الثلاثاء، 12 مايو، 2009

مرضيش يسمعنى

مرضيش يسمعنى

فى يوم من الايام اكتشفت انى راجل اهبل ...ايوة اهبل لابس بيجاما وسخة مقلمة ....ومشمر رجل وسايب الرجل التانية تجرجر فى التراب .....وحاطط الساندويتش فى جيب البيجاما ...وازازة المية فى الجيب التانى.....شعرى منكوش ودقنى طويلة ....وفى رقبتى صفارة وماسك فى ايدى علم اخضر .....وواقف فى ميدان كبير مليان عربيات من افخم واغلى واحلى واحدث الانواع ....كنت واقف فى الوسط اصفـــّر واشاور ...وفاكر ان فية حد سامعنى او حتى شايفنى ...كنت فاكر انهم بيسمعوا كلامى علشان كدة المرور منتظم ....والحركة سهلة ...بدليل انهم بيشاوروا لى وبيضحكوا لى ...كنت فاكر برضة ان الابتسامة معناها شكر وتقدير وعرفان بمجهودى وتعبى ....اتاريهم بيضحكوا علية مش لية ....واللى كانوا بيشاوروا كانوا بيقولوا العبيط اهة ....حتى الابتسامة طلعت ابتسامة شفقة ....والمرور اللى كنت فاكر نفسى بأنظمة ...طلع ان فية اشارات تانية خالص ....توماتيكى .....هية اللى منظماة وممشياة زى الساعة .....يعنى اية ؟ ...والتعب اللى تعبتة دة كلة....اية .... راح على الارض ؟؟!! .....الوقفة اللى فى عز البرد ...ونغرة الشمس ....الشتا اللى كان بيرخ على دماغى ...والتراب اللى كان بيملى عينى ...كل دة راح اونطة ...دراعى اللى اتخدلت وانا بشاور يمين وشمال ....نفسى اللى اتقطع فى الصفارة علشان العربيات تاخد بالها ....كل دة كان على الفاضى ....كانت صدمة كبيرة .... كبيرة قوى ...سبت مكانى المقدس وسط الميدان ....ورحت قعدت تحت شجرة على جنب الطريق ..حسيت بالتعب انا فى الميدان دة وانا عمرى عشرين سنة .....عمرى ماحسيت بالتعب ولا حتى بالستين سنة اللى عدوا من عمرى ....بس النهاردة حسيت بالتعب ...تعب الستين سنة كلة نزل على اكتافى ....رجلى ماعدتش شيلانى ....وشوية ...ولقيت عربية نضيفة قوى ..وغالية قوى ...وقفت جنبى ونزلت منها ست جميلة قوى ...شيك قوى ...غنية قوى ....طبطبت على ضهرى وعطتنى ظرف فية فلوس ...وابتسمت ...ومشيت ...برضة مشيت قوى ....وانا قاعد مذهول ..مش مصدق ...هوّة انا بقيت شحات ولا اية .....لأ...لأ ..ياخونا ماتفهمونيش غلط ...انا بس بريـــّح شوية وحرجع تانى ......ماهو برضة من حقى اريح شوية ....دا انا بقالى ستين سنة واقف ....ماحدش سمعنى كالعادة ....ركنت ضهرى على الشجرة ...وطلعت الساندوتش من جيب البيجاما ...وازازة المية من الجيب التانى ....وقعدت آكل واتفرج على الميدان من برة ....طول عمرى وانا شايفة من جوة ....بس من برة بتشوف احسن واوضح ....بس اية دة ....اية دة ..اية دة ....هما بيتناطحوا كدة لية .....هما بيزقوا فى بعض كدة لية ....الله..... الله... هما بيخطفوا من بعض اية ؟....ياخبر ابيض ....هوّة كل واحد حاطط ايدة فى جيب اللى جنبة لية؟! .....واية حكاية السكينة اللى كل واحد حاططها ورا ضهرة دى ؟!!!...لا لا لا ....المنظر غريب قوى .....الفرجة من برة بتخللى الواحد يشوف حاجات غريبة قوى ....وشوية لقيت واحد داخل على وسط الميدان ... لابس نفس البيجاما بتاعتى ...نفس التقليمة ....وسايب شعرة ودقنة زيى بالظبط ....ومشمر رجل وسايب رجل تجرجر فى التراب ...حتى العلم والصفارة....اية بيقلدنى دة ولا اية ؟.... الله ولا اكونش انا وانا مش واخد بالى ....ناديت علية ...حبيت اقول لة بلاش ..شوفها من برة الاول قبل ما تخش ... مارضيش يسمعنى ...مارضيش يفهمنى ...هوّة حر ذنبة على جنبة ....وافتكرت حاجة غريبة قوية ...من اربعين سنة وانا جاى الميدان ....كان فية واحد تحت الشجرة دى ...فى نفس مكانى دة ....وكان بيندة عليا ويقول لى ..تعالى اقولك الاول...... بلاش ...بلاش يابنى .... اسمعنى ... افهمنى .... بس انا مارضيتش اسمعة ....وكمان مارضيتش افهمة .....

هناك 19 تعليقًا:

  1. انت مرضيتش تسمعك علشان انت مش عاوز تسمع انت

    وعاوز تكون انت ومتقدرش تكون حد تاني

    وبما إن الميدان دول عمره عامل عاميله فيك وانت زي ما انت عاوز بعد ما بقيت ستين وكلت السندويتش وشربت أزازة المية تبقى مش انت وتبطل تنزل الميدان؟
    نو أبسلوتلي

    انت مش ها تسمع كلامك لأنك عارف قيمتك في الميدان ومش بتتخيل وظيفة وهمية ولا حاجة

    من فضلك قول لأنت على لساني أنت راجل إيجابي بس لو سمحت ممكن طلب؟
    نزل رجل البنطلون وشيل التانية من التراب أحنا على أبواب انفلونزا خنازير

    ردحذف
  2. طيب مش بدل ما تقوله بلاش

    كنت تنبهه

    جايز كان غير دينامكية العمل وخلاها تكون فعاله اكتر
    مش بس العلم الى بينظم به جايز في حاجه تانيه يغير بها شكل الميدان من بره مش من جوه بس


    وجايز اوي يكون كمان انت لما قعدت اربعين سنه تنظمهم بالرايه خدوا على النظام والميدان ده ماشي كويس فضل رايتك ؟؟


    ايه ده مش هانبطل نقف فى الميدان بقى هاه

    ردحذف
  3. الكلام كبير المره دى
    بس انا حاسه بيه وفهماه
    بس مش قادره اعبر عنه
    تحياتى

    ردحذف
  4. يعنى ابة ؟
    نمشى ونسيب الميدان بعد اللى شفناه
    هم يعملوا كدا
    طيب و احنا نتقبلة بدون اى رد فعل
    طيب هنروح فين هنفضل تحت الشجرة !!!

    لالالالالا احسن ندخل ونشتغل
    نعمل اللى علينا نقول ونصفر ونشاور
    ويمكن حد يشوفنا

    ويمكن حد داخل الميدان وبنفس البيجاما
    يشوفنا ويقلدنا بس يقلدنا صح

    تقبل مرورى

    ردحذف
  5. السلام عليكم و رحمة الله و بركاته

    بص .. المفروض كنت بدأت من النهاية
    يعنى كان المفروض فعلا تبص من فوق الاول للحكاية و أصلها و فصلها

    و دا مش عشان تقول له ابعد
    الوضع مايسرش
    لكن عشان يدخل و هو عارف و فاهم و ياخد باله

    بلاش تدخل بحماسك بس
    و انت مش مستعد ولا فاهم
    لأن فى الاخر دى بتكون النتيجة

    لكن دا ما يمنعش انك هتستمر
    و تواصل بعد ما شفت من برا

    بالعكس
    هتفهم .. و تتعلم
    و هتتعامل على بصيرة

    و أكيد كدا هتعرف بجد ايه اللى ورا الابتسامة
    او الاشارة
    و ماعدوش يأثروا فيك كدا



    دمت بود

    ردحذف
  6. الطعم المرة دي مختلف
    موضوع مهم جدا والله
    اللي أقدر أقوله اننا كتيييير جدا بنبنى قراراتنا على تفاصيل صغيرة قد لا تكون مؤثرة في الواقع الكبيييييييييير

    معلش عندي مثالين صغنطتين " صغيرين"
    1 - انا شغال بره مصر بشوف كتير ناس غير مصريين بيشوفوا مصر من خلال الافلام وبيبنوا وجهة نظرهم على اللي شايفينه وبس فتلاقي اللي يقولك مصر كلها دعارة " من افلام خالد يوسف واتباعه " واللي يقولك البلد ولا باريس " من افلام شرم الشيخ وما شابهها "
    2 - انا كمان وقعت في نفس المطب لأني قعدت فترة طويلة متابع البرامج الحوارية خصوصا 90 دقيقة وكل يوم انا وانا نفسي مسدودة وحالتي النفساوية تعبانة .... كل يوم جرائم واغتصاب وقتل و حوادث طرق حرق ومجاري ضاربة في كل البلد وسرقات في كل مكان وتحرش بالستات في الشوارع واختطاف اطفال ونساء من داخل بيوتهم والتعذيب في اقسام الشرطة وامن الدولة والمطاريد وبطالة ومخدرات وغلاء وفساد وافساد والله وصلت لمرحلة اني اتعقدت في حياتي وماكنتش عاوز انزل اجازة

    لكن لما نزلت لقيت الوضع مختلف في مشاكل وفي بلاوي لكن في حاجات تانية مبشرة والناس عايشة وبتتأقلم رغم الظروف الصعبة ولقيت اصحابي بيضحكوا ويهزروا عادي رغم مشاكلهم لكن شوفت الحياة بشقيها الحلو والوحش

    فعلا

    لازم نشووووووووف الصورة كاملة

    ردحذف
  7. حاسس إني فهمتك
    ربنا يعينك
    إنت بتعمل حاجة صح
    وأكيد فيه ناس بتقدر

    ردحذف
  8. دايما المنظر من بره مختلف تماما عن المنظر من جوة

    احيانا الواحد بيبقى بيغرق ومش عارف انه بيغرق

    اللى ع الشط بس هو اللى شايف انه هيغرق

    فكرة حلوة
    وتقبل تحياتى

    ردحذف
  9. هى الناس اللى بتتعب بترجع بحاجات جامدة كدا

    الاول طمنى عليك

    ان شاء الله تكون دلوقتى احسن

    المشكلة في الميدان مش فيك

    انت يكفيك شرف المحاولة وكفاية ان اكيد اللى

    بيجى مكانك دا واحد شافك في يوم من الايام

    واتعلم منك

    وهاتفضل تحاول انت واللى هايجى مكانك لحد ان شاء

    الله الميدان ما يتظبط

    وكل واحد يطلع ايده من جيب اللى جنبه ويرمى

    السكينة اللى ورا ظهره


    وساعتها الابتسامة اللى هايبتسموها ليك او للى

    واقف في وسط الميدان هاتكون ابتسامة امتنان مش

    شفقة

    والناس هتشاور لولادها عليك ويقولو اهو هو دا

    السبب في تظبيط الميدان

    مش عارفه اقولك غير انك رائع بمعنى الكلمة

    ردحذف
  10. السلام عليكم ورحمة الله وبركاته
    أحم أحم
    دى طبعآ أول ززياره
    هههههه
    رنا يدوم الود بإذن الله
    بصراحه الكلام ده كبير
    تحياتى لك ولقلمك
    وبجد مش قادره أعبر بعد ماقرءت ربنا يوفقك
    وفى الخر
    أحنا معاااااااااااااااااااك
    أحنا معاااااااااااااااااااك
    تحياتى لك
    إيناس

    ردحذف
  11. طيب ما تسيبه للايام وهى تعلمه

    ماهو كل واحد فى الدنيا لازم لازم ياخد فرصة التعلم لواحده

    والا ما حدش هايعمل حاجه

    ردحذف
  12. ايه ده الله
    دي حلوة اوي
    ده انا اصلا مكنتش فكراها حلوة كده
    تعبيرات رائعة
    معني اعلي
    فعلا الشخص عمره ما بيشوف الحاجة من جوة ذي برة
    لازم فعلا قبل دخول اي شىء نبصله نظره من برة
    لقيناه ينفع يبقه مخسرناش
    لكن لو منفعش بلاش نركب دماغنا ونمي بنفسنا في التهلكة

    بوست رائع واسلوب اروع

    ردحذف
  13. اسلام
    انت ممكن ترتاح شوية
    لكن مستحيل تعتزل الميدان
    ممكن تشوف الصورة كاملة من بره
    وجايز تكون قاتمة .. لكن لازم تدخل تانى وتحاول تنظم
    تحاول تشارك بكل جهدك ..
    لانك لن تجد نفسك الا داخل الميدان

    ردحذف
  14. والمرور اللى كنت فاكر نفسى بأنظمة ...طلع ان فية اشارات تانية خالص ....توماتيكى .....هية ال
    لى منظماة
    انا مش معاك فى نظره التشائم دى صحيح ان بعد فتره بنلاقى ان فيه اشارات تانيه خاص زى ما بتقول لكن غالبا العيب ما بيكونش فينا تخيل لو كل واحد بص من بعيد وحسبها ما كانتش حياتنا اتقدمت الدنيا بتتقدم بالناس اللى بتبقى فى قلب الميدان مين قاللك انهم كانو بيضحكوا عليك اكيد كانو ممتنين واكيد فيه منهم اللى نفسه يبقى زيك
    لو كل ميدان فيه واحد ماسك علم اخضر حتى لوشعره منكوش كانت حاجات كتير اتغيرت وبلاش القه تحت الشجره فيه كتير تحت الشجر دلوقتىبيراقبوا من بعيد
    عاوزين ناس فى الميدان
    بوست رائع ومؤلم

    ردحذف
  15. ايه دا...
    هو مارضيش يسمعك
    ولا رضيش يفهمك .
    و أنت ما رضيتش تسمعه
    ولا رضيتش تفهمه ...
    لكن انا سمعت كلام سوووول لييييه ؟
    وانا فهمت ايييييه؟
    لييييييه ياسوووول .
    الله ...يبارك لك ويبارك للدكتور

    ردحذف
  16. د.راجع تاني...
    اوعي تنساني !

    ردحذف
  17. استاذى العزيز / فركشاوى

    ههههههههه
    معلش بئا

    دى ىخرة اللى يمشى ورايا

    بس منتظرين عودتك
    و مشاركتك


    دمت بود

    ردحذف
  18. الله اكبر والله البلد دى فيها الخير ليوم الدين انا عن نفسى مقتنع بكدة ...انا فرحان قوى بالتعليقات كلها ....يالا بقى نقوم كفاية نوم وطول مافية شباب زيكوا البلد حيتصلح حالها والله ...وماتنسوش باقى من الزمن يومان على الاضراب

    ردحذف