الجمعة، 29 مايو، 2009

فاصل اعلانى ونواصل تانى

فاصل اعلانى ونواصل تانى

الاول كدة علشان ندى كل واحد حقة فكرة الفاصل دى فكرة سول عجبتنى فعملتها ...فشكرا يا سول

مع الشيخ فشار ليلك يبقى نهار

الشيخ فشار .... دكتوراة من جامعة هارفارد فى تفسير اللى مابيتفسرش

الشيخ فشار.... تلاتة ماجيستير من جامعة يوكوهاما فى تحليل اللى مابيتحللش

الشيخ فشار .... تمانية دبلومة من جامعة الازهر فى توصيف اللى مابيتوصفش

الشيخ فشار ...دبلوم صنايع قسم خراطة من مدرسة رزق شويل الميكانيكية فى شبرا

الشيخ فشار.... صاحب الكتاب الاكثر مبيعا ...".مع فشار تخلى الاسد فار "

كل اللى عليك انك تتعشى عشوة تقيلة قوى وتخش تنام على طول ...وخلى الغطا منزاح ...دى اهم حاجة .... خلى الغطا منزاح ....حيجيلك كابوس..... طبيعى ......اتصل بـــ 0900 مهما كان الكابوس مرعب .....مهما كان الكابوس يخوف ....ماتخفش حنفسرة حلو .......ونروقك وندلعك

للتواصل مع الشيخ فشار :

العنوان : فرش الشيخ فشار امام جامع القائد ابراهيم على البحر عد ل

E.mail : ARSAK @ HABAL .com

الأحد، 24 مايو، 2009

الكتالوج (4)

الكتالوج (4)

عصام جودت منتقى ....راجل عصامى او عظامى مش دى المشكلة ...المشكلة فى انة واخد الاربعة وعشرين قيراط كلهم ...المال والاولاد والصحة والجاة والسلطان ...كله يامعلم ....المشكلة ان محدش بيستحمل الاربعة وعشرين قيراط ...تقال يا عالم محدش يقدر يشيلهم ...ماهو لو كانوا ناقصين قيراط ولا قيراطين كانت بقت سهلة ...بس تقول اية.... صحيح قتل الانسان ما اكفرة ...عصام ما استكفاش غرة المال والسلطان والجاة والصحة ...غرة التلفزيون والقاءات والدشات ...غرتة صورتة اللى على اليفط فى الشوارع ..افتكر انة ملك الدنيا بفلوسة ...ونسى ان دة كلة ممكن يكون اختبار من ربنا لا دا اكيد اختبار من ربنا .... بس نسى ...ماهو انسان مش اكتر من لسان... وبقى يجرى ...عايز كل حاجة وكل حد ....اللى يشاور علية ياخدة ....بفلوسى الله ....بجاهى وسلطانى انت مابتفهمش ...وبدأ طريق المشهورات ...او النص مشهورات ...ولما حس انة انضحك علية... وانة أكل البالوظة ...ولبس العمة ...اتجنن...أنا ...أنا ....أنا ...أنا ينضحك عليا ...وشيطانة انتصر علية وقالة اخلص من اللى ضحك عليك...اقتلها ..ماتخافش انت مسنود ...حتعدى زى ماغيرها عدى ...وماتخفش ماتعملهاش بايدك ...أجرلك خط من الصعيد ...يخلصك منها ...ولا من شاف ولا من درى ....وراح الصعيد قابل الخط ...حسنين ابو صرة...واتفق معاة وقتلو البنية ...ماتت نوران فهيم ...وسابت ابوها واجوازها الاتنين يتعاركوا على الميراث .....بس ابو صرة قال لأ مش حاموت لوحدى ...لو حاموت يبقى عصام قبلى منى ...واتحكم على عصام جودت منتقى و حسنين ابو صرة بالاعدام ... ممكن يطلعوا براءة فى النقض علشان بطلان الاجراءات ..او علشان انهم ابرياء فعلا ... برضة مش مهم ...مش مهم انهم ينعدموا ...مش مهم انهم يطلعوا براءة ...المهم ناخد عبرة ونبص فى الكتالوج حنلاقى فية الطريقة

قال تعالى فى سورة ال عمران :

زين للناس حب الشهوات من النساء والبنين والقناطير المقنطرة من الذهب والفضة والخيل المسومة والانعام والحرث ذلك متاع الحياة الدنيا والله عندة حسن المآب . صدق اللة العظيم ... 14

قالى تعالى فى سورة الحديد:

اعلموا انما الحياة الدنيا لعب ولهو وزينة وتفاخر بينكم وتكاثر فى الاموال والاولاد كمثل غيث أعجب الكفار نباتة ثم يهيج فتراه مصفرا ثم يكون حطاما وفى الاخرة عذاب شديد ومغفرة من الله ورضوان وما الحياة الدنيا الا متاع الغرور . صدق الله العظيم 20

قالى تعالى فى سورة عبس :

قتل الانسان ما اكفرة .صدق اللله العظيم ..17


الجمعة، 22 مايو، 2009

الكتالوج (3)

الكتالوج (3)

جلدة وهبالة اتنين اخوات توأم ... سبحانك يارب عكس بعض خالص ....ماتقولش ان دول اخوات ابدا ... بس هية كدة طول عمرها البطن قلابة ...جلدة كان مبدأة ..اتجوز لية علشان اجيب واحدة تاخد فلوسى واقعد اوكلها واشربها على حسابى....لا ياعم ....وطبعا محدش بيقدر مايتجوزش حتى لو قعد طول عمرة يقول مش حتجوز ...القصد كانت جوازة الشوم على المدام ...التلاجة التوشيبا الجديدة عمل لها قفل ...ويطلع الطماطم والخيار ولوازم الطبيخ كل يوم الصبح ويقل التلاجة بالقفل ...بعد الفرح غير لمبات البيت كلها خلاها سهارى ...الغريبة انة كان بيقفل التليفزيون فى الاعلانات علشان يوفر فى الكهربا...وطبعا سذاجة منى لو اتكلمت على اللبس دا موضوع غير وارد طرحة بالمرة ....عمرة ما ادى صدقة لغلبان كان يقول ماهو لو ربنا بيحبة ما كنش خلاة فقير .....الست اتخنقت ياولداة ...ماهى لما توصل انة ياخد مرتبها ويديها خمسة جنية تصرف منها طول الشهر ...يبقى كفاية كدة ...وطبعا كل اللى حواليها بيقول لها اصبرى ..خليكى اصيلة .. اطبعى بطبع جوزك ..ماهو محدش حاسس ..ولا حد يقدر يحس باللى هية فية ..وفى يوم قالت لة يا تطلقنى يا اموت نفسى واجيب لك مصيبة ...طبعا طلقها ماهو خاف لو موتت نفسها يدفع هوة مصاريف الجنازة ....ومش مضطر انى اقولك ان المدام هية اللى دفعت اتعاب المأذون ...واتنازلت عن المؤخر والنفقة ...وسابت لة لوحين خشب من مُلة السرير ..انا لغاية دلوقتى ما اعرفش هوة خدهم يعمل بيهم اية ؟؟؟

هبالة بقى..... هار اسود فلة ياروحى ....مراتة بقى محسودة على النعمة اللى معيشها فيها ...ابخات تقول اية !!...كل يوم فستان ولا جزمة ولا شنطة جديدة ..... والسيغة بتتدبل كل شهر ...بتزهق من شكلها ياحبة عينى .... وبعدين مصنعية اية اللى بتتكلموا عنها دى .... المهم الواحدة تجدد وتعيش ..ان مااتمتعتش فى شبابها حتتمتع امتى ؟!!!...القطط والكلاب بيموتوا فيها ...بيستنوها كل يوم الساعة واحدة الفجر ميعاد رمى الزبالة من البلكونة ...ولما الكيس ينفجر من الوقعة يعمل صوت مدفع رمضان بالظبط .... كلة يتلم ...سمك ولحمة وفراخ وسلطة ....وليمة يامعلم وخلى الغلابة تاكل ...هبالة عندة من كل حاجة تلاتة ...تلفزيون ...دش...هبالة صاحب صاحبة واللى فى جيبة مهوش لية ...هبالة مبدأة اصرف مافى الجيب واستلف مش عيب ...عمرة ما عمل حساب بكرة ..هبالة تجارتة بارت ..عادى بتحصل مع اجدع الدول ...هبالة فلس والديون ركبتة ...والمدام سابتة ..ماهى مش واخدة على الفقر ..هبالة دلوقتى فى السجن معهوش يدفع النفقة ...

مش لو كان هبالة وجلدة بصوا فى الكتالوج مش كان زمانهم عايشين مبسوطين .

قال تعالى : الذين يبخلون ويأمرون الناس بالبخل ويكتمون ماءاتاهم الله من فضلة واعتدنا للكافرين عذابا مهينا . صدق الله العظيم ...النساء 37

قال تعالى : فلما ءاتاهم من فضلة بخلوا به وتولوا وهم معرضون. صدق الله العظيم ..التوبه76

قال تعالى : والذين اذا انفقوا لم يسرفوا ولم يقتروا وكان بين ذلك قواما . صدق الله العظيم..... الفرقان 67

قال تعالى : ولاتجعل يدك مغلولة الى عنقك ولاتبسطها كل البسط فتقعد ملوما محسورا . صدق الله العظيم ..الاسراء 29

قال تعالى : ان المبذرين كانوا اخوان الشياطين وكان الشيطان لربه كفورا . صدق الله العظيم..الاسراء 27

الأربعاء، 20 مايو، 2009

الكتالوج (2)

الكتالوج (2)

كـّبر...اسمة كدة بفتح الكاف وتشديد الباء ...كبّر وكيل نيابة ...يعنى عربية إزازها فامية ..وسارينة ...وركنة فى وسط الشارع ومحدش يقدر يفتح بقة ...ماهو نمر العربية عليها نسر ...كبّر مابيلبسش غير سينيية ومش طايق اللى حوالية ...ودايما لابس نضارة سودا ...طبعا علشان مايشوفش العبيد اللى ملوا البلد ...كبّر مابيردش على حد ومابيسلمش على حد ..ودايما باصص الناحية التانية وقافل نص عينة ....ويمشى حاطط ايدة فى جيبة ويقول يا ارض اتهدى ما عليكى ادى...جاة ومركز بقى ....مرات كبّر جميلة ...جميلة قوى .. يبقى مش اقل من وكيل نيابة هوة اللى يتجوزها ....وكبّر وكيل نيابة يبقى مراتة لازم تكون جميلة ...مرات كبّر حاسة قوى بجمالها وعارفة ان مافيش فى حلاوتها ...وشايفة كل الستات اللى حواليها زبالة واشكالهم تجيب الاكتئاب ...علشان كدة كارهة كل جيرانها ...بتعاملهم بقرف ..وغسيلها دايما ينقط على اللى تحت ...وعمرها ما قالت معلهش ...على طول بتضرب الخدامة ..وتشتم السفرجى...وتلعن ابو البواب ...جة الصيف وحرة ...وجة الفكنص (اجازة المحاكم ) كبّر ومراتة راحوا يصيفوا فى الساحل الشمالى ..فى منتجع القضاة ...ايوة بعيد عن الزبالة اللى ملو الشواطىء...كبر خد المشوار فى ساعتين ونص ...ماهو بيسوق بسرعة ...ياخايب هوة فية رادار يقدر يوقفة ؟؟!...بعد ماصيف كبّر ومراتة وهما راجعين ...قابلتة تريللا ...كبّر استكبر ياخد يمينة ..التريلا هية اللى توسع ...وطبعا كانت النتيجة حادثة فظيعة ...ضاعت فيها رجل كبّراليمين ...وازاز البربيز كلة دخل فى وش المدام ......كبر ساب النيابة ...والمدام اتنقبت ...طبعا مش تدين ؟؟!! والنعمة اتقلبت نقمة ...والقوة بقت ضعف ...والعز بقى زل ....العجيبة ان الجيران الزبالة والستات اللى وشها يجيب الاكتئاب هما اللى كانوا جنب كبّر ومراتة

كان عليك بإية ياكبّر بيه انت والمدام ...ماكنت تبص فى الكتالوج الاول ..علشان تفوق وتصحى وتعرف ان مالكش فى اللى معاك حاجة ..دا كلة فضل من ربنا

قال تعالى :ولولا فضل الله عليك ورحمته ما ذكى منكم من احد ابدا .صدق الله العظيم ...النور 21

قال تعالى : فكان له ثمر فقال لصاحبة وهو يحاورة انا اكثر منك مالا واعز نفرا .صدق الله العظيم ...الكهف 34

قال تعالى : ولا تمشى فى الارض مرحا انك لن تخرق الارض ولن تبلغ الجبال طولا . صدق الله العظيم ..الاسراء 3


قال تعالى : لكيلا تأسو على ما فاتكم ولا تفرحوا بما اتاكم والله لا يحب كل مختال فخور .صدق الله العظيم ..الحديد 23

الثلاثاء، 19 مايو، 2009

الكتالوج

الكتالوج 1

اشتريت دى فى دى ...ما أنا من النوع المدمن تكنولوجيا ...على فكرة ممكن ما اكولش ...ما اشربش ...ما البسش ...لكن اشوف جهاز فية فكرة جديدة وما اشتريهوش ...تبقى مشكلة ....بس دة مش موضوعنا ...موضوعنا انى اشتريت الدى فى دى ....واول ما دخلت وانا بهدومى ...اقعدت اركب واوصل السلوك فى التليفزيون ...قعدت كتير ...يجى ساعتين ونص ...اجرب واغلط واحط الاحمر مع الاحمر ماينفعش احط الاحمر مع الاصفر ..برضة ماينفعش ..بصراحة الجهاز كان حيبوظ اكتر من مرة ...دا غير ان سنون التوصيل كانت حتتكسر ...لولا ان ربنا ستر ...عدت عليا مراتى وقالت لى بلهجة كدة انا ماحبتهاش بصراحة قالت: ياسيدى ما كنت تقرا الكتالوج الاول وشوف المفروض تعمل اية واعملة ...كدة توفر وقت وتحافظ على الجهاز ....وبدال ماتبوظ الجهاز تستمتع بية ....ومشيت وسابتنى ....ومارضتش تكمل الجملة ...من غير ماتقول انا عارف هية كانت عايزة تضيف كلمة ياغبى ....بس هية مارضتش ..خافت طبعا ...القصد ...فكرت شوية فى كلامها ...طبعا من غير كلمة ياغبى ....عجبتنى قوى كلمة اقرا الكتالوج وشوف المفروض تعمل اية واعملة ...كدة توفر وقت وتحافظ غلى الجهاز ...ونطت فى دماغى الفكرة الجديدة والى حاسميها الكتالوج ...وحتكون برضة سلسلة ومحدش يتتريق ويقول سلسلة... سلسلة مافيش خاتم فى القعدة دى ...وبرضة حنتكلم عننا ..البنى ادمين.... الانساننيين ...ياترى احنا بنشغل نفسنا صح وماشين حسب الكتالوج ولا بنعمل زى حالاتى لما ركبت الجهاز من غير ما اقرا الكتالوج وكان حيضيع منى ......قبل مانسى فية آية عايز نقراها كويس قوى ونكررها كذا مرة ونفكر فيها بالراحة ونقارنها باللى احنا بنعملة و باللى حوالينا ... بس نقراها بهداوة براحة كدة..

بسم الله الرحمن الرحيم وهم يحسبون انهم يحسنون صنعا .صدق الله العظيم

الاثنين، 18 مايو، 2009

الاضراب ما لة وما علية

الاضراب ما لة وما علية
اخر حاجة اقفل بيها موضوع الاضراب ....على المدونة بس ... لكن اللى عايز يعمل الاضراب دة كل 17 من الشهر ...ياريت ...واللى عايز يعمل الاضراب كل يوم يبقى ربنا يكرمة ...
أولا : انا مش عايش فى مية المخلل ...ولا انا مثقف فوق العادة عندة كمبيوتر ونت وقاعد يعمل اضرابات ....ولا انا دون كيشوت بحارب طواحين الهوا ...لا ...انا حاسس بالناس وحاسس قوى كمان ...لسبب بسيط وهو انى من الناس دول ....واول يوم دخلت فية الدنيا بعد ماخلصت الجيش كان كل اللى فى جيبى خمسين قرش ...وماجبتش الكمبيوتر الا بعد ما اتجوزت بعشر سنين وبأستخدم النت المجانى بتاع المصرية للاتصالات ...دا علشان التسعين جنية بتوع الدى اس ال كتار عليا

ثانيا : لا الشكوى والحسرة ولا اللوم ولا النقد ولا مصمصة الشفايف ولا رمى همنا وخبيتنا على حد ..حيصلح حالنا ...بالعكس حيجيبنا ورا اكتر واكتر

ثالثا : الطريق الوحيد علشان نغير اللى حوالينا ...دا لو بجد عايزينة يتغير ...ان احنا نغير نفسنا ......توماتيكى حتلاقى اللى حوالينا اتغير ...ووالله والله وكمان والله دا مش كلامى دا كلام ربنا

رابعا :..احسان عبد القدوس قال جملة حلوة قوى ...قال يا عزيزى كلنا لصوص ...فكل اللى كنت طالبة ان احنا نحاسب نفسنا قبل ما نحاسب اى حد ...محدش فينا ولى فلية نطلب من اللى حوالينا يبقوا اوليا

خامسا : اللى يدور فى سبت الورد يلاقى ورد ...واللى يدور قى صفيحة الزبالة حيلاقى زبالة ...والنحلة علشان بتقف على الورد بتدى عسل ...والدبانة علشان بتقف على الزبالة ...بتموت شهيدة افكارها تحت مضرب الدبان

سادسا : طريق طولة 60كيلوا بامشى فية بصفة شبة يومية بقالى تسع سنين ...فى خلال التسع سنين دول اتعمل علية 3كبارى علوية ...وكمان كوبريين يوصلوا للطريق الدولى ... واحنا فى عز الازمة المالية اللى فى العالم الطريق دة بيتوسع علشان يبقى 6حارات مش تلاتة ..انا مش مهندس ....بس بالويم كدة ...الموضوع دة اتكلف كتير قوى ...السؤال هنا ...هوة احنا مابنشوفش دة لية ؟ولا احنا مش عايزين نشوف

سابعا : اى حد لة مطلق الحرية انة يختار انة يكون نحلة او يكون دبانة ...صدقنى انت حر ...والله انت حر ...بس كل اللى بترجاة ..انة مايحاولش يخلى النحلة تعمل نيو لوك وتبقى دبانة
سيها يا اخى ..هوة انت مش بتنادى بحرية الرأى ....ياساتر

ثامنا : فية واحد ماشتركش معانا فى الاضراب وما تقاش ربنا فى شغلة ...ومشدش فرامل الجرار بتاع القطر ...وراح يشرب معسل ...الجرار مشى لوحدة وكسر عربيتين وموت ناس كتير ...منة لله ...لو انا الحكومة بقى ..اعدام ....ومش حاسمع كلام اللى يقول حرام دا عندة عيال ...مالناس اللى ماتت برضة عندها عيال

تاسعا : حبدأ من بكرة سلسلة جديدة اسمها الكتالوج ...فكرة جديدة السبب فيها مراتى ...اشكروها لو طلعت حلوة ...ولو طلعت وحشة اش......كروها برضة

عاشرا : ختامة مسك ..قالى تعالى : ومن يتق الله يجعل له مخرجا ويرزقة من حيث لايحتسب . صدق الله العظيم

خلص الاضراب

خلص الاضراب
ياترى عملنا اية ....ياترى حسينا باية ...ياترى كام واحد اشترك معانا .... ياترى 16 كان احسن ولا 17 ....نفسى اسمع ...اصل بصراحة انا مراهنى ...ونفسى اكسبنى ... والرهان كان على مين يكسب ... الفطرة ...ولا ...؟؟؟؟؟..حنشوف ...!!!!؟؟بس يارب اكسبنى

السبت، 16 مايو، 2009

بكرة

بكرة الاضراب
بكرة 17 مايو ....بكرة الاضراب عن الفساد الصغير ...بكرة الاضراب عن السلبية

الجمعة، 15 مايو، 2009

أوعوا تنسوا

أوعوا تنسوا

اوعوا تنسوا ...باقى من الزمن يومين على اضراب 17 مايو ...مستنيكوا يوم 17 الساعة اتناشر باليل ....نشوف عملنا اية ...وحنعمل اية ...ماهولازم نستمر حتى لو ماحدش نفذ الاضراب دة غيرنا ....حنستمر يعنى حنستمر ......مستنيكوا

الثلاثاء، 12 مايو، 2009

مرضيش يسمعنى

مرضيش يسمعنى

فى يوم من الايام اكتشفت انى راجل اهبل ...ايوة اهبل لابس بيجاما وسخة مقلمة ....ومشمر رجل وسايب الرجل التانية تجرجر فى التراب .....وحاطط الساندويتش فى جيب البيجاما ...وازازة المية فى الجيب التانى.....شعرى منكوش ودقنى طويلة ....وفى رقبتى صفارة وماسك فى ايدى علم اخضر .....وواقف فى ميدان كبير مليان عربيات من افخم واغلى واحلى واحدث الانواع ....كنت واقف فى الوسط اصفـــّر واشاور ...وفاكر ان فية حد سامعنى او حتى شايفنى ...كنت فاكر انهم بيسمعوا كلامى علشان كدة المرور منتظم ....والحركة سهلة ...بدليل انهم بيشاوروا لى وبيضحكوا لى ...كنت فاكر برضة ان الابتسامة معناها شكر وتقدير وعرفان بمجهودى وتعبى ....اتاريهم بيضحكوا علية مش لية ....واللى كانوا بيشاوروا كانوا بيقولوا العبيط اهة ....حتى الابتسامة طلعت ابتسامة شفقة ....والمرور اللى كنت فاكر نفسى بأنظمة ...طلع ان فية اشارات تانية خالص ....توماتيكى .....هية اللى منظماة وممشياة زى الساعة .....يعنى اية ؟ ...والتعب اللى تعبتة دة كلة....اية .... راح على الارض ؟؟!! .....الوقفة اللى فى عز البرد ...ونغرة الشمس ....الشتا اللى كان بيرخ على دماغى ...والتراب اللى كان بيملى عينى ...كل دة راح اونطة ...دراعى اللى اتخدلت وانا بشاور يمين وشمال ....نفسى اللى اتقطع فى الصفارة علشان العربيات تاخد بالها ....كل دة كان على الفاضى ....كانت صدمة كبيرة .... كبيرة قوى ...سبت مكانى المقدس وسط الميدان ....ورحت قعدت تحت شجرة على جنب الطريق ..حسيت بالتعب انا فى الميدان دة وانا عمرى عشرين سنة .....عمرى ماحسيت بالتعب ولا حتى بالستين سنة اللى عدوا من عمرى ....بس النهاردة حسيت بالتعب ...تعب الستين سنة كلة نزل على اكتافى ....رجلى ماعدتش شيلانى ....وشوية ...ولقيت عربية نضيفة قوى ..وغالية قوى ...وقفت جنبى ونزلت منها ست جميلة قوى ...شيك قوى ...غنية قوى ....طبطبت على ضهرى وعطتنى ظرف فية فلوس ...وابتسمت ...ومشيت ...برضة مشيت قوى ....وانا قاعد مذهول ..مش مصدق ...هوّة انا بقيت شحات ولا اية .....لأ...لأ ..ياخونا ماتفهمونيش غلط ...انا بس بريـــّح شوية وحرجع تانى ......ماهو برضة من حقى اريح شوية ....دا انا بقالى ستين سنة واقف ....ماحدش سمعنى كالعادة ....ركنت ضهرى على الشجرة ...وطلعت الساندوتش من جيب البيجاما ...وازازة المية من الجيب التانى ....وقعدت آكل واتفرج على الميدان من برة ....طول عمرى وانا شايفة من جوة ....بس من برة بتشوف احسن واوضح ....بس اية دة ....اية دة ..اية دة ....هما بيتناطحوا كدة لية .....هما بيزقوا فى بعض كدة لية ....الله..... الله... هما بيخطفوا من بعض اية ؟....ياخبر ابيض ....هوّة كل واحد حاطط ايدة فى جيب اللى جنبة لية؟! .....واية حكاية السكينة اللى كل واحد حاططها ورا ضهرة دى ؟!!!...لا لا لا ....المنظر غريب قوى .....الفرجة من برة بتخللى الواحد يشوف حاجات غريبة قوى ....وشوية لقيت واحد داخل على وسط الميدان ... لابس نفس البيجاما بتاعتى ...نفس التقليمة ....وسايب شعرة ودقنة زيى بالظبط ....ومشمر رجل وسايب رجل تجرجر فى التراب ...حتى العلم والصفارة....اية بيقلدنى دة ولا اية ؟.... الله ولا اكونش انا وانا مش واخد بالى ....ناديت علية ...حبيت اقول لة بلاش ..شوفها من برة الاول قبل ما تخش ... مارضيش يسمعنى ...مارضيش يفهمنى ...هوّة حر ذنبة على جنبة ....وافتكرت حاجة غريبة قوية ...من اربعين سنة وانا جاى الميدان ....كان فية واحد تحت الشجرة دى ...فى نفس مكانى دة ....وكان بيندة عليا ويقول لى ..تعالى اقولك الاول...... بلاش ...بلاش يابنى .... اسمعنى ... افهمنى .... بس انا مارضيتش اسمعة ....وكمان مارضيتش افهمة .....

وحشتونى بجد

وحشتونى بجد

جالى دور انفلوانزا معتبر ....سخونية ...كحة ....واللستة الكبيرة اللى قالت عليها وزارة الصحة وهية بتحذر من انفلوانزا الخنازير ....بس الحمد لله ماطلعتش لا خنازير ولا فراخ ...طلعت جيوب انفية ...وعدت الحمد لله ...الى كان مزعلنى مش الجيوب ...اللى زعلنى انى بعدت عنكوا ...وحشتونى بجد ....ولما لقيت تعليقات كتير على موضوع الاضراب وكلها تقريبا مع الاضراب كنت فرحان قوى والسخونية نزلت ....اصلى كنت مراهن على الفطرة والحمد لله كسبت الرهان .....والله احنا كويسين ...بس ملخبطين ...يارب بس نكمل ومننساش يوم 17 مايو وتبقى ايامنا كلها 17 مايو ....شكرا لكل من شاركنى ..وشكر خاص لمديرة تسويق الاضراب اللى من تواضعها مش عايزة اكتر من ديليفرى رغم التعب اللى تعبتة فى عمل البانر ....شوفتوا هية صابرة اد اية ...ربنا يصبرها كمان وكمان ...شكرا ليكوا كلكوا ونتقابل قريب ......وحشتونى بجد

السبت، 9 مايو، 2009

طاب عايزنا نعمل اية ياعم الحاج

طاب عايزنا نعمل اية ياعم الحاج


الاول تصلى على حبيبك النبى ....وليلة 17 مايو تنام بدرى ..وماتتفرجش على عمور شعللها...دةلية ....علشان ماتسخنش نفسك ...فتقوم الصبح كارة الدنيا واللى فيها ....تنام وانت مقرر انك مش حترمى عيوبك و خيبتك وقلة حيلتك على شماعة الحكومة ...اقلع البامبرز وخش الحمام لوحدك ...اعمل اضراب على فسادك وعلى الفاسد اللى قدامك ...اضراب من غير تكسير عربيات ولاتوليع كاوتش ....اضراب مش حيتصور فى الفضائيات ولا على كاميرات المحمول ..اضراب نريح فية الامن المركزى ونخلية يتفرغ للارهاب ....واعمل شوية حاجات بسيطة مش حتاخد منك مجهود ...جرب وياسيدى ان ماعجبتكش ارجع تانى يوم 18 مايو عيش عيشتك...قصدى عيش موتك ....ماهو اللى يعيش زينا وبيفكر تفكيرنا وبيتصرف تصرفاتنا يبقى ميت مش عايش ....جرب تعيش بنى ادم ...من اللى اكرمة ربنا ونعمة ...بنى ادم مش اى كائن تانى ....شوف يا سيدى ...قوم بدرى روح شغلك فى ميعادك ...ماتزوغش ولاتاخد اجازة عارضة ...ولا تعمل خط سير للتامين الصحى ....اقعد على مكتبك من غير ماتحط الفول والطعمية والمخلل ....اشتغل التمن ساعات ....ساعد المواطن وخلص لة شغلة ..ماتكلكعهوش ..... وان كنت دكتور اكشف على العيان فى المستشفى زى مابتكشف علية فى عيادتك ....ولو كنت مهندس استلم صح من المقاول ولو كنت مقاول ماتسمسرش فى الحديد والاسمنت ...لو كنت كناس اكنس الشارع كأنك بتكنس بيتك ...لوكان عندك عربية خلى اليوم دة يوم الفن والزوق ...ماتمشيش مخالف ...وركب الحزام مش عيب والله ...ماتركنش صف تانى ...ووسع للى جاى قدامك ... ماتشغلش السرينة الناس حتحترمك من تصرفاتك مش علشان مركب سارينة الشرطة .......لو كنت طالب احضر المحاضرة بلاش الكافيتيريا ... ولوكنت سكرتيرة ماتعمليش مكالماتك الخاصة من تليفون الشركة ....لو بتشترى حاجة ولقيتها اغلى من السوق ماتشتريهاش وقول للى بيبيع فى وشة ...انت غالى ومش حاشترى من عندك ...ماتخفش وماتتحرجش حتى لو قالك ياباشا وظبطك ....ماتديش رشوة اليوم دة حتى لو الشغل اتعطل ......لوكنت ست بيت نضفى البيت... وماتسبيش المية مفتوحة عمال على بطال... والاوضة اللى مانتيش فيها اقفلى نورها .....ووالنبى.... والنبى ماترميش الزبالة من البلكونة ... واطبخى اكلة حلوة للعيال ...اتزوقى لجوزك.... ولوكنت زوج ادخل على مراتك بتضحك وبوسها ...واقعد مع العيال اعرف اخبارهم ...بلاش قعدة على القهوة النهارد ..واللة اللى حتقولة على القهوة هوة اللى بتقولة بقالك 20سنة ...قوم فى الاتوبيس وقعد الست الحامل ولا الراجل العجوز ...ماتزوغش من الكمسرى وادفع التذكرة ...لو شفت حاجة غلط متقولش وانا مالى ...ماليش دعوة ...لأ ليك دعوة ودة مالك لوماحافظتش علية ماحدش حيحافظ لك علية ....يعنى ماتشوفش حد بيشرط كرسى القطر بالموس ولا بياخد لمبة من حمام المحطة وتسكت ....بلاش تبص لغيرك واحمد ربنا على اللى عطاهولك ...ساعد الناس واعذرهم ...ممكن تعمل كدة يوم 17 مايو ....يوم واحد فى السنة ...صعبة دى ...بس بشرط ...باليل وانت نايم على المخدة اسأل نفسك انهى احلى يوم 16 ولا يوم 17 ...ولو قولت ان يوم 16 هوة اللى احلى ...يبقى انا اللى غلطان ..انا الساذج ...انا العبيط الوحيد اللى فى مصر ...بس انا عارف انى مش حاطلع غلطان ولا ساذج ولاعبيط ....عارف لية ...لانى بصدق كلام ربنا ...وسبحانة وتعالى قال فى محكم تنزيلة ...بسم الله الرحمن الرحيم ...ومن يتق الله يجعل لة مخرجا ويرزقة من حيث لا يحتسب. صدق الله العظيم ..... الكلام واضح زى الشمس اتقى ربنا حيحلهالك ويرزقك ماتعرفش منين ...انت بقى عايزها تتحل والرزق يجى الاول.... وبعدين تبقى تتقى ربنا ....براحتك يا جميل ؟؟؟ بس خدها منى كلمة ...مش حيحصل ولو بعد ميت سنة ....وخليك قاعد لابس البامبرز وبتدور على بزازة جديدة وبتشتم فى الحكومة وفى الفاسدين اللى انت منهم...

اللهم انى لا استطيع التغير بيدى..... واخجل منك ان اغير بقلبى... ...فاقبل محاولتى للتغيير بلسانى ...اللهم بلغت اللهم فاشهد..........

الجمعة، 8 مايو، 2009

ثورة المظلومين

ثورة المظلومين

عم مرسى وعيلتة وجيرانة ...زهقوا ..تعبوا من الفتافيت ...عايزين من الهـُبر.. هما مش من نفسهم ولا اية؟!... كلة بيهبش ياعم الحاج ....امال نصيبنا فين ....عم مرسى وعيلتة وجيرانة قرروا انهم يثوروا ...يعملوا ثورة على الظلم والاستبداد ضد السراية والبشوات ..... عم مرسى وعيلتة وجيرانة لموا نفسهم وطلعوا يشاركوا فى اضراب 6 ابريل ... اتلمو على كفاية ونور والمحظورة اللى كانت موجودة بس من تحت لتحت!!..... .وعملوا الاضراب.... اضراب ضد التوريث.... وضد عدم تداول السلطة...... وضد الغلاء...... وضد الفساد... ايوة اهم حاجة ضد الفساد دى ..... فساد اية اللى انت جاى تقول علية ؟؟... ما نسال نفسنا الاول قبل مانطلع ونعمل اضراب نوقف فية حال البلد اكتر ماهو واقف ....... احنا ضد الفساد بجد بجد يعنى ؟! ...ولا احنا مع الفساد؟ ...ولو احنا ضد الفساد ....زعلانين من الفسدة لية ؟!....علشان احنا مش عارفين نبقى زيهم وزهقنا من الفتافيت......وعايزين الهبر؟ .....ولا احنا مابنحبش الفساد علشان الفساد وحش ؟!...... ولو الفساد وحش .......امال احنا فاسدين لية؟! ...اى نعم احنا فاسدين صغننين بس فاسدين ....الفساد هوة الفساد ....الفساد الكبير زى الفساد الصغير ...زى اللى بيساعد على الفساد ...زى اللى بيقبل الفساد على نفسة .... كلة فساد.... وحجة ان الحكومة بتسرقنى يبقى انا كمان اسرقها دى ماتكولش ....وان اتكلت ماتتبلعش .....وانت مالك يا اخى ؟! لنفرض ان فية واحد حرامى اعمل زية لية؟!!! ما تعمل الى عليك انت.... .اذاكانت الحكومة فاسدة فعلشان احنا فاسدين ...الحكومة هية احنا ...واحنا هما الحكومة ...احنا الاتنين بنظلم بعض وبنظلم نفسنا وبنخرب بيتنا بادينا ....ليـــــــــــة؟؟؟؟! .....لية حاطين شرط ان احنا موافقين نبطل فسادنا بس الحكومة تبطل هية الاول فسادها ......سيب وانا اسيب .......كنا دايما بنقولها لما كنا نمسك فى بعض واحنا صغيرين بنلعب فى الشارع...سيب وانا سيب .....مافكرناش احنا لما نقابل ربنا حنقول لة اية ؟ حنقول احنا كنا بنسرق علشان الحكومة كانت بتسرق ..؟؟... لوالكبار بطلوا يسرقوا كنا حنبطل احنا كمان !!.... طاب وانت مـالك؟! ...واحد بيسرق تسرق زية ليــــــــــــة؟ ....ماتقوليش علشان اوكل العيال .....برضة ماتكولش معايا وان كلت ماتتبلعش ....شوفلك حجة تانية!!! ......مافيش حد بيشيل ذنب حد ...كله حيتحاسب..... انت ناسى دى لية ....؟؟!! طاب ماتيجى ننضف ..... سهلة خالص .....حتقرر انك مش حتبقى فاسد حتى لو كل الى حواليك ولاد ستين كلب ....... بس .....خلاص ...شفت سهلة ازاى ....وصدقنى يوم ماننضف الحكومة غصب عنها حتنضف عارف لية ؟!!... علشان ساعتها حنقدرنطلب حقنا ... مش حنسكت علشان ماحدش يبص لنا فى السبوبة...... مايعكننش علينا ويسمم لنا الفتفافيت !!!!.... ...حنقوى برضا ربنا علينا .......حيكون اللى معاك ربنا مش حزب ولامحافظ ولاصول فى مباحث امن الدولة .....وبدال ماتتذل للجنية اتذل لربنا يا اخى ....... ويوم مانتذل لربنا حيعزنا .................. والله ......................................

طاب نعمل اية ياعم الحاج ؟؟؟؟

دة بقى عنوان البوست الاخير

الخميس، 7 مايو، 2009

مين فينا الظالم (8)

مين فينا الظالم (8)

داليا بنت اخت عم مرسى ....ربنا عدلها لها على طول ...يادوب خدت بكالوريوس التجارة واتجوزت ....ماطولتش زى ما بيحصل اليومين دول حاكم نقص الرجالة فى السوق بقى مشكلة ...

داليا خلفت بت وسمتها ندى ...ندى كبرت ودخلت كى جى ون ....داليا قررت انها تجيب مدرس فى البيت علشان يدى ندى درس ...ماهى الحكومة صعبت المناهج ..الناس كلها بتقول كدة ...المدرس كان بيجى يومين فى الاسبوع ...يوم عربى ويوم حساب ....الاستاذ وصل ...دخلتة داليا الصالون ...ونادت على ندى اللى جابت كراستها وكتابها وقعدت مع الاستاذ....داليا قدمت الشاى للاستاذ وسابتهم وخرجت...داليا رفعت سماعة التليفون وكلمت مى صحبتها ...حكت لها عن نجلاء اللى اتخطبت اول امبارح ..ووصفت لها الشبكة والفستان بالحتة ...وطبعا مانسيتش المكياج اللى ماكنش لايق عليها وكانت مأفوراها زيادة ....ماهى بتدارى ديفوهاتها ...اهوة كل واحد بياخد نصيبة ...يدى الحلق للى بلى ودان ...وكلمتها عن شيماء اللى عايزة تتطلق علشان مسكت جوزها مع صاحبتها ....وحكت عن الفستان اللى جابنة علشان تحضر بية خطوبة اخوها اللى خلى ابوها يدفع دم قلبة فى حجز القاعة الخمس نجوم ....ياميلة بختنا اللى اتعمل فرحنا فى نقابة التجاريين ...وطبعا لازم تجيب سيرة الحكومة ...وقلة ادبها ...ومناهج العيال اللى بقت صعبة واد اية الحكومة بتكـّرة العيال فى التعليم ...وان الدروس بقت مشكلة فى كل بيت وازاى واكلة مصروف البيت ...قال يعنى العيال لما حيتخرجوا حيلاقوا شغل ....كنا احنا اشتغلنا بلا نيلة ....بس نعمل اية الناس كلها على دا الحال ...ماهى حكومة بت كلب اللى بتدية باليمين بتاخدة بالشمال ....مش عارفين يسيطروا على الدروس الخصوصية ...المفروض يمنعوها خالص ...بس تقولى اية ...تلاقيهم بيستفادوا من وراها ....عدت الساعة بتاعة الحصة فى مكالمة التليفون ...ومافاقتش داليا الا على صوت الاستاذ وهوة بيقولها خلاص يا مدام ...داليا حطت السماعة بعد ما قالت لمى حبقى اكلمك تانى ...داليا سألت الاستاذ بأهتمام : اية الاخبار يا استاذ مستوى ندى اية دلوقتى ؟؟...الاستاذ قالها : ماتقلقيش يا مدام ...مستوى ندى بيتحسن يوم عن يوم ....وبأذن الله مع استمرار المتابعة ...حتخش كى جى تو على الاقل... بجيد جدا ...داليا قالت : الله يطمنك يا استاذ ....وعطت لة الظرف وقالت لة اتعابك يا استاذ ....الاستاذ خد الظرف وشكرها وقالها مش عايزك تقلقى خالص يا مدام ...ندى دى زى بنتى ..وحخلى هالك احسن واحدة فى المدرسة ...داليا ودعت الاستاذ ...ورجعت طلبت مى ...قالت لها معلش كنت بادى الاستاذ اتعابة .....وكملت ساعتين كمان ...ماهى الحكاوى كتيرة ...واسرار الناس اكتر ..وحرمة البيوت اكتر واكتر ......

الآ.... اية هوة اللى صعب فى منهج كى جى ون ....يحتاج لمدرس خصوصى فى البيت ..ويحتاج نشتم الحكومة ..ويحتاج نسب النظام اللى مش قادر يمنع الدروس الخصوصية ...طاب ما بدال ماتقعدى ترغى فى التليفون بالساعتين وتجيبى فى سيرة الناس ..ماتقعدى مع بتك تشرحى لها ...انتى مش معاكى بكالوريوس ولا انا متهيئلى ....هية أ ب ت وواحد اتنين تلاتة دى حاجة صعبة محتاجة مدرس ...ولا محتاجة نشتم فى الحكومة اللى مش عارفة تمنع الدروس الخصوصية ...طاب الحكومة حتعمل لك اية؟! ....حتيجى تقف على باب العمارة تمنع المدرس انة يطلع لك ...ولا تبوظ الاسانسير علشان المدرس يتقطع قلبة وهوة طالع لك فيحـّرم يرجع تانى ...لكن ازاى ...ماهى كدة عملت اللى عليها ...اتطمنت من الاستاذ على مستوى البت ...وحملت الحكومة الذنب ...فية احساس بالراحة والرضا عن النفس اكتر من كدة ...يا حاجة يامتعلمة يا ام بكالوريوس.... والله خسارة فيكى كل مليم صرفتة عليكى الحكومة بت الكلب دى علشان تعلمك

ياترى انا عندى حق فى اضراب 17 مايو ؟؟!!

الأربعاء، 6 مايو، 2009

مين فينا الظالم (7)

مين فينا الظالم (7)
صباح قصدى الدكتورة صباح بت عم مرسى ....دكتورة يعنى من ملايكة الرحمة ...خلصت الطب ...وجالها التكليف .......كان طبعا لازم بيبقى عندها نبطشيات ....كانت تروح النبطشية وتطلع على سكن الاطباء ...تتفرج على التليفزيون ...وتقرا فى المجلات اللى جايباها معاها ......الممرضة اتصلت بيها وقالتلها فية حالة طوارىء تحت يادكتورة ....صباح شخطت فى الممرضة ...وقالتلها خليها عندك للصبح وادى لها اى حاجة ......هوة اية احنا مش بنى ادميين ......عايزين ننام ........اتصرفى وماتتصليش تانى ...صباح او الدكتورة صباح ملاك الرحمة كان عندها وجهة نظر ...هوة احنا بنخد كام فى النبطشية يعنى ...علشان نفضل سهرانين طول الليل ....دى حكومة بت كلب على قد فلوسهم ....

ياترى انا عندى حق فى اضراب 17 مايو ؟؟؟!!!



كارم.... ابن اخو عم مرسى ...ربنا كرمة ودخلوة فى الشرطة ....ابوة اللى هوة اخو عم مرسى باع 3قراريط ارض طين سودة ....من اللى مافيش منها من بعد مابنوا السد ....علشان يدفع رشوة ...علشان يدخل الشرطة ...طبعا مش الكلية ...الكلية بتبقى عايزة 3 فدادين .....القصد... كارم وابوة كان عندهم وجهة نظر ....فى الشرطة التظبيط على ودنة مانت لوشوفت إربع الجنيهات اللى بتقع من العربيات وهية معدية على المزلقان اد اية ...حتعرف ان مش خسارة ندفع تمن 3 قراريط ...ونخش الشرطة .... داعز ياولة ربنا كتب هولنا ....الشطارة بجى تتلحلح وتظبط اللى فوجك علشان تجف على المزلجان ساعة الضهرية .....مش تخيب ويوجفك باليل ...كارم قال لا ابوة ....ماتخفش يابا دى سبوبة باليل اجمد كمان ....رد ابوة وقال لة .... بص ياولة ...اول جرشين يدخولولك ...نجيبوا حولى ولانعجة ...وندبحوا ...امال..... احنا لازم نشكر ربنا الى نعمتة ...ولااية .....كارم رد : طبعا يابا ...هوة احنا اجل منها .....دا احنا جريب جوى نبقى من كبارات البلد....ياترى انا معايا حق فى اضراب 17 مايو ....؟

الثلاثاء، 5 مايو، 2009

مين فينا الظالم (6)

اشرف مرسى ابن عم مرسى الكبير ...اتخرج من الاداب قسم فلسفة .....من 12 سنة ...لية دخل اداب ولية اتخصص فلسفة ...هوة نفسة مش عارف ....وبتعمل اية من 12 سنة ياشرف ...برضة مش عارف ...ادينى متلقح على القهوة ....مستنى المسابقات اللى بيقولوا عليه ....اوة كلام ابن عم حديت ...ولاد الكلب مابيعينوش الا المحاسيب .....انا اعرف واحد زميلى تجارة انجلش ...علشان ابوة وكيل وزارة ...شغلوة فى بنك استثمارى بالف وخمسميت جنية ....غير الحوافز والارباح ...مش لو عندى واسطة كنت اشتغلت فى البنك دة ..وطبعا ماكنش معترف ان اداب فلسفة ملهوش شغل فى البنك ...وقال ..يا عم الوسطة تعمل البدع ....القصد اشتغل بالثانوية العامة فى الشباب والرياضة ...حاجة كدة اسمها بدل معار .. يعنى بدل الموظف اللى طلع اعارة لغاية مايرجع من الاعارة .... وبياخد 60 جنية فى الشهر ......يعنى اتنين جنية فى اليوم .....بشرط ان الشهر مايزيدش عن 30يوم ...وطبعا شهر فبراير بيعتبر شهر الحوافز ...... كويس ياسيدى.... اهوم يجيبوا مصروف القهوة ...نعملوا اهية ماهى حكومة بت كلب ....سؤال ساذج منى استحملونى ؟؟؟ ..2 جنية كل يوم لمدة 12 سنة مش كانوا يفتحوا قهوة ....يقف فيها اشرف ....ويسيب الحكومة فى حالها

ياترى انا عندى حق فى اضراب 17 مايو ؟؟!!


الحاجة رئيسة حماة عم مرسى ... لسة بصحتها ...ماهى اتجوزت صغيرة ...وجوزت بتها صغيرة...رئيسة ست بعشر رجالة ...فاتحة بوتيك ومشغلاة الله ينور .... بيع وشرا ومكسب حلو ... كات دايما تقول لاشرف تعالى ياواد بدل قعدتك دى اقف مع ستك وحديك 300جنية فى الشهر ...وطبعا ماكنش بيرضى ...كان مستنى تعيين الحكومة ... اوحابب الانتخة... ...خلينا فى رئيسة ...قولنا ان الحاجة رئيسة بتكسب حلو قوى ...وفى شهر 3 من كل سنة كانت تجيب المحاسب وتقعد جنبة ..لغاية مايطلعها خسرانة ....وبعد ما طبقوا النظام الجديد فى الضرايب ...اخر مبلغ دفعتة ...كان 130جنية .. يعنى بحسبة بسيطة ...تبقى هية كسبانة 650 جنية فى السنة ....يعنى بتكسب فى اليوم اتنين جنية ....والنبى لو انت عندك مشروع بيكسب اتنين جنية فى اليوم ..كنت حتعمل فية اية ؟....عن نفسى كنت سبت المحل مفتوح ومشيت ومرجعتش تانى ...طبعا عندها وجهة نظر ...اللى هية ان الحكومة بتسرقنا ...خسارة فيها اى فلوس ....نسرقها احنا كمان ......مش عارف

ياترى انا عندى حق فى اضراب 17 مايو ؟؟؟!!!

حتى لوكان جمعة

حتى لو كان جمعة

عم مرسى فية شىء لله شكلة كدة دعى علية علشان نويت اجرسة هوة وعيلتة وجيرانة .....والدعوة باين عليها استجابت ولا اية .....يوم 15 مايو طلع جمعة ...طلع اجازة....هوة ذنب عم مرسى؟؟؟ ولا هوة مكتوب علينا يطلع لنا فى كل خرابة عفريت؟؟؟؟ ...بس لأ .... ايوة لأ يعنى لأ... مش حارجع ...مش حتنازل .... وحاننفذ الاضراب ... اية يعنى اجازة ...نقدمة ...نخلية يوم 17 مايو ... 17 مايو ... و17 علشان 16 بيبقى فية اجازة فى المصالح .....مافيش حجة.... حيتعمل يعنى حيتعمل ....ويا اهل المدينة اسمعوا واعوا .... يا هل المدينة.... الحاضر يعلم الغايب ....ان لا مرسى ولا غيرة حيوقفنا ......وحنعمل الاضراب ....وكل الحكاية ان احنا حنخلية يوم 17 مايو ......وحنضرب على اللى يقف فى وشنا حتى لو طلع يوم الجمعة هوة اللى بيحاربنا ...ووراك وراك ياعم مرسى

الاثنين، 4 مايو، 2009

مين فينا الظالم (5)

مين فينا الظالم (5)
مرات عم مرسى ...ست ناصحة ومدبرة فى موضوع الخزين ....دايما عاملة حساب 10سنين قدام.....تنزل كل شهر تجيب التموين ...وخصوصا بعد الحكومة ماذودت الافراد على البطاقة ...مرات عم مرسى كانت تستخدم اللى تستخدمة ....وتحط الباقى تحت السرير ...يا فى دولاب المطبخ ....مرات عم مرسى فى يوم .... اتنطرت من على السرير وهية نايمة ....صوتت ...الحقنى يا مرسى فية حاجة بتقرصنى .... عم مرسى قام وفتح النور وشال من عليها اللحاف ...لقى سرب نمل ماشى على رجليها ....قعدوا يموتوا فية ....وشال المرتبة وطلعوا الاربع كراتين اللى تحت السرير ...كل كرتونة كان فيها 25 كيلوا سكر ...باين كدة النمل نفسة ماعت من السكر قام طلع على رجل مرات عم مرسى علشان يحدق ...نسيت اقولكوا ان دولاب المطبخ كان فية 35 ازازة زيت ....ونسيت اقولكوا برضة ...ان الزيت زرنخ ...واترمى فى الزبالة .....ودعمى ياحكومة ..وادفعى ...منين مش مهم ....على حساب اية مش مهم برضة ...هوة احنا مش مسئولين منك؟! ....بلاش يا مرات مرسى ....ظط فى الحكومة ...هوة مش فية ناس غلابة نفسها فى كيلوسكر تعمل سد الحنك للعيال ...ولا ازازة زيت تحمر لهم بطاطساية ...
ياترى انا عندى حق فى اضراب 17 مايو..؟؟!!

الأحد، 3 مايو، 2009

مين فينا الظالم (4)

مين فينا الظالم (4)

عم اسرائيل ..جار عم مرسى ...عندة مزرعة خنازير ...عم اسرائيل بيكسب كتير ...الخنازير مابتكلش الا الزبالة ...وانتوا عارفين طبعا البلد فيها زباله اد اية ....دا غيران الخنازير بتولد مرتين فى السنة ....وكل ولادة باربع خمس خنازير ...يعنى مافيش مصاريف والخلفة كتير ....يعنى المكسب عال العال ....الحكومة قررت تدبح الخنازير علشان انفلونزا الخنازير اللى لو اتنقلت للبنى ادمين يبقى وباء ويموتنا كلنا ....عم اسرائيل كان عندة وجهة نظر تانية ...قال ان الحكومة بتضهدنا احنا المسيحيين ....وعايزة تخرب بيتنا ...وعاملين حجة انفلوانزا الخنازير دى ...عم اسرائيل هّرب الخنازير على وادى النطرون ....وشيلى ياحكومة ...اتصرفى ....مش احنا مسئولين منك ...بلاش ياعم اشرائيل طظ فى الحكومة العنصرية بت الكلب دى ...بس الل ماتعرفهوش ياعم اسرائيل ان الوباء دة لو جة مصر مش حيموت المسلمين بس .... دا كمان حيموت المسيحيين ...ويمكن تكون اول واحد يموت بما انك مخالط الخنازير ....

ياترى انا عندى حق فى اضراب 17 مايو ..؟؟!!

نداء واجب وفرض ...:

اللى يعرف مكان فية خنازير ولو خنزير واحد .....يخاف على نفسة بلاش على عيالة ...يجرى يبلغ مديرية الطب البيطرى ....وقسم الشرطة ....ومديرية الصحة....ولو مش عارف نمرهم ...اتصل بالسنترال واعرف منهم النمر....ولومش عارف نمرة السنترال اقولك...

نمرة الدليل هية 142

السبت، 2 مايو، 2009

مين فينا الظالم(3)

مين فينا الظالم(3)
ام عم مرسى بعد ما الحكومة فصلتالانتاج عن التوزيع للعيش...اترحمت من طابور العيش والراجل بقى يجى لغاية عندها يديها العيش بقت بتاخد 40 رغيف وتدفع لة الاتنين جنية ...ام مرسى كانت بتاكل 4 ارغفة فى اليوم ...وباقى الاربعين كانت تقعد وتحط الحلة قدامها وتقطعهم لقم صغيرة...انا لما شفتها بتعمل كدة كنت فاكر ان عندها حد كبير ولا مريض بتقطع لة العيش علشان تسهل لة الاكل .....سذاجة منى انا معترف ...اتارى كانت بتقطع العيش علشان الفراخ....ام مرسى كان لعا وجهة نظر ...كانت بتقول ... العيش الحاجة الوحيدة اللى بناخدها ببلاش من الحكومة ... ودعمى ياحكومة رغيف العيش علشان الفراخ تاكل وتسمن ...وادفعى ياحكومة ...منين مش مهمم على حساب اية مش مهم ....المهم تدفعى مش احنا مسئولين منك ؟؟!! بلاش يا ام مرسى.... طظ فى الحكومة.... بس هوة مش فية ناس مش لاقية رغيف العيش دة ...ولا الفراخ اهم من البنى ادمين؟؟!!
ياترى انا عندى حق فى اضراب 17 مايو ..؟؟!!

الجمعة، 1 مايو، 2009

مين فينا الظالم(2)

مين فينا الظالم(2)

عم مرسى كل شهر يروح التأمين يجيب علاج السكر ....يصرفوا لة علبتين انسولين مع انة ما بيستخدمش غير واحدة بس ...كان ياخد العلبتين يستخدم واحدة ويحط التانية فى باب التلاجة ....وبرضة يروح التأمين كل شهر ياخد العلبتين ...بيقول حقى مالحكومة بتلهف منى تلاتة جنية كل شهر تأمين صحى ....عم مرسى عندة فى باب التلاجة اتنين وعشرين علبة انسولين .....عم مرسى راح الشهر اللى فات ملقاش انسولين ...كان ناقص ...عم مرسى اتعارك وشتم الدكاترة والممرضات والصيدلى .....ورح وهوة بيسب ويلعن فى الحكومة ....اللى ماتعرفهوش ان عم مرسى لما روح ....جة يطلع علبة انسولين من اللى فى التلاجة علشان ياخد منها ...اكتشف ان فية احداشر علبة تاريخ الصلاحية بتاعهم انتهى .....وطبعا رماهم فى الزبالة .....مش مهم مالحكومة تشترى ....مش احنا مسئولين منها ...اشترى ياحكومة ....مش مهم منين ولا مهم على حساب اية ....بلاش ياعم مرسى ....طظ فى الحكومة بس مش حرام اللى اترمى دة ...مش اكيد فية حد تانى ممكن يموت لو ملقاش الانسولين دة .....احنا بنعادى مين ....؟؟؟!!!....احنا بنحارب مين ...؟؟!!

ياترى انا عندى حق فى اضراب 17 مايو؟؟؟!!!!