الأربعاء، 27 أبريل 2011

مغلق للتحسينات



مغلق للتحسينات

قريت عن ثورة 23 يوليو فى كتب التاريخ اللى كانت الحكومة بتسلمهالنا كل اول سنة دراسية ... وشوفتها فى فيلم رد قلبى.. والايدى الناعمة بتاع طوبة فضة وطوبة دهب..دا غير سلسلة افلام الثورة اللى من انتاج الاعلام الموجه... واتعلمت من كتب التاريخ ومن الافلام انى ما اصدقش كل اللى بيتقال ... حتى لو سمعته بودنى وشفته بعينى ... ماكله موجه يا معلم .وحضرت احداث يناير ... او ثورة 25 يناير علشان ائتلاف شباب الثورة مايزعلش ويحطنى فى القائمة السوداء ....واتلخبطت زى ماكله اتلخبط وفوجئت بالفساد زى ما كله اتفاجئ... وتفائلت بالأستفتاء زى ماكله اتفائل ... وتشائمت بالاعلان الدستورى زى ما كله اتشائم ... وطلعت ونزلت ... وشوفت وسمعت ... واتعلمت .... تانى اتعلمت انى ما اصدقش كل اللى باسمعه ... حتى لو سمعته بودنى وشفته بعينى ...واتعلمت كمان ان البنى ادم ...هوه البنى ادم ...فى مصر فى امريكا فى ليبيا فى السند ....هوه هوه البنى ادم ... دلوقتى ...بكرة ... امبارح ... من ميت سنه ... بعد ميت سنه ... هوه هوه البنى ادم .... استاذ ورئيس قسم اشتغاله نفسه ...دايما يطلعها هيه اللى عبقرية ...هيه اللى فاهمه ... هيه اللى عارفة .... واللى حواليها ... هما الاغبية ... هما اللى مش فاهمين ... هما اللى مش عارفين ... اتعلمت ان البنى ادم هوه الكائن الوحيد اللى مابيشوفش غير مصلحته ونزوانه ورغباته .... هوه الكائن الوحيد اللى عندة استعداد يقعد ميت سنه يقنعك ان الشمس مش موجودة فى السما رغم ان الضهر بيدن ... اتعلمت كمان ان الثورة اللى بجد بجد ...هيه الثورة على النفس .... اللى مبادئها جاية من عند ربنا .... الثورة اللى بجد هيه اللى يكون عندنا قيم ومبادئ واخلاق .... الثورة اللى بجد هيه ان احنا نبطل نشتغل نفسنا ... ونبدأ نشتغل على نفسنا .... ان احنا نعمل بمبدأ طوبى لمن شغلته عيوبه عن عيوب الناس ...احنا محتاجين ميت 25 يناير علشان نصلح نفسنا ... والعمر بيجرى ... والوقت ضيق ...وحصرم الندم على اللى بيفوت مر علقم والله علقم ....ومن يتق الله يجعل له مخرجا ...ومحدش بيغير حد ...حتى ربنا مابيغيرناش الا لما احنا نبدأ ونغير نفسنا ... وأول الطريق..بناء البنى ادم قبل حتى مانحفر ممر التنمية .

وعليه فقد قررنا نحن مجلس قيادة الثورة ما يلى :

اغلاق المدونة والفيس بوك لحين الانتهاء من التجديدات والتعديلات والتنضيف اللى يرضى ربنا .

رجاء من كل من يريد المساعدة ... ارسال هاربيك او فيبا اوجينرال ... اه وياسلام بقى لو مستر مصل ... واللى بيحبنا يبعت ميه نار .

الأحد، 24 أبريل 2011

عيد سعيد



كل عام والاخوة المسيحين بخير .... كل عام ومصر كلها بخير

الثلاثاء، 19 أبريل 2011

المعونة المصرية لامريكا

المعونة المصرية لامريكا

لما شعب يزنق التتار بين جبلين ويحدفهم بالطوب وينقذ العالم من ذل وهوان وخراب كان حيشوفه ....يبقى ده شعب عبقرى .... لما شعب يولع فى ابراج الصليبيين ويحاربهم من غير دروع بفارس وسيف وبس فيهزمهم بملوكهم وقلب اسدهم ... يبقى ده شعب عبقرى ... لما شعب يطفش حمله بعتاها الامبراطورية العظمى التى لاتغيب عنهاالشمس بعد مايحميهم بمية مغلية فى حوارى رشيد ... يبقى ده شعب عبقرى ... لما شعب ينهزم وينكسر ومايعديش عليه ست سنين ويعدى اكبر مانع مائى بعوامات بلاستيك ويهد ساتر ترابى بخراطيم ميه ... ويرجع كرامتة فى ست ساعات ... يبقى ده شعب عبقرى ... لما شعب يعمل نوع جديد من الثورات ...ثورة من غير قائد ومش اكتر من لمه فى ميدان ويافطة واحبال صوتية ... ويقدر يسقط ديكتاتورية من اكبر الدكتاتوريات فى العصر الحديث فى تمنتاشر يوم ... يبقى ده شعب عبقرى ... .

لما ده يبقى تاريخ شعب ...لما ده يبقى ابداع شعب ... لما دى تبقى عظمة شعب .... ليه بقى مستكترين على نفسنا ان احنا نكون من دول العالم المتحضر .... ليه مش مصدقين ان احنا ممكن نقود العالم ونبقى رئيس الفصل .... ليه صورتنا الذاتية قدام نفسنا مجرد تابع ذليل مقلد مستجدى للقمة العيش وحباية الدوا .... هما العالم التانية دى اجدع مننا فى اية ...؟....ولا هيه دى مشكله العباقرة الازليه ؟ ... ماهو دايما العبقرىكدة ...كسلان ... مش كفايه كسل بقى ؟ مش كفاية لوك لوك ؟ ... مش كفاية فيس بوك وعالم افتراضى وهاش تاج وتريقة على اللى ورا عمر سليمان والجلابية ؟ ... مش كفاية توك شو وهلفطة ليل نهار ؟ ... ماتيجى نستغل الوقت ده ... نشتغل بما يرضى الله ... نجرب مرة احساس اننا بنتقلد مش بنقلد ... نجرب ان يكون لنا اكلنا وشربنا ولبسنا وعادتنا وتقاليدنا وافكارنا واسلوبنا وموضيتنا ورؤيتنا واغانينا .... نجرب نعتز بنفسنا ونقعد نتفرج على العالم وهوه بيقلدنا .... والله نستحق ... وعندنا من العقل والامكانيات والخبرات والحضارة اللى مش عند حد .... مصر حلوة ياولاد ... بس احنا مش حاسين بيها وبقيمتها .... احنا اعظم شعب فى العالم ... ومن غير مانقول على نفسنا المختار ...واللى عمل اكتر مننا يورينا نفسه ... وان كانوا فرسان ينزلولنا الميدان .

ملحوظة : 4 ساعات يوميا فيس بوك وتوك شو ... يعملوا 120 ساعة فى الشهر ... يعنى 1440 ساعة فى السنة ... يعنى فى عشر سنين يعملوا 14400 ساعة .... يعنى فى عشرين سنة يعملوا حوالى سنتين وفر ... يعنى اتنين دبلومه ... يعنى ماجستير ... يعنى مهارة جديدة ... يعنى حفظ القران ... يعنى تعلم لغة ... يعنى احتراف برمجة الكمبيوتر ... عيش معايا اكتر .... يعنى لو 20مليون مصرى بس كل واحد فيهم وفر سنتين فى العشر سنين الجاية .... يبقى حنوفر 80 مليون سنه ... يعنى كلينتون حتقعد مع نبيل العربى علشان تتفاوض معاه يزود المعونة المصرية لامريكا .... يعنى اسرائيل حتبقى من الكائنات المنقرضة .... وسمعنى احلى سلام ... بلادى بلادى لك حبى وفؤاادى .... والختمة الشريفة ماهى صعبة.

الأربعاء، 13 أبريل 2011

لحظة قبل ماتحدف



لحظة قبل ماتحدف

ممكن اكون طيب أو حنين أوساذج أو بسيط على رأى اخونا الشوام ...بس السؤال الى محيرنى هوه ليه احنا بقينا كدة ؟ ولا احنا طول عمرنا كدة بس ماكناش واخدين بالنا ؟ ...

وكدة دى يعنى ليه مابقيناش بنسمى ولا بنبص للقبلة لما بندبح ؟ ... ليه لما بقينا بندبح بقينا بننقى اكبرسكينة تلمه مشرشرة ؟ .... ليه لما بنخلص دبح وسلخ ...بقينا بنشفى ونتشفى ونشرب دم اللى دبحناه وناكل كبده نى؟ ... ليه ماعدناش بنحس ولو للحظه بنسمة وجع ضمير... ولاهمسة ندم حتى ولو كانت بينا وبين نفسنا ....

ليه ماعدش فية كاظمين غيظ ؟ ... بلاش عافين عن الناس ولا بحلم طبعا بمحسنين ...ليه مابناخدش حقنا وبس من غير مانشمت ولانشتم ؟ ... ليه مابنرحمش عزيز قوم ذل .... حتى ولو كان العزيز ده كان عزيز بالظلم ؟!!! ليه كل هذا الغل والحقد وشهوة الانتقام ؟

ماخبيش عليكوا ... ساعات بأحس ان شهوة الانتقام دى بتدارى وراها الفساد السياسى والمالى والنفسى اللى بنحكم بيه رعايانا ... ايوة ما احنا كمان عندنا رعايا ... واحنا برضة كنا ومازلنا جزء من النظام . بس كل الحكاية ان كل برغوت على قد دمه

لنقف جميعا ونتدبر بهدوء المعنى العميق لجملة ...

من كان منكم بلا خطيئة فليرمها بحجر... من كان منكم بلا خطيئة فليرمها بحجر .... من كان منكم بلا خطيئة فليرمها بحجر

الاثنين، 11 أبريل 2011

بعد حديث الرئيس

بعد حديث الرئيس

ماعرفش ايه اللى خلانى افتكر مشهد احمد توفيق فى فيلم شىء من الخوف وهوة ناكش شعرة والعيال حواليه بتحدفة بالطوب وهوه بيصرخ ... انى عتريس ...انى عتريس .... انى بلوه سودا ..... ربنا يعفى عنك ياريس ... والله كنت بحبك... وبينى بينك لغاية دلوقت بأتمنى انك تطلع برىء ... (علشان ماستغباش نفسى ...واطلع مضروب على قفايا طحن)

السبت، 9 أبريل 2011

حلم رزل قوى

<!--[if gte mso 9]> Normal 0 false false false EN-US X-NONE AR-SA MicrosoftInternetExplorer4

حلم رزل قوى

من ارزل انواع الاحلام .. انك تكون نايم وبتحلم انك نايم وبتحلم .... فلما تصحى من الحلم التانى .. وتقول اللهم اجعله خير ... تكتشف انك لسه بتحلم ... وان كل اللى حصل انك قومت بس من الحلم اللى فى الحلم .... وده اللى حصل ... حلمت انى فتحت الفيس بوك الصبح على صفحة المجلس العسكرى ... لقيت الرساله رقم 35 مكتوب فيها : وعلشان احنا الجيش والشعب ايد واحده ...قبضنا على حسنى مبارك وعياله ومراته ونسايبه وصحابة اللى كانوا بيقعدوا معاه على القهوه والشله اللى كانت بتساعده فى نهب مصر ... قصدى حكم مصر ... مش بس كدة ... دا احنا قبضنا على كل من عدى تحت بلكونة القصر الجمهورى فى التلاتين سنه اللى فاتوا ...وحكمنا عليهم بالسجن مدى الحياة ... ومصادرة كل اموالهم وممتلكاتهم ... كدهوه من غير محكمه ولا قفص ولا قاضى ولانيابة ولاغيرة .... واستكفينا بالمحكمة اللى اتعملت فى ميدان التحرير .... وبكدة يبقى اثبتنا للشعب ان احنا وهوه ايد وحدة ... خلاص كدة ولا فيه حاجة تانى .... والله ولى التوفيق ..... مافيش ربع ساعة وميدان التحرير اتملى على اخرة ... مليونية الانتصار ... وهاتك يازغاريد ورقص ومصر هيه امى ويا حبيبتى يامصر ... داغير لم الزباله وكنس الميدان .... باليل عرس وطنى فى الفضائيات ... ومصر الرائدة .... مصر العظيمة... مصر اللى خلت الدول كلها مزبهله ازبهلال اخر حاجتين .... ويا فرحة ماتمت .... تانى يوم الصبح .... الدعوه الى مليونية الحساب .... الفلوس اللى رجعت دى مش لوكانت فى البنك كانت جابت فوايد ... الشعب يريد استرداد الفوايد .... الاخوان المسلمين قالوا لا ... دى ارباح مش فوايد ... الفوايد حرام ... السفليين قالوا : لافوايد ولا اربح دا ربا ... احنا عايزينها غرامة .... الليبراليرون : لا ....فوايد ايه وارباح ايه ... الفلوس دى لو كانت اشتغلت فى البورصة كانت جابت اكتر من ارباح البنك ... الاخوان والسلفيين مابيحبوش مصر وعايزين يتنازلوا عن حقها .... الاشتراكيين ماسكتوش ... مصر يعنى البوليتاريا ... يعنى العمال الغلابة ... الفلوس دى لازم تتوزع عليهم ... بعد مليونية الحساب ماخلصت ... بدأت مليونية الاستنطاع .... يعنى ايه سجن مدى الحياة ... يعنى يقعدوا فى السجن واكلين شاربين نايمين على حساب الشعب ... يعنى يسرقونا وهما فى الحكم ... ويستنطعوا علينا وهما فى السجن ....الشعب يريد تمن الاستنطاع ... وبعد مليونية الاستنطاع بدأت مليونية الاستهبال ووراها مليونية الاستعباط ..... وصحيت من الحلم لقيت نفسى فى ميدان التحرير ... ملقتش لا دبابات ولا مدرعات ولا عساكر بس لقيت مليونيه المصالحة ... الشعب يريد رجوع الجيش ...فتحت النت على صفحة الجيش ملقتهاش ... عارفين الجيش راح فين .... اعتصم فى الصحراءالغربية ... وقعد يهتف الجيش يريد اللجوء السياسى لليبيا ... ماهو لو الحكاية عباطة فى عباطة نروح بقى للقذافى .... عباطه على ابوها .... رجعت التحرير لقيت الشعب كله فى الميدان ولقيت بقية مصر كلها متأجرة مؤقت ... اهو قرش جاى يصرف على الشعب ..... ماهى مصاريف المليونيات غالية .

صحيت من النوم على سؤال بيرن فى دماغى ... هوه احنا حنشتغل امتى ...؟ ولا احنا بقينا شعب ولاموخذة .....ومن غير ماتفهمونى صح .... لوك لوك ....لوك لوك وفعل مافيش.

الاثنين، 4 أبريل 2011

ديمو الكراسى



ديمو الكراسى

قالو ان مصر فيها 25 حزب ... دا طبعا غير الاخوان المسلمين ...والمنشقين عن الاخوان المسلمين ..والوسط والسلفيين والجماعة واهل السنه والوهابيين والصوفيين ... اه.. وبودى ..وطلع كمان عندنا شيعه ... وائتلاف ثورة واختلاف ثورة ...وشادى الغزالى حرب ..والاقباط..والبهائيين ...وفلول الوطنى والبلطجية والالتراس... واهل الفيس بوك وابناء التويتر وانصار النت ...والحياة الحمرا ...والعاشرة مساءا .. ومصر النهاردة .. وريم ,,وفودة ,,,وقناة التحرير ...وحمزاوى وبلال والاسوأيانى ..وجميل وجمال ودلال ونوال...ومايكل ومينا وسوسو وتوتو .. وعبده مجانص والباتعة ام اوشه...وميدان تحرير والقائد ابراهيم ...وكل رصيف فى مصر بقى رصيف مجلس الشعب سابقا ...ومادة تانية وتعديلات واعلان دستور وصوابع بمبى ...وسرايا نيابة وسرايا الاهرام.. والدستور والدستور الاصلى واليوم السابع والتامن والتاسع ...وقايمة بيضا وسودا ودم شهيد .. وحرية وليبراليه ومدنية ... وصباحى وموسى ويسطاويسى والزغلول الكبير ابو الثوره الروحى البرادعى ... وبكرة احسن من النهاردة ومصر هيه امى وياحبيبتى يا مصر ..وشهداء 25 يناير ماتوا فى احداث يناير (معلومه رائعة)... وانا كنت جزء من النظام ... لكن بعد ماوقفت فى التحرير توبت وباشتم النظام دلوقت ...ولحاف الثورة ابو نسر فى النص ...وخصم 50 فى المية ...على شبشب الثورة رحمه ونور على دم الشهدا ... وبريل بقى وطنى .. والطالب ضرب الناظر ... والبت بتقول على الهواء مباشرة : بابا يقول اللى هوه عايزة ...حقة ... وانا اعمل اللى انا عايزاة .... حقى .. وان حاجة ما جتش على مزاجى ... اعمل مليونيه واتاجر بدم الشهيد ...زمان الله لايرجعة كانت ديكتاتورية بفزاعة الاخوان ... دلوقى برضة ديكتاتوريه بفزاعة دم الشهداء ... وياعينى عليك ياقذافى ياللى محدش فهمك لما قولت ...ان معنى الديموقراطية ...ديمو كراسى .... يعنى الدهماء على الكراسى ... يعنى بدل ماكان عندنا ديكتاتور واحد بيحكم ... يبقى عندنا 80 مليون ديكتاتور بيحكم ... وانت ونصيبك بقى ....عندك من الشتيمه بالخيانة والعماله ...للشتيمة بالاب والام اوبأحد اعضائهم ... لغاية قطع الودان ...( مشيها قطع الودان ) علشان مستقبل شباب مصر ... عموما انا باضرب سلام لدم الشهيد وبحب شادى الغزالى حرب وعمرى مارحت ازور سيدنا الحسين وانا شايف ان انور السادات كان غلطان ويستحق القتل وانا ليبرالى وسطى يمينى يسارى وبحب الفيس بوك وبموت فى تويتر وباعشق قناة الناس و اون تى فى .. ووالله حاشترى لحاف الثورة .. ولو الزلزال وحش انا ضدة...ولو حلو انا معاه ...وتحيا مصر ... او تموت ... اللى تتفقوا عليه ... دا لو اتفقتوا من اصله .

يارب الجيش ياخد باله ان فيه حاجة اسمها الاحكام العرفية ويطبقها ... يارب يارب