الأربعاء، 22 أبريل 2009
انت عارف معنى الحب اية (5)
جميلة بعد ما اتطلقت تانى مرة ...قررت تأجل موضوع الحب والجواز دة خالص ....ويدأت تشوف نفسها ومستقبلها ... تركز فى شغلها ....تروح بدرى وتمشى متاخر ....شغل شغل يعنى ...وشوية شوية بدأ نجمها يعلى فى الشركة ...ومع ان سنها صغير ...يادوب سبعة وعشرين سنة ...الا انها اترقت بسرعة وبقت نائب رئيس مجلس الادارة ...الراجل كان مبسوط من شغلها قوى ...وهية كمان كانت مبسوطة منة قوى ...هية دى الرجالة ..عقل....رزانة ....حكمة ....خبرة ... شياكة ..وذوق .....مش العيال بتوع اليومين دول ....ويالهوى يالهوى على الشعر الابيض ....تقولش سلاسل فضة ...هوة دة الصح ...امان وفلوس ومركز وقيمة ...... ودا معشراة بقى اكتر ما معاشرة ابويا وامى ...يعنى عارفة كل طباعة ...وراضية بيها ...ومن بختى اللى شاكلة حيتعدل ...ان مراتة ميتة ومعندوش عيال ......وبدأ يحكى عن الوحدة واد اية هية مرة ..وان النجاح والفلوس والشهرة والمركز ...عمرهم مايعوضوا عن ان يكون فية حد يريح على صدرة ...ويحس انة بيحبة علشان نفسة مش علشان مركزة ولا فلوسة ....وبدأت هية كمان تاخد بالها منة ...من لبسة ومن اكلة وتقدمة لة كباية العصير وتقولة كفاية قهوة ...صحتك ....وطبعا سانوتشات الكفتة اللى كانت تصمم انة ياكلها وسط الشغل ...ياحرام دا واقف طول النهار على رجلية ...وسافروا فرنسا علشان يحضروا معرض الشركة هناك ...ماكنش شغل على اد ماكان شهر عسل ...فسح وشوبنج وسهرات ....برضة الكبير كبير ...بلا لعب عيال ...ورجعوا من فرنسا على المأذون ...ويوم كتب الكتاب كان عيد ميلادة السبعة وخمسين ....طبعا اتولد من جديد .......كلة موجود ..امن وامان ...تبادل وتطبيع ....ومستوى ...اية النعمة اللى الواحدة فيها دى ....احمدك يارب ....بس ياخسارة ....الشعر الابيض اللى زى سلاسل الفضة مش بس معناة خبرة ورزانة وحكمة ...دا لية معانى تانية مابانتش غير بعد الجواز ....(شوف شوف دماغك حتروح بعيد) المعانى التانية يعنى خشونة فى المفاصل ...والكلوستيرول ...وحبة سكر كدة على خفيف ...مش مهم ...مانا متجوزاة وعارفة انة مش شاب صغير ...بس الشعر الابيض اللى عامل زى سلاسل الفضة كان لة بعد تالت (جات اهية )بدات تاخد بالها منة ..خصوصا بعد الاعلانات المستفذة اللى بتيجى فى التليفزيون ...اشى مسمار بينتنى ...واشى شمسية بتتفتح وبتتقفل ...واشى عصير وشاليموة .....ومرة تعمل مش واخدة بالها ..ومرة تعمل انة مابيفرقش معاها ...بس كل يوم كانت تنام ودمعتها على خدها ...وبدأ يعوضها بالهدايا والفسح واللبس والدهب والالماظ ...واستحملت ...بس هوة ما استحملش ...وبدأت الغيرة ...واتطورت لشك ...وبعدين زعيق ...ووصلت اخيرا للضرب ..... وروحت جميلة تالت لامها ....ودى دايما مشكلة جميلة معايا ....بتستعجل وتتجوز قبل ما اخلص سلسلة هوة معنى الحب اية ...لو كانت استنت ...كانت عرفت ان الحب والجواز مش بس تبادل وتطبيع ومستوى اجتماعى ...دا كمان آداء رياضى متقارب ومنافس ....ماهو ماينفعش مركز شباب المدينة يلعب مع فريق المحاربين القدماء ونستنى شوف ماتش حلو....؟؟!!!!!.
الاشتراك في:
تعليقات الرسالة (Atom)
والنبى يااستاذنا تجيش نبروز السلسه بتاعت بوستات الحبي ايه دي ونوزعها على الناس ؟؟
ردحذفالله يصلح حالك يارب انا صوتي راح اتكلم ما حدش بيسمع ولا بيفهم
حلوه مركز شباب المدينه وفريق المحاربين القدامي ده
هههههههههههههه
تحياتي لك يا فندم
طيب اعلق اقول ايه
ردحذفكل مرة ها اقول لك بوست يجنن
لازمن اعمله اعلان في المدونة يمكن حد عنده دم يفهم ويكون عنده عقل
بس انت جبتها هينة يعني الراجل ارمل ومعندوش عيال
لأ الطبيعي خالص يكون متجوز وعنده عيال ومعاهم سكر وضغط وشعر ابيض كفته وبرضه ندور ع التطبيع
تسلم ايدك
تحياتي
اول حاجة بعملها الصبح انى اشوف في بوست جديد لسلسلة الحب ولا ايه
ردحذفانا فهمت انت ليه قلت انه مش عنده عيال وانه مراته متوفيه لان بكدا من وجهة نظر جميلة هايكون كل شئ تمام ومش في منغصات وموافقتها على رجل يكبرها باعوام كثيرة هاتكون منطقية ومبررة لكن تأتى الرياح بما لا تشتهى جميلة
وانا كمان انضميت لستيتة وعملت اعلان في المدونة عن السلسلة لانها وبكل امانة تستحق