مش كلها ضلمة
احمد عندة واحد تلاتين سنة....دكتور تخدير مشهود لة بالكفاءة ....متجوز وعندة عبد الرحمن .... اللى متاكد منة انة خلص الماجستير ...ويمكن يكون خلص الدكتوراة كمان ....مقدرش ااكد علشان انا ماشفتهمش من زمان .....اللى يسمع الكلام دة يقول دا اكيد ابوة استاذ جامعة وظبطهالة ....ولا راجل اعمال واشترى لة الشقة اللى اتجوز فيها ...والماجستير بالمرة ....ماهو كلة بيتظبط يا جميل ...لأ....لا ابوة استاذ جامعة ولا رجل اعمال ولا وارث من عمة اللى فى استراليا...والحكاية عندى من اولها....حكاية عقل وفكر ...حكاية تربية وثقة بالنفس وبالله .....ابوة موظف عادى جدا ....ووالدتة ست بيت ...اسرة متوسطة زى معظم الاسر المصرية ...اتخرج احمد من الطب وقرر انه يكون حاجة ...استلم الامتياز بتاعة ....وكان يروح المستشفى اول واحد ...ويمشى اخر واحد ...كان يلزق للنواب علشان يعلموة ....وبعد الضهر كان بيشتغل فى شركة ادوية علشان يزود دخلة ...وبعد ما يخلص كان اكيد يروح علشان ينام! ....لا كان يروح يتغدى ويريح شوية ....وبعدين ينزل يمسك نبطشيات زمايلة اللى بيهربوا منها ...زمايلة كانوا فاكرين انهم بيضحكوا علية ....لكن هوة كان عندة وجهة نظر ...قالى مرة يادكتور انا بنام على سريرى ببلاش ....لكن على سرير النبطشية باخد خمسة جنية ....دا غير انى بشوف حالات حرجة كتير وباتعلم اكتر ....بعد ماخلص الامتياز اتعرف على دكتور جراحة كبير ....وبقى يساعدة فى العمليات بدون مقابل ...كان يقولة كفاية انى باتعلم منك ...كمان اخد فلوس ؟!!....وشية شويةالدكتور الكبير وثق فية وكان يعتمد علية وطبعا كان بيدية اجر ...وبرضة لسة فى المستشفى الصبح والشركة بعد الضهر والنبطشية باليل ....بس لقى ان عندة ساعتين فاضيين فقرر انة يعمل الماجستير ...وشوية وبعد ماظروفة اتحسنت وبقى يشتغل فى اكتر من مستشفى وينطلب بالاسم ...قرر يتجوز واتجوز صيدلانية محترمة ...جميلة ومؤدبة وبنت ناس ....اتجوز فى ايجار مؤقت ...وخلص الماجستير وخلف عبد الرحمن ....وبدا فى الدكتوراة .....وجاب عربية 128 .....من ايمها ماشفتهوش .....بس اكيد انة جاب شقة تمليك وخلص الدكتوراة ...وغير العربية كمان...انا بثق فية وفى ذكاءة قوى ....ربنا يخلية لمراتة وابنة ويفرح ابوة بية كمان وكمان.... ويبعد عنة شلة اطباء القهوة اللى لغاية دلوقت مابيعرفوش يدوا حقنة فى العرق ...وقاعدين بس يلعنوا اليوم اللى دخلوا فية كلية الطب اللى ضيعت شبابهم ....اللى كانوا محتاجينة علشان يضيعوة فى الهلس.
احسنت اختيار العنوان يا دكتور
ردحذففعلا مش كلها ضلمة
الضلمة والنور بتكون من جوانا احنا
(وقاعدين بس يلعنوا اليوم اللى دخلوا فية كلية الطب اللى ضيعت شبابهم ....اللى كانوا محتاجينة علشان يضيعوة فى الهلس.)الجزء دا عجبنى جدا جدا
اه طبعا مش كلها ضلمه
ردحذفطيب ده انا لو حكيت قصة كفاح ابو رياض بقى هاتدوه نشان
ههههههههههههههههههههههه
مسيرى اقولهالكم ان شاء الله بس يدينى هو الاوكيه
ناس كتير محترمين ومجتهدين وعايشين فى سعاده يمكن ما حدش شايفها
والى شايفها مش فاهم هما ليه سعدا وجايز يحقد عليهم
عشان الناس الى انت وصفتهم دول ادمغتهم عباره عن دماغ دونكي متركبه على بنى ادم
عايش بياكل ويشرب وينام ويعمل زي ما الناس بتعمل وببببببببببببس
ولما يفشل حتى ما يعرفش هو ليه فاشل ويبدا يصب جام غضبه على كل الظروف الى حواليه والناس الى حواليه معاداه هو
اصله فله وعمل الى عليه
تحياتي لحضرتك
وما قولتش رايك فى الموضوع بتاعي الاخير
بتقرا من بعيد لبعيد ليه
للأسف نحن قوم متواكلون متآكلون انبطاحيون انسداحيون متململون مكرشون
ردحذفمفيش حد فينا عاوز يعترف انه هو السبب بنسبة 90% في الحالة اللي هو عليها
مثلا خريج الجامعة اما يشتغل في تخصصه اللي مش فاهمه اصلا او ما يشتغلش ويقول الحالة " ض . ج "
أنا عن نفسي الحمد لله خلصت بكالوريوس تربية وزي ما حضرتك عارف الشغل كتيييييييييييييير لدرجة اني اشتغلت 37 يوم في مدرسة خاصة
لكن اتجهت بعدها لمجال الجرافيك والتصميم الثري دي والحمد لله
على فكرة " ض . ج " اختصار ل ضعيف جدا اللي بيكتبوها في نتائج الكلية للطلبة الساقطين الفاشلين
ردحذف