جميلة بعد مازهقت منى قالت انا لازم احط حد للراجل دة ....وقررت تيجى بنفسها....وهية طالعة على السلم ...قابلت نور ...هوة كمان قرر انة يجى بنفسة ....فتحت الباب ....مش عايز اقولكوا ....كانوا على وشك انهم يضربونى ... قالولى لخص بقى ...كل حلقة بجوازة مش حينفع كدة ... المهم.... دخلتهم وهّديتهم وعملتلهم عصير ....زى محمود سعد كدة ....وقولت لهم شوفوا بقى ....انا حاقول لكم اللى عندى ... وان اصبت فلى اجران وان اخطأت فلى اجر المحاولة ....وبدأت اقول ...مش بس لجميلة ونور .لأ بقول لكل اللى عايز يسمع ويبتدى من وقت ماانتهى الاخرين .....شوفوا بقى :
قبل ما تفكر تحب وتتجوز ....اتأكد الاول انك بقيت كبير ....مش كبير فى السن ....لكن كبير فى العقل و المشاعر .....والاهم ان يكون عندك ثبات انفعالى ...ماتجريش تحب وتتجوز تحت تأثير الفيديو كليب ....ولا الحاح الهرمونات ....ماتستسلمش لأحلام اليقظة والاوهام والخيال ...شوف الواقع زى ماهوة ...مش زى مانت عايز تشوفة ....عـّود نفسك انك تخلط العاطفة بالعقل .... لأنك لو ماعملتش كدة حتتصدم بالحقيقة المرة ....وترجع تعيط ....بص للى قدامك على انة شخصية واقعية ...بنى ادم يعنى ...ماتركبش احلامك علية وتصدق .... تصدق انها ملاك نازل من السما ....ولا تصدقى انة انسان مثالى مابيغلطش ...واوعى تفتكر ان الحب السخن بينجـّح الجواز .... بص حواليك وانت تعرف ان نص الناس اللى اتجوزوا وكان حبهم سخن ...اتطلقوا ....كيـّف تصرفاتك مع تصرفات اللى قدامك ...اتقابلوا دايما فى النص ...حبة عليك وحبة عليها ...حاسب من النقد عمال على بطال ...وابعد عن اسباب الصدام بالمشوار ....خليك ذكى وقول كلمة كويسة ...دايما قول كلمة كويسة ....وانتى ماتدوريش على عيوب جوزك وتظهريها.... وتنشريها ....اوعى من الشك ...غيرة معقولة ماشى ومطلوبة كمان .... اوعى تتباها باللى كنت بتهببة وانت شاب ....وتقعد تحكى مغامراتك الفظيعة .....مالوش لازمة حتضر اكتر ما تفيد .....وانتى ماتقارنيش بينة وبين جوز اختك ولا جوز صاحبتك ...ماتخليش شغلك ياخدك من مراتك ...وانتى ماتخليش المطبخ والعيال ينسوكى جوزك ...حافظ على اسرار بيتك ...وانتى بلاش تفكى بكلمتين مع ماما .....عامل اهل مراتك كويس ...رحب بيهم وجاملهم ....واوعى تحطى راسك براس حماتك ....صدقينى حتخسرى كتير ..... اعملوا صداقات ....زوروا واتزاروا ...بس نقــّوا صحابكم كويس .....ماتفتكروش ان الدنيا حتفضل حلوة على طول ....شوية الم وشوية امل .... شوية حلو وشوية مر ....عادى ..ماشى الحال ... كلة بيعدى ......بلاش بخل ..... وانتى بلاش اسراف ....جددوا حياتكم كل مدة ....فسحة حلوة .... هدية من غير مناسبة ......مفاجأة بس تكون حلوة ...حاكم انا عارف مفاجأتك البايخة .... دايما قولها بحبك ... الستات بيحبوا يسمعوها ...حتى لو قولتلى ان الحب باين فى تصرفاتك معاها ...هية عايزة تسمعها.... سمّّعها لها يا اخى ....ياساتر عليك !!!..... وافهم ان العلاقة الحميمة بتختلف من الراجل للست .... الست بتبقى عايزة حب وحنان وعطف علشان تستجيب ....وانتى افهمى ان الراجل بيستجيب على روحة ....يبص بس !!!....خلية يبص ياستى ......بلاش الحجاب فى البيت ....
وانت ماتفكرش ان الستات زى مابيطلعوا فى الهوت بيرد ولا النت .... ياعبيط دة تمثيل ...شغل سبوبة مهنة حرفة ...بدليل ان انت نفسك مابتقدرش تعمل اللى بيعملة صاحبنا ...ولا اية ؟!!!
وانتى كمان ...بلاش رخامة ...دا جوزك...... يعنى حلالك .....مش عيب ان احنا نتعلم ونطور ...حسسية انك عايزاة زى ماهوة عايزك وبلاش نظام الجثث والديب فريزر دة........جربى.... النتيجة حتبقى رائعة ...على الاقل حيضحك فى وشك الصبح .....ومش حيسألك عن مكان الشراب .....ولا حيقول زرار القميص مقطوع لية ؟؟..... خدوا اجازة من بعض ...سبها تبات عند مامتها يومين .....ولا سافر لك يومين ....اوحشوا بعض .....واوعى ....اوعى تحرم الست من امومتها ...الست مابتبقاش ست كاملة قدام نفسها الا لو خلفت ...بس اتعامل مع تنظيم الاسرة ...وانتى بلاش نظام الارانب ...وماتصدقيش ان العيال بتربط الرجالة ...الدنيا اتغيرت ...دى بتطفشهم دلوقت .......لو سبت مراتك تشتغل.... اقف جنبها .... ساعدها ..ساعدها فى البيت وفى شغلها ...افرح من قلبك لما تكبر فى شغلها ...حتى لو مرتبها بقى اكبر من مرتبك ...بلاش كلاكيع ...يامعقد ....وانتى اقفى وراة وجنبة ...حسسية انة راجل مثالى .....وانك واثقة فية وفى قدراتة ....وان هوة اللى حيحقق كل امالك واحلامك .... خلو ولادكوا همكوا الاول والاخير ....وبلاش السؤال العبيط الاهبل بتاع بتحب با با اكتر ولا ماما ياحبيبى ؟!!!!العيال دول بكرة والنبى ماتبوظوش بكرة كفاية امبارح والنهاردة اللى باظوا ......واخيرا ...والنبى والنبى والنبى ...ماتسمعوش كلام الفضائيات ...ومتخلهوش ياثر عليكوا ...دى سبوبة ياولاد ....اصحى كدة ومتخليش نفسك بضاعة السبوبة ....يبيعوا ويشتروا فيك ...ويكسبوا من ورا احلامك ومشاعرك ................................ ..............................................انا كدة خلصت ........................................
ملحوظة 1 : جميلة ونور نزلوا من عندى بعد ماشربوا العصير وسمعوا الكلام ...نور خدنى بالحضن وباسنى وشكرنى...لكن جميلة شكرتنى بس .....خسارة ....بهزر طبعا او مش بهزر ... جميلة ونوراتجوزوا تانى ...بس المرة دى بعد ما فهموا .....
ملحوظة 2 : الدنيا تســـاعنا كلنا.........................................والله
يا جودعان الراجل ده قال كل الى ممكن يتقال فى سطرين كتبهم
ردحذفايووووووووووه
قول معايا الهي يسترك دنيا واخره
عماله اقول واقول واقول ومش حاسه ان حد فاهمني
تعبت
وربنا حسيت ان المشكله فى انا وايقنت بقى ان انا يا اما فاهمه الحكايه غلط
يا اما مش عارفه اوصل وجهة نظري
انا كتبت قصه تعبر عن رايك ده وكان اسمه قلب ايمان هاتلاقي لها بنر عندي على المدونه لو حبيت
اغلب الرجاله اعتبروني خياليه وواحد قالي مش عارف رومانسيه طفوليه زي باقي الستات
وكلام عجيب كده
ام هند
الى هى المهم يعنى على ايامنا
حقيقى بوست رائع جدا جدا جدا
ولوحده عايز يتبروز
والحقيقه فرحتلهم يعنى نور وجميله الا يعنى حضرتك شقلطهم خالص
هههههههههههههههههههههههه
تحياتي لحضرتك وقلمك وعقلك وشخصك الكريم
وياريت تشرفنى فى المدونه تشوف البانر بتاع السلسله منور عندي ولو عجبك الشكل والحجم وكده قولي ابعتهولك بالحجم ده جاهز على طول
ياعم انت اللى استاذ
ردحذفالحجم دة حلو قوى ممكن تبعتية
اووووووك فورا يا فندم نبعتها
ردحذفوالله شوية نصائح في الجووووووووووووووووووووول
ردحذففعلا لو كل زوجين خدوا بالهم من الكلام اللي حضرتك كاتبه هتبقى الدنيا حلوووووة
لكن للأسف كتير مايعرفوش الكلام ده زي واحد بيسوق عربية وهو مابيعرفش يسوق وعمال يخبط يمين وشمال وكسر الفوانيس وطبق العربية وبوظ الدنيا خالص
لكن الحمد لله الناس اللي في خبرة حضرتك بيفيدونا ويعلمونا قبل ما نتصدم ونخبط ونتبهدل
وان شاء الله بخلي خطيبتي تقرا الموضوع كله علشان نبقى من اولها على نووووووووووووووووووووووووووووور
أزال المؤلف هذا التعليق.
ردحذفالله عليك بجد
ردحذفانت جبت كل المفيد
مش معقول كل مرة هاقولك انت رائع بس لازم اقول رائع جدا وجدا كمان
بس هاتوحشنا السلسلة دى اوي
كل مرة اقرأ لك فيها بتأكد اكتر انك بتعرف توصل للهدف على طول بوضوح وذكاء واسلوب جميل
وكويس انت كسبت ثواب في جميلة ونور
وفيا كمان عشان هاخلى جوزى يقرأ السلسلة كلها
ههههههههههههههه
ابدعت في السلسلة دى بجد وعرفت توصل المعنى بكل سهولة لاى حد عاوز يعرف معنى الحب ايه
برافو يا دكتور
حقيقى رائع
ردحذفممكن تتعين مستشار علاقات اسرية ومنظم للحياة الزوجية .. ياريت كل زوجين ينفذوا 50% من هذه النصائح
مش بس نسبة الطلاق كانت حتنعدم لا كمان الاسرة حتعيش فى سعادة حقيقية
ولو كانت النصائح تباع لكنت اول المشتريين
تحياتى لابداعك
أحلى كلام
ردحذفجزاك الله خيرا
وان شاء الله لك اجران
مقدرش اقول غير رائع...استفدنا واهو كله في ميزان حسناتك
ردحذفحلوه حكاية القديم دي تصدق فكره
ردحذفطبعا انت عارف انا قريت كل ده بس قريته تاني والله
انا معديه اسلم بس يا دوك يارب تكون بخير