الاثنين، 27 فبراير 2012

الفرق بين الجاهل والعالم

الفرق بين الجاهل والعالم

الجاهل ياخد قراراته من المرايا ... يقف كدة ويقول زى نجاة الصغيرة: قولى لى يامرايتى اعمل ايه اترشح ولا بلاش ....العالم يدرس ويسأل وياخد قرار وينفذ...

الجاهل يقول انا مانزلش التحرير علشان اهلى اولى بيه ... اهلى عايزينى .... العالم يتحمل المسؤليه فى عز الانهيار .....

الجاهل يفتى ويقول الجيش مش لازم يكون عندة مصنع اسمنت ... العالم يقول الجيش لازم يكون عنده مصنع اسمنت علشان مايحتاجش لحد ويكون عندة احتياجاته فى كل لحظة .....

الجاهل يقعد ليل نهار على تويتر ... العالم يقعد ليل نهار يشتغل ....

الجاهل اللى يفرح علشان باس ممثله ... العالم يأجل مؤتمراته علشان يقعد جنب مراته العيانه ....

الجاهل اللى مالوش كلمه مرة اه ومرة لأ ... العالم اللى كلمته واحدة .....

الجاهل اللى عايزها هردبيس والحرية انه يعمل اللى هوه عايزة ولو حتى ضد الدين ... العالم اللى يراعى الاصول والاخلاق فى كل اللى بيعمله ....

الجاهل اللى فاكر نفسه هوه بس اللى بيفهم والشعب كله عبيط... العالم اللى مابيقولش رأى غير لما يفهم ويعرف ويتأكد ....

الجاهل اللى يشتم ليل نهار فى اسيادة .... العالم اللى ماتطلعش العيبة من لسانه .

الجاهل اللى علشان اقرع وبنضارة فاكر انه غاندى وعايز يقلدة .... العالم اللى مابيقلدش حد وصوته وافكارة من دماغة .

ده الفرق بين العالم والجاهل .... وزمان قالوا فى الامثال : صاحب العقل يميز ...

ميزوا يا هل مصر وشوفوا عايزين تسلموها لمين .... اه نسيت اقول مين الجاهل ومين العالم ولو انى واثق فى ذكاءكوا ... بس حأذكر فالذكرى تنفع المؤمنين.

الجاهل اسمه البارد عى .... العالم اسمه احمد شفيق .

الجمعة، 17 فبراير 2012

شفيق لأ ....... ليه ؟

شفيق لأ ....... ليه ؟

1 من نظام حسنى ..... طاب ما عمرو موسى من نظام حسنى .... حمدين وحازم وابو الفتوح من نظام حسنى .... بسطاويسى والعوا والاشعل من نظام حسنى .... انا وابويا واخويا وبناتى من نظام حسنى ....مش عايزين حد من نظام حسنى نزلوا اعلان تطلبوا فيه رئيس من مواليد 12 فبراير 2011 وما بعدها ....!

2 لو هوة كويس ما استقلش ليه ؟.....ما استقلش واشتغل والعالم شهد له بالكفاءة ... طاب وعمرو موسى مااستقلش ليه ... البرادعى وافق يوطى لحسنى ليه علشان يلبسه الميداليه ... وغيرة وغيرة اللى قعد ومعملش حاجة بالعكس استفاد من ورا النظام ودلوقتى عامل فيها ستين راجل فى بعض .

3 – موقعة الجمل كانت فى عهدة ..... عهده اللى مكملش شهرين فى عز اوان انفجار الثورة وكلاب مبارك مجروحين وبيحاربوا علشان يفضلوا قاعدين .... طاب ماهى موقعة ماسبيرو ومسرح البالون واطفيح مش فى عهده ..... موقعة محمد محمود ومجلس الوزرا وبور سعيد مش فى عهده .

4 – مرجعش الامن .... طاب ماهو الامن مارجعش لغاية دلوقت بعد سنه من الثورة مش فى عز الانفلات الامنى والداخليه واقسامها وسجونها متدمرة ومحروقة ومسروقة .

5 – هوه ينفع وزير بس ماينفعش رئيس .... طاب بالعقل كدة اللى مسك وزارة خربانه ماتفرقش عن هيئة النقل العام وخسرانه نص مليار دولار وفى عشر سنين تكسب نص مليار دولار والمطار يطلع التانى على مستوى افريقيا .. ماينفعش يبقى رئيس ... امال مين اللى ينفع .... البرادعى اللى ممشيها بوس ... ولا العوا اللى كان بيبوس ايد النظام ويكتب مقالات عن التوريث .... ولا ابو الفتوح اللى كل رصيدة انه وقف بجح فى السادات ... ولا موسى اللى عايش على دعاية شعبولا... ولا حمدين العمدة ... ولا الشيخ حازم صرافة .... مين ينفع يا عالم؟

6 – بيقول انه اتقتل حنجيب رئيس مات قبل كدة ؟ .....طاب ما احنا فى انفعالتنا بنغلط ونهلفط ونلخبط .... ولا شفيق لازم يكون ملاك مابيغلطش .

7 – قال حنجيب بنبونى للثوار .... طاب اسمع الجمله فى سياقها وافهم كان يقصد ايه ... ولا هوه عدوك يتمنالك الغلط يعنى .

8 - بيلبس بلوفر .... مايلبس بلوفر ولا تى شيرت ولا جلابية ... هيه مش حرية شخصية يابتوع الحرية ... ماحنا مستحملين الكوفيات والحظاظات والكرفتات الحمرا والشعر الكنيش ..... اختزال راجل زى شفيق فى البلوفر نوع من انواع السطحية الهبله.

زمان قالوا ملقيوش فى الورد عيب قالوله يا احمر الخدين ... مصر محتاجة راجل عندة رؤية ... عندة افكار خلاقة ... عنده حزم ... خلاص ماعادتش محتاجة حنجورى وهتيفة .... مصر عايزة شغل ... دا لو احنا عايزين مصر بجد ... مش عايشين دور كدابين الزفة .... المفروض .... المفروض ان احنا بعد سنه من الثورة عرفنا مين معانا ومين ضدنا ومين بيشتغلنا وبياكل من ورا قفانا .

اخيرا فكروا بهدوووووء على رأى عماد اديب ... وتانى مش عيب ان الواحد يغلط العيب انه يكابر لو عرف انه غلطان

الأحد، 12 فبراير 2012

سيكولوجية الجماهير

سيكولوجية الجماهير

اللى بيحب القراءة يقرأ الكتاب دة ..... على الاقل اول فصلين ....
وده الرابط بتاعة
http://www.4shared.com/office/fDGZovDk/___.html?refurl=d1url



الثلاثاء، 7 فبراير 2012

فهيم ونعيم وهانى

فهيم ونعيم وهانى

فهيم ونعيم وهانى ... شباب مصرى زى الورد البلدى المفتح فى موسم الربيع ..... فهيم الكبير دبلوم زراعة ... نعيم الوسطانى معهد فنى تجارى .... هانى الصغير ليسانس اداب قسم اجتماع .... الصدفة بس اللى خلتنى اشوفهم واقعد معاهم واكل معاهم واشرب شاى واشد حجر معسل سلوم ....

فهيم ونعيم وهانى واخدين ارض فى الصحرا .... بين الارض وبين بيتهم 350 كيلوا .... مشوار يعنى ...بيروحوا الارض يوم السبت الصبح ... ويروحوا لاهلم يوم الخميس العصر ...

فى الصحرا ماعندهمش تليفزيون وبالتالى ماعندهمش دش ... ولا لاب توب ولا نت ولا فيس بوك ولا تويتر ..... بيقواموا الفجر كل يوم ... يصلوا ويفطروا ويطلعوا على الارض يشغلوا الديزل علشان يطلع ميه يرووا بيها الزرع .... ويفضلوا شغالين لغاية الضهر مايدن .... يصلوا ويتغدوا ويرجعوا يشتغلوا لغاية العصر .... يصلوا ويشربوا الشاى ويرجعوا يشتغلوا فى الارض لغاية المغرب ....يصلوا ويتعشوا ويفضلوا سهرانين لغاية مايصلوا العشا ويناموا .....

اتغديت معاهم ... فول من الارض ... بابا غنوج من بدنجان الارض ... عيش من قمح الارض ... بصل اخضر برضة من الارض ... ارض مصر ... رمل مصر تراب مصر اللى معجون بعرقهم وشقاهم .

بعد الغدا خدونى يفرجونى على الزرع ... كانوا فرحانين وهما بيشرحولى فرحة الاب اللى بيشوف ابنه بيكبر قدام عينية ....فهيم ونعيم وهانى.... زارعين غله وفول وفلفل وبدنجان .... وترمس ...ولما سألت عن الترمس قالوا لى دا لنا بنسلقه ونملحه ونأزأز ...اه نسيت اقول لكوا لقيت بركة كبيرة متبطنه بمشمع وفيها ميه .... سألت ... قالولى :ساعات الديزل بيعطل اوبيبقى فيه ازمه سولار واحنا بنبقى محتاجين ميه ... فلما الديزل بيشتغل نقوم محوشين ميه فى البركة تنفعنا لما نحتاجها للزرع ... استنوا..... استنوا ... شوفوا عبقرية المصرى .... جابوا زريعة (سمك صغير) وحطوة فى البركة وكل يوم يرموله العيش اللى بيفضل منهم ... الزريعه تاكل وتكبر تبقى سمك ياخدوه ويشوه وياكلوه بالهنا والشفا ....

قهيم ونعيم متجوزين وعندهم عيال ... هانى بقى مستنى يبيع محصول السنه دى علشان يتجوز... العروسه موجودة ... قصة حب حلوه من ايام الكليه .... من عندهم من البلد... هانى قالى ادعى لى يا دكتور ربنا يلم شملنا ( يارب ياهانى يسعدك يارب ).

وانا ماشى ( على فكرة ماكنتش عايز امشى ) عطونى هدية من الارض ... بدنجان وفلفل وفول اخضر ..... وترمس علشان أأزأز .

فهيم ونعيم وهانى ... ورونى ان لسه فيه شباب رجاله فى مصر ... شباب عايشين علشان مصر وعلشان يوكلونا .... عايشين علشان مصر واهل مصر .... ومتأكد ...انهم اول شباب حيستشهد لو قامت حرب مع اسرائيل .... مش تقولى فيس بوكك وفيس بوكى وثوار فضائيات ومدونات ....الثوار اللى بجد هما فهيم ونعيم وهانى ... ثوار عايشين علشان مصر مش بيستشهدوا علشان ............ علشان ايه حد يقدر يقولى ؟؟؟!!!

فهيم ونعيم وهانى..... مايفهموش يعنى ايه عصيان مدنى ؟! لكن يفهموا يعنى ايه زرعة تكبروتوكل ومتخليش الايد تتمد لحد ... هيه دى الحرية اللى يفهموها .... مش حرية وضع الصابونه.

على قد مافرحت بيهم على قد مازعلت انى ماعملتش حاجة بجد فى شبابى .... وضيعته اونطة .... قال و زى الاهبل بكمل تضييع عمرى على الفيس بوك .... عيل عبيط بقى تقولوا ايه ؟!!!