الثلاثاء، 31 مايو 2011

شلح واجرى

شلح واجرى

ستى الله يرحمها كانت تقول البلد اللى محدش يعرفك فيها شلح واجرى فيها .... مثل بلدى يحتاج لدراسة عميقة .... هل معناه ان المجتمع بيكبت الرغبة فى التشليح ... ولا معناه ان البنى ادم بطبعة مشلحاتى بس عامل نفسة محترم ومستنى فرصة يشلح فيها.... ولا مفهوم التشليح بيختلف من بلد لاخر ... ولا التشليح دة حاجة عيبة فى حد ذاته وعشان كدة المجتمع اللى ليه قيم ومبادئ مابيسمحش بيه ...واذا كان المجتمع عندة قيم بتقول ان عيب ان البت تبات فى الشارع للصبح لوحدها ... خصوصا ان مافيش سراير فحتضطر تنام على الرصيف .... يبقى دة مجتمع متخلف واحنا لازم نغير القيم العبيطة دى ...ولا لازم نحترم القيم دى ونرسخها بدل مانهدها لغاية ماتتهد على دماغ ابونا ....ولا ندافع على باطل ونقول : وايه يعنى لما البت تبات فى الشارع على الرصيف لوحدها!!... ايه مافيش حقوق انسان ولا ايه ؟احنا فى عصر الحرية احنا فى ثورة...

على فكرة الكلب .. الكلب ابو ديل ده ... اللى بيقعد يهبهب ... ويطلع لسانه ويلهث ... مابيسمحش لاى كلب تانى يقرب من كلبته ... يكله كدة اكل ... هه الكلب عندة نخوه ... خدها منى ... انا بيطرى وعارف بقول ايه .... شوية نخوة يا عالم ... ينهار اسود ومنيل وصل بينا الحال ان احنا نتمنى نبقى زى الكلاب ... شوية نخوة يارجاله ...شوية عقل فكروا ومتكرروش كلام لمجرد انه جاى من منظمات حقوقيه ... حقوقيه على نفسهم .... على ما اعتقد ان البنات والستات السويات ....هه السويات ...حيوافقوا على كلامى قبل الرجاله اللى عندهم نخوه ...هه اللى عندهم نخوه .....

( مجروحين قوى انهم كشفوا على عذريتهم ... دا لو كانوا كشفوا عليها فعلا ... وبابا واخويا مش مجروحين فى نخوتهم لما يسيبوا بناتهم نايمين فى الشارع وسط اغراب) على رأى الشاعر : من يَهْنْ يَسْهُلُ الهَوَانُ عليْه مَا لِجُرْحٍ بِمَيِّتٍ إيــــلامُ

لا سلف ولا اخوان : العزة فى طاعة الله .... العزة فى طاعة الله ... وربنا يهدك يا حمزاوى انت ومرشحة الرئاسة وايناس وخالد وكل اللى زيكم قادر يا كريم

المليونيات .... واشياء اخرى

المليونيات .... واشياء اخرى

1. حارب فى 73 وماحدش كرمة ولا جاب سيرته.

2. عايزه تتجوز اللى بتحبة وابوها مش راضى .

3. اتدبس فى جوازة سعودى ... واكتشف فرق الثقافات السريرية ( ياسيدى اهو كله بيرسم).

4. سابها واتجوز صحبتها علشان عندها شقة .

5. عنده اربعين سنه ولابيشتغل ولا متجوز ولا عندة امل .

6. العيال بيهزأوه فى الحارة على الرايحة والجاية ويقولوله يابن النتافة .

7. عايز يبقى له موقف .. ماهو زهق من العيشة المستريحة اللى من غير مشاكل .

8. لسه وا صل له انه يطلع.

9. عايزة تلبس زى البنات .

10. بطنه بتقرصة من الجوع وبتصحية من عز النوم .

11. عايز يحس انه بنى ادم .

12. كويس وشاطر بس محدش مقدر عبقريته ودايما كارفينة .

13. مديرة بيذله زى ما يكون خدام عند ابوه .

14. عايز يطلع فى التلفزيون ... يمكن مخرج يشوفة فيشغلة فى السيما .

15. عايزة تطلع فى التلفزيون ... يمكن مخرج يشوفها فيشغلها فى السيما .

16. عايز يزوغ من الامتحانات علشان مش مذاكر .

17. عايزها تفضل والعة علشان يقلب رزقة ويعمل اللى هوه عايزة ويبلطج .

18. عايز يطلع فى التوك شو ويعرض مواهبة فى الهلفطة واخر الحلقة ياخد الظرف .

19. فرصة يعمل قرشين من بيع السوبيا والعرقسوس .

20. عايز ياخد العيال والولية يفسهم ببلاش بدل ماهم عايزين يروحوا كارفور .

21. اه نسيت....... نفسه البلد ينصلح حالها وميبقاش فيها فساد .

علشان الكلام يبقى واضح وأوفر على قارئى النوايا وعباقرة السيناريوهات وصله السب واللعن ...انا بتكلم عن مليونيات مابعد مليونية الثورة .

الاثنين، 30 مايو 2011

دىكمان لسه صلاحيتها ساريه

الادراك

مافيش بنى ادم فى الدنيا زى التانى ....حكمة ربنا...اللى مش عارفين نستوعبها ...لكن لو استوعبنا الحكمه دى وفهمناها واقتنعنا بيها ... مش حتلاقى حد بيتعارك مع حد ... ولا حد بيشتم حد ...ولا حتلاقى زوجة بتنكد على جوزها ... ولا جوز بيطلع عين جوزته ...ساعتها لا حنصنف بعض ولا حنخون بعض ....طبعا انا بتكلم هنا عن الناس الاسوياء اللى مش متعمدين الظلم والفساد وركوب الامواج وتغيير الايدولوجيات عن عمد ... ولا باتكلم عن اللى ليهم اجندات خاصة ... بغض النظر عن كلمة اجندات اللى بقت سيئة السمعة .

الدنيا حوالينا من سما لارض لجبال لقمر ...موجودة وكلنا شايفينها .... بس كل واحد مدرك الحاجات دى غير التانى خالص ... كل واحد مستقبل الحاجات دى بطريقة مختلفه ... نمسك القمر مثلا .... القمر عبارة عن قرص دائرى معلق فى السماء يبعث ضوءا فضى ويظهر فى الليل بعد غروب الشمس... هذه هى حقيقة القمر المجردة .... ولكن ... واحد عايش قصة حب لاول مره ... حيشوف ان القمر فيه ملامح من حبيبته ...وبيبعت شعاع يدى جو من الرومانسية على شاعرية زمن ضاع فيه الحب وبقى تيك اواى ... ربنا يسهل والثورة تقدر ترجعه .... واحد سلفى مابيشوفش فى القمر غير انه وسيله نعرف بيها اول الشهر الهجرى علشان الصيام والحج والعيد ....واحد فى كلية العلوم كل امله انه يشتغل فى ناسا... يشوف القمر انه براكين وحفر وجزء ضلمه ساقع تلج عايز يعرف فيه ايه .....وواحد اهبل شايف ان القمر اهم من الشمس علشان بيطلع باليل ينور الدنيا لكن الشمس ملهاش لازمة علشان بتطلع بالنهار والدنيا منورة .... وواحدة عايشة فى زمن المخلل تطلع فوق السطح تخبط بغطيان الحلل علشان تطفش العفاريت اللى خانقة القمر ومخليه وشه مزرود يا حبة عين امه ....وغيرة وغيرها ... كل واحد بيشوف بطريقته ويدرك الامور بمعرفته .....

الادراك بقى باللغة العربية الفصحى يعنى : عملية استقبال المثيرات الخارجية وتفسيرها بواسطة الفرد تمهيدا لترجمتها الى سلوك .

اهى هية سلللللللللللللووووووووووك دى .... الراجل اتصرف او عمل سلوك معين نتيجة لادراكة للشىء بطريقة معينه ... الدنيا ماتهدتش يعنى ....

طاب هوه فيه حاجات بتأثر فى الادراك دة ؟ طبعا .. اهم حاجة المعرفة ... يعنى لما تعرف ان القمر بيعكس نور الشمس ... مش حتقول ان القمر احسن من الشمس ...الحاجة التانية اللى بتأثر على الادراك... البيئة المحيطة بيك ... يعنى الواحد لو عايش فى بيئة شرقيه حيد رك ان اخته قاعدة مع زميلها بطريقة غير اللى حيدركها عم الامريكانى ... وبالتالى السلوك بتاع كل واحد حيبقى غير التانى ....دا كمان تلاقى الاختلاف بين الاخوات فى العيلة الواحدة ...تلاقيهم مختلفين فى ادراكاتهم ووجهات نظرهم .....تاثير الوظيفة او المهنه ... وبرضة الاحتياجات اللى بيشعر بيها البنى ادم ونفسه يحققها بتاثر هية كمان على الادراك ... الحلاق مثلا نفسه يجز شعر الزبون علشان يقبض .. فاول حاجة يشوفها ويدركها فى الراجل اللى داخله ...راس الزبون وشعرة ...

من مواصفات الادراك ان البنى ادم مننا وبدون مايشعر بيلم الحاجات اللى زى بعض مع بعض ... يعنى لو شاف شاب روش من ابو بوكسر ...ويشوف منه تصرفات مش مظبوطة ... يقوم يعمم ويقولك ... كل الشباب هايف وتافه ... رغم ان فيه شباب زى الورد عملوا ثورة ماكانتش على البال ولا الخاطر ( بدون تعميم هه)...

من مواصفات الادراك كمان ان الانسان بيدرك بطريقة اختيارية ... يعنى بالبلدى بمزاجة يعنى مابيدركش او يتجاهل بعض الاشياء مع انها بتكون واضحة زى الشمس ... يا اما لانها مش مهمه بالنسبه له ... يا اما علشان هوه مش عايز يشوفها اصلا ... زى الرئيس السابق كدة ماكنش عايز يدرك ان الشعب مش عايزة ...

هنا بقى يجيى السؤال المهم ...هوه ممكن الادراك يتغير .... طبعا ممكن وممكن جدا كمان .... بس لو استبعدنا ركبان الدماغ ...والخوف من انه يتقال ان احنا غيرنا كلامنا .... والكبر والعنجهيه ...وشوية الكلام الفاضى اللى لا بيودى ولا بيجيب ده .... ولان الادراك بيجى عن طريق المعلومات ...فاذا غيرت المعلومات حيتغير الادراك ... وكمان لو بصيت للامور بنظرة عامة مش نظرة خاصة..يعنى ماخليتش احتياجاتى ورغباتى الخاصة تتحكم فيه .... بالتالى ادراكى حيبقى اوقع وشمل ...مثال من الحياة ... فيه ناس ادركت ان الرئيس السابق راجل وطنى وصاحب الضربة الجوية وليه انجازات ماحدش يقدر ينكرها ..فدافعت عنه باستماته ... لكن لما وصلت لها معلومات انه كان عارف اللى بيحصل من فساد...وان ملف التوريث بمباركتة...اتحول الادراك من حسنى مبارك البطل الى حسنى مبارك الديكتاتور الفاسد .

الأحد، 29 مايو 2011

تم نشرها فى 17 فبراير ,,, ومازات صلاحيتها سارية

مينى فراعين يظهرون على المشهد

فجائية الثورة وسرعة نتائجها وتتابع تغيراتها ... عملت نوع من اللخبطة لمفاهيم وموروثات وافكار وادراكات راسخه فى عقولنا بقالها سبعين تمانين سنة ... قلبت ردود الافعال واساليب التفكير رأسا على عقب ... خلت كل واحد فينا متوتر مش عارف ينام ولا يقعد ولا يقف ولايشتغل .... خلت كل واحد فينا مش قادر يفكر ولا يحلل ولايوصل لنتائج .... خلت كل واحد فينا قاعد ليل نهار يعيد حسباتة مع نفسه قبل مايعيد حسباته مع الواقع اللى اتغير .... ويسأل ... ياترى اللى كنا بنعمله قبل الثورة ده صح ولا غلط ؟.... احنا كنا جبنا ولا اللى قدامنا اقنعونا بكدة .... ؟ احنا كنا فاهمين بس مش قادرين نعمل حاجة ولا ماكناش فاهمين من اصله ؟ ....احنا حابين الثورة علشان حسنى وجمال وعز مشيوا ولا حابينها علشان خلاص حنفوق ونكبر ونعلى ونبقى بنى ادمين يعملوا حضارة بجد ...مش يشغلوا حضارة مشحوتة من برة ....ياترى احنا لازم نتغير فى عشرين يوم زى الثورة ما اتعملت فى عشرين يوم ولا المسأله عايزة وقت ؟ ... عموما انا شايف ان فيه ناس كتيرة قوى محتاجين وقت علشان تلم شتاتها وتعرف هيه رايحه على فين... محتاجين وقت علشان يوصل لهم ان فيه ثورة حصلت وان الدنيا بتتغير وبسرعة .... القصد ... اللى قدر يتغير بسرعة واللى لسه عايز وقت علشان يتغير ...واللى مش عايز يتغير من اصله ... كل دول محتاجين حاجة واحدة بس ... محاجين مازورة موحدة ... مازورة كلنا نقيس بيها ... مش كل واحد معاه مازوتة زى زمان ... مازورة واحدة نقيس بيها احنا عايزين ايه ... عايزين مصر بجد ولا عايزين نرجع زى الاول ..شطارة وفهلوة ومحسوبية ... عايزين نبنى مصر بجد ولا عايزين نبنى على الارض الزراعية اللى بتوكلنا .... عايزين نغير افكار واشخاص عقيمة ولا عايزين شماعات جديدة تقدر تستحمل الخيبة والعجز والكسل وقلة الحيلة ... عايزين نفهم ان كل يوم يعدى من غير شغل حيضيع مستقبلنا ومستقبل عيالنا ولا عايزين نهبهب وخلاص ... عايزين نفكر ازى نكبر ولا عايزين نهلفط وخلاص...عايزين ناخد حقنا ولاعايزين ندبح ونسلخ ونشمت ونعلق على باب زويله....

فى النهاية لم ولا ولن نتفق على اشخاص .... عادى جدا هيه جديدة علينا بس عادى جدا ... ولكن يجب ولا بد وحتما ولزمن ومن كل بد ....ان احنا نتفق على مصر .... علشان لو مصر ضاعت ... احنا حنضيع معاها ..... تانى وعاشر ومليون ومن قبل الثورة باقول وحفضل بعد الثورة حاقول : ايها الاعلاميون .... ايها الصحافيون ...ايها السينيمائيون ... ارحمونا بقى لجل خاطر النبى ...خلى دوركوا اللى جاى تثقيف الشعب وتعليمه وتصحيح ادراكاته ومفاهيمة ... ماتخليش دوركوا انكوا تجيبوا سبق صحفى او اعلامى وتعرفوا هوه الرئيس السابق دخل الحمام النهاردة ولا كان عنده امساك ...ماتخليش دوركوا انكوا تصفوا حسابتكوا مع اللى فات ... مش دوركوا انكوا تطلعوا تعيطوا على الشاشة وتقولوا احنا كنا مقهورين ومحبوسين ... ماحنا كمان كان طالع عين ابونا ...والاهم... والاهم جدا ...بلاش تطلعوا فراعين جداد ... حتى لو كانوا الشباب اللى عملوا الثورة .... كفاية بقى تعبنا .

فكر تكسب :

انا معايا الف ومتين جنية ... الحد الادنى للاجور ... وقدامى اربع ارغفة ...بيبقى الرغيف بكام ؟ ... يبقى الرغيف بتلتميت جنية .... برافوا ..... طيب لو انا باخد ربعميت جنية... وقدامى اربعين رغيف ... يبقى الرغيف بكام ؟ ... يبقى الرغيف بعشرة جنية ... برافووووو

سؤال المسابقة بقى : ايهما اوقع واعقل واصلح ... ازود الفلوس ولا ازود الانتاج ؟؟!...

اعمل مظاهرات ولا ارمى بذرة واقف على مكنة الطحين ؟

فى الكويت الراجل بيقبض ميت دينار بيكفوه وبيزيدوا ... وفى موزمبيق المواطن بيقبض ميت الف زرزور ...ومابيكفيهوش

الأحد، 22 مايو 2011

مصمص وأزواجها الخمسة

مصمص وأزواجها الخمسة

البت مصمص ...عاشقة وغلبانة ... اتجوزت ياحبة عين امها اربع مرات منهم واحدة عرفى ... ما داميتش يا ضنايا يابتى ....ماهو الراجل كان عجوز وصحتة على قدة ... وطيب كدة ومنكسر ماقدرش يحميها لما زاغت فى عين جوزها التانى اللى طلقها منه واتجوزها هوة .... بس محدش مخلد فى الدنيا ... حتى لو سمى نفسة الخالد ... واتجوزت مصمص الجوازة التالته ..راجل طول بعرض ... هيبة ومنظر حاجة كدة تسر القلب .... حق الله الراجل ماكنش حارمها من حاجة ... جاب لها حاجات كتير من اللى نفسها فيها .... بس المكتوب مامنوش هروب ... اتنش الراجل رصاصة وهوه قاعد فى حفلة طهور الواد عبود ....وعلشان محدش يقدر يقول للنصيب لأ والمكتوب على الجبين لازم تشوفة العين ....اتجوزت الرابع .... اهوه بقى ... لاضاها ياكبد امها ... وهزأها بين جيرانها ... مرمطها ومرمط عيالها ...كان يرميلهم الفتافيت .. وهوه يكنز على قلبة ... لأ ويعايرهم كمان....واستحملت البنية ... ماهى طول عمرها مستحملة ... لكن عيالها اسم الله عليهم... ماشاء الله كبروا وماعدوش يتحملوا بهدلتهم وبهدلت امهم ... ووقفوا لجوز امهم ... وحتطلق يعنى حتطلق ....... القصد الراجل سمع الكلام و طلق ... مصمص يا ضنايا اتهيئلها انها استريحت ... بس على رأى المثل قولت للنحس انا رايحه اتفسح ... قالى معاكى هوه انا مكسح ....ماهى مصمص ماتقدرش تعيش من غير جواز ...اه ... ماهو كل اللى حواليها طمعانين فيها ... سبحان الله... رغم السنين والبلاوى اللى شافتها ... لسة ولابت عشرين سنة ... ماطولش عليكوا ...مصمص قالت فى نفسها يابت ماقدمكيش غير فتوة الحارة .... راجل وسيد الرجاله حمش وجد ومالوش فى الهلس ....يقف جنبك ويحميكى ويحاجى على عيالك الاشقيا اللى مابيعجهمش العجب وكل يوم والتانى يمسكوا فى بعض ......واتجوزت مصمص من فتوة الحارة ... أول مرة تمنى نفسها بالامان والحب والهدوء ... لكن يا فرحة ماتمت خدها الغراب وطار ... هما الرجاله كدة كلهم خاينين وعينهم زايغة تندب فيها رصاصة..... اه.... على رأى المثل يا مأمنه للرجال يا مأمنه للمية فى الغربال ... مصمص قالت انا لازم اسيبه ... بس رجعت وقالت فى نفسها ... يابت اتلمى ... وماتخربيش بيتك بايدك ... ماكل الرجالة على دا الحال ... المهم مش بيرجع ينام فى حضنك؟ ... خلااااص ...وبعدين يعنى انتى فاكرة لو اتطلقتى المرة دى ... حتلاقى حد يرضى بيكى انت وعيالك .... تبقى خاااااااايبة ... حتبقى متجوزة خمس مرات قبل كدة وعيالك ينفتلهم بلاد .... مين والنبى اللى يرضى بيكى .اعملى يابت نفسك مش واخده بالك .... ومشى ايامك.... واكسبية يا خايبة.. واوعى تفتكرى ان عيالك حينفعوكى ... دا كل واحد فيهم بكلمة .. كل واحد فيهم مابيفكرش غير فى نفسة .

صعبانه علية مصمص ياجماعة والله ... وعيال مصمص برضة... ولو انهم اشقيا قوى... بس غلابة مخهم على قدهم ... الهى وانت جاهى .. تسترها مع مصمص وتريح بالها وتهدى سرها وتطمن قلبها وتعوضها على كل اللى شافته ...قادر يا كريم .

طبعا دى امنيات ... ودعوات .... لأن الهدوء وراحة البال دة محصلش ولابيحصل ولا حيحصل لمصمص ... نصيبها ...كله مكتوب ........ اعترضوا بقى !!؟؟

فكرة العزيزة ريم سلامة