الاثنين، 4 أكتوبر، 2010

ولا أبرأ نفسى

ولا ابرأ نفسى

سامحونى فى حاله الكآبه والتعميم اللى حتكلم بيها ... لانى بصراحه لغاية دلوقتى ماشوفتش استثناء واحد يوحد ربنا يقول ان اللى جاى فيه خير ... ماشوفتش غير تلت اجيال العن من بعض ... كل جيل عايش دور الشهيد فداء ارض الوطن الغاليه ... كل جيل عايش دور المضحى اللى استحمل اللى محدش استحمله ... وعمل اللى محدش عمله ... كل جيل شايف ان هوه الجيل السوى اللى عارف ربنا واللى ماعملش حاجة غلط ... وان الجيل اللى قبله ساب له تركة تقيله وان الجيل اللى بعدة هوه الجيل الزباله اللى مش مقدر ولاعايزيساعد ولايعمل حاجة ...دا غير انه جيل هلاس مش بتاع مسؤليه...الجيل اللى قبلى بيقول احنا اللى استحملنا الثورة وافرازاتها وزوار الفجر والنكسه والاصلاح الزراعى ورغم كدة عملنا حرب اكتوبر .... طاب مانتوا السبب فى النكسة وانتوا اللى ماعرفتوش تحافظوا على روح اكتوبر ....وجيلى يقول احنا اللى استحملنا الانفتاح وانتفاضة الحرميه والفراخ الفاسدة والارهاب اللى وقف حالنا وعملنا معاهدة السلام ... طاب ماحنا السبب ولا الحاجات دى كلها حصلت لوحدها ولا نتيجة تصرفاتنا و افكارنا الجهنمية ؟!... الجيل الجديد بقى بيقول مانتوا سيبتولنا الديون وقله القيمه بين الدول ... ورغم كدة استحملنا ومستحملين الخصخصة والفساد واكياس الدم والتوك شو وزهرة وازواجها الخمسة ... كل جيل ضحى ياعينى ... كل جيل طاهر برىء ...والجيل اللى بعده هوه اللى ابن كلب .... التلت اجيال انانيين ... مافكروش غير فى نفسهم وبس ... مافكروش غير انهم يلهطوا على حساب ايه مش مهم ... على حساب مين برضه مش مهم ... وبكرة واللى جاى ... انشالله يولعوا بجاز وسخ ...

اربعين سنه هلفطه ...وتبادل اتهامات وتقطيع وشماته وشكوى ... ايوه هيه الشكوى دى .. الحاجة الوحيدة اللى فالحين فيها ...ليل نهار شكوى ...نعمل حاجة ..لأ... نعمل اللى علينا ..لأ... امسك الخريطة وبص ..حتلاقى كل اللى حوالينا عملوا حاجة ... احنا بس اللى قاعدين نقطع فى بعض ..ونشتغل بعض ونشتغل نفسنا بالديموقراطيه وحقوق الانسان و75375 والتسليك بين فتح وحماس والتدوير على لوحة الخشخاش والبحث عن برادعى ... اربعين سنه حصادهم .. ارض زراعية بنبنى عليها مساكن شباب المستقبل والطماطم بتسعه جنيه ........ مصانع بالعبيط والمكن والمادة الخام مش من عندنا ... نيل طويل عريض ... مش مكفينا واللى يشرب منه يجيله فشل كلوى او على الاقل تيفود ...فكروا معايا كدة .. لوالناس اللى بتدينا المكن وقطع الغيار والمادة الخام والقمح قالت مش لاعبه ... حيحصل ايه ؟ ببساطة حنموت ....!!!...

بس اللى شاطرين فيه نسقع فى اراضى ونبنى فى ابراج وكمبوند وفيلات وشاليهات ... تنفتح شهر وبقيت السنه ينعق فيها البوم والغربان ...خيبه قديمه ورثناها عن اجدادنا القدماء ... بس على الاقل اجدادنا سابوا لنا شويه حجارة بتجيب فلوس تكمل عيشتنا وياريتنا عارفين نحافظ عليها ... الا اخر ماتعبنا جبنا عمر الشريف يقولنا حافظوا ... دا على اساس يعنى انه بتاع اثار قديم من ايام فيلم بتاتس ... احنا بقى حنسيب ايه؟؟؟؟؟ ... ... شويه بيوت مهجورة فى الساحل الشمالى والسخنه والجونه ... جاتنا نيله شعب عاله عويل ... شعب متخلف عقليا وجسديا وفكريا .... وابشركوا بقى الطوفان جاى ... وبأسرع مما تتخيلوا ... ساعتها مش حتنفع الحلول الفردية ...ولا حتشفع ثقافة ياللا نفسى ... لأن ساعتها القرشين اللى فى البنك مش حينفعوا ..لأنه ببساطة مش حتلاقوا حاجة تشتروها بيهم ....و ساعتها حتتين السيغة اللى فى الدولاب برضه مش حينفوا بحاجة .... لانه برضة ببساطه مش حتلاقوا حد يشتريهم ... ولما الطوفان يجى صدقونى مش حتلاقوا حتى عيالكوا علشان تحطوهم تحت رجليكوا .

كئيب انا النهاردة ...معلش ... ماهو مش كله ضحك ضحك ... لازم يكون فيه شتيمه ... قصدى كآبه

هناك 4 تعليقات:

  1. طيب
    ها
    يعني لا ها ينفع مال
    ولا دهب
    ولا عيال
    خلاص
    لا إله إلا الله تنفعنا
    وقولة حق والكل خايف وبيترعش حتى من خلف شاشات تنفع ان شاء الله
    ومساعدة اللي نقدر نساعدهم تنفع ان شاء الله
    وتوبة عن بلاوينا الظاهرة والباطنة تنفع ان شاء الله
    ومقاومة الفساد الحياتي اليومي قدر استطاعتنا تنفع ان شاء الله
    والأمل الذي لا ينقطع في روح ورحمة الله تنفع ان شاء الله

    ردحذف
  2. مش عارفه ااقولك ايه الحقيقه...
    انت النهارده كلامك بيوجع قوى خصوصا انه حقيقى جدا...للاسف انا مش من النوع الوطنى قوى اللى هيقوم ويدافع ويقول المصريين اهمه...واحنا عملنا وسوينا ولينا انجازات وكل الكلام اللى لايودى ولا يجيب...بس الحقيقه الواضحه جدا هى ان كلنا عندنا دايما أمل فى ربنا ...انه ان شاء الله هيكون بكرة احسن من امبارح...حتى لو بكرة جه أسوأ من النهارده...بنقول الحمد لله قضى اخف من قضى...ودى نعمه من عند ربنا...بينعم بيها على الناس الغلابه اللى زى حلاتنا...
    اما بالنسبه للفلوس ولا السيغه اللى مش هتنفع لما الطوفان يجى...فأكيد أكيد كلمة ربنا يستر هى اللى هاتنفع...والأحلى منها هى ( حسبى الله ونعم الوكيل )..
    تحياتى

    ردحذف
  3. لييييييييييييييه كده لييييييييييه

    ما تسبوني ساااكته
    يعنى اتكلم بقى ويبقى موت وخراب ديار ولاايه

    يا دوك قلتلك انا كام مره المراره ما بتسيبش حلقي من المناظر حواليا

    كل حاجه باظت
    كل حاجه غلط
    كل حاجه عايزي يتولع فهيا بجاز

    الحكومه الشعب الشوارع البلدكلها

    بس خد بالك
    فيه حلول

    وممكن والله العظيم ممكن

    بس هما مش فاضيين
    توقع الاسواء فى الايام القادمه
    الاسوأ جدا

    لكن فى النهايه لنا ربنا ونقول يااااااااااااااارب

    والنبى ما عرفت اقولك بلاش تكتئب اصل انا اساسا مكتئبه

    ردحذف
  4. مصر فى مهب الريح

    فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة – The Culture of Defeat – بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

    1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
    2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
    3- مشكلة تعمير مصر والتى يعيش سكانها على 4% من مساحتها.
    4 – العدالة الاجتماعية .. وأطفال الشوارع والذين يملكون كل شىء .
    5 – ضرورة الاتحاد مع السودان لتوفير الغذاء وحماية الأمن القومى المصرى.
    6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

    أرجو من كل من يقرأ هذا أن يزور مقالات ثقافة الهزيمة بالموقع التالى www.ouregypt.us

    ردحذف