الأربعاء، 1 أبريل 2009

كلبشات حرير

كلبشات حرير

هناء وشيرين بنتين من مصر ...مايهمش مصر الجديدة ولا القديمة ..... ولا شبرا ولا الصعيد ...ولا بحرى ... المهم انهم بنات من مصر يعنى دم خفيف ..وجدعنة .. وشهامة ...وانوثة ...واذا لزم الامر رجولة ....هناء وشيرين مستورين ابوهم قعد فى الخليج اعارة حلوة ...يعنى متامنين من غير مانخش فى تفاصيل ....البنات خطابهم كتير ..ماهم بصراحة مؤدبين ومتعلمين ... هناء وشيرين اتخطبوا ....هناء حبت خطيبها وقالت هوّة دنيتى .. شيرين قالت المهم الاحترام والامان ....وهما بيجهزوا ...هناء كانت مركزة على اللانجيرى وقمصان النوم والبرفانات والمكياج ...شيرين كانت مركزة على الستاير والبراويز والتحف ...هناء بتقول خطيبى حيتجوزنى انا مش حيتجوز الشقة....شيرين بتقول الناس لما يزورونا لازم يعرفوا احنا مبسوطين اد اية ...هناء عملت فرحها على الديق ....مش مهم المعازيم المهم انا وجوزى ...شيرين عملت الفرح فى فندق خمس نجوم وكان اهم حاجة المعازيم ...احنا عايزيين ناس تشرف ....هناء قضت شهر العسل فى البيت ...ويادوب همة يومين فسحة وسينما ...شيرين قعدت شهر كامل فى شارم ...هناء وقت الازمة كانت تاكل كل يوم فول ...بس كان كل مرة بطعم وشكل جديد ....شيرين زهقانة مش عارفة تعمل اية ....زهقت من اللحمة والفراخ....هناء بتقف مع جوزها الصبح وتعدل لة الكرافتة ....وتقولة اوعى تستسلم لمعاكسة البنات ...اموت فيها ولايجرا لى حاجة ....شيرين تقول لجوزها اعدل الكرافتة علشان معووجة ..انا حضرتلك الفطار ...عايز حاجة تانى؟؟...هناء تودع جوزها على السلم وتقولة خلى بالك من نفسك ....ترجعلى بالسلامة .... شيرين تنادى على جوزها من جوة وتقولة اقفل الباب وراك كويس....هناء كل اسبوع تقول لجوزها روح اسهر مع صحابك على القهوة ..... شيرين تنكد على جوزها لو فكر مجرد التفكير إنة يسهر مع صحابة....هناء لما جوزها يتعب تقول لة الف سلامة ...بعد الشر....شيرين لما جوزها يتعب تقول لة ماقولتلك ماتوقفش فى البلكونة فى السقعة..... . هناء لما يدخل عليها جوزها بكيس لب ... تفرح وتقولة تعيش وتجيب ... شيرين لما جوزها يجيب لها خاتم دهب ...تقولة اه ..هة .. كويس وتنسى حتى كلمة متشكرين ...هناء جوزها عمرة ماشافها بتسيق ولا بتنفض ...شيرين على طول بتسيق وتنفض وتخرط بصل ...هناء بتقول انا انثى وانوثتى اغلى شئ عندى .. شيرين بتقول الراجل زى الست مافيش حد احسن من حد ...هناء خلفت بس عمر العيال ما خدوها من جوزها .... شيرين برضة خلفت بس نسيت جوزها .....هناء وهية عندها خمسين سنة تجرى على حضن جوزها وتعيط وتقولة محتاجاك ....شيرين وهية عندها خمسين سنة تقول ربنا يرحمك يابابا ماحوجتناش لحد ....هناء بقى عندها كل حاجة .....شيرين طول عمرها عندها كل حاجة .....هناء عايشة السعادة.... شيرين اقنعت نفسها بالسعادة ......هناء عنها ستين سنة ...وجوزها لسة شايفها كل ستات العالم ...شيرين عنها ستين سنة ...وجوزها متجوز عليها من اتنين وعشرين سنة وعندة ندا ويوسف وعبد الرحمن .......................!!!

هناك 3 تعليقات:

  1. طيب ارد اقول ايه ؟؟

    طيب اسقف وامشي ولا ايه طيب ؟؟

    اكتر حاجه بتعجبني فى كتابة حضرتك البساطه جدااااا فى التعبير عن الفكر

    حقيقى لا فض فوك

    المقارنه هايله هايله هايله

    وافتكر لو كانت شرين من الاول فكرت بس انها تحب جوزها كانت هاتحبه وتعيش كويس بس الفرق اساسا فى الدماغ هى عايزه ايه



    هناء وشرين قديم انت اوي يا استاذنا

    ههههههههههههههههههههههههههههه

    ردحذف
  2. بس فى حاجه

    اشمعن كلبشات حرير ؟؟

    ما فهمتش دي



    ما تقولش فهمي بطيء
    ههههههههههههههههههههههههه

    ردحذف
  3. انت استاذ والله
    صبرنى سبقتنى وقالت اللى كنت عاوزه اقوله بالظبط ويمكن قلته قبل كدا في تعليق البوست اللى فات

    كتابتك رائعة سهلة ومعبره ومتوجهة ناحية الهدف تماما ولا تخطئ الهدف ابدا

    بجد ما شاء الله عليك

    بس على فكره انا الحمد لله زى هناء في حاجات كتير الا السن طبعا
    هههههههههههههههههه

    تحياتى لك

    ردحذف