الأحد، 28 ديسمبر، 2014

لماذا يٌعَمِر الشراطيط...(3) ؟

لماذا يٌعَمِر الشراطيط...(3) ؟

الشرطوط لوحده ولا يسوى ... يختفى من الوجود ... الشرطوط لازم له مجموعة من الضباع حواليه ... تساعده وتسهل له وتهلل له ... ومن غيرهم ميبقاش ليه اى تلاتين لازمة ...ويتحول لكائن عادى بيموت زينا .... والضباع دى معروفة مجتمعيا باسم المعرضين وفى روايه اخرى ولاد اللى مش نضيفة ..ودول وظيفتهم الاساسية التبرير والتحضير للى بيعملة او بيحتاجة الشرطوط ... وهكذا تستمر البيانولا فى العزف ... شراطيط ومعرضين على القمة يأخذون كل شىء ويتمتعون بكل شىء ويفعلون كل شىء ... وحالمين منظرين محتجين مندهشين فى القاع ... ومع كل طلعة شمس .. يطلع الاسد من عرينة ... يتتاوب ويشد عضلاته ويطلع يجرى علشان ياكل الغزالة ... وتحت نفس الشمس ومن غير ماتتاوب ولا تشد عضلاتها... تجرى الغزالة علشان الاسد ماياكلهاش ... وهيه هيه نفس الشمس ...اللى تحتها تتنطع الضباع راقدة تنتظر مايتبقى من الغزالة .... وبرضة ... تقف العصافير  تتشمس على اغصان الشجر تشاهد فيلم الوساخة اليومى وتحمد الله انها عصافير ...
الاهم بقى ان لا الاسد اختار انه يبقى اسد ... ولا الغزالة كان نفسها تبقى غزالة .. ولا اضبع حد خد رأيه فى انه يطلع ضبع ... ولا العصافير كانت عايزة تبقى عصافير .
 نحن نحكم فيما لا نملك ...نحن نمشيها خطا ومن كتبت عليه خطى مشاها ...
 ولو ان الانسان تزول من مكره الجبال ... يعنى لو عايز يتحول بيتحول .. ممكن من عصفورة لضبع او من غزاله لاسد ... بس ده لو عاز ... شرط انه يعوز ... فيه ناس تقدر تتحول ... بس مش كتير.. الكتير راضى او عامل راضى بنصيبه ...
القصد ... الحمد لله انى عصفورة وانا سعيد كده ومش عايز ابقى شرطوط ...

يارب ... لجل حبيبك النبى احسن ختامنا .

الجمعة، 26 ديسمبر، 2014

لماذا يٌعَمِر الشراطيط...(2) ؟

لماذا يٌعَمِر الشراطيط...(2) ؟

لاحظت ان الشراطيط معمرين ... سبعين وتمانين وتسعين سنه ... وكان السؤال : الا ليه ؟ ... ليه صحيح ؟ ... وكالعادة كانت الاجابة سابقة التجهيز ... الاجابة السهلة المريحة اللى بتطبطب على كتف مدعى المثاليه امثالى  وهى : ماهو ياعبيط  ربنا بيطول فى عمرهم علشان يمد لهم فى الغلط وبعدين ياخدهم اخد عزيز مقتدر على النار عدل وكدهون  ..
طاب تسمح لى ادايقك وافوت عليك فرصة انك تشفى غليلك واقولك : ايه رأيك لو الشرطوط من دول قبل الحشرجة تاب واناب وندم على مافعل ... وربنا قبل التوبة ؟...... صدمتك ... صح ؟
هوه انا ليه اجابة تانية او تحليل تانى وهو: ان الشرطوط كائن نرجسى بطبعة .. مجبول على الانانية وعشق الذات ... مابيهمهوش غير نفسة... مابيحبش غيرها ... مابيراعيش الا هيه ... علشان كده تلاقيه بيحافظ على نفسه قوى ويخاف عليها ويراعيها ...نفسيا وعضويا .. يعنى مابيخليش حاجة تدايقة... ولا يفكر فى حد ...ولا يشيل هم حد ولا حتى اقرب الناس ايه ... ياكل كويس ويشرب كويس وينام كويس ويتدلع كويس ... ولما يتعب يجرى يسافر برة علشان يتعالج كويس ...
الشرطوط مابيشوفش غير نفسه ومصلحته ... لاتقولى بلد بقى ولا مجتمع ولا ناس غلابه ... كل اللى حواليه مش اكتر من خدامين.... كلاب ولا يسووا ... مخلوقين اصلا علشان هوه يعيش والدم االلى بيجرى فى عروقهم المفروض يغذيه هوه .
على فكرة الشرطوط مش عبيط ولا ساذج ولا مغيب ... الشرطوط ذكى وذكى جدا كمان وعارف ومتأكد وموقن ومعتقد اعتقاد راسخ لايقبل الشك ان جنته فى الدنيا ... مش فى الاخرة ... وعلشان كده تلاقية ماسك فى الدنيا بايده وسنانه ...عايز الدنيا لاخر ثانية واخر لقمة طعمها حلو وسهلة المضغ واخر بق ميه ساقعة مشبرة ... عايز الدنيا لاخر جنية واخر طله على فضائية واخر ارتهازة على مرتبة ريش نعام مع حوريه من حور الدنيا المعروفين بالمزز ..
لينا حلقة تالته على فكرة ....


الأربعاء، 24 ديسمبر، 2014

لماذا يٌعَمِر الشراطيط... (1) ؟



لماذا يٌعَمِر الشراطيط....(1) ؟

بصراحة كده زى ما احنا شعب متدين بطبعة ... احنا برضة شعب قليل الادب وأبيح بطبعه ... كل الحكاية ان احنا قبل مجيدة العايقة كنا بنختشى او بمعنى اصح كنا بنعمل ان احنا بنختشى علشان نحافظ على صورتنا قدام الناس ... لكن بعد مجيدة العايقة ... ظاطت يامعلم ... وكله بان على حقيقتة ...وتحققت نبوءة سعاد هانم حسنى عندما قالت : بانوا بانوا على اصلكوا بانوا ...
عندك مثلا اختصار كلمة احتج قبل مجيدة كانت عيب جدا ... لكن بعد مجيده بقت عادى جدا وكمان بقت معاها شكرة اكسترا واحيانا كثيرا حركة اصبع فرى .. عندك مثلا كلمة ولاد اللى مش نضيفة ... كانت بتستخدم على نطاق ضيق ... لكن بعد افعال الاخوان بقت شىء اساسى فى التعامل اليومى مع مجريات الامور ... واصبحت من اهم صفات الاخوان ... عندك مثلا كلمة معرض او عرض ... دى كانت نادرة جدا فى استخدامها لان معانا كان صعب قوى وفيه كبيرة من الكبائر الا وهى قذف المحصنات ..لكن الاخوان شافوا لها مخرج دينى وانها عادى .. وافتوا بشرعية استخدامها .. يمكن ترجعهم الحكم ولا حاجة ... عالم معرضة صحيح ...
نيجى بقى للزغلول الكبير اللى علشانه اتكتب البوست ده واللى جاى ... الشراطيط ... والشراطيط بقى الكلمة اللى خدت صك غفران من الدرجة الاولى من شيخ شيوخ الاسلام العلامة المحترم وجدى غنيم ... فعادى انك تقول شرطوط او شرطوطة او شراطيط او شرططة ... براحتك ياعم الصك معانا ...
القصد .. كلمة شرطوط كلمه جامعة مانعة .. عامة جامه ... مش بس زى مالناس فاهمة انها تعبر عن الدعارة والجنس والرقيق الابيض والانججيه وكدهون ... لا ... لان المرتشى  شرطوط ... وخاين بلده ...شرطوط .. تاجر الاعضاء... شرطوط ... الدكتور اللى بيبيع العيان لمندوب شركة الادوية  فى مقابل نسبة... شرطوط .. الصحفى اللى عارف مصر رايحة لفين ... شرطوط .. الاعلامية او الاعلامى اللى بينشر الجهل والخرافات .. شرطوط .. الرئيس اللى يبوظ التعليم والصحة ... شرطوط ... فى البوست الجاى .. حنناقش اهم قضيانا المعاصرة ... هوه ليه الشراطيط بيعمروا ؟ وليه مابيموتوش بسهولة زى بقيت الشعب ؟

الخميس، 18 ديسمبر، 2014

النجم بين الموهبة والصناعة

النجم بين الموهبة والصناعة

الموهبة دى نعمة ربانى ... ربنا بيصطفى بيها بعض من عبادة ... والموهوب من دول تلاقيه بيشتغل على موهبته بهدوء وتروى واصرار ...ويتعب ويشقى علشان  يكبرها وينميها ويصقلها ... وفجأة وبدون سابق انزار او اعداد بيلاقى نفسه نجم حقيقى له محبيه ومعجبيه ومريدية .. وبيبقى مثل أعلى ومنهج يحتذى به ..ويقعد ويربع فى كتب التاريخ الاف السنين ...
اما بقى انصاف الموهوبين .. وفى بعض الاحيان الاغبياء ...فيتلقفهم صانعى النجوم... صانعى والوعى والادراك ... ليبدأوا لأسباب او لاخرى حمله كبرى لترويج النجم ...حملة ترويجية زى اى حملة تروجية لسلعة غذائية ... مكرونة سمنة زيت... او حتى فوط صحية ... واساسيات اللعبة واحده والجمهور غلبان وبيصدق اللى احنا عايزينه يتصدق ...
صور ... احاديت صحفية ..  ندوات .. تقارير .. اشاعات وبهارات .. ضيف على برامج حوارية يومية .. جرايد ومجلات وتويترات وفيس بوكات ...لغاية مالجمهور الغلبان يتعود عليه وعلى غباوته ...ولان افة الانسان التعود  ... يصبح النجم جزء من الحياة ..  انه النجم العبقرى اللوزعى الجهبذى ...وتصبح الاكذوبة حقيقة واقعى ...وياليتها تقف عند هذا الحد ... لا دا احنا كمان بنبدأ نروج للاكذوبه ...وندافع عنها .. ونهاجم اللى يمسها ولا حتى يقول عليها كلمة مش اد كده...
وهكذا تنمو الاكذوبه وتتحول الى نجم عظيم يجلس على المنصة واضعا اصبعة السبابة على خده وينظر الى السماء فى لحظة من لحظات التفكير الفلسفى العميق .. لحظة من لحظات العلو والسمو والتسامى والارتفاع ... وزغرتى يابت .. وصوتى ياوليه لا يقولوا علينا مابنفهموش فى عالم النجوم ..
وحأديكوا امثله .. امثله مش حصر... على الفرق بين النجم الموهوب والنجم المصنوع فى بعض المجالات ...
نجيب محفوظ فى مقابل علاء الاسوانى .. اكرامى الاب فى مقابل اكرامى الابن ... عبد الحليم حافظ فى مقابل حمزة نمرة ... احمد ذكى فى مقابل خالد ابو النجا ... جمال عبد الناصر فى مقابل ابو سلمى ...غاندى فى مقابل البرادعى ...احمد بهاء الدين فى مقابل عادل حموده ...

 لعن الله االفضائيات... والام بى ايه.. والمركتينج... ودورات كيف تصبح اى حاجة ؟   

الاثنين، 15 ديسمبر، 2014

روقة ....(10)

روقة....(10)

شياطين الانس .. دخلوا بين كل انواع العلاقات الاجتماعية وبوظوها ... ولو حابب تعرفهم اقولك ... صاحبك اللى على القهوه اللى بينصحك ازاى تتعامل مع مراتك ... او صاحبتك اللى اتعرفتى عليها فى الكوافير وبتحكيلك ازاى انها ممشية المخفى على العجين مايلخبطوش .. مش زيك ياخايبة ... ممكن يكون واحد من مدعى الخبرة اللى بيطل علينا بسحنته الزبالة  كل يوم على الفضائيات علشان يسود علينا عيشتنا ... ممكن يكون مؤلف يملك ادوات التاثير... ممكن يكون مخرج شاذ فكريا او عضويا يملك ادوات الابهار  ... او منتج سباك يملك المال ...ممكن يكون صحفى او كاتب او مدرس او كابتن فى نادى او داعيه ...اى حد يقدر يلعب فى تشكيل الوعى والادراك السلبى هوه من شياطين الانس.
القصة مش قصة روقة ... وراجل وست ... القصة قصة مجتمع يعانى من الفصام ... مجتمع مشطور نصفين .. بقينا كائنات ميكس ... كل شىء والعكس ... الراجل عايز اللى تدلعة وتروقه ... وان دلعته وروقته يزعل ويشك ويقولها عرفتى الحاجات دى منين ياسافلة ...  والست اللى عايزة الراجل يشيل المسؤوليه ... ولو شال تقوله ايه انت حتتحكم فيه علشانا بتصرف على البينت ... انا باشتغل وبأقبض زيى زيك بالظبط ...الراجل طول النهار بيشخط وينطر ويمارس ذكورته فى محاوله يائسه لكى يصبح سى السيد بس محدش سامح له .. والست ليلها ونهارها فى البيوتى سنتر واللانجيرى فى محاوله يائسه كى تصبح انثى وبرضة محدش سامح لها .. الراجل عايز يبقى راجل ومش عاجبة انه راجل ... والست مش عاجبها انها ست ونفسها تبقى ست ..انه الانشطار ياعزيزى الذى طال كل شىء ... كل شىء ولا اعفى احدا... انا كمان اللى بفرم فى الكلام ده... انا كمان مشطور ... انا عايز روقة ومرضاش لبنتى تبقى روقة ... انا عايز اتجوز اربعة وما اسمحش لجوز بتى يتجوز عليها..مراتى بقى ماسكة جوز بتى وبتديله من المنقى خيار : احترم نفسك ... انت متجوز بت ناس مش بت من الشارع ... فوق انت فاكر ان ملهاش اهل ولا ايه .؟... وواقفة برضة لمرات ابنى تشرشح لها : ايه ... اهلك ملعموكيش انك تسمعى كلام جوزك وتنفذى اللى يقولك عليه ولا ايه ياحلوة ... عودى نفسك على طبع جوزك ترتاحى ياماما ...
انا بقى ومراتى طلبنا من جوز بتى مهر وشبكة الماظ وفرح ومضيناه على قايمه ... واستغربنا قوى لما ابننا انطلب منه مهر وشبكة الماظ وفرح واهل مراته طلبوا منه يكتب قايمة... وقولنا ساعتها : الناس بقت وحشة قوى كده ليه؟! ... مافيش رحمة بالشباب... صحيح الدنيا اتقل بركتها ...
كلنا مشطورون يا عزيزى ...والسبب شيطان الانس  الذى يذداد مالا وثراءا وشهرة على حساب حياة المغيبون فاقدى الوعى والاهليه الاغبياء امثالى ...
ارجعوا الى اصل الامور .. ارجعوا الى الفطرة .....ارجع ايها الرجل رجلا اسما وفعلا ... ارجعى ايتها المرأة  إمرأة شكلا ومضمونا ... ابدأوا باسرع ماتستطيعون .. فالحياة اقصر من ان تضيع فى كل هذه المماحكات ..ابدأوا ...ومتسألوش السؤال الساذج هوه مين اللى يبدأ؟... اى حد يبدأ بس ابدأوا خصيمكوا النبى    .
عايزين روقة ؟ ... روقوا بالكوا ... روقه من جوه ... روقة الحقيقية انكوا تعيشوا نفسكوا وترضوا بيها وتتصالحوا معاها وتحسوا ان فيه ناس تانية موجوده معاكوا فى الدنيا .. فقط قدروهم ...و ادوا ...ادوا كتير ... سعاده العطاء اطول عمرا من سعادة الاخذ ....مش مصدق صح ؟ ... مش حأقنعك .... جرب بنفسك  وشوف ...
اخر حاجة : بطلوا تنافس

السبت، 13 ديسمبر، 2014

روقة.....(9)

روقة ... (9)

سيدتى القاضية ... نسوانى المستشارات ... انا كنت اعترفت انى متعجرف وانانى ومفترى ... وجاى النهاردة علشان اكمل اعترافاتى ...ايون انا بحب النسوان ... وكل ما اشوف ست حلوة باجرى وراها ..ومابشبعش ستات ... وحافضل كده لغاية ما ابقى عضم فى قفة ... بس مش علشان طفس وعينى زايغة ويندب فيها رصاصة ..ولا علشان انا خاين بطبعى ...زى مابتقولوا عليه ... لأ... انا عمرى ماكنت خاين ولا غدار ... عمرى ماكنت ندل ولا واطى... لكن غصب عنى ... والله العظيم غصب عنى ... لما عينى بتقع على ست حلوة ... او وحشة على فكرة ...بابقى عامل زى المدمن لما بيجى ميعاد الجرعة ...ايوه مدمن ... مانتوا ماتعرفوش يعنى ايه تستستيرون يعلى فى جسم الراجل مننا ... نار قايده فى جتة الواحد ياولداه ... بيبقى عامل زى اللى راكبه جن من بتاع ريهام سعيد ... مابيبقاش عارف يتحكم فى تصرفاته ولا افكارة ... ومدام الليله ليلة اعترافات وصراحة .. فانتوا عارفين كده كويس .. وبتستغلوه حلو قوى علشان تجيبوا رجل الزبون فى الجواز ...فبلاش نضحك على بعض ... ولو عاملين فيها مؤدبين ومابتعرفوش فى قلة الادب والمسخرة ... هاتولى الطب الشرعى يكشف ويحلل ويقول ياترى لما التستستيرون بيعلى بابقى فى حالتى الطبيعية وبابقى مسؤل عن تصرفاتى ولا المفروض اتعامل معاملة الاطفال ؟ ...
انا مستعد انى اتخلص من التستستيرون وتأثيرة .. وابقى ادمن صفحة حريم السلطان بتاعة سنبل لو كان ده حيرضيكوا ويريحكوا .. وانا عارف ومتأكد انه لا حيرضيكوا ولا حيريحكوا ...
عايزين تحاكموا حد وتاخدو حقكم منه .. ماتحاكمونيش انا  ... حاكموا الطبيعة حاكمو التستستيرون ... حاكموا نفسكوا... ولغاية ماتحكموا نفسكوا على اللى عملتوه فيه نفسيا ... وتحاكموا التستستيرون على اللى بيعمله فيه عضويا ... انا برىء ... مش بس برىء ... لا انا حاعيش عيشتى اللى ربتونى عليها .. حأعيش زى ماربنا خالقنى ... حأعيش ادور على روقة واتنين وتلاتة واربعة زى ماربى حلل لى ... ماهوه اللى خالقنى والوحيد اللى عالم بحالى وحنين عليه ...
ومع نفسكوا انتوا بقى ... صرخوا ... ولولوا ... الطموا ... عيشوا دور المظاليم وحقوق المرأة والكوتة ..ومية المخلل اللى انتوا عايشين فيها دى .
والى اللقاء فى الحلقة القادمة ...

 انا اتفقعت من فيلم روقة ده على  فكرة 

الجمعة، 12 ديسمبر، 2014

روقة ...(8)

روقة ... (8)

السؤال النهاردة ... ياترى الراجل مبسوط بروقة ولا برضة عينه مايملهاش الاالتراب ؟ ماهو معروفة جوه وبرة فرشتله وهوه مايل ايه يعدله ...
وهكذا حكمت محكمة النسوان العليا على الرجل بأنه انانى وعينه زايغة وخاين وندل بالفطرة وواطى بالسليقة ... دا غير انه مفترى ومابيرحمش ... وعليه وجب على كل ست انها تاخد حقها من البعيد أول بأول وبالطريقة اللى تريحها .
وبعد ان انتهت المحاكمة ونطقت القاضية بالحكم ... جلست مسترخية وهى تضع رجلا على رجل ... تنفث دخان سيجار فريد الديب وهية رافعة رأسها لاعلى تنظر الى السماء وهى مغمضة احدى عينيها ... تعيش نشوة انتصار الذات العبقرية التى حكمت ونفذت واحتفلت بعدالتها واستواء ميزانها .
لا ياماما لا ... مش انا اللى يتعمل معاه كده ... لسه فيه استئناف ونقض والمتهم حيدافع عن نفسه ..
المتهم : سيدتى القاضيه ... نسوانى المستشارات ... انا مش حقول انى برىء من كل التهم اللى وجهتوهالى ... بالعكس ... انا باشهد الجميع : انا بأعترف بيها كلها ... انا فعلا متعجرف وانانى وفيه الكثير من الصلف ... مش بس كدة ... انا عينى زايغة وبأحب النسوان... ايوه .. وعايز كل حاجة عايز ابقى سى السيد عايز الخدامة والطباخة والرقاصة والعشيقة والعاقلة والصديقة ...ورغم انى بأعترف انى مش برىء بس برضه انا مش متهم ... دورى على اللى حرضنى وخلانى كده ... ومن غير ما تدورى ... انا حقولك مين المحرض ... انتى ... ايوه انتى ومستشاراتك ... انتى اللى اول ماجيت الدنيا كنت زى اى كائن حى ... مانيش متميز فى حاجة وراضى بمساحتى ... انتى اللى اول ماشوفتى الحته الزيادة وقفتى فرحانه وناديتى : يا نسوان العيلة .. املؤوا الارض والفضاء بترانيم وصول الدكر ... املؤوا الصدور والقلوب بالسعادة لوصول السند ... اجعلوا الانشودة حقيقة تعيش وتثمر ... اجعلوا الامل دستور عمل ونضال من اجل الولد حامل الاسم واللقب ... كلكن كنتوا بتخدمونى .. وتتمنولى الرضا ... انتوا اللى علمتونى ان اللى يشخط يبقى راجل ... انتو اللى عتطولى السلطة على اختى الكبيرة قبل الصغيرة ... انتوا اللى كنتوا بتطبطبوا عليه وتخدونى فى حضنكوا عمال على بطال ... انتوا اللى كنتوا بتعملولى الاكل اللى بحبه حتى ولا محدش بياكله غيرى .. انتوا اللى خدمتونى خدمة العبد للسيد ... ايه اللى جد بقى .. مش انتوا اللى زرعتوا ... جايين ساعة الحصاد تحمرقوا ليه ...انا ماكنتش اكتر من عجينه انتوا اللى شكلتوها ... صنم عجوه عبدتوه ... وبعد ما خلتونى اصدق انى اله ... جاين تقولوا لى احنا جوعنا واعايزين ناكلك ...لا ... انسوا ... 


الى اللقاء فى الجزء التانى من دفاع المتهم ...

الثلاثاء، 9 ديسمبر، 2014

روقة....(7)

روقة......(7)

نوصل للسؤال الاصعب والاهم .... هيه روقة مبسوطة انها روقة ولا عامله انها مبسوطة ؟ ..
شوفوا ان بحب الصراحة ... لان الصراحة زى الجراحة ..يا إما الشفاء التام او الموت الزؤام ... والصراحة ان روقة لاهيه مبسوطة ولا هيه زعلانه ... روقة تعبانه ... حيرانه ..كل املها انها تعيش زى اى كائن حى بيقضى مدة عقوبته فى الدنيا ..والايام علمتها انها علشان تعيش لازم ولابد انها ترضى السجان هذا الكائن الهلامى المعروف باسم الراجل ... اللى يؤمر فيطاع .. اللى نحقق له احلامه قبل مايحلم ... اللى عايزها ست بيت شاطرة تحضر له الاكل اللى بيحبه ويكون جاهز على السفرة اول مايدخل من الباب ... اللى عايزها خدامة منضفة البيت وغاسلة الحيطان ولاحسه السيراميك ... اللى عايزها المفرخة اللى تجيب الولد اللى يشيل اسم البعيد ... اللى عايزها الام اللى توكل وتشرب وتلبس وتقلع وتشخخ وتروح تودى المدارس وترجع تجيبهم وتقعد تذاكر لهم ...اللى عايزها راجل تقف للسباك والنجار وتروح تحل مشاكل الفواتير مع شركة الميه ... اللى عايزة الرقاصة صانعة البهجة والسعادة ...اللى عايزها العشيقة المحترفة اللى تعرف ازاى تهدى اعضاؤة ...وفى نفس ذات نفس الوقت .... شايفها العار والعوار ... شايفها العورة اللى لازم تتدارى ورا باب او نقاب ... شيفها الملطشة اللى تتشتم وتنضرب ويتفرغ فيها كل شحنات القهر والعهر اللى بيتمارس عليه طول اليوم ... شايفها الشماعة اللى بيقلع كل خطاياه وهفواته ونزواته وخيبة امله ويعلقها عليها ...وفى الاخر يتجوز عليها علشان كبرت وكرمشت وماعدتش تصد معاه .. الواطى ابو حباية ...
روقة مش مبسوطة ... روقة تاهت من نفسها ...مابقتش عارفه هيه مين ... هيه الست الرقيقة ينبوع الحنان ... ولاهيه خدامة البيت والسرير... ولاهية الام حمالة الاسيه ...ولا هيه الدكر ...
ماعادش فارق مع روقة على فكرة ... وموضوع الانسان والانسانيه وهرى الفضائيات ماعدش يشغلها ...لانها استوعبت الدرس ... عايزة تقضى مدتك ... راضى السجان ... والا ... حبس انفرادى ياجميل ... وعلى ايه ؟ .. نارة ولا جنة مرات اخويا ... وبعدين هوه فيه ايه يابت ... ماكله على دا الحال .. مشى امورك ماتبقيش خايبة ... والشاطرة تعيش فى النار ...وبعدين انتى احسن من غيرك ... بصى حواليكى كده  حتحمدى ربنا على اللى انت فيه .. دا اللى يشوف بلاوى الناس تهون عليه بلوته يامايله ... واهى عيشة والسلام ... ويلعن ابوك مجتمع .
بوست كئيب ... صح ؟ .. بس زى ماقولتلكوا... الصراحة زى الجراحة ... راحة ... هيه بتوجع ... بس وجع ساعة ولا كل ساعة ...


الى اللقاء.

الاثنين، 8 ديسمبر، 2014

روقة .....(6)

روقة ..... (6)

من ناحية الشكل ... سهل على اى ست انها تبقى روقة ... وكل برغوت على قد دمه برضك ... يعنى عندك من عمليات الشفط والنفخ والنحت اللى بتتعمل بره.. مرورا بالدكتور اللى بيشيل النمش والكلف  بجهاز الليزر اللى جايبه بالتقسيط من النقابة ... لميمى الصغير كوافير النجوم اللى بيفرد بالكرياتين البرازيلى الاصلى ويعمل ماسك الاعشاب  ...لغاية  سماح بنت ام الواد يسرى اللى بترسم الحواجب بالفتلة تقولش مسطرة ...انتهاء بهات لنا سكر التموين ومتنساش تجيب ربع لمون وانت جاى يا ابو اسماء ...اما اللبس بقى فحدث ولا حرج .....وبرضك كله على قد مقدرته....
الصعوبة فى ان الست تبقى روقة من حيث المضمون ... يعنى ازاى تغذى ذات الراجل ..وتشبع رجولته ماديا ومعنويا ... وماديا هنا مش معناها فلوس ... ..أيون ...... معناها قلة ادب ومسخرة وكدهون ... وموضوع المضمون ده ليه تقسيمة .. 2% من الستات تقدر تبقى روقة من غير اى مجهود ... بالفطرة ... ربانى ... جين ... موهبة ... و2% من الستات... انسى يامعلم وماتتعبش قلبك وحلك انك تغير العتبه ... ودول اللى كانت بتقول عليهم ستى ... ايش تعمل الماشطة فى الوش العكر ..... الخبر السعيد بقى ... ان 96% من الستات ممكن يتعلموا يبقوا روقة ... هيه عايزة بس شوية مجهود ومذاكرة ومتابعة ... وكله بينجح على فكرة .. اينعم فيه اللى بتطلع الاولى وفيه اللى بتعدى بمقبول وفيه اللى بالرأفه ... بس الخلاصة كله بينجح ... والرجالة غلابه ... بترضى بأى حاجة .. والتعود هيه الحاجة الوحيدة اللى مخليانا عايشين ...
وعلشان محدش يقولى : مش اللى يقول ذاكر المفروض يوفر المصادر اللى حيتذاكر منها ؟
حأقول : كله على النت يا اختشى ... عندك من اول طريقة لف الطرحة لغاية طريقة لف البشكير على الشعر المبلول ...معليكى بس اللى تدعكى فانوس جوجول وتكتبى .. طريقة الكذا كذا .... وقابلى ياست الستات ... فيديو واديو وورد وبى دى اف ...بس انتى ذاكرى.... واللى ملهاش فى النت ...عليها وعلى جارتها النغشه... حتتين كيكة وتخبطى وتقوليلها عايزاكى تدوقى عمايلى وتدخلى تشربى معاها الشاى ... بس نصيحة ... وانت رايحالها... اتأكدى انك طفيتى البوتجاز على المحشى ...
اما بقى حكايه هيه روقة عيب لا حرام ولا حاجة ؟ فبقولك ماعيب الا العيب ... وماحرام اللا اللى حرمه ربنا ... مش عيب ان الست تدلع جوزها وتروقه وتحسسه برجولته وتحس معاه بانوثتها ... زى ماهو مش عيب ان الراجل يدلع مراته ويروقها ويحسسها بانوثتها ويحس معاها برجولته ...
ومدام كله على سنة الله ورسوله يبقى عيشى وسيبيه يعيش ياشيخة حرام عليكى  ... وربنا ياخد الاخوان ... قولوا امين

والى اللقاء مع الاجابة عن السؤال التالى  



الثلاثاء، 2 ديسمبر، 2014

روقة ...(5)

روقة ....(5)

هيه روقة صح ولا غلط ... ولو صح صح ليه ولو غلط غلط ليه ؟..الاجابه على السؤال ده عايزة اسبوع ... لكن الخلاصة ان روقة صح او غلط بتعتمد على ازاى روقة بتشوف نفسها وكمان ازاى الراجل بشوفها ... يعنى لو الست شايفة ومقتنعة ان روقة هى التطور الطبيعى لاى ست وان الحنية والعطاء والانوثة والرقة والدلال .. صفات اساسية فى الكائن الانثوى ماينفعش تتبدل ولا تتحول .. يبقى موضوع روقة صح ... استنى ... فيه شرط يامعلم ... الشرط ان الراجل يعرف هوه كمان يعرف ويقتنع ان الشهامة والمروءة والتضحية وتحمل المسؤليه ... صفات اساسية فى الكائن الرجولى ..يعنى لما الراجل من دول يحب يحس انه راجل قوى ... لازم يحس بالرجوله دى على طول ... لازم يكون راجل فى كل حاجة ... والراجل هوه اللى يعرف ان الست حاجة كده زى الاحجار الكريمة ... ويعرف ان الرسول امرة وقاله رفقا بالقوارير ... الراجل هوه اللى يعرف يكرم الست ومايبهدلهاش فى مواصلات وشغل وتحرش علشان تصرف على البيت من مرتبها ... ماينفعش يسيبها تروح السوق بعد الشغل علشان تجيب الخضار وترجع تطبخ وتغسل وتمسح وتحمى العيال ... وبعد ماتخلص ... المفروض عليها انها تتمكيج وتتبرفن وتفرد شعرها وتستنى الباشا لما يجيى من على القهوه ... علشان تدلكه وتطرقعله صوابعه وتوكله فى بقة وتخليه يحلى وتسيبه يحبس ... وفى الاخر يقولها وهوه بيتقلب على جنبه زى دكر البط :ابقى اظبطى المنبه بدرى شوية علشان تلحقى تحضرى لى الفطار قبل ماتنزلى الشغل ..( على ايه يابن الدايخة .. اشحال انك شغال بالحباية )...
القصد .. علشان روقة تبقى صح لازم الراجل والست يعرفوا واجبتهم قبل مايطالبوا بحقوقهم ...والا حيحصل زى اللى حاصل دلوقت ... مسخ نصه راجل ونصه ست زى معظم ستاتنا ... ومسخ تانى نصه ست ونص راجل زى معظم رجالتنا ... والفطرة بتقول علشان الحال يستقيم والدنيا تبقى حلوة ونحس بالسعادة .... لازم الراجل يبقى راجل والست تبقى ست ...
وهنا يقفز السؤال ... وكيف السبيل والعيشة ضنك.... والطلبات مابتخلصش ... وماعدتش حاجة مكفية ؟ ... وهذا سؤال شرحه يطول وانا بموضوع روقة مشغول ... ممكن نتكلموا فى موضوع الحالة الاقتصادية وتأثيرها على المواطن المصرى فى وقت لاحق ... وكل حاجة ليها حل وربنا خلق الطب والدوا ...
والى اللقاء فى الاجابة على السؤال بتاع هل من السهل على اى ست انها تكون روقة ولا العمليه صعبة .

ملحوظة : الرجاله كانوا فاكرين انى فى صفهم وحظبط لهم روقة ويعيشوا من غير مايدفعوا ويبرطعوا وكدهون .... نفختهم انا البوست ده ... صح ؟