لحم نبت من تجارة العملة (تانى وتالت ورابع)

لحم نبت من تجارة العملة

لما الواحد مننا بيكدب ... ادرينالينه بيزيد ... فتلاقى وشه يحمر... ويعرق ... وعضلاته تترعش ... ورجله تتحرك لوحدها ... دا غير ان جوارحه بتشتغل لوحدها ... تلاقى عينه مكسورة مش قادر يرفعها فى اللى قدامه وان رفعها تلاقيها زايغة مش ثابته ( افتكر لما كنا صغيرين كنا نقول للكداب : عينى فى عينك كدة ) دا غير انك تتلاقيه دايما يغطى بقه بايدة ... لكن فيه محترفين كدب ... بيقدروا يتحكموا فى ادرينالينهم وفى عنيهم وفى حركات جسمهم .. (افتكر كدة جمعة الشوان لما كان تحت جهاز كشف الكذب ) محترفين يامعلم محترفين .

عموما الكدب عيب ... هوه مش عيب قوى يعنى ... ماكلنا بنكدب ... اينعم بنبرر الكدب علشان نطلع قدام الناس محترمين وقدام نفسنا برضة ... فمرة نقول كدبنا علشان كنا حنروح فى داهيه .. ومرة نقول ماهو لو مكدبناش مش حنعرف ناخد حقنا ... ومرة نقول لو ماكدبناش كنا حنخسر ... ومرة نقول علشان مصلحة البلد .ماهو الانسان كائن مبرر بضم الميم .

الغريب بقى انك تكون داعية اسلامى ... يعنى واجهه للاسلام ... يعنى كلامك كله قال الله وقال الرسول ...يعنى تطفح ابونا على قناة الناس والحكمة وتعلمنا الادب وقول الصدق وفى الاخر تطلع كداب .... برضة مش عيب ما انت فى الاول والاخر انسان يعنى مش ملاك ولا نبى ...لكن تكابر وتعمل مظاهرات وتدافع عن كدبك ... مش عارف .. مش لاقيلك عذر ... وان التمست لك سبعين عذر ... خصوصا انك راجل متعلم يعنى مش سواق ميكروباص .. مع احترامى لكل سواق ميكروباص مابيكدبش.

انا مش فقيه فى الدين وبأصلى بالفاتحة وقل هو الله احد ... بس بأعرف عن دينى اللى يمشينى كمسلم ... فليه سؤال كدة بما انك فقيه وداعية ... فيه حديث عن سيدنا النبى بيقول : "قيل لرسول الله صلى الله علـيه وسـلم : أيكون المؤمن جبانا فقال نعم فقيل له أيكون المؤمن بخيلا فقال نعم فقيل له أيكون المؤمن كذابا فقال لا". رواه الإمام مالك.... الحديث ده صحيح ولا حتقول لى حديث ضعيف ..... بلاش فيه ايه فى القران الكريم بتقول قال الله سبحانه وتعالى: " يَا أَيُّهَا الَّذِينَ آمَنُوا لِمَ تَقُولُونَ مَا لاَ تَفْعَلُونَ * كَبُرَ مَقْتًا عِنْدَ اللَّهِ أَنْ تَقُولُوا مَا لاَ تَفْعَلُونَ ..... بلاش : فيه ايه تانيه بتقول : قال تعالى: أَتَأْمُرُونَ النَّاسَ بِالْبِرِّ وَتَنْسَوْنَ أَنْفُسَكُمْ وَأَنْتُمْ تَتْلُونَ الْكِتَابَ أَفَلاَ تَعْقِلُونَ . صدق الله العظيم ... تفسير الايتين دول ايه ياعم الشيخ والنبى .

عموما انا متأكد ان ربنا حينصر دينه ... والاسلام حيسود العالم ... بس اكيد اكيد مش على ادين اللى زيكوا ........ جاتكوا القرف .

ملحوظة  : مع اعتقادى الكامل بأن حسنى مبارك كذاب اشر ...الا انه لم يتكلم يوما بالدين..... وده مش معناه انى موافق على كل اللى عمله حسنى ... علشان والنبى انا تعبت من كلمة فلول دى ... دا طبعا غير الشتيمة .