الجمعة، 17 فبراير، 2012

شفيق لأ ....... ليه ؟

شفيق لأ ....... ليه ؟

1 من نظام حسنى ..... طاب ما عمرو موسى من نظام حسنى .... حمدين وحازم وابو الفتوح من نظام حسنى .... بسطاويسى والعوا والاشعل من نظام حسنى .... انا وابويا واخويا وبناتى من نظام حسنى ....مش عايزين حد من نظام حسنى نزلوا اعلان تطلبوا فيه رئيس من مواليد 12 فبراير 2011 وما بعدها ....!

2 لو هوة كويس ما استقلش ليه ؟.....ما استقلش واشتغل والعالم شهد له بالكفاءة ... طاب وعمرو موسى مااستقلش ليه ... البرادعى وافق يوطى لحسنى ليه علشان يلبسه الميداليه ... وغيرة وغيرة اللى قعد ومعملش حاجة بالعكس استفاد من ورا النظام ودلوقتى عامل فيها ستين راجل فى بعض .

3 – موقعة الجمل كانت فى عهدة ..... عهده اللى مكملش شهرين فى عز اوان انفجار الثورة وكلاب مبارك مجروحين وبيحاربوا علشان يفضلوا قاعدين .... طاب ماهى موقعة ماسبيرو ومسرح البالون واطفيح مش فى عهده ..... موقعة محمد محمود ومجلس الوزرا وبور سعيد مش فى عهده .

4 – مرجعش الامن .... طاب ماهو الامن مارجعش لغاية دلوقت بعد سنه من الثورة مش فى عز الانفلات الامنى والداخليه واقسامها وسجونها متدمرة ومحروقة ومسروقة .

5 – هوه ينفع وزير بس ماينفعش رئيس .... طاب بالعقل كدة اللى مسك وزارة خربانه ماتفرقش عن هيئة النقل العام وخسرانه نص مليار دولار وفى عشر سنين تكسب نص مليار دولار والمطار يطلع التانى على مستوى افريقيا .. ماينفعش يبقى رئيس ... امال مين اللى ينفع .... البرادعى اللى ممشيها بوس ... ولا العوا اللى كان بيبوس ايد النظام ويكتب مقالات عن التوريث .... ولا ابو الفتوح اللى كل رصيدة انه وقف بجح فى السادات ... ولا موسى اللى عايش على دعاية شعبولا... ولا حمدين العمدة ... ولا الشيخ حازم صرافة .... مين ينفع يا عالم؟

6 – بيقول انه اتقتل حنجيب رئيس مات قبل كدة ؟ .....طاب ما احنا فى انفعالتنا بنغلط ونهلفط ونلخبط .... ولا شفيق لازم يكون ملاك مابيغلطش .

7 – قال حنجيب بنبونى للثوار .... طاب اسمع الجمله فى سياقها وافهم كان يقصد ايه ... ولا هوه عدوك يتمنالك الغلط يعنى .

8 - بيلبس بلوفر .... مايلبس بلوفر ولا تى شيرت ولا جلابية ... هيه مش حرية شخصية يابتوع الحرية ... ماحنا مستحملين الكوفيات والحظاظات والكرفتات الحمرا والشعر الكنيش ..... اختزال راجل زى شفيق فى البلوفر نوع من انواع السطحية الهبله.

زمان قالوا ملقيوش فى الورد عيب قالوله يا احمر الخدين ... مصر محتاجة راجل عندة رؤية ... عندة افكار خلاقة ... عنده حزم ... خلاص ماعادتش محتاجة حنجورى وهتيفة .... مصر عايزة شغل ... دا لو احنا عايزين مصر بجد ... مش عايشين دور كدابين الزفة .... المفروض .... المفروض ان احنا بعد سنه من الثورة عرفنا مين معانا ومين ضدنا ومين بيشتغلنا وبياكل من ورا قفانا .

اخيرا فكروا بهدوووووء على رأى عماد اديب ... وتانى مش عيب ان الواحد يغلط العيب انه يكابر لو عرف انه غلطان

هناك تعليقان (2):

  1. طبعا انت عارف انى حياديه جدا وياما كتبت مقالات كويسه عن شفيق
    ومعاك فى كل ده بغض النظر عن حكاية ان ابو الفتوح ماعنددوش تاريخ لانه تاريخه فعلا مشرف
    ولكن انت مش معايا ان شفيق فعلا مايقدرشى يوقف البلد على رجلها ولكن ينفع يديرها يعنى هو مدير ناجح ولكن لا يصلح يكون قائد اعتقد انك تقدر تعرف الفرق
    تحياتى وجهد مشكور:)

    ردحذف
  2. فافى
    باين كدة حادثة ابو الفتوح حتعمل شغل .... ماشى عموما فى الانتخابات كل شىء مباح
    حمشى معاكى فى فرضية ان شفيق مدير مش قائد وحأسأل سؤال .... هيه مصر بقالها ستين سنة محتاجة ايه غير مدير ...والنبى ماهى محتاجة غير مدير فاهم هوه بيعمل ايه ؟ مدير من عند يارب

    ردحذف