الثلاثاء، 5 مايو، 2009

مين فينا الظالم (6)

اشرف مرسى ابن عم مرسى الكبير ...اتخرج من الاداب قسم فلسفة .....من 12 سنة ...لية دخل اداب ولية اتخصص فلسفة ...هوة نفسة مش عارف ....وبتعمل اية من 12 سنة ياشرف ...برضة مش عارف ...ادينى متلقح على القهوة ....مستنى المسابقات اللى بيقولوا عليه ....اوة كلام ابن عم حديت ...ولاد الكلب مابيعينوش الا المحاسيب .....انا اعرف واحد زميلى تجارة انجلش ...علشان ابوة وكيل وزارة ...شغلوة فى بنك استثمارى بالف وخمسميت جنية ....غير الحوافز والارباح ...مش لو عندى واسطة كنت اشتغلت فى البنك دة ..وطبعا ماكنش معترف ان اداب فلسفة ملهوش شغل فى البنك ...وقال ..يا عم الوسطة تعمل البدع ....القصد اشتغل بالثانوية العامة فى الشباب والرياضة ...حاجة كدة اسمها بدل معار .. يعنى بدل الموظف اللى طلع اعارة لغاية مايرجع من الاعارة .... وبياخد 60 جنية فى الشهر ......يعنى اتنين جنية فى اليوم .....بشرط ان الشهر مايزيدش عن 30يوم ...وطبعا شهر فبراير بيعتبر شهر الحوافز ...... كويس ياسيدى.... اهوم يجيبوا مصروف القهوة ...نعملوا اهية ماهى حكومة بت كلب ....سؤال ساذج منى استحملونى ؟؟؟ ..2 جنية كل يوم لمدة 12 سنة مش كانوا يفتحوا قهوة ....يقف فيها اشرف ....ويسيب الحكومة فى حالها

ياترى انا عندى حق فى اضراب 17 مايو ؟؟!!


الحاجة رئيسة حماة عم مرسى ... لسة بصحتها ...ماهى اتجوزت صغيرة ...وجوزت بتها صغيرة...رئيسة ست بعشر رجالة ...فاتحة بوتيك ومشغلاة الله ينور .... بيع وشرا ومكسب حلو ... كات دايما تقول لاشرف تعالى ياواد بدل قعدتك دى اقف مع ستك وحديك 300جنية فى الشهر ...وطبعا ماكنش بيرضى ...كان مستنى تعيين الحكومة ... اوحابب الانتخة... ...خلينا فى رئيسة ...قولنا ان الحاجة رئيسة بتكسب حلو قوى ...وفى شهر 3 من كل سنة كانت تجيب المحاسب وتقعد جنبة ..لغاية مايطلعها خسرانة ....وبعد ما طبقوا النظام الجديد فى الضرايب ...اخر مبلغ دفعتة ...كان 130جنية .. يعنى بحسبة بسيطة ...تبقى هية كسبانة 650 جنية فى السنة ....يعنى بتكسب فى اليوم اتنين جنية ....والنبى لو انت عندك مشروع بيكسب اتنين جنية فى اليوم ..كنت حتعمل فية اية ؟....عن نفسى كنت سبت المحل مفتوح ومشيت ومرجعتش تانى ...طبعا عندها وجهة نظر ...اللى هية ان الحكومة بتسرقنا ...خسارة فيها اى فلوس ....نسرقها احنا كمان ......مش عارف

ياترى انا عندى حق فى اضراب 17 مايو ؟؟؟!!!

هناك تعليقان (2):

  1. للأسف ده حال معظم شباب البلد
    الجزء المسؤول عن التفكير في دماغهم عطلااااااان ومصدي

    وللأسف لسه مؤمنين بمبدأ ان فاتك الميري ,,, اتمرغ في ترابه
    انا عندي واحد صاحبي مستعد يتفقع له عين بس يتعين في الحكومة مش عارف ليه برده

    تخيل حتى لو بتكسب بره الميره اكتر من 10 اضعاف
    اقولك مثلا انا شغال الحمد لله في دولة خليجية طبعا مش بالتخصص الجامعي انا كملت بعد الجامعة ودرست كمبيوتر وجرافك المهم بعد سنة من السفر اتصلوا بي في البيت عندنا وقالوا لي في مسابقة لتعيين المدرسين عاوزين نقدم لك فيها طبعا انا كنت هموت من الضحك والغيظ في نفس الوقت

    ايه المبرر اللي يخليني اقبل وظيفة ب 150 جنيه بس علشان في الحكومة مش عارف ده ان نجحت اصلا وقبلوني في المسابقة

    حتى والله تخيل بعد ما نزلت اجازة لمدة شهر كانوابعض اصحابي بيقولوا لي في وظيفة مدرس تعاقد في الواحات قدم عليها مش هتندم " لأنهم هيثبتونا في الحكومة " انا طبعا شكرتهم وقلت لهم خليها لناس تانية محتاجاها
    انا قصدي من الكلام ده اننا لازم نحرر دماغنا وتفكيرنا من حكاية الدادة الحكومة اللي هتشغلنا وتأكلنا وتشربنا وتجوزنا
    حتى لو دي كانت مسؤوليتها لكن مش قادرة تنفذها لضعف امكانيات او فساد وسرقة مهما كان السبب لازم احنا نحدد مصيرنا بإيدينا وناخد خياراتنا بنفسنا ونتحرك

    ردحذف
  2. حنعيش يعنى حنعيش6 مايو، 2009 1:00 م

    ربنا يكتر من امثالك يابراهيم يارب

    ردحذف