الخميس، 30 يونيو 2011

ائتلاف بلطجية مصر

ائتلاف بلطجية مصر

قرر كل من ائتلاف شباب الثورة ... وائتلاف التيار الاسلامى ...و ائتلاف التيار البردعاوى ... وائتلاف برامج التوك شو ... وائتلاف فلول النظام ... ضم جميع هذه الائتلافات تحت اسم : ائتلاف الائتلافات المؤتلفة المؤلفة المولفة المتألفة... ولطول الاسم قرروا اختصارة الى : ائتلاف بلطجية مصر ... وهذه هى طلبات الائتلاف :

الغاء منصب رئيس الجمهورية

الغاء مجلسى الشعب الشورى

الغاء مجلس الوزراء

تسريح الجيش المصرى

الغاء الشرطة والامن الوطنى والقومى واى نوع امن يستجد

الكلمه الاولى والاخيرة لائتلاف بلطجية مصر.... واهوكله علشان دم الشهداء ....

ماعرفش ليه اليومين دول دايما فاكر الشويش عطية وهوه بيقول لاسماعيل ياسين : يالا قدامى يابن العبيطة

سؤال ساذج من مواطن اكثر سذاجة بيكررة للمرة المليون بقايا مواطن مصرى ونفسى حد من المجلس العسكرى يرد علية : هوه فى الدول الطبيعية ... بيستخدموا امتى الاحكام العرفية ؟

ارحمنا بقى يامجلس لجل حبيبك النبى ولم العاهات النفسية ومدعى الثقافة وطالبى الشهرة ولا انت مش واخد بالك ان البلد بتخرب ....على فكرة من اول مالثورة بدأت وانا مش بالع اللى بيقولوا انهم شباب الثورة ... نفختوهم لغاية مافرقعوا فى وشنا ... حسبى الله ونعم الوكيل ... حسبى الله ونعم الوكيل

الجمعة، 24 يونيو 2011

الى مزيد من الاغتراب

الى مزيد من الاغتراب

قبل الثورة ديكتاتورية حسنى ... بعد الثورة ديكتاتورية الاتلاف .... قبل الثورة بلطجة بدعم الحكومة ... بعد الثورة بلطجة برعاية الحكومة ... قبل الثورة الشرطة فى خدمة النظام ... بعد الثورة الشرطة فى خدمة البيوت .. قبل الثورة واقعية الحرامية ... بعد الثورة رومانسية الثوار ... قبل الثورة اعلام بيتاجر بدم الغلابة ... بعد الثورة اعلام بيتاجر بدم الشهداء ... قبل الثورة حراك سياسى.... بعد الثورة عراك سياسى ... قبل الثورة اقتصاد مريض ... بعد الثورة اقتصاد فى الانعاش ... قبل الثورة محدش عارف حاجة ... بعد الثورة محدش فاهم حاجة... قبل الثورة جمال اللى بيحكم ... بعد الثورة التوك شو هوه اللى بيحكم ... قبل الثورة رمضانك عندنا بعد الثورة برضة رمضانك عندنا ... قبل الثورة مؤتمر السكان بعد الثورة زحف العلمانيين ... قبل الثورة خراب ... بعد الثورة دمار ... قبل الثورة حسنى فى شارم بعد الثورة حسنى برضة فى شارم ... قبل الثورة الجالية المصرية فى مصر .. بعد الثورة حق اللجوء السياسى للمصريين فى مصر ... قبل الثورة تقوقع بعد الثورة تشرذم ...... قبل الثورة مصر مرات ابويا ... بعد الثورة مصر مرات ابويا التانية ... قبل الثورة الزمالك التانى ... بعد الثورة الزمالك برضة التانى ... قبل الثورة تحيا مصر ... بعد الثورة تحيا مصر او تموت ماعدتش فارقة كتير ...

من الاخر ... قبل الثورة اغتراب ... بعد الثورة مزيد من الاغتراب ...

(يارب اكون غلطان وكئيب ومتشائم ومش فاهم اى حاجة كالعادة )

الأربعاء، 22 يونيو 2011

حكمة سعد وولدة

حكمة سعد وولدة

<!--[if gte mso 9]> Normal 0 false false false EN-US X-NONE AR-SA

من العادات السيئة اللى اتعلمتها من صغرى ....عادة قراية التاريخ ... قراية التاريخ رغم ان فيها عبر ومواعظ ... بس فيها عيب خطير ... العيب ان التاريخ بيعيد نفسة بدرجة تخنق ... عاملة زى الافلام بتاعة اسماعيل ياسين ... اللى حفظتها بالسيناريو والحوار والاضاءة والمكساج والمونتاج والتترات كمان ... ورغم انى حفظتها ولا الحفظ المركزى ... بأجرى علشان اشوف الفيلم من اوله لما بيتعاد للمرة المليون ... غريبة مش كدة ... خد الاغرب .... وانا قاعد اتفرج على الفيلم بقول الافية قبل مايقولة اسماعيل ياسين وبرضة اضحك ... اعمل حركاته قبل ما يعملها وبرضة اضحك ... وعارف نهاية الفيلم وبرضة افضل متوتر ومشدود ... الاغرب والاعجب والاهبل ... انى اقوم من قدام الفيلم بعد مايخلص مبسووووط او عامل مبسووووط ... ودة اللى بيحصل معانا نحن شعب مصر المحروسة بالظبط .... من ايام مينا موحد القطرين لاحمس طارد الهكسوس ... وهوه هوه اللى بيحصل برضة ...من ايام ايبك وبيبرس واقطاى ... لأيام محمد على باشا والملك فاروق لمجلس قيادة الثورة وعبد الناصر والسادات وحسنى ... و هوه هوه اللى حيحصل مع اللى جاى ان كان ابو البرادع ولا ابو الامواس .... هيه هيه نفس الافيهات ... هيه هية نفس الحركات ... نفس الاضاءة ونفس المكساج والمونتاج والفلول والاجندات والفزاعات ... وهية هية الحكومة اللى عاملة نفسها مش واخدة بالها ... كل اللى اتغير ان الفيلم بقى بتقنية الدولبى والابعاد الثلاثية... وبرضة الشعب بيكرر الافيهات ويضحك ويمثل الحركات وبرضة يضحك والاغرب والانكت والاعبط .... انه مبسووووط او عامل مبسووووط ... محدش عايز يتعلم من التاريخ ... محدش عايز يتعلم من حكمة سعد زغلول لما قال : مافيش فايدة.... ولا حتى من حكمة ابنه ............. محمود سعد لما قال : اشرب العصير ...

ياشعب مصر الحبيب : اشرب العصير .................... وادينى كوباية