الثلاثاء، 12 أكتوبر 2010

عدو الديموقراطيه

عدو الديموقراطيه

باين كدة ان الخضوع والاستكانه والذل دى حاجة قديمه جوانا...او صفه وراثيه سايدة من ايام الملك نارمر موحد القطرين .... مين السبب بقى نارمر ولا امنحتب مش دى القضيه ... القضيه انه اتغرس وعشش جوانا ان احنا حاجة .. شىء ... بتاعه كده ملهاش لازمه ..وصدقنا ...هما بقى اللى خلونا نصدق ولا احنا اللى صدقنا ...برضه مش دى القضيه ... المهم ان احنا متأكدين بينا وبين نفسنا ان احنا ماننفعش ... وان احنا مش قدهم ... وان احنا وحشين ... ونتيجة للاحساس القاتل بالدونيه ده ...واللى احنا طبعا مش من بينه ... علشان نضحك على اللى قدمنا وعلى نفسنا ونعيش ....ومش قادرين طبعا من الغم والهم اللى راكبنا ...او اللى احنا مركبينه لنفسنا ...بقينا بندور على الموت علشان نرتاح .... بقت محاولاتنا الانتحاريه كتير قوى.... اى نعم مش محاولات صريحة يعنى مابنقفش على سور البلكونه ونرمى نفسنا ... لا ... ماتقلقوش شويه وحتحصل , ... الانتحار دلوقتى بقى رمزى ... نرهق نفسنا زيادة على اللزوم ونسهر للفجر ومانامش ساعتين تلاته فى اليوم ... نسوق بسرعة وتهور ومانغيرش زيت الفرامل ... ناكل كبدة على عربية تحت الكوبرى جنب كوم الزباله ....نديها حشيش وبانجو وابو صليبه وعين الكتكوت ...وبالمره فرصة للتانين يقولوا علينا ان احنا مابنفهمش ومابنعرفش ومابنمشيش غير كدة... بالكرباج ....ما احنا اجداد عبد الصمد ... ويحملونا احساس الذنب ... مش مقدرين تعبنا معاكوا ... ايه قله الوفاء والغدر دة ... فنخضع ذيادة وهما يدوسوا زيادة ..ونخاف نطالب بحقنا فى العيشة الادميه ... اصل مانتش عارف ...احنا مش قدهم ... هما الاقوى .. هما اللى يقدروا يبهدلونا ... اهدى كده وخد حقك بايدك ... بسيطة ... ماتشتغلش ,,, شنع عليهم... قول عليهم نكت ... اشتغلهم .. ظبطهم ... ريحهم ... هوة يديك وعود كدابه وانت اديله الولاء والطاعة ... كدة وكدة يعنى ... من الاخر قللبه ... خليك ناصح خليك فهلوى ... واتحول الكذب والخداع جزء من نسيج الامه ... ومباقيناش نكدب بس على اللى فوق ... بقينا بنكدب فى كل حاجه... فى الحب والجواز والبيع والشرا والكورة والصحوبيه وحتى الدين بقينا نكدب فيه ونقول اللى يراضى المسئول... وياعينى ياعينى...... ياعينى على الوله ... ابو نيه طيبه لو ماكدبش وماخدعش ... حيتدمر ماديا ومعنويا ياولداه... فلوسه حتضيع ... وحيقولوا عليه العبيط اهوه العبيط اهوه ... ... فاكرينها شطارة ... مش عارفين انها احساس بالدونيه وقله الحيله ومركبات نقص ... ليل نهار بنحاول نخفيها بضرب النسوان وشتم العيال وتشريط كراسى القطر بالموس ... وانتظار الفرج .. انتظار المخلص ... هركليز اللى حيخلصنا من الهم... ويرجع لينا كرامتنا وانسانيتنا ... ويحسسنا بالامان فى بكرة ...ويرجع لينا الوطن.... بنطلب المخلص واحنا مش واخدين بالنا ان احنا بنطلب الزعيم الفرد ....برضه الزعيم اللى حنفرعنه باسلوبنا ووانقيادنا ورعبنا ...واللى بعد شويه حيذلنا ... ونبدأ نشتكى ونقول احنا مابقلناش معنى ... ان احنا بقينا حاجة كدة مش عارف ايه هيه ... ونبدأ سلسله القهر من تانى ... ونرجع البيت نطلع غلنا فى العيال وكرسى القطر الغلبان... احنا اللى مش عايزين ديموقراطيه ... احنا خدنا على كدة ... احنا بنحب الذل ... ماتجيبوش الذنب بقى على حد ...واوعوا تفتكروا ان اللى جاى حيكون احسن ... اه ....... عمركوا شوفتوا يأس كده قبل كدة ...بس هوه ده علامة القهر والاحساس بالدونيه والاتكاليه والتخلف .... اييييييييه هو انا مش مصرى ولا اييييييييه ....دا انا مصرى وابويا مصرى... زرغتى ياوليه دى نانسى بتغنيلى!!!!!!!!!!!!!!!!!!!!!!!!!!!!!!!!!!!!!!!!!!!!!!!

هناك 5 تعليقات:

  1. يعنى البرد قافش فى نافوخي وظهري قافش عليا

    قوم تيجى انت تقفش فى معنوياتي؟؟

    ايه الظلم ده يا ناس

    عموما لو كنا احنا كده فهما الى عملونا كده

    باقولك ايه مسكنى اجهزة الاعلام سنتين وانا اظبطلك الشعب ده

    ايوه الاعلام بس واراهنك

    اصل احنا زي ما احنا صفاره تلمنا وعصايه تهشنا

    مسكنى الصفاره ونشوف

    ردحذف
  2. مش نانسى بس

    ولا الخبر لسه ما وصلكش

    داليدا وصباح

    وكل من خطئ على ابواب الفن


    بس عندك حق كتير


    باين كدة ان الخضوع والاستكانه والذل دى حاجة قديمه جوانا...او صفه وراثيه سايدة من ايام الملك نارمر موحد القطرين .... مين السبب بقى نارمر ولا امنحتب مش دى القضيه ... القضيه انه اتغرس وعشش جوانا

    ااقول كمان لا كفايه احباط

    خلينا نسمع نانسى وننسى شويه

    ابقى زورنى

    فيه فى مدونتى شاى قهوه نسكفيه

    صباح نانسى وكل اللى نفسك فيه

    تحياتى

    ردحذف
  3. اهو كلو بيغني علينا علشان مصلحتو وبس
    واحنا ولا احنا هنا
    وكلهم بينسوا
    ان الله لايغير مابقوم حتي يغيروا مابأنفسهم

    ردحذف
  4. للرد على حرق القرأن

    http://elmsryklyom.blogspot.com/

    ردحذف
  5. البوست ده صعب جدا ويااائس اخر حاجه الحقيقه
    انا معاك ان اللى بيحصل فى البلد مهزله بس قدرتنا على التعايش بالطريقة دى مهزلة اكبر..
    واكيد مش باليأس هنحل المشاكل واكيد اكيد مش بالغنى بتاع نانسى وهيفاا...
    ودايما فى امل ان بكرة احسن من النهارده..
    خلى عندك امل فى ربنا..
    مافيش حد اكبر ولا اكرم من ربنا..
    الله اكبر..وحسبى الله ونعم الوكيل..
    تحياتى

    ردحذف