الاثنين، 30 يوليو، 2012

عامل فيها دبور..... لييييه ؟


عامل فيها دبور..... لييييه ؟
انت :
لما يكون فيه ماتش مهم ... نهائى يعنى وانت مش فت ومقعدينك احتياطى ... تدبدب وتنزل تلعب ولا تسيب الفت هوه اللى يلعب(دا على اساس انك بتحب فرقك زى مابتقول يعنى )  ؟ اديك قولتها ... امال صممت تنزل تلعب النهائى ليييه ؟
واحد ساكن فى الدور الاتناشر ... الاسانسير عطل بيه فى الدور الرابع .... يطلع يكمل من الرابع على السلالم ... ولا ينزل الدور الاول وبعدين يطلع الاتناشر؟ ...... اديك قولتها ... امال عايزنا نرجع للقله والمروحة الخوص ليييه؟
لما يكون فى معظم بيوت مصر دش ... واللى معندوش دش عندة وصله ... صح ولا غلط ؟... لما هوه صح .... بتكلم الشعب على الراديو لييييه؟
لما اخويا بياكل فراخ مستوردة ويلبس بدل مستوردة ... وعيالك مش لاقيه الفول النابت ... تصرف على مين ؟ اخوك ولا عيالك .... اديك قولتها ...امال كل امانيك تبعت لاخوك وجبات سخنه دليفرى لييييه ؟
لما يكون مفتاح الكهربا فى البيت محروق ... تجيب كهربائى يصلحه ولا تجيب سباك ؟ ... اديك قولتها ... امال جايب سباك علشان يصلح الكهربا لييييه؟
انتوا بقى  :
لمايبقى قدامكوا واحد صاحب قرارة وخبرة مشهود ليها ... وواحد مابياخدش قرار انه يربط رباط الجزمة الا لما يسأل ويسترشد ... ولازم تختاروا بينهم ... تختاروا مين ؟ ... اديكوا قولتوها ... امال اختارتوا اللى بيوطى يبوس لييييه؟
لما واحد من يوم ماعرفتوه وهوه بيلف ويدور ويكدب  ويقلكوا بالليل كلام مدهون بذبدة يطلع عليه النهار يسيح ..... تصدقوه وتمشوا وراه ؟...لما هوه لأ .... اختارتوه ليه ؟
انت وانتوا :
لما عاملين فيها دبابير وعمركوا ماحتكونوا دبابير ولا حتى هاموش .... بتزنوا على خراب عشكوا وعش اللى جنبكوا ليييييييييييييييه؟


الجمعة، 27 يوليو، 2012

البداية من جديد حاجه حلوه ....... أو وحشة (2)


البداية من جديد حاجه حلوه ....... أو وحشة  (2)

بدأت رحلة البحث عن شقة ..و علشان انا جاي من كتاب تاريخ كنت  متخيل ان شوية الفلوس اللي معايا و اللي حوشتها على مدار عشرين سنة شغل و شقى و احتمال كائنات غريبة من مديرين و عملاء وزملاء... حتجيبلي شقة تمليك في حتة حلوة .. شقة واسعة كدة وفيها لكل بنت من البنات اودة ...خصوصا اني كنت شايف ان كل متر في البلد بيتبني فيه برج... وان العلم بيقول ان لما العرض يزيد السعر بيقل ...مش بقولوكوا جاي من كتاب تاريخ....القصد لجأت للمعارف والاصدقاء والاقارب.. وطبعا سمعت الجملة الشهيرة اللي بتلاقيها علي لسان اي حد ممكن تلجأله علشان يحل لك مشكلة ..يااه..مش كنت تقول.. دا لسة فيه شقة ميه واربعين متر متباعة قدامي بسعر التراب الأسبوع اللي فات .. خليها علي الله ..سيب لي الموضوع ده .. وطبعا الايام بتثبت ان جملة خليها على الله دى... جملة اعتبارية معناها ... حل عن دماغى  اهلى هوه انا ناقص  امك ... فقررت انى ابحث عن اهل الخبرة ... السماسرة .. شغلتهم بقى ... وادى العيش لخبازة ولو ياكل تلت تربع ... واكتشفت حاجة كمان ... اكتشفت ان مصر كلها بتشتغل سماسرة ... العجلاتى سمسار .. المكوجى سمسار ... البقال سمسار ... حتى موظف الحكومة اثناء اوقات العمل الرسمية بيشتغل سمسار ... خريج الجامعة المصرية  سمسار .. خريج الجامعة الخاصة برضة سمسار.... مش حأكدب عليكوا ... فكرت اشتغل سمسار بعد مافشلت فى انى اترشح لرئاسة جمهورية مصر العربية بعد ما اتأكدت انى عمرى ما حاجيب المية وتلاتين الف صوت زى اللى جابهم زعيم الامة ... خالد باشا زغلول قصدى على ... القصد ... اتحولت من دكتور محترم ... خدم فى التعليم سبعتاشر سنة وخد دبلومات فى الجراحة والتسويق والتربية ... اتحولت من دكتور فى شركة دواء مكتوب على الكارت بتاعة رئيس قطاع وتحت ايدة مديرين ومندوبين   ... اتحولت من أب محترم لبتين معتبرينة مثل اعلى .... اتحولت الى كورة شراب فى تقسيمة سماسرة فى دورة رمضانية ...
والى اللقاء مع شلاليت السماسرة فى الحلقة القادمة .

الاثنين، 23 يوليو، 2012

رغبة قويه فى اعادة نشرها


حشيش الارض

الكتاتنى هوه هوه فتحى سرور ... الشاطر هوه هوه احمد عز ... البلتاجى هوه هوه كمال الشاذلى ... العريان هوه هوه صفوت الشريف ... الجديد هوه هوه حسنى ... مافيش حاجة بتتغير ...  ومافيش حاجة حتتغير .... بهدوووووء اقعد واتفرج عليهم نفر نفر .. حتلاقيهم هما هما .... بص كويس بتركيز .... حتلاقينا احنا كمان زى ما احنا .... هيه هيه ... وهما هما ... واحنا احنا ... ثورة بقى انتفاضة هوجة اغتيالات حرب انقلاب  ... حتفضل مصر هيه هيه .... اللى راكبين هما هما ... واحنا  ... احنا احنا ... هما النخل العالى فى العلالى ... واحنا حشيش الارض ... اى نعم مافيش ريح تهزنا ... ولاهوا يهدنا .... بس علطول بينداس علينا بالجزم ...احنا حنفضل زى ما احنا ... نصبر بمرارة ... ننكت بمرارة ... كل اللى بنعمله ... ان احنا بنطلغ غلنا وهمنا فى بعضنا ...
حتفضل هيه هيه وحيفضلوا هما هما وحنفضل احنا احنا ....ويا سيدى ... حلم وراح ...  زى مليون حلم وراح ... ايه اللى جد يعنى ...مابويا بالاشتراكية و حلم .... وجدى سلم على الريس وباسه  وخد الخمس فدادين وحلم ... وجد جدى بنى الهرم وحلم .... مافرقتش يعنى ما احنا بنحلم من سبعتلاف سنه ومافيش حلم بيتحقق ... عادى يعنى ماتعرضهاش .
ياعم دماغك ....يالا ارجع لاصلك ... حضر دكر البط علشان الموسم ... اسلقه و حمرة وخد الشوربه سقى بيها الرقاق ... واتغدى ومصمص.... وحلى بحلاوة الموسم ... واضرب كوباية شاى التموين ابو نص التمن ... واحبس بالسيجارة الكليوبترا ... وباليل ..... بلبع قرص الفياجرا مع قرص عين الكتكوت ... وشغل التت على ماالحباية تعمل مفعولها ....... وصدق انك راجل ...... واتقلب على ضهرك ... واتخمد وشخر .... وابقى استحمى الصبح ........ يمكن .... يمكن..... جايز تطهر .(حلم برضة انك تطهر )

الاثنين، 16 يوليو، 2012

رمضان مابعد الثورة الميمونة


رمضان مابعد الثورة الميمونة

هلفطة .. سفسطة ... شلفطة...
 مرمطة .. رطرطة ... شقلطة ...
هرطقة ..منطقة .. طقطقة ...
مرقعة .. فرقعة ... لعلعة....
معجنة .. سهتنه .. مسكنه ...
مبوسة ... فلحسة ... ملحسة ...
شنخرة ... منخرة ... مسخرة ...
مغنجة ... بلطجة ... عربجة ...
تلك هى نتاج ثورة 25 ينايم ... اصحى وحد الدايم ... رمضان كريم ... كل سنة وانتوا طيبين .... وفى ميه المخلل غطسانين ... وعلى الفيس قاعدين ... وعلى خيبيتنا متتريقين وقالشين ...
كل سنه وانتوا طيبين ... وبسنقر الكلبى فرحانين ... وبالقاضى حلاوه مرحبين .... وبحبظلم مستمتعين ... وبفزاعة النظام القديم خايفين ... وبالدقن مربيين ... وبال(.....) قالعين ... والياميش واكلين ... وللعجوة ساجدين ... وللنوى لابسين ... ولمصر بلدكم خاربين ... وليلكم نهاركم عايشين فى ...
هلفطة .. سفسطة ... شلفطة...
 مرمطة .. رطرطة ... شقلطة ...
هرطقة .. منطقة .. طقطقة ...
مرقعة .. فرقعة ... لعلعة....
معجنة .. سهتنه .. مسكنه ...
مبوسة ... فلحسة ... ملحسة ...
شنخرة ... منخرة ... مسخرة ...
مغنجة ... بلطجة ... عربجة ...

الأربعاء، 11 يوليو، 2012

قولت محدش صدقنى 2



الجزمة هيه الحل

عندنا بيت فى الفلاحين ... مش عارف احنا بنيناه ليه من اصله ... يمكن علشان الحلم العبيط بتاع الارض والطين والجذور ... يمكن علشان الخوف من الزفة بتاعة شوفوا طوله وعرضة يا ولاد ... عواد باع ارضة ياولاد .... يمكن علشان بنيناة بالطوب الاحمر فى الوقت اللى كان كل البيوت بالطوب النى ... يعنى شوية عواجان على زهو على تفاخر ... المهم انه اتبنى وخلاص ... البيت ده مابنرحهوش غير مرة او مرتين فى السنه علشان ناخد ايجار الارض اللى برضة ما اعرفش احنا اشتريناها ليه ؟ مع ان ولا واحد فينا يقدر يفرق بين البرسيم والملوخية .... القصد ... تعبنا من الفيران اللى بتقرقض البيبان والعفش ... مش نافع معاها لا سم ولا مصيدة ولا لزق ... فقررت انى ادرس سلوك الفيران واتعامل معاهم من وجهة نظر نفسية ... بحكم التوجهات والدراسات ... لقيت ان الفيران طول عمرها فى الجحور ... مخنوقة محبوسة مذلولة ..ولما بتطلع على وش الارض ... الف من يمسك لها الشبشب والجزمة والعصايه ... دا غير الحقيقة العلمية اللى بتقول ان سنان الفيران اللى قدام بتطول مع الوقت فلازم يقرقضوا حاجة علشان لو طولت زيادة عن اللزوم ماتعرفش تاكل ... فقولت انا اتصالح مع الفيران ... احط لهم الاكل واجيب لهم خشبة يقرقضوا فيها ... ويانحله لاتقرصينى ولا عايز عسل منك ..ونفذت الكلام ... وشوية ولقيت الاكل اتاكل ... والخشبة اتقرقضت ... وبرضة قرقضوا البيبان والعفش ... وياريت على قد كدة ... دول جابوا القرايب والصحاب واتلموا حوالين البيت وعملوا مظاهرات ...واحتلوا الميدان... وان كان عاجبك يا اهبل يابتاع علم النفس ... ولانى صاحب قرارى ... ولانى بدافع عن بيتى وارضى وبيبانى وعفشى .... اعلنت الحرب من جديد ... عصيان وشباشب ومصيدة ولزق واحدث جهاز بيعلونوا عنه فى التليفزيون بيشتغل بالموجات الصوتية .... بصراحة تعبت علشان اتخلص منهم ...... بس اتعلمت ... اتعلمت ان الفار اللى عايش طول عمرة فى الجحر ماينفعش معاه تعديل سلوك وشوية الفرم بتاع فرويد وسكنر وبافلوف والعالم دى  .... صدقونى اتعلمت ان الجزمة هية الحل مع الفئران المقرقضون.

الثلاثاء، 10 يوليو، 2012

قولت محدش صدقنى



نص الخطاب الاول لرئيس
ايها الاخوان والاخوات :
اعاهد الله العلى العظيم على التمسك بالبرنامج والجهاد فى سبيل تحقيقة والقيام بشرائطة .. والثقة التامة فى القيادات الحديثة ... والسمع والطاعة لمطالب الاخوان والاخوات فى المنشط والمكره... واقسم بالله العظيم على ذلك وابايع عليه والله على ما اقول وكيل .
                          ( الهتيفة : الله اكبر ولله الحمد )
ايها الاخوان والاخوات :
 اننا نرسى دولة القانون ... لذلك سوف احلف اليمين امام الدستورية العليا ... ولاننى ثائر منكم سوف انزل الميدان لاطالب مع اخوانى بالغاء المكمل ... احنا فى ثورة والثورة مكمله .
                          ( الهتيفة : الله اكبر ولله الحمد )
ايها الاخوان والاخوات :
اننى رئيس لكل الشعب ... لكل الشعب... ولذلك سوف استقيل من رئاسة حزب الذل والندامة  ... ولكنى كمواطن له الحق فى ان ينتمى الى حزب ... فاننى لن استقيل من حزب الذل والندامة  .
                          ( الهتيفة : الله اكبر ولله الحمد )

ايها الاخوان والاخوات :
اننى اتعهد بالحفاظ على كافة المعاهدات التى وقعت عليها الجمهورية ... وخاصة معسكر ديفيد .... كما اتعهد بمراجعة بنود معاهدة معسكر ديفيد.. كما اتعهد باعادة العلاقات مع تيران لاحداث توازن استراتيجى فى المنطقة. .
                          ( الهتيفة : الله اكبر ولله الحمد )
ايهاالاخوات :
انا عايز كل واحده فيكوا تطمن خالص ... كل واحدة تلبس اللى هيه عيزاه ... براحتها خالص .. تلبس بنى ... تلبس كحلى .. ازرق .. اسود ... براحتك خالص ... علشان بيقولوا ان الرئيس  حيحجب الستات ... الرئيس مابيحجبش الستات ... عمر الرئيس ماقال ان الستات تتحجب ... دا ربنا اللى بيقول ومدام ربنا اللى بيقول يبقى لازم ننفذ كلام ربنا .
                          ( الهتيفة : الله اكبر ولله الحمد )
ايها الاخوان والاخوات :
اننا دولة مدنية دينية .... جمهورية ملكية...سنية شيعية ... واقتصادها رأسمالى اشتراكى ... ومرجعيها الازهر والمقطم ... ان حرية الرأى والتعبير والابداع مكفولة للجميع بمجرد استلام التصريح ... انى معكم وعليكم ... انى بكم وبدونكم ... اننى الرئيس لا كذب ... انى الرئيس .. انى الرئيس ... انى الشاطر ... انى بلوة سودا ....انى الرئيس يالا خافوا منى ... انى بلوه سودا .. انى الشاطر
والسلاموا عيكم ورحمة الله وبركاته .
                          ( الهتيفة : الله اكبر ولله الحمد )


الأحد، 8 يوليو، 2012

انهم يحنثون بالوعود

انهم يحنثون بالوعود

انهم كاذبون .... انهم خائنون ... وفى خصامهم فاجرون ... انهم بالعهود يحنثون .... وللغايه يهرولون .... وبالوسيله يبررون ....وباعتقالاتهم يتاجرون .. انهم وراء الدين يتسترون .....من الدول العربية يمولون ....وعلى السلطة يركبون ... وللزيت والمكرونة يبيعون ... وللانبوبه يوصلون ... وللشعب هم خادعون .... انهم ليسوا اخوان .... والله اعلم بكونهم مسلمون ..