الجمعة، 13 سبتمبر 2013

ابن حرام .... بس شرعى

ابن حرام .... بس شرعى

زمان كان مفهوم ابن الحرام عند المجتمع ... هوه الواد اللى مايعرفلهوش اب ... اللى بيلاقوه على باب الجامع او على باب الملجأ او على سرير المستشفى بعد ماتهرب امه أول ماتفوق من البنج .
وزمان لما كنا بنسمع كلمة ابن الحرام كان بيجى فى دماغنا على طول ... الدنيا وهيه ضلمة كحل ... اوالشوارع فاضية والسما بترخ والبرق منور الدنيا والرعد صوته فى صدرنا والشباك بينفتح من الهوا والازاز بيتكسر ...وتلاقى شوية كلمات بتترعش على لساننا من عينة ... الشيطان ... الكبريت جنب البنزبن ... ربنا يستر على ولايانا ... استغفر الله العظيم ... ماهى كبيرة .. زنا والعياذ بالله .
القصد ... رغم ان ابن الحرام مالهوش اى ذنب فى ان ابوه وامه عاشوا لحظة ضعف كان الشيطان فيها شاطر نساهم ربنا فزنوا ... الا انه ياولداه بن الحرام ده هوه اللى بيشيل الزباله كلها ... وفى أى مكان عايش فيه ... فى الملجأ .. عند ابن الحلال اللى خده يربيه علشان يكسب فيه ثواب ... او فى مجتمع تحت الكوبرى والاشارات ... بيعيش ابن الحرام مطارد ... مكتوب على ضهرة : ابن الحرام مخلاش لابن الحلال حاجة ... طاب يعنى هوه ابن الحلال كان عطاله حاجة بنفس راضية ؟! ... مكتوب على ضهره: العشرة ماتهونش غير على ابن الحرام ... طاب هوه شاف منكوا ايه غير الذل والاهانه والمعايرة والنبذ والطرد على ذنب هوه ماعملهوش ... وعايزينه كمان يحافظ على العشرة ... دا ايه البجاحة دى ؟؟!! .. مكتوب على ضهره : ابن الحرام يا قواس يا مكاس ... يعنى ابن الحرام يا يطلع مخبر يا بيلم الضرايب ...ماهو من اللى شافه منكوا ياولاد ال ...
عموما انا شايف ان ابن الحرام اللى مالهوش اب ممكن يكون ليه عذر انه يخون وينصب ويغدر ويبيع ناسه ويبقى عدو للمجتمع اللى لفظة ... ماهو ملقاش اللى يحضنة ويربيه وياخد باله منه وماشافش من صغرة غير الذل والاهانه والمرمطة .
لكن ايه بقى عذر ابن الحرام الشرعى  اللى ابوه الشريف كتب على امه العفيفة بقسيمة عند مأذون واتنين شهود وفرح وتورته واسماء الله الحسنى ...وهاتى بوسه يابت ؟ ايه عذر ابن الحرام الشرعى اللى اتعمل له سبوع وطلع لقى له سرير ومكتب ومدرسة ونادى ولبس عيد ... اللى له تيتا وجدو وانكل وطنط بيجيبوله شيبسى وشيكولاته وكانز ...؟
حد يقدر يفهمنى عذرة ايه ابن الحرام الشرعى ده انه ينصب ويغدر ويخون ويبيع بلدة وناسه ؟  عذرة ايه علشان يقتل ويفجر ويقطع طريق ..؟
سؤال للتفكير :

هوه يعنى ايه حرام من اصله فى الايام الوسخة اللى احنا عايشينها دى ؟