الجمعة، 29 أكتوبر، 2010

انا بنت ناس ياناس

أنا بنت ناس يا ناس

بنت ناس حلوه .. ونغشه .. وفايقة ...ورايقة ..... ووشها منور .. وعنيها بتلمع... كانت تمشى لابسه فستانها الاخضر ... وشعرها يهفهف على ضهرها ... سعيدة فرحانة ...الكل كان بيجرى وراها ... الكل نفسة فى نظرة ولا ابتسامه ... الكل ماقدرش غير انه يحبها من بعيد لبعيد وهوه متأكد انه مش حيقدر ياخدها لنفسه ... كان قرايبها وحبايبها واهلها وصحابها.... حامينها حارسينها حبينها خايفيين عليها .... وفى يوم فى شهر فى سنه أو فى كذا سنه ... المهم فجأه كدة ...وهيه ماشيه فى حالها طلع عليها كلاب من كلاب السكك ... مش دى المشكله ... ياما طلع عليها كلاب من كلاب السكك... بس ولا كلب منهم طال منها حاجة ... كان ديما قرايبها وحبايبها واهلها وصحابها ... يحاموا عنها... وفى اخر لحظة ينقذوها ... بس اللى حصل المرة دى ... ماحدش عارف له سبب.... ولاحد فاهم لية حصل ...كلاب السكك المرة دى ....كلاب بلدى ... مش مخلطة زى كل مرة ...هجمت على البنية ... نهشوا فيها ... بهدلوها ... سلبوا منها اعز ماتملك... والغريبة ... ان القرايب والحبايب والاهل والصحاب ... سابوها .. ماجريوش زى كل مرة ينقذوها ... قالوا واحنا مالنا ... خلينا فى همومنا...الاغرب بقى ان بت الناس بعد ما أنكسرت ... واتبهدلت ... ونشفت ... وبدل الاخضر لبست الاسود ...والوش انطفى والعين بطلت تلمع .... ورغم ان مبقاش فاضل فيها حاجة تغرى ولا تشجع .... الا ان القرايب والحبايب والاهل والصحاب .... ماسابوهاش ... بقوا بينهشوا فى اللى باقى منها .... وبالدور ... وبعد كل واحد ماياخد دورة ... يطلع فارد قلوعة ويقول ... انا راجل ... انا جدع .... راجل على مين..؟ وجدع فى ايه...؟ يابن الكلب منك ليه ...اللى يرد يقولك: ماهو علشانك ... واللى يقولك : ان الاوان .. واللى يقولك: كفايه... واللى يقولك: البس التيشيرت وتعالى خد دورك ... حسبى الله ونعم الوكيل ... حسبى الله نعم الوكيل ... حسبى الله ونعم لوكيل ...والبت بعد ماكانت بت ناس ... بقت ليلها ونهارها واقفة تحت العمود فى ايدها سيجارة مستنية اللى يولعهالها.

هناك 4 تعليقات:

  1. كلام كبييييييير أوي يا باشا بس ده كله علشان السلبية اللي احنا فيها كام واحد من اللي بيتكلم يقدر ينفذ....؟ ولو يقدر بينفذ فعلا ولا .... بق في الفاضي .. ربنا يتولانا

    ردحذف
  2. لازم يكون فيه انتماء حقيقي مش كلام يملوا بيه الفضائيات وخلاص

    ردحذف
  3. احييك على الجمع بين صفة السلبية وصفة الخسة

    لان الانسان الكويس اللى مش هيطمع فى بنت بالحرام اكيد برضه هو نفس الانسان الكويس اللى مش هيتخاذل ويقول وانا مالى

    تحياتى

    ردحذف
  4. اسقااط رااائع على احوااال بلدنا الجميله
    اللى اهلها عايزين ينهشوها قبل الغرب...
    بس برضه البنت الحلوة دى هيجى عليها يوم وتتمرد على كل اللى بينهشوا فيها..وتفوق وترجع
    بنت ناس زى زمااان..ربك بيعمل المعجزااات..
    تحياتى

    ردحذف