العروسة الخامسة عشر
عم حسين الحلوانى ... عم حسين..... اللى باخد منه التورته والجاتوة وانا رايح اشوف العرايس ... فكرينة .... عم حسين خلص توضيب محل الورد وكلمنى فى التليفون وقالى : انا عرف يابنى ان يوم الخميس دايما عندك مشغول ... بس الخميس ده افتتاح المحل الجديد ونفسى تشرفنى ... قولت له : اكيد جاى ياعم حسين والعروسة بتاعة الاسبوع دة تتأجل ... هوه انت يعنى شايف لى جوازة بتتم ؟!!! .. يوم الخميس رحت الافتتاح ... محل كبير وشيك جدا ... معمول فيه شوية ديكورات روعة ...سلمت على عم حسين وباركت له... واحنا واقفين مع بعض جات بنت حلوة وشيك ووشها سمح قوى ... عطت لى علبة عصير منجه وقالت : اتفضل يا فندم ... اخدت العصير وانا عينى مانزلتش من عليها ..وقلت : شكرا... عم حسين قال : بنتى رشا ... الباشمهندس خالد ... قولت اهلا وسهلا .. تشرفنا ... عم حسين استأذن وقالى : حشوف الضيوف وارجع لك ... قولت له وانا عينى مش عارف انزلها من على رشا ... اتفضل يا حاج انا مش غريب ... قولت لرشا : على فكرة ديكورات المحل رائعه ... ياترى مين اللى عملهالكوا ... قالت لى : عجبك ؟... قولت : جدا ... قالت لى: انا .. قولت: مش معقول .. قالت : انا اتخرجت من الفنون الجميلة السنه دى و ده اول شغل ليه .. بس ياخسارة .. ماخدش فلوس ... بابا بقى ومش معقول اخد منه فلوس ... قولت : انا بقى بقالى فترة عايز اجدد ديكور مكتبى فى الشركة ومكسل .. بس بعد ماشوفت الذوق العالى ده ... ياريت توافقى وتغيرى لى ديكورات المكتب ...قالت لى : تحت امرك ....وكملنا كلامنا وافترقنا على انها تيجى لى المكتب تانى يوم علشان ترفع المقاسات ...وتشوف ايه اللى ممكن يتعمل ... روحت البيت وان فى منتهى السعادة ... بوست امى وحضنت اختى وهزرت مع ابويا ... احساس لذيذ احساس الحب من اول نظرة دة .. آه... حب ....مالكوا ... كنت غلطان لما ماكنت مش مصدق فى الحب ..وكنت غلطان لما كنت مش عايز اتجوز ... ايه المشكله يعنى ... عيل وغلط وياما العيال بتغلط ...رشا قعدت تشتغل فى ديكورات المكتب شهر كامل ... ( زى قلب كامل كده ) شهر كامل واحنا مع بعض كلنا مع بعض وشربنا مع بعض ... عرفت اخلاقها وطباعها ...عرفت اسلوبها فى الكلام والتفكير ... لقيت بينا حاجات كتير مشتركة ... وفى يوم التسليم .. قولت لها انا عايز اكلمك فى موضوع مهم .. قالت لى : اتفضل ... قولت : بصراحة كدة ومن غير مقدمات ... انا ...انا .. قالت : اتفضل قول ... قولت : بصراحة كدة وبدون مقدمات ... انا معجب جدا بيكى من ساعة ماشوفتك ... وقررت انى اتقدم لعم حسين علشان اخطبك ... رشا بيضا ... بس بعد ماقولت الكلمتين دول بقت لون الطماطم ... وقالت وهيه باصه فى الارض : الكلام دة مع بابا ... قولت لها : اكيد طبعا ...بس عايز اعرف رأيك ... قالت وهيه بتاخد الشنطه علشان تمشى : لو بابا وافق انا موافقة ... وخرجت جرى من غير سلاموا عليكوا....
طبعا حناخد معانا ايه دى كانت مشكله ... يعنى الجاتوه حيبقى من عند عم حسين ولا من محل تانى ... لغايه امى ما قالت: عندى الحل... قولت لها : قول ياجميل .. قالت : انتو ناسيين ان احنا فلاحين ولا ايه ؟ ... احنا ناخد زيارة فلاحى ... وفعلا اتصلنا بعمى اللى على طول عمل لنا جسر جوى... بط وفراخ وحمام وقشطة وزبدة ورقاق ... ويوم الخميس كنا انا والحاج وامى واختى عند عم حسين بنخطب رشا... طبعا محدش سابنا نقعد نتعرف ... يعنى لا صلاة عشا ولا تعالوا افرجكوا على الشقة ... دخلنا فى التفاصيل على طول ... اتفقنا على الشبكه والمهر والفرح والدخله ...طبعا انتوا مستنين النهايه ....والله ما انا عرف اقول لكوا ايه .. انا عارف انكوا بتتمنولى الخير ... وده اللى حصل فعلا ... اتجوزت ... انا ورشا اتجوزنا ... وعندنا دلوقتى رانا ويوسف ... وسعيد جدا فى حياتى ....عارفين احسن حاجة فى الجوازه دى ايه .؟؟؟ ان انا اتجوزت من البنت اللى كنت بأحلم بيها ... وغيرت ديكورات المكتب ببلاش ... والجاتوه والورد بتاع الفرح برضة كان ببلاش ... هوه معقوله احاسب حمايا ... دا حتى الراجل يزعل ...ههههه طبعا بأهزر ... أو مش بهزر ... فعلا ياجماعة الخير ... اللى ربنا يحبه يرزقه بالزوجة الصالحة ...الف حمد وشكر ليك يارب ... عوضت صبرى خير .
الف الف مبروك
ردحذفما هو اللي يصبر ينول و بعد البلاوي الكتير اللي شفتها كان لازم ربنا يعوضك .
مبرووووووووووووكيين تتهنوون ان شااء الله
ردحذفواخيرا كل شي ببلاش ههههه
الف مبروك
ردحذفانا اول مرة ادخل المدونة
يعنى لازم اقرأ مش عايز اتجوز كله
هروح اقراهم وارجع تانى
هههههههههه أخيرااااا
ردحذفالف مبرووووووووك
اللى يصبر ينول فعلا :)
حلوة اوى سلسلة مش عايز اتجوز
تسلم الايادى يا فندم
لولوولوليييييييييييييييييييييييييييييييييي
ردحذفلخييييييييييييرا
يارب تتهني كدا وتفضل مبسوط ديمن يارب:)
واتاااااااااااااااري
عم حسين دا....
:)))))))))))))))
ربنا يسهلك اللي فيه الخير ديمن
هههههههههه
ردحذفشفت قولتلك اصبر
واخر من يصبر ينول
ما عندكش عروسه كده لابنى
هههههههههههه
الف مبروووووووووووك
تحياتى
الف مبروووك
ردحذفوده كان راى من الاول...لازم يكون فى حب علشان الحياة صعبه جدا من غيره...
وازمات الحياة كتيرة ومش بتخلص ..لازم يكون الطرفين مستعدين يضحوا علشان بعض..وده مايجيش الا بالحب وبس...
الف مبرووك مرة تانيه
وانا كمان عندى رانا على فكرة...
تحياتى
الف مبرووووووووووووك يا خالد ريتربو في عزك
ردحذفبس احنا عايزين حاجة مهمة جدا يا دكتور
سلسلة مدونات خالد بعد الجواز ّّّّ!!!!!!
مبرووووووك يا خالد
ردحذفبجد نهاية جميلة جدا جدا
ربنا يسعدكم يارب
ونشوف يومياتك بعد الجواز