الثلاثاء، 30 نوفمبر 2010

بس خلاص

بس خلاص

I am highly demotivated

بس خلاص

الأحد، 28 نوفمبر 2010

ناس بتحب مصر 4

ناس بتحب مصر 4

شوفنا مع بعض افرازات الحزب الوطنى ... ومنتجات الاخوان المسلمين ... فاضل المستقلين والوفد والتجمع ... الوقت ما اسعفنيش علشان اشوف حد من المستقلين ... وكل اللى اعرفة عن الوفديين .. ان مرشحهم سلم عليه وانا قاعد على القهوة وقالى: نفسك معانا ياباشا ... على فكرة القهوة اللى باقعد عليها فى اخر بلاد المسلمين .... فى شارع ساكت .. وكل زوارها مايكملوش عدد صوابع الايد الواحدة ... بعد ما مرشح الوفد مشى ... جه صبى القهوه وحط صينية الشاى وسألنى : هوه الراجل ده ايه اللى جابه من هنا ؟ دا الشارع فاضى ... قولت تلاقية مابيحبش الزحمة ... القصد امبارح بقى حضرت مؤتمر المهيطل ... قصدى مؤتمر حزب التجمع الوحدوى .... افقر مؤتمر شفته ... الغلبان حيفضل غلبان ياولداه ومالوش حظ فى البلد دى ... صوان... ومايزيدش عن عشرين كرسى ... والناس الغلابة ... الصنايعية .. والمهمشين ... والعشوائيين ... مترصصين على الرصيف وساندين على العمود ... والمهيطل اللى المفروض مرشح نفسة ... قاعد على كرسى ورا الصيوان ... بيرتعش مش عارف حيقول ايه لما يقدموة ويطلع يتكلم ... اللى قاعدين على المنصة بقى ... محامى مفوه ... وطبييب من بتوع المراكز الطبية والجوامع ... قام المحامى شتم أبو أم الى خلف جد جدود حسنى مبارك ... وسأل سؤال واحد بس مهم: هوه جمال مبارك العاطل ده ... بيصرف منين بروح والدته؟ .. وقدم الطبيب العبقرى اللى زى معظم اطباء مصر... المعلم فيهم معاه اعدادية... وانا معاشرهم من عشرين سنه ...يعنى انا عارف انا بقول ايه ... وبدأ الكلام : حاحكيلكوا سيناريوهات الرعب اللى بيقدمهالنا الحزب الوطنى ... اول سيناريو كان 2005 لما قالوا لنا فية انفلوانزا الطيور ... الفرة اللى طول عمرنا نسمع عليها ... طول عمرنا والفرة بتيجى للفراخ ... ايه اللى حصل يعنى ... خربوا بيت الناس ما عدا معارفهم وناسهم ... كانوا بيبلغوهم بميعاد حملات التفتيش ... ويقولولهم خبوا الفراخ فى اودة النوم ... ودة اللى خلى نسبة الاصابه تزيد فى الاطفال ..( دا على اساس ان مافيش حد بينام فى اود النوم غير العيال الصغيرة )... وجه السيناريو التانى ... انفلونزا الخنازير ... الخنزير اللى لولاه ماكناش عملنا الانسولين .. والناس اللى عندها سكر كانت ماتت ...( مايعرفش ان الانسولين دلوقتى بيتعمل بالهندسة الوراثيه ) ....الطخينة بقى ..... واتخلصوا من الخنزير المصرى الغلبان ... الخنزير المصرى اللى كان بيخلصنا من الزباله ... واديكوا شايقين الزباله شكلها ايه فى الشوارع ... السياح دلوقتى بتصور جبال الزباله بعد ما كانت بتصور الاهرامات .... مش قولتلكوا انا معاشرهم من عشرين سنه ....

وانهارت اخر قلاع المدافعين عن الغلابة ... اللى لسه ماحدش قالهم ان الاشتراكية خلصت من العالم ....

انا لسه عند على كلمتى ... حأرشح سبونج بوب (فئات) ... وجيمى نيترون (عمال وفلاحين ) اما مقعد المرأة..... هانا مونتانا ...

ملحوظة مهمة : الا هوه فين البرادعى ... خير اللهم اجعله خير ... حد يقوله ياجماعة يلحق موسم الشتا ... الاشغال فى فنادق شارم والاقصر واسوان بقت 100% وكدة مش حيلاقى جناح فاضى ... وحيروح منه الموسم ... وبعدين الاسرة الكريمة تزعل منه ... و يرجع يقول ان حسنى هوه السبب .. ماهى بقت موضة اليومين دول ... فاضل اللى يجيله امساك ... يقول ان حسنى اللى شار عليه ... ممكن يكون حسنى فية البدع ... بس زمان قالوا : اللى يقول لمراته يا عورة ... الناس تلعب بيها الكورة ... انا رافض اللى بيعمله حسنى ... وبرضة رافض اللى بيتعمل فى حسنى لان ببساطة شئنا ام ابينا الراجل ده رمز مصر ... واهانته اهانه لمصر ... وانا بحب مصر... والله بحب مصر بجد

تتظبط ازاى دى ؟؟!!!

الجمعة، 26 نوفمبر 2010

سيناريو حلم

سيناريو حلم

مشهد رقم 1

نهارخارجى

الشعب يتجة الى صناديق الانتخابات للادلاء بصوته واختيار اعضاء مجلس الامه ... الاحداث تمر فى هدوء ... الشرطة لا تتدخل ... والامن المركزى لابس اخضر فى اخضر وكل عسكرى ماسك وردة ...

مشهد رقم 2

ليل داخلى

يتم فرز الصناديق تحت سمع وبصر الجميع ... الجمعيات الاهلية ... جمعيات حقوق الانسان ..المراسلين الاجانب ... الفضائيات ... وكارفور ...

مشهد رقم 3

نهارداخلى

اعلان النتائج ونجاح الحزب الديموقراطى بستين فى المية ... ودخول الرفقاء وحزب العهد وحزب بكرة و المستقلين المجلس ... وكله مرضى ومبسوط ....وبيمنى نفسه بقرارات علاج الاورام

مشهد رقم 4

نهار داخلى وخارجى وليل داخلى وخارجى

الاصليين اهمه ... شفافية وديموقراطية وهمه ... الاصل هيه السيادة ... من غير مراقبين اجانب ...

ولاول مرة من غير تزوير زى ما وعدنا ... جزر القمر تشيد بنزاهةانتخابات ممكلة الاصل ... الصحافة الفرنسية تتمنى لفرنسا انتخابات نزية كانتخابات مملكة الاصل ... فلفل شطة ... وبن مطحون يا امريكانى يا ملعون ....

مشهد رقم 5

نهار داخلى

اجتماعات مجلس الامه ... وقوانين غير ذات اهميه ... وسيد قراره واخته حمرة الخجل هانم

وطلبات احاطة مؤجلة .. والعودة الى جدول الاعمال ... والدخول للمجلس بعد قلع الجزم برة ...

مشهد 6

نهار داخلى

شوية لخبطة وهيصه وظمبليطة ... مفتعله اوغير مفتعله ....تؤدى الى المطالبه بحل مجلس الامه ... والدعوه الى الانتخابات من جديد ... الحق حق ... ومانسكوتش على عبحق لوكان غلطان ...

مشهد 7

نهار داخلى

قرار ملكى بحل مجلس الامه ....ونبدأ من جديد بكل انواع الشفافية القديمة ... والديموقراطية المعروفة.... وياسلام بقى مع ملك جديد ... وعلى النخله بلح زغلول بيقول : مافيش فايدة ... دا كان بس علشان النفوس تهدى ....واتدلعى يا متطلقة ...لولولولوى

لقيت بنتى بتهزنى وبتصحينى وبتقول لى با با ... با با ... قوم بقى انت مش قولت انك حتوصلنى المدرسة النهاردة ... قومت ... وحمدت ربنا انه حلم ... بس حلم صايع قوى وذكى جدا ... الا ممكن يتحقق؟؟؟

الأربعاء، 24 نوفمبر 2010

الاشارة السبب ياضنايا



الاشارة السبب ياضنايا

كان فيه فيلم قديم اسمة الحرام... بطولة فاتن حمامة ...عن قصة للدكتور يوسف ادريس ... قصة من اروع القصص اللى بتبين يعنى ايه القهر بتاع ابوه ... سبب المشكلة اللى حصلت لفاتن حمامه فى الفيلم ...كان جدر بطاطا نفسها راحت له ... وكان تمنه اغلى تمن ممكن يندفع فى جدر بطاطا ... كان التمن شرفها ... وكان السبب جدر البطاطا ... كانت طول الفيلم بتكرر جملة : جدر البطاطا السبب يا ضنايا ... انا بقى استلفت الجمله دى وخليتها الاشارة السبب يا ضنايا ... لان طول ما انت واقف فى الاشارة بتحاول تسلى نفسك ... فبتقرا اسامى المحلات ...الاعلانات ... بتتفرج على الرايح واللى جاى ...ولاننا فى ايام انتخابات ...فبتتفرج على يفط المرشحين ... وربنا مايوريكوا.... واحد مستقل كاتب : قوم الصبح واغسل وشك ...عمر فلان ما حيغشك ... اعلان تانى بتاع الحزب الوطنى بيقول : علشان خاطر تتطمن على ضناك ... وكاتب شوية بنود كدة هية برنامج الحزب الانتخابى ...منهم بند حلو قوى ...بيقول : تحسين مستوى العيش البلدى ... طاب يا اخى قول حنخليه عيش فينو ... يعنى بقالك تلاتين سنة بمؤسساتك ووزراتك ومستشارينك ولجنة سياساتك ..ومش عارفين تحسنوا الرغيف البلدى ... وحطينه فى الخطة الخمسية الجديدة .....يافطة تانيه بس روعة ... مرشحكم اللواء فلان الفلانى ..(لواء امن دوله بالمعاش .... هه لواء امن دوله يعنى موظف حكومة ...) مرشح الحزب الوطنى .... عمال وفلاحين ... يبقى اكيد محمد ابو سويلم مرشح نفسه فئات ....استغبيت نفسى وقولت ايه العبط دة... ما سيادة اللواء حاطط صورة وهوه لابس جلابية وطاقيه ... يبقى صح الراجل دة عمال وفلاحين ... دايما انا كدة ظالم ومفترى ...اخر واحدة بقى قبل الاشارة ماتفتح ... صورة احد الوزراء بس مرشح نفسة فئات ... وزير فى حكومة الحزب مرشح نفسة فى انتخابات مجلس الشعب اللى وظيفته محاسبة الحكومة ... وطبعا طلعت برضة ظالم ومفترى ... هوه مش بيقولك حاسبوا انفسكم قبل ان تحاسبوا ... الوزير حيعمل كده ... ايه المشكله ... الاشارة فتحت .. ومشيت .... العيب مش فى اليفط العيب فى الاشارة اللى بتجيب الضغط والسكر والهلاوس ...

الثلاثاء، 23 نوفمبر 2010

رد على تعليق مدونة ما كفاية بقى


( الحقيقة لها الف وجه )

شكل مصر من برة يدى على حضارة وتقدم ...مؤسسات وكمبيوترات واتصالات ونت وهيومن ريسورس ... بس مش دى الحقيقة ... الواقع بيقول غير كدة.. الواقع بيقول ان مصر عبارة عن شوية بطون وقبائل وشلل وطوائف ... دول صغيرة جنب بعض بس مش وطن كبير يلم ... المشكله ان كله شله بقت تلم نفسها والزبون اللى يخش فيها ... يسيب عقله وفكرة وذاته برة قبل مايدخل ... ويتحول الى مسخ ينفذ ويسمع الكلام ويوافق ... مافيش حوار مافيش اسئلة .. .. اى فكرة جديدة بدعة .. اى تطرير ضلاله ....حاضر وبس ... الشله او القبيلة وزعيمها هما اللى عارفين كل حاجة .. الانتماء ليهم ...الولاء ليهم ... ويدوب الزبون ....والهنا كل الهنا للى يسمع الكلام ومايجادلش وينفذ .. والويل والثبور وعظائم الامور لكل من تسول له نفسه ان يقول رأيه ..... الشله وزعيمها هما الطيبين الحنينين المثالين اللى بيحبوا البلد وعايزين مصلحتها ... لكن اللى برة الشله دول ... الشريرين الوحشين الحراميه النصابين اللى عايزين يخربوا البلد...تعصب واسقاطات وصراعات وتخلف وقصور فى الفكر حيودينا لحروب وهميه دونكيشوطيه.... الكسبان فيها خسران والخسران فيها ندمان ...

كل مصر كدة ... الاخوان كدة ... الحزب الوطنى كدة ... الوفد كدة ... مديرية الرى كدة ... الجيران كدة ... انا لما بهاجم مش بهاجم الاخوان ولا الحزب ولا مديرية الطب البيطرى ... انا بهاجم تصرفات بأشوفها وبأحكم على عقلانيتها ومنهجيتها اى كان بقى مين صاحب التصرفات دى ... وحتى لو غلطت فى الاخوان المسلمين فدة لا يستدعى ان اعفر وجهى فى التراب ندما على الكبيرة التى وقعت فيها والجرم القبيح الذى ارتكبته فى اولياء الله الصالحين ...

خلاصة وجهة النظر ... اننى حر لا انتمى لاى شله اوقبيله او طائفة ... وانما انتمى الى مصر ... اللى مش حيتصلح حالها الا لما الشلل والقبائل المتناحرة اللى فيها .. تحط ايديها فى ايد بعضها وتقرب وجهات النظر لما فية مصلحة البلاد والعباد ... وليس مصلحة الشلل والقبائل ...بدال ماهم مقطعين البلد جزل.. جزل ... خلت الكلاب اللى برة يريلوا عليها ... يارب اكون عرفت اوصل وجهة نظرى ... ووالله انا مسلم وموحد ربنا وعارف رسوله ومبجل اهل بيته وخصوصا سيدنا حمزة سيد الشهداء خصوصا انه شهيد فى سبيل الاسلام فى حرب ضد الكفار ... مش شهيد فى سبيل القبيلة ضد اخواته وولاد عمه ....

ناس بتحب مصر3

ناس بتحب مصر3

بعد مارجعت من الشغل اتغديت وقعدت اتفرج على نيكلوديان ... بصراحة الواد سبونج بوب دة تحفه ... بيعمل حاجات غريبة ...المهم مراتى كانت مختفية ... ماعرفش كانت بتعمل ايه ... وفجأة لقيتها داخله عليه ومعاها فنجان قهوة بوش سمك 3سم ... وقالت :انا حسيت كدة ان نفسك فى فنجان قهوه ...طبعا شكرتها من كل قلبى ... وقلت اد ايه ماقدرش اعيش من غيرها ... وانى لايمكن استغنى عنها .. وانا فى بالى مستنى الطلب اللى حتطلبة منى ... ماهو كله بتمنه .... مراتى طيبة بتقول على طول ... وفعلا بعد اول شفطة قالت : انا عملتلكوا كيكة علشان تفطروا بيها ...قولت :تسلم ايديك .. هيه ياللا قولى... طبعا ده فى بالى قالت :والنبى وانت نازل باليل تاخد حتتين كيكة توديهم لماما .... قولت : لحماتى؟؟ ... من عنية ...هوه انا ليه غير حماتى ... ياسيدى ... عديها ...ماهو مافيش حاجة لله اليومين دول ... وبعدين اذا كان مشوار حماتى تمنه فنجان قهوه من ابو وش 3سم ..يبقى حلو ... مربحة يعنى .... القصد ماطولش عليكوا ... خدت العلبة ورحت لحماتى .... وعلى اول شارع حماتى لقيت 3عربيات امن مركزى .. .. عربية مطافى ... عربية غريبة كدة مكتوب عليها ادارة المفرقعات... وظباط بقى.. ونجوم على الكتاف ...ونسور ...وسيوف .. جو من بتاع الحرب .. مش ناقصه غير دبابتن ... قربت شويه وفهمت ... مؤتمر شعبى للاخوان ...وهتافات تجلجل المكان .... الاسلام هوه الحل ... واللى يزور ايدة تنشل.... الاسلام هوه الحل ... واللى يزور ايدة تنشل....الله اكبر ولله الحمد ..وصلت لحماتى بالعافية ... دخلت ... وكالعادة قست لها الضغط ... وكالعادة قولت لها عالى شويه ياست الكل .. بطلى حوادق ... وكالعادة قالت لى: هوة انا باكل مخلل خالص ... وبعدين ما انا ماشية على الدوا ...وكالعادة قولت لها: الحوادق مش بس مخلل ... خفى من الملح فى الاكل ... وكالعادة قالت : ياخويا ... خليها على الله ... وسمعت هيصة جامدة ...وهتافات هزت البيت ... طلعت البلكونة لقيت الاخت مرشحة الاخوان والاخ مرشح الاخوان وصلوا ... جبت كرسى وقولت اسمع هما بيقولوا ايه ... وبدأ اللقاء بالهتاف المشهور بتاع الاخوان .. الاسلام ديننا .. والقرآن دستورنا .. والموت فى سبيل اللى اسمى امانينا ... وبدأ المقدم كلامة ببسم الله الرحمن الرحيم ... والصلاة والسلام على اشرف المرسلين .... وتحيه لحمزة سيد الشهداء ..... (طاب لزمته ايه هنا سيرة حمزة سيد الشهداء ... ضربتها فى دماغى ...ملقتلهاش حل ... قولت يمكن بيلمح لحسن البنا ... وان سيدنا حمزة سيد الشهداء يبقى حسن البنا نائب سيد الشهداء ... ولا بيخوف مثلا عساكر الامن المركزى اللى بيلعنوا اليوم اللى مادخلوش فية مدارس .. وكانت النتيجة المرمطة اللى بيتمرمطوها كل ما شله تطق فى دماغها وتحب مصر ... ماعرفش ).... قدم الاخت المرشحة التى بدات فى الحديث: حسن البنا انسحب من الانتخابات ايام مش عرف مين رئيس وزراء مصر سنة 1942 علشان كان ليه طلب واحد ... الطلب دة كان الغاء البغاء فى مصر ... ولما رئيس الوزرا ماوافقش ... حسن البنا انسحب من الانتخابات ...مش زى مابيقولوا شغل من تحت التربيزة ... كانت الست المصرية ... بدل ماتمسك فى ايديها كارنية دكتورة ولا مهندسة ..كانت بتمسك فى ايديها ...كارنية امرأة تمارس البغاء ...(هوه محدش قال لها ان البغاء فى مصر اتلغى من سنة 1949... وان مديحة كامل اتجوزت نور الشريف وفتحوا كبارية ).. وصله هتاف ... حسبى الله ونعم الوكيل ... حسبى الله ونعم الوكيل .... وكملت الاخت :

انا كنت فى مؤتمر من اتناشر سنة ... المؤتمر عن الحضارة ... ده الاسم ...لكن الحقيقة انه فى الاخر عمل توصيات ... التوصيات دى تبان انها مش ملزمة ... لكن بعد شويه بتتعمل قانون ويمر فى مجلس الشعب ويبقى سيف على رقابينا ...وفعلا دة اللى حصل ... المؤتمر اوصى بتجريم ختان البنات ... وبإباحة عمليات الترقيع على انها عمليات تجميل .... والاخوان المسلمين هما اللى وقفوا فى وش القانون ونجحوا انهم يحولوا ختان الاناث من تجريم الى تقنين ....(انا مش حتكلم عن الختان لان الموضوع دة بيعفرتنى لانه مثل حى على التخلف العقلى ... انا حتكلم على اباحة الترقيع ... هوه الترقيع محتاج قانون ... وحتى لو طلع له قانون ... هية الاخت الطيبة لويزا اللى رايحة تعمل عملية الترقيع دى ... حتسيح لنفسها كدة ... وتقول انا برقع قانونى .... هوه فية ايه .. انتوا بتشتغلونا ليه ....) ...المهم ماستحملتش اكمل ... وماكنش عندى استعداد اسمع الاخ المرشح الاخوانى .. اللى اكيد حيتكلم عن الاسلحة الفاسدة وحريق القاهرة .... سلمت على حماتى ونزلت ...

وكالعادة مرشحين بلا برامج ....بس المرة دى ...استخدام اسلوب الاستعطاف والضرب على اوتار الدين ... وتسخين الرجوله فى الرجال اللى ناقصة رجوله علشان يدافعوا عن ستاتهم وبناتهم من طوفان القلع اللى جاى بقيادة الحذب الوطنى ...اسلوب انهم غلابه ياعينى والامن المركزى وامن الدوله اليهود بيجروا وراهم ليل نهار علشان يمنعوهم من نشر الدعوة اللى الاسلام ... شحاتة مشاعر ...ولعب بالعواطف واستغلال الجهل .....

سيادة اللوا ماينفعش ... والاخت والاخ بتاع الاخوان برضة ماينفعوش...

وانا كنت قايل قبل كدة انى ماليش دعوة بالانتخابات ومش حأروح ادى صوتى ... لكن معلش ياجماعة .. انا حشارك ... لانى اكتشفت ان عدم مشاركتى سلبيه منى ... ومش حأخبى عيكوا انا حأرشح مين ... باقولها يصوت عالى .. ومش حيهمنى اى حد ... لا امن دوله ولا مخابرات ...ولا امن مركزى ... ولا حتى ابويا..

انا حأرشح سبونج بوب

الأحد، 21 نوفمبر 2010

ناس بتحب مصر2

ناس بتحب مصر2

بدأ سيادة اللواء فى الكلام وقال : فيه ناس بترشح نفسها علشان محتاجة منصب ... انا مش محتاج ... انا لواء ... وفيه ناس بترشح نفسها علشان الفلوس .... وانا الحمد لله ربنا كارمنى ... حتسألونى امال انت مرشح نفسك ليه ؟ اقولكوا .....علشان بحب مصر ... وعلشان لازم كلنا نحب مصر ... مصر ياجماعه مش حينصلح حالها غير لما نحبها ... واحد من اللى قاعدين قام وقال : ياسيادة اللواء ... انت ماتعرفنيش وحتى لو فكرتك مش حتفتكرنى ... لكن سيادتك من عشرين سنه وانت قائد المنطقة الشماليه ... خدمتنى ونقلتنى لوحدة جنب بيتى ... (من عشرين سنه يوم مايكون ربنا كارم سيادة اللواء قوى كان حيكون برتبة رائد ... يعنى مستحيل انه يكون قائد المنطقة الشمالية ) وبدأ الهتيف : عاش رجل الخدمات ....عاش رجل الخدمات ... كمل اللواء كلامه وقال : انا سعادتى بلاقيها فى خدمة الناس واللى ماعرفوش قبل اللى اعرفة ... لحظة صمت الواضح ان سيادة اللواء مش لاقى حاجة يقولها... وفجأة قال : اسألونى ... عايز اللى عندة سؤال يسألنى .. انا هنا علشان تسألونى .. ومرة لحظة صمت تانيه بس المرة دى طويله شويه ... اكتشفت ساعتها ان الناس مش عارفة تسأل فى ايه او تسأل ليه ؟ او ممكن يكونوا خايفين يسألوا ... ماعرفش .... سيادة اللواء قال : اسألوا ... اسألوا ... قام واد شاب حلو كدة من اللى متابعين الفضائيات وقال : هوه ايه برنامج سيادتك يا باشا ؟ ... وفجأه الناس هاجت فى الواد ياعينى ... برنامج ايه وكلام فاضى ايه... هوه سيادة اللواء محتاج برنامج انتخابى ؟!! دة شرف لينا انه يترشح عن ديرتنا ...وقام الهتيف : بطل اكتوبر يا بلاش ... غيرة فى الدايرة ماينفعناش...سيادة اللواء شاور للهتيف علشان يسكت وقال : ياجماعة سيبوا اللى عايز يسأل يسأل ... احنا فى بلد ديموقراطى ... احنا لازم نرسخ دعائم الديموقراطية ... شوف يا بنى ... انا برنامجى اشوف ايه اللى ناقصكوا واجيبهولكوا ..( طاب انا ناقصنى شرابين وفانله بكم علشان الشتا )... سيبك من الكلام بتاع الفضائيات والعالم المثقفين والبرنامج والمسلسل والحلقة والكلام اللى لايجيب والا يودى ... انا برنامجى انى اخدمكوا ... اثبتلكوا انى بحب مصر .... شاب تانى اتشجع وقال : التعليم يا باشا ... حنعمل ايه فى التعليم ؟؟ ... اللواء قال ده سؤال مهم يا جماعة لا ن التعليم هوه اللى حيطلع جيل يحب مصر ... جيل يستلم مننا الرايه ويطور البلد ... انا عندى تمانيه وخمسين سنه ... طول عمرى فى الجيش ... ولما طلعت مسكت رئاسة حى ... بنيت ستين مدرسة ( ستين مدرسة فى حى ... امال الناس اللى فى الحى ساكنه فين ... اكيد فى حى تانى ... ماسكه لواء برضة بس بيبنى فية بيوت بس ) ... المشكله يا جماعة مشكله ضمير ... فين ضمير المدرس ... فين حب المدرس لمصر ... ولو انى باعذره مالفصل فيه تمانين طالب ... لو كل طالب رفع صباعة ... الحصة حتخلص ... ههههههه ... واتدير وبص لواحد من القاعدين وشاور له وقاله : انت عندك حمام فى البيت ... الراجل استغرب من السؤال وقال وهوه خايف : ايوه يا سيادة اللواء ... اللواء سأ له تانى : الحمام ده فيه سيفون ؟... الراجل قال : ايوة ... اللواء قال : والسيفون ده بينقط ؟... الراجل قال : ايوه .... ضحك اللواء وقال : شوفتوا .. ده دليل ان احنا مش بنحب مصر ( فهمت ساعتها ان مصير التعليم فى مصر مربوط بحالة السيفون ... يعنى لو بطل خر ... التعليم حيتصلح حاله ) وكمل اللواء كلامه : اللى خلانا نكسب حرب اكتوبر المؤهلات ... المؤهلات كانوا معانا فى الدبابه واحنا بنعدى بارليف ( تانى ....هوه عندة58 سنه والحرب كانت من 37 سنه يعنى عمر سيادته ساعتها كان 21 سنه ... يعنى بكتيرة كان فى تالته الكليه الحربية ..ازاى بقى كان راكب الدبابة وبيعدى بارليف ) ... الخلاصة يا جماعة ان احنا عايزين نحب مصر ... ..انا متشكر ليكوا يا جماعة ... انا مش عايز اسيبكوا .. لكن واجب عليا انى امر على بقيت اهل الدايرة علشان اشوف طلباتهم وايه اللى ناقصهم ( طبعا على اساس انه شاف مطالب اهل القهوه ) ... قام واحد من اللى قاعدين جنب سيادته وقالى اسمح لى بكلمه يا سيادة اللواء ... واشتغل: قال رسول الله صلى الله عليه وسلم : الناس معادن كالذهب والفضة ... خيارهم فى الجاهليه خيارهم فى الاسلام ... ومعدن سيادة اللواء ... معدن اصيل ... اللى ماتعرفهوش يا جماعة ان سيادة اللواء منسب لاهل بيت رسول الله ... سيادة اللواء من الاشراف ... وضجت القهوة ... الله اكبر.... الله اكبر ... وكمل مولانا كلامه : قال رسول الله صلى الله عليه وسلم : تركت فيكم ما ان تمسكتم به لن تضلوا بعدى ابدا ... كتاب الله وسنتى واهل بيتى ... وانا ياسيادة اللواء بقول الكلام دة مش نفاق ولا رياء ... ورغم انى عارف ان سيادتك مخبى حكاية انك من الاشراف ومابتحبش تقولها ... لكن دا حق اهل دايرتك عليك ... انهم يعرفوا مين هوه سيادة اللواء ... سيادة اللواء سلم على اللى قاعدين واحد واحد ... ومشى وركب المرسيدس ... والهتيف شغال : بطل اكتوبر يا بلاش ... غيرة فى الدايرة ماينفعناش....

مسكت ميكى وفتحت على قصة عم دهب وهوه بيحارب عم بطوط علشان يخطف منه زيزى ويتجوزها ... وجه فى بالى خاطر غريب قوى ... اللى مايعرفوش سيادة اللواء ان احنا مش عايزين حد يقولنا حبوا مصر ... لاننا بنحبها زى سيادته مابيحبها واكتر ... بس الفرق ان سيادته بيحبها وعايز يجيب منها عيال ... لكن احنا بنحبها وكل املنا انها تاخدنا فى حضنها .... ايه قلة الادب دى ... فيه حد يقول كدة على مصر ...

فزورة : سيادة اللواء مش مستقل ... ولا اخوان ... ولا وفد ... يبقى ايه يا حلوييييييييين ؟؟؟؟؟؟؟

السبت، 20 نوفمبر 2010

ناس بتحب مصر1

ناس بتحب مصر1

انا من الناس اللى مابتغيرش كلمتها ... يعنى مش من اتباع عبد الفتاح القصرى ... ونظرية المرة دى تنزل لكن المره الجاية لممكن ابدا ... الكلام ده مش عندى خالص ..... خصوصا فى موضوع الانتخابات .. لانى مقتنع ان الانتخابات دى شأن داخلى للدوله المصريه مليش الحق انى اتدخل فيه .... لاسباب كتيرة اهمها ان الحكومة الله يسترها مأجره لى مصر مؤقت ... ورغم كدة بتعاملنى على انه ايجار دايم ... دا غير انه بصراحة.... ماقابلتش لغاية دلوقت ... حد وقفنى وقالى : ورينى الاقامه ... بس ده لايمنع انى احكى اللى باشوفة... حتى من باب التسلية ... وبكل حياد والله .

قوم ايه..... بعد صلاة الجمعة ...عديت على كشك الجرايد واشتريت سمير ومن حظى لقيت اخر نسخة من سوبر ميكى ... انا مش عارف مابيذودوش الاعداد اللى بيطبعوها ليه ؟؟؟!! ... القصد قولت اروح اشرب فنجان قهوة على القهوة واتصفح المجلات لغاية ما اروح واقعد اقراهم براحتى ... وشوية ولقيت زفه يامعلم ... راجل ماشى فى النص وحواليه يجى اتناشر واحد وماسكين صورته ... وبيهللوا .. ويقولوا :بطل اكتوبر يا بلاش ... غيرة فى الدايرة ماينفعناش ... وقعد الراجل واتلم عليه ناس كتير قوى .... قولت ياواد اتفرج وشوف انت من زمان مارحتش موالد ... حطيت ميكى وسمير على التربيزة .... وعدلت الكرسى علشان اشوف بطل اكتوبر حيقول ايه ؟ ... وبدا الراجل يتكلم .....مش مهم هوه بيقول ايه ... لا مهم وحاحكيى كل اللى قاله .... الاهم بقى المنظر الغريب اللى كان بيحصل ... شوف يا سيدى ... واحد شاكله مالوش فى اى حاجة ... دخل وسحب كرسى فى ايدة ووصل لغاية سيادة اللواء ... وهوه بيهتف .... البلد كلها ياباشا واقفة وراك ... انت الامل ياباشا ... تحيا مصر ... تحيا مصر ... وراح قاعد ومشاور للجرسون ... وقاله : مش القعدة على الباشا ... الجرسون قاله : براحتك ياسوكه .... سوكه قال : ادينا بقى كانزايه من بتاعة شويبس الجديدة ...وحجر معسل .... وتفاحة ... وغيار .... الجرسون قال : أأمر يا سوكة بيه ومشى وهوة بيضحك ... ضحكة سخرية ...تشفى ...غل ... اهى ضحكة كدة تحس ان وراها انتصار وخلاص

... اتنين ماشين فى الشارع واحد قال للتانى : يابنى انا ماعزمتكش على حاجة من زمان .... تعالى.....تعالى نشرب شاى على القهوة دى .... وشوية شوية القهوة بقت شبه يوم ماتش الاهلى والترجى اللى ماكنش مزاع .... واحد من اللى مع سيادة اللوا ... شكله كدة مدير الحلة الانتخابية ...على فكرة انا كاتبها صح ... وزى ماكان بيقولها بالظبط ... القصد مدير الحله خد الجرسون على جنب ... وشويه بدأ ت حركات غريبة وبدأوا يشدوا بعض من الهدوم ... الجرسون قال : احنا اتفقنا على ميت جنيه ... اهم ...عايز ايه بقى ...مدير الحله : اه دا على اساس ان فيه عشرين تلاتين واحد حيقعدوا ... مش جايبلى الاستاد ...الجرسون : وانت مالك هوه انت اللى حتدفع ...؟ مدير الحمله مايولع اللى حيدفع انا باتكلم على نصيبى ... لو ماجيتش ميه كمان مش دافع تمن الطلبات ...الجرسون : طاب اعملها وانا خلى كل اللى قاعدين دول يكسروا على دماغم الكراسى وشوف الفضيحة بقى ... مدير الحمله : طاب هات خمسين ... الجرسون : لا ميه بس بمزاجى ... مدير الحمله قشطة يا معلم ... اتدير رايح لسيادة اللوا ء وهوه بيهتف : سيادة اللواء نصير الغلابة ... سيادة اللوا اليد الطاهرة ..... ونكمل بكرة

الاثنين، 15 نوفمبر 2010

ياأهل المدونات


يا أهل المدونات

كل سنه وانتوا طيبين ... ومن غير الحكومة عايشين ... وللانتخابات مش مشاركين .... وعلى الظالم والمفترى داعيين ... ولحياتكم مصلحين.... ولنفسكم حابين .... وفى شغلكم ناجحين ...وعن المشاكل باعدين ...وطبعا اهم حاجة للفتة والخروف واكلين .... وانا بقى بادعى لكوا ان السنة الجاية على عرفات تكونوا واقفين ...وللبس الاحرام لابسين...
قولوا آميييييييييييييييييييييييييييييييييييييييييييين


الجمعة، 12 نوفمبر 2010

كدة أريح

كدة أريح

لو بصينا فى التاريخ حنلاقى ان الشعب المصرى طول عمرة شعب فى حاله ... مالوش دعوة بحد.... ومابيتدخلش فى شئون اىبلد....سواء كان شقيق او غير شقيق .. ولا عدو اوحبيب ... وعلشان كدة باطالب كل ابناء الجالية المصرية فى مصر ... وخاصة المدونين والمثقفين والمتعلمين ... اطالبهم بالا يتدخلوا فى موضوع انتخابات مجلس الشعب المصرى لأنه شأن داخلى ليس لنا الحق فى ابداء اى اراء فيه ... وبلاش وجع قلب.. وشكرا ...

نصيحة: أحسن حاجة تعملوها ياجماعة علشان مايجلكوش السكر والضغط والاكتئاب والمرارة... انكوا تقروا ميكى وسمير والاميرات ... وتتفرجوا على نيكلوديان وام بى سى3 ... لغاية مايومين الانتخابات دول يعدوا ... وترجع ريمه ( قصدى فتحى سرور ) الى عادتها القديمة ... ( قصدى لرئاسة المجلس ) ...

ملحوظة : تعبير الجالية المصرية فى مصر مش بتاعى وماعرفش هوه بتاع مين ... بس تعبير عجبنى قوى ... ولذلك احتفظ لصاحبه بكامل حقوق الملكية الفكرية .

الثلاثاء، 9 نوفمبر 2010

مصر الإفتراضية

مصر الإفتراضية

كنت فاكر ان حالة الانشطار اللى فى مصر دى ... حاله جديدة نتيجة العبط اللى بيحصل فى البلد بقاله خمسين سنه ... اتارى الحالة دى من ايام المماليك البحرية ... ولو سبتونى شويه اقدر ادور فى التاريخ واكيد حتطلع الحاله دى من ايام أمنمحات الاول وسنوسرت الثانى ... مصر مش مصر واحدة .. لأ ... مصر مصرين ... مصر الحكومة والسلطة ... ومصر الشعب والناس ... الحكومة متخيله ان فيه شعب ... شعب افتراضى ... بتحكمة وتشوف مصلحنه وتعمل له دستور وقانون ونظام ... والشعب عامل مع نفسه حكومة تانية ... افتراضية برضه ... ليها قونينها ودستورها ونظامها اللىبيتحكم بيها .

الحكومه الأفتراضية بتعمل قوانين والشعب الافتراضى مابينفذهاش ... بتعمل انتخابات والشعب الافتراضى مابيروحهاش ... ويتطلع جرايد والشعب الافتراضى مابيقراهاش ... الحكومة الافتراضية بتعمل قنوات فضائية .والشعب الافتراضى مابيشوفهاش ... الشعبمع نفسه عمل انتخاباته وقوانينه وجرايدة وقنواته ... الشعب اتصرف ... الشعب بقى شعارة : ياحكومة لا تقرصينى ولا عايز عسل منك .

حأحكى لكوا حكاية بيبرس ماسنجر ... اسمه كدة ... : بيبرس اشترى شقة ادارى ... اودة وصاله ... وقال فى نفسه : ابقى أأجرها لمحامى ولا محاسب ايجار مؤقت... اهو يدخلى قرشين بدل الفلوس ماهى بتخس فى البنك ... بيبرس استلم الشقة على الطوب من سنتين ... واقعد يوضب قيها واحدة واحد ويادوب لسه مخلصها ... راح لشركة الكهربا علشان يركب عداد تجارى ... عادى يعنى ... موظف شركة الكهربا ... قاله تمضى على اقرار ان الشقة ادارى وانك اذا استخدمتها سكنى ... نرفع العداد بدون سابق انذار ... بيبرس مضى وهوه بيغلى ... بيقول يا عالم العداد التجارى فاتورته اغلى من العداد المنزلى ... يعنى المفروض الموظف يمضينى على العكس ... ليه؟ ... لان الشقة لو سكن وفيها عداد منزلى ... وانا حولتها مكتب ... يعنى نشاط تجارى يبقى انا بانصب على الحكومة وباسرقها فمن حقها انها تشيل العداد ... لكن لو العداد تجارى وانا عاملها سكن ...يبقى الحكومة هية اللى كسبانه ... ولا انا غلطان يا جماعة .

المهم بعد ما بيبرس مضى الموظف قال له : هات بقى البطاقة الضريبية ... بيبرس قاله مافيش بطاقة ضريبية ... انا كل الحكاية عايز اركب العداد علشان اعرف أأجرها ... الموظف قال: روح هات جواب من الضرايب بكدة .... عم بيبرس راح للضرايب وسألهم ... موظف الضرايب قال له : ايوة الكهربا علشان تركب عداد تجارى لازم يكون فيه بطاقة ضريبيه ... بيبرس قال : بس انا مش حأعمل مشروع ... انا حأجرها ... موظف الضرايب قال : ماقدامكش غير حل واحد ... بيبرس قال : انجدنى الله يخليك ...قاله انت تعمل مشروع وهمى ( افتراضى يعنى ) وتطلع البطاقة الضريبية ... وتروح تقدمها للكهربا ... يقوموا يركبوا لك العداد ... بعد ماتركب العداد ... تيجى تقفل النشاط وتلغى البطاقة الضريبية ... بيبرس قال : ماشى ... وبدأ فى اجراءات الشركة ... واختار نشاط مشغل عملا بنصيحة الموظف ... الموظف كتب ان بداية النشاط من سنتين على حسب عقد الشقة ... بيبرس اتنطط ... قال :انا لسه باوضب فيها ... يبقى بداية النشاط من سنتين ازاى .... قامت المديرة قالت : بص يا استاذ ... انت تروح الكهربا تجيب جواب انك لسه مادخلتش العداد ... وبكدة نعمل بداية النشاط من النهاردة ... بيبرس كان حيغمى عليه ... اتمالك نفسه وقال : امال ياجماعة انا جاى ليه مش علشان بتوع الكهربا عايزين بطاقة ضريبية علشان يركبوا العداد ... وبعدين هوه فيه نشاط اصلا علشان يبقى بدايته من النهاردة .... المديرة قالت : والله هوه دة اللى عندنا ... بيبرس لم ورقة ونزل يجر اذيال الخيبة ... باليل نزل قعد مع رئيس الحكومة الافتراضية على القهوة وحكى له حكايته ... رئيس الحكومة قاله: سهله خالص ... انت تعمل عقد ايجار لمراتك بتاريخ النهاردة ... وتاخد عليه اثبات تاريخ من الشهر العقارى ..وتروح الضرايب وتعمل اى نشاط وتاخد البطاقة الضريبية ... وتروح الكهربا تركب العداد ... وبعدين تطلع على الضرايب توقف النشاط ... وترجع مع المدام فى نفس اليوه وتخليها تعمل لك تنازل عن العداد باسمك ....... واتبع بيبرس التعليمات وخلص موضوع العداد ...

السؤال بقى اللى تاعبنى انا شخصيا ... اذا كانت الضرايب بتقول لبيبرس اعمل نشاط افتراضى ... وطلع البطاقة الضريبية كده وكده .. وبعدين الغيها ... يعنى الموضوع مش فارق معاها ... أمال الكهربا زعلانه ليه ومحموقه على الضرايب وقلقانه عليه اكده ليه؟؟؟؟؟؟؟؟ ؟!!!!!!!!!!!!!!!!!!!!!!

ملحوظة اخيرة : موظف الحكومة بتاع الضرايب هوه كمان طلع افتراضى ... لان القانون اللى بيمش الشغل فى ناحيه وهوه بيتحايل عليه من الناحية التانية ... الله ... هوه مش من الشعب .. واحنا قولنا ان الشعب افتراضى ... يبقى لازم الموظف يطلع افتراضى ... هيييييييييييييييييييييييييييييه الحكومه مخترقة ياولاد ............ الله يلعن ابو الكفرة........... قولوا امييييييييييييييييييين

الاثنين، 8 نوفمبر 2010

سخن نفسه

سخن نفسة

حمادة شاب كويس ...متعلم ومعاة شهادة عالية..... ابوة تاجر كبير ...اى نعم ابوة بدأ من الصفر بس ما شاء الله دلوقتى ...فلوس وعمارات وعربيات ...بس الحاجات دى كلها ما اثرتش علية ...لسة راجل ...ومربى عيالة علشان يطلعوا رجالة ...المهم ...حمادة قرر انة يتجوز ...خال حمادة قالة على عروسة بنت ناس ....ابوها وكيل وزارةمعاة فى الشغل...العروسة مدرسة اعدادى...حلوة مؤدبة ومحجبة بس حجاب بجد مش حجاب مصرى ...حمادة وافق وقال لخالة كلم لى الراجل علشان نروح نشوف العروسة ولو كان فية قبول نخلـــّص ...خال حمادة كلم الراجل اللى بكل ذوق وادب قالة تشرفونا وتنورونا فى اى وقت ...بس خلية يكلمنى بكرة علشان احدد معاة ميعاد يشرفنى فية .... تانى يوم حمادة كلم ابو العروسة فى الموبيل .. ..اللى رد كان ابن الراجل ...قال لحمادة ممكن حضرتك تتصل كمان ساعة بعد اذنك .... حمادة قفل الموبيل وسأل نفسة ...هّوة الراجل عاطى الموبيل لابنة لية ...يكونش مش عايز يرد علية ...واية كمان ساعة دى ؟! هوة انا بشحت منة ...وبعدين طريقة الواد ماكنتش حلوة ...هوة فاكرنى اية ...لااااااااااا ...دا انا ابن المعلم حسب الله على سن ورمح ....هوة يطول النسب دة ...ولا علشان وكيل وزارة يعنى ...طظ اية يعنى ماهو فى الاخر موظف ...بيقبض كام يعنى !!...دا انا كنت حاجيب لبنتة اللى ماتحلمش بية .... كفاية الشقة المتين متر ....بس هما يقدروا يفرشوها ....هوة حد لاقى جواز اليومين دول .....عدت الساعة ...مسك حمادة الموبيل وضرب على ابو العروسة ....التليفون رن رنتين واتقفلت السكة ....حمادة اتعفرت ...انا ... انا يتقفل فى وشى السكة ...هوة فاكر نفسة مين ...اذا كان وكيل وزارة فخالى برضة على وش وكيل وزارة ...واخويا مهندس اد الدنيا ...واختى جوزها عقيد شرطة ...دا نسب عمرة مايحلم بية ..والله لاورية ...دا احنا سياد البلد ...دا انا اشاور لأى واحدة تيجى لغاية عندى ...وبعدين تلاقى امها قرشانة ...وهية اللى ممشية البيت ....وابوها وكيل الوزارة دة تلاقية شورتها .....ماهى الناس دى كدة من برة هلا هلا ومن جوة يعلم الله ....مش لاقيين جواز ولما حد يعبرهم يتنططوا ويتشرطوا ....وبعدين كويس ان الواحد يفهم من الاول ...ماهو احسن ان الواحد يخلع وهوة على البر ..حمادة مسك الموبيل وضرب على الراجل تانى ...لكن المرة دى الموبيل كان مقفول ...اية ..اية ..يعنى اية ...بيهرب منى ولا اية ؟؟ يلعن ابوة ...هوة يطول ... حمادة راح جرى على خالة ...شابف مجايبك انت عايزنى اناسب عيلة واطية ...انت عايز تدبسنى... مابيردش علية وقفل الموبيل فى وشى ....خال حمادة حاول يهدية ويقولة محدش عارف ظروف الناس اية ...حمادة طبعا كان شايط وقال بنرفزة لا خلاص بلاها الجوازة دى ...بس والله لاورية مين حمادة الوكيل اللى يترفض دة ....روح حمادة وقعد على السرير مش عارف ينام من الغيظ ...قال فى نفسة انا اروح لة بكرة الشغل ...وبهدلة قدام الموظفين بتوعة ..واورية مين حمادة اللى يتجرأ ويرفضة ....وقعد يتقلب شمال ويمين...ومانمش اللا بعد ماخلص علبتين سجاير ....حمادة قام الساعة عشرة لبس وجرى على خالة ....اول مادخل على خالة قالة فين مكتب الراجل دة انا عايز اخش لة علشان امسح بكرامتة الارض ....خالة قالة اقعد انت ماتعرفش اللى حصل ...مش الراجل جات لة ازمة امبارح وكان حيروح فيها لولا انهم جابو لة دكتور فى البيت ونقلوة على المستشفى ....وانا لسة جاى من عندة .... وقالى بلغ حمادة اعتذارى وقولة بس افوق وانا اللى حاكلمة احدد ميعاد معاة علشان يشرفنا .... حمادة رجع من عند خالة وهوة فى السكة ...كان بيقول لنفسة ...برضة الناس المحترمة محترمة ....شوف باأخى وهوة فى عز المرض بيعتذر على انة ماردش علية ...برضة يا اخى المحترم محترم!!!!!!!!!!

الخميس، 4 نوفمبر 2010

ديك أم المدير

ديك أم المدير

خلى عندكوا ثبات انفعالى .... ومتتخضوش وكملوا قراية الموضوع وماتركزوش فى العنوان حتفهموا قصدى.... انا الدكتور بطاطا... اسمى الحقيقى او الناس هما اللى مطلعينه عليا .. مش مهم .... اتخرجت من كلية الطب البيطرى .... وماتعينتش فى الحكومة .. مش بمذاجى ... مافيش تعيين فى الحكومة ... عموما انا ماكنتش مستنى تعين الحكومة ... اشتغلت فى مزرعة دواجن على الصحراوى ... وخدت خبرة كبيرة قوى ... وبعد ما اتجوزت ... قولت اشتغل لنفسى بقى ... اجرت مزرعة وبدات اشتغل ... مرة فوق مرة تحت ... الدنيا كانت ماشية ... وفجأة ... ظهرت انفلوانزا الطيور .. والدنيا اتقلبت ... وخسرت شوية فلوس حلوه كدة ... يعنى من الاخر بدأت من الصفر ...ويادوب لسه بأقف على رجلى ... ولقيت مدير مكتب المحافظ على رأس لجنه من خمستاشر واحد ... ضابط ومندوب من البيئة وعسكرى امن مركزى وموظف من الصحة ودكتور بيطرى ... وقرروا ان المسافة بين المزرعة والكتله السكنيه غير مطابقة للمواصفات ... وان المزرعة لازم تتقفل لانها بؤرة عدوى ... حاولت اتفاهم مع مدير مكتب المحافظ ... ابدا ...قالى: صحة الناس اهم من اى حاجة .. وقرر مدير مكتب المحافظ انه يشمع المزرعة بالشمع الاحمر ... واتشمعت المزرعة بالشمع الاحمر ... وبدأت تانى ... بس المرة دى من تحت الصفر ... لكن ربنا كريم ... الحكومة طلبت دكاترة بيطريين تعينهم علشان الانفلوانزا ... واتعينت ... ورغم ان اللى فى المدرية عارفين انى خبرة جامدة فى الدواجن ... الا انهم عينونى فى قسم الحيوانات الكبيرة .. بقر وجاموس وكدة ... والدنيا مشت ... وفى يوم من الايام بعد الشغل... روحت ... عملت التليفون على الصامت ... ودخلت اصلى على ما مراتى تحضر الغدا ... فراخ ومحشى ... وفجأة لقيت الباب بيخبط زى الخبط بتاع البوليس اللى بنشوفه فى الافلام ... فتحت ... لقيت اخويا بيقولى .. الحق ... فيه عربية من المحافظة فيها راجل كبير كدة وشكله ظابط ... بيسألوا عليك على اول الشارع ... قولت : محافظة يا ساتر يارب .. انا ماليش دعوة بالبرادعى ..ولا بحبه اصلا ... دخلت البس هدومى علشان لو مسكونى ولا حاجة مايبقاش الدكتور بطاطا اسمه اتاخد بالبيجاما .. .. لبست وخدت الموبيل ...لقيت عليه خمسة وتلاتين ميسد كول من المدير بتاعى .. كلمته ... زعق فيه قالى انت فين يا افندى وكيل الوزارة بنفسة عايزك ... اقفل حيكلمك دلوقت ... ويادوب قفلت ولقيت وكيل الوزارة بيتصل بيه.. .. وقال : فيه عربيه من المحافظة حتجيلك ومعاها مدير عام المديرية .. حتروح معاه لبيت مدير مكتب سيادة المحافظ ... اعمل اللازم ... وقفل السكه ... مدير مكتب المحافظ هوه الراجل دة موراهوش غيرى .. استر يارب ...فتحت الباب لقيت مدير عام المديرية بنفسه ... بيقولى ياللى بسرعة ...ركبت العربية والناس فى الشارع بتتكلم وتقول اللى يجى فى بالها ...اللى يقول بطاطا اختلس ... واللى يقول بطاطا هوه اللى دخل انفلوانزا الخنازير مصر ... واللى يقول مسكوا بطاطا علشان هوه السبب فى غلو اللحمة ..... المهم ... وصلنا لبيت مدير مكتب المحافظ ... قابلنا وهوه لابس جلابية بيضا وطاقية شبيكة .. .. وقال اتفضلوا ... طبعا كان نفسى امسك فى زمارة رقبته ... ماهوه اللى قفل لى المزرعة ... قولت : خير يا باشا ... قالى نشرب الشاى الاول ... وبعدين اجيب لك الحاجة تقولك ... شربنا الشاى وجات الحاجة ام مدير مكتب المحافظ ... قالت : شوف يابنى ... الفراخ اللى مربياها تعبانى قوى ... عايزاك تشوفهم وتعمل لهم اللازم ... قولت انا تحت امرك ... قالت : الاهم بقى من الفراخ ... الديك... قولت: ماله ... قالت : ماعدش زى الاول يابنى ... مش عارف يكسر الفراخ ...مش عارفة ايه اللى صابه .... ده بقى بالذات لازم تشوف له حل .... قولت عنيه يا حاجة ... مدير مكتب المحافظ قلنا اتفضلوا ... طلعنا معاه الشقة اللى قى الدور التالت ... هه ... الشقة اللى فى التالت ... يعنى المسافة بين الفراخ وبين الكتله السكنيه فيها مشكله ... وطبعااتكتمت فى قلبى ... الشقة ياسيدى فيها تلت اود ... اودة فيها بط ... واودة فيها ديوك رومى ... واودة فيها يجى خمسميت فرخة .... مزرعة مزرعة يعنى ... عملت اللازم وقعدت اعصر مخى والخبرة اللى عندى حتى محاضرات الكليه قعدت افتكر فيها علشان اعرف سبب اللى يخلى الديك مش عارف يكسر ... مش لاقى ... ماهو حرام برضة ... ديك واحد مطلوب منه يكسر خمسميت فرخة ... والله حرام ... المهم جات فى دماغى فكرة .... رحت كاتب له نص قرص فياجرا على مية الشرب لمدة تلت ايام ... ومشينا .. العربية وصلتنى لباب البيت ... الدكتور مدير عام المديرية ...نزل بنفسة وشكرنى قدام الشارع ... والناس قعدت تقول اللى يجى على بالها ... د. بطاطا ده طول عمرة راجل محترم ...الدكتور بطاطا دة واصل ... منور يا دكتور بطاطا ... اتفضل اشرب قهوتك معانا ... طلعت بيتنا لقيت مراتى والعيال نايمين ... وسايبين لى طبق فيه صوبعين محشى وحتة فرخى ....

بعد اسبوع ... وانا قاعد على مكتبى فى الشغل مابعملش حاجة كالعادة ... دخل عليه رئيس القسم ومعاه ورقة بيهزها فى الهوا .... وقال : ماشى يا سيدى ... يابخت من كان النقيب خاله ... قرار ادارى من وكيل الوزارة بتعيينك رئيس قسم الدواجن فى المديرية ياسيدى ... قولت فى نفسى ... اكيد ديك ام مدير مكتب المحافظ ربنا نفخ فى صورته والفياجرا عملت شغل ..... اه يابلد مابتمشيش الا بالفياجرا ............. على فكرة القصة دى من الحياه وحصلت فعلا مش خيال ..... مش بقولكوا .... يابلدنا ان الاوان