الاشاعة2
زى ماشوفنا امانى فى البوست اللى فات لما طلعت اشاعة على سامية انها ماتت ...دا طبعا لانها مابتحبهاش ومتغاظة منها ... ونفسها تعمل فيها اى حاجة ... وطبعا لانها ماتقدرش تطلع قدام نفسها وحشة وشريرة ... ولا قدام صاحباتها غيارة ولا يطلع عليها انها كيادة وغلاوية ... يبقى مافيش غير الاشاعة هيه اللى تشيل الغطا من على حلة الميه اللى بتغلى علشان ماتنفجرش ... واهو منها نشفى غليلنا ونطلع اللى جوانا ... ومنها نبان طيبين وعسولين وزعلانين على اللى جرى لصحبتنا اللى اتخطفت فى عز شبابها ياكبد امها ... وبكدة بقينا ملايكة قدام نفسنا وقدام الناس .. ولوحد فكر يقولها انت قولتى كدة ليه على ساميه ...على طول حتقول ... هو انا عملت ايه يعنى ... انا قولت اللى سمعته زيكوا بالظبط .والاشاعة مش بس تفريغ انفعال كاتم على مراوحنا ... لا .. دا كمان اسلوب لايجاد تفسير معقول يقبله العقل البشرى ... لان البنى ادم مايقدرش يعيش من غير مايفهم ويفسر اللى قدامة ... وان ماعرفش الحقيقة ... يألف هوه حقيقة ويصدقها ... مثال علشان مانتلخبطش : زمان ولغاية دلوقتى والله ... القمر ساعات كدة كان يزرد ويبقى لونه برتقانى ... الناس ماكنتش لاقية تفسير ... فيعملوا ايه ... يسكتوا ولا يقولوا مش عارفين ... ماينفعش ...فراحوا مفسرين الظاهرة دى على ان الشياطين بتمسك فى رقبة القمر وتخنقة ... مش بس كدة .. دول لقو للموضوع ده حل ... خدوا غطيان الحلل وطلعوا على السطوح وقعدوا يخبطوا علشان يخوفوا الشياطين ويخلوهم يسيبوا رقبة القمر .
القصد الاشاعة ليها معادلة ... لو اتوفرت بقت اشاعة واتنشرت ولعلعت ... الاشاعة =الغموض *الاهميه ...مثال برضة : حالة الرئيس السابق الصحية ( غموض )... عايزينه يتحاكم ويروح طرة ( اهمية ) تساوى ...1 الرئيس هرب الى اسرائيل عن طريق الموساد
2 الرئيس راح اتعالج فى تبوك ورجع بعد المليونية التالته ولا الرابعة مش فاكر
3الرئيس يحتضر ويطلب رؤية حفيدة
5 الرئيس مش فى مصر اصلا من بعد الثورة .
ومعاك بقى للصبح يا معلم ... ماهو فيه ناس عايزة تورينا انها تعلم بواطن الامور ... وقايمة نايمة فى المخابرات ... ومافيش معلومة تقدر تعدى من تحت ايديها .... وفيه ناس كدة تحب تسخن القاعدة وتروش الليلة ... وياسلام بقى لو شوية صحافة على توك شو ... تولع يامعلم .. ماهوتخيل انت واحد قاعد متوقع اخبار ودماغة عماله تودى وتجيب ... وولا على حامى ولا على بارد ... وواقف على ضوافرة ... جرب كدة وقوله اى حاجة .... بس شكلها يركب ويمشى ويعقل ... حيصدق على طول ... مش بس حيصدق ... حيردد ... وينشر ... ويزود ... وهيييييييه هيصة ....اللى يحب النبى يقول هييييييييييه.
والى القاء فى الحلقة القادمة من الاشاعة .
ليست هناك تعليقات:
إرسال تعليق