى ادميين ياعالم ياهوه... عيالنا اتخلقوا لزمن غير زمنا ... زمن لة مفرداتة ....زمن له متطلباتة ... بلاش نعيشهم فى زمنا لمجرد احساسنا انهم ملكنا ... دا المفروض نعيش معاهم زمنهم... مش هما اللى يعيشوا معانا زمنا ....ياعالم اتقوا ربنا فى العيال ......

جاتكم نيلة ياعلم يا عبك (خسارة فيكوا البفتة)