الثلاثاء، 23 نوفمبر، 2010

ناس بتحب مصر3

ناس بتحب مصر3

بعد مارجعت من الشغل اتغديت وقعدت اتفرج على نيكلوديان ... بصراحة الواد سبونج بوب دة تحفه ... بيعمل حاجات غريبة ...المهم مراتى كانت مختفية ... ماعرفش كانت بتعمل ايه ... وفجأة لقيتها داخله عليه ومعاها فنجان قهوة بوش سمك 3سم ... وقالت :انا حسيت كدة ان نفسك فى فنجان قهوه ...طبعا شكرتها من كل قلبى ... وقلت اد ايه ماقدرش اعيش من غيرها ... وانى لايمكن استغنى عنها .. وانا فى بالى مستنى الطلب اللى حتطلبة منى ... ماهو كله بتمنه .... مراتى طيبة بتقول على طول ... وفعلا بعد اول شفطة قالت : انا عملتلكوا كيكة علشان تفطروا بيها ...قولت :تسلم ايديك .. هيه ياللا قولى... طبعا ده فى بالى قالت :والنبى وانت نازل باليل تاخد حتتين كيكة توديهم لماما .... قولت : لحماتى؟؟ ... من عنية ...هوه انا ليه غير حماتى ... ياسيدى ... عديها ...ماهو مافيش حاجة لله اليومين دول ... وبعدين اذا كان مشوار حماتى تمنه فنجان قهوه من ابو وش 3سم ..يبقى حلو ... مربحة يعنى .... القصد ماطولش عليكوا ... خدت العلبة ورحت لحماتى .... وعلى اول شارع حماتى لقيت 3عربيات امن مركزى .. .. عربية مطافى ... عربية غريبة كدة مكتوب عليها ادارة المفرقعات... وظباط بقى.. ونجوم على الكتاف ...ونسور ...وسيوف .. جو من بتاع الحرب .. مش ناقصه غير دبابتن ... قربت شويه وفهمت ... مؤتمر شعبى للاخوان ...وهتافات تجلجل المكان .... الاسلام هوه الحل ... واللى يزور ايدة تنشل.... الاسلام هوه الحل ... واللى يزور ايدة تنشل....الله اكبر ولله الحمد ..وصلت لحماتى بالعافية ... دخلت ... وكالعادة قست لها الضغط ... وكالعادة قولت لها عالى شويه ياست الكل .. بطلى حوادق ... وكالعادة قالت لى: هوة انا باكل مخلل خالص ... وبعدين ما انا ماشية على الدوا ...وكالعادة قولت لها: الحوادق مش بس مخلل ... خفى من الملح فى الاكل ... وكالعادة قالت : ياخويا ... خليها على الله ... وسمعت هيصة جامدة ...وهتافات هزت البيت ... طلعت البلكونة لقيت الاخت مرشحة الاخوان والاخ مرشح الاخوان وصلوا ... جبت كرسى وقولت اسمع هما بيقولوا ايه ... وبدأ اللقاء بالهتاف المشهور بتاع الاخوان .. الاسلام ديننا .. والقرآن دستورنا .. والموت فى سبيل اللى اسمى امانينا ... وبدأ المقدم كلامة ببسم الله الرحمن الرحيم ... والصلاة والسلام على اشرف المرسلين .... وتحيه لحمزة سيد الشهداء ..... (طاب لزمته ايه هنا سيرة حمزة سيد الشهداء ... ضربتها فى دماغى ...ملقتلهاش حل ... قولت يمكن بيلمح لحسن البنا ... وان سيدنا حمزة سيد الشهداء يبقى حسن البنا نائب سيد الشهداء ... ولا بيخوف مثلا عساكر الامن المركزى اللى بيلعنوا اليوم اللى مادخلوش فية مدارس .. وكانت النتيجة المرمطة اللى بيتمرمطوها كل ما شله تطق فى دماغها وتحب مصر ... ماعرفش ).... قدم الاخت المرشحة التى بدات فى الحديث: حسن البنا انسحب من الانتخابات ايام مش عرف مين رئيس وزراء مصر سنة 1942 علشان كان ليه طلب واحد ... الطلب دة كان الغاء البغاء فى مصر ... ولما رئيس الوزرا ماوافقش ... حسن البنا انسحب من الانتخابات ...مش زى مابيقولوا شغل من تحت التربيزة ... كانت الست المصرية ... بدل ماتمسك فى ايديها كارنية دكتورة ولا مهندسة ..كانت بتمسك فى ايديها ...كارنية امرأة تمارس البغاء ...(هوه محدش قال لها ان البغاء فى مصر اتلغى من سنة 1949... وان مديحة كامل اتجوزت نور الشريف وفتحوا كبارية ).. وصله هتاف ... حسبى الله ونعم الوكيل ... حسبى الله ونعم الوكيل .... وكملت الاخت :

انا كنت فى مؤتمر من اتناشر سنة ... المؤتمر عن الحضارة ... ده الاسم ...لكن الحقيقة انه فى الاخر عمل توصيات ... التوصيات دى تبان انها مش ملزمة ... لكن بعد شويه بتتعمل قانون ويمر فى مجلس الشعب ويبقى سيف على رقابينا ...وفعلا دة اللى حصل ... المؤتمر اوصى بتجريم ختان البنات ... وبإباحة عمليات الترقيع على انها عمليات تجميل .... والاخوان المسلمين هما اللى وقفوا فى وش القانون ونجحوا انهم يحولوا ختان الاناث من تجريم الى تقنين ....(انا مش حتكلم عن الختان لان الموضوع دة بيعفرتنى لانه مثل حى على التخلف العقلى ... انا حتكلم على اباحة الترقيع ... هوه الترقيع محتاج قانون ... وحتى لو طلع له قانون ... هية الاخت الطيبة لويزا اللى رايحة تعمل عملية الترقيع دى ... حتسيح لنفسها كدة ... وتقول انا برقع قانونى .... هوه فية ايه .. انتوا بتشتغلونا ليه ....) ...المهم ماستحملتش اكمل ... وماكنش عندى استعداد اسمع الاخ المرشح الاخوانى .. اللى اكيد حيتكلم عن الاسلحة الفاسدة وحريق القاهرة .... سلمت على حماتى ونزلت ...

وكالعادة مرشحين بلا برامج ....بس المرة دى ...استخدام اسلوب الاستعطاف والضرب على اوتار الدين ... وتسخين الرجوله فى الرجال اللى ناقصة رجوله علشان يدافعوا عن ستاتهم وبناتهم من طوفان القلع اللى جاى بقيادة الحذب الوطنى ...اسلوب انهم غلابه ياعينى والامن المركزى وامن الدوله اليهود بيجروا وراهم ليل نهار علشان يمنعوهم من نشر الدعوة اللى الاسلام ... شحاتة مشاعر ...ولعب بالعواطف واستغلال الجهل .....

سيادة اللوا ماينفعش ... والاخت والاخ بتاع الاخوان برضة ماينفعوش...

وانا كنت قايل قبل كدة انى ماليش دعوة بالانتخابات ومش حأروح ادى صوتى ... لكن معلش ياجماعة .. انا حشارك ... لانى اكتشفت ان عدم مشاركتى سلبيه منى ... ومش حأخبى عيكوا انا حأرشح مين ... باقولها يصوت عالى .. ومش حيهمنى اى حد ... لا امن دوله ولا مخابرات ...ولا امن مركزى ... ولا حتى ابويا..

انا حأرشح سبونج بوب

هناك 5 تعليقات:

  1. للاسف هى دي الحقيقه
    للاسف قليلا الى فاهمين

    انا عشان اقدم صوتي لازم اعمل حاجه واحده

    انقى احسن الوحشين

    وانا مش هاعمل كده لانهم ببساطه كلهم عندي فى كفه واحده

    وانى مش هادي صوتي دي مش سلبيه لانى لو فى دوله محترمه كان ده معناه انى مش عاجبنى ولاد التيت المتشرحين دول

    والنبى اعصابي تعبانه من الى بيحصل من المرشحين

    انت عارف احنا عندنا حاجه جديده بقى
    كل مرشح بيعمل زفه كده ويمشي يلف البلد ومألف اغنيه ومسجلها بصوت مطرب شعبي من الى بيغنى وهو ضارب حشيش وماشي يذيعها بسماعات

    عليه العوض ومنه العوض

    ردحذف
  2. السلام عليكم

    انا اعرف حضرتك بتتكلم عن مين بالظبط يا اخى الفاضل

    احب اقولك انى شايفه ان وجهه نظرك عن جماعه الاخوان المسلمين خاطئه

    دى جماعه تستحق التقدير وتستحق منا كل تعاطف معها

    كفايه ان نوابها فى الدوره اللى فاتت قدروا يكشفوا حجم الفساد اللى فى البلد

    كفايه ان نوابها دخلوا جيوبهم نظيفه وخرجوا وجيوبهم نظيفه ايضا

    كفايه الحملات والتبرعات والمساعدات اللى قدموها على قد ما يقدروا

    كفايه الاهانات اللى استحملوها عشان يرفعوا قيمه الحق

    كفايه ان فى حد فى الشعب المصرى مش عايز مصر تخرب بالفعل مش بالكلام بس

    احنا كلنا عايزين مصر تتحسن بس منعمل ايه

    هما اتحركوا
    هما قالوا لازم نتغير

    هما قالوا مش هنقدر نغير لوحدنا وان الشعب المصرى لازم كله يبدأ بالتغير مش فئه دون الاخرى

    كفايه انهم بيجاهدوا فى سبيل الله بكل مااستطاحوا

    الجهاد مش حمل السيف فقط


    الجهاد جهاد الكلمه

    اكيد كلنا

    الاخوان عايزين يوصولوا للسلطه

    بس ليه ؟

    هل علشان وراء ذلك مصالح شخصيه

    احلف يمين احاسب عليه يوم العرض على ربى وربك ان هدفهم الوحيد هو نشر الشريعه الاسلاميه التى جعلنا الله خلفائه فى الارض من أجلها

    الرسول عليه الصلاه والسلام خير قدوه فى ذلك

    هل عندما أنزل الله رسالته على نبيه اكتفى الرسول بدعوه الناس للاسلام فقط

    ام انه أقام الدوله الاسلاميه وحكم الناس بالشريعه التى لا بديل لها

    فى عصر الخلفاء الراشدين رحمهم الله

    هل أكتفوا بنشر الاسلام فقط ام حكموا الدوله الاسلاميه بما يرضى الله

    (الدين حاجه والسياسه حاجه)

    هذا هو الشعار التى استطاع النظام المصرى ان يزرعه فى عقول المصريين وفصدقه المصريين دون تفكير (الا من رحم ربى)

    دون الرجوع الى الشريعه الاسلاميه ليعرفوا حقيقه الأمر

    حقيقه الامر اخى ان (حكم المسلمين والمسيحيين بشرع الدين الاسلامى هو الذى كلفنا الله به فى فى كتابه الكريم)


    قال تعالى ( وما خلقت الجن والإنس إلا ليعبدون)

    الحكم بالشريعه الاسلاميه جزء لا يتجزاء منه العباده

    والا لما كان الرسول حكم ايامه لقلا لهم سأعلمكم دينكم وانتم أحرار فى حكم الدوله

    والأن انت تنكر ان جماعه الاخوان المسلمين يذوقون اشد العذاب والاهانه من قبل أمن الدوله بل من قبل كل من يرى مثل رأيك

    اخى عندما بعث الله نبيه حاربه قريش وأهانوه ولقى فى ذلك الكثير الكثير حتى أعلى كلمه الاسلام التى كلفه الله بها

    وها انا اقول ان جماعه الاخوان المسلمين حتما ستلاقى الكثير من تعذيب واهانه وسب وقذف بل وقتل


    ولكن كل ذلك يهون لانهم يعلمون ان الله معهم

    وحتما حتما سيأتى اليوم ( لا أعلم هذا اليوم سيكون فى حياتك أم بعد مماتك) الذى ينصر الله عباده الذين جاهدوا من أجله من أجل نشر شريعته السمحه فى الارض

    أبى خير دليل على ذلك فلن أحكى كم لاقى من التعذيب والاعتقالات والاهانات من قبل أمن الدوله وليس ابى وحده
    بل كل من يقف فى وجه الظلم ولا يخف من نطق كلمه الحق مهما كانت العواقب لتأتى أنت ومن مثلك يحتقرون منهم ويسبونهم بالله عليك كفى استهانه بهم فوالله نحن لم نذق قليل منهم فلا تكن انت وهم يا اخى

    لتعلم ان عقاب الظالمين عند اللله وخيم وليس بالقليل

    ارجوك أخى راجع نفسك

    وأقرأ عن تاريخ جماعه الاخوان المسلمين

    وإن لم تقتنع فعلى الاقل ليكن موقفك حيادى

    كفى ظلم لنا فنحن عانينا وسنعانى الكثير من أجل عوده الحكم الاسلامى

    يهدينا ويهديكم الله أخى

    تحياتى الطيبه لك والسلام عليكم

    ردحذف
  3. مدونة ما كفاية بقى :
    لو حضرتك.. تعبتى نفسك شوية وقرأت مدونتى واللى فيها ... وعلى الاقل .. اول بانر تحت العنوان ... حتعرفى انى والحمد لله مسلم ... وانىوالحمد لله نفسى شرع ربنا هوه اللى يسود ونتحكم بية ...بس انا كل خلافى على الاسلوب ... وجماعة الاخوان اللى حضرتك بتتكلمى عنها ... انا فى فترة من شبابى كنت فيها ... وفى الجماعات الاسلامية .. واعرفهم كويس واعرف ايدولوجيتهم .. وجايز يكون فيه ناس مش طالبه غير الحق والعدل ... بس اللى ماتعرفهوش .. ان فيه ناس تانية برضة الموضوع بالنسبة لهم مش اكتر من سبوبة وزعامة... والدليل المجموعة اللى انفصلت عنهم وكان نفسها تعمل حزب اسلامى وسطى والحكومة مارضيتش ... عموما انا لا مع ولا ضد اى حد عايز يصلح مصر ... بس الاسلوب ...هوة اللى يشغلنى ... لان مصر والله مستهدفة ومن زمان بلاش بقى يجى خرابها بايدين ولادها ... تحت اى مسمى كان ....وانا مش مضطر اقول انى مسلم وانىباتمنى ان الاسلام هوة اللى يحكم العالم ... مش بس علشان انا مسلم لكن علشان هوه ده الصح ...
    شكرا على تعليقكم ووفقكم الله

    ردحذف
  4. وانا مع حضرتك
    تعرف حضرتك الحزب الوطني ده .... هوا
    ولا يسوا اي حاجه
    انا خالي كان نازل الانتخابات ودخل حزب وطني والحزب الوطني قعد يعمل استطلاعات رأي وهيصه
    وفي الاخر النائب الحالي بتاع الفئات بتاعنا قلب عمال ونجح في الحزب بردو

    قولتلهم ولااااااااااا هيحصل حاجه
    انتخبناه مش انتخيناه هو ناجح ناجح
    انتهت
    هتعب نفسي ليه بقى
    البلد دي ماشيه على هواها

    ربنا يخرجنا من الدنيا دي على خير
    كلنا ورا اي حاجه تيجي من نيكولودين

    ردحذف