الجمعة، 24 أبريل، 2009

انت عارف معنى الحب اية(6)

انت عارف معنى الحب اية(6)

بعد ما نور طلق شرويت ...امة قالت لة سيبنى بقى انقيلك بمعرفتى ....اية رأيك فى البت نجلاء بت منيرة ....حلوة ومؤدبة ومعاها شهادة ...دا غير ان احنا دايسينهم وعارفين اصلهم وفصلهم ....والبت كمان غلبانة وعلى قد ايدينا .... وافق نور ...وعملو الفرح ...والزفة كانت جايبة اخر الشارع ...وبدأت حياة نور ونجلاء ...تبادل وتطبيع ونفس المستوى والماتشات كلها تعادل محد ش بيغلب حد ....ومرت الايام.... ودارت الايام ...وفى يوم ونور بيتغدى ....لقى نجلاء بتاكل وهية سرحانة ....سألها مالك ..قالت لة ولا حاجة ماتشغلش بالك ...قالها لأ فية حاجة قولى ...قالت لة اصل اخويا نجيب فى مشكلة كبيرة ...كان كاتب على نفسة شيك بالف وخمسميت جنية ...تمن بضاعة اشتراها ....بس زى مانت شايف الحال واقف ...وميعاد الشيك جة ...والراجل مش صابر ويا يدفع يا الراجل يقدم الشيك للنيابة ...نور قالها وبعدين .... نجيب حيتصرف ازاى ....نجلاء فالت لة والله مانا عارفة ...اكيد حيلاقى حد يسلفة ...ولا يوصل مع الراجل لحل ...هوة بيقول انة لو باع البضاعة دلوقتى حيخسر جامد ....لكن لو صبر اسبوع كمان حتفرق جامد ....ماتشغلش بالك انت ...اجيب لك فاكهة ولا تشرب الشاى على طول .....نور سكت شوية كدة وقال لها ....اعملى الشاى وبعد ما نشرب الشاى خدى الف وخمسميت جنية من الالفين اللى فى الدولاب ....ورحى اديهم لنجيب ..... نجلاء رفضت وقالت انت ذنبك اية ؟.....انا عارفة اخويا اكيد حيتصرف ....نور قالها اسمعى الكلام ...وبعدين احنا مش حنعمل حاجة بالفلوس دى دلوقت ...هـّوة اولى ...يفك بيهم زنقتة ....نجلاء كانت فرحانة قوى ....اخوها برضة يا ناس ....بس كانت فرحانة اكتر بنور ....وبعد الغدا راحت لامها علشان تدى اخوها الفلوس ...وراح نور يقعد ما امة شوية ....ام نور عملتلة شاى وقعدت تستفسر عن احوالة وعن شغلة .....قالها الحال ماشى ولو ان القعدة فى البنك طول النهار ...كسرة ضهرى ....قالت لة يا ضناية يابنى ...طاب ماتحط شالتة ورا ضهرك ....ولما تروح خلى نجلاء تدعك لك ضهرك بابو فاس ...الا البت دى عاملة معاك اية ...اوعى تكون مزعلاك .....نور قالها ابدا يامة دى طيبة وغلبانة ....اسكتى يامة مش اخوها نجيب كان حيخش السجن ...كاتب على نفسة شيكات بالف وخمسميت جنية وماعهوش يسدد.....بس انا قولت لنجلاء تروح تدى لة الفلوس لغاية ماتفرج بعد اسبوع زى ما بيقول

امة بنرفزة : تدى لة الفلوس منين ...هية معاها فلوس ؟

نور بسذاجة : لأ من االفين الجمعية اللى كنت عاملها معاكى

امة : وانت تقولها لية اصلا على الجمعية

نور : مش مراتى حخبى عليها لية ؟!

امة : اه ياخايب يا مايل .....وانطلت عليك حكاية الشيك دى؟!!!

نور : طاب وهية حتكدب لية ...وبعدين هية ماطلبتش فلوس ...دى حتى كانت رافضة تاخدهم ...انا اللى صممت

امة : حتفضل طول عمرك عبيط ...دا كهن نسوان يا ولا ...ماتعرفوش انت ...تعيط لك شوية تقوم تصعب عليك وتروح كاعع ....وفى دخلت اخت نور من الباب ...هية مين دى يامة اللى تعيط لة

امة : تعالى شوفى خيبة اخوكى ...قال اية نجيب اخو نجلاء علية شيك وحيخش السجن واخوكى الشهم بعت لة فلوس ...الف وخمسميت جنية اتفرجى والنبى

اختة : ماهو نور اخويا كدة يامة طول عمرة طيب

امة : انت تقوم دلوقتى حالا ...تروح تجبيب الفلوس

نور : مايصحش يا جماعة ...طاب نستنى الاسبوع اللى قال علية ولو ماجبش الفوس حاروح اخدهم منة

اختة : ايوة ....علشان تكون الفلوس اتصرفت وموت ياحمار بقى

نور : ماشى ماشى انا نازل

امة : اياك ماتروحش

نور : خلاص يامة ...ونزل نور وكلام امة واختة بيلف فى دماغة ...بس قرر انة مايطلبش الفلوس حايروح يجيب مراتة بس مش حيطلب الفلوس ....شكلها حيبقى وحش قوى

ام نور واختة حطوا راسهم فى راس بعض

ام نور : الناس دى باين عليهم داخلين على طمع ....ايوة تلاقيهم بيقولوا موظف فى بنك كبير وبيقبض اد كدة

اختة : لا ... لازم يفوقوا من اولها هما عايزين يستعبطوا اخويا ولا اية

ام نور : ايوة يا بت فاكرة لما لما الراجل بتاع الفراشة جاب الكراسى واخوكى ماكنش هنا ....وابوها هوة اللى دفع ...فاكرة... ماصبرش اول ماجة اخوكى خد منة الفلوس ...طاب كان يتكسف على دمة ...دى اكنها نقطة بنتة... ياساتر

اختة : يامة مانا قولت لك ان الناس دى واطية ولمامة ....ماصدقتنيش ...طيب فاكرة لما صممت تروح للكوافير الغالى ...قال يعنى الكوافير الغالى هوة اللى حيعدلها المصدية ...بس اهو دبح والسلام

ام نور : طاب وبعدين يا بت ....حنعمل اية دلوقت ...انا عارفة ...عُمر نور ما حيطلب الفلوس

اختة : خلاص يامة انتى تقومى تلبسى ونروح لهم انت وانتى ....ونهزأهم بكرامتهم الارض وناخد الفلوس من حبابى عنيهم

ام نور : صح يابت عندك حق الاشكال دى ما ينفعش معاها غير العين الحمرا .....انا داخلة البس

ام نور لبست واخدت اختة وراحوا على بيت ام نجيب ....وعلشان ما اوجعش دماغك اتخيل انت اللى حصل .....فضيحة بجلاجل ....ضرب وشتيمة ونور مسك فى نجيب ...ونجلاء شدة شعراخت نور ونور ضرب نجلاء ...وامة صوتت ...والناس اتلمت..... وراحوا القسم ...ورمى نور يمين الطلاق على نجلاء .....وخدت امة الالف وخمسميت جنية ...واللى ماتعرفوش ان نجيب كان اتفق مع الراجل انة يصبر علية اسبوع واللى ماتعرفوش برضة ان نجيب جات لة بيعة حلوة تانى يوم العركة ...وباع وكسب وسدد الشيك ....ممكن بقى نضيف حاجة مهمة مع التبادل والتطبيع والمستوى والاداء الرياضى .... البيوت اسرار المفروض ان ماحدش يعرف عنك انت ومراتك حاجة ولا حتى امك ...لا حلو ...ولا مر .....ممكن ؟!؟!؟!؟

هناك 5 تعليقات:

  1. صباح الخير

    دى فعلا اهم نصيحة لازم يطبقها كل زوج وزوجة

    كل مشكلة بين اى زوج وزوجة مهما كانت كبيرة لازم تفضل بينهم لانها مهما كانت كبيرة هاتتحل وهخاتتنسي لكن لو طلعت برا يمكن مش تتحل ولو اتحلت مش هاتتنسي واكيد لو كانت مشكلة صغيرة هاتزيد وهاتكبر بسبب التدخلات الخارجية

    انا عارفه انى كل مرة بقولك كدا بس مش قادرة اخبي اعجابي بالسلسلة دى
    ما شاء الله عليك

    ردحذف
  2. طيب انا ليا طلب عند حضرتك

    عايزاك تعمل السلسله دي فى تبويب خاص بحيث اخد منه وصله عندي فى المدونه الى يعمل كليك عليها تديله صفحه فيها السلسله كلها

    لو حضرتك مش لك فى الحركات دي خلي البت مروه تعملهالك

    اه مروه متزحوله على العلمين صحيح

    طيب لو مش عارف الليله دي قولي وانا تحت امرك اقولك ازاي


    بالنسبه للبوست بقى
    اه طبعا فى رجاله وستات طبعا
    الكلام بيقع من بؤهم كده بكل هبل
    وفى الاتجاهين

    يعنى يروح يقول لامه مراتي قالت ومراتي عملت

    ويروح يقول لمراته ماما على فكره ما بتحبكيش واصلا ما كانتش موافقه عليكى

    انسان عكاك بمعنى الكلمه

    وطبعا برضه فى ستات كده عادي

    بس يعنى انت هاتفضل مبهدل نور وجميله كده طول حياتهم
    هههههههههههههههههههه

    يلا ادينا بنتعلم فيهم فيران تجارب بقى ان كان عاجبهم

    تحياتي لك يا استاذنا

    ردحذف
  3. تعليق متأخر يا سيدي لأنك ماشي بسرعة جدا
    على ما خرجت وجيت لقيت نور طلق نجلاء
    ده نور ده بقى خبرة في الملاعب
    انا لو منه ابطل العب خالص لأنه خايب وطري كده وخسارة فيه البت نجلاء الطيبة بنت حتته
    هو كان فعلا لازمه شيرويت تطلع النجيلة الخضرا على عيونه

    تحياتي على الكلام الجميل والقصص الرائعة اللي كلها عوبر

    ردحذف
  4. ياسلام على الخبرة ياجدعان
    والله انت استاذ
    انا ما كنتش واخد بالي من موضوع البيوت اسرار ده خالص مع اني شوفت بلاوي بتحصل قدامي ومشاكل وخناقات وحتى ضرب بسبب الموضوع ده
    لازم اتصل بخطيبتي واتفق معاها من دلوقتي " البيوت أسرار "

    ردحذف
  5. عندك حق لازم اسرار البيوت متتقلش لحد

    ردحذف