الجمعة، 31 ديسمبر 2010

كل سنة وانتم طيبين

كل سنة وانتم طيبين

كل سنة وانت طيبين وفرحانين ومبسوطين ... ولاى انتخابات مش رايحين ... ولكل اللى يزعلكوا مطنشين ...
ايه رأيكوا نعمل حاجة جديدة السنة دى :
كل واحد يكتب اهدافه اللى عايز يحققها السنة دى .... خمس اهداف :
* على المستوى الدينى
* على المستوى الاجتماعى
* على المستوى الوظيفى
* على المستوى الصحى
* على المستوى الشخصى
بس بشرط يكون الهدف واضح ... وليه ميعاد يكون متنفذ فيه ...
ونكتبه على ورقة ... ونعلقة على التلاجة ... علشان اللى رايح واللى جاى يشوفة ... ويبقى شكلنا وحش قوى قدامه لو مانفذناهوش ... فكرة جديدة ممكن تدى للايام اللى جاية معنى ... علشان نعرف نعيش غصب عن اى حد مش طايقنا ومش عايزنا


الاثنين، 27 ديسمبر 2010

الجواز التانى حكاية ملهاش نهاية

الجواز التانى حكاية ملهاش نهاية

كنا ماشين فى المعدل الطبيعى ... كل كام شهر كدة يطلع واحد من الشلة يقول انا عايز اتجوز تانى ... وشوية ويهبط ... ياعلشان متردد .. ياعلشان خايف من اللى حيحصل له .. ياعلشان مابيعرفش ... قصدى مايعرفش من قلة الموارد المالية .. ماهو اصل الجواز مكلف .... اليومين دول بقى العملية ذادت حبتين .. بقى المعدل اتنين تلاتةكل اسبوع يقولوا عايزين تنجوز تانى ... وبرضة شوية ويهبطوا .

وعلشان اى ظاهرة فى الدنيا لازم يكون ليها اسباب ... وانا كنت مقتنع ان سبب الحالة دى هيه ازمة منتصف العمر ... يعنى الراجل من دول ...فجأة بيكتشف ان عمرة جرى منه وهوه بيدور على لقمة العيش ... فيبقى عايز يلحق اللى فاضل من شبابه ... ورغم ان دى حقيقة لايمكن اغفالها ... الا ان الموضوع اتضح انه ليه ابعاد تانية .

الراجل من دول بيقول فى اسباب طلبة للجوازة التانية ... ان مراتة ماعدتش زى الاول ... بقت مفترية ..دا غير انها مش واخدة بالها منه ...وان هية ماكنتش عايزاه علشان ذاته .. لكن كانت عايزاة طمعا فى حيواناته المنوية اللى حتخليها تخلف وتعيش امومتها ... وبعد ماخلفت اتحولت لمرابى يهودى محتال ...كل همه انه يستنزف فلوسه ويخليه على الحديدة .. وورغم ان دى حقيقة لايمكن اغفالها ... الا ان الاهم هوة ايه اللى خلى المراة كدة ... ايه اللى خلاها اتوحشت وأوحشت من وجهة نظر الراجل .

من وجهة نظرى ... ان اللى خلى المرأة بالفكر ده والاسلوب ده والتصرفات دى ... هوه الراجل ... الراجل اللى عايز يتجوز تانى وفاكر ان الجديدة حتكون مختلفة وتعوضة وتديى له اللى عايزة ... مايعرفش ان القصة كلها شهرين وتتحول الجديدة الى صورة طبق الاصل من القديمة ... امومتها وفلوسه هما اللى ليهم الاولوية القصوى ... نرجع تانى بعد الاستطراد اللى حيهيج العالم عليه ونقول ايه اللى خلى المرأة بتفكر كدة وتتصرف كدة ؟ ... انا راى انه الراجل هوه السبب ... هوه اللى جة يكحلها فعماها ... هوه اللى لخبط مشاعر ووجدان وافكار المرأة ..

هوه اللى حولها لملكية خاصة اذا كان اب ولا اخ ولا زوج ... ملكيه خاصة يطلع عليها الذل والقهر والاهانه اللى بيشربهم طول النهار من اللى حواليه ومن رئيسه فى الشغل وفى البلد ... هوه اللى خلاها ملكية خاصة يسقط عليها خيبتة وضعفة وقلة حيلته وجهله .. علشان يبان قدام نفسة انه دكر ماحصلش ... هوه اللى اقنعها انها مجر جسد ... وسيلة للمتعة والترفية اللى بيمارسة برضة بوجهة نظر الدكر القوى المفترى ... وفى نفس ذات نفس الوقت اقنعها انها عورة وان لازم تتستر وماتعبرش عن اى مشاعر او احاسيس وتتنقب حتى لو مالبستش النقاب ... وفى نفس ذات النفس قالها انها رمز العطاء ... ينبوع الحنان ...الامومة الطاغية ... اللى ممنوع عليها انها تعمل اى حاجة او تفكر فى اى حاجة ...غير انها تربى العيال وتاخد بالها منهم ... لما اقنع المرأة بكل اللى فات وخلاها تحفظ الدرس من من ايام ستى وستك ... وتورثة ... لغاية مابقى فى عقلها وفكرها وكيانها ... جاى يشتكى .. ويعاقب ويقول أنا عايز اتجوز ... طاب ما انت السبب .. انت اللى لخبطها ... انت اللى خليتها تشوف نفسها ملكية خاصة ... تحت امرك يا سيدى ...خلتها شايفة نفسها عورة .. شايفها نفسها مجرد جسد للمتعة ... ... صراع بين اللى فارض عليها انها تشوفه ... وبين ادميتها كأنسان له مشاعر واحاسيس ورأى وكيان وعقل ورغبات وتطلعات ... نتيجة هذا الصراع .. كان التوحش الناعم اللى حضرتة بيشتكى منه .. النتيجة .. لف ودوران ومكر ... سلاح بتدافع بيه عن نفسها لانها عارفة انها لو جات فى العدل حيحصل لها ايه ... النتيجة ان الجسد اللى الدكر عايزة بقى أداة تعذيب ... تعذب بية الدكر ونفسها فى نفس الوقت .. النتيجة انها ماقدمهاش غير انها تمسك فى امومتها اللى بتلاقى فيها نفسها ... لما تلاقى حد محتاجها ومايقدرش يستغنى عنها ... حد تحس انها ملكاه ... ماهى طول عمرها ممكلوكة ... النتيجة استنزاف فلوس الدكر عقابا ليه وأمان ليها

انت السب ياعم الدكر ... اشرب ياحلو ... انا لو مكان المراة ... اخليك تتجوز تانى ... علشان تشرب من كاس غباءك حتى الثماله .

ملحوظة :

انا مش متأكد قوى ان وجة نظرى صح ... بس اللى متأكد منه قوى ... ان الرجالة والستات حيرفضوا هذا التحليل ... الرجاله علشان تبان دكورة ... والستات علشان تبان انها زى الولد ماهياش كلة عدد ... براحتهم ... وجهة نظرى وتلزمنى ...

الجمعة، 24 ديسمبر 2010

1 2 3 4 5

1 2 3 4 5

حالة الاندهاش على وش الانسان بتبقى غريبة قوى ... حواجبه بتبقى مرفوعة .. وبقه مفتوح ... وعنيه مبرقه ... من الاخر تحس انه اهبل ... انا بقى حسيت انى اهبل ... لانى اندهشت من اندهاش مكنه الفضائيات بعد فيلم 6 7 8 ... حالة اندهاش غريبة ... ايه ده .. هوه فيه كده ... الرجالة اتعبطت ولا ايه ... لاااااااااااا الموضوع مايتسكتش علية .. دى العملية زادت قوى ... دا جرس انزار ... احنا لازم نغلظ العقوبة على الكلاب اللى بتتحرش ... ايه الحاجات الغريبة اللى بتحصل فى مجتمعنا دى .. عمرنا ماشوفنا كدة ... ماكنش فية الكلام ده زمان ...هوه ايه اللى ماكنش فيه زمان ؟!!! طول عمر التحرش موجود .. واسأل جدتك كدة ... حتقولك ان العربجى كان بيتحرش بيها وهيا بتركب السوارس ... قال بيعمل نفسه قال انه بيحط لهاالشنط ... زادت .. اه زادت .. باخت ..اه باخت ... قلة ادب ... اه قلة ادب ... سفاله ... اه سفاله ووضاعة كمان ... بس قبل ما تندهشوا كده .. اسألوا .. ليه التحرش زاد ... انتوا بتقولوا 6 7 8 ماشى على عينى وراسى ... بس علشان نوصل ل6 لازم نعدى على 1 2 3 4 5...ماهو لومافيش 1 2 3 4 5 مش حيبقى فية 6 7 8 .

ماهو لومافيش شباب طالع من المدرسة ولا الجامعة ..لا لاقى شغل... ولا عندة امل اصلا انه يشتغل ... ولا حتى اللى اتعلمه نافعة ..يبقى مافيش واحد .

ماهو لو مافيش شباب طول النهار واليل متحاصر بفيديو كليب ومسلسلات وافلام كلها جنس وعرى ومثلية......يبقى مافيش اتنين .

ماهو لو مافيش شباب بيشوف اعلانات عن كمبوند وفرصة شقة بنص مليون جنية ويا تلحق يا متلحقش .. وهوه كل امله شقة اودة وصاله .. .يبقى مافيش تلاتة .

لو مافيش شباب عمره بيضيع قدامه .. ويفضل انه يهاجر غير شرعى ويرمى نفسه فى البحر ... وان غرق ومات مش فارقة ماهوه عايش ميت اصلا ... يبقى مافيش اربعة .

ماهو لو مافيش شباب... شاب فى العشرين من كتمة عواجيز الفرح على نفسة...وان كان عاجبك ... يبقى مافيش خمسة .

انا عارف ان كل دة مش مبرر ... وان اللى بيتحرش ..لازم ياخد عقابة ... بس كل اللى بيتحرش ... اللى بيتحرش فى الاتوبيس ... واللى بيتحرش بالشعب ... وخصوصا اللى بيتحرش بالشعب ... لان كدة مبقاش تحرش ... دا بقى ..........................اغتصاب.

جربت تحارب التحرش باليفط ... ايوه .. تكتب يافطه تقول فيها ..اللى حيتحرش ...حنزعل منه ... ؟!!!... سؤال يبين لك ان الموضوع مبقاش تحرش جنسى بس ... دا بقى تحرش عقلى وفكرى كمان .....

ياعالم ياهوه انتوا ماسكين فى المجنى عليه وسايبين الجانى ...ابو يفط ...

جلبى جايد نار يا ولدى .

الأربعاء، 22 ديسمبر 2010

عمارة طظ


عمارة طظ

ليل نهار وعواجيز الفرح والمطيباتية والشماشرجية بتوعهم .... راكبين على ودان ابونا ونازلين هلفطة وبيقلوا:ان الحلول لمشاكلنا(اللى بقالها ميت سنة...ولسه قدامها ميت سنه كمان علشان تتحل )لازم تكون حلول غير تقليدية... لازم تكون حلول ابداعيه ..لازم تكون حلول ابتكارية ... وطبعا ينسوا يقولوا لنا اية هيه الحلول العبقرية دى ... وفى الاخر يعملوا نفس اللى بيعملوة من ايام هوجة عرابى ... كل اللى بيغيروه الاسم ... يعنى بدل المساكن الشعبية ... يسموها مساكن شباب المستقبل... الشباب اللى بيفكرنى بالنكته بتاعة العشر اصحاب بلديتنا اللى كانواماشيين طابور ورا بعض .. آم وقعوا فى حفرة ...شباب زى الورد بيضيع عمره قدامه وهوه نفسه يتجوز ومش عارف ...ولأننا بنكرر الكلام بس لزوم الفشخرة والتباهى بالثقافة واحنا قاعدين على القهوة ... بنقول دايما: على رأى الشاعر : ماحك جلدك مثل ظفرك فتول انت جميع امرك .... وطبعا ما بنعملش كدة .

فعلى ما اعتقد ان جه الوقت اللى وجب بقى على الشباب انه يحط ايدة فى ايد بعض ويدوروا على مصلحتهم ومايستنوش عواجيز الفرح يحلوا لهم مشاكلهم ... لان من الاخر عواجيز الفرح مش حيحلوا حاجة ...لانهم من الاخر برضة ..عقولهم متأممه..ونفسياتهم متيبسة ... والبروستاتا اللى مش مخلياهم لا على حامى ولا على بارد ... كل اللى شاغلهم مشوار الحمام اللى جاب لهم خشونه فى ركبهم ... مثلا حتاخدوا ايه والنبى من مسئول كبير بيقول لحفيدة والنبى افتح لى الايميل علشان جاى لى رساله مهمه عليه ....اهل الكهف ياعم الحاج ... لسه بيتكلموا عن الاشتراكيه والبلوريتاريا وتحالف قوى الشعب والناصرية والعمال والفلاحين ومية المخلل .... وكل اللى فالحين فيه انهم يأجروا شوية هتيفه يطبللهم فى الجرايد والتليفزيون بتعهم ويحلفوا بيمين المصطفى انهم خبرة الزمان وعبقرية الاوان ... وهما مش واخدين بالهم ان مافيش حد لابيقرا جرايدهم ولا بيشوف تليفزيوناتهم ... القصد حاكم القلب مليان.

اكبر مشكلة عند الشباب هيه الجواز ...واكبر مشكله فى الجواز هيه الشقة ...وعلشان اى شقة عادية جدا مايقلش تمنها عن متين وخمسين الف جنية ...دا طبعا على اساس ان احنا بنلاقى الجنيه ده تحت السرير واحنا بندور على الشبشب ... طاب الشباب يعمل ايه والنبى ...

فكرة ... ارجوا انها ماتترفضش لمجرد الرفض ...او لمجرد الكسل ... او لمجرد ان ماحدش عملها قبل كدة (حاكم احنا مابنعرفش نعمل حاجة غير التقليد ).. او لمجرد ان الفكرة مش طالعه مننا ... اولأى اسباب تانيه انا مش عارفها ... حتى لو كان الفكرة فيها عيوب .. ندور على طريقة نطورها ونحدثها ونظبطها لغاية ما نخليها تنفع ...عموما انا مقتنع انها تنفع والنتيجة حتبقى عنب ان شاء الله .

صلوا على الحبيب مصطفى ...لو قولنا ان فيه عشر شباب حلويين كده ..وكل واحد قدر يدبر حسبة ستين سبعين الف جنية من الفلوس اللى محوشها من شغلة ...الزهرات ...على فلوس الجمعيات اللى الحاجة عملاهاله ... على فلوس شهادة (ا) اللى ابوه عملهاله بالفلوس اللى فاضت بعد ماجاب المروحة والتسجيل لمارجع من العراق الشقيق ...على تمن السبع قراريط نصيب ابوه فى ميراث بيت جدة اللى قاعد فيه عمه ونفسه يشتريهم منه وابوه مش راضى علشان فيهم ريحة المرحوم ... اوغلاسة .... لو الشباب دول اتلموا وحطوا فلوسهم على بعض... واشتروا حتة ارض وبنوا عليها عمارة ست ادوار ... الدور الارضى محلات ... والخمس ادوار كل دور شقتين ... مش لازم يعنى الشقة متين متر ... تسعين متر حلو قوى ... حتى يرحموا ابو العروسة وميخلهوش يندين بتمن السجاجيد ...

الباقى بقى من تمن الارض على فلوس بيع المحلات ماعدا محل مش حيبيعوه ... وحقولكوا لية ... على كام شركة اعلانات تحط اعلانتها على العمارة فتديهم فلوس ... على تظبيط رجل اعمال يبقى الراعى الرسمى للعمارة ...ويحطوا له ياسيدى صورة فى مدخل العمارة تحتيها كلمتين حلوين ... واهو كله من الضرايب .. مش احسن مايكمل بالفلوس دى تمن اللعيب الاعرج علشان يمضى له سنتين فى نادى .....منهم تلت سنين مصاب ..الفلوس دى بقى تكمل البنى و التشطيب .

المحل بقى اللى مش حيبيعوه... يعملوا فيه جمعية تعاونيه ...راس مالها منهم برضة او من الفلوس اللى حتفضل من البنا .... ويجيبوا فية كل ما يلزم البيت العصرى ... من التكييف الى سلك المواعين ...ويبيعوا لنفسهم ولجيرانهم بهامش ربح صغير ....واخر السنه يوزعوا الارباح على نفسهم ... ساعتها بس حنقول لشركات المعمار اللى بتبنى الكمبوند وتعمل اعلانات تمنها يبنى مصر المحروسة .. طظ ... حنقول للتجار الجشعين الطماعين اللى بيبيعوا بالغالى ... طظ ...حنقول لنواب الشعب المزورين المحصنين ... طظ ... من الاخر ... حنقول للحكومة ... طظ .... طظ فيكى ياحكومة... انت مش عايزانا ... واحنا كمان مش عايزينك ...

طاب والله فكرة ... نسمى العمارة عمارة طظ... ونحط على بابها صورة واحد مطلع لسانه ... ونعيش ... نعيش غصب عن الكل ... اييييييييييييييييييييه ...ياللللللللللللللللا ... عايز تعليقات ... بس تكون تطوير مش تدمير

ملحوظة مهمه جدا جدا :

علشان انا مصرى وابويا مصرى ... حنبقى نجيب واحد من وزارة التضامن الاجتماعى يعمل قرعة لتوزيع الشقق ..علشان تامر مايقولش اشمعنى انا واخد الاخير ويوسف هوه اللى ياخد التالت علوى

الاثنين، 20 ديسمبر 2010

لسه فيه فرصة

لسه فيه فرصة

مرة قريت جملة حلوه قوى فى كتاب بتقول : لو انت مش عارف انت عايز تروح فين يبقى اكيد ..اكيد ... المكان اللى حتوصل له مش حيعجبك .. وده معناه أنك لو ماعرفتش هدفك كويس قوى ... وتعبت فى التخطيط له ... ومشيت ناحيته بخطوات ثابتة وراكزة على الارض وباصرار وعزيمة ... حتبقى كمن يتخبطه الشيطان من المس ... يعنى بالبلدى حتبقى بتلطش ... وفاتورة التلطيش فى مشوار الدنيا غاليه قوى ... لان الفاتورة ...عمرك... عمرك اللى فجأة بتكتشف انه ضاع منك وماعملتش فيه حاجة غير انك كنت بتدور على سعادة وهمية بتخلص بعد بدايتها بنص ساعة ... ساعتها حيحصلك حاجة من اتنين ... يا أما تكتئب وتقفل على نفسك بابك وتقعد تجتر احزانك وخيبة املك وتموت من الهم .. دا طبعا ان ما انتحرتش ... يا اما تستخدم اساليب التبرير والاسقاط علشان تقدر تبص لنفسك فى المرايا كل يوم ... والتبرير انك تقعد تهلفط لنفسك ولكل اللى تقابله بشوية مبررات مابتقنعش حد غيرك ... اما الاسقاط انك تقعد تجيب الذنب على غيرك ... يعنى فلان وعلان والواسطة والظروف والعين والحسد واسرائيل والحكومة هما السبب ...وعلشان انت اعقل من انك توصل لطريق من الطريقين اللى احلاهما مر علقم ...بطل تعيش اللحظة ... بطل تعيش نظرية عيشنى النهاردة وموتنى بكرة ... نظرية ان ما عشتش فى شبابى امال حاعيش امتى ؟!!... لانك طول ما انت بتفكر بمفهوم اللحظة ...(دا دلوقت كمان بيقنعوك بمفهوم احلى ما فى اللحظة ...يعنى اللحظة بقت كتيير ) حتفضل تجرى من متعة لحظية الى متعة لحظية واللى عمر متعة فيهم ما حتبقى ولا تستمر .. مش حينوبك غير انك تدفع عمرك تمنها... غالى قوى عمرك تمن لمتع زايله وماهياش اكتر من اشتغاله للنفس ... قوم يا جميل غير نفسك ... لسه فيه فرصة ... طول مافيك نفس لسه فيه فرصة .. قوم غير نفسك ومتستناش اللى حواليك يتغيروا ... لانهم ببساطة مش حيتغيروا ... لانهم ببساطة ابسط ...مش عايزين يتغيروا ...

واخيرا رغم الفشل اللى حوالينا من كل ناحية ...رغم الغباء اللى محاوطنا ..رغم التخلف اللى مأنسنا فى السياسة والاقتصاد والثقافة والعلم ...لسه فيه ناس بتقدر تعمل حاجة تقابل بيها ربنا... وترضى بيها عن نفسها .. مش تقولى خروج..ومارينا .. وسينما ...ومول ..ورنج تون وتصوير بنات الناس بالموبيل .. واخر الليل سيجارة بانجو..

يالا قوم مستنى ايه........ ................. ياخايب يامايل