1 2 3 4 5
حالة الاندهاش على وش الانسان بتبقى غريبة قوى ... حواجبه بتبقى مرفوعة .. وبقه مفتوح ... وعنيه مبرقه ... من الاخر تحس انه اهبل ... انا بقى حسيت انى اهبل ... لانى اندهشت من اندهاش مكنه الفضائيات بعد فيلم 6 7 8 ... حالة اندهاش غريبة ... ايه ده .. هوه فيه كده ... الرجالة اتعبطت ولا ايه ... لاااااااااااا الموضوع مايتسكتش علية .. دى العملية زادت قوى ... دا جرس انزار ... احنا لازم نغلظ العقوبة على الكلاب اللى بتتحرش ... ايه الحاجات الغريبة اللى بتحصل فى مجتمعنا دى .. عمرنا ماشوفنا كدة ... ماكنش فية الكلام ده زمان ...هوه ايه اللى ماكنش فيه زمان ؟!!! طول عمر التحرش موجود .. واسأل جدتك كدة ... حتقولك ان العربجى كان بيتحرش بيها وهيا بتركب السوارس ... قال بيعمل نفسه قال انه بيحط لهاالشنط ... زادت .. اه زادت .. باخت ..اه باخت ... قلة ادب ... اه قلة ادب ... سفاله ... اه سفاله ووضاعة كمان ... بس قبل ما تندهشوا كده .. اسألوا .. ليه التحرش زاد ... انتوا بتقولوا 6 7 8 ماشى على عينى وراسى ... بس علشان نوصل ل6 لازم نعدى على 1 2 3 4 5...ماهو لومافيش 1 2 3 4 5 مش حيبقى فية 6 7 8 .
ماهو لومافيش شباب طالع من المدرسة ولا الجامعة ..لا لاقى شغل... ولا عندة امل اصلا انه يشتغل ... ولا حتى اللى اتعلمه نافعة ..يبقى مافيش واحد .
ماهو لو مافيش شباب طول النهار واليل متحاصر بفيديو كليب ومسلسلات وافلام كلها جنس وعرى ومثلية......يبقى مافيش اتنين .
ماهو لو مافيش شباب بيشوف اعلانات عن كمبوند وفرصة شقة بنص مليون جنية ويا تلحق يا متلحقش .. وهوه كل امله شقة اودة وصاله .. .يبقى مافيش تلاتة .
لو مافيش شباب عمره بيضيع قدامه .. ويفضل انه يهاجر غير شرعى ويرمى نفسه فى البحر ... وان غرق ومات مش فارقة ماهوه عايش ميت اصلا ... يبقى مافيش اربعة .
ماهو لو مافيش شباب... شاب فى العشرين من كتمة عواجيز الفرح على نفسة...وان كان عاجبك ... يبقى مافيش خمسة .
انا عارف ان كل دة مش مبرر ... وان اللى بيتحرش ..لازم ياخد عقابة ... بس كل اللى بيتحرش ... اللى بيتحرش فى الاتوبيس ... واللى بيتحرش بالشعب ... وخصوصا اللى بيتحرش بالشعب ... لان كدة مبقاش تحرش ... دا بقى ..........................اغتصاب.
جربت تحارب التحرش باليفط ... ايوه .. تكتب يافطه تقول فيها ..اللى حيتحرش ...حنزعل منه ... ؟!!!... سؤال يبين لك ان الموضوع مبقاش تحرش جنسى بس ... دا بقى تحرش عقلى وفكرى كمان .....
ياعالم ياهوه انتوا ماسكين فى المجنى عليه وسايبين الجانى ...ابو يفط ...
جلبى جايد نار يا ولدى .
تعرف ان كنت اقول عندك حق في 1 2 3 4 5 وانا مبنكرش انها عوامل موجودة لكن انت تقول ايه في العيال الصغيرة اللي لسه مكملتش 14 و15 وبتتحرش دي
ردحذفالمشكلة في التربية وفي الوعي لانه لو كان الموضوع مسألة فيديو كليبات واعلانات كان زمان الغرب اللي فيه عري أكثر بيأكلوا بعض
انا شايفة ان الردع هو المطلوب وهو الحل السحري والردع حيكون بتغليظ العقوبة وتطبيقها القانون هو الضامن الوحيد لخلق مجتمع سوي خالي من التحرش
بص يا دكتور بقى علشان نبقى على نور :)
ردحذفاحنا زمان مكناش بنجيب عربجى كنا بنشيل على كتافنا :)
نصيحة بجد غير أو احذف الجزء بتاع ستى ده ، وده طبعا أول طلب منى ليك .
الموضوع جميل جدا .
على فكرة طلبى ده علشان أنا صعيدى برضه .
وأظن لو كنت بحراوى برضه كنت هطلب منك كده .
لان الستات زمان كان معروف عنهم انهم قاعدين فى البيت وميطلعوش برة والباقى كان استثناءات.
حتى خطيبها ميشوفهاش غير بعد ما يتجوزوا .
ده اللى بييجى طبعا فى التليفزيون ، أما اللى كان فى الواقع فأنا بصراحة معرفهوش .
تحياتى ليك يا دكتور
محب
ردحذفعلى عينى اول طلب ليك ... والتغير ياسيدى حيبفى ...( وانا سالت جدتى انا قالت لى التحرش موجود من زمان من ايام السوارس)...التحرش موجود من قديم الازل ... عموما انا مش بدافع عن المتحرشين .. انا نفسى يتجلدوا فى ميدان عام .. بس كل اللى اقصدة ان احنا لما نناقش قضية نناقشها من كل جوانبها ... ولما نعاقب نعاقب كل اللى اتسببوا فى القضية مش ندور على كبش فداء ونسخن الدنيا علشان الفيلم يبيع ... ولا نعمل يفط نمشى بيها فى جامعة القاهرة ويبقى كدة عملنا اللى علينا ... على فكرة انا بحراوى بس صعيدى اكتر من الصعايدةنفسهم ... والدليل جلبى جايد نار ...مش بتقولوها كدة ... شكرا على تعليقك
خواطر
ردحذفماختلفناش ... معاقبة كل المسؤلين عن التحرش ... كلهم ... اللى اتحرش .. والاب اللى مرباش اللى اتحرش ...والاعلام اللى بيبيسخن المتحرش... والمسؤل اللى ما ساعدش المتحرش علشان مايتحرش ... لما نحب نحل نحل صح .. مانشتغلش نفسنا ... دة قصدى .. شكرا على تعليقك