الأحد، 29 أبريل، 2012

أماصين


أماصين

كدابين ... منافقين ... ملوعين ... وقولنا ماشى ... لكن تطلعوا كمان عيال أماصة ... ياخبر اغبر ياولاد ... هوه انتوا بتلعبو بلى واللى قدامكوا ماخدتش بوزليمة ( يسأل عنها من هم فوق الاربعين ربيعا ) ولاحتى  ماتش كورة على فلوس ؟!... أماصين ... يا خبر اغبر ياولاد .... هية عركة على توكة ولاطوق ولا ازازة منكير؟! .... اماصين ....يا خبر اغبر ياولاد .... هية اللى جنبى مش عايزة تشيل الشنطة من على التختة وانا مش عارفة اكتب؟! .... اماصين ... ياخبر اغبر ياولاد .... هوه سندوتش عطيتك منه حته وانت مرضيتش تدينى من سندوتشك حته زى ماانا ماعطيتك حتة ؟! ..... أماصين .... ياخبر اغبر ياولاد ... ولاحتى هيه خدت الواد بتاعى منى ولاهوه وقع بينى وبين البت بتاعتى ؟!....أماصين  ياخبر اغبر ياولاد .... أماصين...
مصير البلد مافيهوش أمصة ياعيل منك له .... اتفرجوا ياعالم ... اتفرجوا ياخلق ... اتفرجوا ياهوه .... اللى عايزين الرئاسة أماصين....
 اذا كان الموضوع  بقى كدة ...يبقى ..........هه ياللى مش لاعب... ماشى ماشى  
ملحوظة : اللى حيقولى مين اللى خد سندوتش الجبنة من الكتاتنى .... حأوقفة على الفصل واجيب له مصاصة

السبت، 28 أبريل، 2012

مزاد الدين


مزاد الدين

دينكوا و دين ابوكوا و دين امكوا و دين اسلافكوا .... نزلتوة المزاد... و الا اونا...  الادوى ... الاترى  نشترى الدنيا بالدين نشتريها فمن يبيع ... نشترى الكراسى بالدين نشتريها فمن يبيع ...كدب وخداع وسفاله ..... لوع نسوان وكيد حريم ...ردح شراديح وكهن عاهرات .... بتبيعوا ايه بإيه جاتكوا القرف .
مش دى امريكا الشيطان الاعظم ... مش دى امريكا اللى مش عايزين معونتها ... مش دى امريكا اللى المخلوع كان بيسجد لها ... مش ده الشيخ الشهيد ابن لادن ...مش دى امريكا الوسخة اللى عطت لعيالكوا واخواتكوا وامهاتكو الجنسية .... بتبيعوا ايه  بإيه جاتكوا القرف .
قال والشعب الطيب عايز ينضرب على قفاه زى (حامد ) للمرة المليون وينتخب ابو الافتاح ومصدق بكل هطاله العركة الوهمية بينه وبين الاصدقاء المتأسلمون ....قال ويقولك شفيق ده فلول ... يانهار اسود على العقول المغسولة يابشر .
افخر اننى فلول ... وافخر اننى اكره الاصدقاء المتأسلمون واخواتهم فى الرضاعة ...افخر بأننى سوف ارشح الفريق شفيق ....وكفاية بقى عباطة وهباله ومتاجرة بالدين والشعب الغلبان ... كفاية بقى فيلم الثورة الاهبل اللى مصدقينه ده.
يا اخوانه ... يا خلق هو ... ياعالم ... يابشر ... يابنى ادمين ... فوقوا بقى يوم ماحتخرب مش حتخرب على اللى معاهم جنسية امريكية وخليجية وايرانية والمانية ... حتخرب بس..... على اللى معاه الجنسية المصرية ...
يحيا المجلس العسكرى.... يحيا المشير وعنان ... يحيا الفريق شفيق ... والموت للخونه وتجار الدين.

الجمعة، 27 أبريل، 2012

الجزمة هيه الحل


الجزمة هيه الحل

عندنا بيت فى الفلاحين ... مش عارف احنا بنيناه ليه من اصله ... يمكن علشان الحلم العبيط بتاع الارض والطين والجذور ... يمكن علشان الخوف من الزفة بتاعة شوفوا طوله وعرضة يا ولاد ... عواد باع ارضة ياولاد .... يمكن علشان بنيناة بالطوب الاحمر فى الوقت اللى كان كل البيوت بالطوب النى ... يعنى شوية عواجان على زهو على تفاخر ... المهم انه اتبنى وخلاص ... البيت ده مابنرحهوش غير مرة او مرتين فى السنه علشان ناخد ايجار الارض اللى برضة ما اعرفش احنا اشتريناها ليه ؟ مع ان ولا واحد فينا يقدر يفرق بين البرسيم والملوخية .... القصد ... تعبنا من الفيران اللى بتقرقض البيبان والعفش ... مش نافع معاها لا سم ولا مصيدة ولا لزق ... فقررت انى ادرس سلوك الفيران واتعامل معاهم من وجهة نظر نفسية ... بحكم التوجهات والدراسات ... لقيت ان الفيران طول عمرها فى الجحور ... مخنوقة محبوسة مذلولة ..ولما بتطلع على وش الارض ... الف من يمسك لها الشبشب والجزمة والعصايه ... دا غير الحقيقة العلمية اللى بتقول ان سنان الفيران اللى قدام بتطول مع الوقت فلازم يقرقضوا حاجة علشان لو طولت زيادة عن اللزوم ماتعرفش تاكل ... فقولت انا اتصالح مع الفيران ... احط لهم الاكل واجيب لهم خشبة يقرقضوا فيها ... ويانحله لاتقرصينى ولا عايز عسل منك ..ونفذت الكلام ... وشوية ولقيت الاكل اتاكل ... والخشبة اتقرقضت ... وبرضة قرقضوا البيبان والعفش ... وياريت على قد كدة ... دول جابوا القرايب والصحاب واتلموا حوالين البيت وعملوا مظاهرات ...واحتلوا الميدان... وان كان عاجبك يا اهبل يابتاع علم النفس ... ولانى صاحب قرارى ... ولانى بدافع عن بيتى وارضى وبيبانى وعفشى .... اعلنت الحرب من جديد ... عصيان وشباشب ومصيدة ولزق واحدث جهاز بيعلونوا عنه فى التليفزيون بيشتغل بالموجات الصوتية .... بصراحة تعبت علشان اتخلص منهم ...... بس اتعلمت ... اتعلمت ان الفار اللى عايش طول عمرة فى الجحر ماينفعش معاه تعديل سلوك وشوية الفرم بتاع فرويد وسكنر وبافلوف والعالم دى  .... صدقونى اتعلمت ان الجزمة هية الحل مع الفئران المقرقضون.

الأربعاء، 25 أبريل، 2012

والنبى لنكيد السلطان


والنبى لنكيد السلطان
والنبى لنكيد السلطان ... ونقول اللى ماعمره انقال.... ياكيدينهم .... يافارسينهم ... ياكوينهم .... ياتعبينهم.... ودقى يا مزيكه ..... حزينى....
 ورقصنى ياجدع ...
الفريق اه... الدكتور اه ... الكدابين لأ ... الاستبن لأ... وسمعنى سلام بلادى بلادى لك حبى وفؤادى
الرجالة ... الرجالة بس  ... الملوعين لأ .. سلطان لأ... ابو حظاظة لأ ... وسمعنى سلام راجعين فى ايدنا سلاح.
الكبير قوى ... الاذكياء قوى ... للصغيرين لأ ... للأغبياء لأ  ... وسمعنى سلام ياعينى الواد حيعيط ادى الواد لابوه.
مصر ام الدنيا ... اللى حتفضل مصر .... غصب عن الموتورين ... والمنافقين ...والكدابين... وسمعنى سلام تحيا جمهورية مصر العربية ..... ومن القلب يامعلم

الثلاثاء، 24 أبريل، 2012

اسكتوا... اسكتوا .... مش طلعوا مابيعرفوش


اسكتوا... اسكتوا  .... مش طلعوا مابيعرفوش

هما بصراحة كان شكلهم يخدع ... صحة كدة ونفس وطول وعرض وعضلات ... ولاسجاير ولامعسل ولاتفاحة ...والتزام... ومافيش سهر .. ويصلوا الفجر حاضر ويعملوا بعدة رياضة وجرى  ... وماشاء الله يقعدوا فى العقيقة من دول وهاتك يافارم... إمام يامعلم ... امام جامع بقى .. امام شفعات ... اهو زى ماتحب تحسبها احسبها.....بس يافرحة ماتمت ... خدها الغراب وطار ..... طلعوا فى الاخر ...لوك لوك ..لوك لوك .. وفعل مافيش ....طلعوا مابيعرفوش ...وفى السياسة مابيفهموش ... و الاقتصاد فى غير الزيت والانابيب مانجحوش ...وغير شوية الشعارات مايقولوش ... ويدبدبوا يا الدوار  يامايدخلوش .... وغير اللوع واللف والدوران مايقولوش ... ولو اللمه مش فى صالحهم  مايطلعوش ... ويخافوا على الكرسى لامايقعدوش ...فيجيبوا الاستبن تيوبلس علشان ماينفخوش .... ماهم فى غير الجحور مايعيشوش ... وياصفقات ياميتفقوش ... بس اللى عايزين الدح .... للأح مايقولوش .... دول مش بس طلعوا مابيعرفوش ... دول يابإيدهم اللبوس يا مايلبسوش .... 

ملحوظة هامة جدا :
 الموضوع لا يحتمل اى  ايحاءات تخدش الحياء العام  ...وانا مش مسئول على اللى حيتخدش  

ملحوظة هامة جدا جدا   :
 اتنين بأكرههم عمى ............... الغبى

ملحوظة هامة جدا جدا جدا   :
ابقى قابلنى فى الدستورية العليا يا معلم

الاثنين، 23 أبريل، 2012

الثعلب والديك



الثعلب والديك

برز الثعلب يومـــــــــــا          في ثياب الواعظينــــــا
فمشى في الارض يهدي          ويسب الماكرينـــــــــــا
ويقول الحمـــــــــــــد لله            اله العالمينـــــــــــــــــا
يا عبــــــاد الله توبـــــوا           فهو كهف التائبــيــنـــــا
وازهـــدوا في الطير ان الـــــــــــــعيش عيش الزاهدينــــــا
واطلبـــــوا الديك يؤذن         لصلاة الصبح فينـــــــا

فأتى الديك رســــــول                    من امام الناسكينــــــــا
فــأجــاب الديـك عذرا                   يا أضل المهتدينـــــــــا
بـــلغ الثعلــــب عنـــي                  عن جدودي الصالحينـا
أنهم قالــــــــوا وخير الــــــــــــــــــــــقول قول العارفينــــــــا
مخطئ من ظن يومـــاً                  أن للثعلب ديـــــنـــــــا

ملحوظة :
القصيدة للأمير الشعراء أحمد شوقى ... فمن هو الديك ؟ ومن هو الثعلب ؟ فى الايام الهبلة اللى عايشينها دى ...

الجمعة، 20 أبريل، 2012

خالص العزاء للفريق احمد شفيق


مش ملاحظين... ؟

مش ملاحظين... ؟
مش ملاحظين ان احنا بقالنا سنه ونص بنعمل كل حاجة فى الدنيا غير ان احنا نشتغل.
مش ملاحظين ان احنا كلنا بنفكر ونخطط ونقرر ومابننفذش اى حاجة من اللى احنا فكرنا فيه وقررناه وخططناله .
مش ملاحظين ان احنا بنعمل مليونيات .. يحصل فيها مصادمات وناس تموت ... علشان جايز العسكرى مايمشيش ... او احتمال الانتخبات تتزور ... يعنى مليونيات سببها جايز واحتمال .
مش ملاحظين ان اللى نفسهم يحكموا ماشيين بنظرية معاهم معاهم ... عليهم عليهم ... يعنى لو المصلحة مع المليونيات يبقى طظ فى القانون والشرعية وصندوق الانتخابات ....ولو المصلحة مع الشرعية والقانون وصندوق الانتخابات ... يبقى طظين تلاته فى المليونيات .
مش ملاحظين انا احنا رافضين الشاطر والاستبن بتاعة وبنفكر نرشح ابو الفتوح .... ( مرة واحد صعيدى حب يتجوز على مراته قام لقاها هيه !!!)
مش ملاحظين ان احنا ضد المجلس العسكرى مع ان كل التخوفات من اللى حيعملة كلها مجرد هذاءات وهلاوس  لغاية دلوقت .
مش ملاحظين ان كل قيادات الاخوان انبياء ... يعنى الشاطر يوسف العصر ومرسى لقمان العصر ... دا طبعا على اساس ان احنا اصنام العصر ... الات والعزى واساف ونائلة .
مش ملاحظين مناخير البلكيمى اللى طلع فى المجلس وعطى لنا خطبة جمعة على انة ماكانش قصدة ...
مش ملاحظين ان ابو اسماعين كداب وبجح.
مش ملاحظين انه وجب بقى ان الشعب يقول كلمته ويطرد الكدابين زى ماطرد حسنى .
لو مش ملاحظين تبقى مصيبة ... ولو ملاحظين تبقى المصيبة اعظم.
ملحوظة  :
هيه صعبة ان احنا نهد مجلس الشعب على دماغ ابوهم .... بس سهل قوى ان كل فئة من الشعب ليها نقابة ....تسحب الثقة من مجلس نقابتها الاخوانى ... علشان ماعملش حاجة من يوم ما مسك ... ولا هوه حلال ان احنا نمشى الجنزورى وحرام ان احنا نمشى الاخوان .

الخميس، 19 أبريل، 2012

فوازير نفسية


فوازير نفسية

البارانويا  :
  حالة نفسيّة مرضيّة يملك المصاب بها جهازاً عقائدياً معقّداً وتفصيلياً يتمركز حول أوهام لا أرضيّة واقعية لها.
هذه الأوهام تقنعه بأنه مضّطهد من قبل الآخرين وبأنّ السبب الرئيسي لإضطهاده من قبلهم هو كونه شخص عظيم ومهمّ للغاية!
الجهاز العقائدي المفعم بالأوهام الذي يبتلي به المصاب بالبارانويا يتشكّل ويتطور ببطء شديد وعلى مرّ زمن طويل. ويصبح مع الأيام منظّماً للغاية إلى درجة يبدو معها منطقيا ومقنعا!
والخطورة التي ينطوي عليها هذا الإضطراب النفسي تكمن في أن المصاب به يبدو طبيعيّا أثناء الحديث وفي تصرفاته وسلوكه إلى درجة لاتثير لدى اللآخرين إيّة رغبة لمواجهة المريض وإحالته إلى الجهات المعنيّة بعلاجه.
تتشكّل لدى المريض قناعة مطلقة بأنّه عظيم وبأنّ الآخرين يسعون لإيذائه والحطّ من عظمته. ويدافع عن قناعته هذه حتى عندما تواجهه بكلّ البراهين التي تثبت عدم صحّة تلك القناعة.
عدم الثقة بالآخرين يدفع المريض لتركيز كلّ حواسه على تصرفات الناس من حوله وتفسير كل حركة لهم بطريقة تخدم قناعاته. يبني من الحبة الصغيرة جبلا كبيرا كأن يدّعي عندما يرى شخصا يلوح يده عن بعد بأنّ هذا الشخص يشير اليه ويتكلم للآخرين عنه، وقد يذهب أبعد من ذلك فيدّعي أنه يخطط لقتله.
هذه الأوهام التي يعيشها المصاب بالبارانويا تجعل منه شخصا شكّاكا عنيدا غاضبا عدوانيّا وناقما على الآخرين.
ياترى ده مين ده ؟؟؟؟؟؟؟؟؟