المبادىء مابتتغيرش ياصاحبى
انا عارف كويس قوى ... دا غير انى بأدرسها فى المحاضرات : ان احنا كبشر لسنا ملائكة ( وان كنا احيانا بنبقى شياطين ) نفسويتنا بتلعب معانا الدنيئة ... لما بنتفرج على حد بيتكلم ... اوم ايه تلاقينا كدة نحب نسمع اللى كلامه ماشى على هوانا ... او رأيه ملمس مع رأينا ... وكمان لما الزبون اللى بيتكلم يبقى هيبه كده وكاريزما ربانى ... تلاقينا على طول نسلم باللى بيقوله خصوصا لو كان راجل دين عظيم او عالم جاى من امريكا ... عندك مثلا لما زويل يتكلم فى السياسة ... تلاقينا بنزبهل ونتنح ونوافق على كل اللى بيقوله ... ليه ؟ ... مش علشان هوه فاهم فى السياسة .. لا خالص ... لكن علشان فاهم فى الفيمتوا ثانيه ... اللى احنا مش فاهمينها وكمان عالم امريكانى ونوبل والطحن دة ... وممكن جدا يكون بيقول فى السياسة ريان يافجل اللى بتتقال فى سوق الخضار اللى احنا برضة مش فاهمينه ... وبنشترى البطاطس بالشىء الفلانى لأن مكتوب عليها حيوى .... مع انها يا اخى من نفس قفص البطاطس المرويه بميه الصرف الصحى ... الله ... طاب ماهى مية صرف صحى يعنى حيوى برضه ... حيوى ولا مش حيوى ؟ ...حاسس كدة انى طولت ... معلش ... انا نفسى حاسس انى بقيت رغاى اليومين دول ..ثورة بقى ... او كانت ثورة بقى ... ماهو محدش عارف هيه الثورة راحت فين ؟ ... ولا هيه ماكنتش ثورة بجد زى ما انا معتقد وبأتشتم لما بأقول دى كانت مجرد كرشة نفس...ولا هيه ثورة ماتمت خدها الاخوان وطار . ... برضه خرجت عن الموضوع ... بس ماهو اصل الكل اتهرس فى بعضة ... الشاذ بقى ثورجى ... والثورجى بقى بلطجى ... والبلطجى بقى اخوانجى ... والاخوانجى بقى مجلسنجى ...وكلها بقت بطاطس بوريه والساندوتش بخمسه جنية ..... برضه نرجع للموضوع ... اعذرونى يا جماعه شكلى اتعديت بالشيزوفيرينا ... ماهى الدراسات الحديثة اثبتت ان الشيزوفيرينيا فى مصر بقت وباء معدى ومن علاماته اللت الكتير والدخول فى موضوع الخروج فى موضوع تانى خالص ...شكلكوا كدة حيطلع من المدونه ومايكملش البوست ... لا والنبى ... دا بوست مهم جدا .... خلاص حندخل فى الموضوع ... مش حأتكلم فى الفرعيات زى مجلس الاخوان واقعد اقول سيب وانا سيب .. والجنزورى يمشى وانا اسحب الشاطر وكدهوه .. ولا اتكلم فى مين مامته امريكانيه ولا مين جده سورى ... ( البلد دى كل اللى فيها مخلطين ولا ايه ) ياسيدى ماكله من اجل حفنه دولارات واى حد يمسك ... البليد والشاطر والقبيح ... اى حد ... اى حد ... انا سامعكوا بتقولوا الله يخرب عقلك لخص يا عم الحاج وقول الكلميتن اللى مصدعنا علشان تقولهم ... حاضر حاضر ... صللوعلى الحبيب المصطفى :
شريف سأل احمد شفيق على الحياه الحمرا : انت اللى طلعت قرار بالافراج عن خيرت الشاطر لما كنت رئيس وزارة .... لو رجع بيك الزمن حتفرج عنه برضة ؟
رد احمد شفيق: اكيد حفرج عنه .. المبادىء مابتتغيرش ياصاحبى .
هوه دة البوست اللى كنت عايز اكتبه من الصبح ... انا كدة خلصت .. اتفضلوا بقى خدوا راحتكوا فى الشتيمة والتهزيق والتلطيش والسب واللعن ويافلول وكدهوه ...
بس لن اتنازل : مش كل الفلول فلول ومش كل الثوار ثوار ... بس الاكيد ان كل الاخوان اخوان .
من نعم ربنا عليا اني مبدخلش في جدال محسوم نتيجته :)
ردحذفسؤالي لو الفريق شفيق اتنازل لعمر سليمان في حالة ترشحه (تصريحات منسوبة لشفيق صحفيا ) حترشح عمر سليمان ؟!
سؤال اخير :انا نازل دمنهور بعد شهرين باذن الله ممكن نتشرف بمعرفتك ؟
اولا تنزل بالسلامة وتنور بلدك واكيد حأتشرف بيك
ردحذفثانيا نعم سأرشح عمر سليمان ... وكنت سأرشح منصور حسن لو كان استمر ... القضية عندى مصر مش شخص او ايدولوجيا... والحقيقة اللى ممكن تزعلك منى انى اتمنى ان يكون عمر سليمان رئيسا وشفيق نائبا ... ومش بحب ايام حسنى ولا بطانة حسنى ولا الفلول ولا الليبراليين ولا معلش معلش ولا الاخوان ... ياريت تفهمنى صح
الله يسلمك احنا اللي نزداد شرف حتى لو كنت حترشح واحد بيعتبر الثورة كلها على بعضها مخطط خارجي حيعدمنا كلنا , ممكن ابقى اسلم عليك من العالم الاخر عن طريق مقال خيالي لعلاء الاسواني السبب الاساسي لحبك لشفيق :)))
ردحذفمنصور حسن وشفيق , اختلاف في وجهات النظر لكن عمر سليمان ؟!!!!
من غير معلش ولا حاجة , الحب والكراهية مشاعر خارجة عن ارادة الانسان اصلا متسببة بسببها , بس الحاجة اللي حتجنني ازاي مبتحبش حسني مبارك وايامه وحترشح وزير مخابرات مبارك 18 سنة , متهم بتعذيب المعتقليين بالنيابة عن الولايات المتحدة اللي مكنتش تقدر تعذبهم على ارضها , وضلع اساسي في قضية ابو عمر المصري اللي السي اي ايه هربه من ايطاليا (ايطاليا جكمت على ظباط السي ا ي اايه ) بس طبعا بعد ما غادروا الاراضي الايطالية(معلومة مش استنتاج ) , ازاي قدرت تجمع بين كراهيتك العميقة لاسرائيل وترشيحك لمن يعتبر رجلها الاول في مصر ........ مش عارف ويكيليكس بيمثل حاجة بالنسبة ليك ولا لا بس ممكن الرجوع اليه ولو على سبيل الاستئناس
يمكن علشان معانتش زي مقلت قبل كده في عهد مبارك, بس صدقني في عهد عمر سليمان المعاناة حتبقى ديليفري :))
ده ملوش علاقة بان القضية عندي مش مصر :)) , نقدر نعتبرها شخصية او ايديولوجيا يعني دين وبعدين انا وبعدين مصر :)))))))
تحياتي
واحد من الناس :
ردحذفاولا : نفسى تتأكد انى لو اكتشفت انى غلط فعندى من الشجاعة والرجوله انى اقول انى غلطان ..
ثانيا : حبى لأحمد شفيق ليس بسبب الاسوأيانى ... ولكن لأنى دارس يعنى ايه ادارة ... وفاهم هوة بيقول ايه ... ثم جبى وقبله اقتناعى بهذا الرجل كان بعد سنه واحدة من توليه وزارة الطيران ... وعن وقائع وليس خيالات ..وانا فى مجال الادارة بقالى 15 سنة .. واعرف يعنى ايه ان المدير القائد ذو الرؤية كائن نادر الوجود
ثالثا : قد تكون خصم لعمر سليمان ولهذا تكرهه .. ولكن لماذا تريدنى ان اصدق ان مافعله جريمة من وجهة نظرك ولاتريد ان اصدق انا ما جعلة يفعل ذلك جريمة من وجهة نظرة .
ثالثا : انا لا اعرف ماهى رتبتك فى الاخوان ... ولكن انا متأكد انك لاتعلم كل شىء
رابعا : انا افعل اى شىء قد تتخيله ... الا ان ابيع دينى بدنياى ... فمعنى مصر اولا لاتعنى ان الدين ثانيا ... الترتيب عندى ... الدين ثم مصر ... ثم مصر .. ثم مصر ... اما انا فغير موجود نهائيا فى الترتيب
خامسا : معلومة قد تفيد ... لقد اقتربت بل قل دخلت الاخوان لمدة عام وكان هذا العام يكفى لأن اخرج من الجماعة ... قد اكون مخطىء ولكن مشكلة حياتى انى لا ابيع عقلى لاحد .... صعيدى تقول اية؟!
سادسا : اى كلام تانى يتقال حيخلينى اخسر صديق ذو عقل راشد ولكن بأيدولوجية مختلفة .. لذلك فقد وجب ان اضع فولوستوب فى هذا الموضوع
بيقولوا ان 70% من التواصل هوه عن طريق التعامل وجها لوجه ومن غير ذلك يعتبر من عيوب التواصل , فاعتقد ان فيه سوء تفاهم لكلمات انا مقلتهاش الا على سيل المداعبة البحته وحطيت وراها علامة ابتسامات كتيير دلالة على عدم جديتها والا فمفيش مجنون حيقول انه الاول ثم بلده
ردحذفلم اكن لاهتم بتوضيح كلماتي لولا احترامي ليك , وحعتبر تهديدك بفقدان صديق انفعال ناتج عن سوء التفاهم
ثالثا واحنا في زمن يتمنى الناس الانتساب للاخوان , انا لم انتم يوما واحدا في حياتي للاخوان المسلمين ولا حتى ساعة واحدة
انتهاك حقوق الانسان واعتقاله بدون تهمه او محاكمة مش وجهة نظر دي جريمة مبتتبدلش بتبدل ادوار الفريسة والصياد
تحياتي واعتذاري ووعدي بعدم التعليق مرة اخرى تظرا لان دي مش اول مرة تسيء فهم كلماتي على مدونتك