انت عارف معنى الحب اية (7)
عندى مشكلتين ...الاولى ان المفروض ان الحلقة دى كانت الاخيرة ...لكن اثيرت مشكلة فى غاية الاهمية ماينفعش نعمل السلسلة دى ونتجاهلها .....المشكلة التانية بقى ان جميلة ونور ما عندهمش المشكلة دى ....يالله ...ربنا رحمهم منى المرة دى ..... اية بقى المشكلة ؟ ....المشكلة لو اتنين بيحبوا بعض قوى ...واتجوزوا ....وعايشين سعدا ....بس اكتشفوا ان واحد فيهم مابيخلفش ....ياترى الحب حيفضل زى ماهوة .... ولاحيزيد ....ولا اكيد حيقل ....هوة بصراحة الموضوع صعب قوى ...خصوصا انة بيفرق من الراجل للست .....هوة الراجل عايز الولد ...علشان لمايموت يكون فية حد شايل اسمة ....بس هوة انت ساعتها حتكون معانا ....ولا حد اصلا حيكون فاكرك ....وساعات يقولك انا عايزة علشان اتعكز علية لما اكبر ....دا طبعا على اساس انة ضامن ان الواد مش حيسبة ويهاجر ويطفش من البلد ....والسبب الاهم طبعا هوة علشان يورث الفلوس اللى قعد يلمها طول عمرة ...ومايلهفهاش اخواتة على الجاهز.....طاب والنبى ماتنساش تحول جزء من الرصيد للاخرة ..علشان يبقى معاك فلوس تصرف ....ويجرى يطلق الست ويكسر قلبها ...مش كفاية انها مجروحة فى انوثتها .....لا يطلقها ويتجوز علشان يخلف ......حق الله .....حقة ....محدش يقدر يعيبة ...اى نعم هية مشاعر الابوة اقل حبتين من مشاعر الامومة ...بس موجودة علشان كدة محدش يقدر يمنعة من الجواز ....المشكلة مش فى الراجل المشكلة فى الست ....اللى مابتعرفش تطالب بحقها ....وبتضحى بأمومتها وفطرتها ....مش علشان الحب والعشرة زى مابتقول دايما ...لكن بتبقى اكتر علشان ماتبقاش متطلقة ....كلمة لسة لغاية دلوقت صعبة ....وتبعاتها اصعب .....وتقول لنفسها : هى البنات الصغيرة عارفة تتجوز لما المتطلقة حتتجوز...وبعدين حاقعد فين ...ومين حيستحملنى ...وان استحملونى ....حاستحمل انا ازاى نظرات الرجالة الزبالة للست المتطلقة ...لا ياعم ...كدة رضا ....وخليها بجميلة ...والراجل اكيد حيشيلها لى ...وتبدأ تهدى نفسها وترضيها بأحلى جمل اخترعناها علشان نريح بيها نفسنا ...قسمة ونصيب ...ماحدش بياخد اكتر من نصيبة ....اللى مكتوب على الجبين لازم تشوفة العين ....وتفضل انها تعيش مجروحة ومكسورة بحاجة هية ملهاش ذنب فيها ....وعلشان احنا مجتمع عبيط ومابنقدرش تاخد قرار فى مستقبلنا ولا فى حياتنا ....المفروض ندور على حل ...والحل موجود بس لاننا مجتمع عبيط برضة ....بنتكسف نتكلم فية ونستعيب ....مايصحش ...ساعات بنعتبرة كفر ...وقبل ما اقولكوا الحل ....حاحكى لكم حدوتة ...كان ياما كان ....3سمكات واحدة ذكية وواحدة اذكى وواحدة غبية طحن ....كانوا بيعوموا فى بركة جنب البحر ...عدى الصياد على البركة .....وقال الله.... وانا راجع اصطاد ال3 سمكات دول .....السمكة الاذكى سمعت الكلام بتاع الصياد وراحت نطة فى البحر ونجت بحياتها ....والصياد راجع شافتة السمكة الذكية ....فكرت بسرعة وعملت نفسها ميتة وطفت على المية ...مسكها الصيد ورماها فى البحر ....ونجت السمكة الذكية ...مافاضلش الا الغبية الطحن ...قعدت تلف وتدور حوالين نفسها لغاية ما الصياد اصطادها ....وكانت عشوة لذيذة .......وطبعا احنا مش حنعمل زى السمكة الذكية ونطلب الطلاق ...لكن اكيد حنعمل زى الطحن ...علشان كدة الحل هوة ان احنا نعمل زى السمكة الاذكى ....ببساطة وبدون كسوف ولا خشى لان اللى اختشوا ماتوا ....نطلب نعمل تحليل ما قبل الزواج ........حتى لو كنا بنموت فى بعض ومانقدرش نتخيل الدنيا واحنا مش مع بعض .....صدقونى واحنا على البر احسن ...وصدقونى برضة ...الحب السخن بيبرد ...والعشرة الدافية بتسقع....والحاجة الوحيدة اللى اللى بتدى الدنيا معنى وتخليها تستمر ...هية العيال ....ونزعل شوية ...وينكسر قلبنا حبتين زيادة ...ونكتئب شهرين تلاتة اربعة ....احسن ولا نعيش طول عمرنا زهقانتين ومكتئبين ومش حاسين بطعم الدنيا ...وعايشين واحنا من جوانا محملين اللى قدمنا الذنب ....ومستعذبين التضحية .....وما بنعملش حاجة غير ان احنا نلوم ...ونشتكى ....ولما نتعب من اللوم والشكوى .....ناخد حباية القسمة والنصيب ...ونشرب معلقة اللى مكتوب على الجبين لازم تشوفة العين ..... وناخد حقنة ماحدش بياخد اكتر من نصيبة .......
شكر خاص لصاحب الفكرة
القديرة ريم
تا تا تا اول تعليق
ردحذفسبقتك يا ريم لا لااااااااااا
نرغي بقى
ردحذفشوف يا فندم
انا ليا راي يمكن يكون شبه ده لكن مختلف شويه
بمعنى والله يعنى لو كانت
حباية القسمة والنصيب ...و معلقة اللى مكتوب على الجبين لازم تشوفة العين ..... وحقنة ماحدش بياخد اكتر من نصيبة حلوين وطعمين ومريحين صاحبهم
ايه المشكله هو حر
بس شكوى لا ما يصدعناش بقى
الا ان طبعا الوضع ما بيكونش طبيعى ويوما ما هايقول ياريتنى
الحل الى حضرتك قلته تمام التمام بس ده لما يكون فى ناس عندها عقل اصلاااااا
احب اقولك ان انا عملت تحليل ما قبل الزواج
ما كانش قصدنا بس هى جت كده هابقى احكيلكم الفيلم ده بعدين
لكن كمان فى ناس يا فندم اعرفهم سنين متجوزين ما عندهم اي موانع معروفه ومش بيخلفوا ربنا عايز كده اللللللله
وفى كمان ناس بتضع عمرها وفلوسها تجري ورا الخلفه عشر خماشر سنه وبعدين ربنا يكرمهم بطفل انابيت مثلا واحد يدلعوه ويبوظوه ويطلع عين اهاليهم بعد ما يكبر
لو كانوا بعد خمس سنين علاج راحوا اتبنوا طفل كان زمانه بقى طولهم على ما جم يخلفوا
ومالوا ما يخلفوا ايه المشكله ؟
ومعاهم الطفل اليتيم ايه المشكله ؟؟
تعرف يا استاذنا
انا جوزي كان مربي حمام كهوايه يعنى
المهم فى حمامه كان شكلها حلو اوووووي ولونها ابيض وكانت انيقه كده انا كنت باحبها
انكسر قلبي يا اخويا وانفطر عليها لما عرفت انها عقيمه مش بتخلف ... قصدي مش بتبيض يعنى
المهم فرضا قالي ده دي الناس الغاويين حمام وبيفهموا بيستخلوها احسن استغلال
قلتله ازاي يعنى
قالي يعنى لو مثلا حمامه اول مره تبيض نسيب لها بيضه واحده ترقد عليها وتاكلها لما تفقس لانها بتبقى لسه هبله وندي التاني بقى الكبيره دي واحده
وكمان ممكن ناخد من اي حمامه تانيه بيضتين ونحطهم تحتها وهى ترقد وتربيهم والتانيه بقى تكون متفرغه وتبيض تاني على طول ما تعطلش للرقده والتربيه
قلتله طب وهى فعلا لما تلاقي بيض فى عشها هاترقد عليها وكده
قالي اااااه طبعا دي فكره سبحان الله
وفعلا كنا بنعمل كده وفرخت هى كذا جوز
حد فهم قصدي ؟؟؟
وصدقنى صحيح بيكون الاختيار صعب ما بين الزوج الى بقى حبيب وبين الامومه
والتبنى ممكن يكون حل للطرفين
للللللللكن برررررررررضه باعلى صوتي الى نفسها تخلف وجوزها مش بيخلف ترحمه من العلاجات المضنيه والعمليات
وترحم نفسها وتسيبه لحال سبيله بكل هدوء وتتجوز غيره وتحب جوزها الجديد وتخلف منه لو ربنا اراد
وهو كمان يتجوز واحده ارمله او مطلقه محتاجه اب لولادها ويربي ولادها ويعتبرهم ولاده
وجايز ربنا يكرمه ويخلف مع الجديده بعيدا عن التردد
ولو عكسنا الادوار برضه هي هي
يعنى لو الست هى الى مش بتخلف
يا تطلق وتتجوز برضه واحد ارمل او مطلق محتاج ام لولاده
يا ترضى انه يتجوز غيرها بصدر رحب وتربي ولاده بكل حب وهدوء مع زوجته الجديده
مالوش لازمه نعذب بعضنا ونعذب نفسها الدنيا اسهل وابسط من كده
ويابختنا بدينا الى مبسط فعلا الامور
يا لهوي على رغييييييييي
معلش بقى انت عارف الطبع
تحياتي لحضرتك وطرحك المتميز
وتحياتي لريم حبيبتى صاحبة الفكره
ستيتة حسب الله الحمش
ردحذفطرح فعلا ماركة فله يا روحي
عارف اساس كل مشاكل حياتنا الشخصية ايه؟
اننا نستمتع بمسلسل الضحك على النفس
ونتمتع بغباء اجتماعي نادر الوجود لأنه انتهى مع انقراض الديناصورات
عجبني كلامك وياريت يسمع اللي عقله فيه مركز تفكير
تحياتي
مشكلة عويصة بس برضه انا لي رأي مختلف
ردحذفاولا مسألة العقم دي اصبحت دلوقتي مسألة نسبية جدا
يعني ما نقدرش نحكم على راجل مثلا انه عقيم الا لو كان معندوش حيوان منوي واحد سليم يعني لو بينتج حيوان منوي واحد بس نقدر نقول انه مش عقيم مع العلم ان عدد الحيوانات المنوية في السنتيمتر المكعب الواحد من 20-80 مليون تخيلوا
وفي طرق جديده سمعت عنها انهم بياخدوا الخلايا اللي بتنشأ منها الحيوانا ت المنوية ويحاولوا يخصبوا البويضة بيها بس مش عارف التفاصيل صراحة
وعلى فكرة انا بنت عمي قعدت يمكن اكتر من 10 سنين ما تخلفش ومش عارفين ايه السبب مع انها هي وزوجها مفيش عندهم مانع طبي لكن سبحان الله بعد العشر سنين تعبت راحت تكشف الدكتور قالها انتي حامل فكرته بيهزر ولماحللت طلعت حامل فعلا وجابت واد وبعد الواد جابت كمان واحد ولسه باين في واحد تالت ههههههههههه
معلش طولت شوية
بس انا عندي استفسار انساني
فرضا ان الراجل او الست مش بتخلف
ايه ذنبه او ذنبها انها تعيش حياة مع واحد اكيد هيكون كبييييير في السن لأن عنده اولاد وعاوز واحده والسلام او الراجل اللي يعيش مع واحدة تانية عندها اولاد او مطلقة لسبب او لآخر وايه ذنب المطلقة دي اصلا انها تتجوز واحد ما بيخلفش ممكن يكون سبب طلاقها ان طليقها مش كويس
وعلى فكرة عاوز اقول حاجة مهمة جدا جدا جدا
تعرفوا ان سيدنا الرسول صلى الله عليه وسلم تزوج 11 بخلاف ما ملكت يمينه صلى الله عليه وسلم ولم ينجب الا من السيدة خديجة ام المؤمنين فقط وانجب منها جميع ابناؤه الا ابراهيم انجبه من السيدة مارية
وكلنا يعرف انه كان يحب السيدة عائشة حبا جما وكانت بالغة قبل ان يتوفي سيدنا محمد صلى الله عليه وسلم
ياريت حد يرد عليا ويفهمني .................
صباح الخير يا دكتور
ردحذفانا بعتذر عن تأخري في التعليق ودا لان النت الوحش فصل عندى وابى ان يرجع الا بعد محاولات مضنية
واهم حاجة ان اول تعليق مش راح لحد غريب وراح عند صبرني حبيبتى
يادكتور الشكر لله واسلوبك الرائع هو اللى بيدي اى فكرة اهمية ويضعها في قالب جميل
كل كلامك صح ومظبوط تماما بس اللى يفهم ويطبق .
بصراحة احلى خبر ان لسا في اجزاء تانية من انت عارف معنى الحب ايه لاننا خلاص اتعودنا عليها
طبعا احنا مش بنتكلم عن الحالات الخاصة اللى بيكون فيها الزوجين مستعدين يضحو باى شئ بمحض ارادتهم لكن مش يسيبو بعض وان كان هذا نادرا جدا
عجبنى جدا تعبير ( مستعذبين التضحية ).
حنعيش
ردحذفاولا تقبل مرورى
ثانيا طرحك للموضوع واضح ومميز
وعندك حق تماما .. ان بلاش نضيع عمرنا فى حاجات ممكن منكنش اد مسئولياتها .. ونفوق بعد فوات الاوان
بس صدقنى الست بتستمر لانها
1- بتبقى خايفة جدا من لقب مطلقة
2-من العودة لبيت الاب وما اقساها ان تعود ضيفة بعد ان كانت صاحبة منزل
3-ان تقول لنفسها اضمن منين لو اتجوزت تانى اخلف طفل ..مش يمكن ...الخ
وبرضة صدقنى الست الشرقية مظلومة جدا
تحياتى لك