الأربعاء، 13 يوليو 2016

الخداع الإستراتيجى طريقك الى السعادة الزوجية القاعدة الثانية

الخداع الإستراتيجى
طريقك الى السعادة الزوجية
القاعدة الثانية
(لاتصدق كل ما يقال لك)

قال تعالى : (بَلْ وَجَدْنَا آبَاءَنَا كَذَلِكَ يَفْعَلُونَ  (صدق الله العظيم .
قوم ايه عملوا زى ابهاتهم وجدودهم وكملوا فى عبادة الاصنام فدخلوا النار لكفرهم وغباءهم .. نوع اكسرا من الغباء الجينى اللى بيتورث لغاية النهاردة .. اينعم اغبياء اليوم مابيعبدوش اصنام كفر والعياذ بالله ... لكن بيعبدوا اصنام فكر وتفكير بتدخلهم نار الدنيا خالدين فيها .
اغبياء اليوم صدقوا كلام اباؤهم الأولون ...  صدقوا انه لوغلبك بالمال اغلبية بالعيال ... صدقوا انه تقصقصى طيرك لايلوف على غيرك .. و ان جوزك على ماتعودية وابنك على ماتربية ... وصدقوا ان يا مأمنه للرجال يا مأمنه للميه فى الغربال ..مع ان الايام اثبتت ان لما العيال تكتر والهم بيزيد الراجل بيطفش ... بيهج ... بيخلع ... وان قصقصة الريش عمرها مابتمنع راجل انه يتجوز تانى ...وان لا جوز اتعود ولا ابن اتربى .. والاهم ان الشك والتخوين بيخلى اللى ما بيخونش يخون ..
الرجاله بقى صدقوا ان دبح القطة سيطرة .. وان كسر الضلع يطلع مكانه 24 (ماعرفش طبيا تيجى ازاى ) ولما يشاوروا ويخالفوا يبقى كده صياعة .. صدقوا ان الرجولة هز سرير وفتح عكا ...مع ان الايام اثبتت ان دبح القطة ماعدتش يخوف ... وكسر الضلع بيطلّع مكانه 24 حالة كره وحقد وكسرة نفس واكتئاب واهى عيشة والسلام ... مايعرفوش ان الصياعة انك تختار الرأى الصح حتى لو ماكنش رأيك ... مايعرفوش ان الرجولة امن وامان وطبطبة وحنان قبل ماتكون هز سرير ..
مش بس اباؤنا الاولون اللى مش لازم نصدق كل كلامهم ... احنا كمان مش لازم نصدق كل كلام ونوس الاعلام ومدعى الثقافة ونخب العار والعوار وصاحبى اللى على القهوه وجارتى والبنت اللى بتعمل الحواجب فى الكوافير ... حتى لو فرضنا انهم عايزين المصلحة وبينصحوا لله .... نصيحتهم دى تلزمهم تخصهم وتخص ظروفهم وبيئتهم وثقافتهم وتفكيرهم  ... واللى ماتعرفهوش بقى ... ان مافيش جوازة زى التانيه ..واللى ينفع فلان ماينفعش علان ... واللى يمشى مع علان مش بالضرورة يمشى مع ترتان ... كل جوازة حالة خاصة ... حالة فريدة .. كل اتنين متجوزين لهم اسلوبهم وطريقتهم ونظامهم فى التعامل مع الحياة ...
(خللى بالك معظم اللى بيتقالك انه بيحصل مش اكتر من انه مجرد امنيات انه يحصل. اه والله كده ولو مش مصدق .. لاحظ كدة وقولى )
خصيمك النبى لما تشتكى لصاحبك وينصحك فكر الاول نصيحته دى تنفع معاك ولا لأ ... السيدة فى ضهرك لما تفكى بكلمتين مع جارتك وتنصحك .. فكرى الاول نصيحتها دى تمشى مع ظروفك ولا حتزود الطين بله ..
عموما مش كل اللى سابهولنا ابهاتنا وحش وماينفعش ... ولا كل اللى بيقولهولنا صحابنا بيودينا فى داهية ... القصد انك تفلتر وتختار اللى ينفعك ..

الى اللقاء 


الثلاثاء، 12 يوليو 2016

الخداع الإستراتيجى طريقك الى السعادة الزوجية القاعدة الاولى

الخداع الإستراتيجى
طريقك الى السعادة الزوجية
القاعدة الاولى
(لاتصدق كل ما تراه)


سهرت انا وبنتى الصغيرة نتفرج على فيلم سبايدر مان ... تكسير وتخبيط وطير فى الهوا ... كان الفيلم شاددنى ... بنتى سألتنى  : الفيلم عاجبك يابابا ؟..قولت لها : قوى .. الواد ده جامد جدا ... بيعمل حاجات خارقة ... بصت لى بريبه وقالت : انت مصدق يابابا ... قولت لها : ايوه ... وانتى مصدقه ؟ ... قالت لى : لأ طبعا ... انا عاملة مصدقة ...
البنت الصغيرة عاملة مصدقة ... لكن احنا يا كبار مصدقين ... مصدقين ان نانسى عجرم اللى فى التليفزيون هية اللى فى الحقيقة ... مصدقين ان هيفاء وهبى شكلها كده وهية قايمة من النوم ... مصدقين ان ياسمين صبرى فى برنامج بيت العيلة هية ياسمين صبرى اللى واخدة دور برد ...
مصدقين ان ظافر عابدين بيصحى من النوم بيحب على روحة ... وان عمرو يوسف علطول حاطط برفان قصدى برفيوم لاتقولوا عليا قديم ولا حاجة ..
مش عايزين نصدق ان كل ده خيال ... وان نانسى وهيفاء وياسمين مايفرقوش عن اى واحده ست عادية مابتطلعش فى التليفزيون ... الفرق بس فى الاضاءة والمكياج وزاوية التصوير ... مش عايزين نصدق ان ظافر وعمرو زى ابو محمد وابو كريم ... بس الفرق حركات متدربين عليها وحوار مكتوب لهم وحافظينه... مش كل اللى نشوفه نصدقة ونبقى عايزين منه وعايزين زيه .. لان ساعات كتير اللى بنشوفه بيبقى خيال فى دماغنا قبل مايكون صورة قدام عنينا ...
فوق كده وصلى على النبى ... مراتك متفرقش كتيرعن نانسى وهيفاء وياسمين  ..دا يمكن تكون اكثر انوثه وجمال  منهم بس شغل البيت وطلبات العيال وطلباتك مش عاطينها فرصة تمارس انوثتها ... جوزك مايفرقش كتير عن ظافر وعمرو والرداد ... دا يمكن يكون ارجل .... بس الكفاح والجرى ورا لقمة العيش علشان يوكل العيال ويلبسهم ويديهم دروس .. مش مديله فرصة يبقى رومانسى ويجيب ورد يا ابراهيم ...
اه نسيت حاجة مهمة ... الفيلم اللى بتقفل على نفسك الاوضة وتقعد تتفرج عليه وتشحن ... ده بقى بالذات مش حقيقى خالص ... كله اضاءة وزووم وعدسات وحوارات وادوية والمشهد ابو نص ساعة  اللى بيبهرك ده بيتصور فى اسبوع ... لان بالعقل كده .. مافيش حد يستحمل كده ..
ساعات كتير بنقارن بين الخيال والواقع ... فبننكد على نفسنا الواقع ومابنعرفش نعيش فى الخيال ......
دور على نانسى فى مراتك ودورى على ظافر فى جوزك .... والختمة الشريفة حتلاقوهم

الى اللقاء



الأحد، 10 يوليو 2016

الخداع الإستراتيجى طريقك الى السعادة الزوجية

الخداع الإستراتيجى
طريقك الى السعادة الزوجية

السعادة الزوجية الكاملة غاية لاتدرك وأمل لايترك ... اتكتب فيها كتير واتقال فيها مواويل ... واتعالجت بكذا طريقة ... بس كان دايما العلاج علاج اعراض ... محدش كان بيعالج اسباب ... ومن اشهر الكتب كان كتاب مستر هوبنز الشهير .. كيف تخون زوجتك وتجعلها سعيده ... واللى اتسبب فى ان البعض ذهب الى المأذون مرتين ... وكتييير راحوا للمأذون المرة التانية بس من غير مايروحوله.. مستر هوبنز فشل فى حلوله اللى قدمها فى كتابه لأنها كانت حلول كلها خيانة وكدب وتحايل ... حلول تغضب ربنا ... واللى يغضب ربنا عمرة مايرتاح ولايشوف سعاده ... بتبقى عيشتة ضنك  ...
قوم ايه الحاج هوبنز المصرى قرر انه يألف كتاب عن السعادة الزوجية ... وسماه الخداع الاستراتيجى طريقك الى السعادة الزوجية ... طبعا انت دلوقتى بتقول مافيش فايده ... المصرى متدين بطبعة ... يقولك الخيانه والكدب حرام لكن يألف كتاب عن الخداع ... طاب اية الفرق بين الخداع وبين الكذب والخيانة ... ما الاتنين واحد ... انت بتشتغلنا .. صح ؟
انا بقى اللى بأقول : مافيش فايدة .. المصرى دايما حاسس ان فيه حد بيشتغله .. عموما انا ياسيدى قصدى بالخداع هنا ... خداع ونوس الجن وونوس الانس .. مش قصدى خداع شريك الحياه .. شوفت .. انت اللى نيتك مش صافيه .. وبعدين بطل تتسرع فى احكامك .. اقرا الكتاب الاول وبعدين احكم ...
عموما الكتاب عبارة عن عشر فصول ... كل فصل قاعده ... لو استوعبت القواعد ونفذتها .... مش حاوعدك بالسعادة الزوجية الكامله ... لان زى ما قولتلك السعادة الزوجية الكاملة غاية لا تدرك وامل لا يترك ... لكن اوعدك انك حتقرب قوى منها ... وتعيش مبسوط اكتر شوية ..
بس فيه شرط ... ان الشريكين ينفذوا القواعد مع بعض ... لازم هما الاتنين ... والا حتبقى ملهاش لازمة ... ونرجع تانى نمشى فى طريق مستر هوبنز الاجنبى ... وترجع ريما لعادتها القديمة ...
                                                 إلى اللقاء مع القاعدة الاولى

                                                     الحاج هوبنز المصرى
مع حفظ  حقوق الملكية الفكرية لمخترع شخصية مستر هوبنز