الاثنين، 27 ديسمبر 2010

الجواز التانى حكاية ملهاش نهاية

الجواز التانى حكاية ملهاش نهاية

كنا ماشين فى المعدل الطبيعى ... كل كام شهر كدة يطلع واحد من الشلة يقول انا عايز اتجوز تانى ... وشوية ويهبط ... ياعلشان متردد .. ياعلشان خايف من اللى حيحصل له .. ياعلشان مابيعرفش ... قصدى مايعرفش من قلة الموارد المالية .. ماهو اصل الجواز مكلف .... اليومين دول بقى العملية ذادت حبتين .. بقى المعدل اتنين تلاتةكل اسبوع يقولوا عايزين تنجوز تانى ... وبرضة شوية ويهبطوا .

وعلشان اى ظاهرة فى الدنيا لازم يكون ليها اسباب ... وانا كنت مقتنع ان سبب الحالة دى هيه ازمة منتصف العمر ... يعنى الراجل من دول ...فجأة بيكتشف ان عمرة جرى منه وهوه بيدور على لقمة العيش ... فيبقى عايز يلحق اللى فاضل من شبابه ... ورغم ان دى حقيقة لايمكن اغفالها ... الا ان الموضوع اتضح انه ليه ابعاد تانية .

الراجل من دول بيقول فى اسباب طلبة للجوازة التانية ... ان مراتة ماعدتش زى الاول ... بقت مفترية ..دا غير انها مش واخدة بالها منه ...وان هية ماكنتش عايزاه علشان ذاته .. لكن كانت عايزاة طمعا فى حيواناته المنوية اللى حتخليها تخلف وتعيش امومتها ... وبعد ماخلفت اتحولت لمرابى يهودى محتال ...كل همه انه يستنزف فلوسه ويخليه على الحديدة .. وورغم ان دى حقيقة لايمكن اغفالها ... الا ان الاهم هوة ايه اللى خلى المراة كدة ... ايه اللى خلاها اتوحشت وأوحشت من وجهة نظر الراجل .

من وجهة نظرى ... ان اللى خلى المرأة بالفكر ده والاسلوب ده والتصرفات دى ... هوه الراجل ... الراجل اللى عايز يتجوز تانى وفاكر ان الجديدة حتكون مختلفة وتعوضة وتديى له اللى عايزة ... مايعرفش ان القصة كلها شهرين وتتحول الجديدة الى صورة طبق الاصل من القديمة ... امومتها وفلوسه هما اللى ليهم الاولوية القصوى ... نرجع تانى بعد الاستطراد اللى حيهيج العالم عليه ونقول ايه اللى خلى المرأة بتفكر كدة وتتصرف كدة ؟ ... انا راى انه الراجل هوه السبب ... هوه اللى جة يكحلها فعماها ... هوه اللى لخبط مشاعر ووجدان وافكار المرأة ..

هوه اللى حولها لملكية خاصة اذا كان اب ولا اخ ولا زوج ... ملكيه خاصة يطلع عليها الذل والقهر والاهانه اللى بيشربهم طول النهار من اللى حواليه ومن رئيسه فى الشغل وفى البلد ... هوه اللى خلاها ملكية خاصة يسقط عليها خيبتة وضعفة وقلة حيلته وجهله .. علشان يبان قدام نفسة انه دكر ماحصلش ... هوه اللى اقنعها انها مجر جسد ... وسيلة للمتعة والترفية اللى بيمارسة برضة بوجهة نظر الدكر القوى المفترى ... وفى نفس ذات نفس الوقت اقنعها انها عورة وان لازم تتستر وماتعبرش عن اى مشاعر او احاسيس وتتنقب حتى لو مالبستش النقاب ... وفى نفس ذات النفس قالها انها رمز العطاء ... ينبوع الحنان ...الامومة الطاغية ... اللى ممنوع عليها انها تعمل اى حاجة او تفكر فى اى حاجة ...غير انها تربى العيال وتاخد بالها منهم ... لما اقنع المرأة بكل اللى فات وخلاها تحفظ الدرس من من ايام ستى وستك ... وتورثة ... لغاية مابقى فى عقلها وفكرها وكيانها ... جاى يشتكى .. ويعاقب ويقول أنا عايز اتجوز ... طاب ما انت السبب .. انت اللى لخبطها ... انت اللى خليتها تشوف نفسها ملكية خاصة ... تحت امرك يا سيدى ...خلتها شايفة نفسها عورة .. شايفها نفسها مجرد جسد للمتعة ... ... صراع بين اللى فارض عليها انها تشوفه ... وبين ادميتها كأنسان له مشاعر واحاسيس ورأى وكيان وعقل ورغبات وتطلعات ... نتيجة هذا الصراع .. كان التوحش الناعم اللى حضرتة بيشتكى منه .. النتيجة .. لف ودوران ومكر ... سلاح بتدافع بيه عن نفسها لانها عارفة انها لو جات فى العدل حيحصل لها ايه ... النتيجة ان الجسد اللى الدكر عايزة بقى أداة تعذيب ... تعذب بية الدكر ونفسها فى نفس الوقت .. النتيجة انها ماقدمهاش غير انها تمسك فى امومتها اللى بتلاقى فيها نفسها ... لما تلاقى حد محتاجها ومايقدرش يستغنى عنها ... حد تحس انها ملكاه ... ماهى طول عمرها ممكلوكة ... النتيجة استنزاف فلوس الدكر عقابا ليه وأمان ليها

انت السب ياعم الدكر ... اشرب ياحلو ... انا لو مكان المراة ... اخليك تتجوز تانى ... علشان تشرب من كاس غباءك حتى الثماله .

ملحوظة :

انا مش متأكد قوى ان وجة نظرى صح ... بس اللى متأكد منه قوى ... ان الرجالة والستات حيرفضوا هذا التحليل ... الرجاله علشان تبان دكورة ... والستات علشان تبان انها زى الولد ماهياش كلة عدد ... براحتهم ... وجهة نظرى وتلزمنى ...

هناك 10 تعليقات:

  1. اااااااااااااه كده انا هابات هنا فى المدونه دي نروح نجيب اللحاف ونيجى بقى علىما نرد على البوست ده

    تخيييييييييل بقى انا رايي ايه ؟؟؟

    طب والنبى توقع انا رايي ايه ؟؟

    ها توقعت ايه من الراعيه الاولى لجمعية المرأه المتوحشه
    هههههههههههههههههههههههه

    نكمل الرد الجاي اما اعمل شاي او سحلب واجيلكم

    ردحذف
  2. اهو عاجبك كده جالي حموضه ولا شربت لا ده ولا ده


    نيجى للراي بقى

    انا شايفه انك متحامل جدا على الرجل وظالمه بصراحه يعنى مش فى كل الحالات بس غالبا

    ايون صدق صدق

    انا شايفه ان هو كمان ضحيه لفكر مجتمع كامل

    حضرت بتقول هى متربيه على انها تكون ام فى المقام الاول
    طيب ماهو مش هو الى رباها برضه لوحده .. اطلاقا هو المجتمع بتاعنا دلوقتي في اخطاء بشعه

    محتاجه اصلاح .. على المستوى العام ماينفعش نهاتي كده من قلبنا مع كل واحد على حده

    بصرف النظر عن الوسيله للاصلاح دلوقتي خلينا نتكلم عن المشكله نفسها

    دلوقتي انت لما تقنع البنت بانها دورها فى الحياه هى الامومه وبمجرد ما تخلف خلاص مش عايزها تعمل حاجه غير انها تكون ام وبس مش حتى ام فى المقام الاول

    طيب ما انت كده بوظت للرجل نصه التاني يعمل ايه هو ؟؟

    قد يكون هو مشارك فى الجريمه دي .. لكن برضه لان هو كمان شارب من نفس المسقا هو كمان متربي فى مجتمع فى اخطاء كتير اوي

    بالتالي انا بيصعب عليا الاثنين والله هما الاثنين محتاجين اصلاح
    محتاجين بعض مش لاقيين بعض


    حرفيا مره واحد قالي انه عمل زي ما انت بتقول اتجوز رقم اثنين والى بعد سنتين بالظبط اتحولت لنفس الاولى بلا اسوأ

    يبقى المشكله مش فى الست كعامل احادي وانما الشيله كلها غلط

    المجتمع كله محتاج اصلاح والله .. اصلاح اجتماعي

    ردحذف
  3. انت عارف
    انا دلوقتي حيث انى خبره يجى 30 سنه فى الافلام الامريكاني .. بقيت اعرف المشاكل الى بيعاني منها المجتمع الامريكى من خلال افلامهم .. ومش كل الافلام نوعيه معينه من الافلام

    عندهم ناس بتدرس المجتمع .. بيشوفوا ايه المشاكل الى فيه ... بيوجهوا لهم رسائل غير مباشره من خلال اعمال فنيه لابطال سينما مشهورين وانتاج ضخم وحاجه مبهررره

    وبكده نكون دوبنا معلقة الدوا فى كوباية عصير منجه وبالشفا

    انما احنا افلامنا ومسلسلاتنا بتقول للست رمز العطاء والاموووووووومه
    ولازم الى تترمل تبقى وفيه لذكرى جوزها وتعيش تربي عيالها حتى لو ما عندهاش عيال تعيش برضه

    والى مطلقه ما ترضاش تجوز اصل عندها عيال

    والى حب ولا طالش لازم يعيط وينهار وينوح على عمره عشر سنين و يتعقد والى اخره من الهبل المتقع

    ها صدعت ولا لسه ؟؟

    ردحذف
  4. اهو انت الى قلت لسه

    اخر نقطه لكل من هو معتقد ان مراته بتستنزفه ... خليه يتكسف على دم اهله ويمسك المصروف هو ويورينا جمال طلته

    انا معاك فى ستات مفتريين وكمان بياخدوا فلوس اجوازهم ويحوشوا من وراهم والى اخره

    انما اؤكد ان تسعين فى الميه من الطبقه الوسطى اساسا مش عارفه لا تحوش ولا تتنيل ولو لقت نفسها قرش هاتصرفه على البيت والعيال بلا نيله والنبى

    ولكن عندي بس تبريرين للموقف ده

    يا اما هو شايل ايده من الكبيره والصغيره ومش حاسس ايه الى بيتصرف على ولاده اصلا والدنيا نار وكل خطوه بفلوس بالتالي هو هنا عايز قطم رقابته على صدره ايوووووووووه حتى لو كان بيشتغل رئيس جمهوريه بعد الظهر مالناش دعوه


    يا اما هى عندها نقص حاد فى السعاده والاستمتاع بالحياه بالتالي بتدور على طريقه تانيه تحس معاها انها بتاخد نصيبها من الدنيا

    وكفايه كده عشان حاسه انك هاتحدفينى بالاه حاده

    وقولي بقى ان جاي المنصوره وانا اوعدك مش هارغي كتير كده :)

    ردحذف
  5. ندى
    دقيقة واحدة حاخد حباية الكيتوفان وارجع لك
    كدة اهو ملقيتش كيتوفان وخدت فولتارين
    نرد بقى :
    هوه انت عندك حق ... لان المسؤلية مشتركة ... بس الراجل وهوه لسة عيل امة اللى معترضة على نوع المعامله ... بتربية على نفس المعامله ... ولا ايه رايك فى الواد اللى امه بتقول لاخته اسمعى كلام اخوكى واعملى له الشاى وحضرى له الجزمة ...
    ثانيا : انا بعترف انى معمم حبتين ... بس انا اتكلمت على الغالبية العظمى ... لكن فية ستات فى الطبقات العليا والدنيا ... بيعملوا ردود افعال تانية خالص ... بس برضة مش سوية .. مش ردود افعال ادميين ... لكن ردود افعال مملوكين برضة ... العليا بتنفخ وتشد وتشفط علشان تفضل جسد حلو ... والدنيا هية اللى بتشتغل والراجل قاعد يشرب معسل .. وتقول ضل راجل ولا ظل حيطة
    من الاخر زى حسين الجسمى مابيقول : سلطة وحدش دارى ...
    انا بفكر جديا فى يوم لمنصورة بس لو الجو طلع كويس

    ردحذف
  6. انا استمتعت بالبوست واستمتعت بتعليق ندى الياسمسن وتعرف انا معاها في كثير من اللي هيا قالته خصوصا لما قالت ان 90 في المائة من الستات لو لاقت نفسها قرش حتصرفه على البيت وعيالها وكمان انا معاك بشكل كبير في اللي انت قلته في ردك على تعليقها.
    تعرف دائما فيه سؤال محيرني ليه الرجل لما يوصل لمنتصف العمر يبص لشريكة حياته و يقول عايز الحق اللي ضاع من عمري هو لما بيبص على التغييرات اللي طرأت عليها ليه مبيبصش لنفسه ويكتشف ان هو كمان مش الرجل الذي كان وان قطار العمر زي ما عدى عليه عدى عليها

    ردحذف
  7. خواطر
    حارد باسلوب الجراحة اللى اخدت فيها دبلوم بجيد جدا ..علشان الراجل يقدر يصرخ ... لكن الست وان كانت دى رغبة دفينة فيها الا انها ماتقدرش تقول ... بس لو جات الفرصة استحاله تقول لا ... الاتنين بشر ... الاتنين بشر .. مش ملايكة .. بس احنا ساعات كدة بنحب نصنف على مزاجنا

    ردحذف
  8. لا على فكره اختلف معاك فى التبرير الى قلته من حيث انهم الاثنين بيحسوا انهم عايزين يبصوا بره شريك الحياه

    الطبيعه النفسيه والفسيوليجيه تختلف

    الذكر بطبعه بيتوق دايما لوضع القبيله .. او زي ما بيسموها فى عالم الحيوانات يادوك القطيع

    بالتالي هو منتصف العمر واوله واخره اصلا اصلا بيحلم بالتعدد ده عادي

    بخلاف الست الى احلامها فى اغلب الاوقات تتعلق بالفارس الاوحد وتتعلق بالحب الخرافي وبوكيه الورد والشمعتين

    يعنى مش عارفه انا قدرت اوضح وجهة نظري ولا لا

    بس عامة هما الاثنين بشر
    بس الاثنين مختلفين نفسيا وفسيولوجيا

    ردحذف
  9. اه بالنسبه للقاء والله انا باتمنى من قلبي الجو يبقى كويس هما بيقولوا انه هايبقى فى برد من دلوقتي لحد 72 ساعه يا مسهل ويخلصوااااااااااا

    ونتشرف بحضرتك ان شاء الله يا فندم

    اه ابقى خد بنادول متجرب فى الظروف دي :)

    ردحذف
  10. اعاااااااااااااااااااا
    ندور ونلف
    علي نفس ذاااااات المشكله
    الاساس غلط من الاول
    ام بتربي ان الولد دا هيرو ومان وبيعمل كل اللي فنفسو
    وبنت طول الوقت حاضر ونعم وبس
    وطبعا نتيجه دا أيييييه........نماذج ربنا يستر علي جاي منها
    بس خلاص

    ردحذف