السبت، 9 مايو، 2009

طاب عايزنا نعمل اية ياعم الحاج

طاب عايزنا نعمل اية ياعم الحاج


الاول تصلى على حبيبك النبى ....وليلة 17 مايو تنام بدرى ..وماتتفرجش على عمور شعللها...دةلية ....علشان ماتسخنش نفسك ...فتقوم الصبح كارة الدنيا واللى فيها ....تنام وانت مقرر انك مش حترمى عيوبك و خيبتك وقلة حيلتك على شماعة الحكومة ...اقلع البامبرز وخش الحمام لوحدك ...اعمل اضراب على فسادك وعلى الفاسد اللى قدامك ...اضراب من غير تكسير عربيات ولاتوليع كاوتش ....اضراب مش حيتصور فى الفضائيات ولا على كاميرات المحمول ..اضراب نريح فية الامن المركزى ونخلية يتفرغ للارهاب ....واعمل شوية حاجات بسيطة مش حتاخد منك مجهود ...جرب وياسيدى ان ماعجبتكش ارجع تانى يوم 18 مايو عيش عيشتك...قصدى عيش موتك ....ماهو اللى يعيش زينا وبيفكر تفكيرنا وبيتصرف تصرفاتنا يبقى ميت مش عايش ....جرب تعيش بنى ادم ...من اللى اكرمة ربنا ونعمة ...بنى ادم مش اى كائن تانى ....شوف يا سيدى ...قوم بدرى روح شغلك فى ميعادك ...ماتزوغش ولاتاخد اجازة عارضة ...ولا تعمل خط سير للتامين الصحى ....اقعد على مكتبك من غير ماتحط الفول والطعمية والمخلل ....اشتغل التمن ساعات ....ساعد المواطن وخلص لة شغلة ..ماتكلكعهوش ..... وان كنت دكتور اكشف على العيان فى المستشفى زى مابتكشف علية فى عيادتك ....ولو كنت مهندس استلم صح من المقاول ولو كنت مقاول ماتسمسرش فى الحديد والاسمنت ...لو كنت كناس اكنس الشارع كأنك بتكنس بيتك ...لوكان عندك عربية خلى اليوم دة يوم الفن والزوق ...ماتمشيش مخالف ...وركب الحزام مش عيب والله ...ماتركنش صف تانى ...ووسع للى جاى قدامك ... ماتشغلش السرينة الناس حتحترمك من تصرفاتك مش علشان مركب سارينة الشرطة .......لو كنت طالب احضر المحاضرة بلاش الكافيتيريا ... ولوكنت سكرتيرة ماتعمليش مكالماتك الخاصة من تليفون الشركة ....لو بتشترى حاجة ولقيتها اغلى من السوق ماتشتريهاش وقول للى بيبيع فى وشة ...انت غالى ومش حاشترى من عندك ...ماتخفش وماتتحرجش حتى لو قالك ياباشا وظبطك ....ماتديش رشوة اليوم دة حتى لو الشغل اتعطل ......لوكنت ست بيت نضفى البيت... وماتسبيش المية مفتوحة عمال على بطال... والاوضة اللى مانتيش فيها اقفلى نورها .....ووالنبى.... والنبى ماترميش الزبالة من البلكونة ... واطبخى اكلة حلوة للعيال ...اتزوقى لجوزك.... ولوكنت زوج ادخل على مراتك بتضحك وبوسها ...واقعد مع العيال اعرف اخبارهم ...بلاش قعدة على القهوة النهارد ..واللة اللى حتقولة على القهوة هوة اللى بتقولة بقالك 20سنة ...قوم فى الاتوبيس وقعد الست الحامل ولا الراجل العجوز ...ماتزوغش من الكمسرى وادفع التذكرة ...لو شفت حاجة غلط متقولش وانا مالى ...ماليش دعوة ...لأ ليك دعوة ودة مالك لوماحافظتش علية ماحدش حيحافظ لك علية ....يعنى ماتشوفش حد بيشرط كرسى القطر بالموس ولا بياخد لمبة من حمام المحطة وتسكت ....بلاش تبص لغيرك واحمد ربنا على اللى عطاهولك ...ساعد الناس واعذرهم ...ممكن تعمل كدة يوم 17 مايو ....يوم واحد فى السنة ...صعبة دى ...بس بشرط ...باليل وانت نايم على المخدة اسأل نفسك انهى احلى يوم 16 ولا يوم 17 ...ولو قولت ان يوم 16 هوة اللى احلى ...يبقى انا اللى غلطان ..انا الساذج ...انا العبيط الوحيد اللى فى مصر ...بس انا عارف انى مش حاطلع غلطان ولا ساذج ولاعبيط ....عارف لية ...لانى بصدق كلام ربنا ...وسبحانة وتعالى قال فى محكم تنزيلة ...بسم الله الرحمن الرحيم ...ومن يتق الله يجعل لة مخرجا ويرزقة من حيث لا يحتسب. صدق الله العظيم ..... الكلام واضح زى الشمس اتقى ربنا حيحلهالك ويرزقك ماتعرفش منين ...انت بقى عايزها تتحل والرزق يجى الاول.... وبعدين تبقى تتقى ربنا ....براحتك يا جميل ؟؟؟ بس خدها منى كلمة ...مش حيحصل ولو بعد ميت سنة ....وخليك قاعد لابس البامبرز وبتدور على بزازة جديدة وبتشتم فى الحكومة وفى الفاسدين اللى انت منهم...

اللهم انى لا استطيع التغير بيدى..... واخجل منك ان اغير بقلبى... ...فاقبل محاولتى للتغيير بلسانى ...اللهم بلغت اللهم فاشهد..........

هناك 28 تعليقًا:

  1. عليه افضل الصلاة والسلام

    وخليك قاعد لابس البامبرز وبتدور على بزازة جديدة


    هههههههههههههههههههههههه حلوه دي

    عجبتنى

    عندك حق والله فى كل كلمه قلتها

    طيب بالنسبه لمسؤلة الدعايا بتاعة الاضراب يومها ينفع تجيب دلفري ؟؟

    عشان الشغل بس

    ردحذف
  2. ياباشا كباب وكفتة بالسلطاتة وبابا غنوجوة

    ردحذف
  3. عليه افضل الصلاة والسلام


    والله يا دكتور اسلام عندك حق في كل كلمة قلتها


    طيب بالنسبة للحماوات حضرتك

    مش بردو المفروض يتقو ربنا في اليوم دا ويبطلو

    حركاتهم ؟
    ههههههههههه


    انت فعلا بلغت يا دكتور وجزاك الله خيرا

    يارب بس الناس تفهم

    ردحذف
  4. علشان خاطرك ياريم ...حعملك حتة بوست ...صاروخ موجة براس نووية ...للحموات ....ولو انهم غلابة والله على قد دماغهم ...بس لازم يفوقوا

    ردحذف
  5. بوست جميل
    جمع سلبيات المجتع كلها وكتيرمننا شاركنا بصمتناوبقى كل واحد فى جزيره لكن فيه ناس كتير بتحاول والله لكن ليه احنا بقينا كدا مش عارفه يمكن الاستاذ وحيد حامد السيناريست فسر الموضوع لما قال ان الحكومه لما تبقى فاسده مش مشكله هيجى يوم وتتغير لكن لما الشعب يبقى فاسد هنا الكارثه مين هيغيره وانا معاه فى التفسير ده النا س ماصدقت حاله الفساد الحكومى اللى كل يوم بزيد وبيكافاء ولم يعد فيه امل فى تعيير والناس بتكتشف ان اللى كانوا زعلانين منه امس بتترحم عليه النهارده حتى الافلام والمسلسلات كان بيبقى فيه نهايه للشر النهارده والقصه بتخليك تتعاطف مع الشر كل ده بعمل غسيل مخ للناس وتقضى على الضمير الجمعى
    بالمصادفه وانا بكتب بسمع من بعيد اغنيه بتقول يانكون قد الحياه ياتعيش وحيد وسط الدروب
    تقبل تحياتى

    ردحذف
  6. عطش الصبار انا سعيد جدا بمداخلتك ...وصدقنى فية ناس كتير كويسين .... بس لازم الناس دول يعملوا حاجة والا الركب حتغرق بالكويسين والوحشين ...مرة تانية سعيد بتشريفك لية

    ردحذف
  7. د. اسلام
    معاك ياباشا ووسوف انشر دعوتك كمان
    ويارب تنجح فكرتك ولو على مستوى معدود
    لانها صح وتدعو للصح
    تحياتى

    ردحذف
  8. د.اسلام
    اعجبتني فكرتك وأؤيدك في دعوتك
    فعلا لابد أن ننصلح نحن قبل أن نطلب من الآخرين الصلاح
    لكن هذه الدعوة لا ينطبق عليها وصف اضراب
    فهي فعل قوي وأداء ما هو مطلوب

    يمكننا تسميته بيوم الصلاح او يوم الامانة
    تحياتي
    ايهاب

    ردحذف
  9. السلام عليكم و رحمة الله و بركاته

    ربنا يوفقك يا دوكتور يارب
    حقيقى بجد أنا سعيدة بالدعوة دى

    و ياريت لو هتنزل بوست جاى بردوا تذكر الناس ان نيتهم تكون لله

    على الاقل ييجى اليوم دا ميزان حسناتهم
    و ان شاء الله فى ميزان حسناتك انت كمان


    و عند وعدى بإذن الله
    أنا بعت اللينك للى عندى على الميل
    و هأنشره على المدونة ان شاء الله

    و يارب يكون خالص لوجهه




    دمت بود

    ردحذف
  10. والله عندك حق فى كل كلمة انا بتخض لما بسمع كلمة اضراب
    لان الشعب المصرى هو ما يقول اضراب بيفتكرها اضرب وتكون فرصة للهمجية :)

    ردحذف
  11. اللهم صلي على سيدنا محمد
    ربنا يقدرنا على التنفيذ وان كان لي اعتقاد خاص ان من يطبق يومها لن يكون اول يوم تطبيق له

    وربنا يجعل الدعوة دي في ميزان حسناتك
    تحياتي

    ردحذف
  12. عليه افضل الصلاه والسلام
    ربنا يعينا ونطبق ده واكيد حاجات كتير هتتغير ومش هانرجع للغلط تانى
    متفقه مع رأى ستيته ان الانسان اللى هينفذ الكلام ده هيكون بطبعه كده
    لكن ده مكيمنعش ان ممكن يكون فى شئ بيتهاون فيه وشايفه بسيط ومتهاون فيه

    والامثله اللى حضرتك ذكرتها كتير

    ربنا يعينك

    ردحذف
  13. ميرسي يا دكتور اسلام

    والله يا دكتور انا اصلا بضحك على تصرفات الحموات

    اللى فعلا بتكون على اد تفكيرهم

    بس طبعا في انتظار البوست دا بس وجهه ناحيتى شويه يمكن الرؤوس النووية دى تجيب رد فعل سريع

    ردحذف
  14. بصرحه دعوه كريمه جدا
    ياريت كل يوم الناس تعمل كده

    انا مش بنادي ياليأس بس الناس للأسف مبسوطه كده
    وتسمع كلام غيريب يبرر اللامباله والتواكل والانانيه
    اللي بقوا فيها


    والكلمه الجديده اللي فرساني (يعم دي بلدهم يعملوا فيها اللي عيزينه)
    مش فاهمه يقصدوا مين
    هي دي مش بلدنا والا ايه وهمه مين دول اللي دي بلدهم ومش بلدنا زيهم

    ردحذف
  15. انت مختفي النهارده ولا انا بتهيألي ؟

    لعله خيرا يا فندم

    ردحذف
  16. ان شاء الله الدعوة دى تنتشر.. واهى دى الحاجة اللى الواحد عندة امل يحصل بيها انقلاب سلمي
    تحياتى يا د. اسلام

    ردحذف
  17. اللهم اما صلى على سيدنامحمد
    صلى الله عليه وسلم
    بارك الله فيك يادكتور اسلام
    سنقوم بنشرالدعوة
    وربنا يجعل الخير يعم بهذه النصائح الطيبة
    وجعله الله فى ميزان حسناتك
    وتقبل تحياتى

    ردحذف
  18. السلام عليكم

    خلاص ان شاء الله انا يوم 17 هحاول ما اعملش حاجة غلط
    بس انا عندى ملاحظة ان الواحد مننا ما يعملش الصح على سبيل التجربة
    ولكن يجب انه يكون عنده يقين انه لما يتقى الله وما يبقاش فاسد يبقى ربنا هيخلف عليه بالمال والبركة وراحة البال والسعادة

    ولان كل اللى هيعمل كده هيحس بسعاده فى ليلة يوم 17 ولكنه هينتظر ان تتغير الحياة من حواليه ولما هيصبح تانى يوم هيلاقيها هى زى ما هى ..فهيرجع تانى يعمل اللى كان بيعمله يوم 16

    لذلك انا قصدى يكون يوم 17 وسلوكيات يوم 17 قرار ناخده كلنا من دلوقت حتى لو بدأنا تنفيذه يوم 17 ونقرر انه ما يبقاش يوم 17 بس

    تقبل تحياتى

    ردحذف
  19. بسم الله الرحمن الرحيم
    أولاً : ألف صلاه علي الزين ...
    وجاي أرد الدين .
    عليا ديون جاي اسددها ...
    اشكر سول والدكتور علي دعوتهم الطيبه .
    ثانيا: اشاركهم همي همومهم ونبددها ...
    ونمحيها في لحظه صدق مع رب الكون يرسيها .
    ثالثا : نتحاسب ونتعاتب بحب ...تدلني علي الطريق أمشي فيها ...للجنه .
    رابعا : من غير زعل ولا خجل الغلطان نعرفه غلطه علشان تاني ما يقع فيها .
    خامسا ...و سادسا ...الخ انا نويت والنيه لله أقاطع ...وأقطع كل خط اتصال مع أبليس .
    وأصالح روحي ...و كل من زعلته ولو بنظره غير مقصوده .
    في انتظار النتائج المثمره ان شاء الله .

    ردحذف
  20. السلام عليكم

    التغيير على طول بيجي من اعماق النفس .. وبالاشيا الصغيرة

    دعوة جميلة جدا

    موفقين

    ردحذف
  21. سلام
    اسلام الفكرة هايلة و انا معاك مضرب يوم 17 عن الفساد و اتمنى الاضراب ده يكون دائما
    انا من المغرب ربما حكون وحدي اللي مضرب بس معلش يمكن يلتحق بيا ناس اخرين ان شاء الله
    فكرة واحدة عايزة اقولها لك
    لا يعني اننا نحاول كجماعة نقدم تغيير لانفسنا و نساهم في ان بلادنا تكون بخير ان الحكومة مش فاسدة
    لا فاسدة و كل المنغصات و المشاكل اللي احنا عايشين فيها بسببها و بسبب قوانينها
    مودتي
    ربنا يوفقك و يوفقنا و يكون اضراب 17 مايو ناجح باذن الله

    ردحذف
  22. هاحاول وربنا معانا

    فكرتني باحدهم قال
    لو الحرامية في مصر بطلوا يسرقوا يوم واحد في السنة
    لكانت مصر دي من اغنى الدول في العالم

    ردحذف
  23. دعوة جميلة ونابعة من قلب محب للخير

    انا معاكم وان شاء الله الاضراب هيكون عند الجميع

    بارك الله فيك

    دمت بحفظ الرحمن

    ردحذف
  24. ربنا يكرمك ويلاقى كلامك صدى عند الجميع

    ردحذف
  25. فكرة جميلة أوي .. وعلى فكرة أنا راح أضرب من النهار دا .. تحياتي لك ووفقكم الله وبارك فيكم.

    ردحذف
  26. بعد أذن حضرتك انا نشرت دعوة للحملة عندى فى المدونة جزاك الله عننا خيرا
    وان شاء الله يكون آثرها طيب

    ردحذف
  27. عليك افضل الصلاه والصلام وعلى ال بيتك وصحبك اجمعين الى يوم الدين يا رسول الله

    طيب حاضر يا دكتور اسلام بس ربنا يخليك قولى انا ست بيت وبعمل كل المذكور اعلاه بالنسبه لستات البيوت

    يوم 17 اقلب واغير ولا استمر والله بالتكلم جد مش هزار هو دا العادى عندى

    على العموم هانشر الموضوع لقتناعتى بأنه هايكون مفيد جدا لو عمله اكبر عدد من الناس بره فى الاشغال والشارع
    وربنا يقدرك على الافكار البنائه

    ردحذف
  28. جزاك الله خيرا

    و انا مع رأي الدكتورة ستيته حسب الله الحمش

    لن يكون اول يوم ولكنه سيكون يوم بطعم اخر

    ردحذف