الجمعة، 29 أكتوبر 2010

انا بنت ناس ياناس

أنا بنت ناس يا ناس

بنت ناس حلوه .. ونغشه .. وفايقة ...ورايقة ..... ووشها منور .. وعنيها بتلمع... كانت تمشى لابسه فستانها الاخضر ... وشعرها يهفهف على ضهرها ... سعيدة فرحانة ...الكل كان بيجرى وراها ... الكل نفسة فى نظرة ولا ابتسامه ... الكل ماقدرش غير انه يحبها من بعيد لبعيد وهوه متأكد انه مش حيقدر ياخدها لنفسه ... كان قرايبها وحبايبها واهلها وصحابها.... حامينها حارسينها حبينها خايفيين عليها .... وفى يوم فى شهر فى سنه أو فى كذا سنه ... المهم فجأه كدة ...وهيه ماشيه فى حالها طلع عليها كلاب من كلاب السكك ... مش دى المشكله ... ياما طلع عليها كلاب من كلاب السكك... بس ولا كلب منهم طال منها حاجة ... كان ديما قرايبها وحبايبها واهلها وصحابها ... يحاموا عنها... وفى اخر لحظة ينقذوها ... بس اللى حصل المرة دى ... ماحدش عارف له سبب.... ولاحد فاهم لية حصل ...كلاب السكك المرة دى ....كلاب بلدى ... مش مخلطة زى كل مرة ...هجمت على البنية ... نهشوا فيها ... بهدلوها ... سلبوا منها اعز ماتملك... والغريبة ... ان القرايب والحبايب والاهل والصحاب ... سابوها .. ماجريوش زى كل مرة ينقذوها ... قالوا واحنا مالنا ... خلينا فى همومنا...الاغرب بقى ان بت الناس بعد ما أنكسرت ... واتبهدلت ... ونشفت ... وبدل الاخضر لبست الاسود ...والوش انطفى والعين بطلت تلمع .... ورغم ان مبقاش فاضل فيها حاجة تغرى ولا تشجع .... الا ان القرايب والحبايب والاهل والصحاب .... ماسابوهاش ... بقوا بينهشوا فى اللى باقى منها .... وبالدور ... وبعد كل واحد ماياخد دورة ... يطلع فارد قلوعة ويقول ... انا راجل ... انا جدع .... راجل على مين..؟ وجدع فى ايه...؟ يابن الكلب منك ليه ...اللى يرد يقولك: ماهو علشانك ... واللى يقولك : ان الاوان .. واللى يقولك: كفايه... واللى يقولك: البس التيشيرت وتعالى خد دورك ... حسبى الله ونعم الوكيل ... حسبى الله نعم الوكيل ... حسبى الله ونعم لوكيل ...والبت بعد ماكانت بت ناس ... بقت ليلها ونهارها واقفة تحت العمود فى ايدها سيجارة مستنية اللى يولعهالها.

الاثنين، 25 أكتوبر 2010

مش عايز اتجوز 16

العروسة الخامسة عشر

عم حسين الحلوانى ... عم حسين..... اللى باخد منه التورته والجاتوة وانا رايح اشوف العرايس ... فكرينة .... عم حسين خلص توضيب محل الورد وكلمنى فى التليفون وقالى : انا عرف يابنى ان يوم الخميس دايما عندك مشغول ... بس الخميس ده افتتاح المحل الجديد ونفسى تشرفنى ... قولت له : اكيد جاى ياعم حسين والعروسة بتاعة الاسبوع دة تتأجل ... هوه انت يعنى شايف لى جوازة بتتم ؟!!! .. يوم الخميس رحت الافتتاح ... محل كبير وشيك جدا ... معمول فيه شوية ديكورات روعة ...سلمت على عم حسين وباركت له... واحنا واقفين مع بعض جات بنت حلوة وشيك ووشها سمح قوى ... عطت لى علبة عصير منجه وقالت : اتفضل يا فندم ... اخدت العصير وانا عينى مانزلتش من عليها ..وقلت : شكرا... عم حسين قال : بنتى رشا ... الباشمهندس خالد ... قولت اهلا وسهلا .. تشرفنا ... عم حسين استأذن وقالى : حشوف الضيوف وارجع لك ... قولت له وانا عينى مش عارف انزلها من على رشا ... اتفضل يا حاج انا مش غريب ... قولت لرشا : على فكرة ديكورات المحل رائعه ... ياترى مين اللى عملهالكوا ... قالت لى : عجبك ؟... قولت : جدا ... قالت لى: انا .. قولت: مش معقول .. قالت : انا اتخرجت من الفنون الجميلة السنه دى و ده اول شغل ليه .. بس ياخسارة .. ماخدش فلوس ... بابا بقى ومش معقول اخد منه فلوس ... قولت : انا بقى بقالى فترة عايز اجدد ديكور مكتبى فى الشركة ومكسل .. بس بعد ماشوفت الذوق العالى ده ... ياريت توافقى وتغيرى لى ديكورات المكتب ...قالت لى : تحت امرك ....وكملنا كلامنا وافترقنا على انها تيجى لى المكتب تانى يوم علشان ترفع المقاسات ...وتشوف ايه اللى ممكن يتعمل ... روحت البيت وان فى منتهى السعادة ... بوست امى وحضنت اختى وهزرت مع ابويا ... احساس لذيذ احساس الحب من اول نظرة دة .. آه... حب ....مالكوا ... كنت غلطان لما ماكنت مش مصدق فى الحب ..وكنت غلطان لما كنت مش عايز اتجوز ... ايه المشكله يعنى ... عيل وغلط وياما العيال بتغلط ...رشا قعدت تشتغل فى ديكورات المكتب شهر كامل ... ( زى قلب كامل كده ) شهر كامل واحنا مع بعض كلنا مع بعض وشربنا مع بعض ... عرفت اخلاقها وطباعها ...عرفت اسلوبها فى الكلام والتفكير ... لقيت بينا حاجات كتير مشتركة ... وفى يوم التسليم .. قولت لها انا عايز اكلمك فى موضوع مهم .. قالت لى : اتفضل ... قولت : بصراحة كدة ومن غير مقدمات ... انا ...انا .. قالت : اتفضل قول ... قولت : بصراحة كدة وبدون مقدمات ... انا معجب جدا بيكى من ساعة ماشوفتك ... وقررت انى اتقدم لعم حسين علشان اخطبك ... رشا بيضا ... بس بعد ماقولت الكلمتين دول بقت لون الطماطم ... وقالت وهيه باصه فى الارض : الكلام دة مع بابا ... قولت لها : اكيد طبعا ...بس عايز اعرف رأيك ... قالت وهيه بتاخد الشنطه علشان تمشى : لو بابا وافق انا موافقة ... وخرجت جرى من غير سلاموا عليكوا....

طبعا حناخد معانا ايه دى كانت مشكله ... يعنى الجاتوه حيبقى من عند عم حسين ولا من محل تانى ... لغايه امى ما قالت: عندى الحل... قولت لها : قول ياجميل .. قالت : انتو ناسيين ان احنا فلاحين ولا ايه ؟ ... احنا ناخد زيارة فلاحى ... وفعلا اتصلنا بعمى اللى على طول عمل لنا جسر جوى... بط وفراخ وحمام وقشطة وزبدة ورقاق ... ويوم الخميس كنا انا والحاج وامى واختى عند عم حسين بنخطب رشا... طبعا محدش سابنا نقعد نتعرف ... يعنى لا صلاة عشا ولا تعالوا افرجكوا على الشقة ... دخلنا فى التفاصيل على طول ... اتفقنا على الشبكه والمهر والفرح والدخله ...طبعا انتوا مستنين النهايه ....والله ما انا عرف اقول لكوا ايه .. انا عارف انكوا بتتمنولى الخير ... وده اللى حصل فعلا ... اتجوزت ... انا ورشا اتجوزنا ... وعندنا دلوقتى رانا ويوسف ... وسعيد جدا فى حياتى ....عارفين احسن حاجة فى الجوازه دى ايه .؟؟؟ ان انا اتجوزت من البنت اللى كنت بأحلم بيها ... وغيرت ديكورات المكتب ببلاش ... والجاتوه والورد بتاع الفرح برضة كان ببلاش ... هوه معقوله احاسب حمايا ... دا حتى الراجل يزعل ...ههههه طبعا بأهزر ... أو مش بهزر ... فعلا ياجماعة الخير ... اللى ربنا يحبه يرزقه بالزوجة الصالحة ...الف حمد وشكر ليك يارب ... عوضت صبرى خير .

الجمعة، 22 أكتوبر 2010

مش عايز اتجوز 15

العروسة الرابعة عشر

انا عارف انى بأتاخر عليكوا ... بس علشان نفسى اجيب لكوا اخبار كويسة ... ماهى كانت البدايه كويسة ... والعروسة كانت كويسه ... عقل وتدين واصل ونسب وجمال ... رحت اول مرة مع الحاجة واختى ... ورحت تانى مره لوحدى ... رحت تالت مرة بردة لوحدى .... على فكرة كل مرة كنت بأروح كنت باخد معايا حاجة ... جاتوه ...تورته .. شيكولاته ... وكله من الغالى والله ... حتى فى اخر زيارة ..ام العروسة قالت : ياخالد يابنى خف ايدك شويه ... انت داخل على جواز ... كده عمرك ماحتعرف تعمل قرش .... فى المرة التالته بقى اتفقت مع ابو العروسة ان احنا نجيب الرجاله ونتفق على التفاصيل ...وفعلا أخدت الحاج وخالى وجبت تورتايه ايس كريم من بتاعة موفينبيك ... ما المرة دى ابويا بقى اللى رايح مش اى حد ... دخلنا وسلمنا وكان مع ابو العروسه خالها برضة .. وبدأ الكلام فى الدنيا وفى السياسة والتوريث واولياء الله الجدد واللى بيعملوه فى الصحفيين ... وشويه وابويا قال : شوف ياحاج صلى على النبى ... كلنا قولنا عليه الصلاة والسلام ... احنا جايين نطلب ايد بنتكوا لخالد ابنى ... ابو العروسة رجع بضهرة كدة واتفرد وقال: دا يشرفنى ياحاج ...ابويا قال : ندخل فى التفاصيل بقى يا حاج ... طلباتك ايه؟ ..وقبل ما الراجل يرد ويقول طلباته ..خال العروسة انطلق يامعلم : دا كان متقدم لها عريس وكان قاعد هنا مكانك كدة ياحاج وكان معاه شنطة فلوس ...كنت حأرد عليه بس لقيت ابويا بيضغط على رجلى وهوه بيقول : طبعا طبعا بتكوا تتاقل بالمال ومايكفيهاش كمان ... قال الخال : ايوه.... انتوا بقى حتجيبوا شبكة بكام ... ابويا قال وهوه بيبص لابوا العروسة : احنا ياحاج حنجيب شبكه بعشرين الف ... رد ابو العروسة : والله يا ابو خالد ... الشبكة دى هدية من العريس لعروسته ... دخل الزبون تانى : هوه ايه اللى هدية وايه اللى عشرين الف .. دا بت خالتها جايلها شبكة بخمسة وعشرين الف ... هيه مش اقل من بت خالتها ... ابويا برضة بص لابو العروسة وقال : انت ايه رايك ياحاج ؟ ... ابو العروسة قال: والله ياحاج انت عرف البنات وازاى بيبصوا لبعض .... ابويا قال : خلاص يا حاج خمسه وعشرين .. والخمسه دول هدية منى لبتنا ....ودخل الزبون وقال : واحنا بنكتب قايمه .... دخل خالى وقال : وماله حقها وحقكوا ... العفش اللى حايجى حيتكتب فى القايمة ... رد الزبون : مش العفش بس ... كل اللى حايجى فى البيت ... والاحسن .. نكتب قايمه بميت الف جنيه ... خالى بدأ ينفعل :طاب لو الحاجات كانت اقل من ميت الف جنيه ... قال : وايه يعنى انتوا حتلاقوا زى بتنا ؟ .... دا فيه عريس مكلمنى عليها وكان عايز يجى بكرة ومعاه شنطين فلوس ... طبعا انا قاعد باغلى ومش قادر اتكلم احتراما لابويا وخالى ... لكن لقيت ابويا بيقول لى : مش عايز تقول حاجة ياخالد ... حسيت ساعتها انه بيقول لى انطلق خد قرارك انا ماليش فيه ... بصيت كدة وقولت : والله يابا انا شايف ان احنا مش حنقدر على البيعة دى ..يعنى واحد داخل بشنطة فلوس والتانى عايز يجى بشنطتين فلوس ... لا ياحاج : انا مقدرش ادخل مزاد على بضاعة انا مامعييش تمنها ... الا لودخلت ... ممكن اخسر التأمين ... ... بصيت لابو العروسة وكملت : وانت ماترضليش الخسارة يا حاج مش كده ولا ايه ..وعموما الجواز قسمه ونصيب ... وكفايه ان احنا اتعرفنا على ناس كويسة .... وحصل شوية خزعبلات كدة وابتسامات من ورا القلب وروحنا ...

انتوا شايفين ان حظى وحش واكيد زعلانين علشانى ... بس انا شايف ان فيه امل ان المرة الجاية الاقى العروسة ... ماهى البنت دى كانت كويسة ... بس اهلها بقى ... يالا ...

الأحد، 17 أكتوبر 2010

الطماطم بين النظرية والتطبيق

الطماطم بين النظرية والتطبيق

من يوم ما وعيت على الدنيا ... يعنى من اربعين سنه كدة ... وانا اعرف ان الاسم الحركى للطماطم هوه المجنونه ... اه عرفت بعد كده ان اسمها قوطة وبندورة وحاجات تانيه ... بس الاسم الكودى هوه المجنونه .... ولما سألت عرفت ان اسم المجنونه دة علشان يوم يبقى سعرها فى السما ويوم يبقى الاتنين كيلو ببلاش ونص ... طاب وده معناه ايه يعنى ... اقولكوا : ده معناه ايه ..

ثانيا : ان اللى حصل للطماطم اليومين اللى فاتوا دول مش حاجة جديدة ... ماهى الطماطم حالها كده من اربعين سنه ... يعنى المفروض ان احنا نكون اتعودنا على كدة ...ومانتفاجأش

اولا : لو الطماطم بتزيد فى سعرها شهرين فى السنه ... حاجة تقرف ... طاب ماهى بترخص عشر شهور فى السنه ... حاجة كويسة ... يبقى ليه بقى الازمة النفسية وحاله الاكتئاب اللى صابت الشعب الحبيب من زيادة سعر الطماطم

ثالثا : ماتيجى نتحمل نصيبنا من المسئوليه ... ازاى ... احكيلكوا الحكاية اللى خلتنى اكتب البوست ده ...وانتوا حتعرفوا

قوم ايه مراتى من اسبوعين كدة طلبت منى اشترى كيلو طماطم وشوية خضار ... وبعد مرور الاسبوعين وبعد ثورة الطماطم اللى على النت والمدونات ومن ضمنهم انا ...دا طبعا غير التوك شو والمصرى اليوم .. والدستور الالكترونى ... اكتشفت ان احنا كل يوم تقريبا بناكل طبيخ بدمعة ... قوم سألت : هوه يامراتى العزيزة كيلوا الطماطم اللى جبته من اسبوعين فيه بركه قوى كدة لدرجة ان احنا بقالنا اسبوعين بنطبخ منه ....ضحكت وقالت ربنا يبارك ..بس لا طبعا .... قولت : امال ايه الحكاية ... دى الناس بره بتاكل ملوخيه بقى لها شهر ...علشان مشكله الطماطم ... قالت : مشكلتهم .. يحلوها بمعرفتهم ... انا طبعا فاهم مراتى وعارف انها لما ببتكلم بالاسلوب دة يبقى هيه عامله حاجة محدش عاملها ... قولت: فهمنى يا عبقرى ..قالت : فاكر لما سألت اخوك على الميعاد اللى بتبقى فيه عروة الطماطم غاليه ...(اخويا دة مهندس زراعى ) قولت : ايوه .... قالت : انا بقى قبل ميعاد العروه دى ... الطماطم بتبقى رخيصة ... اقوم اشترى كميه واعصرها واغليها واحطها فى علبه كبيرة واحطها فى التلاجة ... تيجى العروه ...تغلى الطماطم ...تولع الطماطم .. تنقص الطماطم فى السوق.... ماليش فيه .... قولت : يابنت الايه ... يعنى احنا عندنا طماطم دلوقت ... قالت ايوة تكفينا اسبوعين كمان ... دا غير ان فاضل اربع طماطمات من اللى انت جايبهم سيباهم للسلطه .......ايه رأيكم ؟ّّّ!!!

رابعا : مش حل مراتى احسن من اننا ندفن نفسنا فى المشكله ..ونسخن بعض ... وننفعل ... ومانصدق نلاقى جنازة ونشبع فيها لطم .. ونحمل رئيس الجمهموريه مسؤلية اختفاء الطماطم ... اقول لكوا اخر نكته تحزن اكتر ماتضحك ... واحد من عباقرة الافرازات المصرية ...قال ياجماعة ابراهيم عيسى اترفد مش علشان الضرايب ولا علشان مقالة البرادعى زى مانتوا عارفين ... دا اترفد لان مباحث امن الدوله عرفت انه بيكتب مقال عن الطماطم بيهاجم فيها حسنى مبارك ...وبيقول فيه ان الرئيس فى اى دوله محترمه لو الطماطم غلت عندة يقدم استقالته على طول

خامسا : اقول لكوا حاجه .....وانا عارف انها مش حتعجبكوا .... ساعات كتير بيصعب عليه حسنى مبارك قوى ........ قوى والله

السبت، 16 أكتوبر 2010

مش عايز اتجوز 14

العروسه الثالثة عشر

وحشتكوا مش كدة ... والله ما اخرنى عليكوا غير الشديد القوى .. اصلى قعدت يجى اسبوع فى البيت عيانوزهقان ومكتئب ومش طايق نفسى ... طبعا عايزين تعرفوا السبب ... السبب العروسة الاخرانيه اللى ححكيلكوا حكايتها ...شوف ياسيدى ... طبعا كالعادة جبت الجاتوه ورحنا للعروسة اللى اهلها استقبلونا استقبال الفاتحين ... امى واختى زى مانت عارف طلعوا برة فى الصاله ... وابوالعروسه ...لاااا ... دانزل يشرب حجر معسل على القهوه .... المهم بقى ... العروسة عادى يعنى .. لا حلوه ولا وحشة ... بس كانت مكشرة ... مش تكشيرة زعل ولا عركه ... لا تكشيرة زهق .. ملل ... قلق ... ومع التكشيرة حاطه على وشها ابتسامه غصب ... فالابتسامه طالعة زى ماتقول اشمئزاز كدة ... قولت استعنا على الشقى بالله ... ماتخدش يابنى بالمظاهر ... ناخد وندى فى الكلام ونشوف ..سالت : انا عرفت انك فى اخر سنه فى كليه الحقوق ... قالت ايوه ... ربنا يعديها على خير ... قولت ايه مش مذاكرة ولا ايه ... لا بذاكر وبذاكر كويس قوى ...بس الاساتذه متدبأنى ... بيجيبوا اسئله صعبه قوى ... انا عارفة انهم بيبقوا عايزين يشوفونى مزاكرة كويس ولا لا ... قولت : قصدت متدبئين الدفعة بتاعتكوا ... قالت : لا انا بالذات ... بس انا مش بديهم فرصة واحل كويس ... بس برضة بيدققوا فى ورقتى لما بيجوا يصححوها ...قولت : طاب ليه انت بالذات ... قالت : انا عارفة ...زمايلى اللى فى الكليه راحوا وقالوا لهم عليه كلام وحش ... ومن يومها وهما متدبئنى ... قولت : طاب ومحاولتيش تقعدى مع الدكاترة دول وتفهميهم الحقيقة .... قالت : حتى لو طلعت لهم واتكلمت معاهم مش حيصدقونى ... دول بيراقبوا كل تحركاتى عايزين يمسكوا عليه غلطة ..بس مش عارفين ...قولت : وبيراقبوكى ازاى ... قالت ... كل حته انا باروحها حاطين فيها كاميرات سريه ... قولت : يعنى ممكن يكون فيه كاميرات هنا ... قالت لى : ماتبصش ... قولت ماهو لو فيه كاميرات حيسمعونا ... قالت لى :لا .. الكاميرات من غير صوت ... قولت طاب والحل ... قالت المكان الوحيد اللى مافهوش كاميرات هوه اودة النوم ... قولت كويس ... قالت لى: لا مش كويس ... دول متتفقين مع الجيران علشان يراقبونى ومن ورا الشيش ... قولت : طاب وبعدين : قالت باقفل الشيش والازاز علشان مايشوفنيش ... قولت : انت ليكى صحاب ؟ ... قالت لى: قاطعتهم كلهم ... قولت ليه : قالت لى : بيتكلموا عليا من زرا ضهرى ... بص ... لو حد قالك عليه حاجة ماتصدقش ... دول كلهم متفقين مع الدكاترة اللى فى الكليه قولت : حيقولوا لى ايه .....قالت : كلام اصل هما عايزين يسواؤا سمعتى ... علشان انا بنت شريفة ومحدش لمسنى .. طول عمرى ماحدش لمسنى ....حتى وانا بنت صغيرة فى تالته ابتدائى ... مافيش مخلوق لمسنى ...وبدأت تتوتر والعرق ملى وشها ...قولت : هدى نفسك ... انا عارف .. ولو ماكنتيش بنت شريفة وعفيفة ماكنتش جيت علشان اخطبك ... قالت : يعنى انت خلاص حتخطبنى ...قولت فى نفسى : يانهار طين ياولاد ... ان احأتدبس ولا ايه ... قولت يعنى نتعرف ولو فيه وفاق .. ربنا يسهل.. قالت : اهوه ... رجعت فى كلامك اهوه .. يبقى صدقت اللى بيقولوه عليه .... وبدأ صوتها يعلى : دول كدابين ... محدش عارف حاجة .. محدش شاف حاجة ... انا ماليش ذنب ... كل حاجة جات غصب عنى ... انا ... وفجأة اغمى عليها ووقعت على الارض ... حاولت انادى على حد يلحقها ... صوتى ماكنش راضى يطلع ... اتمالكت نفسى وناديت على امى ... دخلت ام العروسه بطريقة غريبه ... كانت هادية خالص .. قعدتها وخبطت على خدها وفاقت ... قولت : ..انا ... انا... ام العروسه قالت : ماتقلقش يابنى دى بس اصلها ماكلتش حاجه النهاردة ... فجالها هبوط ... شويه كده وحتبقى كويسه ... قلت فى نفسى : الحكابه مش حكايه هبوط .. شكل الحكايه دى بتتكرر كتير ... طبعا استأذنا بحجة ان لينا زيارة تانيه ...علشان نسيب العروسة ترتاح ... واحنا ماشيين كان نفسى اقول لامها بنتك عايزة دكتور نفسانى ... بس قولت وانت مالك ياواد الا تلبسك مصيبه ... بصراحة البنت دى صعبانه عليه قوى ... قوى قوى .. بس اعمل ايه ؟؟؟!!

الثلاثاء، 12 أكتوبر 2010

عدو الديموقراطيه

عدو الديموقراطيه

باين كدة ان الخضوع والاستكانه والذل دى حاجة قديمه جوانا...او صفه وراثيه سايدة من ايام الملك نارمر موحد القطرين .... مين السبب بقى نارمر ولا امنحتب مش دى القضيه ... القضيه انه اتغرس وعشش جوانا ان احنا حاجة .. شىء ... بتاعه كده ملهاش لازمه ..وصدقنا ...هما بقى اللى خلونا نصدق ولا احنا اللى صدقنا ...برضه مش دى القضيه ... المهم ان احنا متأكدين بينا وبين نفسنا ان احنا ماننفعش ... وان احنا مش قدهم ... وان احنا وحشين ... ونتيجة للاحساس القاتل بالدونيه ده ...واللى احنا طبعا مش من بينه ... علشان نضحك على اللى قدمنا وعلى نفسنا ونعيش ....ومش قادرين طبعا من الغم والهم اللى راكبنا ...او اللى احنا مركبينه لنفسنا ...بقينا بندور على الموت علشان نرتاح .... بقت محاولاتنا الانتحاريه كتير قوى.... اى نعم مش محاولات صريحة يعنى مابنقفش على سور البلكونه ونرمى نفسنا ... لا ... ماتقلقوش شويه وحتحصل , ... الانتحار دلوقتى بقى رمزى ... نرهق نفسنا زيادة على اللزوم ونسهر للفجر ومانامش ساعتين تلاته فى اليوم ... نسوق بسرعة وتهور ومانغيرش زيت الفرامل ... ناكل كبدة على عربية تحت الكوبرى جنب كوم الزباله ....نديها حشيش وبانجو وابو صليبه وعين الكتكوت ...وبالمره فرصة للتانين يقولوا علينا ان احنا مابنفهمش ومابنعرفش ومابنمشيش غير كدة... بالكرباج ....ما احنا اجداد عبد الصمد ... ويحملونا احساس الذنب ... مش مقدرين تعبنا معاكوا ... ايه قله الوفاء والغدر دة ... فنخضع ذيادة وهما يدوسوا زيادة ..ونخاف نطالب بحقنا فى العيشة الادميه ... اصل مانتش عارف ...احنا مش قدهم ... هما الاقوى .. هما اللى يقدروا يبهدلونا ... اهدى كده وخد حقك بايدك ... بسيطة ... ماتشتغلش ,,, شنع عليهم... قول عليهم نكت ... اشتغلهم .. ظبطهم ... ريحهم ... هوة يديك وعود كدابه وانت اديله الولاء والطاعة ... كدة وكدة يعنى ... من الاخر قللبه ... خليك ناصح خليك فهلوى ... واتحول الكذب والخداع جزء من نسيج الامه ... ومباقيناش نكدب بس على اللى فوق ... بقينا بنكدب فى كل حاجه... فى الحب والجواز والبيع والشرا والكورة والصحوبيه وحتى الدين بقينا نكدب فيه ونقول اللى يراضى المسئول... وياعينى ياعينى...... ياعينى على الوله ... ابو نيه طيبه لو ماكدبش وماخدعش ... حيتدمر ماديا ومعنويا ياولداه... فلوسه حتضيع ... وحيقولوا عليه العبيط اهوه العبيط اهوه ... ... فاكرينها شطارة ... مش عارفين انها احساس بالدونيه وقله الحيله ومركبات نقص ... ليل نهار بنحاول نخفيها بضرب النسوان وشتم العيال وتشريط كراسى القطر بالموس ... وانتظار الفرج .. انتظار المخلص ... هركليز اللى حيخلصنا من الهم... ويرجع لينا كرامتنا وانسانيتنا ... ويحسسنا بالامان فى بكرة ...ويرجع لينا الوطن.... بنطلب المخلص واحنا مش واخدين بالنا ان احنا بنطلب الزعيم الفرد ....برضه الزعيم اللى حنفرعنه باسلوبنا ووانقيادنا ورعبنا ...واللى بعد شويه حيذلنا ... ونبدأ نشتكى ونقول احنا مابقلناش معنى ... ان احنا بقينا حاجة كدة مش عارف ايه هيه ... ونبدأ سلسله القهر من تانى ... ونرجع البيت نطلع غلنا فى العيال وكرسى القطر الغلبان... احنا اللى مش عايزين ديموقراطيه ... احنا خدنا على كدة ... احنا بنحب الذل ... ماتجيبوش الذنب بقى على حد ...واوعوا تفتكروا ان اللى جاى حيكون احسن ... اه ....... عمركوا شوفتوا يأس كده قبل كدة ...بس هوه ده علامة القهر والاحساس بالدونيه والاتكاليه والتخلف .... اييييييييه هو انا مش مصرى ولا اييييييييه ....دا انا مصرى وابويا مصرى... زرغتى ياوليه دى نانسى بتغنيلى!!!!!!!!!!!!!!!!!!!!!!!!!!!!!!!!!!!!!!!!!!!!!!!

الاثنين، 11 أكتوبر 2010

عميل ولا عويل ؟؟؟!!!

عميل و لا عويل ؟؟؟!!!

المسئول عن ازمه بتحصل فى اكل ولا شرب ولابوتجاز ... يبقى عميل ولا عويل...... ؟

المسئول عن اجيال جاهلة ومتخلفة بتطلع تسعى فى الشوارع وتمسح عربيات وهيه معاها بكالوريوسات .. يبقى عميل ولا عويل..... ؟

المسئول اللى بيضيع تاريخ بلد وثقافته ويساعد على تطور الانحدار الاخلاقى فيه ... يبقى عميل ولا عويل..... ؟

المسئول عن الفساد الادارى والرشوة والمحسوبيه ... يبقى عميل ولا عويل ......؟

عموما ان كان عميل منه لله ... وان كان عويل بقى ......برضه منه لله ... بس انا رأيى انه لا عميل ولا عويل ... ده عليل ... ايوه يعنى مريض ... والمرض اللى عنده الله يعافيكوا ... مرض نفسى عقلى مع شويه تخلف ولعب فى كروموسومات الاكس واى ...... من الامراض اللى مابتتعالجش .ادعوا له ربنا يشفيه ...اويشفيهم ... ماهوا بقى مرض معدى ... استر يارب

الخميس، 7 أكتوبر 2010

الاشتغاله بين النظريه والتطبيق

الاشتغاله بين النظريه والتطبيق


بالراحة كدة وواحدة واحدة .... الانسان مننا عبارة عن ايه؟ ... طبعا غير اللحم والدم ... الانسان عبارة عن شويه مشاعر يتحكم فيهم شوية دوافع ...اكيد كلنا عارفين المشاعر ... حب ..كرة ...غضب...فرح ...حزن ... امال الدوافع هيه ايه ؟ ... الدوافع دى حاجة كل الانساننين مولودين بيها ... هيه اللى بتحركهم وتتحكم فيهم وفى تصرفاتهم وسلوكهم .... مثال : لو انت جعان ...ايه اللى بيحصل ... دافع الجوع يشتغل ... ويخليك لا على حامى ولا على بارد ... ويزقك علشان تروح تاكل ... ولما تاكل وتشبع ...تهمد وتهبط ....طاب لو مافيش اكل ... ايه اللى ممكن تعمله ؟ ... حتعمل اى حاجة علشان تاكل وتحافظ على حياتك .... ممكن تسرق ...ممكن تقتل ... صح ؟ .... فيه زى دافع الجوع ...دافع العطش ....دافع الالم ... ودافع الجنس ... ودول بقى اسمهم الدوافع الاساسيه ... المشتركة فيها جميع البنى ادمين ....

فيه بقى دوافع تانيه اسمها الدوافع المكتسبه ودى اللى احنا بنكتسبها طول ما احنا عايشيين وبنتعامل مع الدنيا ... وهيه ...الخوف ..الانتماء ...الاستكشاف ..العدوان ...... اللى فات ده كله النظريه .... امال فين التطبيق ياجميل ؟ ...حأقولك حالا ...الناس اللى فاهمه النظرية بتعمل ايه ؟.... بتدوس على دوافع البشر ...وطول ماهيه بتدوس .....الناس تطلع اللى فى جيبها ... وتبقى تحت طوعها ...وتحت رجليها وتلعبهم زى ماهيه عايزة ...ونبقى يا ولداه عجينه فى ايديهم ويعملوا فينا اللى هما عايزينه .... اديك مثال .. وانت جعان ممكن تاكل اى حاجة وتحمد ربنا وترتاح من دافع الجوع اللى تاعبك ومعذبك ... لكن لو قولت لك استنى ... فيه ساندوتش همبورجر ...وعليه طماطم ام تسعه جنيه وفلفل وجزر وكاتشب ومايونيزو مسطردة ومعاه بطاطس محمرة وكمان حجمه كبييييير ... حتعمل ايه ؟ .... حتدبدب فى الارض وتقول انا عايز من دة ....أهى أهى أهى ...طاب لو دوست على العطش بقى وقولت كوكاكولا ساقعة ومشبرة ولما بتفتح تعمل تشش وجواها تلج بيلعب والدنيا حر وانت عطشان ياحبة حين امك ....حتعمل ايه ؟ ..... بصلو قولت لك احنا عارفين اد ايه الالم اللى بتحس بيه وانت مش قادر تجيب حاجاتك الاساسيه ياكبد امك ... ولا يهمك ...اشترى بالفيزا .... وادفع لما تفرج ...تعمل ايه ؟ لو قولت لك اقعد بقى واسترخى وبص على الموزز ... فيديو كليب ونسوان عريانه ومشاهد ساخنه وشويه شذوذ مايضرش ... ودوس على الجنس ...حتعمل ايه ؟ اى نعم انت مش حتعمل حاجة وحتبص بس.... بس ده عبط منك ملناش فيه ... المهم تدفع يامعلم ... وفلوس كتير تخش جيبهم ...لكن البحر يحب الزيادة..... وفرصة انك تلاقى حد عبيط تشتغله مش كتيير .... يقوموا يلعبوا على الدوافع المكتسبه ... اوعى العربيه اللى من غير فرامل بى بى اس ....حتموت وتتقلب بيك .... اللعب على دافع الخوف .... اشترك معانا فى جبهة التغيير علشان نساعد اونكل البرادعى ... اللعب على دافع الانتماء ....تعالى اقولك اسرار الجرائم واللى بيحصل فى دهاليز الحكم واخبار الفنانين ورجال الاعمال ....اللعب على غريزة الاستكشاف .... ماتسكوتش على حقك... اعمل مظاهرات واعتصامات واقف جنب ابراهيم عيسى وعمرو اديب مبعوث العنايه الالهيه لانقاذ شعب مصر .....اللعب على دافع العدوان .... وياللللاااا ... هيصه يامعلم ... سبوبه ببلاش ... والعبطة كتيير ... هما يكسبوا ويتغنوا ... واحنا نعمل جمعيات ونشترى بالفيزا ونندين ....هما يبقوا اصحاب قنوات وجرايد وفيلات .... واحنا نزعل وننقهر ويجيلنا السكر.... علشان شالوهم من برنامج ولامن رئاسة تحرير .... هما يبقوا فووووووق .... واحنا ندفع تمن قعدتهم فوووووق ..

هوه العنوان مش كان يبقى احسن لو كان اصحوا يا عبط كفايه بقى

الأربعاء، 6 أكتوبر 2010

مش عايز اتجوز 13

العروسة الثانية عشر

دخلت عليه امى وانا قاعد على النت اقرأ فى مدونه حنعيش يعنى حنعيش ... قالت : ايه يا خالد انت لسه قاعد ... انت ناسى ان النهاردة الخميس ... قوم يابنى البس اتأخرنا على العروسة ... قولت : والنبى ياماما سيبينى فى حالى .. بلا عروسة بلا محروسة ... انا كدة حلو وزى الفل ... مش عايز اتجوز ... مش شايفة البوست الاخرانى بتاع حنعيش يعنى حنعيش بيقول ان الطوفان جاى ... قالت : هوه انت لسه متابع الراجل ده ... سيبك منه ماتخليش كلامه يأثر فيك ... دا ربنا كبير يابنى وعالم بحالنا ... سيبنى بس اهبدهولك تعليق غير معروف اخليهولك يقفل المدونه دى ... قلت ضاحكا : ياواد يابتاع النت وعرفت كمان التعليقات .... قالت : جرى ايه ياواد ... دا الفيس بوك بتاعكوا ده مولود على ايدى .... المهم ... قمت لبست وعملنا اللى بنعمله كل اسبوع ... خبطنا ودخلنا ... ريحة البخور كانت تخنق ... شويه وجات العروسه ... وهيه داخله علينا امها قالت : اسم الله والحارس الله وضمت صوابعها الخمسه وعملت بيهم دايرة فى الهوا ... وقالت : بتى اللهم صلى على النبى بكالوريوس اقتصاد وعلوم سياسية ... ماشاء الله الله اكبر ... خرج الحاج يصلى العشا ... الحاجة قالت لامى واختى : تعلوا نقعد فى الصاله ونسيب العرسان يتعرفوا على بعض ... النهاردة الخميس... جايبين فيلم حلو على روتانا سينما ...

العروسه كانت لابسه سلسله فيها كف وفى وسط الكف عين ... ولابسه خاتم فيه فص ازرق كبير ... سالت بتضرع : هوه ممكن نفتح الشباك ؟... اصل البخور جامد قوى .... قالت : حاضر وفتحت الشباك وهيه بتقول : هوه انت مابتحبش البخور ... قولت : لا ابدا بس انتوا مكترينه شويه ... قالت : بالعكس ... داحتى البخور النهارده خلص وبابا كسل ينزل يجيب ... قولت : النهارده ..؟ .... هوه انتوا بتبخروا كل يوم ....؟ ... قالت : طبعا .... وراحت موطيه صوتها وقالت : اصل البخور بيطرد العين .. ويراضى الاسياد ... انتفضت وقولت : ايه ؟؟؟ ...اسياد ... قالت : ماتخفش ماتخفش ... احنا عاملين احتياطتنا ... عمرهم ما يزرونا .... قولت : احتياطات ازاى يعنى ؟ ... قالت كل ركن من اركان البيت فيه حجاب... قولت : ياسلاااام ! ... قالت : آه والله ... اصل كل حاجه وليها حجابها ... سألت : ازاى يعنى ... قالت : اقولك ... يعنى مثلا اختى بعد ما تجوزت كانت دايما على خلاف مع جوزها .... رحنا للشيخ عمل لنا حجاب المحبه ... ومن يومها مافيش خلافات بينهم خالص ... قولت : ياسلااام ..!! قالت : آه والله ... قولت : والحجاب ده فيه ايه ؟ ... قالت : حقولك بس اوعى تقول لحد ... اصل دى اسرار ... قولت: لا ماتخفيش مش حاقول لحد ... قالت : دى ياسيدى ورقة مكتوب فيها يا بدوح يا بدوح يا بدوح .... الف بين الروح والروح ... بحق العلم واللوح ... وآدم وحوا ونوح ... وبعدين تتقفل الورقة على شكل حجاب وبعدين مولانا يعزم عليها ويبخرها ... وتلبسها الوحدة فى رقبتها ... كل يبقى زى الفل ... قولت : ياسلااام ....! قالت: اه والله قولت : طاب وعدم الوفاق ده كان سببه ايه .....قالت : ماحنا عرفنا بعد كدة ... واحده صاحبة اختى ... منها لله بقى ... كانت عامللها عمل بعدم الوفاق حطاه تحت السرير ... قولت : وحطته ازاى ؟ ... قالت : شوف الكهن ياسيدى... قالت لها والنبى افرش معاكى ... علشان افك عقدة من عقد المرتبه ... اختى طيبه ... وافقت ... اتاريها وهيه بتفك عقدة المرتبه ...راحت حاطه العمل تحت السرير ... قال وعامله صحبتها ..... قولت : طاب وتفك عقدة المرتبه ليه ؟ ... قالت علشان يجيلها عريس ... قولت فى نفسى : يانهار اسود على العيشة واللى عايشينها ... مال المرتبه ومال العريس ؟!! ... العروسه حست بيه وقالت : افهمك ... ماهى الواحدة لما مايجيلهاش عرسان ... تروح لاى واحدة لسه بتفرش عفشها وتفك عقدة من عقد المراتب ... مايفوتش اسبوع الا والعريس يخبط .... قولت : ياسلاااام ..!! قالت اه والله ... قولت : بس انا مش مصدق ان فيه ستات شريره كدة ... قالت لى : لا صدق دا فيه اللى اكتر من كدة ... ورجاله بقى مش ستات .... قولت : احكى لى .... قالت : اخو جوز اختى ... قولت : ماله ؟ ... قالت : كانت لسه والدة ... وقال ايه كان عايز يدخل يبارك لها ... وكان شايل كيس اسود ... لولا ستر ربنا امى خدت منه الكيس وفتحته..... وفعلا ... لقت فيه لحمه ...قولت : وفيها ايه دى ؟!! قالت فيها ايه ... دا كان عايز يشاهرها ... قولت : يشهرها ازاى مش فاهم ... قالت : يشاهرها ... يعنى مايخليهاش تخلف تانى ...قولت : برضه مش فاهم ؟ ... قالت : ما اصل الواحدة لما تكون والدة ... لو راجل دخل عليها وهوه حالق دقنه ..او شارى لحمه ... ماتحملش تانى ... قولت : ياسلااام ؟!!... قالت اه والله ... قولت لو حصل يعنى ... ليها حل؟ ...قالت :ايوه ليها حل ... بس وجع دماغ بقى ...جوزها ينزل يوم الجمعة ... ويلم عشر برايز من عشر رجاله ...كل واحد منهم بريزة ... ولازم يكون الرجاله اسمهم محمد ....ولازم يكونوا لابسين جلابيه بيضا ...وقبل ما ادان الجمعة يدن ... قولت : وبعدين ... قالت : يلف العشر برايز فى قماشه ومراته تتحزم بيهم لغايه ماتبان البشارة .... قولت : ياسلااام ..؟! قالت اه والله ... قولت : انت تقديرك ايه فى الكليه ... قالت : كنت باطلع بامتياز كل سنه ... ماعدا اخر سنه ... طلعت بجيد جدا ...قولت : لازم ماكنتيش حاطه حجاب النجاح ... قالت بتعجب : فعلا ... بس انت ايه اللى عرفك ؟ قولت : ماهو انا نسيت اقولك ان اختى اللى تحت الارض بتقولى كل حاجة .........

والنبى حد يقول لامى مش عايز اتجوز .... والنبى والنبى ..

الثلاثاء، 5 أكتوبر 2010

حرب الرجال


حرب الرجال

كل سنه ومصر طيبه ... كل سنة وشعب مصر بخير ... وقبل ما اروح حسأل سؤال:
عارفين احنا انتصرنا ليه فى اكتوبر ؟
علشان حاجة بسيطة خالص ........... علشان كنا رجالة ... ووقفنا وقفة رجاله ....

الاثنين، 4 أكتوبر 2010

ولا أبرأ نفسى

ولا ابرأ نفسى

سامحونى فى حاله الكآبه والتعميم اللى حتكلم بيها ... لانى بصراحه لغاية دلوقتى ماشوفتش استثناء واحد يوحد ربنا يقول ان اللى جاى فيه خير ... ماشوفتش غير تلت اجيال العن من بعض ... كل جيل عايش دور الشهيد فداء ارض الوطن الغاليه ... كل جيل عايش دور المضحى اللى استحمل اللى محدش استحمله ... وعمل اللى محدش عمله ... كل جيل شايف ان هوه الجيل السوى اللى عارف ربنا واللى ماعملش حاجة غلط ... وان الجيل اللى قبله ساب له تركة تقيله وان الجيل اللى بعدة هوه الجيل الزباله اللى مش مقدر ولاعايزيساعد ولايعمل حاجة ...دا غير انه جيل هلاس مش بتاع مسؤليه...الجيل اللى قبلى بيقول احنا اللى استحملنا الثورة وافرازاتها وزوار الفجر والنكسه والاصلاح الزراعى ورغم كدة عملنا حرب اكتوبر .... طاب مانتوا السبب فى النكسة وانتوا اللى ماعرفتوش تحافظوا على روح اكتوبر ....وجيلى يقول احنا اللى استحملنا الانفتاح وانتفاضة الحرميه والفراخ الفاسدة والارهاب اللى وقف حالنا وعملنا معاهدة السلام ... طاب ماحنا السبب ولا الحاجات دى كلها حصلت لوحدها ولا نتيجة تصرفاتنا و افكارنا الجهنمية ؟!... الجيل الجديد بقى بيقول مانتوا سيبتولنا الديون وقله القيمه بين الدول ... ورغم كدة استحملنا ومستحملين الخصخصة والفساد واكياس الدم والتوك شو وزهرة وازواجها الخمسة ... كل جيل ضحى ياعينى ... كل جيل طاهر برىء ...والجيل اللى بعده هوه اللى ابن كلب .... التلت اجيال انانيين ... مافكروش غير فى نفسهم وبس ... مافكروش غير انهم يلهطوا على حساب ايه مش مهم ... على حساب مين برضه مش مهم ... وبكرة واللى جاى ... انشالله يولعوا بجاز وسخ ...

اربعين سنه هلفطه ...وتبادل اتهامات وتقطيع وشماته وشكوى ... ايوه هيه الشكوى دى .. الحاجة الوحيدة اللى فالحين فيها ...ليل نهار شكوى ...نعمل حاجة ..لأ... نعمل اللى علينا ..لأ... امسك الخريطة وبص ..حتلاقى كل اللى حوالينا عملوا حاجة ... احنا بس اللى قاعدين نقطع فى بعض ..ونشتغل بعض ونشتغل نفسنا بالديموقراطيه وحقوق الانسان و75375 والتسليك بين فتح وحماس والتدوير على لوحة الخشخاش والبحث عن برادعى ... اربعين سنه حصادهم .. ارض زراعية بنبنى عليها مساكن شباب المستقبل والطماطم بتسعه جنيه ........ مصانع بالعبيط والمكن والمادة الخام مش من عندنا ... نيل طويل عريض ... مش مكفينا واللى يشرب منه يجيله فشل كلوى او على الاقل تيفود ...فكروا معايا كدة .. لوالناس اللى بتدينا المكن وقطع الغيار والمادة الخام والقمح قالت مش لاعبه ... حيحصل ايه ؟ ببساطة حنموت ....!!!...

بس اللى شاطرين فيه نسقع فى اراضى ونبنى فى ابراج وكمبوند وفيلات وشاليهات ... تنفتح شهر وبقيت السنه ينعق فيها البوم والغربان ...خيبه قديمه ورثناها عن اجدادنا القدماء ... بس على الاقل اجدادنا سابوا لنا شويه حجارة بتجيب فلوس تكمل عيشتنا وياريتنا عارفين نحافظ عليها ... الا اخر ماتعبنا جبنا عمر الشريف يقولنا حافظوا ... دا على اساس يعنى انه بتاع اثار قديم من ايام فيلم بتاتس ... احنا بقى حنسيب ايه؟؟؟؟؟ ... ... شويه بيوت مهجورة فى الساحل الشمالى والسخنه والجونه ... جاتنا نيله شعب عاله عويل ... شعب متخلف عقليا وجسديا وفكريا .... وابشركوا بقى الطوفان جاى ... وبأسرع مما تتخيلوا ... ساعتها مش حتنفع الحلول الفردية ...ولا حتشفع ثقافة ياللا نفسى ... لأن ساعتها القرشين اللى فى البنك مش حينفعوا ..لأنه ببساطة مش حتلاقوا حاجة تشتروها بيهم ....و ساعتها حتتين السيغة اللى فى الدولاب برضه مش حينفوا بحاجة .... لانه برضة ببساطه مش حتلاقوا حد يشتريهم ... ولما الطوفان يجى صدقونى مش حتلاقوا حتى عيالكوا علشان تحطوهم تحت رجليكوا .

كئيب انا النهاردة ...معلش ... ماهو مش كله ضحك ضحك ... لازم يكون فيه شتيمه ... قصدى كآبه

الأحد، 3 أكتوبر 2010

مش عايز اتجوز12



العروسة الحادية عشر

يوم الخميس ...........................................................................................

..........................................................................................................

دخلت العروسة وهيه شايله الحاجة الساقعة والجاتوه .... كانت لابسة حاجة مش عارف هيه ايه بالظبط .... لاهيه بدى ولا هيه بلوزة ولاباين انه قميص ولا حتى شاكله شيرز .... وشيرز بلغة قدماء المصريين يعنى بلوفر .... دا غير الطرحة اللى لا لون ولاطعم ولا ريحة ... قولت فى نفسى : ياواد ماتخدش بالمظاهر ... عموما فيه ناس كتير ذوقها وحش فى اللبس ...بس بتبقى شخصيه كويسه وفكرهاعالى واسلوبها حلو ...العروسه من اول ماقعدت وهيه بتعدل وتلف وتشد فى الحاجة الغريبة اللى هيه لابساها ...حسيت انها عايزة تقولى : ايه رايك؟... فقولت من ورا قلبى ...شيك قوى الطقم ده عليكى ... قالت بفرح : مرسى ...انا جيبته فى التخفيض بالفين وسيعميت جنيه ... لقطه ... كان بالفين وتسعميه.....قولت : ياه مش غالى شويه .... قالت بفخر : لأ طبعا ... دا كريستيان ديور .... قولت : ودى بقى حاجة كويسه ؟!....قالت باستغراب : طبعا ... دا سينييه ... قولت : جميل ان الواحد يشترى حاجه ماركه .... قالت لى: طبعا انا مابشتريش الا الحاجات السينييه ... دا غير انى مابدخلش الا المحلات الكلاس ... يعنى مابشتريش الا من سيتى سنتر ... كارفور ... ولما بننزل اسكندريه فى الصيف باشترى من سان استيفانو مول ... سألت : يعنى انت مابتشتريش غير كريستيان ديور ... قالت : لا طبعا ... بغيير يعنى مرة ايف سان لوران ... ومرة شانيل ... وساعات بس قليله لما مابلاقيش حاجة عجبانى ... باشوف حاجات من بتاعة هانى البحيرى ... بس يعنى مش كتير ... كنت عايز اسأل مين هانى البحيرى ده ... بس طريقتها فى الكلام عنه حسستنى انه حاجة جامده ومشهور ...وماينفعش ماكونش اعرفة .... فقولت اسكت يا واد احسن لك ... قالت :على فكرة ... احنا كلنا كده ...اهم حاجة لما نشترى نشترى سينييه ... امبارح اخويا جاب طقم ديزيل روعة ... تى شيرت وبنطلون بالف وتلتميت جنيه بس ... قولت لها : بس ؟ قالت لى اه والله بس ... قولت : ماصدقش ديزل وبالف وتلتميت جنيه بس ؟ قالت : اه والله... امال يساوى كام ؟ .. قولت والله الديزيل على حسب انت نازله فين ... يعنى اللى رايح القاهرة مش زى اللى رايح اسوان ... والفرنساوى غير الاسبانى ...بصيت لى بتعجب ... مافهمتش القفشة ... بصراحة عندها حق ... قفشه مش سينييه خالص ... قالت : امال انت بتحب ماركات ايه ؟ ... قولت : والله انا مش بركز فى الماركه على قد ما بركز ان الحاجة تبقى ذوق وشيك وشكلها حلو ... قالت: غريبة دى ... فيه حد يقدر يلبس حاجة مش سينييه....قولت : يعنى ... لسه الموضوع ده ماوصلناش ... قالت : بس انا شايفه ان مامتك واختك لبسهم حلو وشيك .. باين عليه سينييه ... قولت لها : ده حقيقى ... العبايه اللى لابساها الحاجة ماركة ام سينا الخياطة ... والتيير اللى لابساه اختى ماركة عم حافظ هوزن ... العروسة بصت لى باشمئزاز وقالت : يعنى ... ماركات ماسمعتش عنها ... قولت ازاى بقى ... دى ام سينا مشهورة انها بتعمل حردة الكم ولا اجدع مقص دار ... ولا عم حافظ هوزن ... احسن من يلفق ديل جيبه فى القطر المصرى كله ... وفجأه دخل علينا اخو العروسه .. لابس تى شيرت معفن ... وبنطلون جينز زباله من الاخر ... قالى : اهلا وسهلا يا باشمهندس معلش كان المفروض اكون فى استقبالك ... بس اصلى بادور على ال سى دى ناشيونال يابانى اصلى ... بقالى اسبوع مش لاقى ... ماتعرفش الاقيه فين ... قولت له : اسألك اصل انا ماليش غير فى الكمبيوترات ...قالى : طيب ماتنساش والنبى يا باش مهندس .. قام علشان يمشى ... قومت وانا فى ايدى كاس البيبسى وفى نفس اللحظة قامت العروسة الدنيا اتلخبطت .. وكاس البيبسى وقع على التيشرت الديزل اللى بقى ماركة بيبسى .... اخو العروسة اتجن وقعد يصرخ التى شيرت التىشيرت ... وقلع التى شيرت علشان يلحق البقعة قبل ما تثبت ...اه نسيت اقولكوا على حاجه مهمه ... لما قلع التى شيرت .... كان لابس فانله داخليه ماركة المشربيه ... اه يعنى مخرمه من كل ناحيه ... وفى النص مقطوعة ضبه ومفتاح ... الموقف كان محرج للغايه ... استأذنا واحنا على السلم قولت لابو العروسه : على فكره ياحاج .... مصنع ناشيونال اليابانى الاصلى قفل من خمسه وعشرين سنه ... وفتح مصنع فى الصين ومصنع فى ماليزيا ... وبقى اسمه باناسونيك .....

مش عارف ليه حاسس كدة انكوا بتقولوا عليه انى اتعمدت انى اوقع كاس البيبسى على اخو العروسة ... صدقونى ... ماكنش قصدى ... او ماتصدقنويش

شكر خاص

فكرة

د. احمد السيد