الأربعاء، 29 أبريل 2009

مين فينا الظالم (1)

من حوالى شهر كدة كنت عملت بوست ادعى فيها لعمل اضراب من نوع خاص اضراب يبنى مش يهد ... فية ناس وافقت... وفية ناس رفضت ..... سكت بس بصراحة ماقدرتش اسكت كتير .....فقررت اقول لكوا وجهة نظرى وانتوا بقى تشوفوا انا عندى حق ولا ماعنديش ووجهة نظرى دى حتكون برضة فى سلسلة ....عجبتنى حكاية السلسلة دى!!!!!!! وحأسميها مين فينا الظالم

مين فينا الظالم (1)


انفلونزا الطيور........ مرض خطير....... مش المشكلة فى انة بيقضى على الفراخ ولابيضيع الثروة الداجنة....دى هينة .. ولا المشكلة انة بيصيب البنى ادمين ..... دى سهلة اهى ليها علاج هوة شرطة السرعة والتشخيص الدقيق ....بس فية حل ....المصيبة الكبيرة بقى ...ان الفيروس دة يتحور فى الانسان ويبدأ يتنقل بين البنى ادمين .....ساعتها بقى حيبقى وباء ....زى وباء الكوليرا اللى حصل فى مصر زمان ......يعنى موت بالجملة ......ايوة ...الناس حتموت بالجملة .....وخصوصا ان فيروس الانفلوانزا على قد ماهوا فيروس عبيط ...شوية شمس تموتة ...الا انة فيروس رزل .....كل ما تعمل لة مصل يحور نفسة ....تعمل مصل تانى يحور نفسة تانى ..... يعنى بالبلدى كدة لو حصل واتحور وبدأ يتنقل من انسان لانسان ...يبقى مافيش حاجة حاتنفعنا غير رحمة ربنا ..... واتعلمنا زى كل اللى درسوا الطب مااتعلموا.... انة لما بيظهر وباء اول حاجة بنعملها ان احنا نرفع درجة الاستعداد ونعمل حاجة اسمها كارنتين ......بمعنى ان لو فية حالة اشتباة واحدة فى مكان يبقى لازم نقفل المكان دة .....لاحد يدخل ولا حد يطلع ....لغاية مانسيطر على المرض .....حاجة عادية جدا ومن اساسيات الطب الوقائى فى اى بلد متخلف فى العالم ......لغاية كدة حلو ..؟؟ لا مش حلو ....لية ..؟؟ علشان احنا مصريين ومانقدرش مانفتيش ....علشان احنا بنفهم فى الطب والهندسة وادارة الازمات والحكم كمان..... هية كيميا؟....وعلية فقد قررنا نحن المصريين الوطنيون بناة الاهرام ....ان نضع ايدينا فى يد بعضنا ...ونتصدى .....لحكومة الاعداء ..الممثلة فى نظيف واعوانة .....التى اثبتت الايام انهم من سلالة راشيل وحننيا ....كما اثبتت الاستخبارات الحديثة كونهم ياكلون انواع خاصة من الفراخ تربى فى مزارع تحت الارض ...ويتركون الشعب الغلبان يكح تراب ...على رأى الاعلان الرخم ....وقررنا ان نتصرف بما يتراءى لمصلحتنا فبدأنا بما هو آت ....
خبينا الفراخ وقفلنا عليهم فوق السطح ...علشان لما الطب البيطرى يجى مايلاقيش حاجة ...والفراخ اللى تموت نرميها بسرعة فى الشارع الا تعدى اخواتها ....وبعدين ما احنا طول عمرنا بنرمى الفراخ الميتة فى الشارع اية اللى جد .....وعم ريشة صاحب مزرعة الفراخ اللى بان فيها الاعراض ...طبعا ما بلغش لية هوة عبيط علشان يعدمولة المزرعة ولا اية ...انت باين عليك مش من هنا !!!...واتصل بسرعة بعم عريف التاجر اللى طبعا كان فرحان وهوة بياخد المزرعة بنص التمن ...نسيت اقولكوا انة استلم الفراخ ...الفجر وطلع بالعربية من الطريق اللى ورا ....علشان يبعد عن لجنة المرور ....وراح المحافظة اللى جنبنا اللى ماكنش فيها انفلوانزا .....لغاية كدة .....كلة يهون.... طاب والدكتور البيطرى اللى بيطلع علشان يحصن اللى يقدر يلاقية ..وينسى يحط التحصين فى التلج ...ويقولك....ياعم ...اهم حاجة عند حكومة الاعداء ان الدفاتر تكون متسددة ....وانا بسدد الدفاتر صح .....وطظ بقى فى اللى بتدفعة الحكومة ....مهما اعداء ولاد كلب بقى....ولى كان يتلم بمليون بقى عايز مليار ...وانتشر المرض ....وناس اتصابت ...وناس ماتت ....وبدأنا الحملةالاعلامية المعروفة (جنازة ونشبع فيها لطم )......المانشيتات الحمرا فى الصحف الصفرا اتلمت على عمور وميزو ومنمن ....وصوتى يا للى مانتيش غرمانة ....وسخنى ياللى ولعتى الفرن .....وبدل مايوعوا بناة الاهرمات ... مسكوا فى حكومة الاعداء اللى مش عارفة تشوف شغلها وفى الفاسد ابن الفاسد اللى لغاية دلوقت مش عارفين مين هوة....اللى اتغنى من مجايب التحصين اللى اكيد هوة كمان فاسد ....داغير السمك واللحمة اللى غلوا وحكومة الاعداء مابتتحركش ....وقعدوا يعيطوا على الناس الغلبانة اللى بيتبهدلوا بسبب حكومة الاعداء ...وطبعا مانسيوش يقولوا ان دا كلة علشان مافيش ديموقراطية ...ولاتداول سلطة ...وحودوا على التوريث ...وحقوق الانسان ...وماهو لوماكنش فية ضرب فى الاقسام ...ماكنتش الانفلونزا تقدر تهوب ناحيتنا .....الآ..... مين تبع اية وهما الاتنين رايحين على فين .....عرفتوا بقى لية انا عايز اعمل اضراب 17 مايو
ملحوظة : بدات تظهر اتفلوانزا الخنازير .....ودى بقى لوماتعدلناش يبقى علية العوض بجد

الاثنين، 27 أبريل 2009

انت عارف معنى الحب اية (8)والاخيرة

جميلة بعد مازهقت منى قالت انا لازم احط حد للراجل دة ....وقررت تيجى بنفسها....وهية طالعة على السلم ...قابلت نور ...هوة كمان قرر انة يجى بنفسة ....فتحت الباب ....مش عايز اقولكوا ....كانوا على وشك انهم يضربونى ... قالولى لخص بقى ...كل حلقة بجوازة مش حينفع كدة ... المهم.... دخلتهم وهّديتهم وعملتلهم عصير ....زى محمود سعد كدة ....وقولت لهم شوفوا بقى ....انا حاقول لكم اللى عندى ... وان اصبت فلى اجران وان اخطأت فلى اجر المحاولة ....وبدأت اقول ...مش بس لجميلة ونور .لأ بقول لكل اللى عايز يسمع ويبتدى من وقت ماانتهى الاخرين .....شوفوا بقى :
قبل ما تفكر تحب وتتجوز ....اتأكد الاول انك بقيت كبير ....مش كبير فى السن ....لكن كبير فى العقل و المشاعر .....والاهم ان يكون عندك ثبات انفعالى ...ماتجريش تحب وتتجوز تحت تأثير الفيديو كليب ....ولا الحاح الهرمونات ....ماتستسلمش لأحلام اليقظة والاوهام والخيال ...شوف الواقع زى ماهوة ...مش زى مانت عايز تشوفة ....عـّود نفسك انك تخلط العاطفة بالعقل .... لأنك لو ماعملتش كدة حتتصدم بالحقيقة المرة ....وترجع تعيط ....بص للى قدامك على انة شخصية واقعية ...بنى ادم يعنى ...ماتركبش احلامك علية وتصدق .... تصدق انها ملاك نازل من السما ....ولا تصدقى انة انسان مثالى مابيغلطش ...واوعى تفتكر ان الحب السخن بينجـّح الجواز .... بص حواليك وانت تعرف ان نص الناس اللى اتجوزوا وكان حبهم سخن ...اتطلقوا ....كيـّف تصرفاتك مع تصرفات اللى قدامك ...اتقابلوا دايما فى النص ...حبة عليك وحبة عليها ...حاسب من النقد عمال على بطال ...وابعد عن اسباب الصدام بالمشوار ....خليك ذكى وقول كلمة كويسة ...دايما قول كلمة كويسة ....وانتى ماتدوريش على عيوب جوزك وتظهريها.... وتنشريها ....اوعى من الشك ...غيرة معقولة ماشى ومطلوبة كمان .... اوعى تتباها باللى كنت بتهببة وانت شاب ....وتقعد تحكى مغامراتك الفظيعة .....مالوش لازمة حتضر اكتر ما تفيد .....وانتى ماتقارنيش بينة وبين جوز اختك ولا جوز صاحبتك ...ماتخليش شغلك ياخدك من مراتك ...وانتى ماتخليش المطبخ والعيال ينسوكى جوزك ...حافظ على اسرار بيتك ...وانتى بلاش تفكى بكلمتين مع ماما .....عامل اهل مراتك كويس ...رحب بيهم وجاملهم ....واوعى تحطى راسك براس حماتك ....صدقينى حتخسرى كتير ..... اعملوا صداقات ....زوروا واتزاروا ...بس نقــّوا صحابكم كويس .....ماتفتكروش ان الدنيا حتفضل حلوة على طول ....شوية الم وشوية امل .... شوية حلو وشوية مر ....عادى ..ماشى الحال ... كلة بيعدى ......بلاش بخل ..... وانتى بلاش اسراف ....جددوا حياتكم كل مدة ....فسحة حلوة .... هدية من غير مناسبة ......مفاجأة بس تكون حلوة ...حاكم انا عارف مفاجأتك البايخة .... دايما قولها بحبك ... الستات بيحبوا يسمعوها ...حتى لو قولتلى ان الحب باين فى تصرفاتك معاها ...هية عايزة تسمعها.... سمّّعها لها يا اخى ....ياساتر عليك !!!..... وافهم ان العلاقة الحميمة بتختلف من الراجل للست .... الست بتبقى عايزة حب وحنان وعطف علشان تستجيب ....وانتى افهمى ان الراجل بيستجيب على روحة ....يبص بس !!!....خلية يبص ياستى ......بلاش الحجاب فى البيت ....
وانت ماتفكرش ان الستات زى مابيطلعوا فى الهوت بيرد ولا النت .... ياعبيط دة تمثيل ...شغل سبوبة مهنة حرفة ...بدليل ان انت نفسك مابتقدرش تعمل اللى بيعملة صاحبنا ...ولا اية ؟!!!
وانتى كمان ...بلاش رخامة ...دا جوزك...... يعنى حلالك .....مش عيب ان احنا نتعلم ونطور ...حسسية انك عايزاة زى ماهوة عايزك وبلاش نظام الجثث والديب فريزر دة........جربى.... النتيجة حتبقى رائعة ...على الاقل حيضحك فى وشك الصبح .....ومش حيسألك عن مكان الشراب .....ولا حيقول زرار القميص مقطوع لية ؟؟..... خدوا اجازة من بعض ...سبها تبات عند مامتها يومين .....ولا سافر لك يومين ....اوحشوا بعض .....واوعى ....اوعى تحرم الست من امومتها ...الست مابتبقاش ست كاملة قدام نفسها الا لو خلفت ...بس اتعامل مع تنظيم الاسرة ...وانتى بلاش نظام الارانب ...وماتصدقيش ان العيال بتربط الرجالة ...الدنيا اتغيرت ...دى بتطفشهم دلوقت .......لو سبت مراتك تشتغل.... اقف جنبها .... ساعدها ..ساعدها فى البيت وفى شغلها ...افرح من قلبك لما تكبر فى شغلها ...حتى لو مرتبها بقى اكبر من مرتبك ...بلاش كلاكيع ...يامعقد ....وانتى اقفى وراة وجنبة ...حسسية انة راجل مثالى .....وانك واثقة فية وفى قدراتة ....وان هوة اللى حيحقق كل امالك واحلامك .... خلو ولادكوا همكوا الاول والاخير ....وبلاش السؤال العبيط الاهبل بتاع بتحب با با اكتر ولا ماما ياحبيبى ؟!!!!العيال دول بكرة والنبى ماتبوظوش بكرة كفاية امبارح والنهاردة اللى باظوا ......واخيرا ...والنبى والنبى والنبى ...ماتسمعوش كلام الفضائيات ...ومتخلهوش ياثر عليكوا ...دى سبوبة ياولاد ....اصحى كدة ومتخليش نفسك بضاعة السبوبة ....يبيعوا ويشتروا فيك ...ويكسبوا من ورا احلامك ومشاعرك ................................ ..............................................انا كدة خلصت ........................................


ملحوظة 1 : جميلة ونور نزلوا من عندى بعد ماشربوا العصير وسمعوا الكلام ...نور خدنى بالحضن وباسنى وشكرنى...لكن جميلة شكرتنى بس .....خسارة ....بهزر طبعا او مش بهزر ... جميلة ونوراتجوزوا تانى ...بس المرة دى بعد ما فهموا .....


ملحوظة 2 : الدنيا تســـاعنا كلنا.........................................والله

الأحد، 26 أبريل 2009

انت عارف معنى الحب اية (7)

انت عارف معنى الحب اية (7)
عندى مشكلتين ...الاولى ان المفروض ان الحلقة دى كانت الاخيرة ...لكن اثيرت مشكلة فى غاية الاهمية ماينفعش نعمل السلسلة دى ونتجاهلها .....المشكلة التانية بقى ان جميلة ونور ما عندهمش المشكلة دى ....يالله ...ربنا رحمهم منى المرة دى ..... اية بقى المشكلة ؟ ....المشكلة لو اتنين بيحبوا بعض قوى ...واتجوزوا ....وعايشين سعدا ....بس اكتشفوا ان واحد فيهم مابيخلفش ....ياترى الحب حيفضل زى ماهوة .... ولاحيزيد ....ولا اكيد حيقل ....هوة بصراحة الموضوع صعب قوى ...خصوصا انة بيفرق من الراجل للست .....هوة الراجل عايز الولد ...علشان لمايموت يكون فية حد شايل اسمة ....بس هوة انت ساعتها حتكون معانا ....ولا حد اصلا حيكون فاكرك ....وساعات يقولك انا عايزة علشان اتعكز علية لما اكبر ....دا طبعا على اساس انة ضامن ان الواد مش حيسبة ويهاجر ويطفش من البلد ....والسبب الاهم طبعا هوة علشان يورث الفلوس اللى قعد يلمها طول عمرة ...ومايلهفهاش اخواتة على الجاهز.....طاب والنبى ماتنساش تحول جزء من الرصيد للاخرة ..علشان يبقى معاك فلوس تصرف ....ويجرى يطلق الست ويكسر قلبها ...مش كفاية انها مجروحة فى انوثتها .....لا يطلقها ويتجوز علشان يخلف ......حق الله .....حقة ....محدش يقدر يعيبة ...اى نعم هية مشاعر الابوة اقل حبتين من مشاعر الامومة ...بس موجودة علشان كدة محدش يقدر يمنعة من الجواز ....المشكلة مش فى الراجل المشكلة فى الست ....اللى مابتعرفش تطالب بحقها ....وبتضحى بأمومتها وفطرتها ....مش علشان الحب والعشرة زى مابتقول دايما ...لكن بتبقى اكتر علشان ماتبقاش متطلقة ....كلمة لسة لغاية دلوقت صعبة ....وتبعاتها اصعب .....وتقول لنفسها : هى البنات الصغيرة عارفة تتجوز لما المتطلقة حتتجوز...وبعدين حاقعد فين ...ومين حيستحملنى ...وان استحملونى ....حاستحمل انا ازاى نظرات الرجالة الزبالة للست المتطلقة ...لا ياعم ...كدة رضا ....وخليها بجميلة ...والراجل اكيد حيشيلها لى ...وتبدأ تهدى نفسها وترضيها بأحلى جمل اخترعناها علشان نريح بيها نفسنا ...قسمة ونصيب ...ماحدش بياخد اكتر من نصيبة ....اللى مكتوب على الجبين لازم تشوفة العين ....وتفضل انها تعيش مجروحة ومكسورة بحاجة هية ملهاش ذنب فيها ....وعلشان احنا مجتمع عبيط ومابنقدرش تاخد قرار فى مستقبلنا ولا فى حياتنا ....المفروض ندور على حل ...والحل موجود بس لاننا مجتمع عبيط برضة ....بنتكسف نتكلم فية ونستعيب ....مايصحش ...ساعات بنعتبرة كفر ...وقبل ما اقولكوا الحل ....حاحكى لكم حدوتة ...كان ياما كان ....3سمكات واحدة ذكية وواحدة اذكى وواحدة غبية طحن ....كانوا بيعوموا فى بركة جنب البحر ...عدى الصياد على البركة .....وقال الله.... وانا راجع اصطاد ال3 سمكات دول .....السمكة الاذكى سمعت الكلام بتاع الصياد وراحت نطة فى البحر ونجت بحياتها ....والصياد راجع شافتة السمكة الذكية ....فكرت بسرعة وعملت نفسها ميتة وطفت على المية ...مسكها الصيد ورماها فى البحر ....ونجت السمكة الذكية ...مافاضلش الا الغبية الطحن ...قعدت تلف وتدور حوالين نفسها لغاية ما الصياد اصطادها ....وكانت عشوة لذيذة .......وطبعا احنا مش حنعمل زى السمكة الذكية ونطلب الطلاق ...لكن اكيد حنعمل زى الطحن ...علشان كدة الحل هوة ان احنا نعمل زى السمكة الاذكى ....ببساطة وبدون كسوف ولا خشى لان اللى اختشوا ماتوا ....نطلب نعمل تحليل ما قبل الزواج ........حتى لو كنا بنموت فى بعض ومانقدرش نتخيل الدنيا واحنا مش مع بعض .....صدقونى واحنا على البر احسن ...وصدقونى برضة ...الحب السخن بيبرد ...والعشرة الدافية بتسقع....والحاجة الوحيدة اللى اللى بتدى الدنيا معنى وتخليها تستمر ...هية العيال ....ونزعل شوية ...وينكسر قلبنا حبتين زيادة ...ونكتئب شهرين تلاتة اربعة ....احسن ولا نعيش طول عمرنا زهقانتين ومكتئبين ومش حاسين بطعم الدنيا ...وعايشين واحنا من جوانا محملين اللى قدمنا الذنب ....ومستعذبين التضحية .....وما بنعملش حاجة غير ان احنا نلوم ...ونشتكى ....ولما نتعب من اللوم والشكوى .....ناخد حباية القسمة والنصيب ...ونشرب معلقة اللى مكتوب على الجبين لازم تشوفة العين ..... وناخد حقنة ماحدش بياخد اكتر من نصيبة .......


شكر خاص لصاحب الفكرة
القديرة ريم

الجمعة، 24 أبريل 2009

انت عارف معنى الحب اية(6)

انت عارف معنى الحب اية(6)

بعد ما نور طلق شرويت ...امة قالت لة سيبنى بقى انقيلك بمعرفتى ....اية رأيك فى البت نجلاء بت منيرة ....حلوة ومؤدبة ومعاها شهادة ...دا غير ان احنا دايسينهم وعارفين اصلهم وفصلهم ....والبت كمان غلبانة وعلى قد ايدينا .... وافق نور ...وعملو الفرح ...والزفة كانت جايبة اخر الشارع ...وبدأت حياة نور ونجلاء ...تبادل وتطبيع ونفس المستوى والماتشات كلها تعادل محد ش بيغلب حد ....ومرت الايام.... ودارت الايام ...وفى يوم ونور بيتغدى ....لقى نجلاء بتاكل وهية سرحانة ....سألها مالك ..قالت لة ولا حاجة ماتشغلش بالك ...قالها لأ فية حاجة قولى ...قالت لة اصل اخويا نجيب فى مشكلة كبيرة ...كان كاتب على نفسة شيك بالف وخمسميت جنية ...تمن بضاعة اشتراها ....بس زى مانت شايف الحال واقف ...وميعاد الشيك جة ...والراجل مش صابر ويا يدفع يا الراجل يقدم الشيك للنيابة ...نور قالها وبعدين .... نجيب حيتصرف ازاى ....نجلاء فالت لة والله مانا عارفة ...اكيد حيلاقى حد يسلفة ...ولا يوصل مع الراجل لحل ...هوة بيقول انة لو باع البضاعة دلوقتى حيخسر جامد ....لكن لو صبر اسبوع كمان حتفرق جامد ....ماتشغلش بالك انت ...اجيب لك فاكهة ولا تشرب الشاى على طول .....نور سكت شوية كدة وقال لها ....اعملى الشاى وبعد ما نشرب الشاى خدى الف وخمسميت جنية من الالفين اللى فى الدولاب ....ورحى اديهم لنجيب ..... نجلاء رفضت وقالت انت ذنبك اية ؟.....انا عارفة اخويا اكيد حيتصرف ....نور قالها اسمعى الكلام ...وبعدين احنا مش حنعمل حاجة بالفلوس دى دلوقت ...هـّوة اولى ...يفك بيهم زنقتة ....نجلاء كانت فرحانة قوى ....اخوها برضة يا ناس ....بس كانت فرحانة اكتر بنور ....وبعد الغدا راحت لامها علشان تدى اخوها الفلوس ...وراح نور يقعد ما امة شوية ....ام نور عملتلة شاى وقعدت تستفسر عن احوالة وعن شغلة .....قالها الحال ماشى ولو ان القعدة فى البنك طول النهار ...كسرة ضهرى ....قالت لة يا ضناية يابنى ...طاب ماتحط شالتة ورا ضهرك ....ولما تروح خلى نجلاء تدعك لك ضهرك بابو فاس ...الا البت دى عاملة معاك اية ...اوعى تكون مزعلاك .....نور قالها ابدا يامة دى طيبة وغلبانة ....اسكتى يامة مش اخوها نجيب كان حيخش السجن ...كاتب على نفسة شيكات بالف وخمسميت جنية وماعهوش يسدد.....بس انا قولت لنجلاء تروح تدى لة الفلوس لغاية ماتفرج بعد اسبوع زى ما بيقول

امة بنرفزة : تدى لة الفلوس منين ...هية معاها فلوس ؟

نور بسذاجة : لأ من االفين الجمعية اللى كنت عاملها معاكى

امة : وانت تقولها لية اصلا على الجمعية

نور : مش مراتى حخبى عليها لية ؟!

امة : اه ياخايب يا مايل .....وانطلت عليك حكاية الشيك دى؟!!!

نور : طاب وهية حتكدب لية ...وبعدين هية ماطلبتش فلوس ...دى حتى كانت رافضة تاخدهم ...انا اللى صممت

امة : حتفضل طول عمرك عبيط ...دا كهن نسوان يا ولا ...ماتعرفوش انت ...تعيط لك شوية تقوم تصعب عليك وتروح كاعع ....وفى دخلت اخت نور من الباب ...هية مين دى يامة اللى تعيط لة

امة : تعالى شوفى خيبة اخوكى ...قال اية نجيب اخو نجلاء علية شيك وحيخش السجن واخوكى الشهم بعت لة فلوس ...الف وخمسميت جنية اتفرجى والنبى

اختة : ماهو نور اخويا كدة يامة طول عمرة طيب

امة : انت تقوم دلوقتى حالا ...تروح تجبيب الفلوس

نور : مايصحش يا جماعة ...طاب نستنى الاسبوع اللى قال علية ولو ماجبش الفوس حاروح اخدهم منة

اختة : ايوة ....علشان تكون الفلوس اتصرفت وموت ياحمار بقى

نور : ماشى ماشى انا نازل

امة : اياك ماتروحش

نور : خلاص يامة ...ونزل نور وكلام امة واختة بيلف فى دماغة ...بس قرر انة مايطلبش الفلوس حايروح يجيب مراتة بس مش حيطلب الفلوس ....شكلها حيبقى وحش قوى

ام نور واختة حطوا راسهم فى راس بعض

ام نور : الناس دى باين عليهم داخلين على طمع ....ايوة تلاقيهم بيقولوا موظف فى بنك كبير وبيقبض اد كدة

اختة : لا ... لازم يفوقوا من اولها هما عايزين يستعبطوا اخويا ولا اية

ام نور : ايوة يا بت فاكرة لما لما الراجل بتاع الفراشة جاب الكراسى واخوكى ماكنش هنا ....وابوها هوة اللى دفع ...فاكرة... ماصبرش اول ماجة اخوكى خد منة الفلوس ...طاب كان يتكسف على دمة ...دى اكنها نقطة بنتة... ياساتر

اختة : يامة مانا قولت لك ان الناس دى واطية ولمامة ....ماصدقتنيش ...طيب فاكرة لما صممت تروح للكوافير الغالى ...قال يعنى الكوافير الغالى هوة اللى حيعدلها المصدية ...بس اهو دبح والسلام

ام نور : طاب وبعدين يا بت ....حنعمل اية دلوقت ...انا عارفة ...عُمر نور ما حيطلب الفلوس

اختة : خلاص يامة انتى تقومى تلبسى ونروح لهم انت وانتى ....ونهزأهم بكرامتهم الارض وناخد الفلوس من حبابى عنيهم

ام نور : صح يابت عندك حق الاشكال دى ما ينفعش معاها غير العين الحمرا .....انا داخلة البس

ام نور لبست واخدت اختة وراحوا على بيت ام نجيب ....وعلشان ما اوجعش دماغك اتخيل انت اللى حصل .....فضيحة بجلاجل ....ضرب وشتيمة ونور مسك فى نجيب ...ونجلاء شدة شعراخت نور ونور ضرب نجلاء ...وامة صوتت ...والناس اتلمت..... وراحوا القسم ...ورمى نور يمين الطلاق على نجلاء .....وخدت امة الالف وخمسميت جنية ...واللى ماتعرفوش ان نجيب كان اتفق مع الراجل انة يصبر علية اسبوع واللى ماتعرفوش برضة ان نجيب جات لة بيعة حلوة تانى يوم العركة ...وباع وكسب وسدد الشيك ....ممكن بقى نضيف حاجة مهمة مع التبادل والتطبيع والمستوى والاداء الرياضى .... البيوت اسرار المفروض ان ماحدش يعرف عنك انت ومراتك حاجة ولا حتى امك ...لا حلو ...ولا مر .....ممكن ؟!؟!؟!؟

الأربعاء، 22 أبريل 2009

انت عارف معنى الحب اية (5)

جميلة بعد ما اتطلقت تانى مرة ...قررت تأجل موضوع الحب والجواز دة خالص ....ويدأت تشوف نفسها ومستقبلها ... تركز فى شغلها ....تروح بدرى وتمشى متاخر ....شغل شغل يعنى ...وشوية شوية بدأ نجمها يعلى فى الشركة ...ومع ان سنها صغير ...يادوب سبعة وعشرين سنة ...الا انها اترقت بسرعة وبقت نائب رئيس مجلس الادارة ...الراجل كان مبسوط من شغلها قوى ...وهية كمان كانت مبسوطة منة قوى ...هية دى الرجالة ..عقل....رزانة ....حكمة ....خبرة ... شياكة ..وذوق .....مش العيال بتوع اليومين دول ....ويالهوى يالهوى على الشعر الابيض ....تقولش سلاسل فضة ...هوة دة الصح ...امان وفلوس ومركز وقيمة ...... ودا معشراة بقى اكتر ما معاشرة ابويا وامى ...يعنى عارفة كل طباعة ...وراضية بيها ...ومن بختى اللى شاكلة حيتعدل ...ان مراتة ميتة ومعندوش عيال ......وبدأ يحكى عن الوحدة واد اية هية مرة ..وان النجاح والفلوس والشهرة والمركز ...عمرهم مايعوضوا عن ان يكون فية حد يريح على صدرة ...ويحس انة بيحبة علشان نفسة مش علشان مركزة ولا فلوسة ....وبدأت هية كمان تاخد بالها منة ...من لبسة ومن اكلة وتقدمة لة كباية العصير وتقولة كفاية قهوة ...صحتك ....وطبعا سانوتشات الكفتة اللى كانت تصمم انة ياكلها وسط الشغل ...ياحرام دا واقف طول النهار على رجلية ...وسافروا فرنسا علشان يحضروا معرض الشركة هناك ...ماكنش شغل على اد ماكان شهر عسل ...فسح وشوبنج وسهرات ....برضة الكبير كبير ...بلا لعب عيال ...ورجعوا من فرنسا على المأذون ...ويوم كتب الكتاب كان عيد ميلادة السبعة وخمسين ....طبعا اتولد من جديد .......كلة موجود ..امن وامان ...تبادل وتطبيع ....ومستوى ...اية النعمة اللى الواحدة فيها دى ....احمدك يارب ....بس ياخسارة ....الشعر الابيض اللى زى سلاسل الفضة مش بس معناة خبرة ورزانة وحكمة ...دا لية معانى تانية مابانتش غير بعد الجواز ....(شوف شوف دماغك حتروح بعيد) المعانى التانية يعنى خشونة فى المفاصل ...والكلوستيرول ...وحبة سكر كدة على خفيف ...مش مهم ...مانا متجوزاة وعارفة انة مش شاب صغير ...بس الشعر الابيض اللى عامل زى سلاسل الفضة كان لة بعد تالت (جات اهية )بدات تاخد بالها منة ..خصوصا بعد الاعلانات المستفذة اللى بتيجى فى التليفزيون ...اشى مسمار بينتنى ...واشى شمسية بتتفتح وبتتقفل ...واشى عصير وشاليموة .....ومرة تعمل مش واخدة بالها ..ومرة تعمل انة مابيفرقش معاها ...بس كل يوم كانت تنام ودمعتها على خدها ...وبدأ يعوضها بالهدايا والفسح واللبس والدهب والالماظ ...واستحملت ...بس هوة ما استحملش ...وبدأت الغيرة ...واتطورت لشك ...وبعدين زعيق ...ووصلت اخيرا للضرب ..... وروحت جميلة تالت لامها ....ودى دايما مشكلة جميلة معايا ....بتستعجل وتتجوز قبل ما اخلص سلسلة هوة معنى الحب اية ...لو كانت استنت ...كانت عرفت ان الحب والجواز مش بس تبادل وتطبيع ومستوى اجتماعى ...دا كمان آداء رياضى متقارب ومنافس ....ماهو ماينفعش مركز شباب المدينة يلعب مع فريق المحاربين القدماء ونستنى شوف ماتش حلو....؟؟!!!!!.

الثلاثاء، 21 أبريل 2009

انت عارف معنى الحب اية(4)

انت عارف معنى الحب اية(4)

أبو نور.... نور فاكرينة .....جوز جميلة الاولانى ...ابوة بقى كان عامل بسيط على مكنة فى شركة من شركات الغزل والنسيج من بتوع الحكومة ....هوة اللى بناها على كتافة من ايام باحلف بسماها وبتربها ...طول عمرة عندة ضمير فى شغلة ...وساعات كتير كان بيطبق ورديتين علشان يكفى مصاريف العيال ...بس العيشة ما بقتش مكفية ...واشترك فى مظاهرة ...كل اللى كان قصدة انهم يزودوا الحوافز .... ويرجعوا وجبة التغذية اللى قطعوها ...وعلشان هوة اقدم واحد ...العمال خلوة الزعيم ...زعيم المظاهرة ....أبو نور لقى ان المظاهرات اكسب من حكاية الورديتين دول ....المرتب زاد والوجبة رجعت ...وشغلوا نور فى بنك استثمارى كبير ...بمرتب الف وخمسميت جنية ....هوة نفسة بقالة اربعين سنة شغل ومابياخدهمش ...ومن يومها وأبو نور بقى حريف مظاهرات واضرابات خصوصا لما وصل للدش وطلع مع منى الشاذلى ....وهبد منها الف جنية فى الربع ساعة اللى طلع فيها ...و برضة ماشتمش فيها الحكومة ....دول شغلولى الواد ..اشتمهم برضة ....القصد نور فرح بالوظيفة وراح ضارب موبيل فخم ..وجاكتيتين وكام قميص على تلت كرفتات ....وجزمة ببوز وتوكة من الجنب ... بقى واد استثمارى بجد .....البنك بعت نور دورة تدريبية... اسبوع فى فندق خمس نجوم ....فول بورد ....الواد اتهبل وقعد يكلم نفسة ...انفتحت لك طاقة القدر يا نور ...دخلت من باب الجمال يانور ...بقيت رجل اعمال يا نور .....وفى التدريب اتعرف على زميلتة ..اسمها شرويت ...يعنى حاجة كدة اسبيشيال ...مال وجمال ....مدير البنك صاحب ابوها ....لا بباها... داللى جاى باينة فلة ....نور لقى فى شرويت البرستيج والعيلة والنسب والقيمة والناس النضيفة ....وشرويت لقت جدعنة ولاد البلد والشهامة والرجولة ....كان بالنسبة لها دنيا جديدة عمرها ماشافتها ....وكانت بالنسبة لة الدنيا اللى عمرة ما كان يحلم يشوفها .....اية طبعها شوية منفتح ...عادى بس بصراحة البت مؤدبة ...وقرر انة يطبع ....ماحنا بنطبع مع اسرائيل مش حنعرف نطبع مع شرويت ...وطبـّع ...واتجوزوا وفى الفرح اللى كان فى فندق خمس نجوم... جه ابو نور وامة واخواتة البنات .... كانوا حاجزين لهم تربيزة فى اخر القاعة ..فى الركن.... نور كان ملبسهم كويس ...كان شارى الهدوم من نفس المحل اللى بتشترى منة شرويت ...دا حتى دافع بالفيزا؟!! ....بس برضة قعدوا فى الركن فى اخر القاعة ...نور قال لنفسة او برر لنفسة ...ابويا وامى مابيحبوش الدوشة والاختلاط..... كدة احسن ...وخلص الفرح على خير وخد نور عروستة وطلع على الفيلا بتاعة ابو شرويت ...ماهم قرروا انهم يعيشوا فى الفيلا ....ماهى شرويت وحيدة وامها ....مامتها عايزاها جنبها ...سيبك من الشكليات المهم الحب والتطبيع (هوة فهم التطبيع غلط ولا اية ).وفى الصباحية ام نور راحت هية واختة علشان يصبحوة ....عادى يعنى ...بس ابوة مرضيش يروح معاهم كان عندة وردية اوقال ان عندة وردية .....دخلت شرويت والسفرجى وراها بيزق عربية الشاى ...وقدم لهم الشاى والجاتوة ....بصراحة البت رحبت بحماتها واخت جوزها كويس قوى ....ومشيت ام نور واختة بعد مااعتذروا عن انهم يتغدوا معاهم ...وفى السكة اخت نور كانت مولعة ....شفتى شفتى يامة ...مستكبرة تقدم لنا الشاى باديها ...اية مستوطية حطيتنا لية ..؟!! دا انا اخويا محاسب فى بنك قد الدنيا ...ياعينى عليك يا اخويا وعلى بختك ....شرويت ماكانتش بتروح تزور حماتها ...بس عمر ام نور ماكانت بتقولة حاجة ...ماكنتش عايزة تنكد علية ....بس اختة كانت بتقول ...نور كان عارف ان شرويت مابتحبش تروح لأمة ...مش مستكبرة لاسمح الله ...بس مافيش لغة حوار ....شرويت بتقول كدة ....بعد شوية نور لاحظ ان الحفلات اللى كانت بتتعمل فى الفيلابدأت تقل ...وبدأت تتعمل برة ....وبدأ محدش يقولة تعالى ....عادى اكيد عندهم اسبابهم ...المهم الحب .....وذود جرعة التطبيع شوية ......وفى يوم كان حاسس انة زهقان وان امة وابوة واحشينة واحشينة قوى ...راح سهر معاهم لبس البيجاما ونزل جاب قرطاس طعمية سخنة وجرجير ....واتعشوا وانبسطوا ...من زمان ماانبسطش كدة ....لما روح لقى شرويت جايبة لة بدلة جديدة وقميص وكرافتة ....عادى ماهى على طول بتجيب لة ...بس المرة دى كان حاسس بحاجة غريبة ...وفاق على صوت شرويت وهية بتقولة عايزاك تكون اشيك واحد فى حفلة بكرة دى اهم حفلة ...سالها وهوة سرحان حفلة اية ادى ....قالت لة اصل بابا اشترى المصنع اللى بيشتغل فية عمى من الحكومة .....وبكـــــــ ......وماسمعش حاجة تانى .....سرح وهوة شايف حماة وهوة داخل المصنع والعمال حوالية بيهتفولوة ....وفى وسط العمال شاف ابوة ....وشاف ابوة وهوةواقف قدام مكتب حماة مستنى الاذن علشان يكلمة فى الحوافز ...ماهى المظاهرات مابقتش تنفع ...ماهو بقى قطاع خاص ياحلو .....وحس نور انة بيقصر ...ويقصر ....ويقصر.....لغاية مابقى قد عقلةالصباع ....وصحى على صوت شرويت بتقولة .. اكيد ماما واخواتك وعمى حيكونوا ماشغولين ....فبلاش ندايقهم ونعزمهم مش كدة يا حبيبى ...؟!!بص نور فى عين شرويت وقالها برضة الواحد مابيتعلمش ....الحب ماطلعش واحد وواحدة ....دا طلع واحد واهلة.... ووحدة واهلها .....وعلشان الحب يمشى ويكمل ...لازم مستوى العلتين يكون زى بعض ....ردت شرويت وقالت ..انا كمان اكتشفت دة ...مش كفاية التبادل والتطبيع لازم كمان المستوى الاجتماعى.... مهم طبعا... ................................................ وهوة لوحدة المرة دى اللى روح لامة ...لان هية ماكنتش سابت فيلة امها ......

الاثنين، 20 أبريل 2009

انت عارف معنى الحب اية(3)

انت عارف معنى الحب اية(3)

جميلة بعد ماسابت نور ...قعدت تعيد حسابتها واكتشفت اد اية كانت غلطانة ...خصوصا بعد ما قرأت الحلقة التانية من المدونة بتاعتى ...واقتنعت ان الحب مش هّوة اللى فى السينما ....وان الحب الحقيقى هّوة تبادل المشاعر والاحاسيس والاحتياجات ...وشوية شوية قابلت شاب كويس .....لقت نفسها معاة ...واتبادلوا المشاعر والاحاسيس والاحتياجات .... وقررت انها تتجوزة ....خصوصا انة مش شبة احمد السقا خالص .....والمرة دى كانت صاحية قوى زى ماشافت مميزاتة شافت عيوبة ....وعرفت عنة كل حاجة ...اىنعم عندة شوية طباع بايخة بس مش مهم .....ماهى ماما عن جدتى عن جدتها اكرمهم الله جميعا قالت ..ابنك على ماتربية وجوزك على ماتعودية ....وهية قررت انها تسمع كلام الكبار ...وكانت كل ما خطيبها يعمل حاجة مش على هواها ...ولاحاجة ماتعجبهاش ...تقول معلش بعد الجواز حاظبطة واعودة ...واتجوزت جميلة ...وبدأت حياتها وهية مقررة انها تعيش فى سعادة....وتعوض تجربة نور ....الله لايرجع ايامها ....وخلص شهر العسل والحياة حلوة وسهلة ....والمشاعر متبادلة والاحتياجات متظبطة وكلة تمام ....بس يا خسارة ايمن كان لما بيرجع من الشغل ...كان بيقلع هدومة ويعلقها عل كرسى السفرة .... جاى تعبان مش طايق يا ولداة ....بس جميلة مش متعودة على كدة ...ماهى طول عمرها منظمة وبتحب النظام ....وبكل ذوق جميلة قالت لايمن ...لوسمحت يا حبيبى بلاش تعلق هدومك على كراسى السفرة ...وبكل ذوق ايمن قالها حاضر يا حياتى ....وتانى يوم برضة رجع ايمن من الشغل وعلق هدومة على كرس السفرة ...قالت لة جميلة وهية بتكز على سنانها ...انا فضيتلك مكان فى الدولاب ياروحى ....رد ايمن وهوة بيكز هوة كمان ...حاضر يا عينى ....وتانى يوم بدأ نفس الحوار ...بس نبرة الصوت بدأت تزيد فيها الرخامة ...كدة مش حينفع لو حد دخل علينا دلوقت يقول علينا اية؟! ...رد ايمن بنفس درجة الرخامة ...لما يبقى حد يجيى يبقى يحلها ربنا ....وعدى ست شهور على الحال دة ..... لاهية بتسكت ولا هوة بيعلق هدومة فى الدولاب..... وقررت جميلة انها تفضحة عند العيلة ....اسلوب ضغط ...! ماهو حتتعود يعنى حتتعود ...ماما قالت كدة ....وماتعديش مناسبة الا وتقول قدام الناس ....ايمن طبعة غريب! بيعلق هدومة على كراسى السفرة ....وعدت ست شهور كمان وبرضة مافيش فايدة .... لا هية بتسكت ولا هوة بيعلق هدومة فى الدولاب ...وبدات حرب المخابرات ...حرب ما تحت الحزام .....مش دة اللى هوة بيحبة ....طاب مش عملاة ....اوكية اوكية ..طاب مافيش فسحة الاسبوع دة ....ماشى ماشى ...والنبى مانا طابخة النهاردة ....تعبانة ياناس هوة مش من حقى اتعب .....ومالة طاب انا سهران النهاردة مع صحابى على القهوة .... وشوية شوية ....وبدأت الحتة اللى فى وسط السرير توسع ...وحمدوا ربنا ان مافيش عيال ....وكل واحد روح لأمة .....وطبعا جميلة قعدت تلعن فيّة وفى مدونتى ...وتقول ....ادى اخرة التبادل بتاع اهلك ...عملت اية بقى المشاعر والاحاسيس والاحتياجات ....جاتك نيلة فيك وفى اللى يسمع لك ......بس انا مظلوم والله ....لو كانت صبرت لما تقرأ الحلقة التالتة....كانت حتعرف ان مش بس التبادل مهم ...دا فية حاجة تانية اهم اسمها التطبيع ....مش اللى بنا وبين اسرائيل لاسمح الله ....لكن التطبيع يعنى الواحد ياخد على طبع التانى حتى لو الطبع دة مش عاجبة ....واوعى يقول قبل مايتجوزة ...حبقى اغير الطبع اللى مش عاجبنى ..واعودة على طبعى ....ماحدش بيغير حد ...والطبع مابيطلعش الا مع الروح .....يعنى ياتاخديه هوّة وطبعة مع بعض ....يا تسبية هوّة وطبعة مع بعض ...وقبل ماتتجوزى ...كان بدال ما تسمعى كلام ماما اللى ورثتة عن تيتا ...وتنفذية من غير ماتفكرى ....كنت اسأليها الاول ....هوا انت عرفتى تغيرى طبع بابا يا ماما ....؟؟!!!!!!

الجمعة، 17 أبريل 2009

انت عارف معنى الحب اية(2)

انت عارف معنى الحب اية (2)
ما بحبوش ياماما ...مش قابلها يابابا ...يا دة يا مش متجورة ...بحبة يا ناس....لو ماتجوزتش دى ..حاموت نفسى ....بحبها يا هوووة ....طاب لية ...لية بنحب فلان بالذات ونكرة فلان ...لية ممكن نقبل نتجوز فلان ...ونفضل الموت على ان احنا نتجوز علان.......فكرت وقرأت وسأ لت وبرضة ما وصلتش لإجابة ...لغاية ما يوم جات بنتى الصغيرة ....ونطت على حجرى وقعدت تبوس فية وتقولى انا بحبك قوى يا بابا ....طبعا كنت فرحان قوى ...وكان عندى استعداد انفذ اى طلب تطلبة ...ولو اروح اخر الدنيا ....سألت بنتى انتى بتحبينى قوى ..؟ قالت لى قوى قوى يا بابا ....سألت تانى طاب لية ؟...قالت لى وهية بتحضنى وبتدينى بوسة فى خدى التانى ....علشان انت بتجيب لى كل اللى انا عايزاة ...وطلعت تجرى تشوف قناة طيور الجنة ....البت الصغيرة البريئة ...لقت الحقيقة ....احنا بنحب اللى بيجيب لنا كل اللى احنا عايزينة ...ولو ماجابش ما بنحبوش .....ومن غير ما تلوى شفايفك ...وتكشر حواجبك ...وتكز على سنانك ...وتبدأ تدافع عن الحب ....وتنزهة عن اى شبهة مصلحة ...كمل معايا للاخر ....
اى نعم لما بنكبر مابيبقاش كل اللى حنا عايزينة ...شيبسى ولامصاصة..ولا قلم رصاص بسنون ...
لكن بنبقى عايزين حاجات كتير .....حاجات مادية ونفسية وعاطفية وجنسية ....ونبدا ندور حناخد الحاجات دى ازاى ....ومين اللى حيديهالنا ....ولما بنقابل حد ونتعرف علية وشكلة يريحنا ...نبدا من غير ما نشعر ...نسأل وندّور ..هوة حيقدر يدينا اية؟!! .....طبعا السؤال مابيتسألش مباشر كدة ....بس دايما بنلاقى طريقة نسأل بيها السؤال دة .....كلنا بنعرف نضحك على نفسنا كويس قوى ...ومفكرين ان احنا بنضحك على اللى حوالينا ... المهم ...ماتيجى نسأل كدة ونشوف .....طبعا انا مش حتكلم على الاكل والشرب واللبس ...دى اساسيات..ومش حينفع نحب حد وهوة مجوعنا ومعطشنا ومعرينا ....نعلى شوية.. ...لو لقيت اللى قدامك بيديك الامان وبتحس وانت معاة انك مش مضطر تهرب ولا تستخبى ولا تدارى ...ولما تلاقية دايما واقف جنبك وبيدعمك ...وطول مانت معاة بيديك السعادة والضحك والمتعة ...دا غير انة بيوريك حاجات اول مرة تشوفها .....ويعلمك حاجات اول مرة تتعلمها ...ولما تشوف اعجابة بيك فى عنية ...ولا لما يقلدك فى كلامك وحركاتك ...لما بتحس وانت معاة بضعفك وخضوعك وفى نفس الوقت يوصلك اد اية انت مسيطرعلية وعلى مشاعرة ....وانت معاة بيديلك احساس العيلة والاسرة ....ولا لما يديك احساسك بذاتك ووكيانك.....ويوريك اد اية انت اعظم واحد فى الدنيا ...ولما بيوصلك لأعلى درجات الاحساس برجولتك أو انوثتك ......دا طبعا بعد الجواز ...اة ... كلة ماشى بس جوة حدود ربنا ...
لو عطاك كل دة ...حتحبة؟!! بلاش لومعطكش كل دة ..ممكن تحبة ؟!!!! والنبى لا تضربة بالجزمة ....بس خلى بالك يا جميل ...احنا بنبقى مبسوطين قوى واحنا بناخد ...لكن لو ماعطيناش زى ما بناخد ....البيعة مش حتكمل ....اتعلمناها كدة فى التسويق ...انت تكسب وانا اكسب ....على فكرة ....احسن واحد علمنى التسويق ....بنتى ....ولو مش مصدق اقرا من الاول ....حتلاقيها طبقت معايا احدث نظريات التسويق ....حضن وبوسة فى مقابل شيبسى ومصاصة ...وقلم رصاص بسنون

الأربعاء، 15 أبريل 2009

انت عارف معنى الحب اية (1)

انت عارف معنى الحب اية (1)
جميلة ونور ...شابين حلوينوصغيرين ..فى سنة اولى كلية ...كلية واحدة ..وسكشن واحد ...بس مايعرفوش بعض ...حيعرفوا بعض ازاى ....دا السكشن فية 300 طالب ...مين يعرف مين يا عم ... يوم الجمعة راح نور مع شلتة السينما ...وراحت جميلة مع شلتها هية كمان السينما ...علشان يشوفوا الفيلم الجديد بتاع احمد السقا ومنى ذكى ...فيلم رومانسى وانت عارف احنا اد اية محتاجين الرومانسية ....ولا اية ؟!!! النور انطفى ...وبدأ الفيلم ...كانوا مركزين قوى ...ومشدودين لكل لقطة ...مع انهم ياخى شافوا الميكنج بتاع لفيلم على روتانا سينما ....يعنى عارفين لقطات الفيلم معمولة ازاى ....كلة ضحك على الدقون ...وتمثيل فى تمثيل ....لكن الشاشة الكبيرة اللى بنحس قدامها قد اية احنا صغيرين ...مع الضلمة والتكييف الساقع ...وشوية الموسيقى التصويرية الحزينة اللى تقطع القلب اللى معمولة بنظام الدولبى ....دا غير الديكورات اللى فى الفيلم اللى نفسك تقعد ان شالله فى ضلها ...لخبطوا مشاعر العيال ...وحس نور انة احمد السقا ...وحست جميلة انها منى ذكى .... وبدأ الفيلم ...مش فيلم احمد السقا ومنى ذكى ....لأ ....دا فيلم تانى فى دماغ جميلة ونور ....صدقت جميلة انها منى ذكى ....واتمنت انها تقابل احمد السقا .....وصدق نور انة احمد السقا ....واتمنى انة يقابل منى ذكى ...وتانى يوم وهما فى الكلية ...صادفت ووقفوا قدام بعض ....جميلة قالت فى نفسها ...الواد دة شبة احمد السقا ...مناخيرة بالظبط ...ونور قال فى نفسة ...البت دى شكل منى ذكى بالظبط دا حتى ودنها ...قربوا من بعض ...واتكلموا ...وانطلقت شرارة الحب ...أو اللى كانوا فاكرين انة حب ...جميلة ماكنتش شايفة غير احمد السقا بجدعنتة ودمة الخفيف ...ونور ماكنش شايف غير منى ذكى برقتها ورومانسيتها ...واتبادلوا كشاكيل المحاضرات ...واتكلموا فى التليفونات ...وقعدوا فى الكافيهات ...كل حركة حركة احمد السقا ...وكل همسة همسة منى ذكى ....ماكنتش شايفة هيافتة وقلة عقلة واستهتارة ...ماكنش شايف انانيتها وحبها لنفسها وحقدها ....بس كملوا ...كملوا لمجرد انهم بدأوا ...واتخرجوا ..واتجوزوا ...طبعا غصب عن العيلتين ....ماحنا لازم ندافع عن حبنا ...والا اية ؟!!!!.....وشافها وهية بالايشارب وشافتة ودقنة طويلة ...شافها وهية قايمة من النوم ...وشافتة وهوة معمص ...شاف انانيتها وحبها لنفسها ....شافتة وهوة مش عارف يعمر فى شغلانة ...نسيت احمد السقا وشافت نور ....نسى منى ذكى وشاف جميلة ....واتطلقوا بعد سنة من الجواز ....وصحوا من حلم احمد السقا ومنى ذكى ...وصحوا على الحقيقة المرة اللى ماكانوش شايفينها....او اللى ماكانوش عايزين يشوفوها ....كان حلم والعيشة فى الحلم احلى من العيشة فى الحقيقة ....بس فية واحد ناصح ذكى...عايش فى الحقيقة ....بيكسب كويس قوى من شغلتة ...وواثق قوى فى ذكاءة .... لدرجة انة بيوريك هوة بينصب عليك ازاى وبرضة بيتنصب عليك ...وياريتة بيدفعك فلوس بس كانت هانت !!...لأ ..دابيدفعك تمن التذكرة وكمان بيدفعك عمرك .......يا أهـــــــبــــــــل ...انت وهـيـــــــة....

الثلاثاء، 14 أبريل 2009

توضيح لابد منة

توضيح لابد منة
الواضح انى مابقيتش مركز ....وبدأت علامات الزهيمر تبان عليا ...انا مقصدش انى ادافع عن الشباب اللى مبدأة افعل ماشئت ....ماخلاص مافيش حياء....واذا كنت بأعذر الشباب علشان الطاقة والهرمونات والبحث عن الذات ....الا انى ماقدرش اعذر البجاحة ....وانك تطلب ان اللى حواليك يوافق على اللى بتعملة ...وساعات بتوصل انك عايز فتوى تصرح لك بدة ....ولو احنا كنا بنعمل كدة فى شبابنا ...كنا بنعملة فى المستخبى ...علشان عارفين انة غلط ...بس برضة مانعملش فيها ملايكة ....واذا كان الشباب لازم يتحاسب فاحنا كمان لازم نتحاسب لان لنا يد فى اللى بيحصل دة ...ولازم نتحمل نصيبنا من المسؤلية ...مش بس نقعد نشتم فيهم وخلاص ...يارب اكون عرفت اوصل وجهة نظرى.....

ملحوظة : هوة يمكن اناماباردش لكن بقرا كل التعليقات مش غتاتة بس الوقت هوة المشكلةمش اكتر
ملحوظة 2: هوة فية اية بالظبط واحد يقولى انت قدمك سعد على البد والتانى يقولى انت باين عليك روش وبتروش ...بلاش ظلم والنبى ...

الاثنين، 13 أبريل 2009

إ تحا سب قبل ما تحا سب

إ تحا سب قبل ما تحا سب
رحت اتفرج على ماتش الاهلى على القهوة ...هيصة وظمبليطة وجو كدة ...كل اللى كانوا بيتفرجوا معايا كانوا بيشتغلوا المدير الفنى للاهلى .....نزل دة......طلع دة ....المفروض ان فلان يرجع ورا ....وان علان يطلع قدام ....لا الماتش ولا الصحبة كانوا حلويين .....خدت كباية الينسون وطلعت قعدت فى ركن مع نفسى برة القهوة ...وخطر على بالى سؤال ...هّوة بجد لو احنا مكان جوزية ...كنا حنعمل اية؟ ... والسؤال جاب سؤال تانى ....هّوة احنا لو مكان شباب اليومين دول كنا حنعمل اية ؟....ونافورة اسئلة واشتغلت .....طاب احنا رافضين تصرفات الشباب دة لية ؟....علشان تصرفاتهم غلط ....ولاعلشان مش عارفين نعمل زيهم ؟........هما فعلا وحشين ولادى غيرة عواجيز ؟مكانش على ايامهم ..دش ..ونت...وموبايل ...وكوك دور ....طاب لية واحنا صغيرين بنرفض كلام الكبار؟ ...ولما بنكبر بنرفض تصرفات الصغيرين؟....علشان اتعلمنا من غلطا تنا ولا دورالعجوز الخبرة حلو ؟....ولو دور العجوز الخبرة حلو....هوة ّحلو فعلا ولا علشان مش قادرين نمثل غيرة؟ ...لية ماسكين كرباج ونازلين لسع فى الشباب؟ ....مع ان احنا كنا زيهم واحنا قدهم .....دا يمكن العن ....فية دش ونت ؟! ماكان فية مجلات وافلام ثقافية بالهبل.... المشكلة بس كانت فى الفيديو ...فية موبيل ومسج ....كان فية تليفون ارضى بيتعمل لة وصلة فى الاوضة اللى جوة ....ومن غير ماحد يعرف ....والجواب كان بيتحط فى السبت وهوة بيتدلدل ...ولا كان يترمى بالنبلة فى البلكونة ....فية بانجو وبودرة .... طاب م طول عمر الحشيش موجود ..بيتلف فى سجاير ويتعمل فى كوبايات ....فية ولاد بتوقع البنات؟ ...كان فية حلقات ذكر يوماتى لرسم خطط لتوقيع البنات ....فية بنات بتشتغل الولاد؟ ....ماطول عمرهم بيرسموا على الواد الحليوة الغنى لغاية مايقع ...... فية زوغان من المحاضرات؟.....كان فية زوغان من السكاشن مش من المحاضرات بس ....فية كافيهات وسيلانترو؟ ....كان فية كافتريات وكازينو الوردةالحمرا ....فية بطا لة والشباب مش لاقى شغل؟ ..... شفنا الذل علشان نلاقى شغل ....فية مارينا والسخنة؟ ...كان فية العجمى ومراقيا ....فية مياصة وقلة ادب؟ ...كان فية مسخرة وقلة ادب .... طاب اية؟!.... هّوة احنا اللى تبنا ولا الزمن هّوة اللى هدنا ؟!! ...هّوة احنا فهمنا ولا احنا بنستعبط ؟ ... ولو بنستعبط ...بنستعبط عيالنا ولا بنستعبط نفسنا ؟ ....ولو بنستعبط نفسنا ...علشان نريح دماغنا من المسؤلية ؟...ولا علشان نشد ونسلكن مشاعرنا اللى عجزت ؟....انا مابقيتش فاهم ....هّوة احنا بقينا بوشين ولا احنا طول عمرنا بوشين بس ماكناش واخدين بالنا............والحل....؟؟؟؟
الحل.......خليك صريح مع نفسك...اوعى تكون كذاب وكذوب..... خليها ياشرق ياغرب ...مش بالمرة شمال وجنوب!! ...اوعى تقول فلان وفلان ....نفسك جوة مليانة عيوب .......توب ......كل الناس بتوب ....بس ربك ..رب عظيم ...مش رب لسان ...... دا ربك رب قلوب ؟!!!.

السبت، 11 أبريل 2009

مش كلها ضلمة

مش كلها ضلمة
احمد عندة واحد تلاتين سنة....دكتور تخدير مشهود لة بالكفاءة ....متجوز وعندة عبد الرحمن .... اللى متاكد منة انة خلص الماجستير ...ويمكن يكون خلص الدكتوراة كمان ....مقدرش ااكد علشان انا ماشفتهمش من زمان .....اللى يسمع الكلام دة يقول دا اكيد ابوة استاذ جامعة وظبطهالة ....ولا راجل اعمال واشترى لة الشقة اللى اتجوز فيها ...والماجستير بالمرة ....ماهو كلة بيتظبط يا جميل ...لأ....لا ابوة استاذ جامعة ولا رجل اعمال ولا وارث من عمة اللى فى استراليا...والحكاية عندى من اولها....حكاية عقل وفكر ...حكاية تربية وثقة بالنفس وبالله .....ابوة موظف عادى جدا ....ووالدتة ست بيت ...اسرة متوسطة زى معظم الاسر المصرية ...اتخرج احمد من الطب وقرر انه يكون حاجة ...استلم الامتياز بتاعة ....وكان يروح المستشفى اول واحد ...ويمشى اخر واحد ...كان يلزق للنواب علشان يعلموة ....وبعد الضهر كان بيشتغل فى شركة ادوية علشان يزود دخلة ...وبعد ما يخلص كان اكيد يروح علشان ينام! ....لا كان يروح يتغدى ويريح شوية ....وبعدين ينزل يمسك نبطشيات زمايلة اللى بيهربوا منها ...زمايلة كانوا فاكرين انهم بيضحكوا علية ....لكن هوة كان عندة وجهة نظر ...قالى مرة يادكتور انا بنام على سريرى ببلاش ....لكن على سرير النبطشية باخد خمسة جنية ....دا غير انى بشوف حالات حرجة كتير وباتعلم اكتر ....بعد ماخلص الامتياز اتعرف على دكتور جراحة كبير ....وبقى يساعدة فى العمليات بدون مقابل ...كان يقولة كفاية انى باتعلم منك ...كمان اخد فلوس ؟!!....وشية شويةالدكتور الكبير وثق فية وكان يعتمد علية وطبعا كان بيدية اجر ...وبرضة لسة فى المستشفى الصبح والشركة بعد الضهر والنبطشية باليل ....بس لقى ان عندة ساعتين فاضيين فقرر انة يعمل الماجستير ...وشوية وبعد ماظروفة اتحسنت وبقى يشتغل فى اكتر من مستشفى وينطلب بالاسم ...قرر يتجوز واتجوز صيدلانية محترمة ...جميلة ومؤدبة وبنت ناس ....اتجوز فى ايجار مؤقت ...وخلص الماجستير وخلف عبد الرحمن ....وبدا فى الدكتوراة .....وجاب عربية 128 .....من ايمها ماشفتهوش .....بس اكيد انة جاب شقة تمليك وخلص الدكتوراة ...وغير العربية كمان...انا بثق فية وفى ذكاءة قوى ....ربنا يخلية لمراتة وابنة ويفرح ابوة بية كمان وكمان.... ويبعد عنة شلة اطباء القهوة اللى لغاية دلوقت مابيعرفوش يدوا حقنة فى العرق ...وقاعدين بس يلعنوا اليوم اللى دخلوا فية كلية الطب اللى ضيعت شبابهم ....اللى كانوا محتاجينة علشان يضيعوة فى الهلس.

الخميس، 9 أبريل 2009

وداع اخر حاجة

وداع اخر حاجة

وانا باكتب الموضوع دة حسيت انى لدعت ...اوضربت حسيت انى فى كابوس وقررت ماكتبوش .....وبعدين قررت اكتبة .....وبعدين رجعت فى كلامى ....وفى الاخر قررت اكتبة .....بس يارب اكون متهيئلى ...ولا يكون كل دة من خيالى المريض

وداع اخر حاجة

بوبس قرر انة يقطع علاقتة بأشكى (اسمها اشكيناز ويدلعوها اشكى ) ...زى ماتقول كدة زهق منها ....ملل نفسة يجدد...متسالش اهوة زهق وخلاص وعايز يسيبها ......المهم راح كاتب لها رسالة على الموبيل وقال لها ...انا بقالى كام يوم وانا مش متظبط.....مش فى المود ....شريط زكرياتنا بيمر قدامى زى فيلم السينما ....من اول ما اتقابلنا فى الديسكو ....ماكناش نعرف بعض بس حسينا بعض .....وفرحت لما طلعت من الديسكو ...لقيتك قاعدة فى عربيتى ...سالت نفسى ساعتها هية فتحت العربية ازاى ....ماشغلتش نفسى بالاجابة ....قولتى لى اطلع ...وطلعنا ماكناش عارفين احنا رايحين فين .....واتعرفنا على بعض ...وسهرنا فى المقطم للصبح ....ولما روحنا كملنا على الموبيل ......رغم ان احنا ملحقناش نعرف بعض ...بس حسينا بعض اخر حاجة وعلاقتنا كبرت بسرعة وارتبطنا ببعض اكتر واكتر....ولا لما بباكى كان يدايقنا ويقول لنا متتاخروش برة عن الساعة اتنين ....وبلاش حكاية الفجر دى !!......ولا لما بابا غلّبنا علشان يدينا مفتاح شالية السخنة علشان نقضى فية ليلة العيد الصغير .....ولا لما كنا فى السخنة وحسينا اد اية احنا محتاجين بعض ...ورفضتى المسك الا لما نتجوز ....وقررنا نتجوز ....وخدنا العربية ورحنا الجبل ....وخلطنا دمنا بدم بعض ...وكان ربنا شاهد على جوازنا .....حسيت ساعيتها قد اية ...انتى طاهرة ونقية ....فاكرة لما رجعنا لربنا ...لما حسينا انه عطانا كتير واحنا لازم نشكرة ....وقررنا نلتزم ....ورميتى كل هدومك القديمة ...ونزلنا اشترينا الجينز والكارينا ....وعملتى شعرك ديل حصان ....وانا لما ربيت دقنى ...وكان شكلها وحش ...وقالولى ممكن تعمل سكسوكة ..... ماهو خالد بن الوليد كان عامل سكسوكة ....فى فيلم من بتاع الكفار ....يعنى ينفع ....ورمينا شرايط عمرو دياب ...وبقينا نسمع عمر خالد ..... ولا لما بدأنا نعمل الخير واشتركنا فى الروتارى ......ولما اقنعتينى ابطل شرب ومن يومها ...هية البيرة وبس ....غيرتى حياتى بقيت انسان اخر حاجة ...الحمد لله على نعمة الالتزام .....بس ياخسارة ......لما اتقابلنا اخر مرة حسيت انك مش مشدودة لية.....ولقيتك مهتمة قوى بخطيبك وبتتكلمى علية كتير ...وفاجئتينى ان فرحكوا بعد اسبوعين ...وانك حتسافرى معاة برة علشان شغلة ......طبعا انتى قولتى لى ان احنا برضة حنتكلم والنت بيقرب البعيد ....بس انا ما اقدرش ...ما اقبلش خصوصا بعد ما التزمت ....فكان لازم نفترق ...لازم نتطلق ...انتى طالق يااجمل حد ...يا احن حد حسيتة .. وداس ارسال... وطلع لة رسالة على الموبيل بتقولة لطول الرسالة ستقسم الى 3اجزاء .....داس موافق ...واتبعتت الرسالة اللى بتنهى ...اشرف واطهر قصة حب ممكن تقابلها ...طبعا بمقاييس اليومين دول ...

ملحوظة : لا يعلمها كل الروشيين والمروشيين واللى مش فاهميين واللى مش عايزين يفهموا واللى مش عايزيين يعيشوا عيشة اهلهم....الاشكيناز من اسوأ والعن طائفة من طوائف اليهود



بوست موشى ديان مالوش اى علاقة ببوست تهنئه خاصة فمحدش يلمح ويقول فى سرة ... اقدام... هة..... وخلينا صحاب احسن


الثلاثاء، 7 أبريل 2009

كنا بنحارب بالفول والمش

كنا بنحارب بالفول والمش

سنة67 يعنى من اتنين واربعين سنة ....كانت هزيمة مصر فى حرب 67 ....عادى ما اى دولة ممكن تتهزم ...والحمد لله قدرنا ننتصر بملحمة كبيرة واعجاز اكبر فى 73 ....دا طبعا غصب عن عين اهل الجهلة اللى بيحاولوا يبينولنا غير كدة .....طعم الانتصار جميل ....هوة انا ماقدرش اقولكم طعم الهزيمة كان اية لانى ساعتها كان عندى شهر وماقدرش اقوللكوا حتى طعم لبن الام كان اية ....لكن اقدر اقولكوا طعم النصر ...كان جميل اينعم كنت برضة لسة صغير ...بس كنت حاسس السعادة والفخر فى كل اللى حوالية ....كان خالى فى الحرب ورجع ...كانت رجلة مكسورة ....البيت ماكنش بيفضى ...اللى نعرفة واللى مانعرفوش كان بيجى ويسلموا علية ....سالت امى هوة لية بيقولوا لخالى يابطل هوة مش اسمة صلاح .....قالتلى علشان هوة طرد الاسرائليين من مصر ...كنت فرحان قوى وكنت دايما اقولة يابطل ...خالى البطل جة ..خالى البطل راح ....نرجع تانى لموضوع الهزيمة ...ايامها كان وزير الدفاع الاسرائيلى اسمة موشى ديان ...وبعد انتصارهم اللى هوة مش شطارة منهم على قد ماهو خيابة مننا .....وقف فى الكنيست وقال انا كنت على بعد كيلو مترات من القاهرة ...بس مرضيتش اخشها .....قام اعضاء الكنيست قالولوا ...ملهاش لازمة الجملة دى ...احنا انتصرنا وخلاص .....ماتزودهاش ياعم ديان ....رد موشى ديان وقال متخافوش ...المصريين لا يسمعون واذا سمعوا لايفهمون واذا فهموا سرعان ماينسون....حقيقة مرة ....وامر مافيها ان احنا كدة فعلا ...ولغاية دلوقتى .... مابنسمعش وان سمعنا مابنفهمش وان فهمنا بسرعة ننسى اللى فهمناة ...اوعى تصدق ان اسرائيل جامدة ...ولاحتى امريكا ..احنا اللى خايبين ومايلين ....رجالة على نفسنا بس ....الحكومة راجل على الموظف الغلبان ....والموظف راجل على المواطن الغلبان ...والمواطن راجل على مراتة الغلبانة ....ومراتة راجل على العيال الغلبانين....والعيال رجالة بالسجاير والبانجو.....ومبنعملش غير ندوات ...ونحط مناديل ورق... ومية معدنية ...ونطلع بريك ...ونرجع نعمل توصيات ونقول ونقول ....وبرضة مانسمعش .....ونقرر فى المؤتمرات اللى بعد كدة ان احنا نسمع ...ونسمع....بس مانفهمش ....وننفذ التوصيات مش زى ماهى المفروض تتنفذ ....لا طبعا ...بنفذها زى ما احنا شايفين ....ونرجع تانى نعمل ندوات ونفهم المرة دى بس ياخسارة ننسى اللى احنا فهمناة....ونبدأ من الاول ....كل مرة نرجع من الاول ....نبتدى من 67 .....نفسى اشوف اليوم اللى نبطل نبقى رجالة على بعض ...ونسمع ونفهم وماننساش ...ونبنى ونعمر ونكبر ....على فكرة زمان واحنا صغيرين كنا نتلم فى الشارع ونقعد نغنى ....ونقول ..موشى ديان الهش الهش ....ضرب مراتة بصحن المش.....موشى ديان الغول الغول ضرب مراتة بصحن الفول....مع اننا ماكناش نعرف مين هوة موشى ديان ولا بيعمل اية ....بس كنا بنحارب على قدنا .....ماهو ماكنش فية على ايامنا بانجو نحارب بية .....ملحوظة اخيرة موشى ديان كان بعين واحدة ....بس كان شايفنا كويس قوى

الأحد، 5 أبريل 2009

دعوة الى اضراب 15 مايو

دعوة الى اضراب 15 مايو

هّوة احنا لية على طول حطين الحكومة العدو الاول لينا يلا نعمل اضراب 6ابريل يالا نحتفل بمرور سنة على اضراب 6 ابريل....وندوات ومجلات واللى لة واللى مالوش بيشتم الريس ....لنفرض انة غلطان .....طاب انت يااخى تقدر تشتم ابوك لما مايرضاش يجيب لك حاجة انت عايزها ....لية مافكرناش فى غير ان الريس والحكومة ضدنا .... فية فساد ....ايوة فية فساد.... فية مراكز قوى .....ايوة فية مراكز قوى .....زينا زى اى بلد فى الدنيا .....بس اللى يفرقنا عن اى بلد انا احنا رجالة على نفسنا بس ....بدال مانحط ادينا فى ايدين بعض ونحارب الفساد ....نقعد نقول الحقينى يا امريكا ....الحقينى يا حقوق الانسان ....الحقنى يااضراب 6 ابريل ...الحقينى ياحركة كفاية .....طاب ماكفاية زن على خراب عشنا ....هو انتوا فاكرين ان امريكا بتحبنا اكتر من اسرائيل ....ولا منظمة حقوق الانسان خايفة علينا ولاحتى بتوع كفاية حاسين اصلا بالغلابة....ولاحتى بتوع اضراب 6ابريل نفسهم يصلحوا البلد لله ...حتقولى نظرية مؤامرة ....ومالوة ....مرة بقى تكون فى مكانها .....وبدال ما نوقف حال البلد اللى هيه واقفة اصلا ....ونقول بلاش نشتغل يوم 6ابريل ....نسأل نفسنا هّوة احنا بنشتغل بقيت السنة الاول ؟؟!!.....ما نجرب مرة بجد نعمل اضراب على الفساد ...ودى دعوة منى ياريت تلاقى صدى ....نعمل اضراب بس على الفساد على الكابة بتاعة الصحف الصفرا ونشتغل .... ونخلى يوم الاضراب دة يوم 15مايو ... اضراب على المفسدين والمرتشيين ....والمحتكرين ....والجرايد الصفرا ..وقناة الجزيرة ...وقناة العالم ...اختارت 15مايو علشان دا اليوم اللى قضى فية السادات على مراكز القوى...نقرر ان اليوم دة ننام بدرى ...ونروح الشغل بدرى ....ونخلص مصالح الناس بدرى ...ومانشتريش الجرايد الصفرا ...ومانتفرجش على الجزيرة ولا نانسى عجرم ...ونشتغل بجد التمن ساعات ...ومانديش رشوة حتى لو شغلنا اتعطل ....ماهو متعطل من سنين ...اية يعنى لو اتعطل يوم كمان ... ندفع ونصمم ناخد الباقى ... مانشتريش من المحلات اللى بتغلى علينا ..نقاطع كل اللى بيستغلنا ونقولة فى وشة مش حاخد منك علشان انت بتستغلنى ....نعمل اضراب صح ولو مرة فى حياتنا ....اضراب على نفسنا قبل مايكون اضراب على الفاسدين ...نجرب حيحصل اية ...صدقونى حيحصل كل خير....طبعا كلامى مش حيعجب ناس كتير ...وحيقولوا انت بتغازل الحكومة ....شوف بقى عايز اية من ورا الكلام دة ....انا موافق انا بغازل الحكومة.... ووحش ...ولية اهداف خفية ويمكن اكون انا صاحب سجن ابوغريب ومأجرة مؤقت للامريكان .....وانا اللى ارشدت على صدام ...بس ماتيجى نحاول ...

وبرضة عمرى ماحاشتم حسنى مبارك ولااحمد نظيف ولاحتى يوسف بطرس غالى....رغم انى باختلف معاهم ... ...لانى متاكد انى ماعرفش كل حاجة واللى مايعرفش كل حاجة مايشتمش عمال على بطال ...واقولكوا كلمة قالها احمد مظهر فى فيلم وا اسلاماة ...لما جالة مندوب التتار ...دا كلامى ودى دعوتى ومعرفش مين معايا ومين ضدى ....وبرضة ....والله ماعايز ابقى زعيم .....وياريت اللى معايا ينشر الدعوة دى على قد مايقدر ...دعوة الى اضراب 15 مايو...........اللهم بلغت اللهم فاشهد

على فكرة انا بحب حسنى مبارك وربنا يخلية ويطول عمرة وكفاية ياكفاية

السبت، 4 أبريل 2009

زمان كان احلى لية

زمان كان احلى لية

زمان كنا بنتباها قدام بعض لما نقرا كتاب لطه حسين ..ولا رواية ليوسف السباعى اونجيب محفوظ .. ولانحفظ سورة ...ولا لما نعمل اشتراك فى مكتبة البلدية .....كنا بنفرح لما بنتعلم حاجة جديدة ...ولا بيتوفر معانا قرشين ...نأجر بيهم عجل ...كنا نقعد نحوش علشان نشترى جزمة كاوتش بخمسة وسبعين قرش من عند باتا ..وناخد الكورة الشراب ونديها لعب ...مرة ماكنش عاجبنا اكل امى كانت طبخاة ...ابويا ضربنا حتة علقة ...وقالنا محدش يقول مش عاجبنى ...كلها نعمة ربنا ...غيرنا مش لاقى ... كنا نستنا العيد علشان ناخد العيدية ونركب المراجيح ... كان احلى حاجة لما الراجل يطبل على الطبلة ...ويقول لنا اللى يحب النبى يقول هيييية ...كنا بنقول هييية من قلبنا وباعلى مافى حسـّنا ....كان ابويا ياخدنا معاه صلاة الجمعة ... واحنا طالعين كان يدينا فلوس علشان نديها للغلابة اللى قدام الجامع .....فى المدرسة ....كان الاستاذ عبد السلام يعدى علينا فى الطابور ومعاة مقص .... اللى يلاقى شعرة طويل يعملة نقرة فى شعرة ماتتصلحش الا لو حلق زيرو.....كنا نستنا يوم الحد علشان اليوم المفتوح ...ودة كان يوم بيفتح فية التليفزيون الساعة احداشر الصبح ...ويجيب فيلم كوميدى لاسماعيل ياسين...كنا بنضحك رغم اننا شوفنا الفيلم قبل كدة ميت مرة بس كنا بنضحك وبرضة من قلبنا. ذاكرنا ونجحنا وكبرنا وحبينا ....بس حتى فى حبنا كنا محترمين عمرنا ما مدينا ايدينا ... كل ماشاويرنا كنا بنعملها مشى ...نادر لما كنا نركب تاكسى ...كنا سعداء عمرنا ما اشتكينا من قلةالفلوس ...مع ان الدنيا كانت غالية...ايوة غالية اغلى من دلوقت ..اللحمة كانت بجنية ...وجرام الدهب كان بتلاتة جنية ...ماهو المرتب برضة كان تمنتاشر جنية ...يعنى بحسبة بسيطة ...تلاقى جرام الدهب كان سدس المرتب ....دلوقت عشر المرتب بضم العين ...يبقى مين ايامة كانت اغلى ...طاب اية اللى خلى دلوقتى اوحش من زمان ....عارفين لية ...علشان مبقاش عاجبنا حاجة ...مافيش حاجة بترضينا ...زعلانين.... على طول زعلانين ....زعلانين علشان مش عارفين نحدث الموبيل ...علشان مش ملاحقين نساير الموضة .. مبقاش يعجبنا وسط البلد ...عايزين نشترى من سيتى سنتر ...ماهو وسط البلد بقى بتاع البيئة واللوكل ...علشان البلطى بقى وحش ...وعايزين جمبرى وسبيط وسمك موسى ...والشقة الايجار عايزينها تمليك ... وبعدين هوة مش حقنا يكون عندنا عربية ...واية اللادا اللى بتقول عليها دى ..عايزين واحدة بور وتكييف ... والمروحة بقت موضة قديمة ..عايزين تكييف ..وعايزين نغير الكمبيوتر دا فية هاردات متين جيجا نزلت ... وانت عيز المتين فى اية ...علشان يكفى الافلام والاغانى والفيديو كليب .... هو انت بتتفرج عل الافلام فى الكمبيوتر ...لأ ماهوكلة بيجى على الدش ....وان مجاش بلاقية على الوصلة .....هو’ كمان فية وصلة؟!!! ...ياعم دى كل الحكاية خمسة وعشرين جنية فى الشهر وتشوف كل المتشفر ....ماعدش عاجبنا مراتتنا .. عايزين من اللى فى الفيديو سلب( ايوة سين ماغلطش فى الكتابة) ....بقينا رنة ومسج وريموت وديليفرى ....وريّح كدة وانتخ على الكنبة الامريكان فيرنيتشر ...واطلب البيتزا ديليفرى ومتنساش الكانز ... وامرك لله لما الراجل اللى جايب البيتزا يخبط ...قوم وافتح له ومتنساش تتخانق معاة ..علشان نسى يجيب الكاتشب ...كل وانبسط واقعد اتفرج على الاعلانات ... واتمنى واحلم بالفيلا وحمام السباحة والمزز اللى متنطورة حواليك ...ومتنساش تدخل العيال مدارس لغات ..علشان ينسوا العربى ويسجلوا اسم صاحبهم اسامة على الموبيل ...اوسامة..... عربى اي ياعم دا العربى دا بقى بيئة و لوكل .... وافرح بعيالك وهما حافظين الاغانى ....وانبسط لما يقولولك يابابى عايزين نروش ونروح الملاهى ....ومتنساش وانت بتفسح العيال ....تعدى على الهيبر ماركت ...وتشترى كل اللى مانتش عايزة ... مش مهم مالدفع بعد خمسة وخمسين يوم ....مش احنا معانا فيزا ولا اية ... اه .. مانا عارف ان الفلوس بقت اليومين دول... بيئة و لوكل .... اصرف مافى الجيب واندين مش عيب ...ولما تروح الشغل اوعى تنسى تزمبك زمايلك .. وتبقى عصفورة المدير علشان تقبض كتير.... واحرق دمك ..وارفع ضغطك ...وهات لنفسك السكر ..وركب دعامة ... واشتكى ان الدوا غالى ...وان الدنيا مش مكفية ..وموت ...موت وسيب العيال تكمل ... ويبيعوا حتة الارض اللى ورثتها عن ابوك ...ماهو انت ماعملتش حاجة ...خليهم ياخدوا فلوس الارض ....ويحدثوا الموبايل... ويجيبوا اللاب توب.... ويروحوا المول ... ويشتروا بالفيزا ... ويطلبوا ديليفرى ... ويفرقعوا كانز ....ويضربوا جيل ...ويكووا شعرهم بمكوة السيراميك ويدعوا عليك ويقولوا.... روح منك لربنا يادادى .....ماكنتش سيبت لنا فيلا ...ولا شالية فى مارينا ولا بورتوالسخنة...كدة يادادى تسيبنا فى الهم ...... جاتك الهم

تهنئة خاصة جداً جداًََ

تهنئة خاصة جداً جداًََ

زى النهاردةمن اتنين واربعين سنة بس كان يوم تلات وكانت الساعة تلاتة العصر ....خدبالك يوم تلات يعنى يوم يزهق كدة لا انت عارف تكون نشيط زى اول الاسبوع ولا عارف تكون كسلان وعايز تنام زى اخر الاسبوع ....وخلى بالك من الساعة ...تلاتة العصر .. بعنى نفسك تريح لك ساعة... وتمددلك ساعة على السرير ....يوم وساعة مالهومش لازمة .....ومتنساش برضة انة فى بداية فصل الربيع ....ورياح الخماسين من اشهر معالم الربيع فى مصر .....المهم شرف للوجود كائن عجيب قعد يتولد تلت ايام ...على حسب رواية امة ...اكيد كان عارف انة مش حيكون مبسوط ....علشان كدة حب يأخر نفسة على قد مايقدر .... ماعتقدش ان اللى فاضل له حيكون قد اللى راح ...خصوصا انة بيشرب سجاير وقهوة وشاى وبيشتغل شغلانة تحرق الدم ...والغريبة انة عمرة ماحب الشغلانة دى ولا عمرة حيحبها.... الاغرب انة شاطر وناجح فيها .... واية الغريب فى كدة ...مهوة اصلا انسان غريب ....فية كل متناقضات الدنيا ... طيب لدرجة العبط ...وشرير لدرجة ان الريس عمر حرب يدوب يبقى تلميذة ..ايام يشتغل تمنتاشر ساعة فى اليوم وممكن يقعد شهر فى البيت مايعملش اى حاجة ...يقف جنب ناس ويحارب ناس ..ناس كتير بتحبة وتموت فية ....ناس كتير بتكرهة وتستنفخة......ذكى لدرجة الدهاء .....واحيانا غبى لدرجة البله الماغولى...نفسة يسافر.......يهج ........يطفش ....... بس لو طلع من مصر يموت زى السمكة لو طلعت من المية ......عموما انا مابحبش اتكلم على الشخصية دى كتير لانها شخصية محيرانى ومزهقانى بس مضطر اعيش معاها ..واتعامل معاها بصفة يومية .....كل الحكاية انى كنت عايز اشاركة عيد ميلادة واقولة............

كـــــــل ســـــــــــنة وانــــــــا طــــــــيب ومســـــتحملنى

الخميس، 2 أبريل 2009

تاج

تاج

جميل قوى احساس انك قاعد قدام حد بيسالك عن نفسك بس ياسلام لو الكلام دة يبقى فى التليفزيون

اسمك ؟

اسمى اسلام

السن ؟

ثلاثون عام و144 شهر....ال144شهر دول بتوع الحكومة لكن ال30سنة دول اللى حفضل بيهم لغاية ما اموت

مجال دراستك ؟

كلية لطب البيطرى ودراسات عليا فى جراحة الحيوان

اسم مدونتك؟

جنعيش يعنى حنعيش

صورتك الرمزيه فى المدونه بتعبر عن ايه ؟

مستقبل مصر لخص وجاب من الاخر

هل فكرت فى اغلاق المدونه ؟ والسبب ؟

مرة من الزهق .... بس جملة جميلة قالتهالى صبرنى يارب هية اللى خلتنى ماقفلهاش قالت لى لوكل واحد زهق وقفل المدونة يبقى مش حيبقى فية مستقبل

ايه رد فعلك لو حد قل ادبه فى التعليق ؟

اتعلمت اسمع كل الاراء حتى قليلة الادب ...اكيد حتعلم منها حاجة ....مش يمكن اقرر فى يوم ابقى قليل الادب اهو يبقى عندى رصيد

اسوأ مدونه ؟

كل مدونة بتقلد وملهاش شخصية ...او بتبدع برة اطار الله ورسولة

هايحصل ايه للاميل بعد ما تموت ؟؟

حيموت معايا ....دا لومامتش قبلى

اديت الباص وور لحد قبل كده ؟؟

طبعا لا ...مانا زى اى بنى ادم لية جانب اسود ماحبش حد يشوفة

السفر بالنسبالك ايه ؟

السفر زى الموت مابحبوش ولو انى نفسى اهاجر

المود بتاعك ايه ؟؟

انت وحظك ياجميل

بتعمل ايه فى وقت فراغك؟؟

بانام ....مش علشان نوم الظالم عبادة ....لكن علشان الايام الهباب ديتها النوم

الاكله المفضله ؟

اتعلمت ان كلة نعمة ربنا

الصفات الى اخدتها من والدك ؟

بقدر اقرا الناس كويس

الصفات الى اخدتها من والدتك ؟

السخرية من الازمات

اكتر ست حاجات بتكرهم ؟

الكذب

الضعف

قلة الادب

الخوف

الظلم

الجدل

اكتر ست حاجات بتحبهم ؟

الصدق

الاحساس بالناس

الدفاع عن الاسلام

الفلوس طبعا

الافكار الجديدة

وقبل كل دول وبعد كل دول بناتى

شخصيتك نوعها ايه ؟

اقرب شبة لشخصيتى بندول ساعى الحائط

احلى جمله قيلت فى وصف مدونتك؟

1انت قديم قوى ياباشا

2كتاباتك متجهة للهدف مباشرة

أهمية التعليقات بالنسبه لي ؟

هوة اللى بيخلينى اكمل

احلى بوست كتبته ؟

كلبشات حرير

أفضل مدونه قراتها؟

كلهم حلوين ...لان لكل واحد راية


الشغل بالنسبه لك ا يه ؟

باشتغل شغلتين شغلة تصرف على البيت

وشغلة بالاقى فيها سعادتى

الانترنت بالنسبه لك ايه ؟

نعمة من نعم ربنا ماحدش عارف قيمتها

تمرر التاج ده لمين ؟

لكل من قراة ..لانة حاجة جميلة انك تشوف نفسك

شكرا لصبرنى يارب زميلة الكفاح المسلح

الأربعاء، 1 أبريل 2009

كلبشات حرير

كلبشات حرير

هناء وشيرين بنتين من مصر ...مايهمش مصر الجديدة ولا القديمة ..... ولا شبرا ولا الصعيد ...ولا بحرى ... المهم انهم بنات من مصر يعنى دم خفيف ..وجدعنة .. وشهامة ...وانوثة ...واذا لزم الامر رجولة ....هناء وشيرين مستورين ابوهم قعد فى الخليج اعارة حلوة ...يعنى متامنين من غير مانخش فى تفاصيل ....البنات خطابهم كتير ..ماهم بصراحة مؤدبين ومتعلمين ... هناء وشيرين اتخطبوا ....هناء حبت خطيبها وقالت هوّة دنيتى .. شيرين قالت المهم الاحترام والامان ....وهما بيجهزوا ...هناء كانت مركزة على اللانجيرى وقمصان النوم والبرفانات والمكياج ...شيرين كانت مركزة على الستاير والبراويز والتحف ...هناء بتقول خطيبى حيتجوزنى انا مش حيتجوز الشقة....شيرين بتقول الناس لما يزورونا لازم يعرفوا احنا مبسوطين اد اية ...هناء عملت فرحها على الديق ....مش مهم المعازيم المهم انا وجوزى ...شيرين عملت الفرح فى فندق خمس نجوم وكان اهم حاجة المعازيم ...احنا عايزيين ناس تشرف ....هناء قضت شهر العسل فى البيت ...ويادوب همة يومين فسحة وسينما ...شيرين قعدت شهر كامل فى شارم ...هناء وقت الازمة كانت تاكل كل يوم فول ...بس كان كل مرة بطعم وشكل جديد ....شيرين زهقانة مش عارفة تعمل اية ....زهقت من اللحمة والفراخ....هناء بتقف مع جوزها الصبح وتعدل لة الكرافتة ....وتقولة اوعى تستسلم لمعاكسة البنات ...اموت فيها ولايجرا لى حاجة ....شيرين تقول لجوزها اعدل الكرافتة علشان معووجة ..انا حضرتلك الفطار ...عايز حاجة تانى؟؟...هناء تودع جوزها على السلم وتقولة خلى بالك من نفسك ....ترجعلى بالسلامة .... شيرين تنادى على جوزها من جوة وتقولة اقفل الباب وراك كويس....هناء كل اسبوع تقول لجوزها روح اسهر مع صحابك على القهوة ..... شيرين تنكد على جوزها لو فكر مجرد التفكير إنة يسهر مع صحابة....هناء لما جوزها يتعب تقول لة الف سلامة ...بعد الشر....شيرين لما جوزها يتعب تقول لة ماقولتلك ماتوقفش فى البلكونة فى السقعة..... . هناء لما يدخل عليها جوزها بكيس لب ... تفرح وتقولة تعيش وتجيب ... شيرين لما جوزها يجيب لها خاتم دهب ...تقولة اه ..هة .. كويس وتنسى حتى كلمة متشكرين ...هناء جوزها عمرة ماشافها بتسيق ولا بتنفض ...شيرين على طول بتسيق وتنفض وتخرط بصل ...هناء بتقول انا انثى وانوثتى اغلى شئ عندى .. شيرين بتقول الراجل زى الست مافيش حد احسن من حد ...هناء خلفت بس عمر العيال ما خدوها من جوزها .... شيرين برضة خلفت بس نسيت جوزها .....هناء وهية عندها خمسين سنة تجرى على حضن جوزها وتعيط وتقولة محتاجاك ....شيرين وهية عندها خمسين سنة تقول ربنا يرحمك يابابا ماحوجتناش لحد ....هناء بقى عندها كل حاجة .....شيرين طول عمرها عندها كل حاجة .....هناء عايشة السعادة.... شيرين اقنعت نفسها بالسعادة ......هناء عنها ستين سنة ...وجوزها لسة شايفها كل ستات العالم ...شيرين عنها ستين سنة ...وجوزها متجوز عليها من اتنين وعشرين سنة وعندة ندا ويوسف وعبد الرحمن .......................!!!