وداع اخر حاجة
وانا باكتب الموضوع دة حسيت انى لدعت ...اوضربت حسيت انى فى كابوس وقررت ماكتبوش .....وبعدين قررت اكتبة .....وبعدين رجعت فى كلامى ....وفى الاخر قررت اكتبة .....بس يارب اكون متهيئلى ...ولا يكون كل دة من خيالى المريض
وداع اخر حاجة
بوبس قرر انة يقطع علاقتة بأشكى (اسمها اشكيناز ويدلعوها اشكى ) ...زى ماتقول كدة زهق منها ....ملل نفسة يجدد...متسالش اهوة زهق وخلاص وعايز يسيبها ......المهم راح كاتب لها رسالة على الموبيل وقال لها ...انا بقالى كام يوم وانا مش متظبط.....مش فى المود ....شريط زكرياتنا بيمر قدامى زى فيلم السينما ....من اول ما اتقابلنا فى الديسكو ....ماكناش نعرف بعض بس حسينا بعض .....وفرحت لما طلعت من الديسكو ...لقيتك قاعدة فى عربيتى ...سالت نفسى ساعتها هية فتحت العربية ازاى ....ماشغلتش نفسى بالاجابة ....قولتى لى اطلع ...وطلعنا ماكناش عارفين احنا رايحين فين .....واتعرفنا على بعض ...وسهرنا فى المقطم للصبح ....ولما روحنا كملنا على الموبيل ......رغم ان احنا ملحقناش نعرف بعض ...بس حسينا بعض اخر حاجة وعلاقتنا كبرت بسرعة وارتبطنا ببعض اكتر واكتر....ولا لما بباكى كان يدايقنا ويقول لنا متتاخروش برة عن الساعة اتنين ....وبلاش حكاية الفجر دى !!......ولا لما بابا غلّبنا علشان يدينا مفتاح شالية السخنة علشان نقضى فية ليلة العيد الصغير .....ولا لما كنا فى السخنة وحسينا اد اية احنا محتاجين بعض ...ورفضتى المسك الا لما نتجوز ....وقررنا نتجوز ....وخدنا العربية ورحنا الجبل ....وخلطنا دمنا بدم بعض ...وكان ربنا شاهد على جوازنا .....حسيت ساعيتها قد اية ...انتى طاهرة ونقية ....فاكرة لما رجعنا لربنا ...لما حسينا انه عطانا كتير واحنا لازم نشكرة ....وقررنا نلتزم ....ورميتى كل هدومك القديمة ...ونزلنا اشترينا الجينز والكارينا ....وعملتى شعرك ديل حصان ....وانا لما ربيت دقنى ...وكان شكلها وحش ...وقالولى ممكن تعمل سكسوكة ..... ماهو خالد بن الوليد كان عامل سكسوكة ....فى فيلم من بتاع الكفار ....يعنى ينفع ....ورمينا شرايط عمرو دياب ...وبقينا نسمع عمر خالد ..... ولا لما بدأنا نعمل الخير واشتركنا فى الروتارى ......ولما اقنعتينى ابطل شرب ومن يومها ...هية البيرة وبس ....غيرتى حياتى بقيت انسان اخر حاجة ...الحمد لله على نعمة الالتزام .....بس ياخسارة ......لما اتقابلنا اخر مرة حسيت انك مش مشدودة لية.....ولقيتك مهتمة قوى بخطيبك وبتتكلمى علية كتير ...وفاجئتينى ان فرحكوا بعد اسبوعين ...وانك حتسافرى معاة برة علشان شغلة ......طبعا انتى قولتى لى ان احنا برضة حنتكلم والنت بيقرب البعيد ....بس انا ما اقدرش ...ما اقبلش خصوصا بعد ما التزمت ....فكان لازم نفترق ...لازم نتطلق ...انتى طالق يااجمل حد ...يا احن حد حسيتة .. وداس ارسال... وطلع لة رسالة على الموبيل بتقولة لطول الرسالة ستقسم الى 3اجزاء .....داس موافق ...واتبعتت الرسالة اللى بتنهى ...اشرف واطهر قصة حب ممكن تقابلها ...طبعا بمقاييس اليومين دول ...
بوست موشى ديان مالوش اى علاقة ببوست تهنئه خاصة فمحدش يلمح ويقول فى سرة ... اقدام... هة..... وخلينا صحاب احسن
ههههههههههههههههههههههههههههههههه
ردحذفانا قلت حاجه
انا بسأل بس سؤال بريء
يا استاذنا لا العفو ما اقدرش اقول كده
ههههههههههههههههههه
اما بالنوسبه لعم الحاج بوبس واشكي
بصراحه انا عمري ما قابلت الاشكال دي اطلاقا انما عارفه انهم موجودين للاسف الشديد المريع
واول مره اعرف موضوع الاشكيناز ده
وعادي مش اول مره نقلد واحنا مش فاهمين اي حاجه
من كام يوم يا استاذنا شوفت توكتوك مرسوم عليه صورة جيفارا
انا اكاد اجزم انه صاحب هذا التوتوك ومديره ما يعرفوش اسم صاحب الصوره ولا عمل ايه اساسا
مش بس دول لا كل اهبل وعبيط مسمي نفسه جيفارا وراسم صورته
هو بتنجان وخلاصن
الا قولي يعنى بما انك برضه جايز معلوماتك احسن مني انت عارف انا قرويه ساذجه
هو جواز الدم ده ما ينفعش الا فى الجبل يا اخويا ؟؟؟
يعنى يمكن القسيمه بتاعتي تضيع نبقى نتصرف وكده
طب انت كنت متردد ليه ؟؟؟
ماله البوست ماهو زي الفل اهو وبيعكس واقع مؤسف جداااااا
بس على فكره ده ما يمنعش وجود شباب محترمين فعلا وكويسين بس النسبه بتضمحل كل شويه
تحياتي لحضرتك
هههههههههههههه
ردحذفانا بجد استغربت لما لقيت البوست الجديد بتاعك عنوانة وداع اّخر حاجة قلت مش معقول الكتور هو كمان بيقول اّخر حاجة وجريت قرأت البوست
بس بجد الشباب دول موجودين وكتير فعلا يمكن صبرنى قالت انها مش صادفت حد فيهم قبل كدا بس انا صادفت كتيييير منهم
انا من مصر الجديدة وللاسف في هناك كتير شباب من النوع دا طبعا قبل ما اتجوز كانت الطريقة والكلام بتاعهم غير كلام وطريقة اليومين دول بس نفس الافكار ونفس الاسلوب ودلوقتى لما بروح لماما ازورها بشوف الساعة 3 الفجر البنوتات الصغيرين راجعين مع اصحابهم الشباب وبابي بتاع كل واحدة واقف في البلكونة وعادى عادى
وبعدين كويس انك كتبت الموضوع دا بعد ما ترددت لاننا كنا هانزعل لو مش كتبته لانه فعلا جميل وبيعكس حالة موجودة وبجد انت قلت مصطلحاتهم وكأنك عايش معاهم
انا شاكة فيك بصراحة انت كنت معاهم ولا ايه ؟
هههههههههههههههه
سلمت يداك ورائع جدا كالعادة