الاشاعة
مصر اليومين دول مافيهاش اى نوع من انواع التطور الانسانى الا فى موضوع الاشاعة .... ماهو بينى وبينكوا الاشاعة ان ماكانتش تظهر فى اليومين دول حتظهر امتى والنبى .... القصد .. الاشاعة دى شكل من اشكال التعبير الانسانى ... يعنى موجودة فى كل المجتمعات ... بس مابتزيدتش الا فى ظروف معينة ... حرب ..ثورة ... وباء ... انفلات امنى .. انفلات حزبى ... انفلات اخلاقى ... اهو اى انفلات وخلاص ...وعلشان نفهم الاشاعة لازم نفهم معنى مصطلحين ... الاول الادراك ودة كان ليه بوست اللى عايز يقرأه يتفضل ... والمصطلح التانى هوه الاسقاط .... يعنى ايه بقى اسقاط ياعم الخبير ...الاسقاط ده بقى موجود فى كل البنى ادمين ... ويبان قوى فى الاحلام ... يعنى البنى ادم اللى احساسة بالدونية والنقص تاعبة ... تلاقيه يحلم بانه بطل فى حلبة ملاكمة وبيغلب تايسون ومحمد على كلاى بالقاضية .... والاسقاط مش بس فى الاحلام ... دا كمان فى احلام اليقظة ... يعنى تلاقى الواحد من دول ممدد على السرير وباصص للسقف وعايش يامعلم .. بيحقق فى امال ورغبات وماسك النجوم بأديه ... والاشاعة بقى زى احلام اليقظة كدة بس بكلام يتقال بطريقة تمشى مع اللى احنا عايزينه ... ومش قادرين نعمله ... فبنعملة بالاسقاط اللى هوه نعمة من نعم ربنا علينا.... لانه بيرحمنا من وجع الضمير ... بالبلدى كدة التانى هوه اللى جزمة ابن جزمة لكن احنا فله شمعة منورة لان الغلط اللى احنا بنعمله حاجة بسيطة خالص قدام الخطايا اللى بيعمله التانى ....عموما الاشاعة هى انعكاس للحالة الانفعالية من غير مانحس تخلى الواقع اللى حوالينا ماشى مع اللى احنا عايزينة فنصدقها وننقلها ...ومثال على كدة قصة واقعية بتحصل كل يوم .
اتجمعوا المعازيم فى فرح ... من ضمن المعازيم امانى ... امانى دى مابتحبش سعاد ... عادى جدا .... نشوف ايه اللى حصل .
منى سألت دعاء : هيه فين سعاد ؟ .. ماجتش ليه ؟ الا تكون عايانه ولا حاجة ؟
دعاء سألت امانى : هيه سعاد عيانة زى مابيقولوا ؟... يارب حالتها ماتكونش وحشة ؟
امانى قالت لنجلاء : سعاد عيانة وشكلها كدة حالتها وحشة خالص ..
نجلاء قالت لهناء : سعاد عايانه قوى انا لازم اروح اتطمن عليها .
هناء قالت لساميه: سعاد شكلها كدة بتموت ... دى طالبه نجلاء علشان توصيها..
نور قالت لساميه : افردى وشك يابت ليقولوا عليكى طامعانة فى العريس
ساميه : والنبى بلاش هزار يا نور ... سعاد بتموت وطالبه تشوف عيالها
نور : مايسة ماتعرفيش سعاد ماتت امتى ؟
مايسة لمنى : عرفتى ان سعاد ماتت الصبح واحنا مانعرفش .. انا حامشى بقى علشان الحق العزا وابقى اعتذرى للعروس
منى :شافت سعاد وهية داخلة من الباب راحت عليها جرى وحضنتها : ايه الاشاعة البايخة دى ... دول قالوا انك متى... مين طلع الاشاعة دى .؟
سعاد : اكيد فيه حد حيبقى مبسوط من الاشاعة دى ؟؟!!
والى اللقاء فى الجزء التانى من الاشاعة
ليست هناك تعليقات:
إرسال تعليق