السبت، 4 أبريل 2009

زمان كان احلى لية

زمان كان احلى لية

زمان كنا بنتباها قدام بعض لما نقرا كتاب لطه حسين ..ولا رواية ليوسف السباعى اونجيب محفوظ .. ولانحفظ سورة ...ولا لما نعمل اشتراك فى مكتبة البلدية .....كنا بنفرح لما بنتعلم حاجة جديدة ...ولا بيتوفر معانا قرشين ...نأجر بيهم عجل ...كنا نقعد نحوش علشان نشترى جزمة كاوتش بخمسة وسبعين قرش من عند باتا ..وناخد الكورة الشراب ونديها لعب ...مرة ماكنش عاجبنا اكل امى كانت طبخاة ...ابويا ضربنا حتة علقة ...وقالنا محدش يقول مش عاجبنى ...كلها نعمة ربنا ...غيرنا مش لاقى ... كنا نستنا العيد علشان ناخد العيدية ونركب المراجيح ... كان احلى حاجة لما الراجل يطبل على الطبلة ...ويقول لنا اللى يحب النبى يقول هيييية ...كنا بنقول هييية من قلبنا وباعلى مافى حسـّنا ....كان ابويا ياخدنا معاه صلاة الجمعة ... واحنا طالعين كان يدينا فلوس علشان نديها للغلابة اللى قدام الجامع .....فى المدرسة ....كان الاستاذ عبد السلام يعدى علينا فى الطابور ومعاة مقص .... اللى يلاقى شعرة طويل يعملة نقرة فى شعرة ماتتصلحش الا لو حلق زيرو.....كنا نستنا يوم الحد علشان اليوم المفتوح ...ودة كان يوم بيفتح فية التليفزيون الساعة احداشر الصبح ...ويجيب فيلم كوميدى لاسماعيل ياسين...كنا بنضحك رغم اننا شوفنا الفيلم قبل كدة ميت مرة بس كنا بنضحك وبرضة من قلبنا. ذاكرنا ونجحنا وكبرنا وحبينا ....بس حتى فى حبنا كنا محترمين عمرنا ما مدينا ايدينا ... كل ماشاويرنا كنا بنعملها مشى ...نادر لما كنا نركب تاكسى ...كنا سعداء عمرنا ما اشتكينا من قلةالفلوس ...مع ان الدنيا كانت غالية...ايوة غالية اغلى من دلوقت ..اللحمة كانت بجنية ...وجرام الدهب كان بتلاتة جنية ...ماهو المرتب برضة كان تمنتاشر جنية ...يعنى بحسبة بسيطة ...تلاقى جرام الدهب كان سدس المرتب ....دلوقت عشر المرتب بضم العين ...يبقى مين ايامة كانت اغلى ...طاب اية اللى خلى دلوقتى اوحش من زمان ....عارفين لية ...علشان مبقاش عاجبنا حاجة ...مافيش حاجة بترضينا ...زعلانين.... على طول زعلانين ....زعلانين علشان مش عارفين نحدث الموبيل ...علشان مش ملاحقين نساير الموضة .. مبقاش يعجبنا وسط البلد ...عايزين نشترى من سيتى سنتر ...ماهو وسط البلد بقى بتاع البيئة واللوكل ...علشان البلطى بقى وحش ...وعايزين جمبرى وسبيط وسمك موسى ...والشقة الايجار عايزينها تمليك ... وبعدين هوة مش حقنا يكون عندنا عربية ...واية اللادا اللى بتقول عليها دى ..عايزين واحدة بور وتكييف ... والمروحة بقت موضة قديمة ..عايزين تكييف ..وعايزين نغير الكمبيوتر دا فية هاردات متين جيجا نزلت ... وانت عيز المتين فى اية ...علشان يكفى الافلام والاغانى والفيديو كليب .... هو انت بتتفرج عل الافلام فى الكمبيوتر ...لأ ماهوكلة بيجى على الدش ....وان مجاش بلاقية على الوصلة .....هو’ كمان فية وصلة؟!!! ...ياعم دى كل الحكاية خمسة وعشرين جنية فى الشهر وتشوف كل المتشفر ....ماعدش عاجبنا مراتتنا .. عايزين من اللى فى الفيديو سلب( ايوة سين ماغلطش فى الكتابة) ....بقينا رنة ومسج وريموت وديليفرى ....وريّح كدة وانتخ على الكنبة الامريكان فيرنيتشر ...واطلب البيتزا ديليفرى ومتنساش الكانز ... وامرك لله لما الراجل اللى جايب البيتزا يخبط ...قوم وافتح له ومتنساش تتخانق معاة ..علشان نسى يجيب الكاتشب ...كل وانبسط واقعد اتفرج على الاعلانات ... واتمنى واحلم بالفيلا وحمام السباحة والمزز اللى متنطورة حواليك ...ومتنساش تدخل العيال مدارس لغات ..علشان ينسوا العربى ويسجلوا اسم صاحبهم اسامة على الموبيل ...اوسامة..... عربى اي ياعم دا العربى دا بقى بيئة و لوكل .... وافرح بعيالك وهما حافظين الاغانى ....وانبسط لما يقولولك يابابى عايزين نروش ونروح الملاهى ....ومتنساش وانت بتفسح العيال ....تعدى على الهيبر ماركت ...وتشترى كل اللى مانتش عايزة ... مش مهم مالدفع بعد خمسة وخمسين يوم ....مش احنا معانا فيزا ولا اية ... اه .. مانا عارف ان الفلوس بقت اليومين دول... بيئة و لوكل .... اصرف مافى الجيب واندين مش عيب ...ولما تروح الشغل اوعى تنسى تزمبك زمايلك .. وتبقى عصفورة المدير علشان تقبض كتير.... واحرق دمك ..وارفع ضغطك ...وهات لنفسك السكر ..وركب دعامة ... واشتكى ان الدوا غالى ...وان الدنيا مش مكفية ..وموت ...موت وسيب العيال تكمل ... ويبيعوا حتة الارض اللى ورثتها عن ابوك ...ماهو انت ماعملتش حاجة ...خليهم ياخدوا فلوس الارض ....ويحدثوا الموبايل... ويجيبوا اللاب توب.... ويروحوا المول ... ويشتروا بالفيزا ... ويطلبوا ديليفرى ... ويفرقعوا كانز ....ويضربوا جيل ...ويكووا شعرهم بمكوة السيراميك ويدعوا عليك ويقولوا.... روح منك لربنا يادادى .....ماكنتش سيبت لنا فيلا ...ولا شالية فى مارينا ولا بورتوالسخنة...كدة يادادى تسيبنا فى الهم ...... جاتك الهم

هناك 3 تعليقات:

  1. والله عندك حق في كل كلمة قلتها
    انا فاكر زمان كنت بحلم بالعيد قبله بشهور
    وليلة العيد انام وجنبي لبس العيد الجديد والجزمة الجديدة على السرير
    ودلوقتي انت شايف الدنياعملت ازاي في فترة قصيرةجدا
    انا على فكرة عندي 27 سنة لكن شايف الفرق كبير جدامن 10 او 15 سنة فاتوا والنهاردة
    الحياة اصبحت ملل بالظبط زي ما انت وصفت
    الحميمية راحت بين الناس
    من الحاجات الحلوة اللي فاكرها اني كنت يوم العيد او تاني يوم بالكتير بروح عند اخوالي واقعد معاهم يوم او يومين لانهم كتير حوالي 9 وبصراحة بيكون يوم جميل جدا مع انهم في عزبة في الارياف معزولة تقريبا لكن اللعب مع اولاد خالي والجري والتنطيط في الحقول حاجة كانت روعة والله
    وفاكر لما كانوا بيجيبوا فيلم هندي يبدأ الظهر و ينتهي بعد المغرب بعده ما تقدرش تقوم من مكانك لان ظهرك بيكون اتخشب
    دلوقت انا في الامارات تخيل دبي وان 95 ولاب توب ودش وعربيات وفسح ومولات ومتنزهات ومهرجانات وووووو والله حاسس ان الدنيا دي مالهاش لزمة مش علشان بعيد عن أهلي لكن حاسس اني مش سعيد وخلاص وبحلم والله وانا بقعد مع صحابي وقرايبي تحت الشجرة على جسر الترعة نصطاد سمك او حتى نتكلم في اي حاجة وانا عند اخوالي ساعة العشا مثلا تخيل لازم كلهم يتجمعوا ياكلوا مع بعض وتخيل انت كل واحد وولاده ومراته يبقى عددهم كام بصراحةلما بفتكر الايام دي بزعل قوي على حالنا دلوقتي

    ردحذف
  2. كدددددددددده

    يوفتني بوست والبت ريم تعلق قبلي مش انا حاجزه هنا صف اول ولا اييييييه


    طيب انا هاقول لحضرتك على حاجه انا ممكن امضي وابصم تحت الكلام وامشي ولا ايه

    بص انا اخر ما زهقت مره على فكره بالفعل طلعت فى واحد ومراته
    كانوا بيشكوا من ضيق ذات اليد وبالصلاه على النبى فى بيتهم 3 موبايلات بالصلاة على النبى ده كان من خمس سنين يعنى قبل ما الموبيلات ترخص كده

    وعيالهم اساسا كانوا اطفال

    طيب بتشتكوا ليه بقى ما انتم بتصرفوا بتاعه 200 جنيه اهو كل شهر على الموبيالت غير تمن العدد

    ياعم الحاج ده انا عندي عده جيالي هديه ومش عايز اجيب لها خط وباقول مالوش لازمه دلوقتي

    وحقيقى المشكله ان احنا ما عدناش بنرضى

    بنقول ما عادش الناس بيتجوزوا لييييييييه

    والبنات الله يحرقهم بيطلبوا طلبات كتير

    فى حين والله العظيم مش البنات بس الشباب كمان عايزين يتجوزوا فى شقه فيها من الابره للصاروخ الله هما اقل من ولاد طنط ظاظا ولا ايه

    السعاده فعلا فى الرضا والله

    تحياتي لحضرتك ونجري على البوست الجديد بقى

    ردحذف
  3. انا كنت عندى حق لما قلت انك بتوصل لهدفك مباشرة
    هى المشكلة في القناعة والرضا اللى اختفوا ومش بئا لهم وجود

    كله عاوز يمتلك كل حاجة واي حاجة بغض النظر عن هو محتاجها ولا لأ عشان كدا ككل حاجة مش بئى لها اى طعم

    انا مش بعفي نفسي ولا بقول انى مش كدا للاسف انا كمان اصبحت كدا بس مش بصورة مبالغ فيها يعنى هههههههه
    وفعلا كل شئ كنا بنحس بحلاوته الاول دلوقتىبيعدى علينا من غير مانحس بيه
    حتى الضحك مش بئى من القلب ولا بنحس بيه

    يا صبرنى ياقمر انا مش اقدر اعلق قبلك يا جميل دا مش انا والله يا فندم ... انا برئ يا بيه

    ردحذف