الاثنين، 20 أبريل، 2009

انت عارف معنى الحب اية(3)

انت عارف معنى الحب اية(3)

جميلة بعد ماسابت نور ...قعدت تعيد حسابتها واكتشفت اد اية كانت غلطانة ...خصوصا بعد ما قرأت الحلقة التانية من المدونة بتاعتى ...واقتنعت ان الحب مش هّوة اللى فى السينما ....وان الحب الحقيقى هّوة تبادل المشاعر والاحاسيس والاحتياجات ...وشوية شوية قابلت شاب كويس .....لقت نفسها معاة ...واتبادلوا المشاعر والاحاسيس والاحتياجات .... وقررت انها تتجوزة ....خصوصا انة مش شبة احمد السقا خالص .....والمرة دى كانت صاحية قوى زى ماشافت مميزاتة شافت عيوبة ....وعرفت عنة كل حاجة ...اىنعم عندة شوية طباع بايخة بس مش مهم .....ماهى ماما عن جدتى عن جدتها اكرمهم الله جميعا قالت ..ابنك على ماتربية وجوزك على ماتعودية ....وهية قررت انها تسمع كلام الكبار ...وكانت كل ما خطيبها يعمل حاجة مش على هواها ...ولاحاجة ماتعجبهاش ...تقول معلش بعد الجواز حاظبطة واعودة ...واتجوزت جميلة ...وبدأت حياتها وهية مقررة انها تعيش فى سعادة....وتعوض تجربة نور ....الله لايرجع ايامها ....وخلص شهر العسل والحياة حلوة وسهلة ....والمشاعر متبادلة والاحتياجات متظبطة وكلة تمام ....بس يا خسارة ايمن كان لما بيرجع من الشغل ...كان بيقلع هدومة ويعلقها عل كرسى السفرة .... جاى تعبان مش طايق يا ولداة ....بس جميلة مش متعودة على كدة ...ماهى طول عمرها منظمة وبتحب النظام ....وبكل ذوق جميلة قالت لايمن ...لوسمحت يا حبيبى بلاش تعلق هدومك على كراسى السفرة ...وبكل ذوق ايمن قالها حاضر يا حياتى ....وتانى يوم برضة رجع ايمن من الشغل وعلق هدومة على كرس السفرة ...قالت لة جميلة وهية بتكز على سنانها ...انا فضيتلك مكان فى الدولاب ياروحى ....رد ايمن وهوة بيكز هوة كمان ...حاضر يا عينى ....وتانى يوم بدأ نفس الحوار ...بس نبرة الصوت بدأت تزيد فيها الرخامة ...كدة مش حينفع لو حد دخل علينا دلوقت يقول علينا اية؟! ...رد ايمن بنفس درجة الرخامة ...لما يبقى حد يجيى يبقى يحلها ربنا ....وعدى ست شهور على الحال دة ..... لاهية بتسكت ولا هوة بيعلق هدومة فى الدولاب..... وقررت جميلة انها تفضحة عند العيلة ....اسلوب ضغط ...! ماهو حتتعود يعنى حتتعود ...ماما قالت كدة ....وماتعديش مناسبة الا وتقول قدام الناس ....ايمن طبعة غريب! بيعلق هدومة على كراسى السفرة ....وعدت ست شهور كمان وبرضة مافيش فايدة .... لا هية بتسكت ولا هوة بيعلق هدومة فى الدولاب ...وبدات حرب المخابرات ...حرب ما تحت الحزام .....مش دة اللى هوة بيحبة ....طاب مش عملاة ....اوكية اوكية ..طاب مافيش فسحة الاسبوع دة ....ماشى ماشى ...والنبى مانا طابخة النهاردة ....تعبانة ياناس هوة مش من حقى اتعب .....ومالة طاب انا سهران النهاردة مع صحابى على القهوة .... وشوية شوية ....وبدأت الحتة اللى فى وسط السرير توسع ...وحمدوا ربنا ان مافيش عيال ....وكل واحد روح لأمة .....وطبعا جميلة قعدت تلعن فيّة وفى مدونتى ...وتقول ....ادى اخرة التبادل بتاع اهلك ...عملت اية بقى المشاعر والاحاسيس والاحتياجات ....جاتك نيلة فيك وفى اللى يسمع لك ......بس انا مظلوم والله ....لو كانت صبرت لما تقرأ الحلقة التالتة....كانت حتعرف ان مش بس التبادل مهم ...دا فية حاجة تانية اهم اسمها التطبيع ....مش اللى بنا وبين اسرائيل لاسمح الله ....لكن التطبيع يعنى الواحد ياخد على طبع التانى حتى لو الطبع دة مش عاجبة ....واوعى يقول قبل مايتجوزة ...حبقى اغير الطبع اللى مش عاجبنى ..واعودة على طبعى ....ماحدش بيغير حد ...والطبع مابيطلعش الا مع الروح .....يعنى ياتاخديه هوّة وطبعة مع بعض ....يا تسبية هوّة وطبعة مع بعض ...وقبل ماتتجوزى ...كان بدال ما تسمعى كلام ماما اللى ورثتة عن تيتا ...وتنفذية من غير ماتفكرى ....كنت اسأليها الاول ....هوا انت عرفتى تغيرى طبع بابا يا ماما ....؟؟!!!!!!

هناك 4 تعليقات:

  1. الحمد لله انا لسه خاطب
    مش هتخذ اجراء تاني الا لما تخلص باقي الحلقات علشان ما تحصلش في الأمور أمور ههههههههههههههههههه
    بس فعلا حضرتك لمست وتر حساس جدا ومهم جدا
    ناس كتيييييير بتعتقد انها ببساطة ممكن تغير طباع شريك حياتها 180 درجة بمنتهى البساطة وده طبعا مستحيل في 99.99% من الحالات
    الفيصل في الموضوع ان لازم كل شئ يكون واضح وباين من الأول وكل واحد عارف نفسه هيقدر يواصل ويتعامل و " يطبع " مع الوضع ده ولا مش هيقدر

    ردحذف
  2. ايووووووووووووه

    تماااااااااام

    تعرف انا دايما اقول ايه

    اقول على الاقل لو كنت ناوي تغير حاجه فى شريك حياتك ماشي
    لكن كمان حاول يكون عندك احتمال 50 فى الميه انها ممكن ما تتغيرش وتسأل نفسك بقى
    هاتقدر تستحمله كده زي ما هو من غير ما يتغير ولا لا

    كمان انت لسه على البر على راي الاخت وزه المدونه

    قالت مره فى احد بوستاتها

    لما تكون عايز بطه بلدي ليه تتجوز وزه بيضا بيضا وبعدين تحاول تخليها بطه بلدي

    ما من الاول كنت تاااااااخد بطه بلدي

    وطبعا طبعا فى ناس ممكن تتغير وناس لا

    وفى طباع ممكن تتغير وطباع تانيه لا


    بس جوزك على ما تعوديه دي مقوله تانيه تماما

    وصح على فكره

    بس تعوديه على طباعك انتى وحياتك
    مش تغيري طباعه هو


    يعنى من الاخر تحطوا ناموس الحياه بينكم كل واحد يعرف طبع التاني ويتعود عليه
    مش يحاول يغيره ويخليه ببساطه مسخ

    وده بيحصل كتير على فكره خصوصا من جانب الزوج

    لما يتجوز واحده ويبدأ من اول يوم يملي عليها الشروط والواجبات معقبا كل شرط من دول بامر الطاعه الواجب على الزوجه
    وشويه شويه تخسر شخصيتها وتبقى مسخ هونفسه ما يحبوش

    موضوع كبير كبير كبير عايز رغي كتير كفايه عليك كده بقى

    تحياتي لحضرتك فعلا

    وياريت تتابع بوستات الحب عند شمس النهار وتشارك معانا هنا ك فى الراي

    ردحذف
  3. لا دي هي الى بت رخمه بقى شكلها ومش معمره بيت حد

    ايوه هو ده الى هايقوله لها المجتمع عشان اطلقت مرتين

    المجتمع كله عايز صيانه وحياتك

    بس احنا بنحب ندفن راسنا فى الرمل والى بيفكر يرفع راسه من الرمل
    بيمسكوه بهدله

    كفايه علينا كلام الافلام والامثال

    ردحذف
  4. الله عليك بجد

    عجبنى اوي البوست دا بس مش كنت كتبتة بدري 7 سنين

    انا متفقة معاك تماما ان في طبعا لا تتغير ولا يجدى معها غير التطبيع التام

    وانت عارف طبعا ان انا ليا تجربة شخصية مع جوزك على ما تعوديه دي

    بس كلام صبرنى فعلا صح ان الزوجة بتقصد انها تعوده على نظام لحياتهم المشتركة مع بعض وهو دا اللى ممكن تحققه الزوجة فعلا يمكن مع بعض الرجال بيتحقق بسرعة ومع بعضهم بياخد وقت طويل حتى يتم تحقيقه وفي رجال مش بيتحقق دا معاهم ابدا ابدا

    لكن تغيير الطباع الشخصية دا صعب جدا

    ردحذف